ভারতকী প্রধানমন্ত্রী

প্রধান মন্ত্রী, শ্রী নরেন্দ্র মোদীনা ঐখোয়গী কঞ্জুম্পসন পেত্তর্নশিং অসিদা মীৎয়েং চংবা অমসুং মখোয়না অকোইবগী ঈশিং-নুংশিৎকী ফীভমদা থোকহল্লিবা অকাইবা অসি করম্না হন্থহনগনি হায়বা অসি য়েংশিনবা মথৌ তাই হায়না ফোঙদোকখ্রে। মহাক্না হায় হিরম অসিদা ঐখোয়না থেংনরিবা খুদোংচাদবা কয়া অসি কোকহনবদা সর্ক্যুলর ইকনোমীনা মরু ওইবা খোঙথাং অমা ওইরগনি। মহাক অসি ঙসি ভিদিও কনফরেন্সিংগী থোংদা ইন্দিয়া-অস্ত্রেলিয়া সর্ক্যুলর ইকনোমী হেক্কাথোনগী লোইশিনবগী থৌরমদা ৱা ঙাংখিবনি।

Speaking at the India-Australia Circular Economy Hackathon Award Ceremony. https://t.co/nM1wYCQNQg

— Narendra Modi (@narendramodi) February 19, 2021

প্রধান মন্ত্রীনা হায় পোৎচৈশিং রিসাইকল তৌবা অমসুং অমুক হন্না শিজিন্নবা, অমোৎপা লৈহন্দবা অমসুং রিসোর্স ইফিসেন্সী হেনগৎহনবা হায়রিবা অসি ঐখোয়গী পুন্সি মহিংগী শরুক অমা ওইহনগদবনি। মহাক্না হেক্কাথোন অসিদা উৎখিবা ইন্নোবেসনশিং অসিনা পীবা ইথিনা লৈবাক অনিনা সর্ক্যুলর ইকনোমী সোল্যুসনশিং পুরকপদা মাংজিল থাহল্লগনি হায়বগী থাজবা থম্মি হায়না ফোঙদোকখ্রে। মহাক্না ৱাখল্লোনশিং অসি চাউখৎহন্নবা অমসুং ইনক্যুবেৎ তৌনবা লম্বীশিং খঙদোক্নবা ফোঙদোকখ্রে। প্রধান মন্ত্রীনা হায়, “ঐখোয়না কাওরোইদবদি মালেম ইমানা পীরিবা পুম্নমক অসিগী মপু ঐখোয় খক্তা নত্তে, ঐখোয়দি শুপ্নগী তুংদা লাক্কদৌরিবা চারোনশিংগী ত্রস্তীশিং ‌ওইবা খক্তনি”।

প্রধান মন্ত্রীনা হায় ঙসিগী নহারোলশিংনা হেক্কাথোন অসিদা থৱায় য়াওনা শরুক য়ারিবা অসিনা ভারত অমসুং অস্ত্রেলিয়াগী মরক্তা লৈরিবা মপাং ওইবগী মরী অসি ফগৎলক্লি হায়বগী খুদম অমনি। “ভারত-অস্ত্রেলিয়াগী অচেৎপা মপাং ওইবগী মরী অসিনা কোবিদ মতুংগী মালেম শেমগৎপদা মরু ওইবা থৌদাং অমা লৌরগনি। অমসুং ঐখোয়গী নহারোল, ঐখোয়গী নহা ওইরিবা ইন্নোবেতরশিং, ঐখোয়গী স্তার্তঅপশিং অসিনা মপাং ওইবগী মরী অসিদা মাং থারগনি” হায়না প্রধান মন্ত্রীনা ফোঙদোক্লদুনা মহাক্কী মরোল লোইশিনখি।

****