ভারতকী প্রধানমন্ত্রী

অদোমগুম্বা লৌমী মরুপশিংগা ৱারী শাবা অসিনা অনৌবা ৱাখল্লোন অমা লৈহল্লি, ইশাদা নৌনা অমুক্কা থাজহল্লি। ঐখোয়গী মন্ত্রী, শ্রী নরেন্দ্র তোমার সিংহজীনা হৌজিক হায়বীখিবগুম্না, ঙসি অসি ভগবান বসাভেশ্বরাগী নুমিৎনি, পরশুরামগী নুমিৎসু ওই। অদুগা ঙসি অসি অক্সয় তৃত্যাগী শেংলবা নুমিৎ অমসু ওই। অদুগা, লৈবাক মীয়াম খুদিংদা ঐহাক্না ইদকী নুংঙাইরবা পাউজেলসু পীজরি।

হৌজিক্কী কোরোনাগী মতম অসিদা লৈবাক মীয়ামগী পুক্নিং থৌগৎনবা, লাইচৎ অসিবু মাইথীবা পীনবা খোঙফম চেৎনা হোৎননবা অপাম্বা লৈবা অসিগা লোয়ননা ঐহাক্না লৌমী মরুপশিংগা ৱারী শারি অমসুং মসিবু ঐহাক্না থবক ওইনা পাংথোক্কনি। ঙসিগী থৌরম অসিদা শরুক য়ারিবা লৌউ-শিংউ অমসুং লৌমীগী য়াইফ-য়ুম্বাল মন্ত্রী, শ্রীমান তোমার সিংহজী, ঐহাক্কী কেন্দ্র সরকারগী অতোপ্পা মরুপশিং, মুখ্য মন্ত্রী খুদিংমক, রাজ্য সরকারশিংগী মন্ত্রী, এম.পি., এম.এল.এ. অমসুং লৈবাক শিনবা থুংবগী ঐহাক্কী লৌমী মরুপ অমসুং ইচিল ইনাওশিং,

ঐখোয়না ঙসিগী য়াম্না শিংননীংঙাই ওইরবা মতম অসিদা মীয়ামগা ৱারী-ৱাতাই অসি তৌরি। মসিগী কোরোনাগী মতম অসিদসু লৈবাক্কী লৌমীশিংনা লৌউ-শিংউগী মতাংদা মশাগী মথৌদাং পাংথোকপা ওইনা রেকোর্দ ওইবা মওংদা লৌরোক পুথোক্লি, লৌউবদা অনৌ-অনৌবা থৌওং কয়া শিজিন্নরি। অদোমগী হোৎনজমন অসিবু পি.এম. সম্মান নিধীগী ইন্সতোলমেন্ত অমনা অহেনবা তেংবাং অমসু পীগদৌরি। ঙসি অক্সয় তৃত্যগী নুমিৎনি, লৌউ-শিংউগী অনৌবা খোঙজেল হৌবা নুমিৎনি অমসুং ঙসিমক, লৌমীশিংগী বেঙ্ক একাউন্ততা চাউরাক্না লুপা করোর লিশিং ১৯সু হকথেংননা হাপখ্রে। মসিনা চাউরাকপা লৌমী করোর ১০দা কান্নবা ফংহনগনি। বেঙ্গোলগী লৌমীশিংনা খুদোংচাবা অসি অহানবা ওইনা ফংলগনি। বেঙ্গোলগী লৌমী লাখ কয়ানা অহানবা ইন্সতোলমেন্তকী শেনফম ফংখ্রে। রাজ্য সরকারশিংদগী লৌমীশিংগী মমিং হেক ফংবগা, স্কিম অসিগী কান্নবা ফংবা লৌমীশিংগী মশিংসু হেনগৎলক্কনি।

মরুপশিং,

পি.এম. কিসান য়োজনাগী মতেংদগী অপিকপা অমসুং ময়াই-ওইরপ চাউনা লৌউবা মীওইশিংনা কান্নবা য়াম্না ফংনরি। হৌজিক্কী লুরবা তাঞ্জা অসিদা, য়োজনা অসিনা পীরিবা শেনফম অসিনা লৌমী কয়াগী ইমুংদা য়াম্না তেংবাংলি। য়োজনা অসিনা হৌজিক ফাওবদা চাউরাকপা লৌমী করোর লাখ ১১দা লুপা করোর লাখ ১গা লিশিং ৩৫গী চাউরাকপা শেনফম য়ৌখ্রে, মসিনা হায়বদি মরক্তা লৈবা মীওইশিং নাথৈদুনা লৌমী করোর ১.২৫গী বেঙ্ক একাউন্ততা হকথেংননা শেল ফংলে হায়বনি। মসিগী মনুংদগী, কোরোনাগী মনুং খক্তদা, লুপা করোর লিশিং ৬০গী মথক্তা লৌমীশিংনা ফংখ্রবনি। লৈবাক মীয়ামদা তঙাই ফদবা মতমদা হকথেংননা তেংবাং ফংবা, খোঙজেল থুনা ফংবা, তঙাই ফদবা মীওইদুমক্তদা তেংবাং ফংবা হায়বা ৱাফম অসিদা ঐখোয়গী সরকারনা লেপ্তনা হোৎনরিবনি।

ইচিল ইনাওশিং,

সরকারনা পোত্থোক লৈবগী থবকশিংদা অসিগুম্বা কান্নবা অসিবু অথুবা মতমদা পীনবগীদমক্তা পাক চাউনা থবক পায়খৎপা হেনগৎলক্লি। কোরোনাগী খুদোংচাদবা মরক্তা, লৌমীশিংনা লৌউ-শিংউ অমসুং লৈকোল য়োকপদা রিকোর্দ থম্লিবা অসিগা লোয়ননা সরকারসু এম.এস.পি.দা লৌরোক লৈবগী অনৌবা রেকোর্দ কয়া থম্লি। অহানবদা হৱাই-চেংৱাইগী, হৌজিক্না গেহু লৈবগী রেকোর্দসু থম্লে। হন্দক্কী চহিগী ওইনা, মমাংগী চহিগা চাংদম্নবদা, গেহুগী ১০%গী শরুক হেনবদি এম.এস.পি.দা লৈখ্রে। হৌজিক ফাওবগী ওইনা, চাউরাকপা লুপা করোর লিশিং ৫৮গী গেহু লৈবগী শেনফম অসি লৌমীশিংগী একাউন্তশিংদা য়ৌনখ্রে। য়াম্না ফবা ৱাফমদি, লৌমীশিংনা মখোয়গী পোত্থোকশিং মন্দীদা য়োনখ্রবা তুংদা, মখোয়না শেলগীদমক্তা য়াম্না কুইনা ঙাইবগী মথৌ তাদ্রে, ৱাখল ৱাদ্রবসু য়ারে। লৌমীশিংগী হক্কী মতুং ইন্না ফংফম থোকপা শেনফমশিং মখোয়গী বেঙ্ক একাউন্ততা হাপ্লক্লে। পঞ্জাব অমসুং হরিয়ানাগী লৌমী লাখ কয়াগী বেঙ্ক একাউন্তশিংদা অহানবা ওইনা শেনফম হকথেংননা শেল হাপ্পগী খুদোংচাবা ফংবা অসিদা ঐহাক্না নুংঙাইবা ফাওই। হৌজিক ফাওবগী ওইনা, পঞ্জাবকী লৌমীশিংগী একাউন্ততা লুপা করোর লিশিং ১৮গী শেনফম অমসুং হরিয়ানাগী লৌমীশিংগী ওইনা লুপা করোর লিশিং ৯গী শেনফমশিং হাপ্লকখ্রে। ইশাগী শেনফম্বু বেঙ্ক একাউন্ততা হাপ্লকপদা কনানবু নুংঙাইরোইদোইনো? পঞ্জাব অমসুং হরিয়ানাগী লৌমীশিংনা মসিগী নুংঙাইবা অসি থেংনরি অমসুং মীয়ামদা মখৌ পোঙনা হায়রি। ঐহাক্না সোসিএল মীদিয়াদা লৌমীশিংনা, মরু ওইনা পঞ্জাবকী লৌমীশিং, মখোয়গী অপুনবা শেনফম্বু একাউন্ততা হাপ্লকপগী নুংঙাইবা ফোংদোকপগী ভিদিও কয়াসু উরে।

মরুপশিং,

লৌউবদা অনৌবা ৱারোইশিন পুথোক্নবা অমসুং পাম্বৈ পাংথোক্নবগীদমক্তা সরকারনা লেপ্তনা হোৎনদুনা লাক্লি। ওর্গানিক ফার্মিং পুক্নিং থৌগৎপা অসিসু মসিগী থৌরাং অমনি। অসিগুম্বা লৌরোক অসিদা শেল চঙবসু হন্থৈ, মসিনা লৈহাউ অমসুং মীওইবগী হকচাংদসু কান্নবা পী অমসুং লৌরোক্কী অহেনবা মমলসু ফংই। লৌউবগী থৌওং অসি চত্থবা লৈবাক শিনবা থুংবগী লৌমী খরগা ঐহাক্কা মতম খরগী মমাংদা ৱারীসু শাখি। মখোয়গী অপাম্বা, লৌশিংগী মতাংদা খঙবদা ঐহাক্না য়াম্না পেনবা ফাওজখি। ওর্গানিক ফার্মিং অসি হৌজিক্তি, গঙ্গাগী তোর্বান অনিমক্তা অমসুং মসিগী কিলোমিতর ৫গী অকোয়বা মফমদা পাক-শন্না চত্থনবা পুক্নিং থৌগৎলি। মসিগী মরমদি লৌউবগী থৌওংশিংদা শিজিন্নবা কেমিকেলশিংবু নোংজু থাগী মতমদা গঙ্গা তুরেলদা তাশিন্দুনা তুরেলবু মোৎশিনবগী থৌওং থিংনবনি অমসুং পান্দম অসিগীদমক্তা গঙ্গা তুরেলগী তোর্বান অনিমক্কী কিলোমীতর ৫-৫গী অকোয়বদা লৈবা মফমশিংদা ওর্গানিক ফার্মিং পাংথোক্নবা অহেনবা মিৎয়েংশু চঙলি। মসিগী ওর্গানিক্কী পোত্থোকশিং অসি কৈথেলশিংদা গঙ্গা নমামীগী মিংথোল থোন্দুনা য়োনবগী থবক চত্থরি। মতৌ অসিগুম্না, ভারতকী মহৌশাগী লৌউ-শিংউগী পোত্থোকশিংসু কারবার তৌবা নুংঙাইনবগীদমক্তা পুক্নিং থৌগৎলি। মসিদা নত্তনা, সরকারনা অপিকপা অমসুং ময়াই ওইরপ্না চাউবা লৌমীশিংনা বেঙ্কতগী অহোঙবা অমসুং অরায়বা লোন ফংহন্নবসু লেপ্তনা হোৎনরি। মসিগীদমক্তা, হৌখিবা চহি অমগা মখায়দা লৌমীশিংদা কিসান ক্রেদিৎ কার্দ পীবগী অখন্নবা খোঙথাং অমসু পায়খত্তুনা লাক্লি। অদুগা, হৌজিক ফাওবগী ওইনা হায়রিবা কিসান ক্রেদিৎ কার্দ করোর ২দগী হেন্না পীথোকখ্রে। লৌমীশিংনা কার্দ অসিগী খুত্থাংদা লুপা করোর লাখ ২ হেনবগী শেনফমশিং লোন ওইনা লৌনখ্রে। মসিগী খ্বাইদগী কান্নবশিং অসি য়েন-ঙানু লোইবা, দাইরী অমসুং ঙা য়োকপগা মরী লৈনবা লৌমীশিংনা ফংবা হৌখ্রবনি। অদুগা, সরকারনসু অচৌবা ৱারেপ অমা হন্দক্তা লৌখ্রে। ঐহাক্না ঐহাক্কী লৌমী ইচিল-ইনাওশিংসু মসিগী ৱারেপ অসিদা য়াম্না নুংঙাইবা ফাওগনি থাজৈ মরমদি মসিনা মখোয়দা য়াম্না কান্নবা পীগনি। সরকারনা কোরোনাগী ইরাংবু য়েংলদুনা, কে.সি.সি. লোন শিংদোকপগী মতমসু শাংদোকখ্রে। মসিগী লোন অসি লৌখিবা লৌমীশিংনা জুন ৩০গী মনুংদা লোন শিংবা য়ারগনি। মসিগী খুদোংচাবা অসিগী মনুংদসু ৪%গী শেন্দোইগী চাংদা ফংলিবা লোন অমসুং কান্নবা ফংবশিং অদুমক লৈখিগনি অমসুং মখা তানসু চত্থখিগনি।

মরুপশিং,

ভারতনা কোরোনাগা লান্থেংনবদা খুঙ্গং, লৌমীশিংগী অচৌবা থৌদাং লৈরি। কোরোনাগী মতম অসিদা ভারতনা মালেমগী ওইনা খ্বাইদগী চাউবা চানবা চিঞ্জাক লেম্না পীবগী থবক পায়খৎলিবা অসি মখোয়গী মরমদগী ওইথোক্লিবনি। প্রধান মন্ত্রী গরীব কলয়ান য়োজনাগী খুত্থাংদগী হৌখিবা থা ৮ ফাওবা লায়রবশিংনা লেম্না চিঞ্জাক পীখি। হন্দক্কী মতাংদসু, মে অমসুং জুন থাদা লৈবাক্কী মীওই করোর ৮০ হেনবশিংদা লেম্না চিঞ্জাক পীবগী থৌরাং য়াৎপা লোইখ্রে। মসিগীদমক্তসু, কেন্দ্র সরকারনা লুপা করোর লিশিং ২৬ হেনববু লায়রবশিংগী ইমুংগী চাকখুমগী মৈ মুত্তনবা চাদিং তৌখ্রবনি। ঐহাক্না রাজ্য সরকারশিংদা লায়রবশিংদা চিঞ্জাক পীবগী থৌওংশিংদা অপনবাঅয়েৎপা অমত্তা লৈহন্দনবা হোৎননবা ইয়াথং পীখিবসু লৈখ্রে।

মরূপশিং,

চহি ১০০গী মতুংদা লাক্লিবা শাথীরবা লাইচৎ অসিনা মালেম্বু খোঙথাং খুদিংদা চাংয়েংলি। ঐখোয়গী মাঙদা শক উদবা য়েক্নবা অমা লৈ অমসুং মসিগী য়েক্নবা অসিগী মওং য়াম্মি। মসিগী য়েক্নবা অসিগী মরমদগী ঐখোয়না ঐখোয়গী নক্নবা মীওই কয়া লৈখিদ্রে। হৌখিবা নুমিৎ খরসিদা লৈবাকমচাশিংনা থেংনরিবা খুদোংচাদবশিং, মীওই কয়ানা অৱা-নুংঙাইতবা পুংফম কয়া লান্দুনা লাক্লিবশিং অসি ঐহাকসু চপ-মান্ননা ফাওরি। কোরোনাগী অনিশুবা ৱেভ অসিদা রিসোর্সকা মরী লৈনবা খুদোংচাদবা খুদিংমকপু ঐখোয়না খোঙজেল থুনা ৱারোইশিন পুরক্লি। মসিনা খ্বাইদগী অহানবা মরু ওইবনি খন্দুনা থবক তৌরি। সরকারগী বিভাগ খুদিং, এম.পি., লৈবাক্কী আর্ম্দ ফোর্স, সাইন্তিস্তশিংনা শিংনবা অসিগা থেংননবা অহিং-নুংথিল নাইদনা অমত্তা ওইনা লেপ্লিবা অসিসু অদোম্না উরম্লগনি। লৈবাক্কী তোঙান-তোঙানবা মফমশিংদা কোবিদ হোস্পিতাল কয়া খোঙজেল য়াঙনা শাগৎলি, অনৌবা তেক্নোলোজী শিজিন্নদুনা ওক্সীজেন প্লান্ত কয়া অমা শেম্লি। ঐখোয়গী আর্ম্দ ফোর্স অহুম্মক, আর্মী, এয়র ফোর্স অমসুং নেভী, অসিনা মসিগী থবক অসিদা অঙম্বা পাঙ্গল থাদুনা থবক তৌরি। ওক্সীজেন রেলনা কোরানাগী মাইয়োক্তা থেংনরিবা লান অসিগী পাঙ্গল হাপ্লি। লৈবাক্কী থাপ্ল-থাপ্লবা মফমশিংদা অখন্নবা ত্রেনশিং, ওক্সীজেন রেল, অসিনা ওক্সীজেন য়ৌহনবগী থবক চত্থরি। ওক্সীজেন তেঙ্কর পুথোক-পুশিন তৌরিবা ত্রক থৌবশিংনা লেপ্পনা নাইদনা মথৌ তৌরি। লৈবাক্কী দাক্তর, নর্স, স্তাফ অমোৎ-অকাই শেংবা মীওই, এম্ব্যুলেন্স থৌবা মীওই, লেবতা থবক তৌবা মীওই, সেম্পল লৌবা মীওিশিংনা পুন্সি কন্ননবা পুং ২৪ চুপ্না মথৌ তৌনরি। ঙসিদি, লৈবাক অসিগী মরু ওইবা হিদাক লাংথকশিং অৱাৎপা লৈতনা ফংহন্নবা খ্বাইদগী অহেনবা মিৎয়েং চঙদুনা হোৎনরি। সরকার অমসুং লৈবাক্কী ফার্মা সেক্তরনা হৌখিবা নুমিৎ খরনি অসিদা মরু ওইবা হিদাক্কী মশিং য়াম্না হেনগৎহনখ্রে। মীরমদগী হিদাক কয়াসু পুশিনলক্লি। তাঞ্জা অসিদসু, মীওই খরদি মশাগী কান্নবগীদমক্তা অসিগুম্লবা হিদাক অমসুং তঙাই ফদবা খুৎশু-খুৎলায় কয়াবু ব্লেক মার্কেত্তা য়োনবগী থৌওং কয়াসু পাংথোক্লি। ঐহাক্না অসিগুম্বা মীওইশিংগী মথক্তা অকনবা চৈরাক পীনবা রাজ্য সরকারশিংদা হায়রি। মসি মীওইবা খুন্নাইগী মাইয়োক্তা পাংথোকপা থবক্নি। ঐখোয় থৌনা হনগদবা লৈবাক নত্তে। ভারতনা থৌনাসু হল্লোই অমসুং ভারত মচা অমনা মখোয়গী মথৌনাসু কৈদৌনুংদা হল্লোই। ঐখোয়না লান্থেংনগনি অমসুং শোইদনা মায় পাক্কনি।

মরূপশিং,

ঙসিগী থৌরম অসিদা, ঐহাক্না লৈবাক্কী লৌমী খুদিং, খুঙ্গংশিংদা লৈরিবা ইচিল-ইনাও খুদিংমক্তা কোরোনাগী মতাংদা চেকশিন্না লৈনবা অমুক্কা হন্না হায়জনীংই। মসিগী শিংনবা অসি খুঙ্গংশিংদা য়াম্না থুনা শন্দোকপা হৌরক্লি। লৈবাক্কী সরকার খুদিংনা মসিগা মাইয়োক্নবা ঙম্নবা হীরম খুদিংমক পাংথোক্লি। মসিদা, খুঙ্গংগী মীওইশিংনা তসেংবা ই-পাউ খঙবা, পঞ্চায়তী রাজকা মরী লৈনবা লুপ খুদিংনা তেংবাংন্দুনা থবক তৌমিন্নবসু য়াম্না মরু ওইবা ৱাফম অমা ওইরে। অদোম্না লৈবাক অসিবু কৈদৌনুংদা থৌশাদবা তৌখিদে, হন্দক্কী মতাংদসু মদুমক পাংথোক্কনি হায়বা থাজৈ। ইশাবু, ইমুংবু কোরোনাদগী ঙাকথোক্নবগীদমক্তা খুন্নাইগী থাক্তা পাংথোকপা য়াবা মরু ওইবা থবক খুদিংমক পাংথোক্কদবনি। মতম পুম্বদা মাস্ক উপ্পা অসি য়াম্না মরু ওইবনি। চিন অমসুং নাতোনবু খুমদুনা কাংলোন চুম্না উপকদবনি। অনিশুবদা, অদোম্না মওং অমত্তগী লোক খুবা, লাইহৌ হৌবা, লোক থুংবা, ওবগুম্বা লাইওং লাকপা মতমদা কৈদৌনুংদা লাইথোক্কনু। অহানবা ওইনা, ইশাবু অতোপ্পদগী লাপথোক্তুনা লৈবীয়ু। অদুগা অথুবা মতমদা কোরোনা তেস্ত তৌথোকপীয়ু। রিপোর্ত লাক্ত্রিবা ফাওবা দাক্তরনা পীবা হিদাক খুদিংমক চাদুনা লৈবীয়ু।

মরূপশিং,

মসিদগী ঙাকথোকপগী য়াম্না চাউবা পাম্বৈ অমসু লৈ, কোরোনাগী তীকা থাদোকপা। লৈবাক্কী মীয়াম খুদিংবু তীকা কাপথোক্নবা কেন্দ্র অমসুং রাজ্য সরকারশিংনা লেপ্তনা হোৎনদুনা লাক্লি। লৈবাক শিনবা থুংবগী চাউরাকপা ভেক্সিনগী দোজ করোর ১৮ অসি হৌজিক ফাওবগী ওইনা কাপখ্রে। অদুনা, অদোমসু ইশাগী মতম লাকপদা শোইদনা কাপথোকপীয়ু। মসিগী তীকা অসিনা ঐখোয়বু কোরোনাদগী ঙাকথোক্কনি, লাইনা অসিনা শাথীনা নারকপগী ফীভম লাকহল্লোই। অদুগা, তীকা থারবা তুংদসু, মাস্ক উপ্পা, ফুৎ ৬কী অরাপ্পা থম্বগী কাংলোন্দি থাদোকপা ইয়াদে। ঐহাক্না লৌমী মরুপশিংবু অমুক্কা হন্না য়াইফ পাউজেল পীজরি।

মীয়াম্বু য়াম্না থাগৎচরি।

*****