ভারতকী প্রধানমন্ত্রী

জয় স্বামীনারায়ন।

হিস হোলিনেস গুরু হরি মহন্ত স্বামী মহারাজ, ইকাই খুম্নরবা সন্তশিং, সতসঙ্গী ইমুংগী মীওই পুম্নমক, অতৈ দিগনিতরীশিং, অমসুং অচৌবা স্তেদিয়ম অসিদা তিল্লিবা নুপী অমসুং নুপাশিং।

কার্য়কর সুভর্ন মহোৎসবকী থৌরম অসিদা ঐহাক্না ভগবান স্বামী নারায়নগী মফমদা ইকায় খুম্নবা উৎচরি। ঙসি অসি প্রামুখ স্বামী মহারাজকী 103শুবা মপোক কুমওনসুনি। ঐহাক্না ঈশ্বর গুরু হরিগী শকলোন ওইরিবা প্রমুখ স্বামী মহারাজকী মফমদসু ইকায় খুম্নবা উৎচরি। ভগবান স্বামী নারায়নগী পাউতাকশিং, প্রমুখ স্বামী মহারাজগী ৱারেপশিং…অসি ঙসি পরম পুজ্য গুরু হরি মহন্ত স্বামী মহারাজগী কন্না হোৎনজবা অমসুং কত্থোকপগা লোয়ননা মহৈ ফংলি। অসিগুম্বা অচৌবা থৌরম অসি শিন্মী লাখ অমা, নহারোল অমসুং অঙাংশিংনা মরু, উ-পাম্বী অমসুং মহৈগী ৱাখল্লোন ফোঙদোক্লিবা কলচরেল প্রোগ্রাম অমনি… ঐহাক্না অদোমগী মরক্তা ইশামক্না শরুক য়াবা ঙমদ্রবসু, থৌরম অসিগী ইনর্জী অসি ঐহাক্কী থম্মোয়দগী ফাওই। ঐহাক্না পরম পুজ্য গুরু হরি মহন্ত স্বামী মহারাজ, মসিগী অচৌবা লাইগী থৌরম অসিগীদমক অৱাংবা থাক্তা থাগৎপা ফোংদোকচরি। ঐহাক্না অৱাংবা থাক্তা ইকায় খুম্নবা উৎচরি।

মরুপশিং,

কার্য়কর সুভর্ন মহোৎসব অসি চহি 50গী সর্ভিসকী খোঙচৎ অসিদা মরুওইবা মাইলস্তোন অমনি। চহি 50গী মমাংদা, ভোলুন্তিয়রশিং রেজিস্তর তৌবগী থৌওং অমসুং মখোয়বু সর্ভিসকী থবকশিংগা শম্নহন্নবগী থৌওং হৌখি। মতম অদুদা, কনাগুম্বা অমত্তনা শিন্মীশিংবু রেজিস্তর তৌবগী ৱাখল্লোন ফাওবা লৈরমদে। ঙসিদি, BAPS শিন্মী লাখ কয়ানা মপুং ফানা থাজবা অমসুং কত্থোকপগা লোয়ননা সর্ভিসকী থবকশিংদা শরুক য়াবা উবদা য়াম্না নুংঙাইবা ফাওই। মসিনা ওর্গানাইজেসন অমহেক্তগী ওইনা অচৌবা মাই পাকপা অমনি। মসিগীদমক্তা ঐহাক্না অদোমবু থাগৎচরি অমসুং ঐহাক্কী য়াইফ-পাউজেল পীজরি।

মরুপশিং,

কার্য়কর সুভর্ন মহোৎসব অসি ভগবান স্বামী নারায়নগী মীওইবগী ওইবা তম্বীরোলগী থৌরম অমনি। মীওই মিলিয়ন কয়াগী পুন্সিদা অহোংবা পুরকখিবা চহি কয়াগী সেবাগী মগুন অদুনি। BAPSকী সর্ভিস কেম্পেনশিং অসি য়াম্না নক্না উবা ফংজবা অসি ঐহাক্কী নুংঙাইবা অমনি। ঐহাক্না মখোয়গা মরী লৈনবগী খুদোংচাবা ফংজখি। ভুজতা য়ুহার হাবনা থোকহনবা অমাং অতাগী ফীভম, নারনারায়ন নগরগী খুঙ্গং অমুক হন্না শেমগৎপা, কেরলাদা ঈশিং-ঈচাউ থোকপা, উত্তরাখন্দদা চীং নীংখাইবগী অৱাবা, কোরোনাগুম্বা মালেমগী ওইবা লাইচৎকী অৱাবা ওইরবসু… ঐখোয়গী কার্য়করগী মরুপশিংনা মফম খুদিংমক্তা ইমুংগী ওইবা ৱাখল্লোন অমগা লোয়ননা লেপ্লি, নুংশিবা পোক্তুনা মীপুম খুদিংমক্তা মতেং পাংলি। কোবিদকী মতম অসিদা BAPSকী লাইশঙশিং অসি করম্না সর্ভিস সেন্তরশিং ওইহনবগে হায়বসি মীপুম খুদিংমক্না উখ্রে।

ঙসি ঐহাক্না অতোপ্পা থৌদোক অমবু অমুক হন্না নিংশিংবা পাম্মি। মীশিংনা মসিগী মরমদা য়াম্না খঙদে। য়ুক্রেনদা লান হৌরকপা মতমদা, ভারত সরকারনা মফম অদুদা পন্দুনা লৈরম্বা ভারত মচাশিংবু থাদোক্নবা খুদক্তা ৱারেপ লৌখি। মসিগী মতুংদা, পোলেন্দদা ভারত মচা মশিং য়াম্না লাকপা হৌরকখি। অদুবু লানগী ফিভম অসিদা পোলেন্দ য়ৌরকখিবা ইন্দিয়নশিংদা মতৌ করম্না খ্বাইদগী হেন্না মতেং পাংগদগে হায়বসিদা অৱাবা অমা লৈখি। মতম অদুদা, ঐহাক্না BAPSকী লাইনিংবা অমগা ৱারী শানখি… অমসুং ঐহাক্না খনবদা ঐহাক্না ৱারী শানখিবা অদু অয়ুক্কী পুং 12 নৎত্রগা 1 অদু ওইরম্বনি। পোলেন্দ য়ৌরক্লিবা ভারত মচা মশীং য়াম্লবা অদুদা মতেং পাংনবা ঐহাক্না অদোমগী মতেং মথৌ তারে হায়না ঐহাক্না মঙোন্দা হায়জখি। অদোমগী ওর্গনাইজেসন্না য়ুরোপ শিনবা থুংবদগী BAPSগী শিন্মীশিংবু মতৌ করম্না নুমিদাং অমদগী নুমিদাং অমদা পুনশিনবগে হায়বদু ঐনা উখি। লানগী ফীভম অসিদা পোলেন্দ য়ৌরকখিবা মীওইশিংদা অদোম্না য়াম্না মতেং পাংখি। BAPSকী মপাঙ্গল অসি, মালেমগী থাক্তা মীওইবা খুন্নাইগী য়াইফনবগীদমক্তা অদোমগী থৌদাং অসি য়াম্না শিংথানীংঙাইনি। অমসুং মসিনা মরম ওইদুনা ঙসি, কার্য়কর সুভর্ন মহোৎসবতা, ঐহাক্না অদোম পুম্নমক্তা ঐহাক্কী থাগৎপা ফোংদোকচরি। ঙসিদি, BAPS ৱার্করশিংনা মালেম শীনবা থুংনা মখোয়গী সর্ভিসকী খুত্থাংদা মীওই মিল্লিয়ন কয়াগী পুন্সিদা অহোংবা পুরক্লি। মখোয়না মখোয়গী সর্ভিসকী খুত্থাংদা মীওই মিলিয়ন কয়াদা খুদোংচাবা পীরি, অমসুং খুন্নাইগী অরোইবা শরুক্তা লৈরিবা মীওইশিংদা শক্তি পীরি। মরম অদুনা অদোম্না ইথিল পীরি, অদোমবু থৌনিজরি, অদোমবু ইকাই খুম্নবা উৎলি।

মরুপশিং,

BAPSকী থবকশিংনা মালেম পুম্বদা ভারতকী শক্তি অমসুং ইথিল অদু মপাঙ্গল কনখৎহল্লি। মালেমগী লৈবাক 28দা লোর্দ স্বামী নারায়নগী লাইশঙ 18000, মালেম পুম্বদা স্পিরিচুএল সেন্তর লিশিং 21 হেনবা, তোঙান তোঙানবা সর্ভিস প্রোজেক্তশিংগী থবকশিং… মালেম অসিনা মসি উরকপা মতমদা, মসিনা ভারতকী স্পিরিচুএল হেরিতেজ, স্পিরিচুএল আইদেন্তিতী অদু উরি। মসিগী লাইশঙশিং অসি ভারতকী চৎনবীগী মশকশিংনি। মখোয়শিং অসি মালেমগী খ্বাইদগী লিরবা হিংদুনা লৈরিবা চৎনবীগী সেন্তরশিংনি। মীওই অমহেক্তনা মখোয়গা শম্নরকপা মতমদা, মহাক্না ভারতকী মায়কৈদা পুক্নিং চিংশিনবা ঙমদে। থা খরগী মমাংদা, আবু ধাবীদা লোর্দ স্বামী নারায়নগী লাইশঙ শঙ্গাখি। লাইবক ফবদি ঐহাকসু থৌরম অদুদা শরুক য়াখি। থৌরম অদু, লাইশং অদুগী মতাংদা মালেম পুম্বদা য়াম্না খন্ন-নৈনরি। মালেমনা ভারতকী স্পিরিচুএল হেরিতেজ, মালেমনা ভারতকী কলচরেল দাইভর্সিতী… অসিগুম্বা হোৎনরিবশিং অসিনা ভারতকী কলচরেল গ্লোরি অমসুং হ্যুমেন জেনরোসিতীগী মরমদা মালেমদা খঙহল্লি। অমসুং মসিগীদমক্তা, ঐহাক্না থবক তৌরিবা মরুপ-মপাং পুম্নমকপু থাগৎপা ফোংদোকচরি।

মরুপশিং,

অদোম পুম্নমক্কী অচৌবা ৱারেপশিং অসি লাইনা-লাইনা মপুং ফাহনবা অসি লোর্দ স্বামী নারায়ন, সাহাজানন্দ স্বামীগী পিনান্সকী মহৈনি। মহাক্না হিংলিবা মীওই খুদিংমক, অৱা-অনা নংলিবা মীওই খুদিংমকপু নুংশিখি। মহাক্কী পুন্সিগী তাঙ্কক খুদিংমক মীওইবগী য়াইফনবগীদমক কত্থোকখি। মহাক্না হৌদোকখিবা ভেল্যুশিং অদু ঙসিদি BAPSনা মালেমদা মঙাল অদু শন্দোক্লি। BAPSকী থবকশিং অসি ঈশৈ অমগী ৱাহৈ পরেং খরগী খুত্থাংদা শন্দোক্না তাকপা য়াই, অদোমসু তারম্বা য়াই, মসি য়ুমথোং খুদিংমক্তা শকলমগনি – তুরেলগী ঈশিংদি থকপীনু, উগী মশাগী উহৈ চাবীগনু, তুরেলগী ঈশিংদি থকপীনু, উগী মশাগী উহৈ চাবীগনু, মহাক্কী হকচাং, ৱাখল, লন অদু অতোপ্পদা দান তৌরিবা মীওই অদু অশেংবা মীওইবনি….পৃথিবী অসিগী ঈশ্বরনি।

মরুপশিং,

ঐহাক্না BAPS অমসুং ভগবান স্বামী নারায়নগা অঙাং ওইরিঙৈদগী মরী লৈনবগী খুদোংচাবা ফংখিবা অসি ঐহাক্কী নুংঙাইবা অমনি। প্রধান স্বামী মহারাজনা ঐঙোন্দা পীরম্বা মীনুংশিং অমসুং থৌজাল অসি ঐহাক্কী পুন্সিগী লননি। মহাক্কা লোয়ননা ঐহাক্কী পুন্সিগী মরুওইবা শরুক অমা ওইরকখিবা পর্সনেল ওইবা থৌদোক কয়া অমা লৈরি। ঐহাক পব্লিক লিফতা চংদ্রিঙৈদা, ঐহাক মুখ্য মন্ত্রী ওইদ্রিঙৈদা, অমসুং ঐহাক মুখ্য মন্ত্রী ওইরকপা মতমদা, প্রধান মন্ত্রী ওইরকপা মতমদা… মহাক্কী লমজিং-লমতাক অসি মতম পুম্নমক্তা লৈখি। নর্মদাগী ঈশিং সবরমতীদা লাকপা মতমদা… খ্বাইদগী শক্নাইরবা প্রামুখ স্বামীজী মশামক্না পুৱারী ওইরবা থৌরম অদুদা য়াইফ পাউজেল পীনবগীদমক লাকখি। চহি কয়াগী মমাংদা স্বামী নারায়ন মহামন্ত্র মহোৎসব অসি স্বামী জীগী লমজিং মখাদা পাংথোকখি। মথংগী চহিদা স্বামী নারায়ন মন্ত্র লেখন মহোৎসব পাংথোকখি। মতমদু ঐহাক্না কৈদৌঙৈদসু কাউথোক্লরোই। মন্ত্র ইবগী ৱাখল্লোন অসি মশামক্না শিংথানিংঙাইনি। ঐগীদমক্তা মহাক্কী থম্মোয়দা ফাওবরিবা নুংশিবা, মহাক্কী মচা অমগী নুংশিবা… মসি ৱাহৈদা ফোংদোকপা হায়বসি অরুবা অমনি। মীয়ামগী য়াইফনবা থবকশিংদা ঐহাক্না মতম পুম্নমক্তা প্রমুখ স্বামী মহারাজগী য়াইফ-মঙ্গোল ফংখি। ঙসি অসিগুম্লবা অচৌবা থৌরম অসিদা, ঐহাক্না প্রমুখ স্বামী মহারাজকী থৌরমশিং, মহাক্কী থবক তৌরিবা মীশক অমা ওইবগী স্পিরিচুএল ওইবা মওংদা লৈরম্বা অদু উবা ফংলি।

মরুপশিং,

ঐখোয়গী চৎনবীদা, সর্ভিস অসি খ্বাইদগী চাউবা ধর্ম্নি হায়না লৌনৈ। সেবা পরম ধর্ম: মসি ৱাহৈ খক্তা নত্তে, মসি ঐখোয়গী পুন্সিগী ভেল্যুশিংনি। ভক্তি, থাজবা অমসুং লাইনিংবদগী হেন্না সেবা তৌবদা হেন্না ৱাংবা মফম অমা পীরি। পব্লিক সর্ভিস হায়বসি মীয়ামগী সেবাগা মান্নৈ হায়নসু হায়নরি। সেবা অসিদি ইশাগী ওইবা ৱাখল্লোন লৈতবা অদুবুনি। নখোয়না মেদিকেল কেম্প অমদা অনাবশিংদা মতেং পাংলিঙৈদা, নখোয়না অৱাবা তারবা মীওই অমদা চানবা পীরিঙৈদা, নখোয়না অঙাং অমবু তাকপীরিঙৈদা, নখোয়না অতোপ্পশিংবু মতেং পাংবতা নত্তনা… মসিগী মতমসিদা নখোয়গী মনুংদগী অঙকপা অহোংবা অমা লাকই। মসিনা অদোমগী থাজবগী খোঙচৎতা লমজিং-লমতাক অমসুং থৌনা পী। অমসুং হায়রিবা সর্ভিস অসি শিন্মী লিশিং অমসুং লাখ কয়াগা লোয়ননা ইন্সতিত্যুসন অমগী মওংদা, মুভমেন্ত অমগী মওংদা ওর্গানাইজ তৌরবা মওংদা পাংথোকপা মতমদা…অদুবু অঙকপা মহৈশিং ফংই। অসিগুম্বা ইন্সতিত্যুস্নেল সর্বিস অসিনা খুন্নাই অমসুং লৈবাক অসিগী মরুওইবা প্রোব্লেমশিং কোকহন্নবগী মপাঙ্গল লৈ। মসিগী খুত্থাংদা ফত্তবা কয়া অমা মুত্থৎপা য়াই। অপুনবা পান্দম অমগীদমক থবক তৌরিবা মীওই লাখ কয়ানা লৈবাক অমসুং খুন্নাইগীদমক অচৌবা শক্তি অমা ওইরক্লি।

অমসুং মরম অদুনা, ঙসিদি, লৈবাক অসিনা চাউখৎলবা ভারত অমগী পান্দমগা লোয়ননা মাংলোমদা চংশিল্লিবা অসিদা ঐখোয়না মীয়ামগী পুন্না লাকপা অমসুং হীরম খুদিংমক্তা অচৌবা থবক অমা পাংথোকপগী ৱাখল্লোন অদু উবা ফংলি। স্বচ্ছ ভারত মিসন ওইগেরা, নেচরেল ফার্মিং ওইগেরা, নৎত্রগা অকোয়বগী ফীভমগী মতাংদা খঙহনবা ওইগেরা, নুপীমচাশিংগী মহৈ তম্বগী মতাংদা ওইগেরা, নৎত্রগা ত্রাইবেলশিংগী য়াইফ-থৌরাংগী মতাংদা ওইগেরা… লৈবাক অসিগী মীয়াম্না লৈবাক শেমগৎপগী খোঙচৎ অসিদা মাংলোমদা চংশিল্লি অমসুং লমজিংলি। মখোয়না অদোমদগী ইথিল য়াম্না ফংগনি। মরম অদুনা, ঙসি ঐহাক্না, ঐহাক্না অদোমদা করিগুম্বা অমা হায়জনীংই।

ময়াম পুম্নমক্না মফমসিদগী ৱারেপ খরা লৌবীয়ু। চহি খুদিংগী অনৌবা ৱারেপ অমা লৌবীয়ু অমসুং চহি অদু অখন্নবা ওইহল্লু অমসুং মদু ৱারেপ অদুদা কত্থোকপীয়ু। খুদম ওইনা, চহি অমা কেমিকেল ফ্রী ফার্মিংদা, চহি অমা লৈবাক অসিগী য়ুনিতী ইন দিভর্সিতীগী কুহ্মৈশিংদা কত্থোকউ। নহারোলশিংগী শক্তি ঙাকথোক্নবা ঐখোয়না দ্রগ শিজিন্নবা থিংনবা ৱারেপসু লৌবা তাই। হৌজিক মফম কয়াদা মীওইশিংনা তুরেলশিংবু অমুক হন্না হিংগৎহল্লি। অদোমসু অসিগুম্বা থবক অসি মাংলোমদা পুখৎপা য়াই। মালেমগী তুংলমচৎপু কন্নবগীদমক্তা ঐখোয়না তুংকোইনা চৎনগদবা পুন্সি মহিংগী ৱারেপ লৌবা তাই। ভারতনা মালেম পুম্বদা পীরিবা মিসন লাইফকী মীৎয়েং অদুগী অশেংবা মগুন অমসুং শাফু অদু ঐখোয়না উৎকদবনি।

ঙসিদি, “এক পেদ মা কে নাম” কেম্পেন অসি মালেম শীনবা থুংনা খন্ন-নৈনরি। মসিগী মাইকৈ অসিদা অদোম্না হোৎনরিবশিং অসিসু য়াম্না মরু ওই। অদোম্না ভারতকী চাউখৎপা খোংজেল য়াঙখৎহন্নবা কেম্পেনশিং, হায়বদি ফিৎ ইন্দিয়া, ভোকেল ফোর লোকেল, মিল্লেৎশিং প্রমোৎ তৌবা অসিনচিংবা কয়া অমা পাংথোকপা য়াই। নহা ওইরিবা থিঙ্করশিংদা অনৌবা খুদোংচাবশিং পীনবগীদমক, ‘বিকাসিত ভারত য়ং লিদর্স দাইলোগ’সু চয়োল খরগী মতুংদা জনুৱারীদা পাংথোক্কনি। মসিদা ঐখোয়গী নহারোলশিংনা চাউখৎলবা ভারতকী ৱারেপ অদু মপুং ফাহন্নবগীদমক মখোয়গী ৱাখল্লোনশিং অদু পীরগনি, মখোয়গী থৌদাং অদুগী মওং মতৌ অদু শেমগৎলগনি। নহা ওইরিবা শিন্মী পুম্নমক্না মসিদা শরুক য়াবা য়াই।

মরুপশিং,

ইকাই খুম্নরবা প্রমুখ স্বামী মহারাজনা ভারতকী ইমুং-মনুংগী চৎনবীদা অখন্নবা মীৎয়েং থমখি। মহাক্না ‘ঘর সভা’গী খুত্থাংদা খুন্নাইদা অপুনবা ইমুং অমগী ৱাখল্লোন অদু মপাঙ্গল কনখৎহনখি। ঐখোয়না মসিগী কেম্পেনশিং অসি মাংলোমদা পুখৎকদবনি। ঙসিদি ভারতনা 2047 ফাওবদা চাউখৎপগী পান্দমদা থবক তৌরি। লাক্কদৌরিবা চহি 25গী লৈবাক অসিগী খোঙচৎ অসি ভারতকীদমক্তসু য়াম্না মরু ওই অমসুং মসিনা BAPSকী শিন্মী খুদিংমক্কীসু মরু ওই। ভগৱান স্বামী নারায়নগী য়াইফ-মঙ্গোলগা লোয়ননা, BAPS ৱার্করশিংগী সর্ভিস কেম্পেন অসি লেপ্তনা মাংলোমদা চংশিল্লগনি হায়না ঐনা থাজবা থম্লি। ঐহাক্না অমুক্কা হন্না অদোম পুম্নমকপু কার্য়কর সর্ভন মহোৎসবকীদমক্তা নুংঙাইবা ফোংদোকচরি।

জয় স্বামীনারায়ন।

***