ভারতকী প্রধানমন্ত্রী

গুজরাতকী মুখ্য মন্ত্রী, শ্রীমান ভুপেন্দ্র ভাই পতেল, সি.আর.পতেল, গুজরাত সরকারগী মন্ত্রীশিং, পি.এম.আৱাস য়োজনাগী বেনিফিসরী ওইরিবা ইমুং-মনুংশিং, অতোপ্পা অঙম-অথৌশিং অমসুং গুজরাতকী নুংশিজরবা ইচে-ইচল, ইচিল-ইনাওশিং,

ঙসি মশাগী য়ুমদা চংখিবা গুজরাতকী ঐগী ইচে-ইচল, ইচিল-ইনাও লিশিং কয়া অমগা লোইননা ঐহাক্না ভুপেন্দ্র ভাই অমসুং মহাক্কী তীমবুসু নুংঙাইবা ফোংদোক্লি। হৌজিক খুঙ্গং অমসুং সহরগা মরি লৈনবা করোর লিশিং কয়া অমগী প্রোজেক্তশিংগী উরেপ-উয়ুং তম্বা অমসুং শঙ্গাবগী খুদোংচাবা ফংজরে। মসিদা লাইরবশিংগী য়ুম য়াওরি, ঈশিংগী প্রোজেক্তশিং য়াওরি, সহর চাউখৎপগীদমক্তা তঙাইফদবা প্রোজেক্তশিং য়াওরি, ইন্দস্ত্রিয়েল দেবেলপমেন্তকা মরি লৈনবা প্রোজেক্ত খরা অমসু য়াওরি। ঐহাক্না বেনিফিসরী কুদিংমকপু, মরু ওইনা ঙসি মশাগী য়ুম ফংলবা ইচে-ইচলশিং, ঐহাক্না ময়াম পুম্নমকপু অমুক্কসু হন্না য়াম্না নুংঙাইবা ফোংদোক্লি।

ভাজপাগীদমক্তা লৈবাক চাউখৎপা হায়বসি কনভিক্সননি, কমিৎমেন্তনি। ঐখোয়গী ওইনদি লৈবাক শেম্বা হায়বসি লেপ্তনা চত্থবআ মহায়গ্য অমনি। হৌজিক গুজরাত্তা অমুক হন্না বি.জে.পি. সরকার শেম্বা অসি থা খরা খক্তা মঙাইরি, অদুবু চাউখৎ-থৌরাংগী খোংজেল অসি উরগা ঐহাক্না য়াম্না নুংঙাইবা ফাওই, অপেনবা ফাওই।

হন্দক্তা লাইরবশিংগী য়াইফ-থৌরাংগীমদক্তা গুজরাত্তা লুপা করোর ৩গী বজেত পুথোকরকখ্রে। অমরোমদা গুজরাতনা লুচিংদুনা ময়ামদগী তোল্ল-তারবশিংবু অখন্নবা মিৎয়েং থমদুনা ৱারেপ কয়া অমা লৌখি। হৌখিবা থা খরদা গুজরাতকী বেনিফিসরী লাখ ২৫ রোম অয়ুশমান কার্দ খুৎশিন্নখ্রে। গুজরাতকী মীরোল্লবী নুপী চাউরাক্না লাখ ২ রোম প্রধান মন্ত্রী মাত্রু ৱন্দনা য়োজনাদগী মতেং ফংখি।

মসিগী মনুংদা, গুজরাত্তা অনৌবা মেদিকেল কোলেজ ৪ হাংদোকখ্রে। অনৌবা সরকার শেম্লবা মতুংদা গুজরাত্তা মতম অসিগী অনৌবা ইনফ্রাস্ত্রকচরগীদমক্তা লুপা করোর লিশিং কবা অমগী থবক হৌখ্রে। মসিদগী গুজরাতকী নহা লিশিং কয়াগীদমক্তা থবক্কী অনৌবা খুদোংচাবা অমা পীরগনি। মসিনা তাক্লিবসি গুজরাতকী দবল ইঞ্জিন সরকারনা শরুক অনি হেন্না য়াংনা থবক তৌরি হায়বনি।

মরুপশিং,

হৌখিবা চহি ৯দা লৈবাক শিনবা থুংনা ঙক্নিংঙাই ওইবা মওংদা অহোংবা কয়া অমা লাক্লি, ঙসিদি মদু লৈবাকমচা খুদিংমক্না থেংনরি। মতম অমদা হিংবদা তঙাইফদনা মথৌ তাবা ফেসিলিতীশিংগীদমক্তা মীয়াম্না খৌরাংনা ঙাইরম্মি। চহি কয়া অমা ঙাইরবা মতুংদা অৱাৎপা অসিবু মীয়াম্না মখোয়গী লাইবক্তা তম্লম্লবনি খনখি। মীপুম খুদিংমক্না মসিবু মখোয়গী লাইবক্তা অসুম্না পুন্সি লেল্লো হায়না তম্লম্লবনি খনখি, হৌজিক্তি অঙাংশিং চাউরগা তৌগদবা ওইরগদি তৌজরকঅনি, অসুম্না নুংঙাইতবা ফাওখি, মী অনম্বনা পিদৎ-পাদৎলবা খাংপোকশঙ অসিদা পোক্লকপা মীদি মহাক্কী মতুংদা লাকপা মীরোলশিংসু পিদৎ-পাদৎপা খাংপোকশঙদা অদুমক মখোয়গী পুন্সি অদু অদুমক লেল্লগনি হায়না খনখি। মসিগী অৱাবা নুংঙাইতবা অসিদগী হৌজিক্তি লৈবাক অসি মপান থোরকখ্রে।

ঙসিদি ঐখোয়গী সরকারনা অৱাৎপা পুম্বা কোকহন্দুনা লাইরবশিং খুদিংমক্তা মশামক য়ৌশিন্নবা থবক তৌরি। ঐখোয়নআ য়োজনাশিংগী চাদা চামা সেচুরেশন পুরক্নবা হোৎনরি। হায়বদি য়োজনা অমগী লৈরিবা বেনিফিসরী খুদিংমক্তা সরকার মশামক চৎলি। সরকারগী অসিগুম্বা এপ্রোচ অসিনা য়াম্না চাউনা করপশন মুত্থৎখি, খেৎনবা মুত্থৎখি। বেনিফিসরিশিংদা য়ৌনবা ঐখোয়গী সরকার অসিনা ধর্ম অমসুং জাতিগী খেৎনবা য়েংদে। অমসুং নহাক্না খুঙ্গং অমদা মী ৫০ ফংগদবা ওইরবদি মী ৫০ মক্তা অদুমক ফংঙি, মখোয় অদু অৱাং-অনেম, জাত-বিজাতকী খেন্নবা অমত্তা লৈতনা মীপুম খুদিংমক্তা লোইনা ফংঙি।

ঐগী ৱাখলদা খেৎনবা অমত্তা লৈতবা মফম অদুবু অশেংবা সেকুলারিজম্নি হায়না লৌই। সোসিয়েল জস্তিসকী মতাংদা ৱারি শারিবা মীশিং, নখোয়না মীয়ামগী নুংঙাইনবগীদমক্তা থবক তৌবা মতমদা, মীয়ামগী খুদোংচানবগীদমক্তা থবক তৌবা মতমদা, মীপুম খুদিংমকপু মশাগী হক ফংহন্নবগীদমক্তা চাদা চামা থবক তৌরবদি মদুদগী হেনবা সোসিয়েল জস্তিস অমত্তা লৈতে হায়না ঐহাক্না লৌই। অমসুং ঐখোয় পুম্নমক্না খঙই মদুদি লাইরবশিংনা মখোয়গী পুন্সিদা তঙাইফদনা মথৌতাবশিং, মখোয়গী অৱাবশিং হন্থবা মতমদা মখোয়দা মশানা-মশাবু থাজবা অদু হেনগৎলকই।

ঙৈহাক্কী মমাংদা চাউরাক্না ইমুং লিশিং ৪০, লিশিং ৩৮ রোম্না মশাগী চেক্কী য়ুম ফংখ্রে। মসিদশু চাউরাক্না য়ুম লিশিং ৩২ রোম হৌখিবা নুমিৎ ১০০গী মনুংদা শেমদুনা লোইশিনখি। মসিগী মনুংদা তোঙান-তোঙানবা বেনিফিসরীগা হৌজিক ঐহাক্না ৱারি শাবগী খুদোংচাবা ফংলি। অমসুং মখোয়গী ৱা অদু তারগা নখোয়নসু ফাওরমগনি মদুদি মসিগী য়ুমশিং অসিনা মরম ওইরগা মখোয়গী মশানা-মশাবু থাজবা কয়া য়াম্না লৈখি অমসুং ইমুং অমমম্না অসুক য়াম্না থাজবা অসি পোক্লক্লবদি খুনাই অসিগীদমক্তা কয়াদা চাউবা শক্তি ওইরগনি। লাইরবশিংগী থমোইদা মশানা মশাবু থাজবা ফাওরকপা অমসুং মখোয়না মসি মখোয়গী হক্নি অমসুং মসিদা খুনাই অসিনা ঐখোয়বু মতেং পাংলি অমসুং মসিনা য়াম্না চাউবা পাঙ্গল অমা ওইগনি।

মরুপশিং,

অরিবা পোলিসীগী তুং ইন্দুনা, মাইপাক্ত্রবা পোলিসীদা চত্তুনা লৈবাক অসিগী লাইবক হোংবা ঙম্লোই অমসুং লৈবাক অসিবু মাইপাকপা পুরকপা ঙম্লোই:ল হান্নগী সরকারনা করম্বা এপ্রোচতা থবক তৌরম্লিবনো, ঙসি ঐখোয়না করম্বা ৱাখল্লোনদা থবক তৌরিবনো হায়বদু খঙদোকপা হায়বসি য়াম্না মরু ওই। লাইরবশিংগীদমক্তা য়ুম পীনবগী য়োজনা কয়া অমা ঐখোয়গী লৈবাক অসিদা চহি কয়াদগী পাইখত্তুনা লাকখি। অদুবু চহি ১০-১২গী মমাংদা লৈরিবা মশিং অসিনা তাক্লিবসি ঐখোয়গী খুঙ্গংশিংগী চাদা ৭৫দি মখোয়গী ময়ুমদা তোইলেত নিংথিনা লৈতবা য়ুম ওইনা তৌরম্মি।

লাইরবশিংগী য়ুমগী তৌরম্বা য়োজনাশিং অদুদসু মসিগী মতাংদা মিৎয়েং চংখিদে। য়ুম হায়বসি কুপ্নবগী খক্তমক নত্তে, মী লৈশিন্নবখক্কী নত্তে। য়ুম হায়বসি ঐখোয়না নিংজবা মফম্নি, মসিদা মঙলান শাগৎলি, মসিদা ইমুং অমগী হৌজিক অমসুং তুংগী পুন্সি লেপকদবা মফম্নি। মরম অদুনা ২০১৪গী মতুংদা ঐখোয়না লাইরবশিংগী য়ুমবু চেকনা কুপ্পা য়ুম খক্তমক ওইহন্দে। মসিবু ঐখোয়না লাইরবগা লান্থেংনবগীঅচেৎপা য়ুমফম অমা ওইনা ওইহনখি, লাইরবশিংবু চাউখৎহন্নবা, মখোয়বু ইজৎ লৈনা হিংনবগী পাম্বৈ অঞা ওইহনখি।

ঙসি সরকারগী মহুত্তা বেনিফিসরীশিং মশামক্না পি.এম. আৱাস য়োজনাগী মতুং ইন্না মখোয়গী য়ুম অদু করম্না শাগনি হায়বদু লেপ্পি। মসি দিল্লী লেপ্পা ৱাফম নত্তে, দান্ধিনাগরদগী লেপ্পা ৱাফম নত্তে, মশানা লেপ্পা ৱাফম্নি। সরকারনা মশাগী বেঙ্ক একাউন্ততা শেল হাপচিল্লি। য়ুম শারি, হায়বা অসিগী খুদম ওইনবা ঐখোয়না তোঙান-তোঙানবা স্তেজদা য়ুম অদুগী জিয়ো তেগ্গিং তৌই। নখোয়নসু খঙই মদুদি মসি হান্নদি অসুম্না তৌরমদে। বেনিফিসরী ফাওবা য়ৌহন্দ্রিঙৈগী মমাংদা য়ুমগী শেল অদু করপশনদা দান তৌখি। শাবা য়ুম অদুসু লৈবা য়াবা য়ুম ওইখিদে।

ইচে-ইচলশিং অমসুং ইচিল-ইনাওশিং,

প্রধান মন্ত্রী আৱাস য়োজনাগী মতুং ইন্না শারিবা য়ুমশিং অদু য়োজনা অমখক্তদা লোইবা নত্তে, মসি য়োজনা কয়া অমগী অপুনবা পেকেজনি। মসিদা স্বচছ ভারত অভিয়ানগী মনুং চন্না শাবা তোইলেত য়াওরি। মসিদা শৌভাগ্য য়োজনাগী মখাদা মৈগী কেনক্সন ফংহল্লি। মসিদা উজ্বালা য়োজনাগী মখাদা এল.পি.জি. গ্যাসকী কনেক্সন লেম্না পীরি। মসিদা জল জিৱন অভিয়ানগী মখাদা তোতিদগী ঈশিং ফংহল্লি।

হান্নদি মসিগী খুদোংচাবশিং অসি ফংনবা লাইরবশিংনা সরকারগী ওফিসশিংদা য়াম্না তোইনা লাকপা তারম্মি। অমসুং ঙসিদি লাইরবশিংনা মসিগী খুদোংচাবশিং অসিগা লোইননা লেম্না রেশন অমসুং লেম্না লায়েংবগী খুদোংচাবা ফংলি। নখোয়না খন্দুনা য়েংঊ মসিনা লাইরবশিংদা কয়াদা চাউনা মতেং পাংলি।

মরুপশিং,

পি.এম.আৱাস য়োজনানা লাইরবশিংগা লোইন-লোইননা নুপী ওইবীশিংগী চাউখৎ-থৌরাংবুশু য়াম্না চাউনা মতেং পাংলি। হৌখিবা চহি ৯দা চাউরাক্না চেক্না শাবা য়ুম করোর ৪ লাইরবা ইমুংশিংদা ফংহনখ্রে। হায়রিবা য়ুমশিং অসিদা চাউরাক্না চাদা ৭০দি নুপী বেনিফিসরীশিংগী মমিংদশু লৈ। হায়রিবা ইচন্নুপী করোর কয়া অসিনা অহানবা ওইনা করিগুম্বা মরল অমা মখোয়গী মমিংদা রেজিস্তর তৌখি। ঐখোয়গী শিদদি, ঐখোয়গী লৈবাক অসিদদি, গুজরাত্তসু খঙই মদুদি য়ুম ওইরবদি নুপাগী মমিংদা লৈ, গারি ওইরবদি নুপাগী মমিংদা লৈ, লৌ ওইরবদি নুপাগী মমিংদা লৈ, স্কুতর ওইরবসু মদু নুপাগি মমিংদা অদুমক লৈ অমসুং মপুরোইবগী মমিংদা লৈ, মপুরোইবা লৈত্রগনা মচানুপীগী মিংদা লৈ, মমাগী মিংদা, নুপীগী মিংদা করিমত্তা লৈতেত। মোদী মসিগী ফিভম অসিবু হোংদোকখ্রে অমসুং হৌজিক্তি ইমা-ইবেল, ইচেল-ইচলশিংগী মিংদা সরকারগী য়োজনাগী খুদোংচাবা লৈরিবশিং অসিদা ইমাশিংগী হাপ্পা মথৌ তারে নত্রগা ইমা ক্তমক মদুগী হক পীখ্রে।

পি.এম. আৱাস য়োজনাগী মতেংদগী শাবা য়ুমগী মমল অসি হৌজিক লিশিং মঙা-য়াংখৈদা শাবা নত্তে, মসিদা লাখ ১.৫০দগীনা ১.৭৫ ফাওবা চংনা শাই। মসিনা তাকপদি প্রধান মন্ত্রী আৱাস য়োজনা মখাদা শাখিবা য়ুমশিং অসিদা লৈখিবা মীশিং অদুগী য়ুমশিং অদুগী মমল অদু লাখতনি অমসুং লাখ কয়াগী য়ুম অমগী মপু ওইরে, মসিনা তাক্লিবসি নুপী করোর কয়া অমা লাখপতি ওইখ্রে হায়বনি, অমসুং মরম অসিনা ঐহাক্কী লাখপতি ওইরবা ইচে-ইচলশিং অসিনা ঐহাকপু মখোয়গীদমক্তা থবক হেন্না তৌবা ঙম্নবা থৌজাল পীনবীরি।

মরুপশিং,

লৈবাক অসিদা অর্বানাইজেশন হেনগৎলকপা অসি য়েংলগা বি.জে.পি সরকারনা তুংদা লাক্কদবা শিংনবশিং অদুবু খল্লগা থবক তৌরি। ঐখোয়না রাজকোত্তা মতম অসিগী অনৌবা তেক্নোলোজী শিজিন্নদুনা য়ুম লিশিং অমা হেন্না শাখি। হায়রিবা য়ুমশিং অসি শেল য়াম্না চংদনা অমসুং অতেনবা মতমগী মনুংদা শেম্বা লোইশিনখি অমসুং অদুগী মতিকশু চেকশিল্লি। লাইত হাউস প্রোজেক্তকী মখাদা ঐখোয়না লৈবাক অসিগী সহর ৬তা মসি শিজিন্নখি। অসিগুম্বা তেক্নোলোজী অসিগী মতেংদগী লাক্কদবা মতমশিংদা য়াম্না হোংবা অমসুং মতম অসিগী অনৌবা য়ুম লাইরবশিংদা ফংহল্লগনি।

মরুপশিং,

ঐখোয়গী সরকারনা য়ুমশিংগা মরি লৈনবা শিংনবা অমশু কোহনখ্রে। হান্নদি রিয়ল এস্তেত সেক্তরদা অআপম্বদা তৌরম্মি, নমথাক তৌবগী ৱাকৎ কয়া লাক্লম্মি। ময়াই ওইরপ তৌবা ইমুংশিংবু সেক্যুরিতী পীনবা আইন অমদা লৈরমদে। অমসুং অচৌ-অচৌবা বিল্দরশিংনা পুরকপা স্কীমশিং অদুদা য়াম্না ফজ-ফজরবা ফোতোশিং হাপ্লম্মি, য়ুমদশু মসিগী য়ুম অসি লৌনবা হায়দুনা লেপ্লম্মি। অমসুং য়ুম পীবা মতমদদি অতোপ্পা ওইনা পীরম্মি। অইবনা অমা, পীবনা অতোপ্পা অমা।

ঐখোয়না রেরা লো অমা শেমখি। মসিদা মিদল ক্লাসকী ইমুংশিংবু আইনগী ওইবা সেক্যুরিতী পীখ্রে। অমসুং শেল পীবা মতমদা উৎপা দিজাইন অদুমক য়ুম শাবশিং অদুনা মদুগা চপ মান্ননা শাদুনা পীবা হায়বসি কমপলসরী ওই, অদু নত্রবদি জেলদা থাজিনবগী ওর্দর লৈ। অসিখক্তা নত্তে, ঐখোয়না মিদল ক্লাসকী ইমুংশিংবুশু য়ুম শাবগীদমক্তা নিংখা তম্লবা মতুংদা অহানবা ওইনা মিদল ক্লাসকী বেঙ্ক লোনগা লোইন-লোইননা মদুদা থিগদবা শেন্দোইগী মতাংদা মতেং পাংনবগী এরঞ্জমেন্তশু তৌখি।

গুজরাতনা মসিগী মফমশিং অসিদশু য়াম্না ফজনা থবক তৌখি। গুজরাত্তা ময়াই ওইরপ তৌবা ইমুং লাখ ৫দা করোর লিশিং ১১গী তেংবাং পীদুনা সরকারনা মকোয়গী পুন্সিগী মঙলান অদুবু মঙফাওনহনখি।

মরুপশিং,

ঙসি ঐখোয় ময়াম পুন্দুনা আজাদি কা অমৃতকাল অসিদা চাউখৎপা ভারত অমা শেমগৎনবা হোৎনরি। মসিগী চহি ২৫ অসিদা ঐখোয়গী সহরশিং মরু ওইনা তিয়র-২, তিয়র-৩ সহরনা ঐখোয়গী শেনমিৎলোনবু চাউখৎহল্লগনি। গুজরাত্তশু অসিগুম্বা সহর কয়া অমা লৈ। হায়রিবা সহরশিং অসিগী সীস্তেমশিং অদু তুংদা থেংনগদবা শিংনবশিং অদুবু য়েংলগা শেমগৎলি। লৈবাক অসিগী সহর ৫০০দা বেসিক ফেসিলিতীশিং অদু অমৃত মিসনগী মনুং চন্না অহোংবা পুরক্লি। লৈবাক অসিগী সহর ১০০দা শেমগৎলিবা স্মার্ত ফেসিলিতীশিং অদুবুশু মতম অসিগী অনৌবা মওংদা ওন্থোক্লি।

মরুপশিং,

ঙসি ঐখোয়না অর্বান প্লানিংদা ইজ ওফ লিবিং অমসুং ক্বাইলিতী ওফ লাইফ, অনিমক্তা চপ মান্ননা মিৎয়েং থম্লি। মীশিংনা মফম অমদগী মফম অমদা চৎপা মতমদা মতম য়াম্না চংদনবা হায়দুনা ঐখোয়না য়াম্না কন্না হোৎনরি। ঙসি লৈবাক অসিদা মসিগী ৱাখল্লোন অসিগা লোইননা মেত্রো নেতৱার্ক পাক শন্না শন্দোরক্লি। চহি ২০১৪ ফাওবদা লৈবাক অসিদা মেত্রো নেতৱার্ক কিলোমিতর ২৫০দগীশু তানা লৈরম্মি। হায়বদি চহি ৪০দা কিলোমিতর ২৫০গী মেত্রো রুত ফাওবা শেম্বা ঙম্লমদে। অদুবু হৌখিবা চহি ৯ অসিদা অনৌবা মেত্রো রুত কিলোমিতর ৬০০ শেমখি, মসিদআ মেত্রো চেনবশু হৌখ্রে।

ঙসি লৈবাক অসিদা স্র ২০দা মেত্রো চেল্লি। ঙসি নখোয়না য়েংবীয়ু, এহমদাবাদগুম্বা সহরশিংদা মেত্রো লাকপনা মরম ওইরগা পব্লিক ত্রান্সপোর্ত কয়াদা নুংঙাইহল্লবা । স্রশিংগী অকোইবদা লৈরিবা মফমশিংদা মতম অসিগী অনৌবা অমসুং য়াম্না য়াংবা কেনেক্তিবিতীগা লোইননা শম্নহনবা মতমদা মরু ওইবা সহরশিংদা প্রেসর হন্থরগনি। এহমদাবাদ-গান্ধিনাগরগুম্বা ত্বিন সিতী অসি ঙসিদি ৱন্দে ভারত এক্সপ্রেসগুম্বা ত্রেনশিংগী খুত্থাংদা শম্নহল্লি। অসুম্না গুজরাতকী তোঙান-তোঙানবা সহরশিংদা ইলেক্ত্রিক বসশিংশু য়াম্না য়াংনা মশিং হেনগৎলক্লি।

মরুপশিং,

লাইরবা ওইগেরা নত্রগা ময়াই ওইরপ তৌবা ওইগেরা, ঐখোয়গী সহরশিংদা ক্বালিতী ওফ লাইফ অসি তরু-তনানবা অকোইবগী ফিভম লৈবা, অশেংবা নুংশিৎ  ফংবা মতমদতা ওইথোক্কনি। মসিগীদমক্তা লৈবাক অসিদা মিসন মোদতা থবক পাইখৎলি। ঐখোয়গী লৈবাক অসিদা নুমিৎ খুদিংগী অমোৎ-অকাই তন কয়া অমা থোরক্লি। অহানবদা মসিগী মতাংদা লৈবাক অসিদা নুংনাংবা করিমত্তা ফাওরমদে। হৌখিবা চহিশিংদা ঐখোয়না ৱেস্ত মেনেজমেন্ততা অহেনবা মিৎয়েং থমখি। ২০১৪দা লৈবাক অসিদা ৱেস্ত প্রোসেসিং শুপ্নতগী চাদা ১৪-১৫ খক্তমক তৌখি, অদুবু হৌজিক্তি চাদা ৭৫দি ৱেস্ত প্রোসেসিং তৌরে। করিগুম্বা মসি হান্ন মাংজৌননা তৌরম্বা তারবদি ঐখোয়গী সহরশিংদা ঙসি অমোৎ-অকাই, ফত্তা-হাওদিগী চিংজাও কয়া পৈরিবসি পৈরম্লোই। হৌজিক্তি কেন্দ্র সরকারনা অসিগুম্বা ফত্তা-হাওদিগী চিংজাওশিং অসি মুত্থৎনবগীদমক্তশু মিসন মোদতা থবক তৌরক্লি।

মরুপশিং,

গুজরাতনা লৈবাক অসিবু ৱাতর মেনেজমেন্ত অমসুং ৱাতর সপ্লাই গ্রিদকী য়াম্না ফবা মোদেল অমা খুদোল তমখ্রে। কনাগুম্বা অমনা কিলোমিতর লিশিং ৩ শাংবা মেন পাইপলাইন অমসুং কিলোমিতর লাখ ১.২৫দগী হেনবা দিস্ত্রিব্যুশন লাইনশিংগী মতাংদা তাবা মতমদা মহাক্না অসুক চাউবা থবক অসিবু হায়দুনা য়াম্না লাইনা থাজবা ঙমদে। অদুবু মসিগী য়াম্না চাউরবা থবক অসি গুজরাতকী মীয়াম্না তৌদুনা উৎলরে। মসিদগী চাউরাক্না খুঙ্গং লিশিং ১৫ অমসুং সহর ২৫০গী মফমশিংদা থক্নবা অশেংবা ঈশিং য়ৌহল্লি।  অসিগুম্বা ফেসিলিতীশিং অসিদগীশু গুজরাত্তা লাইরবা ওইগেরা নত্রগা ময়াই ওইবা কাংলুপশিং পুম্নমক্কী পুন্সি য়াম্না লাইহল্লরে। গুজরাতকী প্রজানা অমৃত সারোৱর শাবদা মখোয়না লৌখিবা থৌদাং অদুসু য়াম্না থাগৎনিংঙাইনি।

মরুপশিং,

চাউখৎ-থৌরাংগী খোজেল অসিবু ঐখোয়না মখাতানা অদুমক লেংদনা লৈহনগদবনি। ময়াম পুন্না হোৎনবনা অমৃত কালগী ঐখোয়গী ফিরেপ পুম্বা মাইপাকপা ঙমগদৌরিবনি। অরোইবদা ঐহাক্না নখোয় ময়াম্বু অমুক হন্না চাউখৎ-থৌরাংগী থবকশিং অসিগীদমক্তা হন্না-হন্না নুংঙাইবা ফোংদোক্লি। মশাগী মঙলান মঙফাওনরবা, য়ুম ফংলবা ইমুংশিং, হৌজিক্তি অনৌবা ফিরেপ অমগা লোইননা ইমুং-মনুংশিংবু মাংলোমদা পুখৎনবগী থৌনা অদু পুথোক্লো। চাউখৎ-থৌরাংগী ওইথোকপা য়াবশিং অসি মপাল নাইবা নত্তে, নখোয়গীসু মসিদা শরুক য়াওরিবনি অমসুং ঐখোয়না পাম্বশুনি, লাক্লো ময়াম পুন্দুনা ভারতপু হেন্না খোংজেল য়াংনা চাউখৎহল্লসি। গুজরাতপু হেন্না নুংঙাই-য়াইফবগী মাইকৈ তম্না পুখৎলসি। মসিগী ৱাখল্লোনশিং অসিগা লোইননা নখোয় ময়াম্বু হন্না-হন্না থাগৎচরি!

*****