ভারতকী প্রধানমন্ত্রী

মনোহর মেৱারা – খুরুমজরি সর।

প্রধান মন্ত্রী- খুরুমজরি মনোহরজী, খুরুমজরি।

মনোহর মেৱারা – খুরুমজরি সর। ঐগী ইমিং মনোহর মেৱারা কৌই।

প্রধান মন্ত্রী – অদোম কমদৌবীরিবগে,

মনোহর মেৱারা – য়াম্না নুংঙাইরি সর।

প্রধান মন্ত্রী – ইমুং মনুংদা কন্না-কন্না লৈবগে।

মনোহর মেৱারা – ঐগী ইমুং-মনুংদা ঐ, ঐহাক্কী লোইনবী অমসুং ইচানুপা অনি লৈ। ইচানুপা অমা লুহোংলে, মহাক্কী ইমৌসু লৈরে, অমসুং ঐহাক্কী ইশুনুপা অমসু লৈ।

প্রধান মন্ত্রী – মনোহরজী ঐঙোন্দা খঙহল্লকপগী মতুং ইন্না অদোম্না প্রোপর্তী কার্দ থমদুনা লোন লৌই হায়। লোন অসিদগী অদোমদা মতেং কয়া য়াম্না ফংলবগে? মসিনা অদোমগী পুন্সিদা করি অহোংবা পুরক্লবগে? লৈবাক পুম্বনা অদোমবু তারি, অদুদি মনোহরজী অদোমগী এক্সপরিয়েন্স অদু পাউদমবীয়ু।

মনোহর মেৱারা- ঐহাক্না SVAMITVAগী দোক্যুমেন্ত ফংলে। ঐহাক্না য়াম্না নুংঙাইখি, ঐহাক্কী ইমুং মনুংসু য়াম্না নুংঙাইখি, ঐহাক্না অদোমবু খুরুমজরি, থাগৎপা ফোংদোকচরি।

প্রধান মন্ত্রী – অদোমবুসু হন্না-হন্না থাগৎচরি। ঐহাক্না খঙনীংই মনোহরজী, খরা দিতেল ওইনা করি-করি তৌবগে ফোংদোকপীয়ু?

মনোহর মেৱারা- দিতেলদা হায়রগনি ঐহাক্না দোক্যুমেন্ত ফংখি, মদু শীজিন্নদুনা লোন লৌখি ঐহাক্না, ঐহাক্না দাইরী ফার্মগী লোন লৌখি, ঐহাক্না লাখ তরাগী লোন লৌখি।

প্রধান মন্ত্রী – লাখ তরা।

মনোহর মেৱারা- হোয় সর ঐহাক্না লাখ তরাগী লোন লৌখি।

প্রধান মন্ত্রী – মদুনা করি তৌখিবগে?

মনোহর মেৱারা – সর, ঐহাক্না দাইরী ফার্ম অমা হাংদোক্লে । ঐনা দাইরী ফার্মদা থবক তৌরি, ঐহাক্না থবক তৌরি, ঐগী অঙাংশিংসু থবক তৌরি অমসুং মরম অদুনা ঐহাক্না লৌউ-শিংউ অমসুং দাইরী ফার্ম য়েংশিল্লি।

প্রধান মন্ত্রী – অদোমগী শা-শন কয়াম লৈবগে?

মনোহর মেৱারা – সর, ঐহাক্কী শন মঙা অমসুং ইরোই অমা লৈ, মদুগী মনুংদা ঐহাক্কী শননাও তরুক লৈ। মসি ঐগী বিজিনেসনি। ঐহাক্না মসিদগী শেন্দোং কয়া অমা ফংই।

প্রধান মন্ত্রী – হোয়, মমাংদা লোন লৌবা য়াবগী পাম্বৈ অমত্তা লৈরমদে, হৌজিক্তি নহাক্না লোন লৌরে মরমদি নহাক্কী য়ুমগী চে-চাংশিং লৈরে।

মনোহর মেৱারা – সর, হান্নদি ঐহাক্কী য়ুমগী চে-চাং লৈরমদে, মরম অদুনা ঐহাক্না লোন লৌবদা খুদোংচাবা লৈরমদে। ঙসি ঐহাক্না য়ুমগী চে-চাংশিং পাইরে, মরম অদুনা ঙসি ঐহাক্না লোন লৌবগী কান্নবা ফংলে, মরমদি ঐহাক বেঙ্ক অমহেক্তদা চৎপা মতমদা, ঐহাক্না লোন অমা ফংই।

প্রধান মন্ত্রী – ফরে, লোন অদুসু লোইশিনখিদুনা অঙাংশিংবু দিবতর ওইহনবা অসি থোক্লরোই, মসি থোক্লরোই।

মনোহর মেৱারা – নত্তে, অঙাংশিং অসি অসিগুম্বা নত্তে সর, মরমদি ঐনা তৌরিবা অদু ঐগী অঙাংশিংনসু মতুং ইল্লি।

প্রধান মন্ত্রী – নত্তে, অদোম্না নীংথিনা শেল তাল্লি।

মনোহর মেৱারা – সর, অদোম্না ফজনা শেন্দোং ফংলি।

প্রধান মন্ত্রী – অদোম্না লোন অদু শীংদোকপা ঙম্লগনি,

মনোহর মেৱারা– হোয়

প্রধান মন্ত্রী – অদোম্না লোন অদুসু শীংদোকলগনি।

মনোহর মেৱারা – হোয় সর, ঐহাক্কী ইন্সতোলমেন্ত অসি চাউরাক্না 16000 ওই, অদুনা ঐহাক্কী ইনকম অসি থা অমদা লুপা 30,000 ওই, অদুনা ঐহাক্না ইন্সতোলমেন্ত অদু থীরি অমসুং ঐহাক্না ঐহাক্কী ইমুংগী অতোপ্পা শেল-থুমগী শেনফমশিংসু শেল অসিদগী মেনেজ তৌরি।

প্রধান মন্ত্রী – ফরে মনোহর জী, য়াম্না ফরে, অদোমগী কেন্দ্র সরকারগী স্কিমনা মরম ওইদুনা অদোমগী পুন্সিদা অৱাবা হন্থরে। মসি ঐহাক্কী ওইনা য়াম্না নুংঙাইবা অমনি। অদোমগুম্বা ইমুং লাখ কয়াগী শেন্থোক অসি ওনরশিপ স্কিমগী খুত্থাংদা হেনগৎলক্লিবা অসি উবদা য়াম্না নুংঙাইবা ফাওই।

মনোহর মেৱারা– হোয় সর।

প্রধান মন্ত্রী – ঐখোয়গী সরকারগী মরুওইবা অসি লৈবাক অসিগী মীপুম খুদিংমক্না চাউথোকচবা পোক্কদবনি, মহাক্কী পুন্সি অসি লায়থোক্কদবনি, ওনরশিপ স্কিম অসি ৱাখল্লোন অসিগী এক্সতেন্সন অমনি। মনোহরজী, অদোমবু হরাও-তয়াম্বা ফোংদোকচরি। খুঙ্গংগী মীপুম খুদিংমকপু হায়জরি মদুদি মীপুম খুদিংমক্না মখোয়গী কার্দ শেমগদবনি অমসুং মদুদগী লোন লৌগদবনি, থবক খরা তৌগদবনি, পুম্নমক্তা হায়জগদবনি। অদোমবু হন্না-হন্না থাগৎচরি।

মনোহর মেৱারা – সর, ঐহাক্কী মায়কৈদগী অমদি ঐহাক্কী ইমুং-মনুংগী মায়কৈদগী, অদোমবু য়াম্না থাগৎচরি, খুরুমজরি সর।

প্রধান মন্ত্রী – থাগৎচরি।

প্রোগ্রাম কোওর্দিনেতর– হৌজিক রাজাস্থানগী শ্রী গঙ্গানগর জিলাগী SVAMITVAগী কান্নবা ফংলবা প্রোপরিতী কার্দ হোল্দর শ্রীমতি রচনা জীনা ৱারী শানবদা শরুক য়াগনি।

রচনা – ইকাই খুম্নরবা প্রধান মন্ত্রীদা ঐহাক্না খুরুমজরি।

প্রধান মন্ত্রী- হেলো রচনা জী, খুরুমজরি। রচনা জী, অদোম্না করি থবক তৌবগে, অদোমগী ইমুং মনুংদা মীওই কয়া লৈবগে, অদোম্না SVAMITVA স্কিম অসিগা মতৌ করম্না মরী লৈনরকখিবগে হায়বদু ঐঙোন্দা পাউদম্বীয়ু।

রচনা – সর, ঐগী ইমুং-মনুংদদি ঐগী নুপা নরেশ কুমার বিষ্ণোই অমসুং ঐগী মচানুপী অমা অমসুং মচানুপী অমা লৈ।

প্রধান মন্ত্রী – অমসুং মসিগী স্কিম অসিগী মরমদা ঐঙোন্দা পাউদম্বীয়ু।

রচনা – সর, ঐহাক মফম অসিদা চহি 20দগী লৈরি, ঐহাক্কী য়ুম অপীকপা অমা লৈ, মদুগী ওইবা ঐহাক্কী দোক্যুমেন্ত অমত্তা লৈতে অমসুং হৌজিক ফাওবদা ঐহাক্না SVAMITVA স্কিমগী মখাদা কার্দ অসি ফংলে। সর, ঐহাক্না লুপা লাখ 7.45গী লোন লৌখ্রে অমসুং ঐহাক্না দুকান অমসু হাংদোক্লে, দুকান অদুদা পোৎলমশিং য়োল্লি অমসুং ঐহাক্না ঐহাক্কী অঙাংশিংগী অৱাংবা থাক্কী মহৈ-মশিং তম্বগী মঙলান অদু মপুং ফাহনবা ঙমখ্রে।

প্রধান মন্ত্রী – অদু ওইরবদি কার্দ অসি ফংদ্রিঙৈ মমাংদা অদোমগী পোৎ-চৈ অমত্তা লৈরমদে, অদোমগী করিসু লৈরমদে।

রচনা – হোয় সর, ঐহাক্না করিগুম্বা অমত্তা লৈতে।

প্রধান মন্ত্রী – অদু ওইরবদি প্রোব্লেম লৈরমগনি, মীশিংসু অৱা-অনা তারে।

রচনা – ঐহাক য়াম্না খল্লি সর, ঐহাক্না SVAMITVA য়োজনা কার্দ ফংলে সর, ঐহাক অমসুং ঐহাক্কী ইমুং-মনুংনা য়াম্না নুংঙাইবা ফাওই।

প্রধান মন্ত্রী – ফরে, অদোম্না করিগুম্বা মতমদা খল্লকপা য়াওব্রা মদুদি চহি 20 হৌখ্রবা মতুংদা অদোম্না করিগুম্বা অমত্তা লৈত্রে, অদোম্না আশা মাংলমগনি, মসি থোক্লক্কনি হায়না অদোম্না খনখিব্রা?

রাচনা – সর, অসিগুম্বা থৌদোক অসি থোক্লক্কনি হায়না ঐহাক্না খল্লমদে, সর, ঐহাক চহি 20 চুপ্না য়ুম অমদা লৈরি।

প্রধান মন্ত্রী – অদুদি, অদোম্না SVAMITVA য়োজনাগী মখাদা অতোপ্পা কান্নবা কয়া ফংলবগে হায়বদু ঐঙোন্দা পাউদম্বীয়ু।

রচনা – হোয় সর, ঐহাক্না অদোমদা হায়জনীংই, মসিগী খুত্থাংদা ঐহাক্না SBM স্কিম ফংলে অমসুং সর, ঐহাক্না লুপা লাখ 8গী মুদ্রা লোনসু লৌখ্রে অমসুং ঐহাক রাজীবকা শম্নরে অমসুং ঐহাক্কী ইমুংগী আয়ুশ্মান কার্দসু শেমখ্রে সর।

প্রধান মন্ত্রী – বিজিনেস য়াম্না নীংথিনা চত্থরি।

রচনা – হোয় সর, ঐহাক্না MNREGAদা থবক তৌরি।

প্রধান মন্ত্রী – অদুদি অদোম্না লুপা লাখ 15গী লোন লৌখ্রে, অদোম্না দুকান অমা চলাইরি, অদোম্না MNREGAদা থবকসু তৌরি, অদোমগী নুপাসু করিগুম্বা খরা তৌরম্বা তাই।

রাচনা– সর, মহাক দ্রাইভরনি।

প্রধান মন্ত্রী– অদুদি, ঐহাক্না খঙলে মদুদি অদোমগী ইচানুপীনা মপাল লমদা মহৈ তম্বা পাম্মি, অদোম্না মসিগী ক্রেদিৎ অসি SVAMITVA য়োজনাদা পীবা পাম্বিবরা?

রচনা – সর, ঐহাক্না মহাকপু মপান লমদা থাবা পাম্মি, মহাক্না চৎপা পাম্মি।

প্রধান মন্ত্রী – হায়বীয়ু, হায়বীয়ু।

রচনা– হৌজিক মহাক্না AILET তম্মি, ঐগী ইচানুপীগা লোয়ননা ঐনা লৈরি।

প্রধান মন্ত্রী – মহাকপু অদোম্না করম্বা অতোপ্পা মফমদা থাবা পাম্বগে?

রচনা – অস্ত্রেলিয়া।

প্রধান মন্ত্রী – অস্ত্রেলিয়া, অদোমগীদমক্তা মসি SVAMITVA য়োজনাগী খুত্থাংদা ওইথোক্লগনি।

রাচনা – হোয় সর।

প্রধান মন্ত্রী – চলো, রচনা জী, অদোমগী অমসুং অদোমগী ইচানুপীগী মঙলান অসি অথুবা মতমদা মঙফাওনহনবিয়ু হায়না ঐনা ঈশ্বরদা হায়জরি। SVAMITVA য়োজনা অসিনা মথৌ তাবশিং অদু মপুং ফাহনবতা নত্তনা ঐখোয়গী নাগরিকশিংগী আশাশিং অদু মপাঙ্গল কনখৎহল্লিবা অসি য়াম্না নুংঙাইবা ৱাফম অমনি। অশেংবা ৱাহন্থোক্তি, স্কিম অমহেক্তগী মরুওইবা অদুদি মীওইশিংগা মসিগা শম্নবা অমসুং শক্তি লৈহনবা অদুনি। রচনা জী, অদোম্না মরক্তা করিগুম্বা খরা হায়নীংবা লৈব্রা।

রচনা – সর, ঐহাক্না হায়জনীংবদি, করিগুম্বা অদোমসু ঐহাক্কা মান্নবা লুচিংবা অমা ওইরবদি, লাইরবশিংগী য়াইফনবা অদোম্না হৌদোকখিবা স্কিম অসিগীদমক ঐহাক অমসুং ঐহাক্কী ইমুং-মনুংগী মায়কৈদগী থাগৎপা ফোংদোকচরি।

প্রধান মন্ত্রী – থাগৎচরি, ঐহাক্না উরিবা খুঙ্গংগী মীপুম খুদিংমক্তা ঐহাক্কী য়াইফ পাউজেল পীবিয়ু। লাক্লো, হৌজিক ঐখোয়দা কনানা শরুক য়াগদগে হায়বদু য়েংসি।

প্রোগ্রাম কোওর্দিনেতর – হৌজিক, মহারাস্ত্রগী নাগপুর জিলাগী মপু ওইবা অমসুং প্রোপর্তী কার্দ হোল্দর ওইরিবা বেনেফিসরী রোশন সামভাজী পাতিলনা ৱারী শানবদা শরুক য়াগনি।

প্রধান মন্ত্রী – হেলো রোশন জী।

রোশন – হেলো সর।

প্রধান মন্ত্রী – রোশনজীনা হায়বীয়ু।

রোশন – হোয় সর, সর, মহারাস্ত্রগী সন্তশিং অমসুং অথোইবা মীওইশিং অমসুং ইনিসিএসনগী অশেংবা লমদম নাগপুরদগী ঐ রোশন পাতিলনা অদোমবু থাগৎচরি সর।

প্রধান মন্ত্রী – হেলো।

রোশন – হেলো সর।

প্রধান মন্ত্রী – অদোমগী ইচানুপা অদুগী মিং করি কৌবগে?

রোশন পাতিল – সর, ঐহাক্কী ইচাগী মিংনা শরভিল কৌই, ঙসি মহাক্কী মপোক নুমিৎসুনি।

প্রধান মন্ত্রী – ঙসি মহাক্কী মপোক নুমিৎনি…

রোশন পাতিল – হোয় সর, ঙসি মহাক্কী মপোক নুমিৎনি…

প্রধান মন্ত্রী – ঐহাক্কী য়াইফ-পাউজেল পীবীয়ু।

রোশন পাতিল – অদোমগী য়াইফ-পাউজেল অসি মহাক্কা লোয়ননা লৈ।

প্রধান মন্ত্রী–  রোশন জী, অদোম করি তৌবগে অমসুং অদোমগী ইমুং মনুংগী মীওই কয়ামরুম লৈবগে?

রোশন – সর, ঐহাক লৌমী অমনি, ঐহাক লৌউ-শিংউ তৌই অমসুং ঐহাক্কী প্রাইবেৎ থবক অমসু তৌরে, সর। ঐগী ইমুং মনুং অসিদা অপুনবা ওইনা মীওই তরুক লৈ, ঐগী নুপী, ঐগী ইমা অমসুং ইপা, ঐগী ইচিন ইনাও অনি, অমসুং হৌজিক ঐগী অপীকপা মচানুপা লৈ, সর।

প্রধান মন্ত্রী – অদুদি অদোম্না করম্না মপু ওইবগী কার্দ, প্রোপর্তী শিৎ, মসিগা মরী লৈনবা থবকশিং অসি পায়খৎলিবনো অমসুং অদোম্না মাংলোমদা করি কান্নবা ফংলবগে?

রোশন– সর, ঐহাক্না মপু ওইবগী কার্দ ফংলবা মতুংদগী, ঐহাক্না মদুদা লোন লৌবা ঙমখি। মমাংদা, সর, ঐহাক্না ঐহাক্কী য়ুমদা লোন অমা লৌবা ঙমখিদে, হায়বদি ঐহাক্কী য়ুম অসি অচৌবা য়ুম অমনি, খুঙ্গংদা ঐহাক্কী অরিবা য়ুম অমা লৈ, মরম অদুনা ঐহাক্না লোন অমা লৌবা ঙমখি মরমদি ঐহাক্কী প্রোপর্তী কার্দ লৈ, সর। ঐহাক্না বেঙ্কতগী লুপা লাখ 9গী লোন লৌখি অমসুং শেল অদুগী শরুক অমগা লোয়ননা য়ুম অমা শাখি অমসুং শেল অদুগী শরুক খরনা ঐহাক্না লৌবুক্কী ঈথৈ লৌখোংগী থৌরাং তৌখি। মসিনা মরম ওইদুনা ঐগী মহৈ-মরোংশিং হেনগৎলকখি অমসুং ঐগী শেল-থুমসু হেনগৎলকখি। চহি অনি-অহুমগী মমাংদা ঐহাক্কী মহৈ-মরোং অমখক্তমক থারম্মি, অদুবু হৌজিক্তি মহৈ-মরোং অহুম থারে অমসুং ঐহাক্কী ইনকমসু হেনগৎলে অমসুং লৌউ-শিংউবদগী ঐহাক্না শেন্দোং ফংবা ঙম্লে।

প্রধান মন্ত্রী – ফরে, অদোমগী অসিগুম্বা মপাঙ্গল কনবা দোকুমেন্তশিং, চে-চাংশিং লৈরিঙৈদা, বেঙ্কতগী লোন লৌবদা অদোম্না খুদোংচাদবা থেংনখিব্রা? অদু ওইরবদি মসি পুরকউ, মদু পুরকউ, মসি পুরকউ, মদু পুরকউ, অদু থোকখিব্রা?

রোশন – হোয়, সর, হান্নদি দোক্যুমেন্ত কয়া অমা লৈরম্মি, ঐনা হায়রিবদি মসি পুরকউ, মদু পুরকউ, বেঙ্ককী মীওইশিংনা ঐবু দোক্যুমেন্ত খুদিংমক্কীদমক চত্থোক চৎশিন তৌহল্লম্মি। অদুবু ঐহাক্না মপু ওইবগী কার্দ ফংলবা মতুংদগী, দোক্যুমেন্ত অমত্তা মথৌ তাদ্রে, মপু ওইবগী কার্দ অসিখক্তনা মীপুম খুদিংমক্কীদমক কান্নবা ওইরে।

প্রধান মন্ত্রী – অদোমদা থাজবা লৈ।

 রোশন – মসিগীদমক্তা ঐহাক্না অদোমগী মফমদা য়াম্না থাগৎচরি, সর।

প্রধান মন্ত্রী – বেঙ্ককী মীওইশিংদা মপুং ফানা থাজবা লৈ।

রোশন – হোয় সর, বেঙ্করশিংনা মসিদা থাজবা য়াম্না লৈ অমসুং মসিদা লোনশিং য়াম্না লায়না ফংই।

প্রধান মন্ত্রী – অদুগা হৌজিক্তি অদোম্না য়ুম অমা শারে, অদোম্না লোন অদু করম্না শীংগনি?

রোশন – হোয় সর, ঐহাক লৌউবুক্তা মনা-মশিং কয়া থারি, ঐহাক্না মদুদগী শেন্দোংসু ফংই। অতোপ্পা মহৈ-মরোং অনি অহুম লৈ। মদুদগী কান্নবা অমসু ফংলি, ইরিগেসনগী পাম্বৈনা মরম ওইদুনা, অতোপ্পা মহৈ-মরোংশিংসু ফজনা থোকই, সর, মরম অদুনা হেন্না কান্নবা লৈ, মরম অদুনা ঐহাক্না লোন অদু লায়না শীংদোকপা ঙম্লগনি।

প্রধান মন্ত্রী – ফরে রোশন জী, কেন্দ্র সরকারগী অতোপ্পা স্কিমশিংগী কান্নবা অদোম্না ফংলব্রা?

রোশন – হোয় সর, ঐহাক্না কেন্দ্র সরকারগী উজ্জ্বলা গ্যাস স্কিমগী কান্নবা ফংলি, ঐহাক্না পি.এম. সম্মান নিধি য়োজনাগী কান্নবা ফংলি, ঐহাক্না পি.এম. পিক ইন্সুরেন্স স্কিমগী কান্নবা ফংলি, ঐহাক্না অসিগুম্বা স্কিমশিংগী কান্নবা ফংলি সর।

প্রধান মন্ত্রী – ওকে রোশন জী, ওনরশিপ স্কিমগী খুত্থাংদা মীওই কয়ানা মতেং কয়া ফংলিবা অসি য়াম্না নুংঙাইবা অমনি। মপু ওইবগী স্কিম পুরকপা মতমদা, রোশন্না করিগুম্বা খরা হায়খি।

রোশন – হোয় সর, মপু ওইবগী স্কিম্না মরম ওইদুনা মীয়াম্না কান্নবা কয়া ফংলি । ঐখোয়গী খুঙ্গংগী মীওই খরনা দুকান হাংনবা লোন লৌখ্রে। মমাংদা, মখোয়না করিগুম্বা অমত্তা তৌবা ঙম্লমদে, মখোয়না মখোয়গী লৌউ-শিংউগী মখা পোন্না লোন লৌবা ঙমদে, মখোয়গী য়ুমগী মখা পোন্না লোন লৌবা ঙমদে, অদুবু মপু ওইবগী কার্দকী মতুং ইন্না, মীপুম খুদিংমক্না লোন য়াম্না লাইনা লৌবা ঙম্লে, মসিনা মরম ওইদুনা মীশিংনা মখোয়গী অপীকপা ললোন-ইতিক অমসুং লৌউ-শিংউ তৌরি, মরম অদুনা মখোয়গী ইনকম শরুক অনি হেনগৎলে, সর, অমসুং মখোয়না মখোয়গী ইমুং-মনুং অমসুং অঙাংশীংবু য়াম্না লাইনা মেনেজ তৌরি, অমসুং নুংঙাইনা হিংলি, সর।

প্রধান মন্ত্রী – অদুদি, রোশন জী, অদোম্না হায়খি মদুদি অদোমগী খুঙ্গংগী অতোপ্পা মীওইশিংসু মসিগী খুদোংচাবা লৌরি। অমসুং ঐহাক্না খুঙ্গংগী মীওই খুদিংমক্না মসিগী খুদোংচাবা লৌনবসু হায়জরি। অদোম্না য়ুম অমা শাখ্রে, লৌউ-শিংউদা খুমাং চাউশিল্লে, অমসুং অদোমগী ইনকমসু শরুক অনি হেনগৎলে। অমসুং য়ুম অমা শাবা মতমদা, শাৎকী য়ুম অমা লৈরকপা মতমদা, খুঙ্গংদা অদোমগী থাকসু হেনগৎলে।

রোশন – হোয়, সর, মসিগীদমক ক্রেদিৎ পুম্নমক অদোমদা পীজরি, সর, ঐহাক্না অদোমবু য়াম্না থাগৎচরি, সর।

প্রধান মন্ত্রী – ফরে, সর, অদোম পুম্নমকপু য়াইফ-পাউজেল পীজরি অমসুং নাগপুরগী মীয়ামদসু য়াইফ-পাউজেল পীজরি।

রোশন – থাগৎচরি সর, থাগৎচরি, থাগৎচরি সর।

প্রধান মন্ত্রী – হৌজিক কনানো?

প্রোগ্রাম কোওর্দিনেতর – হৌজিক প্রধান মন্ত্রীনা অতোপ্পা বেনিফিসরী ওনরশিপ প্রোপর্তী কার্দ হোল্দর ওরিশাগী রায়াগাদা জিলাগী শ্রীমতি গজেন্দ্রা সঙ্গীতাজীগা ৱারী শানগনি।

সঙ্গীতা – ইকাই খুম্নরবা প্রধান মন্ত্রীদা ঐহাক্না য়াইফ-পাউজেল পীজরি।

প্রধান মন্ত্রী – হেলো সঙ্গীতা জী।

সঙ্গীতা – হেলো।

প্রধান মন্ত্রী – সঙ্গীতা জী, অদোম্না করি থবক তৌবগে হায়বদু ঐঙোন্দা পাউদম্বীয়ু।

সঙ্গীতা – ঐনা ফী তুবগী থবক তৌই।

প্রধান মন্ত্রী – হোয় অমসুং ইমুংগী মীওই কয়ানা থৌদাং লৌবগে?

সঙ্গীতা – ঐগী ইমুং মনুংগী মীওই মরি লৈ, অঙাং অনি অমসুং ঐগী নুপা। ইচানুপী অমা এম.কোমগী অরোইবা চহিদা তম্লি, অনিশুবা ইচানুপীনা অন্ধ্র প্রদেশকী কাদাপাদা থবক তৌরি, অমসুং ঐগী নুপাসু প্রাইবেৎ কম্পনী অমদা থবক তৌরি।

প্রধান মন্ত্রী – অদুদি, সঙ্গীতা জী, য়ুমগী প্রোপর্তী রাইত ফংহনবা, পেপরশিং ফংহনবা অসি অসিগুম্না ওইদে, গবর্নমেন্তকী পেপরশিংগী মতুংদা অতোপ্পা পেপর অমা লাক্লে হায়রসি, মসিনা অদোমগী পুন্সিদা করম্না অচৌবা অহোংবা অমা পুরকপগে?

সঙ্গীতা – হোয় সর, অচৌবা অহোংবা অমা লাক্লে। মমাংদা পেপর লৈরমদে, পর্মেনেন্ত পেপর লৈরমদে, সর, ঐখোয়না ফংলিবা পর্মেনেন্ত পেপর অসিনা খুঙ্গংদা লৈরি হায়বা ঐখোয়গী থাজবা অদুসু হেনগৎহল্লে অমসুং মসিদা ঐখোয়না য়াম্না নুংঙাইবা ফাওই।

প্রধান মন্ত্রী – অদোম্না হৌজিক্কী মতমদা নখোয়না নখোয়গী দোক্যুমেন্তশিং অদু ফংলবা মতুংদা করি তৌবগে?

সঙ্গীতা – হোয়, ঐখোয়না পেপরশিং অদু ফংলে। ঐহাক্না প্রধান মন্ত্রী অৱাস য়োজনাগীদমক এপ্লাই তৌখ্রে অদুবু মদু পাংথোকখিদে। ঐহাক্না য়ুমগী থবক খরাসু পাংথোকই।

প্রধান মন্ত্রী – অদোম্না বেঙ্কতগী লোন লৌখ্রবরা?

সঙ্গীতা – হোয় সর, ঐহাক্না হৌজিক ফাওবদা লৌখিদ্রি, হৌজিক লৌনবা খল্লি।

প্রধান মন্ত্রী – অদোম্না বেঙ্কতা লোন লৌবা পাম্বিবরা?

সঙ্গীতা – হোয় সর, ঐহাক হৌজিক লোন লৌনবা খন্নরি।

প্রধান মন্ত্রী – অদু ওইরবদি নহাক্না লোন অদুদা করি তৌগনি?

সঙ্গীতা – ঐনা ঐগী লোন লৌদুনা ঐগী ললোন-ইতিক্কী থবক খরা হেন্না পাকথোক চাউথোকহনবা পাম্মি, সর।

প্রধান মন্ত্রী – অদুনা ঐহাক্না ঐহাক্কী বিজিনেসতা হেন্না মীৎয়েং থমগনি।

সঙ্গীতা – হোয়, করিগুম্বা শেল খরদি কনবা ঙম্লবদি ঐগী অঙাংশিংগী মহৈ তম্বদসু কান্নবা ফংলগনি।

প্রধান মন্ত্রী – লাকপীয়ু সঙ্গীতা জী, অদোমগী থবক অমসুং অদোমগী য়ুম চাউথোকহনবীয়ু, মসিগীদমক অদোমদা য়াইফ-পাউজেল পীজরি। মপু ওইবগী স্কিমগী খুত্থাংদা, অদোমগী খ্বাইদগী চাউবা শীংনবসি লোইখ্রে। নহাক্না নহাক্কী য়ুমগী চে-চাং ফংলে অমসুং নহাকসু সেল্ফ হেল্প গ্রুপকী মেম্বর অমা ওইরে। সঙ্গীতা জী, সঙ্গীতা জী অদোম করিগুম্বা হায়বীয়ু।

সঙ্গীতা – চহি 60নি। ঐখোয়দা মতম চুপ্পগী ওইবা চে-চাং অমত্তা লৈরমদে সর, ঐখোয়না মসি মপু ওইবা স্কিমগী খুত্থাংদা ফংখি, সর ঐহাক্না অদোমগী মফমদা য়াম্না থাগৎপা ফোংদোকচরি।

প্রধান মন্ত্রী – ফরে, অদোমগী য়াইফ-পাউজেল অসি ঐগী খ্বাইদগী চাউবা পাঙ্গলনি। অদোমসু সেল্ফ হেল্প গ্রুপতা থবক তৌরি অমসুং ঐখোয়গী সরকারনা নুপীগী SHGশিংদা লেপ্পা লৈতনা মতেং পাংলি। য়েংবিয়ু, মপু ওইবগী স্কিম অসিনা খুঙ্গং পুম্ববু ওন্থোক্কনি। চঙবীয়ু, ঐখোয়বু মীওই কয়ানা ঙাইদুনা লৈরি, হৌজিক কনা লৈবগে, কনাদা চৎকদগে।

প্রোগ্রাম কোওর্দিনেতর – জম্মু অমসুং কাশ্মীর। হৌজিক প্রধান মন্ত্রীনা জম্মু অমসুং কাশ্মীরগী সাম্বা জিলাগী অতোপ্পা মপু ওইবগী কান্নবা ফংলবা অমসুং প্রোপর্তী কার্দ হোল্দর শ্রী বীরেন্দ্র কুমারজীগা ৱারী শানগনি।

প্রধান মন্ত্রী – হেলো বীরেন্দ্রজী।

বীরেন্দ্র – হেলো

প্রধান মন্ত্রী – বীরেন্দ্র জী, অদোমগী মরমদা ঐঙোন্দা খংহনবীগনু।

বীরেন্দ্র – প্রধান মন্ত্রীজী, ঐহাক লৌমী অমনি অমসুং ঐহাক অমসুং ঐহাক্কী ইমুং-মনুংনা ঐহাক্না প্রোপর্তী কার্দ ফংবদা য়াম্না নুংঙাইবা ফাওই। ঐখোয়না হায়রিবা লমদম অসিদা চহি কয়াদগী লৈরি অমসুং হৌজিক মসিগী দোক্যুমেন্তশিং ফংলবা মতুংদা ঐহাক্কী থম্মোয়দা চাউথোকচবা ফাওই। প্রধান মন্ত্রী জী, মসিগীদমক্তা ঐহাক্না অদোমগী মফমদা য়াম্না থাগৎচরি।

প্রধান মন্ত্রী – হোয়, মমাংদা কার্দ অমসুং দোক্যুমেন্ত লৈরমদে অমসুং অতোপ্পা খুঙ্গংগী মীওইশিংদসু লৈরমদবা য়াই।

বীরেন্দ্র – সর, ঐখোয়গী খুঙ্গংগী মীওইশিংগী মরক্তগী কনা অমত্তনা চে-চাং অমত্তা লৈতে। খুঙ্গং অসিদা চহি 100 হেন্না চহি কয়াদগী লৈরক্লবা মীওই কয়া অমা লৈরি, অদুবু মখোয়গী দোক্যুমেন্তশিং লৈতে। হৌজিক, খুঙ্গংগী মীপুম খুদিংমক্না মপু ওইবগী স্কিমগী মখাদা ঐখোয়না ফংলিবা চে-চাংশিং অসিদা নুংঙাইবা ফাওই।

প্রধান মন্ত্রী – ফরে, ঐখোয়না প্রোপর্তী কার্দ ফংলে, মসিনা অদোমগী পুন্সিদা করি অহোংবা পুরক্লে?

বীরেন্দ্র – ঐহাক্না প্রোপর্তী কার্দ ফংলে, অদুবু ঐহাক্কী লমশিংগী মনুংদা অমা ৱাথোক লৈ। মসিগী প্রোপর্তী কার্দ অসিনা মরম ওইদুনা, ঐগী লমশিংগী মরক্তা লৈবা ৱাথোক অদুসু লোইশিনখ্রে। হৌজিক্তি, মসিগী প্রোপর্তী কার্দ অসিনা মরম ওইদুনা, ঐহাক্না ঐহাক্কী লম অদু বন্ধোপ থমদুনা বেঙ্কতগী লোন লৌবা ঙম্লে অমসুং ঐহাক্কী য়ুম অদু শেমদোকপা ঙম্লে অমসুং ঐহাক্কী ইমুংগী শেল-থুমগী ফিভম অদু মপাঙ্গল কনখৎহনবা ঙম্লে।

প্রধান মন্ত্রী – ফরে, অদোমগী খুঙ্গংদা, অতোপ্পা মীওইশিংনা মপু ওইবা স্কিম অসিগী কান্নবা লৌখ্রবরা? মদুদসু অহোংবা লৈব্রা?

বীরেন্দ্র – হোয়, সর, অহোংবা অমা লাক্লে, প্রধান মন্ত্রীজী। মপু ওইবগী স্কিমগী মখাদা ঐখোয়গী খুঙ্গংদা প্রোপর্তী কার্দ অমা হেক্তা ফংলবসু, খুঙ্গংগী মীওই খুদিংমক্কী মপু ওইবগী হক অদু হৌজিক ময়েক শেংনা লেপ্লে। লম অমসুং লল্লোন ইতিক্কা মরী লৈনবা ৱারোইশিন পুরকপা ঙম্বনা মরম ওইদুনা খুঙ্গংগী মীওইশিংগী মায়কৈদগী ঐহাক্না থাগৎপা ফোংদোকচরি।

প্রধান মন্ত্রী – ভিরেন্দ্র জী, অদোম পুম্নমক্কা ৱারী শানবদা নুংঙাইবা ফাওই, ঐহাক নুংঙাইবা ফাওই। হোয় সর, অমসুং মসি ঐহাক্কীদমক্তা য়াম্না নুংঙাইবা ৱাফম অমনি মদুদি অদোম্না মপু ওইবগী স্কিমগী মখাদা ফংলকপা কার্দ অদু য়ুমগী পেপর অমা ওইনা খনবা খক নত্তনা, অদোম্না মসি অদোমগী প্রোগ্রেসকী লম্বী অমসু ওইহল্লি। ঐহাক্না অদোমদা য়াইফ-পাউজেল পীজরি। য়াম্না ইংবা ৱেদরনি, জম্মু অমসুং কাশ্মীরগী মীপুম খুদিংমক্না মখোয়গী হকশেলগীদমক্তা চেকশিনগদবনি। অদোমবু হন্না হন্না নুংঙাইবা ফোংদোকচরি।

বীরেন্দ্র – থাগৎচরি সর।

প্রোগ্রাম কোওর্দিনেতর – হৌজিক ঐহাক্না ইকাই খুম্নরবা প্রধান মন্ত্রীবু ৱা ঙাংবীনবা হায়জরি।

খুরুমজরি!

ঙসি অসি লৈবাক অসিগী খুঙ্গংশিং, লৈবাক অসিগী খুঙ্গংগী শেন্মিৎলোনগীদমক য়াম্না পুৱারী ওইরবা নুমিৎ অমনি। রাজ্য কয়াগী শক্নাইরবা গবর্নরশিং অসি প্রোগ্রাম অসিগা মরী লৈনৈ। ওরিশা, ছত্তিসগর, মধ্য প্রদেশ, রাজস্থান, য়ু.পি., মহারাস্ত্র অমসুং গুজরাতকী মুখ্য মন্ত্রীশিংসু ঐখোয়গা লোয়ননা শরুক য়ারি। জম্মু অমসুং কাশ্মীরগী লেফতেনেন্ত গবর্নর, লদাখকী লেফতেনেন্ত গবর্নরসু ঐখোয়গা লোয়ননা য়াওরি। কেন্দ্রগী মন্ত্রীমন্দলগী ঐহাক্কী মরুপশিং লৈবাক অসিগী তোঙান তোঙানবা মফমশিংদা তোঙান তোঙানবা প্রোগ্রামশিংদা শরুক য়ারি। রাজ্য সরকারশিংগী মন্ত্রীশিং, এম.পি.শিং অমসুং এম.এল.এ.শিং, অতোপ্পা মীয়ামগী মীহুৎশিংসু মফম অসিদা শরুক য়ারি।

গ্রাম পঞ্চায়ৎ লিশিং কয়াগা মরী লৈনবা মরুপশিং, SVAMITVA য়োজনাগী কান্নবা ফংলবা মীওই লাখ কয়াগা মরী লৈনবা মরুপশিং, মসি মশাগী ওইনা য়াম্না পাক চাউবা অমসুং অচৌবা প্রোগ্রাম অমনি অমসুং অদোম পুম্নমক্না মসিদা য়াম্না পুক্নিং চিংশিন্দুনা শরুক য়াবীরি। ঐনা অদোম পুম্নমকপু থাগৎচরি।

মরুপশিং,

চহি মঙাগী মমাংদা SVAMITVA য়োজনা হৌদোকখি। মসিনা মরম ওইদুনা খুঙ্গংশিংদা লৈবা মীওইশিংনা মখোয়গী য়ুমগী লিগেল প্রুফ ফংলগনি। মফম খরদা মসিবু ঘারাউনি হায়না কৌই, মফম খরদা মসিবু অধিকর অভিলেখ হায়না কৌই, মফম খরদা মসিবু প্রোপর্তী কার্দ হায়না কৌই, মফম খরদা মসিবু মালমত্তা পত্রা হায়না কৌই, মফম খরদা মসিবু রেসিদেন্সিএল লেন্দ লিজ হায়না কৌই। মমিংশিং অসি তোঙান তোঙানবা রাজ্যশিংদা খেন্নৈ, অদুবু মসি মপু ওইবগী সর্তিফিকেৎশিংনি। হৌখিবা চহি 5দা, অসিগুম্বা মপু ওইবা কার্দ অসি চাউরাক্না মীওই করোর 1.5দা পীখ্রে। ঙসিদি, প্রোগ্রাম অসিগী মখাদা ইমুং লাখ 65 হেনবনা মসিগী ওনরশিপ কার্দশিং অসি ফংখ্রে। হায়বদি, মপু ওইবগী স্কিম অসিগী মখাদা, খুঙ্গংগী মীওই করোর 2.25 রোমনা মখোয়গী য়ুমগী পর্মিনেন্ত লিগেল দোক্যুমেন্ত ফংখ্রে। ঐনা মখোয় পুম্নমকপু থাগৎচরি, ঐগী য়াইফ-পাউজেল পীজরি। ঙসিগী প্রোগ্রাম অসিগী মতুং ইন্না, লম অসিগা মরী লৈনবা সরকারগী চে-চাংশিং ফংলবশিং, মখোয়না মদুগী কান্নবা মতৌ করম্না লৌবা য়াগনি, ঐহাক্না ৱারী শাখিবা অদুদগী অদোম্না ৱাখল্লোন কয়া অমা ফংগনি।

মরুপশিং,

21শুবা চহি চাগী মালেম অসিদা, ক্লাইমেৎ চেঞ্জ, ঈশিংগী অৱাবা, হকশেলগী অৱাবা, লাইচৎ অসিনচিংবা কয়া অমা লৈরি। অদুবু মালেমগী মায়কৈদা অতোপ্পা অচৌবা শীংনবা অমা লৈরি। মসিগী শীংনবসি মপু ওইবা হকশিং, মপু ওইবগী অয়াবা পীরবা চে-চাংশিংনি। চহি কয়াগী মমাংদা, য়ুনাইতেদ নেসন্সনা মালেমগী লৈবাক কয়াদা লৈবা লমগী মপু ওইবগী মতাংদা খন্ন-নৈনবা অমা পাংথোকখি। মালেমগী লৈবাক কয়াদা, মীওইশিংনা পর্মিনেন্ত লিগেল দোক্যুমেন্তশিং লৈতে হায়বসি স্তদী অমনা উৎলি। লায়রবগী চাং হন্থহন্নবগীদমক্তা, মীওইশিংদা মপু ওইবা হকশিং লৈহনবা অসি য়াম্না মরু ওই হায়না য়ুনাইতেদ নেসন্না ময়েক শেংনা ফোংদোক্লি। মালেমগী শক্নাইরবা ইকনোমী অমনা প্রোপর্তী রাইতকী শীংনবগী মতাংদা লাইরিক অমা মপুং ফানা ইখ্রে। অমসুং লাইরিক অসিদা, মহাক্না হায়খি খুঙ্গংশিংদা লৈবা মীওইশিংগী অপীকপা প্রোপর্তী অসি দেদ কেপিতেলনি। হায়বদি, মসিগী প্রোপর্তী অসি মিং লৈতবা প্রোপর্তী মখল অমনি। মরমদি খুঙ্গংগী মীওইশিং, লাইরবশিংনা, পোৎলম অদুগী মহুৎ শিন্দোক্তুনা ত্রাঞ্জেক্সন অমত্তা পাংথোকপা ঙমদে। মসিনা ইমুং অদুগী শেল-থুম হেনগৎহনবদা মতেং পাংবা ঙমদে।

মরুপশিং,

মালেম অসিনা মায়োক্নরিবা অচৌবা শীংনবসিদগী ভারত্তা অকাইবা পীবা ঙমখিদে। ঐখোয়গী ফিভম অসিসু মান্নরি। ভারতকী খুঙ্গংশিংদা লুপা লাখ কয়া অমসুং করোর কয়াগী প্রোপর্তী লৈজরবসু, মদুগী মমল অদুদি লৈতে হায়বসি অদোম্না খঙই। মরমদি, মীশিংনা মখোয়গী য়ুমগী লিগেল ওইবা দোক্যুমেন্তশিং লৈতবনা মরম ওইদুনা য়ুমগী মপু ওইবগী মতাংদা য়ানিংদবা লৈ। মফম কয়াদা, মপাঙ্গল লৈবা মীওইশিংনা য়ুমশিং অদুদা লৈরম্মি। লিগেল দোক্যুমেন্তশিং য়াওদনা, বেঙ্কশিং ফাওবা অসিগুম্বা প্রোপর্তীশিং অসিদগী খোঙথাং মরি লাপ্না লৈগনি। মসি দিকেদ কয়াদগী তৌদুনা লাক্লি। মমাংগী সরকারশিংনা মসিগী মাইকৈ অসিদা অকক্নবা খোঙ!থাং খরা লৌখৎলম্লবদি অফবা ওইরমগনি, অদুবু মখোয়না মসিগী মাইকৈ অসিদা করিসু তৌখিদে। মরম অসিনা, ঐখোয়গী সরকার অসি 2014দা শেমখিবা মতমদা, ঐখোয়না প্রোপর্তী পেপরশিংগী শীংনবশিং অসি থেংননবা ৱারেপ লৌখি। সেন্সিতিব ওইবা সরকার অমত্তনা মখোয়গী খুঙ্গংগী মীওইশিংবু অসিগুম্বা খুদোংচাদবা অমদা থাদোকপা ঙম্লোই। অমসুং ঐখোয়না মীপুম খুদিংমক্কী চাউখৎপা পাম্মি, ঐখোয়না মীপুম খুদিংমক্কী থাজবসু পাম্মি, ঐখোয়গী মন্ত্রী রাজীব রঞ্জনজীনা মসিবু য়াম্না ফজনা শন্দোক্না তাকখি। মরম অদুনা, ঐখোয়না SVAMITVA য়োজনা হৌদোকখি। ঐখোয়না ৱারেপ লৌখি মদুদি দ্রোনশিংগী মতেংগা লোয়ননা লৈবাক অসিগী খুঙ্গং খুদিংমক্তা য়ুমশিংগী লমগী মেপিং তৌগনি, খুঙ্গংগী মীওইশিংদা মখোয়গী রেসিদেন্সিএল প্রোপর্তীগী চে-চাংশিং পীগনি।

ঙসিদি, ঐখোয়না স্কিম অসিগী কান্নবশিং অসি উবা ফংলি, খুঙ্গংগী লায়রবশিংগীদমক থবক তৌবা ঙমখিবদা ঐখোয়না নুংঙাইবা ফাওই। ঐহাক্না SVAMITVA য়োজনাগী কান্নবা ফংলবশিংগা ৱারী শানখি। স্কিম অসিনা মখোয়গী পুন্সিদা করি অহোংবা পুরক্লিবগে, হৌজিক মখোয়না মখোয়গী প্রোপর্তীদা বেঙ্কতগী মতেং করম্না ফংলি। অদোমগী লম লৈরম্মি, অদোম্না মফম অদুদা লৈরম্মি অদুবু অদোমগী দোক্যুমেন্তশিং লৈরমদে, সরকারনা মসিগী প্রোব্লেম অসি কোকহনগদবনি অমসুং মরম অদুনা ঐখোয়না থবক অসি পায়খৎলি অমসুং মসি তৌরি অমসুং মখোয়গী ৱারী শাবদা ঐহাক্না মখোয়গী মায়থোংশিংদা হরাওবা, নুংঙাইবা, থাজবা, অনৌবা থবক অমা তৌবগী মঙলানশিং অদু উবা ফংই।

ইচিল-ইনাওশিং,

ঐখোয়গী লৈবাক অসিদা খুঙ্গং লাখ 6 হেন্না লৈরি। খুঙ্গংশিং অসিগী শরুক তঙ্খাইদা দ্রোনশিংনা সর্ভে তৌখ্রে। লিগেল দোক্যুমেন্তশিং ফংলবা মতুংদা, মীওই লাখ কয়ানা মখোয়গী য়ুমশিং অমসুং মখোয়গী প্রোপর্তীশিংদা বেঙ্কতগী লোন লৌখ্রে। শেল অসিগা লোয়ননা মখোয়না খুঙ্গংদা মখোয়গী অপীকপা ললোন-ইতিক্কী থবকশিং হৌরে। মসিগী মনুংদা অয়াম্বদি অপীকপা অমসুং ময়াই ওইবা লৌমীগী ইমুংশিংনি। মখোয়গীদমক্তদি, হায়রিবা প্রোপর্তী কার্দশিং অসি শেন্মিৎলোনগী সেক্যুরিতীগী অচৌবা গেরেন্তী অমা ওইরে।  ঐখোয়গী দলিত, শোত্থরবা অমসুং ত্রাইবেল ইমুংশিং অসি আইন্না য়াদবা এনক্রোচমেন্তশিং অমসুং কোর্ত্তা মতম শাংনা চয়েৎনবা কয়া অসিনা খ্বাইদগী অৱাবা পীরি অমসুং শোকহল্লি। হৌজিক, লিগেল প্রুফ ফংলকপগা লোয়ননা, মখোয়না হায়রিবা ক্রাইসিস অসিদগী কোকহনবা ঙম্লে। খুঙ্গং খুদিংমক্তা প্রোপর্তী কার্দশিং অসি শেম্লবা মতুংদা লুপা করোর লাখ 100 হেনবগী শেন-থুমগী থবকশিং পায়খৎপগী লম্বী হাংদোক্লগনি হায়না পানরি। লৈবাক অসিগী শেন্মিৎলোনদা করি করম্বা কেপিতেল হাপচিনগনি হায়বদু অদোম্না খনবা য়াই।

মরুপশিং,

ঙসিদি ঐখোয়গী সরকারনা গ্রাম স্বরাজবু মপুং ফানা ইকাই খুম্নবা উৎতুনা পুরক্নবা হোৎনরি। মপু ওইবা স্কিমগা লোয়ননা খুঙ্গং চাউখৎপগী থৌরাং অমসুং থবক পায়খৎপা অসি হৌজিক য়াম্না ফগৎলক্লি। ঙসিদি ঐখোয়দা ময়েক শেংবা মেপশিং লৈরগনি, মী তাবা মফমশিং খঙবা ঙম্লগনি, মরম অদুনা চাউখৎ থৌরাংগী থবকশিং অসিসু ময়েক শেংনা থৌরাং তৌরগনি অমসুং ঐখোয়না হান্ননা লান্না থৌরাং তৌবনা মরম ওইদুনা থোক্লকখিবা অশোই-অঙাম অমসুং অৱা-অনাশিং অসিদগীসু কোকহনবা ঙম্লগনি। করম্বা লম অসি পঞ্চায়ৎ অদুগীনি অমসুং করম্বা লম অসি পেসত্যুরনি হায়বগী মতাংদা য়ানদবা কয়া লৈ। হৌজিক্তি, প্রোপর্তী রাইৎ ফংহন্দুনা, গ্রাম পঞ্চায়ৎশিংগী প্রোব্লেমশিংসু লোইশিনগনি অমসুং মখোয়সু শেন্মিৎলোনগী ওইনা মপাঙ্গল কনখৎহনগনি। খুঙ্গংদা মৈ চাকপগী থৌদোকশিং, ঈশিং-ঈচাউ, চীং নীংখাইবা, অমসুং অসিগুম্বা খুদোংথীবা কয়া থোকই। প্রোপর্তী কার্দশিং লৌদুনা, দিজাস্তর মেনেজমেন্ত অসি হেন্না ফগৎলগনি, দিজাস্তর থোকপা মতমদা মতিক চাবা ক্লেম অমা লৌবা অসি লায়গনি।

মরুপশিং,

লৌমীশিংগী লমগী মতাংদা য়ানদবা কয়া লৈ হায়বা ঐখোয়না খঙই। লমগী দোক্যুমেন্তশিং ফংবদা অৱাবা লৈ। কনাগুম্বনা পাৎৱারীদা অমুক হন্না চৎকদবনি, তেহসিলগী অকোইবদা চৎকদবনি। মসিনা লল্লোন-ইতিক্কী লম্বীসু হাংহল্লি। হায়রিবা প্রোব্লেমশিং অসি হন্থহন্নবা, লমগী রেকোর্দশিং দিজিতেলাইজ তৌরি। মপু ওইবা অমসুং ভু-আধার – হায়রিবা সিস্তেম অনি অসি খুঙ্গংগী চাউখৎপগী য়ুম্ফম ওইগদৌরিবনি। ভু-আধারগী খুত্থাংদা লম অদুদা অখন্নবা মশক অমা পীখ্রে। ভু-আধার নম্বর করোর 23 রোম ইসু তৌখ্রে। মসিগা লোয়ননা, করম্বা প্লোৎনা কনাগীনো হায়বদু খঙবা লায়। হৌখিবা চহি 7-8 অসিদা লমগী রেকোর্দশিংগী চাদা 98 দিজিতেলাইজ তৌখ্রে। লৈবাক অয়াম্বগী মেপশিং অসি হৌজিক দিজিতেলগী মওংদা ফংলে।

মরুপশিং,

মহাত্মা গান্ধীনা হায়রম্মি- ভারত অসি খুঙ্গংশিংদা লৈরি, ভারতকী থম্মোয় অসি খুঙ্গংশিংদা লৈ। পুজিয়া বাপুগী ৱাখল্লোন অসি হৌখিবা চহি তরা অসিদা মংফাওনহনখ্রে। হৌখিবা চহি 10দা মৈ ফংলবা ইমুং করোর 2.5 হেনবগী মনুংদা অয়াম্বদি খুঙ্গংশিংদগীনি। হৌখিবা চহি 10দা তোইলেৎ ফংলবা ইমুং করোর 10 হেনবগী মনুংদা অয়াম্বনা খুঙ্গংশিংদগীনি। উজ্জ্বলা গ্যাস কনেক্সন ফংলবা ইচে-ইচল করোর 10গী মনুংদা অয়াম্বনা খুঙ্গংশিংদা লৈরি। হৌখিবা চহি মঙাদা তেপ ৱাতর ফংলবা ইমুং করোর 12 হেন্না খুঙ্গংশিংদগীনি। বেঙ্ক একাউন্ত হাংবা মীওই করোর 50 হেনবগী মনুংদা অয়াম্বনা খুঙ্গংশিংদগীনি। হৌখিবা দিকেদ অমদা আয়ুশ্মান আরোগ্য মন্দির লাখ 1.5 হেন্না শাখ্রে অমসুং মখোয়শিং অসি অয়াম্বনা খুঙ্গংশিংদা লৈদুনা খুঙ্গংশিংগী মীয়ামগী হকশেলগীদমক থবক তৌরি। নীংতম্লবা মতুং দিকেদ কয়াগী মমাংদা, ঐখোয়গী খুঙ্গংশিং অমসুং খুঙ্গংশিংদা লৈরিবা মীওই করোর কয়া অসি অসিগুম্বা মরুওইবা খুদোংচাবশিং ফংলমদে। ঐখোয়গী দলিত, শোত্থরবা অমসুং ত্রাইবেল খুন্নাইগী ইমুংশিং অসি খ্বাইদগী কান্নবা ফংদ্রি। হৌজিক্তি হায়রিবা ইমুংশিং অসিনা মসিগী ফেসিলিতী পুম্নমক্তগী খ্বাইদগী কান্নবা ফংলি।

মরুপশিং,

খুঙ্গংশিংদা অফবা লম্বীশিং লৈহন্নবগীদমক হৌখিবা চহি তরা অসিদা মমাংদা অমুক্তা ওইখিদ্রিবা থবক কয়া পায়খৎলে। 2000দা, অতল বিহারী বাজপেয়ীনা প্রধান মন্ত্রী ওইরিঙৈদা, প্রধান মন্ত্রী গ্রাম সরক য়োজনা হৌদোকখি। মদুদগী হৌরগা, খুঙ্গংশিংদা চাউরাক্না কিলোমীতর লাখ 8.25 রোমগী লম্বী শেমখ্রে। চহি কয়া অসিদা কিলোমীতর লাখ 8.25… হৌজিক অদোম্না উবা ফংলি, চহি 10দা ঐখোয়না লম্বী কিলোমিতর লাখ 4.75 শারকখ্রে, মসি হৌখিবা চহি 10দা শারকখিবা লম্বীগী শরুক অমা ওইরি। হৌজিক ঐখোয়না ঙমখৈদা লৈবা অরাপ্পা খুঙ্গংশিংদা কনেক্তিবিতী হেঙ্গৎহন্নবা ভাইব্রেন্ত ভিলেজ প্রোগ্রামসু পায়খৎলি।

অমসুং মরুপশিং,

লম্বী শেম্বদা নত্তনা খুঙ্গংশিংদা ইন্তর্নেৎ ফংহনবা অসিসু ঐখোয়গী মরুওইবা অমনি। 2014গী মমাংদা, লৈবাক অসিগী পঞ্চায়ৎ 100গী মখাদা ব্রোদবেন্দ ফাইবর কনেক্সন লৈরম্মি। হৌখিবা চহি 10দা ঐখোয়না পঞ্চায়ৎ লাখ 2 হেন্না ব্রোদবেন্দ ফাইবর কনেক্তিবিতীগা শম্নহল্লে। 2014গী মমাংদা, লৈবাক অসিগী খুঙ্গংশিংদা কম্মন সর্বিস সেন্তর লাখ অমদগী হন্থনা লৈরম্মি। হৌখিবা চহি 10দা, ঐখোয়গী সরকারনা অনৌবা কমন সর্বিস সেন্তর লাখ 5 হেন্না শেমগৎলে। অমসুং মসি মশীং খক্তা নত্তে, হায়রিবা মশীংশিং অসিগা লোয়ননা খুঙ্গংশিংদা খুদোংচাবশিং ফংলে, মোদর্নিতী ফংলে। মমাংঙৈদা শহরশিংদা মীয়াম্না উরম্বা খুদোংচাবশিং অদু হৌজিক খুঙ্গংশিংদা ফংলে। মসিনা খুঙ্গংশিংদা খুদোংচাবশিং হেনগৎহনবতা নত্তনা শেন্মিৎলোনগী মপাঙ্গলসু হেনগৎহল্লি।

মরুপশিং,

2025সু খুঙ্গংশিং, লৌমীশিংগীদমক অচৌবা ৱারেপশিং লৌদুনা হৌখ্রে। সরকারনা প্রধান মন্ত্রী ফাসল বিমা য়োজনা মখা চত্থনবা ৱারেপ লৌখ্রে। মসিগী মখাদা হৌজিক ফাওবদা লৌমীশিংনা চাউরাক্না লুপা করোর লাখ 1.75গী ক্লেমগী শেনফম ফংখ্রে, ইন্সুরেন্সকী শেনফম ফংখ্রে। মালেমদা মমল য়াম্না হেনগৎলক্লিবা DAP ফর্তিলাইজরগী মতাংদা অতোপ্পা ৱারেপ অমসু লৌখ্রে। লৌমীশিংনা মমল হোংবা ফর্তিলাইজরশিং ফংহন্নবা সরকারনা লুপা করোর লিশিং কয়াগী এরেঞ্জমেন্তশিং অমুক হন্না তৌখ্রে। হৌখিবা দিকেদ অমদা, লৌমীশিংদা মমল হোংবা ফর্তিলাইজর ফংহন্নবা লুপা করোর লাখ 12 চাদিং তৌখ্রে। মসি 2014গী মমাংগী দিকেদকা চাংদম্নবদা চাউরাক্না শরুক অনি ওইরি। প্রধান মন্ত্রী কিসান সম্মান নিধিগী মখাদা হৌজিক ফাওবদা লুপা করোর লাখ অহুম অমসুং মঙাগী চাংদা লৌমীশিংগী একাউন্তশিংদা য়ৌখ্রে। মসিনা লৌমীশিংগী য়াইফ-থৌরাংগীদমক কেন্দ্র সরকারনা কত্থোক্লিবা অদু উৎলি।

মরুপশিং,

চাউখৎলবা ভারত অমা শেমগৎপদা নুপীগী শক্তিগী অচৌবা থৌদাং লৈ। মরম অসিনা, হৌখিবা চহি তরা অসিদা, ঐখোয়না মরুওইবা স্কিম খুদিংমক্তা মমা অমসুং মচানুপীশিংগী শক্তি হেনগৎহনবগী থৌদাং অদু থম্লি। বেঙ্ক সখি অমসুং বিমা সখিগুম্বা স্কিমশিংনা খুঙ্গংগী নুপীশিংদা অনৌবা খুদোংচাবশিং ফংহল্লে। লাখপতি দিদি য়োজনা অসিনা লৈবাক অসিদা নুপী করোর 1.25 হেন্না লাখপতি দিদি ওইহল্লে। SVAMITVA য়োজনা অসিনা নুপীশিংগী প্রোপর্তী রাইৎসু মপাঙ্গল কনখৎহল্লে। রাজ্য কয়াদা, নুপীশিংগী মমিংসু মপুরোইবগা লোয়ননা প্রোপর্তি কার্দতা য়াওরি। মফম খরদদি, অহানবা মিং অসি লোয়নবীগী ওই, অদুগা অতোপ্পা মফম খরদদি অনিশুবা মিংনি, অদুবু মসি মখোয় অনিমক্না শরুক য়াদুনা পাংথোকই। পি.এম. আৱাস য়োজনাগী মখাদা লায়রবশিংদা পীরকপা য়ুম অয়াম্বসু নুপীশিংগী মিংদা রেজিস্তর তৌখ্রে। অমসুং মসি য়াম্না নুংঙাইবা থৌওং অমনি মদুদি SVAMITVA য়োজনাগী দ্রোনশিংনা ঙসি নুপীশিংদা মপু ওইবা হকশিং পীবদা মতেং পাংলি। দ্রোনশিংনা SVAMITVA য়োজনাগী মেপ্পিংগী থবকশিং পাংথোক্লি। নমো দ্রোন দিদি য়োজনাগী খুত্থাংদা খুঙ্গংগী ইচিল-ইনাওশিংনা দ্রোন পাইলোৎশিং ওইরক্লি। মখোয়না দ্রোনশিং শিজিন্নদুনা লৌউ-শিংউবদা মতেং পাংলি অমসুং অহেনবা শেন্দোং ফংলি।

মরুপশিং,

SVAMITVA য়োজনাগী খুত্থাংদা, ঐখোয়গী সরকারনা খুঙ্গংগী মীওইশিংদা ভারতকী খুঙ্গংগী পুন্সিদা মপুং ফানা অহোংবা পুরকপা ঙম্বা অসিগুম্বা মপাঙ্গল অসি পীরি। ঐখোয়গী খুঙ্গংশিং অমসুং ঐখোয়গী লায়রবশিং অসি মপাঙ্গল কনখৎলবদি, চাউখৎলবা ভারতকী মায়কৈদা ঐখোয়গী খোঙচৎ অসিসু নুংঙাইবা ওইরগনি। হৌখিবা চহি তরা অসিদা খুঙ্গংশিং অমসুং লায়রবশিংগী য়াইফনবা লৌখৎখিবা খোঙথাংশিংগী মতুং ইন্না, মীওই করোর 25না লায়রবদগী থোরকপা ঙমখ্রে। ঐহাক্না থাজবা থম্লি মদুদি SVAMITVAগুম্বা স্কিমশিং অসিগা লোয়ননা ঐখোয়না খুঙ্গংশিংবু চাউখৎপগী মপাঙ্গল লৈবা সেন্তরশিং ওইহনবা ঙমগনি। অমুক্কা হন্না, অদোম পুম্নমকপু য়াইফ-পাউজেল পীজরি। থাগৎচরি!

****