ভারতকী প্রধানমন্ত্রী

ৱাহে গুরুজী কা খালসা,

ৱাহে গুরুজী কা ফতেহ।

ঙসি শেংলবা মফম অসিদা লাকপদা ঐ অপেনবা পোকই। ঙসি লৈবাক অসিদা করতারপুর কোরিদোর কৎথোকপা অসি ঐগী লাইবাক ফবনি। কার সেবাগী মতমদা নহাক্না খনবা অদু হৌজিক ঐসু ফাওরি। মালেম অসিদা লৈরিবা, লৈবাক শীনবা থুংনা লৈরিবা সিখ ইচিন-ইনাওশিং ঐনা থাগৎলি।

ঙসি সিরোমনী গুরদৱারা প্রবন্ধক কমিতীনা ঐঙোন্দা কৌমী সেবা এৱার্দ পীরে। মসিগী মনা ঐখোয়গী সাধুগী মাইপাকপা, কৎথোকপা অমসুং খাংবা কনবগী মাইপাকপগী থবক ইকায়খুম্নবা উৎপা ওইনা পীবনি। মসিগী মনা অসি ঐনা গুরু নানক দেবজীগী খুয়াদা কৎথোক্লি।

মরূপশিং,

গুরু নানক দেবজীগী ৫৫০শুবা মপোক নুমিৎ থৌরম মমাংদা ইন্তিগ্রেতেদ চেক পোস্ত-করতারপুর কোরিদোর হাংদোকপা অসি ঐখোয় পুম্নমক হরাওবা শরুক অনি হেনগৎলে। কারতিক পুর্নিমা লাকপদা, দেব-দিৱালিনা হেন্না মঙাল পীরগনি অমসুং ঐখোয় থৌজাল পীরগনি।

মরূপশিং, কোরিদোর অসি শেমগৎলবা মতুংদা, গুরদৱারা দরবার সাহিব খুরুম্বা হেন্না লাইরগনি। মসিগী কোরিদোর অসি মতম চানা শাবগীদমক পঞ্জাব সরকার, সিরোমনী গুরদৱারা প্রবন্ধক কমিতী অমসুং শীন্মিশিং ঐনা থাগৎলি।

করতারপুর কোরিদোরগী মতাংদা ভারতকী পুক্নিং খঙবগীদমক অমসুং ইকায়খুম্নবা উৎপগীদমক ঐনা পাকিস্থানগী প্রধান মন্ত্রী ইমরান খান নিয়াজি থাগৎলি। মখোয়গী নাকলদা লৈবা কোরিদোর য়াম্না য়াংনা লোইশিনবগীদমক ঐনা পাকিস্থানগী শিন্মীশিং থাগৎলি।

মরূপশিং,

গুরু নানক দেবজী সিখ লাইনিং অমসুং ভারত খক্তগী নত্তনা, মীওইবা খুন্নাই পুম্নমক্কী লন অমনি। ওজা অমা ওইবগী মথক্ত গুরু নানক দেব অসি ৱাখল্লোন অমনি অমসুং পুন্সিগী য়ুমফম্নি। ঐখোয়গী কলচর, গুনশিং, ৱাখল্লোন অমসুং ৱাঙাংশিং গুরু নানক দেবজীগী ৱাখল্লোনদা শেমগৎপনি। গুরু নানক দেবজীনা সুলতানপুর লোধিদগী খোঙচৎ অমগীদমক খোঙশানবা হৌরকপদা মহাক্না অনৌবা মতম অমা হৌনবা চৎলিবনি হায়বা কনানা খঙবা ঙমখি। মহাক্কী খোঙচৎশিং, পাউ ফাওনবা অমসুং উনবশিং অদু খুন্নাইগী অহোংবা পুরক্নবগী মতিক চারবা খুদমশিংনি।

মরূপশিং,

ভারতনা মীনাই ওইদুনা লৈরিঙৈ খুদোংথিবা তারবা মতমদা ভাবা তাহন্নবা অমসুং মিকপ থোকহন্নবা মহাক্কী পুন্সি কৎথোকখি। সোসিয়েল ফিলোসোফিগী খুৎথাংদা গুরুন নানক দেবজীনা অপুনবা, মচিন-মনাও ওইবা অমসুং নুংশিন্না হিংমিন্নবগী লম্বী উৎখি। অচুম্বা অমসুং পুকচেল শেংবদা য়ুমফম ওইদুনা চাউখৎপা পুরক্নবগী লম্বী ঐখোয়দা উৎখি। শেন ফংলক্কনি অদুবু অমুক চৎখিগনি অমসুং অচুম্বদি মতম চুপ্পদা লৈহৌগনি হায়বা ঐখোয়দা মহাক্না তাকপীখি।

মরূপশিং,

করতারপুরগী মফম খুদিংমক দেবজীগী হুমাং তিনশিনখ্রে। করতারপুরগী অতিয়াদা মহাক্কী খোঞ্জেলনা নিল্লি। মহাক্না করতারপুরদা লাঙ্গোল পায়দুনা লৌ উবা হৌখি অমসুং মহাক্না ধর্ম্মগী পাউজেল শন্দোকপা হৌখি অমসুং থবক কন্না শুবদগী ফংলকপা মহৈ-মরোং চাখি।

মরূপশিং,

মসিগী শেংলবা মফম অসিগীদমক ঐখোয়না পায়খৎলিবা অসিনা মতিক চাবা নত্তে। মসিগী কোরিদোর অমসুং আই সি পি অসিনা নুমিৎ খুদিংগী ভক্ত লিংশিং কয়া গুরদৱারা দরবার সাহিবকা নকশিন্নগনি। করতারপুরদগী তাবা ফংবা গুরবানি অসিনা ঐখোয়না সিখ ইচিন-ইনাওশিং খক নত্তনা ভারতমচা খুদিংমক বর পীগনি।

মরূপশিং,

গুরু নানক দেবজীগী য়াম্না নক্নবা মনাই অনি-ভাই লালো অমসুং ভাই মারদানা মীয়াম্না ফজনা খঙলে। হায়রিবা মীওইশিং অসি খন্দুনা ইনাকখুনবা অমসুং লায়রবা অমসুং খুদিংমক চপ মান্নৈ হায়বগী পাউজেল অমা নানক দেবজীনা ঐখোয়দা তাকখি।

মরূপশিং,

গুরু নানক দেবগী ফিলোসোফি অসি মীওইবা খক্তগী নত্তে। মসিদা মহৌশাগী মরুওইবা অদু য়াওরি। মহাক্না হায়খি নুংশিৎনা ওজানি, ঈশিংনা ইপানি অমসুং মালেম্না ইমানি। ঙসি ঐখোয়না অকোয়বগী ফিবম, পোল্লুসনগী মতাংদা ৱারি শানবা মতমদা ঐখোয়গী মাংদা গুরু নানক দেবগী পাউজেলশিং লৈরি।

মরূপশিং,

তুরেল ৫ চেল্লিবা ঈশিং মরাং কাইনা ফংলিবা মতম অদুগী পঞ্জাবতা গুরুনা মাংজৌন্না উরমখি, মহাক্না ঈশিংগী নুংনাংবা ফোংদোক্লদুনা হায়খি-ঈশিংনা মালেম অসি শেম্বা মরম্না মতম চুপ্পদা ঈশিংগী খনগদবনি। ঙসিগী ঐখোয়না ঈশিংগী ৱাখল খনবা কাউরবসু অমসুং অকোয়গী ফিবমগী মতাংদা চেকশিন্দ্রবসু গুরুগী খোঞ্জেল অসিনা ঐখোয়দা মালেম্না ঐখোয়দা পীরিবা পোৎলমশিং নিংশিংহল্লি।

মরূপশিং,

হৌখিবা চহি মঙা অসিদা, ভারতকী ইনাকখুল্লবা মমাংঙৈগী ফিবম অদু ঙাক্নবা অমসুং মালেমদা উৎনবা ঐখোয়না হোৎনরি। মমাং চহিদগী গুরু নানক দেবগী ৫৫০শুবা মপোক নুমিৎ পাংথোক্তুনা লাক্লি। মালেম শীনবা থুংনা ভারতকী হায় কম্মিসনশিং অমসুং এম্বেসিশিংদা অখন্নবা থৌরম কয়া পাংথোক্তুনা লাক্লি। গুরু নানক দেব নিংশিংদুনা কম্মেমোরেতিপ কোইন অমসুং স্তাম্পশিং ফোংলে।

মরূপশিং,

কিরতন, কাথা, প্রাভাতফেরি অমসুং লাঙ্গর থৌরমশিং ওইনা লৈবাক মনুং অমসুং মালেমদা গুরু নানক দেবগী পাউজেলশিং শন্দোকলি। মমাংদসু গুরু গোবিন্দ সিংহগী ৩৫০শুবা মপোক নুমিৎ মালেম শীনবা থুংনা পাংথোকখ্রে। হায়রিবা থৌরম অদুদা কম্মেমোরেতিপ কোইন অমা অমসুং লুপা ৩৫০গী পোস্তেজ স্তাম্প অমা ফোংখি। মহাক্কী মিংদা গুজরাতকী জামনাগরদা ফম্মু ৭৫০ লৈগদবা হোস্পিতাল অমা শাখি।

মরূপশিং,

মালেমগী অনৌবা মীরোলশিংনা গুরু নানক দেবগী পাউতাকশিং খঙনবা গুরবানি অসি মালেমগী লোল কয়াদা হন্দোক্লে। কেন্দ্র সরকারনা হায়জবদা য়ারকপগীদমক ঐনা য়ুনেসকো থাগৎলি। গুরু নানক দেবগী খুৎইশিং লোল কয়াদা হন্দোকপদা য়ুনেসকোনা মতেং পাংলি।

মরূপশিং,

গুরু নানক দেব অমসুং খালসা পান্থকা মরি লৈনবশিং থিজিনবা হেনগৎহন্নবা য়ু কেগী য়ুনিভরসিতি অমদা চেয়রশিং লিংখৎলে। মসিগী মান্নবা থবক কনাদাদা পায়খৎলে। অমৃতসরদা ইন্তর-ফাইথ য়ুনিভর্সিতি অমা লিংখৎনবা ৱারেপ লৌরে।

মরূপশিং,

সুলতানপুর লোধি হেরিতেল তাউন অমা ওইনা শেমগৎনবা থবক পায়খৎলে। মসিদা শেমগৎলিবা হেরিতেচ কমপ্লেক্স, মিউজম, ঔদিতোরিয়ম অথুবদা লোইশিল্লগনি। মফম অসিদা লৈরিবা রেলৱেজ স্তেসন্দগী হৌরগা সহর অসিগী মফম কয়া গুরু নানক দেবগী শক্তমশিং উবা ফংলগনি। গুরু নানক দেবগা মরি লৈনবা মফমশিং ফাওদুনা চেনবা অখন্নবা ত্রেন অমা চয়োল অমগী মনুংদা নুমিৎ মঙানি চেল্লে।

মরূপশিং,

শ্রী অকল তখ, দমদামা সাহিব, কেসগর সাহিব, পাতনা সাহিব অমসুং হাজুর সাহিবকী মরক্ত রেল অমসুং নোংথোক্কী শম্নবা হেনগৎহল্লে। অমৃতসরদগী লন্দন ফাওবা পাইবা এয়র ইন্দিয়া ফ্লাইত্ত ‘ইক ওনকার’ পাউজেল ইরে।

মরূপশিং,

মালেমগী মফম কয়াদা খুন্দারিবা সিখশিং খুদোংচানবা কেন্দ্র সরকারনা মরুওইবা ৱারেপ অমা লৌরে। চহি কয়া মীওই কয়ানা ভারত্ত লাকপদা খুদোংচাদবা মায়োক্নরি। হৌজিক ইমুং কয়া ভিসা অমসুং ও সি আই কার্দশিং শাবা য়ারগনি। ভারত্ত লৈবা মখোয়গী মরি-মতাশিং উনবা অমসুং গুরুশিংগী লাইফমশিং কোইবা য়ারগনি।

মরূপশিং,

আর্তিকল ৩৭০ লৌথোকপদগী, জে অমসুং কেদা লৈরিবা সিখ ইমুংশিং ভারতকী অতৈ মফমশিংগুম চপ মান্নবা হক ফংলগনি। ঐখোয়গী সিখ ইচিন-ইনাওশিং অমসুং ইচলশিং সিতিজনসিপ এমেন্দমেন্ত বিলগী কান্নবা য়াম্না চাউনা ফংলগনি। মখোয় ইরাই লাইনা ভারতকী নাগরিক ওইবা য়ারগনি।

মরূপশিং,

ভারতকী অপুনবা অমসুং সেকুরিতিগীদমক গুরু নানক দেবজীতগী হৌরগা গুরু গোবিন্দ সিংহজীনা কন্না হোৎনরমখি। লৈবাক অসিগীদমক মখোয়না কৎথোকখিবশিং অদু ইকায়খুম্নবা উৎনবা সরকারনা মরুওইবা থবক কয়া পায়খৎলে। চহি অসিদা জাল্লিয়ানৱালা বাগ মীহাৎকী চহি ১০০শুবা থৌরম পাংথোক্কনি। মসিগা মরি লৈনবা মেম্মোরিয়েল অসি মতমগা চুনবা মওংদা শেমগৎলে। সিখ নহারোলশিং লাইরিক তম্বা, স্কিল হেনগৎহন্নবা অমসুং মশানা মশা থবক পীজনবা থবক কয়া সরকারনা পায়খৎলে। হৌখিবা চহি মঙাদা সিখ মহৈরোই লাখ ২৭ তোঙান-তোঙানবা স্কোলারশিপ পীখ্রে।

মরূপশিং,

করতারপুর সাহিব কোরিদোরগীদমক লৈবাক শীনবা থুংনা অমসুং মালেম শীনবা থুংনা লৈরিবা সিখ মরূপশিং ঐনা অমুক হন্না থাগৎলি অমসুং গুরু নানক দেবজীগী ৫৫০শুবা মপোক নুমিৎকী য়াইফ-পাউজেল পীজরি। গুরু গ্রান্থ সাহিবকী মমাংদা লেপতুনা, মসিগী শেংলবা থৌরম অসি শরুক য়ানবগী খুদোংচাবা অমা ঐনা ফংলে, মসিদা ঐ ইশামক থৌজাল ফংলে হায়না খঞ্জরি অমসুং নখোয় ময়ামদা খুরুমজরি-

সতনাম শ্রী ৱাহেগুরু!

সতনাম শ্রী ৱাহেগুরু!

সতনাম শ্রী ৱাহেগুরু!