ভারতকী প্রধানমন্ত্রী

তাইম্স গ্রুপকী শ্রী সমীর জৈন জী, শ্রী বিনীৎ জৈন জী, গ্লোবেল বিজিনেস সম্মিৎ অসিদা শরুক য়াবিরিবা মীথুং পুম্নমক, ইন্দস্ত্রীগী খোঙবুশিং, সি.ই.ও.শিং, একাদমিক্সিয়নশিং, মিদিয়াগী মীওইশিং, অতৈ মীথুংশিং, ইবেম্মা অমদি ইবুংঙোশিং,

ঐগী ৱাফম ফোঙদোকচদ্রিঙৈগী মাঙওইননা, ঐনা সিব ভক্তি অমদি লক্ষ্মী লাৎপগী মরমদা করিগুম্বা ৱাফম খরা থমজগে‍। অদোম্না ইনকম তেক্স হেনগৎহন্নবা ৱাফম থম্লকখি, মখোয়শিং অসি তুংদা করি থোক্লগনি হায়বা খঙদে, অদুবু অদোম্না খঙহন্ননিংবা ৱাফমদি হন্দক্কী বজেত্তা য়াম্না মরুওইবা ফিরেপ অমা লৌরি অমদি মরুওইনা নুপীশিংনা করিগুম্বা বেঙ্ক দিপোজীৎ তৌরবদি, অমদি চহি অনি মপুং ফানা তৌরবদি, মখোয়দা অখন্নবা মওংগী শোয়দবা শেন্দোয় ফংহনগনি অমদি অদোম্না হায়রিবদুগী মতুং ইন্না খোঙথাঙ অসি অদোম্না শোয়দনা পামগনি হায়না খল্লি‍। হায়রিবা ময়াম অসি খঙলবা মতুংদা করিগুম্বা অদোম্না মরম চায় হায়না খল্লবদি মফম অমা পীবিবা হায়বসি হৌজিক্তি অদোমগী ইদিতোরিএল দিপার্তমেন্তকী থবক ওইণে‍। ঐনা মালেমগী মফম পুম্বদগী লেঙবিরক্লিবা লল্লোন ইতিক্কী লুচিংবশিংগী মফমদা নুংঙাইবা ফোঙদোকচরি অমদি তরাম্না ওকচরি‍।

মমাঙদা, ঐহাক মার্চ ৬, ২০২০দা ই.তি. গ্লোবেল বিজিনেস সম্মিৎ শরুক য়ানবগী তাঞ্জা ফংজখি‍। মতৌ অসুম্না, চহি অহুমগী মতম হায়বসি হৌখিবা খঙহৌদে, অদুবু ঐখোয়না হায়রিবা চহি অহুমগী মতম অসি হঙ্গৎনা য়েংলুরবদি মালেম পুম্বসি শাংলবা খোঙচৎ অমদা লাকখ্রবগুম উগনি‍। ঐখোয়না মমাঙদা উনখিবদা, মাস্ক হায়বসি নুংতিগী পুন্সিগী শরুক অমা ওইখিদে‍। ভেক্সিন হায়বসি অঙাংশিংদা মথৌ তাবনি নৎত্রগা অরুবা লাইওংনা নারবা মীওইশিংনা মথৌ তাবনি হায়না মীয়াম্না খন্নরম্মি‍। মীওই কয়া অমসু কালেন সুতি মতমদা কোয়বা চৎননবা থৌরাং তৌনরম্মী‍। মীওই কয়া অমনা হোতেলশিং বুক তৌনরম্মী‍। অদুবু ২০২০গী ই.তি. সম্মিৎ অদুগী নুমিৎ ৫নিখক্কী মতুংদা, দব্লিউ.ঐচ.ও.না কোবিদপু লাইচৎনি হায়না লাউথোরকখি‍। অদুগা তেল্লবা মতমদুদা মালেম পুম্বদা চাউনা অহোংবা লাকপা ঐখোয়না উখি‍। মালেম পুম্বা হৌখিবা চহি অহুমসিদা পুমহোং হোংখ্রে‍। মালেমগী থৌওংশিং হোংখ্রে অমদি ভারতসু হোংলে‍। হৌখিবা মতম খরসিদা, ‘এন্তি ফ্রেজাইল’ হায়বা নুংঙাইরবা ৱাখল্লোন অসিদা ঐখোয়না খন্ন-নৈনবা কয়া তানরে‍। অদোম বিজিনেসকী তাইবংগী মালেমগী লুচিংবশিংনি‍। অদোম্না ‘এন্তি-ফ্রেজাইল’গী ৱাহন্থোক অমদি ৱাখল্লোন মমুৎ তানা খঙবিরবনি‍। মসি খুদোংথিবা কয়া লাকপদা মায়োক্নবতা নত্তনা হায়রিবা ফীভমশিং অদু থেংন-থেংনরগা হেন্না মপাঙ্গল কনখৎলকপা, হেন্না ফীভম ফগৎলকপা থৌওং অমগী ৱাখল্লোন্নি‍।

ঐনা ‘এন্তি-ফ্রেজাইল’গী ৱাখল্লোনগী মতাঙদা অহানবা তাবা মতমদা, ঐগী পুক্নিংদা অহানবা লাকখিবা ৱাখলদি ভারত মচা করোর ১৪০গী অপুনবগী ওইবা ফিরেপ অসিনি‍। হৌখিবা চহি অহুমসিদা, মালেম অসিনা কোরোনাগী শিংনবশিং, করিগুম্বা মতমদা লানগী, করিগুম্বদনা মহৌশাগী ওইবা অমাঙ অতাগী শিংনবশিং মায়োক্নদুনা চৎলিঙৈ মতমদুদা, ভারত অমদি ভারতকী মীয়াম্না হান্না খন্নরুদবা মওংগী পাঙ্গল থৌনা উৎখি‍। ভারতনা মালেমগী মফমদা এন্তি-ফ্রেজাইল ওইবা হায়বসি কমদৌবগে হায়বা উৎখ্রে‍। অদোমসু খনবিয়ু, মতম অমদা ফ্রেজাইল ফাবকী ৱাফম ফোঙদোক্নরম্বদগী হৌজিক্তি ভারতপু এন্তি-ফ্রেজাইল ওইনা শকখঙনরে‍। ভারতনা মালেমগী মফমদা লাংফমবু খুদোংচাবদা কমদৌনা ওন্থোক্কনি হায়বা উৎলে‍।

চহি ১০০গী মনুংদা অমুরক লাকপা ললংফমগী মতমদা ভারতনা উৎখিবা মতিং অসি নৈনদুনা চহি ১০০গী মতুংদা মীওইবা খুন্নাইনা মশা মতোমতা চাউথোকচবা ফাওগনি‍। ঙসি হায়রিবা মতিং অসিদা থাজবা থমদুনা, ভারতনা ২১শুবা চহিচাগী অহুমসুবা দিকেদকী য়ুম্ফম থোল্লদুনা ইং ২০২৩দা খোঙ থাংজিল্লি‍। ভারতকী হায়রিবা মতিং অসিগী খোন্থাঙ ঙসিগী ই.তি. গ্লোবেল সম্মিৎ অসিদসু তারি‍।

মরূপশিং,

অদোম্না চহি অসিগী ই.তি. গ্লোবেল সম্মিৎকী থীম ‘রিইমাজি ন বিজিনেস, রিইমেজিন দি ৱর্ল্দ’ হায়না থম্লি‍। রিইমাজিন হায়রিবা থীম অসি অতোপ্পশিংখক্তগীরা নৎত্রগা ৱাখল্লোন ফোঙদোকপা মীওইশিংগীসু য়াওদবরা মখোয়দা চৎনরোইদবরা হায়বা ঐ খঙদে‍। ঐখোয়গীসিদদি ওপিনিয়ন মেকরশিংদি থা তরুক খুদিংগী পোৎলম অমখক্তবু রি-লোঞ্চ তৌবদা মথৌ চিল্লি‍। অদুগা হায়রিবা রি-লোঞ্চ অসিদা মখোয়না রি-ইমাজিনেসনসু তৌবা নত্তে‍। ফরে, নীংথিনা খঙ-হৈরবা মীওই কয়া মফমসিদা লেঙশিনবিরি, অমবু ওইরবসু অমবু ওইরবসু মসি ঙসিগী মতমসিগা য়াম্না মরী লৈনবা থীম অমদি ওইরি‍। মরমদি, লৈবাকসিনা ঐঙোন্দা থৌগল তৌনবগী তাঞ্জা অমা পীরকপদা, ঐনা অহানবা ওইনা তৌখিবা থবক অমুক হন্না খন্দুনা য়েংবিয়ু‍। ২০১৪দা করি ফীভম লৈরম্বগে হায়ববু লুপা করোর লাখ কয়াগী স্কাম্না মরম ওইরগা লৈবাক্কী মীংচৎ থীরম্মি‍। শেঞ্জা থুমজানা মরম ওইরগা, লায়রবশিংনা মখোয়না ফংফম থোকপা পোৎলমশিং ফংদনা লৈরম্মী‍। নহাশিংগী অনিংবা অপাম্বশিং ইমুং মনুংগী, মরী-মতাগী য়েংবদা কত্থোক্লম্মী‍। খুজিল থৌরাংদা শোয়বনা মরম ওইরগা ইনফ্রাস্ত্রকচর প্রোজেক্তশিং চহি কয়া চোন্থরম্মী‍। অসিগুম্বা ৱাখল্লোন অমদি থৌওংনা মরম ওইরগা লৈবাক অসিনা খোঙজেল য়াঙনা খুমাঙ চাওশিনবদা খুদোংচাদবা মায়োক্নরম্মী‍। মরম অদুননি ঐখোয়না লৈঙাক্লোনগী লংলা খুদিংমক রিইমাজিন, রি-ইনভেন্ত তৌনবা ফিরেপ লৌখিবা‍। লায়রবশিং মপাঙ্গল কনখৎহন্নবগীদমক য়াইফ-থৌরাংশিং ফংহন্নবগীদমক লৈঙাক্না করম্বা অহোংবা পুরক্কদগে হায়বসিদা ঐখোয়না রি-ইমাজিন তৌরম্মী‍। কমদৌনা লৈঙাক্না হেন্না ফবা মওংদা ইনফ্রাস্ত্রকচর শেমগৎকদগে হায়বা ঐখোয়না রি-ইমাজিন তৌরম্মী‍। লৈবাকসিগী মীয়ামগা লৈঙাক্কা করম্বা মখলগী মরী লৈগদগে হায়বা ঐখোয়না রি-ইমাজিন তৌরম্মী‍। ৱেলফ্যার দেলিভরীগা মরী লৈনবা লমদা রি-ইমাজিনেসন তৌবগী মতাঙদা খরা মচা খায়না ঐ থমজগে‍।

লায়রবশিংগী বেঙ্ক একাউন্ত লৈগদবনি, বেঙ্কতগী লোন ফংহনগদবনি, মখোয়গী য়ুম অমদি লন-থুমগী মঙম ফংহনগদবনি, মখোয়দা তোইলেৎ, মৈ অমদি অরুবা চাকথোং গ্যাস নৎত্রগা অয়াঙবা ইন্তরনেৎ কন্নেক্তিবিতী ফংহনগদবনি হায়বনচিংবা ৱাফমশিং হান্নদি মরুওইবনি হায়না খন্নরমদে‍। হায়রিবা ৱাখল্লোন অসি হোংদোকপা, রিইমাজিন তৌবা য়াম্বা মরু ওইরম্মী‍। মীওই খরনা লায়রবা কোকহনবগী মতাঙদা ৱাফম কয়া ফোঙদোক্নরম্মী, অদুবু অশেংবা ৱাফমদি মমাঙদা লায়রবশিং অসি লৈবাকসিগী পোৎলুম ওইনা খন্নরম্মী‍। মরম অসিনা মখোয়বু মশা মতোমতা ইন্থোক্তুনা থম্বিরম্মী‍। অদুগা অমরোমদনা ঐখোয়না থম্লিবা মীৎয়েঙদি লায়রবশিংগী মপাঙ্গল হাপ্পিদুনা মখোয়সু লৈবাকসিগী চাওখৎ খোঙথাঙদা মখোয়গী চপ চাবা মতিং ফুদোক্তুনা থৌদাং য়ারকপা ঙমহনবনি‍। দাইরেক্ত বেনিফিৎ ত্রান্সফরগী খুদম অদোম্না মীৎমক্না নীংথিনা উবিরম্লগনি‍। ঐখোয়গী লৈঙাক্কী স্কীমশিংদা শেঞ্জা থুমজা, শেল খপ্পা, দলালী চাবা অসিনচিংবশিং লৈরম্মী অমদি খুন্নাই অসিনসু মসিবু মহৌশা অমগুম য়ানরম্মী‍।  লৈঙাক্কী বজেৎ, লৈঙাক্কী চাদিংদি হেনগৎলম্মী, অদুবু লায়রবসু মশিং অদুমক হেনগৎলম্মী‍। চহি ৪০রোমগী মমাঙদা, মতমদুগা প্রধান মন্ত্রী রাজীব গান্ধীনা মীয়ামগী য়াইফনবগীদমক দিল্লীদগী লুপা ১ থাদখিবা মতমদা বিনিফিসরী য়ৌবা মতমদা পৈসা ১৫খক য়ৌই হায়রম্মী‍। কনাগী খুত্তা তাখিবনো হায়বদি ঐ খঙদে‍। ঐখোয়গী লৈঙাক্না তোঙান তোঙানবা স্কীমশিংগী মখাদা দি.বি.তি.গী খুত্থাঙদা লুপা করোর লাখ ২৮ হেন্না ত্রান্সফর তৌখ্রে‍। অদোমসু খনবিয়ু, করিগুম্বা রাজীব গান্ধীনা হায়রম্বা ৱাফমদু য়েংলগা হায়রিবদুমক ঙসিসু তৌরম্লবদি, লুপা করোর লাখ ২৪গী চাদা৮৫দি কনাগুম্বা মীওই খরগী ফুরিৎখাউদা চঙখিদুনা শগুন তৌখিগদৌরিবনি, মাঙখিগদৌরিবনি‍। অদুগা শুপ্নতগী লুপা করোর লাখ ৪খক লায়রবশিংদা য়ৌগদৌরিবনি‍। অদুবু ঐনা রিইমাজিন তৌদুনা, দি.বি.তি. সিস্তেম শেমগৎপদগী ঙসি দিল্লীদগী লুপা ১ থাদখিবা মতমদা চাদা ১০০ মখোয়গী মফমদা ফংলে‍। মসিনি রিইমাজিন হায়রিবসি‍।

মরূপশিং,

মতম অমদা নেহরুনা ভারতকী য়ুমথোঙ খুদিংদা তোইলেৎকী খুদোংচাবা লৈরবা মতমদা ভারত চাওখৎপগী পন্দোল অমা লোম্লে হায়বা খঙবা ঙমগনি হায়বিরম্মী‍। ঐনা হায়রিবা অসি পন্দিৎ নেহরুগী ৱাফম্নি‍। চহি কয়াগী মমাঙদা হায়বিরম্বা ৱাফম্নো হায়বা অদোম লাম্বা ফংবিরমগনি‍। মসিনা তাকপদি নেহরুনা লৈরিবা প্রোব্লেম অসি খঙলম্মী অদুবু মদুগী পাম্বৈ অমা পুথোকপদি ঙম্লমদে মরম অসিনা লৈবাক্কী চাউরবা শরুক অমদি মতম শাংনা তঙাই ফদনা চঙদ্রবা য়াদ্রবা ফীভমশিং ফংবা ঙমদনা লৈরম্মী‍। ২০১৪দা ঐঙোন্দা লৈবাক্কী থৌগল তৌনবগী তাঞ্জা পীরকপা মতমদা লৈবাকসিগী খুঙ্গংগী মফমশিংদা সেনিতেসন কভরেজ চাদা ৪০দগী তানা লৈরম্মী‍। তেনখ্রবা মতমসিদা ঐখোয়না তোইলেৎ করোর ১০ হেন্না শাখ্রে, স্বচ্ছ ভারত অভিয়ান হৌদোকখি‍। ঙসিদি লৈবাকসিগী খুঙ্গংগী লমদা সেনিতেসন কভরেজ চাদা ১০০ য়ৌরে‍।

ঐ অদোমগী মফমদা এস্পিরেস্নেল দিস্ত্রিক্তকী মতাঙদসু খুদম অমা পীজগে‍। অদোম্না রিইমাজিন হায়রিবা হীরম অসি থম্বিরবনিনা ঐসু মসিগী মনুংদা থমজগে‍। ২০১৪দা লৈবাকসিদা য়াম্না শোত্থবনি হায়না লৌনরম্বা দিস্ত্রিক্ত ১০০ হেন্না লৈরম্মী‍। হায়রিবা দিস্ত্রিক্তশিং অসি লায়রবা, শোত্থহৌরবা, লম্বী নীংথিনা লৈতবা, অফবা ঈশিং ফংদবা, মহৈ তম্ফমশঙ লৈতবা, মৈ ফংদবা, লায়েংশঙ লৈতবা, মহৈ মশিং হৈতবা, থবক শুফম নোম্ফম লৈতবা ওইনা শকখঙনরম্মী‍। হয়রিবা মফমশিং অসিদা লৈবাকসিগী ত্রাইবেল ইচিল ইনাওশিংনা অয়াম্বা খুন্দারি‍। ঐখোয়না বেকৱার্দ হায়রিবা ৱাখল্লোন অসি রিইমাজিন তৌদুনা দিস্ত্রিক্তশিং অসিবু এস্পিরেস্নেল দিস্ত্রিক্ত হায়না ওন্থোকখি‍। হান্নদি হায়রিবা দিস্ত্রক্তশিং অসিদা ওফিসরশিংবু পনিসমেন্ত পোস্তিং ওইনা থানরম্মী‍। ঙসিদি হায়রিবা মফমশিং অসিদা খ্বায়দগী ফবা নহা ওইরিবা ওফিসরশিং থারি‍।

ঙসি কেন্দ্র লৈঙাক, পি.এস.য়ু., স্তেত লৈঙাকশিং, দিস্ত্রিক্ত এদমিনিস্ত্রেসন পুম্নমক খুৎশম্নদুনা হায়রিবা দিস্ত্রিক্তশিং অসিগী ফীভম হোংলক্নবগীদমক মপুং ফানা হোৎনমিন্নরি‍। মসিগী মরম ওইরগা হেন্না ফবা মহৈ ফংবা হৌরক্লি অমদি ফীভমশিং রিএল তাইম মোনিতরিং তৌদুনা তেক্নোলোজীসু মপুং ফানা শীজিন্নরি‍। হৌজিক য়ু.পি.গী এস্পিরেস্নেল দিস্ত্রিক্ত ফতেহপুরদা ইন্সতিত্যুস্নেল দেলিভরীগী চাং চাদা ৪৭ ওইরম্বদগী চাদা ৯১ য়ৌরে অমদি মসিনা মরম ওইরগা মমা নৎত্রগা অঙাং শিবগী চাং নীংথিনা হন্থরে‍। মধ্য প্রদেশকী এস্পিরেস্নেল দি্সত্রিক্ত বরৱানীদা মপুং ফানা ইম্ম্যুনাইজ তৌরবা অঙাংশিংগী মশিং চাদা ৪০ ওইরম্বদগী হৌজিক্তা চাদা ৯০ য়ৌরে‍। মহারাস্ত্রগী এস্পিরেস্নেল দিস্ত্রিক্ত ৱাসিমদা তি.বি. লায়েংবগী মায় পাকপগী চাং চাদা ৪০ ওইরম্বদগী হৌজিক্তা চাদা ৯০ য়ৌরে‍। কর্নাতকাগী এস্পিরেস্নেল দিস্ত্রিক্ত য়াদগীরদা ব্রোদবেন্দ কন্নেক্তিবিতী লৈবা গ্রাম পঞ্চায়ত মশিং চাদা ২০খক ওইরম্বদগী চাদা ৮০ য়ৌরে‍। অসিগুম্বা পেরামিতর কয়াদা হান্না বেকৱার্দনি হায়নরম্বা এস্পিরেস্নেল দিস্ত্রিক্তশিং অসিদা লৈরিবা কভরেজ লৈবাক্কী চাংচত্তা লৈরিবা ফীভমদগী কা হেন্না ফগৎপা উরি‍। মসিনি রিইমাজিনেসন হায়রিবসি‍।

ঐনা অদোমগী মফমদা অরুবা ৱাতর সপ্লাইগী খুদমসু পীজগে‍। নীংতম্বগী দিকেদ ৭কী মতুংদা ভারত্তা খুঙ্গংগী য়ুমথোঙ মিলিয়ন ৩০খক হায়বদি করোর ৩খক তোতি ঈশিং ফংহলম্মী‍। খুঙ্গংগী য়ুমথোঙ মিলিয়ন ১৬০, হায়বদি করোর ১৬ খুদোংচাবা ফংদনা লৈরম্মী‍। ঐখোয়না ৱাজাও ঙাঙবগী মহুত্তা, য়ুমথোঙ মিলিয়ন ৮০দা হায়বদি করোর ৮দা তোতিগী ঈশিং শুপ্নতগী চহি ৩ মখায়দা ফংহনখি, মসিনি রিইমাজিনেসনগী মতিক‍।

মরূপশিং,

সম্মিৎ অসিদা শরুক য়াবিরিবা এক্সপোর্তরশিংসু ভারতনা খোঙলৈ থুনা খুমাঙ চাওশিন্নবগীদমক অফবা ইনফ্রাস্ত্রকচর মথৌ তাই হায়বা ৱাফমসি য়ানিংগনি‍। অদুবু লৈবাকসিদা হান্না করম্বা ফীভমদা লৈরম্বগে? অদুগা হৌজিক লৈরিবা ফীভমসিনা কমদৌনা লাক্লিবনো? ই.তি.দা ফাওবা অচৌ অচৌবা এদিতোরিএলশিং হীরম অসিগী মতাঙদা ফোঙখি, মীয়াম্না মখোয়গী ৱাখল্লোন ফোঙদোক্নখি‍। মখোয়গী মরক্তা মরুওইবা ৱাফমদি ঐখোয়গী অসিদা ইনফ্রাস্ত্রকচরগা মরী লৈনবা ফিরেপশিংদা লৈবাক্কী মথৌ তাবশিং হন্থনা য়েংলম্মী অমদি রাজনিতীগী মরুওইবদা অহেনবা মীৎয়েঙ থম্মী হায়বসিনি‍। মসিদগী ওইরকপা ফীভমদুগী মহৈ লৈবাক পুম্বনা ফুক্কৎলি‍। করিগুম্বা মফম অমদা লম্বী শেম্বা মতমদা লম্বী শেম্লবা মতুংদা ভোৎ ফংগদ্রা হান্না য়েংলম্মী‍। ত্রেন কদায়ৱাইদা খামগনি, কদায়দা ফাওরগা চৎকনি হায়বসিসু রানজিতিগী অমাঙ অতোং য়েংলগা লেপ্লম্মী‍। হায়বদি, ইনফ্রাস্ত্রকচরগী মপাঙ্গল হান্না মুন্না খঙলমদে হায়বনি‍। অদোম্না তাবদা ঙক্কদবা অমনা, ই.তি.না ইখিদ্রিবসু য়াই, লাইবক থিবদি, ঐখোয়গীসিদা দাম শারম্মী, অদুবু খোংলমগী নেৎৱর্ক শেমগৎলমদে‍। অদোমসু খনবিয়ু মথোল তরুক্কী য়ুম শারগা লিফ্ত লৈত্রবা, সিরি লৈত্রবদি করি ওইগনি‍। দাম শারগা খোঙলম লৈত্রবদি, মতমদুদা ই.তি.না য়েংশিনবা মথৌ তাদে খল্লমদবসু য়াই‍।

ঐখোয়গীসিদা মাইনশিং লৈরম্মী, অদুবু মিনরেল ত্রান্সপোর্ত তৌনবা কন্নেক্তিবিতী লৈরমদে‍। ঐখোয়গীসিদা হিথাংফমশিং লৈরম্মী, অদুবু রেলৱে নৎত্রগা লম্বীগী কন্নেক্তিবিতীগী প্রোব্লেম্না থন্না লৈরম্মী‍। ঐখোয়গীসিদা পৱার প্লান্তশিং লৈরম্মী, অদুবু ত্রান্সমিসন লাইন মতিক চানা লৈরমদে, লৈরম্লিবা খরদুসু ফীভম ফত্তনা লৈরম্মী‍।

মরূপশিং,

ঐখোয়না ইনফ্রাস্ত্রকচরপু পল খাগত্তুনা য়েংবগী থৌওং তোক্লগা ইনফ্রাস্ত্রকচর শেমগৎপগী অচৌবা স্ত্রেতেজী অমগী মওংদা রিইমাজিন তৌখি‍। ঙসিদি ভারত্তা নোংমদা কিলোমিতর ৩৮গী চাংদা হায়ৱেশিং শেমগৎলি অমদি নুমিৎ খুদিংগী কিলোমিতর ৫ হেন্না রেল লম্বী শেম্লি‍। ঐখোয়গী হিথাংফমগী কেপাসিতী লাক্কদৌরিবা চহি ২সিদা এম.তি.পি.এ. ৩০০০ ফাওবা য়ৌরগনি‍। ২০১৪গা য়েংনবদা মথৌ তৌরিবা এয়রপোর্তকী মশিং ৭৪দগী ১৪৭তা হেনগৎলে‍। হৌখিবা চহি ৯সিদা চাউরাক্না কিলোমিতর লাখ ৩ মখায়রোমগী খুঙ্গংগী লম্বীশিং শেম্লে‍। চাউরাক্না কিলোমিতর লিশিং ৮০রোমগী নেস্নেল হাৱয়েশিং শেম্লে, হায়রিবা পুম্নমক অসি চহি ৯দা ওইখিবশিং অদুনি ফোঙদোক্লিবা অসি‍। পুম্নমক অসি নীংশিংবা মথৌ তাই, মরমদি মসিবু ব্লেকআউৎ তৌগদবা মীওই কয়া মফমসিদা লেঙশিন্দুনা লৈরি‍। হৌখিবা চহি ৯সিদা লায়রবা ইমুং করোর ৩গী পক্কাগী য়ুম শাখ্রে অমদি হায়রিবা ইমুং করোর অহুম অসি কয়ামুক য়াম্না য়াম্বগে হায়ববু মালেমগী লৈবাক কয়া অমগী অপুনবা মীশিংদগী হেল্লবনি‍।

মরূপশিং,

ভারত্তা অহানবা মেত্রো কোলকতাদা ১৯৮৪দা হৌদোকখিবনি‍। মসিনা তাকপদি মতমদুদা ঐখোয়দা তেক্নোলোজী অদু লৈরে, এক্সপর্তিজ লৈরে হায়বনি, অদুবু করি ওইখি? লৈবাকসিগী ময়োল্লম অয়াম্বদা মেত্রো ফংহনবা ঙমদনা লাকখি‍। ২০১৪ ফাওবদা, হায়বদি অদোম্না ঐবু থৌগল তৌনবগী তাঞ্জা পীদ্রিঙৈগী মমাঙদা ২০১৪ ফাওবদা থা অমদা কিলোমিতর তঙ্খায়খক্তগী চাংদা মেত্রো লাইন শেমগৎলম্মী‍। ২০১৪গী মতুংদা মেত্রো নেৎৱর্ক শেমগৎপগী চাং হেনগৎলক্তুনা থাদা চাউরাক্না কিলোমিতর ৬কী চাংদা শেমগৎলক্লি‍। হৌজিক ভারত্তা মেত্রো লম্বীগী অশাংবা য়েংনবদা মালেমগী ৫শুবা মফমদা লৈরে‍। লাক্কদৌরিবা থা খরসিদা ঐখোয় মালেমগী অহুমশুবা থাক্তা লৈরগনি‍।

মরূপশিং,

ঙসি পি.এম. গতিশক্তি নেস্নেল মাস্তর প্লান্না ইনফ্রাস্ত্রকচর শেমগৎনবগী খোঙজেল হাপ্লি, অমদি বিনীত জিনা হায়খিবগুম ঐখোয়গী খোঙজেল অমদি মতিক অনিবু পুনশিল্লে‍। হায়বদি, হায়রিবা ৱাখল্লোন অসিনা খোঙজেল হাপ্লি অমদি মদুগী মহৈ রেল লম্বীখক্তদা লোইবা নত্তে, ঐখোয়গী গতিশক্তিগী মরমদা খনবা মতমদা মসি এরিয়া দিভেলপমেন্তকী লমদসু ৱাখল্লোন অসি লৈরি অমদি মফমসিগী মীয়ামগী দিভেলপমেন্তনচিংবা মচিল অহুম লোংবা ফীভম ঐখোয়না পুরক্লি‍। গতিশক্তি প্লেৎফোর্ম ময়াম মরক্তগী তেক্নোলোজীদা পুক্নিং লুপ্পা মীওইশিংগীদমক্তদি খঙজিনবদা নুংঙাইগদবা ৱাফম অমা ওইবসু য়াই‍। ঙসি লৈরিবা ঐখোয়গী গতিশক্তিগী প্লেৎফোর্ম অসিদা ইনফ্রাস্ত্রকচর মেপ্পিংগী দেতা লেয়র ১৬০০লোম য়াওরি‍। প্রপোজেল খুদিংমক আর্তিফিসিএল ইন্তলিজেন্সকী মতেঙগা লোয়ননা লেয়র ১৬০০ অসি ফাওদুনা চৎলবা মতুংদা ফিরেপ লৌগদৌরিবনি‍। ঐখোয়গী এক্সপ্রেসৱেবু ওইরবসু নৎত্রগা অতৈ ইনফ্রাস্ত্রকচরবু ওইরবসু, ঙসিদি খ্বায়দগী তেনবা অমদি খ্বায়দগী ইফিসিএন্ত ওইবা লম্বী লেপথোকপদা এ.আই.গী মতেঙ লৌরি‍। পি.এম. গতিশক্তিনা মফম অমদি মীয়ামগী দিভেলপমেন্ত কমদৌনা পুরকপগে হায়বগী খুদম অমা ঐ ময়ামগী মফমদা থমজগে‍। মফম অমা হেক্তগী মী কুংবা লনবা অমদি মহৈশঙ লৈবগী মতাঙদা, পেরামিতর ১৬০০গী খুত্থাঙদা মেপ তৌবা ঙম্মী‍। অদুগা দিমান্দ অমদি রাজনিতীগী য়েংলগা মহৈশঙ শেমগৎপগী মহুত্তা ঐখোয়না মথৌ তাবা মফমশিংদা মহৈশঙশিং শেমগৎপা ঙম্লে‍। মসিনা তাকপদি, হায়রিবা গতিশক্তি প্লেৎফোর্ম  অসিনা মোবাইল তৱার কদায়দা য়ুংলগা হেন্না কান্নগদগে হায়বসু লেপথোকপা য়ারে‍। মসি তোপ তোপ্পা ফীভম অমা ওইরবনি‍।

মরূপশিং,

ঐখোয়না ইনফ্রাস্ত্রকচরবু কমদৌনা রিইমাজিন তৌবগে হায়বগী অতোপ্পা খুদম অমা হায়রগদি ঐখোয়গী এভিএসন সেক্তর অসিনি‍। ঐখোয়গীসিদা চহি কয়া চুপ্না চাউরবা এয়র স্পেস দিফেন্সকীদমক থিংদুনা লৈরম্মী হায়বা মফমসিদা তিনবিরিবা মীওই খরখক্তগী হেন্না খঙলমদবসু য়াই‍। মসিনা মরম ওইরগা এরোপ্লেনশিং ভারত্তা চত্থোক চৎশিন তৌবদা মতম য়াম্না চঙলম্মী, মরমদি করিগুম্বা মফম অমা দিফেন্স এয়র স্পেসকী মনুংদা তারবদি মদুদা মখোয় চঙলুবা য়াদে, মফমদু কোইরগা চৎপা তাই‍। হায়রিবা ৱাফম অসিগী পাম্বৈ অমা পুথোক্নবগীদমক ঐখোয়না আর্ম্দ ফোর্সকা ৱারী শান্নখি‍। ঙসি নোংথক্কী লম্বী ১২৮ মীচম মীয়াম্না চত্থোক চৎশিন তৌবা য়াহল্লে‍। মসিনা মরম ওইরগা ফ্লাইত পাথ তেনশিল্লে, অমদি মদুনা মতমসু মাঙদ্রে অমদি থাউসুং তিংহন্দ্রে, নাকল অনিমক্তা মতেং ওইনরে‍। অদুগা ঐ ময়ামদা মশিং অমগসু পীগে‍। ফীরেপ অমসিনা চাউরাক্না সি.ও.২ ইমিসন তন লাখ ১গী ময়াদা হন্থহল্লে‍। মসিনি রিইমাজিনেসনগী মতিক‍।

মরূপশিং,

ঙসি ভারতকী ফীজিকেল অমদি সোসিএল ইনফ্রাস্ত্রকচরবু চাওখৎপগী অনৌবা মোদেল অমা ওইনা মালেম পুম্বগী মমাঙদা থম্লি‍। মসিগী অপুনবা খুদম হায়রগদি ঐখোয়গী দিজিতেল ইনফ্রাস্ত্রকচর অসিনি‍। হৌখিবা চহি ৯সিদা ঐখোয়না লৈবাকসিদা কিলোমিতর লাখ ৬ হেনবগী ওপ্তিকেল ফাইবর তিংলে‍। হৌখিবা চহি ৯সিদা লৈবাকসিদা মোবাইল মেন্যুফেকচরিং য়ুনিৎশিং লিংখৎলি‍। হৌখিবা চহি ৯সিদা লৈবাকসিদা ইন্তরনেৎ দেতাগী মমল শরুক ২৫ থোক্না হন্থরে‍। মালেমগী খ্বায়দগী হোঙবা মমল ওইদুনা ঐনা লাকত্রিঙঅ ২০১২কী মমাঙদা ভারত মালেমগী মোবাইল দেতা ত্রাফিক্তা শুপ্নতগী চাদা ২খক কন্ত্রিব্যুৎ তৌরম্মী‍। অদুগা ৱেস্তর্ন মার্কেৎকী কন্ত্রিব্যুসন্না চাদা ৭৫ ওইরম্মী‍। ২০২২দা ভারত্তা মালেমগী মোবাইল দেতা ত্রাফিক সেয়র ২১% ওইরে‍। অদুগা নোর্থ অমেরিকাগী শেয়রনা মরি থোকপগী অমখক ওইহৌরে‍। ঙসি মালেমগী রিএল তাইম দিজিতেল পেমেন্ত ভারত্তা চাদা ৪০ ওইরি‍। মসি ভারতকী লায়রবা মীওইশিংনা কদায়দগী দিজিতেল পেমেন্ত তৌগদৌরিবনো হায়রম্বা মীওইশিংদুদা পীবা পাউখুম অমনি‍। ঐঙোন্দা কনাগুম্বা মীওই অমনা ভিদিও অমা থারকপদা লুহোংফম অমদা ধোল থিল্লিবা মীওইদুনা মহাক্কী ধোলদা ক্যু.আর. কোদ নপ্পা উই‍। মীওই অমনা ফোন লৌথোক্তুনা ক্যু.আর. ক.দ অদুগী মতেংনা শেল থারি‍। রিইমাজিনেসনগী খোঙচৎ অসিদা ভারতকী মীয়াম্না অদুগুম্বা ৱাখল্লোন অদুবু রিজেক্ত তৌখ্রে‍। মখোয়গুম্বা মীওইশিংদুনা পার্লিয়ামেন্ততা, লায়রবশিং অসিনা কদায়দগী অদুগুম্না তৌগদৌরিবনো হায়রম্মী‍। লৈবাকসিগী মীয়াম্না লায়রবগী মতিকপু ৱাখলনা লাম্বা ফাওবা ঙমখিদে‍। ঐদি পুম্নমক্তু খঙখি‍।

মরূপশিং,

ঐখোয়গী লৈবাকসিদা মতম শাংনা পাল্লকখিবা লৈঙাকশিং নৎত্রগা লৈঙাক পায়রম্বা মীওইশিংনা মাই-বাপ কল্চর পামনা থম্লমখি‍। অদোম্না অসিগুম্বা ইমুং মনুং অমদি মরী মতাগী য়েংলগা থবক তৌবগী চৎনবী অসিদা ৱাখল লমহাংনবিগনু‍। মসি তোঙানবা ৱাখল্লোন অমনি‍। মসিদা লৈঙাক অসিনা, লৈবাকসিগী মীওইশিংগী মরক্তা মপু অমা ওইবগী লীচৎ চৎলম্বনি‍। লৈবাকসিগী মীওইশিংনা করিগুম্বা অমা হেক তৌবগা লৈঙাক্না মদুবু চিংনবগী মীৎয়েঙদা য়েংলম্মী‍। অদুগা মীয়াম্না করিগুম্বা অমা তৌবা পাম্লবসু লৈঙাক্তগী অয়াবা হান্না লৌবা মথৌ তারম্মী‍। মসিনা মরম ওইরগা, হান্নদি, লৈঙাক অমদি মীয়ামগী মরক্তা অমগা অমগা থাজনদবা অমদি চিংনবগী নুংশিৎ অমা লৈরম্মী‍। মফমসিদা লেঙশিনবিরিবা সেনিয়র জর্নেলিস্তশিংগী মফমদা ঐ ৱাফম অমখক নীংশিংজগে‍। অদোম নীংশিংবিরমগনি মতম অমদা তি.ভি. অমদি রেদিওগীদমক্তা লাইসেন্স লৌবা মথৌ তারম্মী‍। মদুদসু নত্তনা দ্রাইভিং লাইসেন্সকী মতৌগুম হন্না হন্না রিনিউ তৌবা তারম্মী‍। হায়রিবা ফীভম অসি সেক্তর অমা অনিখক্তগী ৱাফম নত্তনা সেক্তর অয়াম্বদা লৈরম্মী‍। মতমদুদা বিজিনেস তৌবা কয়া লুরম্বগে হায়বা, মীয়াম্না কমদৌনা কন্ত্রেক্ত ফংলম্বগে হায়বা অদোম মমুৎ তানা খঙলম্লগনি‍। ৯০গী মতমদা তঙায়ফদনা অরিবা অশোয়বা খরা শেমদোকখি, অমদি মদুবু রিফোর্ম হায়না মমিং থোঞ্জিল্লম্মী, অদুবু মাই-বাপকুম্বা অরিবা ৱাখল্লোনশিংদি মপুং ফানা মাঙহনবা ঙমখিদে‍। ২০১৪গী মতুংদা ঐখোয়না লৈঙাক্না মমাঙদা হায়বা ৱাখল্লোন অসিবু মীয়াম্না মমাঙদা হায়বা পরিংদা রিইমাজিন তৌরকখি‍। ঐখোয়না মীয়ামদা থাজবা থম্বগী পরিংদা থবক পায়খৎখি‍। সেল্ফ ঐতেস্তেসন নৎত্রগা অনেম্বা থাক্কী থবক লৌবদা ইন্তরভিউ লৌথোকখিববু ওইরবসু, মেরিত্তা য়ুম্ফম ওইরগা কম্প্যুতরনা ফিরেপ লৌদুনা থবক ফংহল্লি‍। ইকনমিক ওফেন্স মচা মচা দিক্রিমিনেলাইজ তৌবা, জন বিস্বাস বিল, কোলেতরেল লৈতবা মুদ্রা লোন নৎত্রগা এম.এস.এম.ই.শিংগীদমক লৈঙাক্না গরেন্তর ওইববু ওইরবসু, অসিগুম্বা প্রোগ্রাম, পোলিসী খুদিংদা মীয়ামদা থাজবা থম্বনা ঐখোয়গী লাইৱা ওইরি‍। হৌজিক্তি খাজনা খোমগৎপগী খুদমসু ঐখোয়গী মাঙদা তাদুনা লৈরে‍।

২০১৩-১৪দা লৈবাকসিগী গ্রোস তেক্স রিভিন্যু চাউরাক্না লুপা করোর লাখ ১১রোম ওইরম্মী‍। অদুগা ২০২৩-২৪দা লুপা করোর লাখ ৩৩ হেনগনি হায়না পানরি‍। হায়বদি, চহি ৯সিদা গ্রোস তেক্স রিভিন্যু শরুক ৩ হেনগৎলে হায়বনি‍। ফীভম অসি ঐখোয়না তেক্স রেৎ হন্থহল্লকপা মতমদতা ওইবা ঙম্লক্লিবনি‍। সমীর গীনা হৌদোরকপা ৱাফমদুদি হৌজিক ঐখোয়না খনগৎত্রি‍। ঐখোয়নদি হন্থহল্লে‍। মীয়ামগা হকথেংননা লোয়নরিবা ময়ামগী মফমদা ৱাফম অসি থমজনিংই‍। ঐ ৱাফম অহুমদা মীৎয়েঙ থমজগে‍। অহানবদা খাজনা থিবা মীশিং হেনগৎলে, হেনগৎলিবা অসিগী ক্রেদিৎ অদোম্না কনাদা পীগনি হায়বসিদা মসিগী ক্রেদিৎতি লৈঙাক্কা একাউন্ততা চঙগদৌরিবরা নৎত্রগা কদায়দা চঙগনি‍। হৌজিক্তি মীয়াম্না হেন্না পুকচেল শেংনা খাজনা থীরি‍। মসিগী ক্রেতিৎ লৈঙাক্তা চৎলবদি, লাক্লিবা ৱাফমদি খাজনা থীরিবা মীয়াম্না মখোয়না থীরিবা খাজনা অদু মীয়ামগী য়াইফনবা, লৈবাক্কী য়াইফনবা থবক্তা শীজিন্নরি খঙলবদি, মখোয়না পুকচেল শেংনা খাজনা থিনবা থোরকই হায়বসিনি‍। মখোয়দা হৈনিংবা ফাওহল্লি‍। মসিমক্নি ঙসি লৈবাকসিদা উরিবা‍। মখোয়না লৈঙাক্কী পুকচেল শেংবদা থাজদুনা, লৈঙাক্কী মফমদা খাজনা থীনবা মথন্তা খোরম্লিবা অসিননি ঐনা খাজনা থীরিবা মীওইশিংগী মফমদা থাগৎপা ফোঙদোকচনিংলিবা‍। অদোম্না মখোয়দা থাজবা থম্লগদি মখোয়নসু অদোমদা থাজরক্কনি হায়বসি ইচম চম্বা ৱাফম্নি‍। ঙসি ভারতকী খাজনাগী মওং মতৌদা লাক্লিবা অহোংবশিং অসি হায়রিবা মরম অসিননি‍। তেক্স রিতর্নগীদমক্তদি, ঐখোয়না থৌওং অসি থাজবা হায়বসিদা য়ুম্ফম ওইরগা লায়থোকহন্নবা হোৎনরি‍। ঐখোয়না ফেসলেস এসেসমেন্তকী থৌওং পুথোক্লি‍। ঐ অতোপ্পা ফিগর অমসু থমজগে‍। ইনকম তেক্স দিপার্তমেন্তনা চহি অসিদা রিতর্ন করোর ৬.৫ হেন্না প্রোসেস তৌখি‍। মসিগী মনুংদা, রিতর্ন করোর ৩লোমদি পুং ২৪গী মনুংদা প্রোসেস তৌখিবনি‍। অদুগা লেমহৌরিবা রিতর্নশিং অদুনা নুমিৎ খরনিগী মনুংদা তৌখি‍। অদুগা শেনফমশিংসু হন্দোকখি‍। অদুগা মমাঙদদি নুমিৎ ৯০গী চাংদা চঙলম্বনি‍। অদুনা মীয়ামগী শেনফম নুমিৎ ৯০ অরেম্বদা তাদুনা লৈরম্মী‍। ঙসিদি মসি পুং খরগী মনুংদা তৌরে‍। মসি চহি খরগী মমাঙদদি ওইথোকপা য়ারোই খন্নরম্বনি‍। অদুবু মসিসু রিইমাজিনেসনগী মতেংনা ওইথোকহল্লে‍।

মরূপশিং,

ঙসি ভারতনা নুংঙাই য়াইফবা হায়বসি মালেমগী নুংঙাই য়াইফবনি, ভারতনা খুমাঙ চাওশিনবা হায়বসি মালেমগী খুমাঙ চাওশিনবনি‍। ভারতনা জি-২০গী থম্লিবা থীম ৱন ৱর্ল্দ, ৱন ফেমিলী, ৱন ফ্যুচর অসিদা মালেমগী শিংনবা কয়াগী পাম্বৈ য়াওরিবনি‍। পুন্না হোৎনমিন্নদুনা, পুম্নমক্কী ইন্তরেস্ত ঙাকপনা মালেম অসি হেন্না ফবা মফম অমা ওইহনগদৌরিবনি‍। চৎলিবা দিকেদ অমদি লাক্কদৌরিবা চহি ২৫ অসিদা ভারতনা চাউনা থাজবা থম্লি‍। পুম্নমক্না হোৎনমিন্নদুনা ভারতনা মাগী পান্দমশিং খোঙলৈ থুনা ফংবা ঙমগনি‍। ঐনা ময়ামগী মফমদা হায়জনিংবগী ভারতকী চাওখৎ খোঙচৎ অসিদা হেক য়ারিবমখৈ য়াওশিনবিয়ু হায়বসিনি‍। অদুগা অদোম্না ভারতকী চাওখৎ খোঙচত্তা য়াওশিল্লক্লবদি, ভারতনা অদোমগী চাওখৎনবগী গরেন্তীসু পীগনি হায়বসি ঙসিগী ভারতকী খোঙফম্নি‍। ঐগুম্বা মীওই অমবু মফমসিদা কৌবিরকপগীদমক ই.তি.গী লমন তোনশিঞ্জরে‍। পাউ-চেদা মফম ফংদ্রবসু মফমসিদদি করি করিগুম্বা মতমদসু ফংলি‍। বিনীত জী অমদি সমীর জীনা ৱা ঙাঙখিবা মতমদা মখোয়না রিইমাজিনগী মরমদা ঙাঙলক্কদ্রা হায়না খল্লম্বনি, অদুবু মখোয়না হীরম অসিদা করিসু পনবিরমদ্রে‍। অদু ওইরবদি মখোয়গী এদিতোরিএল বোর্দনা ফিরেপ লৌরগা মপুদা করিসু তাক্লমদবা ওইরম্বসু য়াই‍। মরমদি ফোঙলিবশিং অদু ঐখোয় করিসু খঙদে, মদুদি মখোয়না তৌজবনি হায়না মপুনা হেক হেক হায়‍। মতৌ অদুগুম্না তৌবা ওইরম্বসু য়াই‍। অমবু ওইরবসু অমবু ওইরবসু ৱাফম খরসি থমজরগা ময়াম পুম্নমকপু হন্না হন্না থাগৎচরি‍।

***