ভারতকী প্রধানমন্ত্রী

ভারত ইমানা য়াইফরে, ভারত ইমানা য়াইফরে

মমিং লৈরবা উত্তর প্রদেশকী মুখ্য মন্ত্রী, শ্রী য়োগী আদিত্যনাথজী, ঐহাক্কী কুইনা লোইনরক্লবা মরু উপ মুখ্য মন্ত্রী শ্রী কেশব প্রসাদ মৌর্য়াজী, কেন্দ্রগী মন্ত্রী-মন্দলদা ঐহাক্কী থবক তৌমিন্নরিবা শ্রী জ্যোতিরাদিত্য সিন্ধিয়াজী, জেনরেল ভি.কে. সিংহজী, সঞ্জীব বালিয়ানজী, এস.পি. সিংহ বঘেলজী, বি.এল. ভর্মাজী, উত্তর প্রদেশ সরকারগী মন্ত্রী, শ্রী লক্ষ্মী নারায়ন চৌধরীজী, শ্রী জয় প্রতাপ সিংহজী, শ্রীকান্ত শর্মাজী, ভুপেন্দ্র চৌধরীজী, শ্রী নন্দগোপাল গুপ্তাজী, অনিল শর্মাজী, ধর্ম সিংহ সৈনীজী, অশোক কতারিয়াজী, শ্রী জি.এস. ধর্মেশজী, পার্লিয়ামেন্তদা ঐহাক্কা থবক তৌমিন্নরিবা দা. মহেশ শর্মাজী, শ্রী সুরেন্দ্র সিংহ নগরজী, শ্রী ভোলা সিংহজী, মফম অসিগী এম.এল.এ. শ্রী ধিরেন্দ্র সিংহজী, তাংবল অসিদা ফম্বীরিবা অতোপ্পা মীয়ামগী মীহুৎশিং অমসুং ঐখোয়বু থৌজাল পীবিনবা লাকপীরিবা মশিং য়াম্লবা ঐহাক্কী নুশিরবা ইচিল-ইনাওশিং।

নোইদা ইন্তর্নেস্নেল এয়রপোর্তকী উরেপ-উয়ুং তম্বগী থৌরম পাঙথোকপা অসিদা ঐহাক্না  ময়াম পুম্বদা, লৈবাক অসিগী মীয়ামদা, উত্তর প্রদেশকী ইচিল-ইনাওশিংদা নুংঙাইবা ফোঙদোকচরি। ঙসি এয়রপোর্ত অসিগী উরেপ-উয়ুং তম্বগী থৌরম অসিগা লোয়ননা ইন্তর্নেস্নেলগী মেপতা দাউ জী মেলাগীদমক মমিং লৈরবা জেৱরসু হাপখ্রে। মসিনা দিল্লী – এন.সি.আর. অমসুং নোংচুপ থংবা য়ু.পি.দা চাউনা কান্নবা ফংহল্লগনি। মসিগীদমক ঐহাক্না ময়ামদা অমসুং লৈবাক মীয়ামদা নুংঙাইবা ফোঙদোকচরি।

মরুপশিং,

২১শুবা চহিচাগী অনৌবা ভারতনা ঙসি মতমগা চুনবা খ্বাইদগী অফবা ইনফ্রাস্ত্রকচর অমা শেমগৎলি। অফবা লম্বৌ, অফবা রেল নেৎৱর্ক, অফবা এয়রপোর্ত মসি শুপ্নগী ইনফ্রাস্ত্রকচর প্রোজেক্তশিং খক্তা  ওইবতা নত্তনা মখোয়না অপুনবা লমদমদা অহোংবা পুরক্লি, মীয়ামগী পুন্সি মপুং ফানা হোংহল্লি। লায়রবা নত্ত্রগা মিদল ক্লাস ওইরসু, লৌমী নত্ত্রগা ললোন-ইতিক তৌবা মীওই ওইরবসু, শিন্মী নত্ত্রগা ওন্তপ্রিনোর ওইরবসু, মীপুম খুদিংমক্না মসিদগী কান্নবা চাউনা ফংলি। ইনফ্রাস্ত্রকচরগী প্রোজেক্তশিংগী শক্তি অসি কন্নেক্তিবিতীদা অপনবা লৈতবা, লাস্ত মাইল কন্নেক্তিবিতী লৈরবা মতমদা হেনগৎলকই। নোইদা ইন্তর্নেস্নেল এয়রপোর্ত অসি কন্নেক্তিবিতীগী ওইআ অচৌবা মোদেল অমসু ওইরগনি। মফম অসিদা তেক্সিদগী মেত্রো অমসুং রেল ফাওবগী মখল পুম্নমক্কী কন্নেক্তিবিতী লৈরগনি। এয়রপোর্ত অসিদগী অদোম্না হেক থোকখিবদা অদোম্না য়মুনা এক্সপ্রেসৱে তোংবা য়ারগনি, নোইদা-গ্রেতর নোইদা এক্সপ্রেসৱেদা চৎপা য়ারগনি। করিগুম্বা অদোম্না য়ু.পি., দিল্লী, হরিয়ানা মফম অমা হেক্তদা চৎপা পাম্লবদি অদোম্না অতেনবা মতমগী মনুংদা পর্ভঞ্চল এক্সপ্রেসৱেদা চৎপা য়ারগনি। অমসুং হৌজিক দিল্লী-মুম্বাই এক্সপ্রেৱেসু অথুবদা শাবা লোইরগনি। মসিনা অতোপ্পা সহর কয়া চৎপদা খুদোংচাহল্লগনি। মসিতা নত্তনা মসিনা মফম অসিদা দেদিকেতেদ ফ্রেৎ কোরিদোরগী দাইরেক্ত কন্নেক্তিবিতীসু লৈহল্লগনি। অমরোমদা নোইদা ইন্তর্নেস্নেল এয়রপোর্ত অসি অৱাংথংবা ভারতকী লোজিস্তিক গেতৱেসু ওইরগনি। মসিনা অপুনবা লমদম অসি নেস্নেল গতিশক্তি মাস্তরপ্লানগী শক্তি লৈরবা মফম অমা ওইহল্লগনি।

মরুপশিং,

ঙসি, লৈবাক অসিদা এভিএসন সেক্তর খোঙজেল য়াংনা চাউখৎলক্লিবা, ভারতকী কম্পনীশিংনা অনৌবা এয়রক্রাফশিং লৈবগী খোঙজেল য়াংখৎলকপা অসিদা নোইদা ইন্তর্নেস্নেল এয়রপোর্তনা অচৌবা থৌদাং অমা লৌরগনি। এয়রপোর্ত অসি লৈবাক অসিগী ওইনা এয়রক্রাফকী মেন্তেনেন্স, শেমজিনবা অমসুং ওপরেসন তৌনবা খ্বাইদগী চাউবা সেন্তর ওইরগনি। মেন্তেনেন্স, রিপিয়র এন্দ ওভরহোল – এম.আর.ও. ফেসিলিতী অসি মফম অসিদা একর ৪০ পাক চাউবা মফমদা শারগনি, মসিনা লৈবাক অসিগী অমদি মীরৈবাক্কী এয়রক্রাফকী সর্ভিস তৌরগনি অমসুং নহা কয়াদা থবক পীরগনি। অদোম্না খন্দুনা য়েংবীয়ু ঙসিসু ঐখোয়না এম.আর.ও. সর্ভিসশিংগীদমক ঐখোয়গী প্লেনশিংগী চাদা ৮৫দি মপালদা থারি। অমসুং থবক অসিদা চহি খুদিংগী লুপা করোর লিশিং ১৫ চাদিং তৌরি, প্রোজেক্ত অসি করোর লিশিং ৩০ চংনা শেমগৎকনি। রিপিয়র তৌবা খক্তদা করোর লিশিং ১৫ চৎলি। করোর কয়া চাদিং তৌরি। অয়াম্বদি অতোপ্পা লৈবাকশিংদা চৎলি। হৌজিকতি এয়রপোর্ত অসিনা ফীভম অসিদা অহোংবা পুরকপদসু মতেং পাংলগনি।

ইচিল-ইনাওশিং,

এয়রপোর্ত অসিগী খুত্থাংদা অহানবা ওইনা, লৈবাক অসিদা ইন্তিগ্রেতেদ মল্তি-মোদেল কার্গো হব অমগী ৱাখল্লোন অদুসু মঙফাওনরগনি। মসিনা লমদম পুম্বা অসিগী চাউখৎ-থৌরাংদা অনৌবা ইনোৎ অমা হাপ্লগনি, অনৌবা মাইয়োল অমদা পুরগনি। ঐখোয়না খঙই মদুদি সমুদ্রগী ঙমখৈ লোন্নবা রাজ্যশিংগী ওইনদি, হীংথাংফম অসি মখোয়গী ওইনা য়াম্না চাউবা লান অমা ওইরি। মহাক্কী মপাঙ্গল অদু চাউখৎ-থৌরাংদা শীজিন্নরি। অদুবু য়ু.পি.গুম্বা রাজ্যশিংগী ওইনদি মসিগী থৌদাং অসি এয়রপোর্তশিংনা লৌফম থোকই। মসিদা অলিগর, মথুরা, মীরুত, অগ্রা, বিজনোর, মোরাদবাদ, বরেল্লীগুম্বা ইন্দস্ত্রিএলগী মফম কয়া লৈরি। সর্ভিস সেক্তরগী ওইনা মসিদা অচৌবা ইকোসিস্তেম অমসু লৈ অমসুং নোংচুপ থংবা য়ু.পি. অসিদা এগ্রিকলচর সেক্তরগী মপাঙ্গল সিয়র অমা লৈজৈ। হৌজিক মফমশিং অসিগী শক্তিসু চাউনা হেনগৎলক্লগনি। মরম অসিনা ইন্তর্নেস্নেল এয়রপোর্ত অসিনা ইন্তর্নেস্নেল মার্কেতশিংগী এক্সপোর্ত তৌনবগঈ অচৌবা সেন্তরগা হকথেংননা শম্নহল্লগনি। মফম অসিদা লৈরিবা লৌমীশিং, মরু ওইনা অপীকপা লৌমীশিংনা হৌজিক পত্থ-পুমথগনবা উহৈ, মনা-মশিং, ঙাশিং হকথেংননা এক্সপোর্ত তৌবা য়ারগনি। খুর্জা রিজনগী আর্তিসশিং, মীরুতকী স্পোর্তস ইন্দস্ত্রী, সহারনপুরগী ফর্নিচর, মোরাদবাদকী ব্রাস ইন্দস্ত্রী, ফুতৱেয়র অমসুং এগ্রাগী পেথা, নোংচুপ থংবা য়ু.পি.গী এম.এস.এম.ই. কয়ানা মীরৈবাক্কী মার্কেতশিংদা হেন্না লায়না য়ৌবা ঙম্লগনি।

মরুপশিং,

মফম অমা হেক্তদা এয়রপোর্তশিং লাকপনা মাইকৈ মরিমক্তা কান্নবা পীগদবা অওনবা অমা হৌরগনি। এয়রপোর্ত শারিঙৈ মনুংদা থবক্কী খুদোংচাবা লিশিং কয়া পীরগনি। এয়রপোর্ত অসি নীংথিনা চল্লাইনবা মীওই লিশিং কয়া মথৌ তাই। এয়রপোর্ত অসিনা নোংচুপ থংবা য়ু.পি.গী মীওই লিশিং কয়াদা অনৌবা থবক পীরগনি। মমাংদা কেপিতেলগা নক্না লৈজরবসু মফমশিং অসি এয়রপোর্ত কুম্বা খুদোংচাবশিং অসি ফংদনা লৈরকখি। দিল্লীদা এয়রপোর্ত অমসুং অতোপ্পা ফেসিলিতীশিং লৈ হায়না থাজনরম্মি। ঐখোয়না ৱাখল্লোন অসিদা অহোংবা পুরকখি। ঙসি হিন্দন এয়রপোর্ত অসি পেসেঞ্জর সর্ভিসকী ওপরেসন হৌহনখ্রে। মসিগা মান্ননা হরিয়ানাগী হিসরদা এয়রপোর্ত্তা থবক পাইখৎপা হৌখ্রে।

ইচিল-ইনাওশিং,

এয়র কন্নেক্তিবিতী হেনগৎকপা মতমদা তুরিজম অসি চপ মান্ননা চাউখৎলক্কনি। ‌ঐখোয়না উবা ফংই মদুদি মাতা বৈস্নো দেবি নত্ত্রগা কেদারনাথ য়াত্রাদা লাকপা ওইরবদি হেলিকোপ্তর সর্ভিস লাক্লবা মতুংদা ভক্তা লাকপগী মশিং চাউনা হেনগৎহনখি। নোইদা ইন্তর্নেস্নেল এয়রপোর্ত অসিনা নোংচুপ থংবা য়ু.পি.গী মমিং লৈরবা লমকোইফমশিং অমসুং লনিং-লাইশোনগী অচৌবা সেন্তরশিংসু মসিগা মান্নবা ফীভমদা লৈহল্লগনি।

মরুপশিং,

নীংখা তম্লবা মতুং দিকেদ ৭কী মতুংদা অহানবা ওইনা উত্তর প্রদেশনা  ফংফম থোকপা অদু ফংবা হৌরে। দবল ইঞ্জিন ওইবা সরকার অসিনা হোৎনরিবশিং অসিগা লোয়ননা ঙসি উত্তর প্রদেশ অসি লৈবাক অসিগী খ্বাইদগী লম্বী-থোং ফাবা লমদম অমা ওইরক্লি। নোংচুপ থংবা য়ু.পি.আ লুপা করোর লাখ কয়াগী প্রোজেক্তশিং খুমাং য়াংনা থবক পাইখৎলি। নোংপোক অমসুং নোংচুপ থংবা সমুদ্রশিংগা লোয়ননা য়ু.পি.গা শম্নরিবা রেপিদ রেল কোরিদোর, এক্সপ্রেসৱে, মেত্রো কন্নেক্তিবিতী, দেদিকেতেদ ফ্রৈৎ কোরিদোর অসি চাউখৎলবা উত্তর প্রদেশকী অনৌবা মশক অমা ওইরক্লি। নীংখা তম্বা ফংলবা মতুং চহি কয়া উত্তর প্রদেশ অসি চৈথাংবা তাদুনা লাকখি। করিগুম্বা লৈতা-লায়রবগী চৈথাংবা, লম্বী-থোং ফত্তবগী চৈথাংবা, করিগুম্বদা ইন্দস্ত্রী ৱাৎনা লৈবগী চৈথাংবা, করিগুম্বদা চাউখৎপা থিন্থবগী চৈথাংবা, করিগুম্বদা ক্রিমিনেল-মাফিয়া অমসুং রাজনিতীগী মতাংদা চৈথাংবা কয়া অসি খাংদুনা লাকখি। মীয়াম্না য়ু.পি.গী তৌবা ঙম্বা মীওইশিং অসিনা য়ু.পি.গী অফবা মশক অমা পুরকপা ঙমগদ্রা হায়বা ৱাহং অসি লাকখি।

ইচিল-ইনাওশিং,

উত্তর প্রদেশপু মমাংগী সরকারশিংনা খুদোংচাবা ফংদনা অমসুং অমম্বা মরক্তা থম্লম্বা, মমাংগী সরকারশিংনা থাজবা পীরগা ওইথোক্লরোইদবা মঙলানশিং মঙহল্লম্বা, হায়রিবা উত্তর প্রদেশ অসিনা জাতিগী থাক খক্তা নত্তনা মালেমগী থাকসু য়ৌবা ঙম্লক্লি। ঙসি,য়ু.পি.দা মালেমগী থাক্কী মেদিকেল ইন্সতিত্যুসনশিং শারি। ঙসি মালেমগী থাক্কী এজুকেসনগী ইন্সতিত্যুতশিং শারি। মালেমগী থাক্কী হায়ৱেশিং, এক্সপ্রেসৱেশিং, মালেমগী থাক্কী রেল কন্নেক্তিবিতী লৈহনদুনা ঙসি য়ু.পি. অসি মল্তিনেস্নেল কম্পনীশিংগী ইনভেস্তমেন্ত তৌফম ওইরক্লি, পুম্নমক অসি ঐখোয়গী য়ু.পি.দা ওইথোকপা ঙম্লে। মরম অসিনা ঙসি লৈবাক অসিগী অমদি মালেমগী ইনভেস্তরশিংনা হায়রি – উত্তর প্রদেশ হায়বদি খ্বাইদগী ফবা ফেসিলিতী অদুনি, লেপ্তনা ইনভেস্তমেন্ত তৌবা হায়বনি। য়ু.পি.গী ইন্তর্নেস্নেল এয়র কন্নেক্তিবিতী অসিনা য়ু.পি.গী মাশক মালেমদা তাক্নবা অনৌবা মশক অমা তাক্লি। এয়রপোর্ত অসিনা মথংগী চহি ২-৩ অসিদা মথৌ তৌবা হৌরকপা মতমদা য়ু.পি.না ইন্তর্নেস্নেল এয়রপোর্ত ৫ লৈবা রাজ্য অমা ওইরগনি।

মরুপশিং,

জেৱর এয়রপোর্ত অসি য়ু.পি.দা মমাংগী সরকারশিংনা অমসুং কেন্দ্রনা নোংচুপ থংবা উত্তর প্রদেশকী চাউখৎ-থৌরাংবু করম্না নাথৈদুনা থম্বগে হায়বগী খুদম অমসু ওইরি। দিকেদ অনিগী মমাংদা য়ু.পি.গী বি.জে.পি. সরকারনা প্রোজেক্তকী মঙলান মঙখি। অদুবু মসিগী এয়রপোর্তকী মতাং অসি দিল্লী অমসুং লখনৌদা পাল্লম্বা সরকারশিংগী য়েৎনবদা চহি কয়া পন্দুনা লৈরুরে। মমাংদা য়ু.পি.দা লৈরম্বা সরকারনা কেন্দ্র সরকারদা চিথি অমা ইখি অমসুং এয়রপোর্ত অসিগী প্রোজেক্ত অসি তোক্নবা হায়খি। হৌজিক দবল ইঞ্জিন সরকার অসিনা হোৎনবদগী ঙসি চপ মান্নবা এয়রপোর্ত অসিগী উরেপ-উয়ুং তম্বা উবা ফংলি।

মরুপশিং, ঙসি ঐহাক্না ৱাফম অমগা থমজগে। করিগুম্বা মোদী-য়োগীনা পাম্লবদি, ঐখোয়না ২০১৭দা সরকার হেক পাইবগা মফম অসিদা লাক্তুনা মসি হৌরম্বা য়াই। ঐখোয়না ফোতো নমদুনা প্রেস নোতশিং পাউচেদা ফোঙদুনা তৌরম্বা য়াই অমসুং করিগুম্বা অসুম্না ঐখোয়না তৌরম্বা তারবদি মীয়াম্না মমাংগী সরকারশিংনা তৌরম্বা অদুনা মরম ওইরগা ঐখোয়না থাজবা ৱাৎলম্বসু য়াই। মমাংদা রাজনিতীগী ওইবা কান্নবশিংগীদমক ইনফ্রাস্ত্রকচর প্রোজেক্তশিং হোবে-হোবে লাউথোকখি। চেশিংদা ইরবসু তশেংনা প্রোজেক্ত অসি করম্না পাইখৎকনি, মসিদা থেংনবা অপনবশিং করম্না কোকহনগনি, মখোয়না কদায়দগী ফন্দশিং মেনেজ তৌগনি খঙলমখিদে। মখোয়না মসি খন্নরমদে। মসিনা মরম ওইরগা, প্রোজেক্ত অসি দিকেদ কয়া লোইশিনবা ঙমদনা লৈরকখি। লাউথোক্লগনি। প্রোজেক্তকী অচংমল শরুক কয়া হেনগৎলগনি। অদুগা মদু লোইশিনদনবা মরম থিবা হৌরক্লগনি, অতোপ্পশিংদা থিন্থবগী মরাল শীজিন্নবা হায়খি। অদুবু ঐখোয়না মসি তৌদে মরমদি ইনফ্রাস্ত্রকচর অসি ঐখোয়গী ওইনা রাজনিতীগী শরুক অমা ওইদে মসি নেস্নেল পোলিসীগী শরুক অমনি। ভারতকী অফবা তুংলমচৎ অমা পুরকপা অসি ঐখোয়গী থৌদাংনি। ঐখোয়না প্রোজেক্ত অসি থিন্থদনবা হোৎনবা তাই। ইনফ্রাস্ত্রকচর অসি পীরিবা মতমগী মনুংদা লোইশিন্নবা হোৎনবা তাই। ঐখোয়না থিন্থবা তারবদি মদু পেনাল্তী পীনবা প্রোভিজনসু শেম্লে।

মরুপশিং,

মমাংদা লৌমীশিংগী লমগী মতাংদা থোক্লম্বা অপনবশিং অদুনা প্রোজেক্তশিং অসি থিন্থনবা অচৌবা অপনবা অমা ওইরমখি। মফম অসিগী অকোইবদা অসিগুম্বা প্রোজেক্ত কয়া মমাংগী সরকারগী মতমদা লৈরমখি, মসিগীদমক লৌমীশিংদগী লম লৌশিনখি অদুবু ক্ষেত্রিপুরনগা মরী লৈনবা সমস্যা নত্ত্রগা চহি কয়া কয়া লম অসি শীজিন্নদনা লৈবগী সমস্যাশিং থোকখি। লৌমীশিংগী য়েংলগা, প্রোজেক্তশিংগী য়েংলগা, লৈবাক অসিগী য়েংলগা ঐখোয়না অপনবশিং অসি লৌথোকখি। ঐখোয়না লৈঙাক্না লৌমীশিংদগী লম মতম চানা অমদি মপুং ফানা ত্রান্সপরেন্সী লৈনবা হোৎনরি। অমসুং মসিগী মুংদা ঐখোয়না লুপা করোর লিশিং ৩০গী প্রোজেক্ত অসিগী উরেপ উয়ুং তম্বা হৌখি।

মরুপশিং,

মীচম প্রজা খুদিংমক্কীদমক ঙসি ক্বালিতী লৈবা ইনফ্রাস্ত্রকচর, ক্বালিতী লৈবা ফেসিলিতীশিং ফংহন্নবা হোৎনরি। লৈবাক অসিগী মীচম প্রজাগী মঙলান অসি প্লেন তোংদুনা চৎপনি, হায়রিবা অসি ঙসিদি মঙফাওনরে। ঙসি মরুপ অমনা হরাওনা মহাক্কী মমা-মপাগা লোয়ননা মখোয়গী য়ুম মনাক লৈবা এয়রপোর্ত অদুদগী অহানবা ওইনা চৎপা মতমদা, মহাক্কী ফোতো অদু সিয়র তৌবা মতমদা ঐখোয়না হোৎনরিবা অদু মাইপাক্লে হায়না ফাওই। য়ু.পি. খক্তদা হৌখিবা চহিদা এয়রপোর্ত ৮দগী ফ্লাইৎশিং পাইবা হৌখিবা অমসুং কয়া অমগী থবক তৌরিবা অসিদা নুংঙাইবা পোকই।

ইচিল-ইনাওশিং,

ঐখোয়গী লৈবাক অসিগী রাজনিতী দল খরনা মখোয়গী মশাগী কান্নবা অদু খক্তা য়েংখি। মখোয়গী ওইবা চাউখৎ-থৌরাংগী ৱাখল্লোন অসি মখোয়গী কান্নবা নত্ত্রগা মখোয় অমদি মখোয়গী ইমুং-মনুংশিংদা লৈরিবা মফমশিং অদু খক্তদা পাইখৎলমখি। অদুবু ঐখোয়নদি জাতিগী মীয়াম হান্না হায়বা ৱাখল্লোন অসিদা চৎলি। ঐখোয়গী মন্ত্রদি সবকাসাথ, সবকাবিকাস, সবকা বিশ্বাস অমসুং সবকা প্রয়াসনা ওইরি। হৌখিবা চয়োল খরা অসিদা য়ু.পি. অমদি লৈবাক অসিগী মীয়াম্না রাজনিতী দল খরগী পোলিসতিক্স মখলশিং উবা ফংখ্রে অদুবু ভারতনা চাউখৎপগী লম্বেলদগী হনবা লৈতে। মতম খরগী মমাংদা ভারতনা ভেক্সিন দোজ করোর ১০০ কাপ্পা ঙম্বগী পন্দুপ য়ৌখি। থা অসিগী অঙনবা শরুক্তা ভারতনা ২০৭০ ফাওবদা নেৎ জিরো তার্গেত (কার্বোন ইমিসন) ফংনবা লাউথোকখি। মতম খরগী মমাংদা কুশিনগরদা ইন্তর্নেস্নেল এয়রপোর্ত শঙ্গাখি। লৈবাক অসিগী হেল্থ ইনফ্রাস্ত্রকচর অসি য়ু.পি.মক্তদা মেদিকেল কোলেজ মাপন অমুক্তদা শঙ্গাদুনা মপাঙ্গল কনখৎহনখি। হৌখিবা চয়োলমক্তদা মহোবাদা অনৌবা দাম অমসুং ইথৈ-লৌখোংগী প্রোজেক্তশিং শঙ্গাখি অমরোমদা ঝান্সিদা দিফেন্স কোরিদোর খোঙজেল য়াংশিনখি অমসুং য়ু.পি. মীয়ামদা পুর্ভঞ্চল এক্সপ্রেসৱে খুৎশিন্নখি। অমসুং নুমিৎ খতগী মমাংদা জনজাতিয়া গৌরব দিৱস পালন তৌখি অমসুং মধ্য প্রদেশধা য়াম্না চাউবা অমসুং মতমগা চুনবা রেলৱে স্তেসন অমা শঙ্গাখি। থা অসিমক্তদা মহারাস্ত্রগী পন্ধর্পুরদা কিমোমিতর চামা হেন্না শাংবা নেস্নেল হায়ৱে শঙ্গাখি অমসুং উরেপ-উয়ুং তমখি। ঐখোয়গী লৈবাক নীংবা অমসুং জতিগী শেবা তৌবগী লম্বীদা রাজনিতী দল খরনা অথিংবা পীবা ঙম্লোই।

মরুপশিং,

ঙসি ২১শুবা চহিচাগী মথৌ তাবশিং অসি ৱাখল্দা থম্লগা মতমগা চুনবা প্রোজেক্ত কয়া খোঙজেল য়াংনা পাইখৎপগী থবক চত্থরি। খোঙজেল অসিনা তৌবা ঙম্বা অমসুং মপাঙ্গল কনবা ভারত অমা ওইহল্লগনি। মসিগী খোঙজেল, খুদোংচাবা অমসুং নুংঙাইবা অসিনা ভারত মীয়ামগী য়াইফবা পুরকপা ঙম্লগনি। ময়ামগী থৌজালদগী য়ু.পি.না দবল ইঞ্জিনগী মসিগী কেম্পেন অসিদা মাংজিল থানা থৌদাং লৌরি। থাজবা অসিগী লোয়ননা ঐখোয়না পুন্না মাংদা চংশিল্লি, ইন্তর্নেস্নেল এয়রপোর্ত অসিগীদমক ময়াম্না অমুক্কা হন্না নুংঙাইবা ফোঙদোকচরি।

ঐহাক্কা লোয়ননা হায়বীয়ু –

ভারত ইমানা য়াইফরে।

ভারত ইমানা য়াইফরে।

ভারত ইমানা য়াইফরে।

হন্না-হন্না থাগৎচরি!

*****