ভারতকী প্রধানমন্ত্রী

নোংচুপ বেঙ্গলগী শান্তিনিকেতন্দা বিশ্ব ভারতী য়ুনিভর্সিতীগী কনভোকেসন্দা প্রধান মন্ত্রীনা পীখিবা ৱারোল

মফম অসিদা তিল্লিবা বঙ্গলাদেশকী প্রধান মন্ত্রী শৈখ হসিনা, নোংচুপ বেঙ্গলগী রাজ্যপাল কেসরী নাথজী ত্রিপাথী, নোংচুপ বেঙ্গলগী চীফ মিনস্তর মমতা বেনরজী, বিশ্ব ভারতীগী ভাইস-চান্সেল্লর প্রোফেসর সাবুজ কালী সেন অমসুং রামকৃষ্ণ মিশন বিবেকানন্দা ইন্সতিতুৎগী ভাইস-চান্সেল্লর শ্বামি অপ্রিয়ান্দজী অমসুং মফম অসিদা তিল্লিবা মীপুম খুদিংমক অমসুং ঐগী নুংশিরবা মরূপশিং,

বিশ্ব ভারতীগী চান্সেল্লর অমা ওইনা, অহানবদা ময়াম্না ঐবু ঙাকপীনবা হায়জরি, মরমদি, য়ুনিভর্সিতী অসি লাকপগী লম্বীদা অঙাং খরনা মখোয় থক্নবা ঈশিং ফংদ্রে হায়না ঐঙোন্দা হায়রকখি। য়ুনিভর্সিতী অসিগী চান্সেল্লর অমা ওইনা অদোম্বু খুদোংচাদবা থোকহন্দবা হায়বসি ঐগী থৌদাংনি। মরম অদুনা অদোম্বু খুদোংচাদবা থোকহনবগীদমক ঐবু ঙাকপীনবা হায়জরি। লৈবাক অসিগী য়ুনিভর্সিতী কয়াগী কনভোকেসন য়াওনবগী খুদোংচাবা কয়া ঐনা ফংখ্রে। থৌরম অয়াম্বদা ঐনা মীথুংলেন ওইনা শরুক য়াখি। অদুবু ঐ ঙসি মীথুংলেন ওইদ্রে, ভাইস-চান্সেল্লর অমা ওইনা শরুক য়ারি। মফম অসিদা ঐগী থৌদাং লৈরিবা অসি গনতন্ত্রনা ওইহনবনি। প্রধান মন্ত্রীগী ফম পায়রুবদগী ঐ চান্সেল্লর ওইবনি। লৈবাক অসিগী মপু অসি গনতন্ত্রনি অমসুং মসিনা লৈবাক অসিগী মীওই কোতি ১২৫দা তোঙান-তোঙানবা মওংদা থৌনা পীরি। গনতন্ত্রগী মখাদা চাউরকপা অমসুং মহৈ তম্লকপা মী খুদিংমক্না হেন্না ফবা ভারত অমা শেমগৎপদা মতেং পাংলি। কনাগুম্বা অমনা ওজাগী মনাক্ত চৎতনা মহৈ হৈবা, মপুং ফাবা অমসুং মাইপাকপা ঙম্লোই হায়নবা অমা লৈ। গুরুদেব রবিন্দ্রনাথ থাকুরগী শেংলবা মফম অসিদা মশিং য়াম্নবা ওজাশিংগা লোয়ননা মতম খরা লৈমিন্নবগী তাঞ্জা ফংজবা অসি ঐগী লাইবক য়াম্না ফবনি।

কনাগুম্বা অমনা লাইশঙ মনুংদা মন্ত্রগী শক্তি মশাদা ফাওবগুম, মদুগা চপ মান্নবা শক্তি ঐনা বিশ্ব ভারতী য়ুনিভর্সিতীদা ফংলি। ঐনা কারদগী কুমথরগা ফম্বাক তম্না লাকপা মতমদা, মফম অসিগী শরুক খুদিং মতম অমদা রবিন্দ্রনাথ তেগোরনা চৎলম্বগী ইহুল ঐঙোন্দা ফাওখি। মফম অসিদা ফম্লগা মহাক্না লাইরিক ইরমগনি। মফম অমদা ফম্লগা মহাক্না মহাক্কী ঈশৈ ঙংলমগনি অমসুং মহাত্মা গান্ধীগা ৱারী শারমগনি। মহাক্কী মহৈরোয়শিংদা মহাক্না পুন্সিগী ৱাহন্থোক, মমা লৈবাক নুংশিবগী মতাংদা তাক্লমগনি।

মরূপশিং,

ঙসি ঐখোয় মফম অসিদা চৎনবী ঙাক্না পুল্লরি। হৌখিবা চহীচাগী অসিগুম্বা থৌদোক কয়া অমরকুঞ্জনা থেংনদুনা লাক্লি। হৌখিবা চহী কয়া অদোম্না তম্লকখিবগী তাঙ্কক অমা ঙসি লোইশিল্লগনি। দ্রিগ্রি ফংলবা খুদিংমক ঐনা থাগৎপা পাম্মি। মখোয়গী তুংগী পুন্সিদা মাইপাকপা ওইনা ঐনা য়াইফ-মঙ্গল পীজরি। পীরিবা দ্রিগ্রি অসি অদোমগী মহৈ-মশিংগী থাক্কী শাখিনি। মরম অদুনা, মসি য়াম্না কান্নবা অমনি। অদুবু, অদোম্না দ্রিগ্রি ফংবা খক নত্তনা মমল নাইদ্রবা মহৈ তম্বা ফংলি। ইনাক খুল্লবা চৎন-লোনচৎশিং অদোম্না ফংহৌগনি। মমাংঙৈগী অমসুং অনৌবা মতম অসিগী গুরু-সিশ্যগী চৎনবগীগা অদোমগ লোয়নদুনা লৈরি।

বেদিক অমসুং পুরানিক মতমদা, মুনিশিংনা চৎনবী অসি ঙাক্তুনা লাক্লি অমসুং অনৌবা মতম অসিদা মসি গুরু রবিন্দ্রনাথ তেগোরনচিংবা অচৌবা মীওইশিংনা মাংদা পুখৎতুনা লাক্লি। মসি চুম্নগী ৱারোল অমা নত্তে, অদোমদা পীবা পাউতাক অমনি। মসি মহৌশানা ঐখোয়দা তাকপীবা মতৌ করম্না অফবা মী নৎত্রগা লৈবাক অমা ওইগদগে হায়বদুনি। গুরুদেব রবিন্দ্রনাথ তেগোরগী অচৌবা ৱাখল অদুনা বিশ্ব ভারতী অসি শেমগৎলকখিবনি।

মরূপশিং,

মালেম পুম্বা অসি য়ুম অমনি। মসিগী পাউতাক অসি গুরুদেবনা বিশ্ব ভারতীগী মরুওইবা পাউতাক অমা ওইরম্মি। ইনাকখুল্লবা ভারতকী চৎন-লোনচৎকী মহাও অদু মসিগী বেদা মন্ত্র অসিদা লোৎতুনা লৈরি। মালেম অসি য়ুম অমনি হায়বদু মফম অসি উৎপা গুরুদেবনা পামখি। মালেম পুম্বা লৈবা য়াবা মফম অদুদা মকোন অমসুং য়ুম অনিমক্কী মরুওইবা অদু চপ মান্নৈ। ভারতকী থৌওং অদু মসিনি। ‘ভসুধৈভ কুতুমবকুম’ হায়রিবা মন্ত্র অসিনা চহি লিশিং কয়াদগী ভারতকী লৈমায়দগী শন্দোক্তুনা লাক্লি।

মরূপশিং,

চহী লিশিং কয়াগী মমাংদা থোকখিবা ওইরবসু বেদা অমসুং উপনিসদ অসি চহী ১০০গী মমাংদা রবিন্দ্রনাথ তেগোরনা শান্তিনিকেতন্দা লাকপা মতমদা চুনরি। ২১ শুবা চহীচাদা থেংনরিবা শীংনরকপশিং মায়োক্নবদা মখোয় অসি হৌজিক ফাওবা শীজিন্নফম লৈরি। ঙসিগী লৈবাকশিং অসি রাজনিতীগী ঙমখৈশিংগী মনুংদা লৈরি। অদুবু লৈবাক অসিগী ফজরবা চৎনবীশিং অসি তশেংনা মালেম শীনবা থুংনা শন্দোকখ্রে। ঙসি ঐখোয়গী ইরক্তা বঙ্গলাদেশকী প্রধান মন্ত্রী শৈখ হসিনাসু য়াওরি। কনভোকেসন অমদা লৈবাক অনিগী প্রধান মন্ত্রীশিং শরুক য়াবা অসি অতাংবা অমনি। ভারত অমসুং বঙ্গলাদেশ অসি লৈবাক অনিনি অদুবু ঐখোয়না পামজবদি অমনা অমগী মতেং পাংনবনি। কলচর নৎত্রগা মীয়ামগী থৌশিলগী ওইরবসু অমনা অমদগী তম্নরি। মদুগী খুদমদি ঐখোয় অনিনা ঙাইহাক্কী মতুংদা বঙ্গলাদেশ ভাবন হাংদোক্লগনি। বিল্দিং অসিদা গুরুদেবকী পামজবশিং মমি তারি।

মরূপশিং,

মতম অমদা, গুরুদেবকী মতিক মগুন খক নত্তনা মহাক্না লম য়াম্না চৎলম্বা অদুগীদমক ঐ অঙাকপা পোকই। ঐগী মপান লৈবাক্কী খোঙচৎ মনুংদা, ঐগা উনবা মীওইশিংনা চহী কয়াগী মমাংদা মখোয়গী লৈবাক্তা তেগোর লাক্লমখি হায়না পাউদম্লকখি। হায়রিবা লৈবাকশিং অদুদা হৌজিক ফাওবা গুরুদেববু নুংশিনা নীংশিংনরি। মীয়াম্না মখোয় মশা গুরুদেবগা লোয়ননবা হোৎনখি।

অফগানিস্তানদা, অফগান খুদিংমক্না য়াম্না চাউথোকচনা কাবুলীৱালাগী ৱারী পন্নরি। চহী অহুমগী মমাংদা ঐনা তজিকিস্থানদা চৎপা মতমদা, গুরুদেবগী মীতম অমা মাইখুম হাংদোকপগী খুদোংচাবা ঐনা ফংখি। মফম অদুগী মীয়াম্না গুরুদেববু ইকায়খুম্নবা অদু ঐনা কৈদৌঙৈদা কাওবা ঙম্লোই।

মালেমগী য়ুনিভর্সিতী অয়াম্বদা হৌজিক ফাওবদা তেগোর অসি তম্নবা সবজেক্ত অমা ওইরি। মহাক্কী মমিং লৌদুনা থোনবা চৌক্রি ফাওবা লৈরি। তেগোর হৌজিক হিংলি অমসুং মালেমগী নাগরিক অমা ওইরি হায়বদা লাল্লোই। ঙসিগী থৌরম অসিদা, মহাক্কা গুজরাতকা লৈনবা মরি অদু ঐনা হায়নীংই। গুরুদেবগা গুজরাতগা অখন্নবা মরি অমা লৈনৈ। মহাক্কী ময়াম্বা সত্যেন্দ্রনাথ তেগোর অসি সিবিল সার্বিসতা য়াওবা অহানবা ভারত মচানি। মহাক মতম শাংনা অহমদবাদতা লৈরম্মি। মহাক অহমদবাদকী কমিস্নর ওইরম্মি। ঐনা ৱারী অমা তাখি মদুদি ইংলেন্দ চৎত্রিঙৈদা সত্যেন্দ্রনাথনা অহমদবাদতা মহাক্কী মনাও নুপাদা থা তরুক ইংলিস তমবীখি। মতম অদুদা গুরুদেব চহী ১৭ খক্তা শুরি। হায়রিবা মতম অদুদা, গুরুদেবনা মহাক্কী মমিং লৈরবা নোভেল ‘খুদিতো পাষন’ অমসুং শৈরেং খরা অহমদবাদতা ইখি। হিরম অমদা, গুজরাত য়াওনা লৈবাক অসিগী মফম খুদিং গুরুদেবনা মালেমগী থাক্তা পুখৎলকপদা অচৌবা থৌদাং লৌখি।

মরূপশিং,

মীওই খুদিংমক পান্দম অমা ফংনবা পোক্লকপনি হায়বসি গুরুদেবনা থাজৈ। অঙাং খুদিংমক মখোয়গী পান্দমশিং ফংনবা হোৎনবদা মহৈ-মশিংনা অচৌবা থৌদাং লৌরি। মহাক্কী শৈরেংদা অঙাংশিংগীদমক মহাক্না পামজবা মহৈ-মশিং ঐখোয়না খঙবা ঙম্মি। স্কুলশিংদা তাকপীরিবশিং অদু খক্তনা মহৈ তম্বা নত্তে হায়না মহাক্না হায়রম্মি। মফম অমসুং মতম অকক্নবা লৈতনা মী অমগী মাইওন খুদিংমক থোং মান্ননা চাউখৎহনবা অদু মহৈ-তম্বনি। মরম অসিনা গুরুদেবনা ভারতকী মহৈরোয়শিং অসি মালেমগী অতৈ মফমশিংদা থোকপা থৌদোক ৱাথোকশিং ফজনা খঙহনবা পাম্লিবা, অতোপ্পা লৈবাকশিংদা মীওই কয়া লৈ, মখোয়গী খুন্নাইগী থাজবশিং করিনো, মখোয়গী চৎনবীশিং অমসুং অতৈ কয়া খঙহনবা পামখি। হায়রবশিং অসি খঙনবা মহাক্না মতম চুপ্পদা তকশিনখি। অদুগা লোয়ননা কনাগুম্বা অমনা ভারতকী কলচরসু কাওরোইদবনি হায়না মহাক্না তকশীনখি।

হায়রিবা ৱাফমশিং অসি অমেরিকাদা এগ্রিকলচর তম্বা চৎখিবা মহাক্কী ময়ানুপাদা চিথী ওইনা ইদুনা খঙহনখি হায়না মমাংদা হায়খ্রে। লাইরিক তম্বগী শরুক অমা ওইনা এগ্রিকলচর তম্বা অসিনা অরোইবা নত্তে অমসুং মীয়ামগী অপাম্বা ফংহনবা ঙম্লোই হায়না মহাক্না ময়ানুপাদা চিথি ইখি। মী খঙনবা থৌরাং তৌরকপা মতমদা মশাগী শক্তম মাংলবদি মহাক মশামক কা অমগী মনুংদা শো লোনশিন্দুনা লৈগদবনি হায়না মহাক্না মখা তানা ইখি।

ভারতকী নিংতম্বগী খোঙজংদা, তেগোরগী মহৈ-মশিং অমসুং ভারতকী ফিলোসোফী অসি তোঙানবা অমা ওইখি। ঐখোয়গী মমাংঙৈগী চৎনবীগী শরুক অমা ওইনা, মহাক্কী পুন্সি অসি ভারতকী অমসুং মালেমগী ৱাখল্লোনগী শরুক অমনি। মসিনা মরম ওইদুনা মহাক্না মহৈ-মশিং তম্বগী তোখাইবা তাইবং অমা বিশ্ব ভারতীদা শেমগৎলম্লিবা। মফম অসিদা অচম্বা হায়বসি মহৈ-মশিং তম্বগী মরুওইবা য়ুফমনি। অহাংবদা উগী মখাদা ক্লাস চৎথরি। মীওইবা অমসুং মহৌশাগী মরক্ত হকথেংননা মরী লৈনরি। ঈশৈ, লাইয়েকপা, থিয়েতর অমসুং এক্তিং য়াওনা মীওইবগী পুন্সিগী শরুক অয়াম্বা মালেম ইমাগী তম্পাক্তা শেমগৎলি। মহৈকোল অসি লিংখৎলম্বা গুরুদেবগী মঙলান মঙফাওনবা ঙম্নবা মহৈ লোয়শঙ অসিনা মাংদা চংশিনবদা ঐনা হরাওবা পোকই। লাইরিক তম্বা অমসুং খুৎশা হৈবা অনি অসি পুনশিন্নবা মহাক্না হোৎনরম্বা অমসুং মীচম মীয়ামগী পুন্সি মহিং ফগৎনবা পায়খৎলম্বা থবকশিং শিংথানীংঙাইনি। মফম অসিদা খুঙ্গং ৫০ শেমগৎনবা অদোমনা হোৎনরি। মসি হায়বা মতমদা ঐগী থাজবা হেনগৎলক্লে। থবক তৌবগা লোয়ননা থাজবা হেনগৎলকই। অদোমনা থবক য়াম্না তৌবা মরম্না অদোমদা থম্লিবা ঐগী থাজবা হেনগৎলক্লে।

মরূপশিং,

মহৈ লোয়শঙ অসি ২০২১দা চহী ১০০ মপুং ফারগনি। মথং চহী ২-৩দা খুঙ্গং ৫০দগী খুঙ্গং ১০০ নৎত্রগা ২০০দা হেনগৎনবা অদোম্না হোৎনগনি। অদোমগী পাঙ্গল অদু লৈবাক অসিগী মথৌ তাবা থবকশিংদা শীজিন্ননবা ঐনা হায়জরি। খুদম ওইনা, মহৈ লোয়শঙ অসিগী ২০২১দা চহী ১০০ শুবা থৌরমদা য়ুমথোং খুদিং মৈ ফংবা য়ুমশিং লৈবা, গ্যাস কনেক্সন লৈবা, অমাঙশঙ লৈবা, মমাশিং অমসুং অঙাংশিং তিকা থাবা অমসুং মীয়াম্না দিজিতেল ত্রান্সেক্সনগী মহৈ হৈবা খুঙ্গং ১০০ অদোমনা শেমগৎকনি। মখোয়না কমন সর্বিস সেন্তরশিংগী কান্নবা খঙগনি অমসুং ওনলাইনদা ফোর্মশিং মেনশিনগনি।

উজ্জৱালা স্কিমগী মখাদা গ্যাস কনেক্সন পীবা অমসুং শ্বচ্চ ভারত মিশনগী মখাদা অমাংশঙশিং শারিবা অসি নুপীশিং নুংঙাইনবনি হায়বসি অদোম্না খঙগদবনি।

শক্তি লাৎলিবা অদোমনা নুপীশিংদা থৌনা পীগনি। মসিগী মথক্তা, অদোমগী থবকশিং অদুনা খুঙ্গং ১০০ অসি মহৌশা পামজবা অমসুং মহৌশা লাৎপা খুঙ্গংশিং ওইহনগনি। অদোম্না মহৌশাগী ফিবম কাইহন্দনা হোৎনবা অসিগুম, খুঙ্গংশিং অসি অদোমগী মিশনগী শরুক অমা ওইহনগদবনি। খুঙ্গংশিং অসিদা ঈশিং য়োক্তুনা থম্নবা মফম মরাং কাইনা শেমদুনা ঈশিং লীদুনা থম্বগী থবক পায়খৎকনি। শিং শীজিন্নবা তোক্তুনা নুংশিৎ শেংহন্দবদগী ঙাকথোক্কদবনি। ওর্গানিক হার শীজিন্নদুনা লৈবাক লৈহাও কনগদবনি। পান্দম অসি ফংনবা ভারত সরকারগী গোবর ধন য়োজনা শীজিন্নগদবনি।

মরূপশিং,

ঙসি ঐখোয় মখল কয়াগী খুদোংচাদবা কয়া মায়োক্নরি। ২০২২দা পাংথোক্কদৌরিবা ৭৫ শুবা নীংতম্বা নুমিৎ থৌরমদা অনৌবা ভারত অমা শেম্নবা ভারত মচা কোতি ১২৫না ৱাশক্লি। ৱাশক অসি ঙাক্নবা হোৎনবদা মহৈ-মশিং অমসুং অসিগুম্বা মহৈ লোয়শঙশিংগী অচৌবা থৌদাং লৈ। অসিগুম্বা মহৈ লোয়শঙশিং অসিদগী থোরকপা নহারোলশিংনা লৈবাক অসিগী অনৌবা পাঙ্গল অমসুং মাইওন অমা পীরি। ঐখোয়গী য়ুনিভর্সিতীশিং অসি শুপ্নগী মহৈ লোয়শঙশিং নত্তে। খুন্নাইগী থবকশিংদা মখোয়না ফজনা শরুক য়ানবা হোৎনরি।

উন্নৎ ভারত অভিয়ানগী মখাদা, খুঙ্গংশিং চাউখৎনবা য়ুনিভর্সিতীশিংগা শম্নহল্লে। গুরুদেবগী ৱাখল্লোনগা মান্ননা, অনৌবা ভারতনা দরকার ওইবগী মতুংইন্না কেন্দ্র সরকারনা ঐখোয়গী এজুকেসন সিস্তেম অসি মপাঙ্গল কনখৎনবা হোৎনরি। চহি অসিগী বজেৎতা রিভাইতেলাইজিং ইনফ্রাস্ত্রকচর এন্দ সিস্তেম ইন এজুকেসন (রাইজ) কৌবা অনৌবা স্কিম অমা হৌদোক্লে। মসিগী মখাদা লৈবাক অসিগী এজুকেসন সিস্তেম অসি মপাঙ্গল কনখৎনবা মথং চহী ৪দা লুপা কোতি লাখ ১ খরচ তৌগনি। মালেমগী ওইনা একাদেমিক নেতৱার্ক অমা থবক হৌরে। মসিগী মখাদা মালেমগী ওইনা খ্বাইদগী ফবা ওজাশিং ভারতকী মহৈ লোয়শঙশিংদা কৌগনি। মহৈ লোয়শঙশিংগী মচাক-মথুমশিং শেমগৎনবা লুপা কোতি লিশিং অমা থাদদুনা হয়ার এজুকেসন ফাইনান্সিং এজেন্সী অমা শেম্লে। মসিনা অচৌবা মহৈ লোয়শঙশিংদা অফবা ইনফ্রাস্ত্রকচরশিং শেমগৎনবা শেল য়াম্না থাদবা য়ারগনি। অঙাংশিং চহী নৌরিঙৈদগী হৌনা অনৌবা ৱাখল খনবা তম্বীনবা লৈবাক অসিগী মহৈ লোয়শঙ ২৪০০ খনগৎলে। মহৈ লোয়শঙশিং অসিদা ক্লাস ৬তগী ক্লাস ১২ ফাওবগী মহৈরোয়শিংদা মীৎয়েং থমদুনা অতল তিনকরিং লেবসশিং লিংখৎলে। মতমগা চুনরবা তেক্নোলোজীশিং য়াওরবা লেবশিং অসি অঙাংশিংদা ফংহনগনি।

মরূপশিং,

অদোমগী মহৈ লোয়শঙ অসি অনৌবা মওংদা মহৈ তম্বগী অহিংবা খুদমনি। অনৌবা থবকশিং য়োকখৎনবা নৌনা হৌদোক্লিবা স্কিম অসিনা বিশ্ব ভারতীগী মহৈরোয় ১১০০০দা হেন্না কান্নবা পীগনি হায়না ঐনা থাজৈ। অদোম মহৈ লোয়শঙ অসিদগী পাস তৌরবনি। গুরুদেবগী বরগা লোয়ননা অদোমগী মীৎয়েং অমা লৈরবনি। বিশ্ব ভারতীগী মশক অদু অদোমদা য়াওরবনি।

মসিগী চাউথোকচবা অসি অৱাংবা থাক্ত পুখৎনবা অদোম্না হোৎননবা ঐনা তকশিল্লি। অনৌবা ৱাখল্লোনশিং অদুগী খুৎথাংদা মহৈরোয়শিংনা মীওই ৫০০-১০০০গী পুন্সিদা অহোংবা পুরকপগী পাউ তাবদা মীয়াম্না বিশ্ব ভারতী অসি থাগৎনগনি।

গুরুদেবনা হায়খিবা অমা নীংশিংলি, কনাগুম্বা অমনা অদোমগা চৎমীন্নবা পাম্লবদি, অদোমগী পান্দম অদু য়ৌদ্রিফাওবা চৎমিন্নৌ। অদোম্না খোঙথাং অমা থাংবা মতমদা সরকারনা অদোমগা লোয়ননা খোংথাং মরি থাংনবা শেম শারি হায়নবা ঐ ঙসি মফম অসিদা লাকপনি। মীয়াম্না শরুক য়ারবা মতমদা ঐখোয়গী লৈবাক অসি গুরুদেবনা পামজরম্বা ২১শুবা চহিচাগী লৈবাক অদুদা চংশিনবা ঙমগনি।

মরূপশিং,

মহাক্না শিদ্রিঙৈদা গুরুদেবনা গান্ধীজীদা হায়রমখি, মহাক্কী পুন্সিগী মমল খ্বাইদগী য়াম্বা পোৎলমশিং য়াওরিবা জহাজ অদু বিশ্ব ভারতী অসিনি। ভারতকী মীয়াম্না মমল য়াম্লবা লন অসি শীজিন্নগনি হায়না মহাক্না থাজৈ। মরম অদুনা লন অসি ঙাকশেন্দুনা থম্বা খক নত্তনা মসি য়োকখৎপা হায়বসি ঐখোয় খুদিংমক্কী থৌদাংনি। অনৌবা ভারত অমগী মঙলান অদুগা লোয়ননা বিশ্ব ভারতী য়ুনিভর্সিতীনা অনৌবা লম্বীশিং উৎপা ঙমগদরা? মসিগা লোয়ননা ঐগী ৱারোল লোইশিঞ্জরে। ময়াম্বু থাগৎচরি।

অদোমগী ইমা-নপাগী মঙলান, মহৈ লোয়শঙ অসিগী মঙলান অমসুং লৈবাক্কী মঙলানগা লোয়ননা অদোমগী মঙলান অসি মঙফাওনবা ঙম্বা ওইরসনু। অদোম পুম্নমক্তা বর পীজরি। ঙমখৈ লৈতনা থাগৎচরি।