ভারতকী প্রধানমন্ত্রী

জয় জগন্নাথ!

জয় জগন্নাথ!

কেন্দ্রগী মন্ত্রীমন্দলদা লৈরিবা ঐহাক্কী মরুপশিং, শ্রী ধর্মেন্দ্র প্রধান জী, অশ্বিনী বৈষ্ণব জী, ওরিয়া সমাজ সন্থানগী প্রসিদেন্ত শ্রী সিদ্ধার্থ প্রধানজী, ওরিশা কম্ম্যুনিতীগী অতোপ্পা ওফিসিএলশিং, ওরিশাগী আর্তিস্ত পুম্নমক, অতোপ্পা শক্নাইরবশিং, নুপীশিং অমসুং নুপাশিং।

ওরিশাগী ইচিল-ইনাও পুম্নমকপু ঐহাক্না য়াইফ-পাউজেল পীজরি। ঐহাক্না আশা তৌরি মদুদি ওরিশা কলচরগী অচৌবা ফেস্তিবেল ‘ওরিশা ফেস্তিবেল 2024’ অসি অথুবা মতমদা পাংথোক্কনি। অদোমগা উন্নবদা ঐহাক য়াম্না নুংঙাইবা ফাওই।

ঐহাক্না ময়াম পুম্নমকপু অমসুং ওরিশাগী মীয়াম্বু ওরিশা ফেস্তিবেলগী থৌরমদা য়াইফ-পাউজেল পীজরি। চহি অসি স্বভাভ কবি গঙ্গাধর মেহেরগী মপোক কুমওনগী চহি চাগী কুমওনসু ওইরি। থৌরম অসিদা, ঐহাক্না মহাকপু নীংশিংলি অমসুং ইকায় খুম্নবা উৎলি। ঐহাক্না ভক্ত দাসিয়া বাউরিজী, ভক্ত সালবেগজী অমসুং ওরিয়া ভাগৱত পুথোকখিবা শ্রী জগন্নাথ দাসজীবুসু ইকায় খুম্নবা উৎচরি।

ওরিশানা ভারতপু মসিগী কলচরেল দাইভর্সিতীনা হিংহন্নবা অচৌবা থৌদাং অমা লৌরি।

মরুপশিং,

ওরিশা অসি মতম পুম্নমক্তা সন্ত অমসুং স্কোলরশিংগী লমনি। অচম্বা মহাভারত, ওরিশা ভাগৱত… মফমসিগী স্কোলরশিংনা ঐখোয়গী ধর্মগী লাইরিকশিং অসি য়ুমথোং খুদিংদা লমদম অসিগী লোলদা য়ৌহনখিবা, ঋসিশিংগী ৱাখল্লোনশিংগা মীওইশিংবু শম্নহনখিবা… মসিনা ভারতকী কলচরগী চাউখৎ-থৌরাংদা অচৌবা থৌদাং অমা লৌখি। মহাপ্রভু জগন্নাথজীগা মরী লৈনবা ওরিশা লোলদা লাইরিক কয়া অমা লৈ। ঐহাকসু মহাক্কী ৱারী অমা মতম পুম্বদা নীংশিংলি। মহাপ্রভুনা মহাক্কী শ্রী মন্দিরদগী থোক্লকখি অমসুং মহাক মশামক্না লানবু লুচিংখি। মতুংদা, লানফম অদুদা চৎপদা, মহাপ্রভু শ্রী জগন্নাথনা মহাক্কী ভক্ত ‘মানিকা গৌদুনি’গী খুৎতগী শঙ্গোম অফম্বা চাখি। ৱারী অসিনা ঐখোয়দা কয়া অমা তম্বি। ঐখোয়না অফবা ৱাখল্লোনগা লোয়ননা থবক তৌরবদি, ঈশ্বর মশামক্না থবক অদু লমজিংই হায়বসি মসিনা ঐখোয়দা তাক্লি। মতম পুম্নমক্তা, মতম পুম্নমক্তা, ফিভম খুদিংমক্তা, ঐখোয় অমত্তা ওইনা লৈ হায়না খনবগী তঙাইফদবা লৈতে, ঐখোয়দা মতম পুম্নমক্তা ‘প্লাস ৱান’ অমা লৈ, ঈশ্বর ঐখোয়গা লোয়ননা লৈ, ঈশ্বর ঐখোয়গা লোয়ননা লৈ।

মরুপশিং,

ওরিশাগী সন্ত কবি ভীম ভোইনা হায়রম্মি – ঐহাক শীরবা মতুংদা নরক্তা চৎকনি, অদুবু মালেম অসিদি কনবা তাই। মসি ওরিশাগী চৎনবীনি। ওরিশানা লৈবাক অপুনবা অমসুং মীওইবা খুন্নাই পুম্নমক্কী সেবা তৌগনি। মফম অসিদা পুরী ধামনা ‘এক ভারত শ্রেস্থ ভারত’কী ৱাখল্লোনবু মপাঙ্গল কনখৎহনখি। ওরিশাগী থৌনা ফরবা অঙাংশিংনা নীংতম লানফমদা শরুক য়াদুনা লৈবাক অসিদা লমজিং-লমতাক পীখি। ঐখোয়না পাইকা ক্রান্তিগী অথৌবশিংগী লমন শীংবা ঙম্লোই। ঐহাক্কী সরকারনা পাইকা ক্রান্তীগী থৌরমদা কোম্মেমোরেতিব পোস্তেজ স্তাম্প অমসুং কোইন অমা ফোংবগী খুদোংচাবা ফংখিবা অসি য়াম্না নুংঙাইবা অমনি।

মরুপশিং,

লৈবাক শীনবা থুংনা উত্কাল কেসারী হরে কৃষ্ণ মেহতাবজীগী থৌদাং অসি নীংশিংলি। ঐখোয়না মহাক্কী 125শুবা মপোক কুমওন অসি পাক-শন্না পাংথোক্লি। মমাংদগী ঙসি ফাওবদা, ওরিশানা লৈবাক অসিদা কয়া য়াম্না থৌনা ফবা লুচিংবা অমা পীবগে হায়বসি ঐখোয়গী মাংদা লৈরি। ঙসি, ওরিশাগী মচানুপী… ত্রাইবেল কম্ম্যুনিতীগী দ্রুপদী মর্মুজী অসি ভারতকী রাস্ত্রপতিনি। মসি ঐখোয় পুম্নমক্কী চাউথোকচনীংঙাই ওইবা ৱাফম অমনি। মহাক্কী ইথিলনা মরম ওইদুনা ঙসি ভারত্তা ত্রাইবেলশিংগী য়াইফনবগীদমক লুপা করোর লিশিং কয়াগী স্কিমশিং হৌদোক্লে। স্কিমশিং অসিনা ওরিশাগী ত্রাইবেল খুন্নাই খক্তদা নত্তনা ভারত পুম্বদা কান্নবা ফংহল্লে।

মরুপশিং,

ওরিশা অসি নুপীগী শক্তি অমসুং মাতা সুভদ্রাগী মওংদা মাগী শক্তিগী লম্নি। ওরিশাগী নুপীশিংনা খুমাং চাউশিল্লবদি ওরিশা চাউখৎলগনি। মসিনা মরম ওইদুনা, নুমিৎ খরনিগী মমাংদা ঐহাক্না ওরিশাগী ঐহাক্কী ইমাশিং অমসুং ইচিল-ইনাওশিংগীদমক্তা সুভদ্রা য়োজনা হৌদোকখ্রে। ওরিশাগী নুপীশিংনা মসিগী অচৌবা কান্নবা ফংলগনি। ঐহাক্না উতকালা অমসুং লৈবাক অসিগী অথোইবা মচানুপা অসিবু নীংশিংগনি, অমসুং অসিগুম্বা চাউরবা পুন্সি অসিদগী ঐহাক্না মহাকপু ইথিল পীরগনি, অমসুং থৌরম অসিবু শীনবগীদমক ঐহাক্না মহাকপু চাউনা ইকাই খুম্নবা উৎচগনি।

মরুপশিং,

মসিগী উত্কাল অসিনা ভারতকী সমুদ্রগী শক্তিদা অনৌবা থাক অমা পীখি। ঙরাং ওরিশাদা বালি জাত্রা লোইশিনখি। মসিগী মতাং অসিদসু, মসি নবেম্বর 15গী কার্তিক পুর্নিমাগী নুমিত্তা কত্তককী মহানাদিগী তুরেলদা পাংথোক্কনি। বালি জাত্রা অসি ভারত অমসুং ওরিশাগী সমুদ্রগী শক্তিগী খুদম অমনি। চহি চা কয়াগী মমাংদা, ঙসিগী তেক্নোলোজী লৈত্রিঙৈদা, মতম অদুদসু সমুদ্রদা চঙবগী থৌনা অদু সমুদ্রগী হীরোইশিংনা উৎখি। ঐখোয়গী ললোন-ইতিক তৌবা মীওইশিংনা ইন্দোনেসিয়াগী বালি, সুমাত্রা, জাভাগুম্বা মফমশিংদা জহাজনা চৎনরম্মি। হায়রিবা খোঙচৎশিং অসিগী খুত্থাংদা ললোন-ইতিকসু পাঙথোকখি অমসুং কলচরসু মফম অমদগী অমদা য়ৌখি। ঙসিদি, ওরিশাগী মেরিতাইম পাৱরনা চাউখৎলবা ভারত অমগী ৱারেপ অদু ফংবদা মরু ওইবা থৌদাং অমা লৌরি।

মরুপশিং,

হৌখিবা চহি 10 অসিদা ওরিশাবু অনৌবা থাক্তা পুখৎনবগীদমক লেপ্পা লৈতনা হোৎনখিবা অদু ঙসিদি ওরিশাগী অনৌবা তুংলমচৎ অমগী আশা ওইরক্লি। 2024দা ওরিশাগী মীয়ামগী মমাংদা অমুক্তা ওইখিদ্রিবা য়াইফ-পাউজেল অসিনা মসিগী আশা অসিদা অনৌবা থৌনা পীরে। ঐখোয়না অচৌবা মঙলানশিং উখি, অচৌবা পান্দমশিং থমখি। 2036তা ওরিশা রাজ্য অসি শেমখিবগী চহি 100শুবা কুমওন পাংথোক্কনি। ঐখোয়গী হোৎনরিবদি ওরিশা অসি লৈবাক অসিগী মপাঙ্গল কনবা, চাউখৎপা অমসুং খোংজেল য়াংনা চাউখৎলক্লিবা রাজ্যশিংগী মরক্তা অমা ওইনবা হোৎনবনি।

মরুপশিং,

মতম অমদা ভারতকী নোংপোক থংবা শরুক… ওরিশাগুম্বা রাজ্যশিং অসি মাংলোমদা চংশিল্লি হায়না লৌনরম্মি। অদুবু ঐহাক্না ভারতকী নোংপোক থংবা শরুক অসি লৈবাক অসিগী চাউখৎপগী গ্রোথ ইঞ্জিননি হায়না লৌই। মসিনা মরম ওইদুনা ঐখোয়না নোংপোক ভারতকী চাউখৎ থৌরাংবু ঐখোয়গী মরুওইবা ওইহল্লি। ঙসিদি, কনেক্তিবিতীগী থবক, হকশেলগী থবক, এজুকেসনগী থবক, পুম্নমক অসি নোংপোক থংবা ভারত পুম্বদা খুমাং চাউশিল্লে। ঙসিদি ওরিশাদা কেন্দ্র সরকারনা চহি 10গী মমাংদা পীখিবা বজেৎ অদুদগী শরুক অহুম হেন্না ফংলি। চহি অসিদা, ওরিশাগী চাউখৎ থৌরাংগীদমক মমাং চহিগা চাংদম্নবদা চাদা 30 হেন্না বজেৎ পীখ্রে। ওরিশাগী চাউখৎ-থৌরাংগীদমক সেক্তর খুদিংমক্তা ঐখোয়না খোঙজেল য়াংনা থবক তৌরি।

মরুপশিং,

পোর্ততা য়ুম্ফম ওইবা ইন্দস্ত্রীএল দিবেলপমেন্তকীদমক ওরিশাদা চাউনা পোতেন্সিএল লৈ। মরম অদুনা, ধামরা, গোপালপুর, অস্তারঙ্গা, পালুর অমসুং সুভর্নরেখা পোর্তশিং শেমগৎতুনা মফম অসিদা ললোন-ইতিক হেনগৎহনগনি। ওরিশা অসি ভারতকী মাইনিং অমসুং মেতলগী পাৱরহাউস অমসুনি। মসিনা স্তীল, এলুমিনিয়ম অমসুং ইনর্জী সেক্তরশিংদা ওরিশাগী থাক অসি য়াম্না মপাঙ্গল কনখৎহল্লি। সেক্তরশিং অসিদা মীৎয়েং চংদুনা, ওরিশাদা চাউখৎপগী অনৌবা থোঙ হাংদোকপা ঙমগনি।

মরুপশিং,

ওরিশাদা কাজু, জুত, কতন, য়াংঙং অমসুং ওইল সীদ মরাং কায়না পুথোকই। ঐখোয়না হোৎনরিবদি পোত্থোকশিং অসি অচৌবা কৈথেলশিংদা য়ৌহন্নবা অমসুং ঐখোয়গী লৌমী ইচিল-ইনাওশিংনা কান্নবা ফংহন্নবা হোৎনবনি। ওরিশাগী সী-ফুদ প্রোসেসিং ইন্দস্ত্রীদা পাকথোক চাউথোকপগী খুদোংচাবা কয়া অমসু লৈরি। ঐখোয়গী খোঙথাং অসিদি ওরিশাগী সমুদ্রগী পোৎলমশিংবু মালেমগী কৈথেলদা দিমান্দ লৈবা ব্রান্দ অমা ওইহন্নবা হোৎনবনি।

মরুপশিং,

ঐখোয়গী খোঙথাং অসি ওরিশা অসি ইনভেস্তরশিংগী পাম্নবা মফম অমা ওইহন্নবা হোৎনবনি। ঐখোয়গী সরকারনা ওরিশাদা ইজ ওফ দুইং বিজিনেস প্রমোৎ তৌবদা অচেৎপা ৱাফম থম্লি। ‘উতকার্শ উতকাল’গী খুত্থাংদা শেল থাদবা হেনগৎলক্লি। ওরিশাদা অনৌবা সরকার শেম্লবা মতুংদা, অহানবা নুমিৎ 100গী মনুংদা লুপা করোর 45,000গী শেনফম অমা অয়াবা পীখি। ঙসিদি ওরিশাগী মশাগী ভিজন অমসুং রোদমেপ লৈরে। হৌজিক মফম অসিদা ইনবেস্তমেন্ত পুক্নিং থৌগৎলগনি অমসুং অনৌবা থবক ফংবগী খুদোংচাবসু লৈরগনি। হোৎনরিবশিং অসিগীদমক্তা মুখ্য মন্ত্রী শ্রীমান মোহন চরন মাঞ্জীজী অমসুং মহাক্কী কাংলুপপু ঐনা থাগৎপা ফোংদোকচরি।

মরুপশিং,

ওরিশাগী ওইথোকপা য়াবশিং অদু অচুম্বা মাইকৈদা শীজিন্নদুনা, মসি চাউখৎপগী অনৌবা অৱাংবা থাক্তা পুখৎপা ঙমগনি। ঐহাক্না থাজৈ মদুদি ওরিশানা মসিগী স্ত্রেতেজিক লোকেসন অসিদগী চাউনা কান্নবা ফংগনি। মফম অসিদগী দোমেস্তিক অমসুং ইন্তর্নেস্নেল মার্কেৎশিং য়ৌহনবা লায়। ওরিশা অসি নোংপোক অমসুং খা-নোংপোক এসিয়াগী মরু ওইবা ললোন-ইতিক্কী মফম অমনি। মালেমগী ভেল্যু চেনশিংদা ওরিশাগী মরুওইবা অসি লাক্কদৌরিবা মতমশিংদা মখা তানা হেনগৎলগনি। ঐখোয়গী সরকারনা রাজ্য অসিদগী এক্সপোর্ত হেনগৎহন্নবা পান্দমদা থবক তৌরি।

মরুপশিং,

ওরিশাদা অর্বানাইজেসন প্রমোৎ তৌনবা অচৌবা পোতেন্সিএল লৈ। ঐখোয়গী সরকারনা মসিগী মাইকৈ অসিদা অচেৎপা খোঙথাংশিং লৌখৎলি। ঐখোয়না হেন্না দাইনামিক ওইবা অমসুং নীংথিনা শম্নবা শহরশিং শেমগৎনবা হোৎনরি। ঐখোয়না ওরিশাগী তায়র তু সিতিশিংদা অনৌবা ওইথোকপা য়াবশিং শেমগৎনবা হোৎনরি। অখন্ননা নোংচুপ ওরিশাগী জিলাশিংদা, অনৌবা ইনফ্রাস্ত্রকচর অসিনা অনৌবা খুদোংচাবা কয়া অমা পীগনি।

মরুপশিং,

হায়র এজুকেসনগী লমদা ওরিশা অসি লৈবাক অসিগী মহৈরোয়শিংগী অনৌবা আশা অমা ওইনা লৈরি। মফম অসিদা নেস্নেল অমসুং ইন্তর্নেস্নেল ইন্সতিত্যুৎ কয়া লৈরি, মসিনা রাজ্য অসিদা এজুকেসন সেক্তরদা মাংজিল থানা চংশিনবা পুক্নিং থৌগৎলি। মসিগী খোঙথাং অসিনা রাজ্য অসিদা স্তার্তঅপ ইকোসিস্তেমসু হেনগৎহল্লি।

মরুপশিং,

ওরিশা অসি মতম পুম্নমক্তা মাগী কলচরগী ওইবা মগুনগীদমক অখন্নবা ওইদুনা লাক্লি। ওরিশাগী আর্ত ফোর্মশিংনা মীপুম খুদিংমকপু শুমহৎলি। ওদিসি জগোই ওইগেরা নত্রগা ওরিশাগী পেন্তিং ওইগেরা, পত্ত চিত্রাদা উবা ফংলিবা লাইভনেস অসি ঐখোয়গী ত্রাইবেল আর্তকী খুদম অমা ওইরিবা সাউরা পেন্তিংদসু চপ মান্ননা শিংথানিংঙাই ওই। ঐখোয়না ওরিশাগী সম্বলপুরী, বোমকাই অমসুং কোতপাদ ৱিভরশিংগী শিন্মীশিংসু উবা ফংলি। ঐখোয়না আর্ত অমসুং ক্রাফমেনশিপকী থৌওং অসিবু হেন্না শন্দোক্লিবমখৈ, আর্ত অসিবু ঙাক্লিবা ওরিশা মীয়াম্বু হেন্না ইকায় খুম্নবা ফংলগনি।

মরুপশিং,

ঐখোয়গী ওরিশাদা আর্কিতেকচর অমসুং সাইন্সকী চাউরবা হেরিতেজ লৈ। কোনার্ককী সন তেম্পল… মসিগী পাক চাউবা, মসিগী সাইন্স… লিঙ্গরাজ অমসুং মুক্তেশ্বরগুম্বা অরিবা মতমগী লাইশংশিংগী আর্কিতেকচর… অসিনা মীপুম খুদিংমকপু শুমহৎলি। ঙসি মীওইশিংনা মখোয়বু উরকপা মতমদা… মখোয়না চহি চাম্মাগী মমাংদা, ওরিশাগী মীওইশিংনা সাইন্সতা য়াম্না মাংজিল থানা লৈরম্মি হায়না খনহল্লি।

মরুপশিং,

ওরিশা অসি তুরিজমগী লমদা অচৌবা খুদোংচাবশিংগী লম অমনি। ওইথোকপা য়াবশিং অসি অশেংবা ওইহন্নবগীদমক্তা ঐখোয়না মখল কয়াগী থবকশিং পায়খৎপা তাই। অদোম্না উবা ফংলি, ঙসিদি ওরিশাগী হেরিতেজ অমসুং মসিগী আইদেন্তিতীবু ইকাই খুম্নবা উৎলিবা অসিগুম্বা সরকার অমা লৈবাক অসিদা অমসুং ওরিশাদা লৈরে। মমাং চহিদা G-20 কনফরেন্স অসি মফম অসিদা পাংথোকখিবা অদু অদোম্না উবা ফংলগনি। G-20গী মনুংদা, ঐখোয়না লৈবাক কয়াগী মকোক থোংবা মীওইশিং অমসুং দিপ্লোমেতশিংগী মমাংদা সুর্য মন্দিরগী অচৌবা মওং-মতৌ অদু উৎখি। মহাপ্রভু জগন্নাথ মন্দির কমপ্লেক্সকী থোঙ মরি খুদক্তা হাংদোকপা অসিদা ঐহাক নুংঙাইবা ফাওই। লাইশঙ অসিগী রত্ন ভান্দরসু হাংদোকখ্রে।

মরুপশিং,

ঐখোয়না মালেমদা ওরিশাগী শক্তম খুদিংমক খঙহন্নবা অনৌবা খোঙথাং কয়া অমা লৌখৎকদবনি। খুদম ওইনা হায়রবদা, ঐখোয়না বালি জাত্রা নুমিৎ অসি বালি জাত্রাবু হেন্না মীয়াম্না পাম্নবা অমসুং মালেমগী প্লেৎফোর্মদা প্রমোৎ তৌনবা লাউথোকপা য়াই। ঐখোয়না ওদিসি দে অসি ওদিসি জগোয়নচিংবা আর্তশিংগীদমক্তা পাংথোকপা হৌবা য়াই। তোঙান তোঙানবা ত্রাইবেল হেরিতেজশিংবু সেলেব্রেৎ তৌনবা অনৌবা চৎনবীশিংসু হৌদোকপা য়াই। মসিগীদমক, স্কুল অমসুং কোলেজশিংদা অখন্নবা থৌরমশিং পাংথোকপা য়াই। মসিনা মীয়ামদা এৱারনেস পীরগনি অমসুং তুরিজম অমসুং অপীকপা ইন্দস্ত্রীগা মরী লৈনবা খুদোংচাবশিং মফম অসিদা হেনগৎলগনি। নুমিৎ খরনিগী মতুংদা, প্রভাসী ভারতীয়া সম্মেলনসু পাংথোক্কনি। মালেম পুম্বগী মীওইশিংনা ভুবনেশ্বর, ওরিশাদা লাক্কনি। প্রভাসী ভারতী দিবস অসি ওরিশাদা অহানবা ওইনা পাংথোক্লি। মসিগী কনফরেন্স অসি ওরিশাগীদমকসু অচৌবা খুদোংচাবা অমা ওইরগনি।

মরুপশিং,

মতমগী অহোংবা লাকপগা লোয়ননা মীওইবনা মখোয়গী মমাগী লোল অমসুং চৎনবীবু কাউথোকপা অসি মফম কয়াদা উবা ফংই। অদুবু ওরিয়া কম্ম্যুনিতীনা, মখোয়না লৈরিবা মফম খুদিংমক্তা, মখোয়গী চৎনবী, মখোয়গী লোল অমসুং মখোয়গী কুহ্মৈশিংগী মতাংদা মতম পুম্নমক্তা য়াম্না পুক্নিং থৌগৎপা ঐনা উখি। মমা লোল অমসুং চৎনবীগী পাঙ্গলনা ঐখোয়বু ঐখোয়গী লমদমগা করম্না শম্নহল্লি হায়বদু ঐহাক্না নুমিৎ খরনিগী মমাংদা খা অমেরিকাগী লৈবাক গুয়ানাদা উখি। চহি 200 রোমগী মমাংদা শিন্মী চাম্মরোম্না ভারত থাদোকখি। অদুবু মখোয়না রামচারিৎ মানস লৌখি। মখোয়না রামগী মিং লৌখি। মরম অসিনা ঙসি ফাওবা মখোয় অসি ভারতকী লমদমগা শম্নরি। ঐখোয়গী হেরিতেজ অসিবু ঙাক-শেন্দুনা চাউখৎপা মতমদা, মসিগী কান্নবা অসি মীপুম খুদিংমক্তা ফংই। অসিগুম্বা মওং অসিদা, ঐখোয়না ওরিশাবু অনৌবা থাক্তা পুখৎপা ঙমগনি।

মরুপশিং,

ঙসিগী মোদর্ন ইরা অসিদা, ঐখোয়না মোদর্ন চেঞ্জশিং অসীমিলেত তৌগদবনি অমসুং ঐখোয়গী রুতশিংসু মপাঙ্গল কনখৎহনগদবনি। ওরিশা পর্বগুম্বা থৌরমশিং অসি মসিগী মেদিয়ম অমা ওইবা য়াই। লাক্কদৌরিবা চহিশিংদা মসিগী থৌরম অসি হেন্না পাকথোক চাউথোকহনবা ঐহাক্না পাম্মি। মসিগী কুহ্মৈ অসি দিল্লী খক্তদা য়ুম্ফম ওইদুনা লৈরোইদবনি। মসিদা মীওই কয়া অমা য়াওগদবনি, স্কুল অমসুং কোলেজশিংগী শরুক য়াবা হেনগৎহনগদবনি, ঐখোয়না মসিগীদমক হোৎনগদবনি। দিল্লীগী অতোপ্পা রাজ্যশিংদগী লাকপা মীওইশিংসু মফম অসিদা লাকপা, ওরিশাবু হেন্না নক্না খঙবা অসিসু য়াম্না মরু ওই। লাক্কদৌরিবা মতমশিংদা, ফেস্তিবেল অসিগী মচুশিং অসি ওরিশা অমসুং লৈবাক অসিগী মফম খুদিংমক্তা য়ৌরগনি হায়না ঐহাক্না থাজবা থম্লি। মসি মীয়ামগী শরুক য়াবগী য়াম্না চাউবা অমসুং ইফেক্তিব ওইবা প্লেৎফোর্ম অমা ওইরগনি। ৱাখল্লোন অসিগা লোয়ননা, ঐনা অমুক্কা হন্না ময়াম পুম্নমক্তা নুংঙাইবা ফোংদোকচরি।

ময়াম পুম্নমকপু হন্না-হন্না থাগৎচরি।

জয় জগন্নাথ!

***