ভারতকী প্রধানমন্ত্রী

ঐগী নুংশিরবা ইনাওশিং অমসুং ইচলশিং, পরাক্রম দিবস থৌরমদা ঐগী য়াইফ পাউজেল পীজরি!

ঙসি মহাক্কী মপোক নুমিত্ত লৈবাক শীনবা থুংনা নেতাজি সুভাস চন্দ্র বোস নিংশিংলি। ঐনা নেতাজি সুভাস বাবুগী মফমদা ইকায়খুম্নবা উৎচরি। চহি অসিগী অচৌবা পরাক্রম দিবস মহাক্কী পোক্নফম লমদম ওরিসাদা পাংথোক্লি। থৌরম অসিদগীদমক ওরিসাগী মীয়াম অমসুং ওরিসা সরকার থাগৎপা ফোঙদোকচরি। ওরিসাগী কত্তক্ত নেতাজিগী পুন্সিদা য়ুম্ফম ওইবা অচৌবা একজিবিসন অমা পাংথোক্লি। নেতাজিদা য়ুম্ফম ওইবা লাইরিক কয়া খোমজিল্লে। নেতাজিগী পুন্সিগী থৌদোকশিংদগী লাই কয়া লাইয়েকপশিংনা কেনভাসতা য়েক্লে। নেতাজিগী পুন্সি খোঙচৎকী ৱারিশিং অসিনা মেরি যুব ভারত নত্ত্রগা মাই ভারত্ত অনৌবা থৌনা অমা হাপ্লগনি।

মরুপশিং,

ঙসি ঐখোয়না বিকিসিত ভারত অমগী পান্দম ফংনবা থবক তৌবা মতমদা নেতাজি সুভাসকী পুন্সিগী থবকশিংনা মখা তানা ঐখোয়দা ইথিল পীগনি। নেতাজি সুভাস বোসকী  খ্বাইদগী মরুওইবা পান্দমদি অজাদ হিন্দ অসিনি। মসি ফংনবগীদমক, মহাক্না অমতা ঙাইরবা পাম্বৈ-অজাদ হিন্দগী ৱারেপগা লোয়ননা মহাক চেৎনা লেপকখি। নেতাজি য়াম্না ইনাকখুনবা ইমুং অমদা পোকখি অমসুং সিবিল সর্বিসেস একজামিনেসন পাস তৌখি, মহাক বৃতিস সরকারদা সেনিয়র ওফিসার অমা ওইবা অমসুং নুংঙাইবা পুন্সি অমদা হিংবা য়ারমখি। অদুবু ভারত অমসুং অতোপ্পা লৈবাকশিং নিংতম্বা ফংনবা মহাক্না খুদোংথিবশিংগী লম্বীদা চৎখি অমসুং শিংনবা কয়া মায়োক্নখি, মহাক্না লৈবাক অমসুং মালেম শীনবা থুংনা চৎপা পামখি। ইনাকখুনবগী নুংঙাইবশিং অদুনা নেতাজি সুভাস ফাজিন্দুনা থম্বা ঙমখিদে। ঙসি ঐখোয়না বিকসিত ভারত অমা শেমগৎনবা ঐখোয়গী নুংঙাইবশিংদগী ঐখোয় খোঙ থাংদোকপা দরকার ওইরে। মালেমগী ওইনা খ্বাইদগী ফবা ওইবা, অফবা থবকশিং খনবা অমসুং মতিক চানা থবক তৌনবা মীৎয়েং চঙবা অসি য়াম্না মরুওই।

মরুপশিং,

ভারত নিংতম্নবা লৈবাক অসিগী থৌনা ফরবা নুপীশিং অমসুং নুপাশিং অমসুং ফুরুপ খুদিংমক শরুক য়াদুনা নেতাজিনা অজাদ হিন্দ ফৌজ লিংখৎখি। তোঙান তোঙানবা লোলশিং ঙাংলবসু, মখোয়গী অমতা ঙাইরবা পান্দমদি লৈবাক অসিগী নিংতম্বা পুরকপনি। মসিগী অপুনবা অসি ঙসি বিকসিত ভারত অমগী মরুওইবা পারা অমা ওইরে। মতম অদুদা নিংতম্বা ফংনবগীদমক অপুনবা অসি তঙাইফদনা দরকার ওইখি, হৌজিক বিকসিত ভারতকীদমক মসি দরকার ওইরে। মালেমগী থাক্ত ভারত চাউখৎনবা খুদোংচাবা ফিবম কয়া লৈরে অমসুং কমদৌনা ভারতনা ২১শুবা চহিচা অসি মখোয়গী ওইনবা হোৎনবগে হায়বগী মতাংদা মালেম্না য়েংলি। নেতাজি সুভাসকী ইথিল লৌবা অমসুং ভারতকী অপুনবগী শক্তমদা মীৎয়েং চঙবা অসি য়াম্না মরুওই। লৈবাক অসি মপাঙ্গল শোন্থহন্নবা অমসুং লৈবাক অসিগী অপুনবগী শক্তমদা অকায়বা পীনবা হোৎনরিবা মীওইশিংদগী মিকুপ নাহুম শিংনা লৈগদবনি।

মরুপশিং,

ভারতকী নাৎ অমসুং চৎনবীগীদমক নেতাজিনা য়াম্না চাউথোকচখি অমসুং ইনাকখুল্লবা ভারতকী গনতন্ত্রগী পুৱারিগী মরমদা য়াম্না তোইনা ৱা ঙাংখি অমসুং মসিদগী ইথিল লৌনবা মীয়ামগী পুক্নিং থৌগৎখি। ঙসিদি ভারত লোয়লম লৈঙাক্কী ৱাখল্লোনদগী মনিংতম্লে অমসুং লৈবাক অসিগী নাৎ অমসুং চৎনবীগী চাউথোকচবগা লোয়ননা চাউখৎলক্লি। অজাদ হিন্দ সরকার চহি ৭৫ মপুংফারকপদা লাল কিলাদা মহাক্না মচু অহুমগী ফিরাল চিংখৎখিবা অদু ঐনা কাউবা ঙম্লরোইদবা পুৱারিগী থৌরম অমনি। নেতাজিগী ৱারিশিংনা ইথিল পীদুনা, ২০১৯ দা ন্যু দিল্লিদা লাল কিলাদা নেতাজি সুভাসতা কৎথোক্লবা ম্যুজিয়ম অমা লিংখৎলে অমসুং হায়রিবা চহি অদুদগী সুভাস চন্দ্র বোস দিজাস্তর মেনেজমেন্ত এৱার্দশিং হৌদোক্লে। ২০২১ দা, নেতাজিগী মপোক নুমিৎ অসি পরাক্রম দিবস হায়না পাংথোক্নবা সরকারনা ৱারেপ লৌখি। নেতাজিগী অচৌবা মীতম অমা ইন্দিয়া গেত ময়াদা থম্লে, অন্দমান্দা ইথৎ অমা নেতাজিগী মিং থোল্লে অমসুং গনতন্ত্র দিবস পেরেদতা আই.এন.এগী লান্মীশিং ইকায়খুম্নবা উৎলে। মসি সরকার অসিনা মহাক ইকায়খুম্নবা উৎপগী খুদম অমনি। 

মরুপশিং,

হৌখিবা চহি ১০ দা, লৈবাক অসি য়াংনা চাউখৎলক্তুনা মীচম মীয়ামগী পুন্সি হিংবদা লাইরে অমসুং লান্মীগী মপাঙ্গলশু কনখৎলে। হৌখিবা চহি ১০ দা, ভারতমচা করোর ২৫ লায়রবা কোক্লে। খুঙ্গং নত্ত্রগা সহর য়াওনা মফম খুদিংমক্ত অনৌবা ইনফ্রাস্ত্রকচরশিং শেমগৎলে। মমাঙদা অমুক্ত ওইখিদ্রিবা মওংদা ভারত লান্মীগী মপাঙ্গল কনখৎলে অমসুং মালেমগী ফম্বাক্ত ভারতকী থৌদাং হেনগৎলক্লি। মালেমদা ভারতনা অহুমশুবা খ্বাইদগী চাউবা ইকোনোমি ওইগদবা নুমিৎ অদু কুইদ্রে। নেতাজি সুভাসনা ইথিল পীদুনা, পান্দম অমগা লোয়ননা, বিকসিত ভারতকীদমক মীওই খুদিংমক লেপ্তনা থবক তৌগদবনি অমসুং মসিনা নেতাজিগী মফমদা উৎপা অশেংবা ইকায়খুম্নবা ওইগনি। অমুক হন্না মীয়ামদা য়াইফ পাউজেল পীজরি অমসুং অদোম থাগৎপা ফোঙদোকচরি!

*****