ভারতকী প্রধানমন্ত্রী

গুজরাতকী মুখ্য মন্ত্রী শ্রী ভুপেন্দ্র ভাই পতেলজী. নভসারীগী এম.পি. অমসুং কেন্দ্র সরকারদা ঐগী মরুপ ওইরিবা, কেন্দ্রগী মন্ত্রী ইনাও সি.আর. পতেল, পঞ্চায়ৎ মেম্বরশিং অমসুং স্তেজতা ফম্মিবা লাখপতি দিদিশিং, অতৈ মীয়ামগী মীহুৎশিং অমসুং মশিং য়াম্না মফম অসিদা তিনবীরিবশিং, মরু ওইনা ঐগী ইমাশিং, ইচে-ইচলশিং অমসুং ইচানুপীশিং, পুম্নমকপু খুরুমজরি!

নুমিৎ খরনিগী মমাংদা ঐহাক্না মহা কুম্ভদা ইমা গঙ্গাগী থৌজালশিং ফংজখি। ঙসি ঐহাক্না নারী শক্তিগী মহা কুম্ভদা থৌজালশিং ফংজরি। ঙসি নুপীশিংগী নুমিৎ অসিদা ঐগী ইমা লৈবাক গুজরাত্তা অমসুং ঐগী ইমাশিং, ইচে-ইচলশিং অমসুং ইচানুপীশিংনা মশিং য়াম্না তিল্লিবা মফম অসিদা ঐহাক্না অখন্নবা নুমিৎ অসিদা নখোয়গী মীনুংশি আমসুং থৌজালশিংগীদমক নারী শক্তিবু ইকাই খুম্নবা উৎচরি। গুজরাতকী লমদম অসিদগী ঐহাক্না ইরৈবাকচা পুম্নমক্তা, লৈবাক অসিগী ইমা অমসুং ইচে-ইচল পুম্নমক্তা নুপীশিংগী নুমিৎকী য়াইফ-পাউজেল পীজরি। ঙসি গুজরাত সফল অমসুং গুজরাত মাইত্রি, স্কিম অনি মফম অসিদা হৌদোক্লে। স্কিম কয়াদগী লাকপা শেলশিং অসি নুপীশিংগী বেঙ্ক একাউন্তশিংদা হকথেংননা ত্রান্সফর তৌরি। ঐহাক্না মসিগীদমক্তসু নুংঙাইবা ফোংদোকচরি।

মরুপশিং,

ঙসি অসি নুপীশিংদা কত্থোকপনি, মসি ঐখোয় পুম্নমক্কীদমক নুপীশিংদগী ইথিল লৌনবা নুমিৎ অমনি, নুপীশিংদগী করিগুম্বা খরা তমশিন্নবা নুমিৎ অমনি অমসুং য়াইফরবা নুমিৎ অসিদা ঐহাক্না নখোয় পুম্নমক্তা য়াইফ-পাউজেল পীজরি অমসুং থাগৎপা ফোংদোকচরি। ঙসি, নুমিৎ অসিদা ঐহাক্না চাউথোক্না হায়জরি মদুদি ঐহাক মালেমগী খ্বাইদগী ইনাক খুনবা মীশক অমনি। ঐহাক্না ঐহাক অসি মালেমদা খ্বাইদগী ইনাক খুনবা মীশক অমনি হায়বা মতম অসিদা মীওই কয়ানা অঙকপা পোক্লমগনি ঐহাক্না খঙই, ঙসি ত্রোল তৌনবা আর্মী পুম্বা মফম অসিদা লাক্কনি অদুবু ঐহাক্না অমুক হন্না হায়গনি মদুদি ঐহাক অসি মালেমদা খ্বাইদগী ইনাক খুনবা মীশক অমনি। ঐহাক্কী পুন্সিদা ইমা-ইচে-ইচল-ইচানুপী করোর কয়াগী থৌজালশিং ফংজরি অমসুং থৌজালশিং অসি লেপ্পা লৈতনা হেনগৎলক্লি। অমসুং মসিনা মরম ওইরগা ঐহাক্না ঐহাক অসি মালেমদা খ্বাইদগী ইনাক খুনবা মীশক অমনি হায়রিবনি। ইমাশিং-ইচে-ইচলশিং অমসুং ইচানুপীশিংগী থৌজালশিং অসি ঐহাক্কী খ্বাইদগী চাউবা ইথিল, ঐহাক্কী খ্বাইদগী চাউবা পাঙ্গল, ঐহাক্কী খ্বাইদগী চাউবা লন অমসুং ঐহাক্কী ঙাকলৌ পীরিবা চুঙ্গোইনি।

মরুপশিং,

ঐখোয়গী বেদশিংদা নুপীশিং অসি নারায়নি হায়না কৌই। নুপীদা ইকাই খুম্নবা অসি খুন্নাই অমসুং লৈবাক্কী চাউখৎ মাইকৈদা অহানবা খোঙথাংনি। মরম অসিনা ভারতপু চাউখৎপা ওইহন্নবা, ভারতকী খোঙজেল য়াংনা চাউখৎপা য়ানবগীদমক ঙসি ভারতনা নুপীনা লমজিংবা চাউখৎ-থৌরাংগী লম্বেলদা চৎখি। ঐখোয়গী সরকারনা নুপীশিংগী পুন্সিদা ইকাই খুম্নবা অমসুং খুদোংচাবা অনিমক পীবদা মরু ওইবা মীৎয়েং থমখি। ঐখোয়না মখোয়গীদমক তোইলেৎশিং শাদুনা নুপী করোর কয়াগী ইকাই খুম্নবা হেনগৎহনখি, অমসুং উত্তর প্রদেশকী কাশীগী ঐগী ইচে-ইচলশিংনা তোইলেৎ হায়বা ৱাহৈ অসি হৌজিক শীজিন্নদে, মখোয়না হায় মদুদি মোদীজীনা ইজত গর (হাউস ওফ রেস্পেক্ত) শাবিখ্রে। ঐখোয়না নুপী করোর কয়াগী বেঙ্ক একাউন্তশিং হাংখ্রে অমসুং মখোয়বু বেঙ্কিং সিস্তেমগা কন্নেক্ত তৌখি, ঐখোয়না উজ্জ্বলা সিলিন্দরশিং মখোয়দা পীদুনা মৈখুগুম্বা সমস্যাশিংদগী মখোয়বু ঐখোয়না কনবা ঙমখি। মমাংদা থবক তৌবা নুপীশিংনা মীরোল্লিঙৈ মনুংদা শুপ্নগী চয়োল 12 খক্তগী ছুতি ফংখি। সরকারনা মসি চয়োল 26তা হেনগৎহনখি। ঐখোয়গী মুস্লিম ইচে-ইচলশিংনা চহি কয়া ত্রিপল তলাক্কী মায়োক্তা আইন শেম্নবা দিমান্দ তৌদুনা লাকখি। ত্রিপল তলাক্কী মায়োক্তা অকনবা আইন শেমদুনা ঐখোয়গী সরকারনা মুস্লিম ইচে-ইচল লাখ কয়াগী পুন্সি মাংখিগদবদগী কনবা ঙমখি। জম্মু অমসুং কাশ্মিরদা আর্তিকল 370 চৎনখিবা মতমদা নুপীশিংগী হক কয়া মাংহনখি। করিগুম্বা রাজ্য অদুগী মপালদা কনাগুম্বা অমনা ময়ুম পাল্লবদি মখোয়না মপা-মপুনা পীরম্বা লমশিং অদু লৌবগী হক মাংখি অদুবু আর্তিকল 370 লৌথোকখিবদগী জম্মু অমসুং কাশ্মিরদা লৈরিবা ভারতকী ইচে-ইচলশিং অমসুং ইচানুপীশিংনা মখোয়গী হকশিং অমুক হন্না হৌজিক্তি ফংলে। ভারতকী শরুক অমা ওইজরবসু কাশ্মিরদা লৈরিবা ঐগী ইমা-ইচে-ইচল-ইচানুপীশিংনা মসিগী হক অসি ফংলমদে অমসুং সম্বিধান পাইরিবশিংনা মসি উখিদে। নুপীগী মায়োক্তা চত্থবা থৌওং অসি মখোয়গীদমক নুংনাংবা ৱাফম ওইখিদে। করম্না সম্বিধানবু ইকাই খুম্নবগে হায়বা অদু আর্তিকল 370 লৌথোক্তুনা লৈবাক অসিগী মীয়ামদা মোদীনা কত্থোকখি।

মরুপশিং,

ঙসিদি, খুন্নাইগী থাক্তা, সরকারগী থাক্তা, অচৌবা ইন্সতিত্যুসনশিংদা নুপীশিংগীদমক খুদোংচাবা কয়া অমা শেমগৎলি। রাজনিতী নৎত্রগা শান্ন-খোৎনবগী লম ওইগেরা, জুদিসিএরী নৎত্রগা পুলিস ওইগেরা, নুপীশিংনা সেক্তর খুদিংমক্তা, লম খুদিংমক্তা, লৈবাক অসিগী মাইকৈ খুদিংমক্তা অৱাংবা থাক্তা চংশিল্লি। 2014দগী হৌরগা লৈবাক অসিদা মরুওইবা পোজিসনশিংদা নুপীশিংগী শরুক য়াবগী চাং য়াম্না থুনা হেনগৎলক্লি। 2014গী মতুংদা সেন্ত্রেল গবর্নমেন্ততা খ্বাইদগী মশিং য়াম্বা নুপী মন্ত্রী ওইখি। পার্লিয়ামেন্ততা নুপীশিংগী মীশিংসু য়াম্না হেনগৎলক্লি। 2019দা, অহানবা ওইনা, নুপী এম.পি. 78 ঐখোয়গী পার্লিয়ামেন্তদা ৱাশক লৌখি। 18শুবা লোক সভাদা, হায়বদি, মসিগী মতম অসিদসু, নুপী এম.পি. 74না লোক সভাগী শরুক ওইরি। ঐখোয়গী কোর্তশিং অমসুং জুদিসিএরীদা নুপীশিংগী শরুক য়াবগী চাংসু চপ মান্ননা হেনগৎলক্লি। দিস্ত্রিক্ত কোর্তশিংদা নুপীগী মীশিং অসি চাদা 35 হেনখ্রে। রাজ্য কয়াদা, সিভিল জজ ওইনা নৌনা খল্লবা মীওইশিংগী চাদা 50 নৎত্রগা মসিদগী হেনবসি ঐখোয়গী মচানুপীশিংনি।

ঙসিদি, ভারত অসি মালেমগী খ্বাইদগী চাউবা স্তার্তঅপ ইকোসিস্তেমগী অহুমশুবনি। হায়রিবা স্তার্ত-অপশিং অসিগী শরুক অনিরোমদি নুপীনা দাইরেক্তর ওইনা লৈরি। ভারতনা স্পেস অমসুং স্পেস সাইন্সতা থোইদোক হেন্দোকপা অৱাংবা থাক্তা য়ৌরি। মফম অদুদসু, অচৌবা মিসন অয়াম্বসি নুপী সাইন্তিস্তকী তীম অমনা লুচিংলি। ঙসি মালেমদা খ্বাইদগী মশিং য়াম্বা নুপী পাইলোৎশিং ঐখোয়গী ভারত্তা লৈরে হায়বসি ঐখোয় পুম্নমক্না চাউথোকচবা ফাওই। নভসারিদা পাংথোকখিবা থৌরম অসিদা নারী শক্তিগী শক্তি অদু ঐখোয়না উবা ফংলি। থৌরম অসিগী মপুং ফাবা থৌদাং অসি নুপীশিংনা লৌখি। অসিগুম্লবা অচৌবা থৌরম অমগী সেক্যুরিতীগীদমক লৈরিবা পুলিস অমসুং ওফিসর পুম্নমক নুপীশিংনি। কন্সতেবলশিং, ইন্সপেক্তরশিং, সব-ইন্সপেক্তরশিং, দি.এস.পি.শিংদগী হৌরগা সেনিয়র ওফিসরশিং ফাওবদা, মফম অসিদা সেক্যুরিতীগী থৌরাংশিং অসি নুপীশিংনা পায়খৎলি। মসি নারী শক্তিগী মপাঙ্গলগী খুদম অমনি। মতম খরগী মমাংদা, ঐহাক্না মফমসিগী সেল্ফ-হেল্প গ্রুপকা মরী লৈনবা নখোয়গী ইচে-ইচল খরগা ৱারী শানখি। ঐহাক্কী ইচে-ইচলশিংগী ৱাহৈশিং, অদোম পুম্নমক্কী থৌনা, অদোমগী থাজবা অসিনা ভারত্তা নারী শক্তিগী মপাঙ্গল অসি করিনো হায়বদু উৎলি! মসিনা উৎলি মদুদি মতৌ করম্না ভারতকী নুপীগী শক্তিনা লৈবাক অসিগী চাউখৎপগী লম্বীদা লমজিংবগে। অদোম পুম্নমক্কা উনবদা, চাউখৎলবা ভারত অমগী ৱারেপ অসি তশেংনা মপুং ফাহনগনি হায়বা ঐহাক্কী থাজবা অদু হেন্না মপাঙ্গল কনখৎলে। অমসুং মসিগী ৱারেপ অসি পাংথোকপদা ঐখোয়গী নুপীশিংগী শক্তিনা খ্বাইদগী চাউবা থৌদাং লৌগনি।

ইমাশিং-ইচে-ইচলশিং,

ঐখোয়গী গুজরাত অসি নুপীশিংনা লুচিংদুনা চাউখৎপগী অচৌবা খুদম অমনি। গুজরাতনা লৈবাক অসিদা কোওপরেসনগী মায় পাকপা মোদেল অমা পীখি। সেল্ফ হেল্প গ্রুপশিংগা মরী লৈনবা ইচে-ইচল পুম্নমক্না গুজরাতকী কো-ওপরেসন মোদেল অসি মফমসিগী নুপীশিংগী থবক অমদি কেপাসিতীগী মতেংনা চাউখৎলকপা অদু খঙনরে। ঙসি মালেম শীনবা থুংনা অমুলগী মতাংদা খন্ন-নৈনরি। গুজরাতকী খুঙ্গং খুদিংগী নুপী লাখ কয়ানা শঙ্গোম পুথোকপদা অহোংবা পুরকখ্রে। গুজরাতকী ইচে-ইচলশিংনা মখোয় মশাবু শেল-থুমগী লমদা মপাঙ্গল কনখৎহনবতা নত্তনা খুঙ্গংগী শেন্মিৎলোনদা অনৌবা শক্তিসু পীরম্মি। গুজরাতি নুপীশিংনা লিজৎ পাপদসু হৌদোকখি। ঙসিদি লিজৎ পাপদনা লুপা করোর চাম্মাগী মমল ওইবা ব্রান্দ অমা ওইরক্লি।

ইমাশিং-ইচে-ইচলশিং,

ঐহাক্না নীংশিংলি মদুদি, ঐহাক্না মুখ্য মন্ত্রী ওইনা অদোমগী শেবাদা তৌরিঙৈদা, ঐখোয়গী সরকারনা ইচে-ইচলশিং অমসুং ইচানুপীশিংগী কান্নবশিংবু ৱাখলদা থমদুনা, চিরঞ্জীবি য়োজনা, বেতি বচাও অভিয়ান, মমতা দিবস, কন্যা কেলাৱানি রথ য়াত্রা, কুনৱারবাই নু মামেরু, সাৎ ফেরে সমুহ লগনা য়োজনা, অভায়াম হেল্পলাইন অসিনচিংবা থবক কয়া পায়খৎখি। পোলিসীশিং চুম্না পায়খৎপা মতমদা নুপীশিংগী শক্তি অসি করম্না হেনগৎলক্কদগে হায়বদু গুজরাতনা লৈবাক পুম্বদা উৎখ্রে। ঐহাক্না মিল্ক কোওপরেতিবশিংগী মরমদা হৌজিক্তা ঙাংখি!  গুজরাতনা মসি দাইরীগী থবকশিংগা মরী লৈনবা নুপীশিংগী একাউন্তশিংদা হৌদোকখি। মমাংদদি মসিগুম্বা অসি লৈরমদে, শেল পীবা নৎত্রগা মিল্কমেন অদুনা শেল লৌই। ঐখোয়না মতম অদুদা ৱারেপ লৌখি মদুদি দাইরীদগী শঙ্গোমগী শেনফম অসি ইচানুপীশিংগী একাউন্ততা দিপোজিৎ তৌগনি, কনাগুম্বা অমত্তনা মসি শোকপা য়ারোই, অমসুং ইচানুপীশিংগী একাউন্তশিংদা হকথেংননা শেনফম ত্রান্সফর তৌবা হৌখি। ঙসিসু স্কিম কয়াগী শেল অসি লৈবাক অসিগী কান্নবা ফংলবা মীওই করোর কয়াগী একাউন্তশিংদা য়ৌরে। দাইরেক্ত বেনিফিৎ ত্রান্সফরগী খুত্থাংদা লুপা করোর লিশিং কয়াগী স্কেমশিং লেপখ্রে অমসুং লায়রবশিংনা মতেং পাংলি।

মরুপশিং,

গুজরাত মশাদা, বুজগী অৱাবা তারবা মতুংদা য়ুমশিং অমুক হন্না শাগৎলকপা মতমদা, ঐখোয়গী সরকারনা হায়রিবা য়ুমশিং অসি নুপীশিংগী মিংদা পীখি। হায়বদি, ঐখোয়না চৎনবী অসি হৌরকপদগী সরকারনা শারম্বা য়ুমশিং অসি হৌজিক্তি ইচে-ইচলশিংগী মিংদা পীগনি। ঙসিদি লৈবাক শিনবা থুংনা পি.এম. অৱাস য়োজনা পায়খৎলি। মসিদসু নত্তনা, অঙাংশিংনা স্কুলদা এদমিসন ফংলবা মতমদা, মখোয়গী মিংদা মপাগী মিংখক্তমক ইগনি, ঐহাক্না মমাগী মিংসু ইগদবনি হায়না ৱারেপ লৌখি। 2014দগী হৌরগা, নুপী করোর 3 রোম য়ুমগী মপু ওইখ্রে।

মরুপশিং,

ঙসিদি, মালেম শীনবা থুংনা জল জীবন মিসনগী মতাংদা খন্ন-নৈনরি। জল জীবন মিসনগী খুত্থাংদা লৈবাক অসিগী খুঙ্গং খুদিংদা ঈশিং ফংহল্লি। হৌখিবা চহি 5দা, খুঙ্গং লাখ কয়াদা লৈবা য়ুম করোর 15.5দা পাইপকী ঈশিং ফংহনখ্রে। অসিগুম্বা অচৌবা মিসন অসি মাই পাকহন্নবগীদমক, ঐখোয়না গুজরাত্তা মহিলা পানী সমিতীস, নুপীশিংগী পানী সমিতীস হৌদোক্লে। হৌজিক্তি মসি লৈবাক শীনবা থুংনা চৎলি। পানী সমিতীসনা অচৌবা থৌদাং অমা লৌখি। মহিলা পানী সমিতীসকী মোদেল অসি গুজরাতনা পীরি। ঙসিদি, মোদেল অসিনা লৈবাক শীনবা থুংনা ঈশিংগী অৱাবা কোকহল্লে।

মরুপশিং,

ঐখোয়না ঈশিংগী প্রোব্লেম কোকহন্নবগী মতাংদা ৱারী শানরকপা মতমদা, ঈশিং কনবা হায়বদি ঈশিং কঞ্জার্বেসন অসিসু চপ মান্ননা মরু ওইরকই। ঙসি লৈবাক শীনবা থুংনা কেম্পেন অমা পাংথোক্লি – “কেৎচ দি রেন”! কেৎচ এভরী দ্রোপ ওফ ৱাতর, কেৎচ দি রেন হায়বসিনা, নোংনা তারকপা মফমদা মদুগী ঈশিং অদু মাংহন্দনবা হায়বনি। খুঙ্গংগী ঙমখৈদগী ঈশিং অসি খুঙ্গংদা অদুমক লৈগদবনি অমসুং য়ুমদগী ঈশিং অসি য়ুমদা অদুমক লৈগদবনি, ঈশিং অসিবু য়োকশিনগদবনি! অমসুং ঐহাক্না নুংঙাইবা ফাওই মদুদি ঙসি ঐখোয়গী নভসারীগী এম.পি. সি.আর. পতিলগী লুচিংগী মখাদা লৈবাক অসিনা কেম্পেন অসিদা খুমাং চাউশিল্লি। অমসুং ঐহাক্না খঙলে মদুদি নভসারীগী ইচে-ইচল পুম্নমক্না মসিগী মাইকৈ অসিদা য়াম্না ফবা থবক তৌরি। নুসারীদা নোংগী ঈশিং কনবা ঙম্নবগীদমক্তা পুখ্রি, চেক দাম, বোরৱেল রিচার্জ, কম্ম্যুনিতী সোক পিৎশিংগুম্বা চাউরাক্না লিশিং 5 হেন্না শাবা লোইশিনখ্রে। হায়রিবা অসি দিস্ত্রিক্ত অমদা য়াম্না চাউবা থৌওং অমনি। হৌজিক ফাওবদা নভসারীদা ঈশিং কঞ্জার্বেসনগা মরী লৈনবা থবক কয়া অমা চত্থরি। হৌখিবা নুমিৎ অনি-অহুম অসিদা থবক 1100 হেন্না পাংথোক্লে হায়না ঐঙোন্দা সি.আর.না হৌজিক্তা পাউদমখি। ঙসি ফাওবদা, পেরকোলেসন পিৎ লিশিং অমগী থবক অসি নুমিৎ অমখক্তদা পাংথোক্লি। নভসারী দিস্ত্রিক্ত অসি নোংগী ঈশিং য়োকশিনবদা, হায়বদি ঈশিং কঞ্জার্বেসন তৌবদা গুজরাতকী মকোক থোংবা দিস্ত্রিক্তশিংগী মনুংদা অমনি। মসিগী মায়পাকপগীদমক ঐনা নভসারীগী মমাশিং, ইচে-ইচলশিং অমসুং ইচানুপীশিংবু অখন্ননা থাগৎপা ফোংদোকচরি। ঙসি ঐহাক্না জিলা অমখক্তগী ইমা লাখ কয়াগী মহা কুম্ভ অসি য়েংলি অমসুং মচানুপা অদু য়ুমদা হল্লকপা মতমদা মমা অদুগী মাইথোংদা করম্না হরাও তয়াম্বগে হায়বদু ঐহাক্না উরি। ঙসি মীপুম খুদিংমক্কী মাইথোং মকা লাম্মি অমসুং মসি অদোম্না অহুমশুবা ওইনা প্রধান মন্ত্রী ওইহনখিবা ইচানুপী অদুনি। মসি অদোমগী য়াইফ-পাউজেলগা লোয়ননা ওইরক্লি।

মরুপশিং,

গুজরাতকী নুপীশিংগী শক্তি, গুজরাতকী খুদমশিং অসি মফম অমখক্তদা অকক্নবা ওইদে। মফম অসিদা, পঞ্চায়ত মীখলদা সিৎ 50% নুপীশিংগীদমক রিজর্ব তৌখ্রে। প্রধান সেবক ওইনা দিল্লীদা অদোম্না ঐহাকপু থারকপা মতমদা, ঐহাক্না লৈবাক অসিগীদমক চপ মান্নবা এক্সপরিয়েন্স, চপ মান্নবা কম্মিতমেন্ত লৌখি। লৈবাক অসিনা অনৌবা পার্লিয়ামেন্ত অমা ফংলবা মতমদা, ঐখোয়না পাস তৌখিবা অহানবা বিল অসি নারী শক্তিগী ওইখি। পার্লিয়ামেন্ত বিল্দিং অসিদা ঐখোয়না অহানবা ওইনা পায়খৎখিবা থবক অসি ‌ইচে-ইচলশীংগীদমক্তা ওইখি অমসুং মসিনা ইমা অমসুং ইচে-ইচলশিংগীদমক মোদীগী কত্থোকপা অদু উৎলি। অমসুং নারী শক্তি ভন্দন এক্তকা মরী লৈনবা খ্বাইদগী চাউথোকচনীংঙাই ওইবা ৱাফম অদু করিগীনো হায়বদু অদোম্না খঙবীরব্রা? অচম্বা ইমুংদগী, ত্রাইবেল ইমুংদগী হৌরকখিবা ঐখোয়গী রাস্ত্রপতিনা বিল অসি অয়াবা পীখ্রে। অদোমগী মরক্তগী কনাগুম্বা অমনা এম.পি. নৎত্রগা এম.এল.এ. ওইরক্কদবা মতম অদু কুইদ্রে।

মরুপশিং,

গান্ধীজীনা হায়রম্মি মদুদি লৈবাক অসিগী থৱায় অসি ভারতকী খুঙ্গংদা লৈ। ঙসি ঐহাক্না মসিদা অতোপ্পা ৱাহৈ পরেং অমা হাপচিল্লে। ভারতকী খুঙ্গংগী থৱায় অসি খুঙ্গংগী নুপীশিংদা শক্তি পীনবনি। মরম অসিনা, ঐখোয়গী সরকারনা নুপীশিংগী হকশিং অমসুং নুপীশিংগীদমক অনৌবা খুদোংচাবশিংদা অহেনবা মরুওইবা পীরি। ঙসিদি ভারত অসি মালেমগী খ্বাইদগী চাউবা ইকনোমীগী মঙাশুবা মফমদা লৈরে। লৈবাক অসিগী শেন্মিৎলোনগী খুমাং চাউশিল্লকপগী য়ুম্ফম অসি অদোমগুম্বা নুপী করোর কয়ানা থোল্লি। মসিদা খুঙ্গংগী শেন্মিৎলোন অমসুং নুপীগী সেল্ফ হেল্প গ্রুপশিংনা মরু ওইবা থৌদাং অমা লৌরি। ঙসিদি লৈবাক অসিগী নুপী করোর 10 হেনবনা স্বয়ম সাহায়তা সমুহ, সেল্ফ হেল্প গ্রুপ লাখ 90 হেন্না চলাইরি। মসিগী মনুংদা, গুজরাত খক্তদা সেল্ফ হেল্প গ্রুপ লাখ 3 হেন্না থবক তৌরি। লৈবাক অসিগী শেন্মিৎলোনগী খুমাং চাউশিলহন্নবগীদমক নুপী করোর কয়াগী শেন্মিৎলোন হেনগৎহন্নবা ঐখোয়না ৱাশক লৌরে। ঐখোয়না ইচে-ইচলশিং অসিবু লাখপাতি দিদি ওইহল্লগনি। নুপী করোর 1.5 রোম লাখপতি দিদি ওইখ্রে। লাক্কদৌরিবা চহি 5দা, নুপী করোর 3বু লাখপতি দিদি ওইহন্নবা ঐখোয়না ৱাশক লৌদুনা চংশিল্লি। অমসুং ইচে-ইচলশিংনা য়াম্না থুনা থবক তৌরি, মসিনা তাক্লি মদুদি ঐখোয়না মতম শাংনা ঙাইরোইদবনি; মদুগী মমাংদা থোক্কনি।

ইমাশিং-ইচে-ইচলশিং,

ঐখোয়গী ইচে-ইচলশিংগী মরক্তগী অমনা লাখপতি দিদি অমা ওইরকপা মতমদা, ইমুং পুম্নমক্কী লাইবক হোংই। নুপীশিংনা মখোয়গী থবকশিংদা খুঙ্গংগী অতোপ্পা নুপীশিংসু শরুক য়াহল্লি। অমসুং ঐহাক্না থাজৈ মদুদি মমা অমসুং ইচানুপীশিংনা করিগুম্বা থবক অমা পায়খৎলবসু, থবক অদুগী ইকাই খুম্নবা অদুসু হেনগৎলকই। তপ্না তপ্না য়ুমদগী হৌরকপা থবক অসি শেন্মিৎলোনগী খোঙথাং অমা ওইরকই। সেল্ফ হেল্প গ্রুপশিংগী ওইথোকপা য়াবা অসি হেনগৎহন্নবা ঐখোয়গী সরকারনা হৌখিবা চহি 10দা মসিগী বজেৎ অসি শরুক মঙা হেনগৎহনখ্রে। হায়রিবা সেল্ফ হেল্প গ্রুপশিং অসিদা গেরেন্তী য়াওদনা লুপা লাখ 20 ফাওবগী লোন পীরি, লুপা লাখ 20 অমসুং মদুসু গেরেন্তী য়াওদনা, গেরেন্তী য়াওদনা ফংলি। সেল্ফ হেল্প গ্রুপকী নুপীশিংদা অনৌবা স্কিলশিং অমসুং অনৌবা তেক্নোলোজীগা শম্ননবা পাম্বৈশিংসু পীরি।

মরুপশিং,

ঙসিদি, লৈবাক অসিগী নুপীগী শক্তিনা শিংনবশিংবু মায়থীবা পীদুনা মাংলোমদা চংশিল্লি। ঐখোয়না দ্রোন দিদি য়োজনা হৌরকপা মতমদা, মীওই কয়ানা চীংনবা লৈখি। মখোয়না দ্রোনশিংগুম্বা মোদর্ন তেক্নোলোজী অমসুং খুঙ্গংগী নুপীশিংগী মরক্তা লৈনবা কোওর্দিনেসনদা চিংনখি। মখোয়না খনখি মদুদি, মখোয়না মসি করম্না তৌবা ঙমগনি। অদুবু ঐহাক্না ঐহাক্কী ইচে-ইচলগী হৈশিংবা অমসুং হোৎনবা কনবদা মপুং ফানা থাজবা থম্লি। ঙসি, নমো দ্রোন দিদি অভিয়াননা খুঙ্গংগী শেন্মিৎলোন অমসুং লৌউ-শিংউদা অনৌবা অহোংবা পুরক্লি অমসুং অহোংবা অসিদা লমজিংবা ইচে-ইচলশিংনা লুপা লাখ কয়া ফংলি, মখোয়গী ইকায়খুম্নবা অসি খুঙ্গং পুম্বদা হোংলক্লি। য়ুম, ইমুং-মনুং, মরী-মতাশিং, খুঙ্গং পুম্নমক্না পাইলোৎ দিদি, দ্রোন দিদিবু চাউথোকচবা পোকচরি। অসিগুম্বা মওংদা, বেঙ্ক সখি অমসুং ইন্সুরেন্স সখিগুম্বা স্কিমশিংনা খুঙ্গংগী নুপীশিংদা অনৌবা খুদোংচাবা পীরি। খুঙ্গংগী ইচে-ইচল অমসুং ইচানুপীশিংদা শক্তি পীনবগীদমক্তা কৃশি সখি অমসুং পশু সখি কেম্পেনশিং হৌদোকখ্রে। হায়রিবা অসিগা মরী লৈনবা ইচে-ইচল লাখ কয়া লৈরি, মখোয়গী শেন্থোকসু হেনগৎলক্লি।

ইচে-ইচল অমসুং ইচানুপীশিং,

লৈঙাক্না পায়খৎলিবা থবকশিং অসিগী কান্নবা গুজরাতকী নুপীশিংদা ফংহন্নবা, গুজরাত সরকারনা নুপী লাখ 10 হেন্না লাখপতি দিদি ওইহন্নবা কেম্পেন অমা হৌদোক্লে। মসিগীদমক ঐনা ভুপেন্দ্র ভাই অমসুং গুজরাত সরকারবু থাগৎচরি।

মরুপশিং,

প্রধান মন্ত্রী ওইরবা মতুংদা অহানবা ওইনা লাল কিল্লাদগী লৈবাক মীয়ামদা ৱারোল পীনবগী খুদোংচাবা ফংলবা মতমদা ঐহাক্না ঐহাক্কী অহানবা ৱারোলদা হীরম অমগী মতাংদা ফোংদোকখি। ঐহাক্না হায়খি মদুদি করিগুম্বা মচানুপী অমা নুমিদাং অথেংবা মতমদা য়ুমদা হল্লক্লবদি, মমা অমসুং মপা অনিমক্না মহাকপু কদায়দা চৎলিবগে হায়না হংখি। মহাক্না করিগীদমক্তা থেংবনো? মহাক্না কদায়দা লৈরুই? মখোয়না ৱাহং চাম্মরোম হংই। অমসুং ঐহাক্না ৱাহং অসি হংজখি মদুদি করিগুম্বা মচানুপীশিংনা মপান্দা লৈরগা য়ুমদা থেংনা হল্লক্লবদি, অদোম্না ৱাহং চাম্মরোম হংই, অদুবু করিগুম্বা নুপামচা অমনা নুমিদাং থেংনা হল্লক্লবদি, নহাক্না মহাকপু কদাইদা চৎলিবগে? কনাগা লোয়ননা অদোম চৎলিবনো? অদোম্না করি তৌখি? হায়না হংবীবরা।

নুপীশিংগী মায়োক্তা থোকপা ক্রাইমশিং থিংনবা, হেন্না ফবা খুন্নাই অমা শেমগৎনবা, মসি য়াম্না মরু ওই। হৌখিবা দিকেদ অমদা, ঐখোয়না নুপীশিংগী সেফতীদা য়াম্না ৱাংবা প্রাইওরিতি অমা পীখি। মখোয়গী মায়োক্তা থোকপা ক্রাইমশিং থিংনবা ঐখোয়না আইনশিং অমসুং রেগুলেসনশিং হেন্না কনবা শেম্লে। নুপীশিংগী মায়োক্তা শাথীবা ক্রাইমশিং অথুবা মতমদা ত্রাইএল তৌনবা অমসুং মরাল লৈবা মীওইশিং অথুবা মতমদা চৈরাক পীনবগীদমক ফাস্ত ত্রেক কোর্তশিং শেমখি। হৌজিক ফাওবদা লৈবাক শিনবা থুংনা অসিগুম্বা কোর্ত 800 রোম অয়াবা পীখ্রে অমসুং মখোয়শিং অসিদগী অয়াম্বনা মথৌ তৌবা হৌখ্রে। মসিগী মনুংদা রেপ অমসুং পোক্সোগা মরী লৈনবা কেস লাখ 3 রোমদি অথুবা মতমদা লোইশিনখ্রে। ইচে-ইচলশিং অমসুং অঙাংশিংগা মরী লৈনবা অসিগুম্বা কেস লাখ অহুমগী ৱায়েল পীখ্রে। রেপকুম্বা শাথীবা ক্রাইমশিংদা রেপ তৌরিবশিংবু চৈরাক পীনবগীদমক আইন অসি শেমদোকখিবা অসি ঐখোয়গী সরকারনি অমসুং অসিগুম্বা পাপ তৌরিবশিং অসি শীবগী চৈরাক পীগদবনি, ঐখোয়না আইন অসি শেমদোকখি। ঐখোয়গী সরকারনা ৱুমেন হেল্পলাইন 24×7অসি নুমিৎ খুদিংগী পুং 24, নুমিৎ 365 মপাঙ্গল কনখৎহল্লে। নুপীশিংগীদমক ৱান স্তোপ সেন্তরশিং হৌদোক্লে। অসিগুম্বা সেন্তর 800 রোম লৈবাক শিনবা থুংনা হৌদোকখ্রে। মসিনা নুপী লাখ 10 হেনবদা মতেং পাংলি।

মরুপশিং,

হৌজিক লৈবাক অসিদা ইন্দিয়ন কোদ ওফ জস্তিস চৎনরে, ঐখোয়না বৃতিশকী অমুবা আইন অসি লৌথোক্লে, লৈবাক অসিনা নীংতম্বা ফংলবা চহি 75গী মতুংদা, অদোম পুম্নমক্না ঐঙোন্দা মসিগী অফবা থবক অসি পাংথোকপগী খুদোংচাবা পীখ্রে। মসিদা নুপীশিংগী সেফতীগা মরী লৈনবা প্রোভিজনশিং অসি মখা তানা মপাঙ্গল কনখৎহনখ্রে। নুপী অমসুং অঙাংশিংগী মায়োক্তা চত্থরিবা ক্রাইমশিংগী মতাংদা ইন্দিয়ন কোদতা তোঙানবা চেপ্তর অমা হাপচিনখ্রে। মসি ঐখোয় পুম্নমক্কী, ভিক্তিমগী ইচে-ইচলশিং, খুন্নাইগী, কম্প্লেন্ত অমা লাকখি মদুদি ইচে-ইচলশিংনা ৱায়েল-পথাপ ফংনবগীদমক মতম শাংনা, নুমিৎ কয়া ঙাইদুনা লৈবগী ৱাকৎনি। মসিসু ইন্দিয়ন কোদ ওফ জস্তিসতা য়েংশিল্লি। রেপকুম্বা য়াম্না শাথীবা ক্রাইমশিংদদি, চার্জ অসি নুমিৎ 60নিগী মনুংদা পীগদবনি, ভর্দিক্ত অসি নুমিৎ 45গী মনুংদা পীগদবনি, মসিগী এরেঞ্জমেন্ত অসি তৌখ্রে। মমাংদা, ভিক্তিম অদুনা পুলিস স্তেসনদা FIR অমা রেজিস্তর তৌনবা লাক্কদবনি, পুলিস স্তেসনদা চৎকদবনি। অনৌবা আইনশিং অসিদা, e-FIR অসি মফম অমহেক্তদগী রেজিস্তর তৌবা য়াগনি। মসিনা পুলিসনা অথুবা মতমদা থবক লৌখৎপা ঙমহনগনি। জিরো FIR গী প্রোভিজনগী মখাদা, নুপী অমহেক্তনা করিগুম্বা মহাকপু অৱা-অনা পীবা তারবদি মহাক্না পুলিস স্তেসন অমহেক্তদা এফ.আই.আর. অমা রেজিস্তর তৌবা য়াই। হৌজিক্তি পুলিসনা রেপ ভিক্তিম অমগী ৱারোল ওদিও-ভিদিওগী খুত্থাংদা রেকোর্দ তৌবা য়াবগী অতোপ্পা প্রোভিজন অমা শেম্লে। মসিদা আইনগী ওইবা অয়াবসু পীখ্রে। মমাংদা, মেদিকেল রিপোর্তসু মতম য়াম্না চংখি। হৌজিক দোক্তরশিংনা মেদিকেল রিপোর্ত অদু ফোংদোক্নবগীদমক নুমিৎ তরেৎ লেপখ্রে। মসিনা নুপী ভিক্তিমশিংদা য়াম্না মতেং পাংলি।

মরুপশিং,

ইন্দিয়ন পেনাল কোদতা শেমখিবা অনৌবা প্রোভিজন পুম্নমক্না মহৈ পীরক্লি। সুরত দিস্ত্রিক্ত অসি খুদম অমনি। হৌখিবা চহিগী ওক্তোবরদা, নুপীমচা অমগী কাংলুপ অমনা রেপ তৌবগী নুংঙাইতবা থৌদোক অমা মফম অসিদা থোকখি। থৌদোক অদু য়াম্না শাথীবা অমনি। ইন্দিয়ন পেনাল কোদকী মতুং ইন্না, হায়রিবা কেস অসিদা চার্জশিং অসি নুমিৎ 15নিগী মনুংদা শেমখি অমসুং চয়োল অমগী মনুংদা মরাল লৈবশিং চৈরাক ফংহনখি। নুমিৎ 15নিগী মনুংদা পুলিসনা মখোয়গী থবক লোইশিনখি, জুদিসিএল প্রোসেস হৌখি অমসুং অতেনবা মতমগী মনুংদা, পুন্সি চুপ্পগী কৈশুমশঙদা থমখি। ইন্দিয়ন পেনেল কোদ চৎনরবা মতুংদা, লৈবাক শীনবা থুংনা নুপীশিংগী মায়োক্তা চত্থরিবা ক্রাইমশিং য়াম্না থুনা হেনগৎলক্লি। য়ু.পি.গী অলিগরদা লৈবা কোর্ত অমনা মাইনর অমা রেপ তৌবগী কেস অমদা মীওই অমদা চহি 20গী জেলগী চৈরাক পীখ্রে। মসি চার্জশিৎ ফাইল তৌরবা মতুং নুমিৎ 30গী মনুংদা চৈরাক পীখিবা য়ু.পি.দা ইন্দিয়ন পেনাল কোদকী মখাদা পীবা অহানবা চৈরাক ওইখি। কোলকতাগী কোর্ত অমনা থা তরেৎকী নুপীমচা অমা রেপ তৌবগী কেস অমদা মরাল লৈবা মীওই অদুবু শীবগী চৈরাক পীখ্রে। মসিগী চৈরাক অসি ক্রাইম অদু পাংথোকখিবা নুমিৎ 80গী মনুংদা পীগনি। লৈবাক অসিগী তোঙান তোঙানবা রাজ্যশিংগী খুদমশিং অসিনা ইন্দিয়ন জুদিসিএল কোদ অমসুং ঐখোয়গী সরকারনা লৌখিবা অতোপ্পা ৱারেপশিং অসিনা নুপীশিংগী সেফতী হেনগৎহনবগা লোয়ননা নুপীশিংদা অথুবা মতমদা অচুম্বা ৱায়েল ফংহনবদসু ময়েক শেংনা উৎলি।

ইমাশিং-ইচে-ইচলশিং,

সরকারগী মকোক ওইনা, অদোমগী সেবা তৌরিবা ওইনা, ঐহাক্না অদোমদা থাজবা পীজরি মদুদি ঐহাক্না অদোমগী মঙলানশিং অদুগী লম্বীদা খুদোংচাদবা অমত্তা থোকহল্লোই। মচানা মমা শেবা তৌবগুম্না, ঐহাক্না ভারত ইমা অমসুং ঐহাক্কী ইমাশিং অমসুং ইচে-ইচলশিং অসিবুসু শেবা তৌরি। অদোম পুম্নমক্না কন্না হোৎনবা, থৌনা অমসুং য়াইফ-মঙ্গোলগা লোয়ননা 2047 ফাওবদা ভারতনা নীংখা তম্বগী চহি 100 মপুং ফারকপা মতমদা চাউখৎলবা ভারত অমগী ঐখোয়গী পান্দম অসি ফংলগনি হায়বগী ঐহাক্না থাজবা থম্লি। মসিগী ৱাখল্লোন অসিগা লোয়ননা, ঐহাক্না অমুক্কা হন্না অদোম পুম্নমকপু, লৈবাক অসিগী ইমা-ইচানুপী পুম্নমকপু, নুপীশিংগী নুমিৎকী য়াইফ-পাউজেল পীজরি। ঐগা লোয়ননা হায়বিয়ু, খুৎ অনিমক থাংগৎতুনা হায়বিয়ু-

ভারত ইমানা য়াইফরে।

ঙসি নারী শক্তিগী খোঞ্জেল হৌনা তাহনগদবনি,

ভারত ইমানা য়াইফরে।

ভারত ইমানা য়াইফরে।

ভারত ইমানা য়াইফরে।

ভন্দে মাতরম।

ভন্দে মাতরম।

ভন্দে মাতরম।

ভন্দে মাতরম।

ভন্দে মাতরম।

ঙসি ঐখোয়না ভন্দে মাতরম হায়বা মতমদা ইমা ভারত খক্তগী নত্তনা লৈবাক অসিগী ইমা করোর কয়াগীদমক ভন্দে মাতরম হায়রি – ভন্দে মাতরম, ভন্দে মাতরম, ভন্দে মাতরম। হন্না-হন্না থাগৎচরি।

খঙহঞ্জবা: প্রধান মন্ত্রীগী ৱারোল অসি শরুক খরদি গুজরাতী লোলদা পীখি, মসিদা মদুগী চাউরাকপা ৱাহন্থোক পীরি।

***