ভারতকী প্রধানমন্ত্রী

ঙসিগী কনফরেন্স অসিদা শরুক য়ারিবা কেন্দ্রগী মন্ত্রী-মন্দলগী ঐহাক্কী মরুপ শ্রী নরেন্দ্র তোমরজী, মনসুখ মন্দাবিয়াজী, পিয়ুশ গোয়ল, শ্রী কৈলাশ চৌধরীজী! গুয়ানা, মালদীপ্স, মোরিশস, শ্রীলঙ্কা, সুদান, সুরীনাম অমসুং গাম্বিয়াগী মপালদগী লাকপা মন্ত্রী খরা, এগ্রিকলচর, ন্যুত্রিসন অমসুং হেল্থকী লমদা লৈরিবা মালেমগী তোঙান-তোঙানবা মফমশিংদগী সাইন্তিস্তশিং অমসুং এক্সপর্তশিং, তোঙান-তোঙানবা এফ.পি.ও. অমসুং স্তার্ত-অপকী নহা ওইরিবা মরুপশিং, লৈবাক্কী কাচিন কোয়া শিনবা থুংবদগী লৌমী লাখ কয়া, অতোপ্পা দিগনিতরীশিং, নুপী অমদি নুপাশিং,

‘গ্লোবেল মিল্লেৎস কনফরেন্স’ পাঙথোকপগীদমক ময়াম পুম্নমকপু থাগৎপা ফোঙদোকচরি। অসিগুম্বা থৌরমশিং অসি মালেমগী য়াইফনবগীদমক তঙাই ফদবা খক্তা নত্তনা মালেমগী য়াইফনবা ভারতনা থৌদাং লৌবা হেনগৎলক্লিবা অসিগী খুদম অমসু ওইরি।

মরুপশিং,

ভারতকী প্রপোজেল অমদি খোঙথাংশিংগী মতুংদা খক্তা য়ুনাইতেদ নেসন্সনা ২০২৩বু ‘ইন্তর্নেস্নেল ইয়র ওফ মিল্লেৎস’ হায়না লাউথোকখি। ঐখোয়না ফিরেপ অমা মাংদা পুখৎপা মতমদা মদুবু মাইপাকহন্নবা থৌদাংচু চপ মান্ননা মরু ওই। ঙসি মালেমনা ‘ইন্তর্নেস্নেল মিল্লেৎ ইয়র’ পালন তৌরিবা মতমদা ভারতনা কেম্পেন অসি মাংজিল থাবদা ঐহাক্না নুংঙাইবা পোকই। মাইকৈ অসিদা ‘গ্লোবেল মিল্লেৎস কনফরেন্স’ অসি মাইকৈ অসিদা মরু ওইবা খোঙথাং অমনি। মসিদা স্কোলরশিং অমসুং এক্সপরিয়েন্স লৈবা মীওইশিংনা মিল্লেৎ থাবা, মসিগা মরী লৈনবা ইকনোমী, হকশেল, লৌমীশিংগী শেন্থোক্তা পীবা মাগী কান্নবশিং, অমসুং অতোপ্পা হীরম কয়াগী মতাংদা খন্ন-নৈনগনি। মসিদা গ্রাম পঞ্চায়ৎশিং, কৃশি কেন্দ্রশিং, স্কুল-কোলেজশিং অমসুং এগ্রিকলচর য়ুনিভর্সিতীশিংনা ঐখোয়গা লোয়ননা শরুক য়ারি। ইন্দিয়ন এম্বেসীশিংদগী লৈবাক কয়ানা ঙসি ঐখোয়গী ইরক্তা য়াওরি। ঙসি ঐখোয়গা লোয়ননা থৌরম অসিদা ভারতকী লৌমী লাখ ৭৫না ভর্চুএল ওইনা য়াওরি। মসিনা মাগী মতিক ময়াই উৎলি। ঐহাক্না অমুক হন্না পুম্নমকপু তরাম্না ওকচরি, নখোয়বু থাগৎপা ফোঙদোকচরি। মিল্লেৎকী কোম্মেমোরেতিব স্তাম্পশিং অমসুং শেনয়েক মফম অসিদা ফোঙখি। মফম অসিদা বুক ওফ মিল্লেৎ স্তেন্দর্দস ফোঙখি। অমসুং মসিগা লোয়ননা আই.সি.এ.আর.গী ইন্দিয়ন ইন্সতিত্যুত ওফ মিল্লেৎস রিসর্চ’ অসি গ্লোবেল সেন্তর ওফ এক্সিলেন্স হায়না লাউথোকখি। অমসুং স্তেজতা কারক্ত্রিঙৈ মমাংদা ঐহাক্না একজিবিসন য়েংখি, ঐহাক্না নখোয় পুম্নমক্তা অমসুং দিল্লীদা লৈরিবা মীওইশিংদা নত্ত্রগা দিল্লীদা লাক্কদবা মীওইশিংদা মিল্লেৎকী মরমদা মসিগী কান্নবগী মতাংদা খঙনবা হায়রি। এনভাইর্নমেন্ত, মহৌশা, হকশেল, লৌমীশিংগী ইনকমগী হীরম পুম্নমক খঙনবগীদমক ঐহাক্না একজিবিসন অসিদা চৎনবা হায়জরি। ঐখোয়গী নহা ওইরিবা মরুপশিংনা অনৌবা স্তার্তঅপশিংগা লোয়ননা লম অসিদা চংলক্লিবা মওং অসিমক শীংথানীংঙাই ওই। পুম্নমক অসিনা ভারতকী ফিরেপ উৎলি।

মরুপশিং,

ঙসি ঐহাক্না গ্লোবেল মিল্লেৎস কনফরেন্সকা মরী লৈনবা লৌমী লাখ কয়া অমদি মীরমগী মীথুংলেনশিংগী মমাংদা ৱাফম অমা অমুক হন্না থমজগে। গ্লোবেল ব্রান্দিং অসি য়েংলগা ভারতকী মিল্লেৎশিং নত্ত্রগা কোর্স গ্রেনগী কম্মন ব্রান্দিংদা শ্রী অন্ন হায়বা মীংথোন পীখি। শ্রী অন্ন অসি লৌউ-শিংউ নত্ত্রগা চাবা খক্তদা লোইদে। ভারতকী চৎনবী খঙবা মীওইশিংনা ঐখোয়গী লৈবাক্তা ‘শ্রী’ হায়বা অসি ইচম চম্বদা হেক্তা হাপতে খঙই। শ্রী হায়বা অসি চাউখৎপা অমসুং অপুনবগী মশকনি। শ্রী অন্ননা ভারতকী অপুনবা চাউখৎ থৌরাংগী মিদিয়ম অমা ওইরক্লি। মসিদা খুঙ্গংশিং, লায়রবশিংসু য়াওরি। শ্রী অন্ন হায়বা অসি লৈবাক্কী অপীকপা লৌমীশিংগী য়াইফনবা হাংলিবা থোংনি, শ্রী অন্ন অসি লৈবাক্কী মীওই করোর কয়াগী মচি ওইবা চীঞ্জাক্কী মাস্তরনি, শ্রী অন্ন অসি কেমিকেল ফ্রী ফার্মিংনি, মসিনা ক্লাইমেৎ চেঞ্জকী শীংনবা মায়োক্নবদা মতেং পাংই।

মরুপশিং,

ঐখোয়না শ্রী অন্ন অসি গ্লোবেল মুফমেন্ত ওইহন্নবা চোকথবা লৈতনা হোৎনখি। ২০১৮দা ঐখোয়না মিল্লেৎপু ন্যুত্রি-সিরিএল হায়না লাউথোকখি। মাইকৈ অসিদা লৌমীশিংবু ভাব তাহনবদগী হৌরগা মার্কেৎতা ইন্তরেস্ত লৈহন্নবা থাক খুদিংমক্তা থবক পাইখৎখি। ঐখোয়গী লৈবাক্তা মিল্লেৎ অসি রাজ্য ১২-১৩দা মপুং ওইনা থাই। অদুবু দোমেস্তিক কঞ্জুম্পসন অসি থা অমদা মীওই অমনা কে.জি. ২-৩দগী হেন্দে। ঙসি মসি থা অমদা কে.জি. ১৪ হেনগৎহনখি। হায়বদি কিলো অনিদগী অহুম ওইরম্বদগী কিলো ১৪দা হেনগৎহনখি হায়বনি। মিল্লেৎকী অচা-অথক্কী পোৎলম য়োনবসু চাদা ৩০ হেনগৎখি। হৌজিক মিল্লেৎ কেফে তোঙান-তোঙানবা মফমশিংদা হাংবা হৌখ্রে, মিল্লেৎকা মরী লৈনবা রেসিপিশিংগীদমক সোসিএল মেদিয়া চেনেলশিং শেম্লি। মিল্লেৎগীদমক ‘ৱান দিস্ত্রিক, ৱান প্রদক্ত’ স্কিম মখাদা জিলা ১৯ খনগৎখি।

মরুপশিং,

খঙই মদুদি চেং-হৱাই থারিবা লৌমী অয়াম্বা অপীকপা লৌমীশিং, মর্জিনেল ফার্মরশিংনা ওইরি। অমসুং ভারতকী মিল্লেৎ পুথোকপদা অপীকপা লৌমী করোর ২.৫ হেন্না হকথেংননা য়াওরি খঙবদা মীওই খরদি শোইদনা অঙকপা পোক্কনি। মখোয় অয়াম্বগী লম য়াম্না পীকই, অমসুং মখোয়না ক্লাইমেৎ চেঞ্জকী অয়াম্বা শীংনবশিং মায়োক্নরি। শ্রী অন্নগীদমক হৌখিবা ভারতকী মিল্লেৎ মিসন, কেম্পেন অসিনা লৈবাক্কী লৌমী করোর ২.৫গীদমক থৌজাল অমা ওইরগনি।  অহানবা ওইনা নীংতম্বা ফংলবা মতুংদা অপীকপা লৌমী করোর ২.৫না মিল্লেৎ পুথোক্তুনা সরকারগীদমক চাউনা মতেং পাংলি। মিল্লেৎকী অমসুং অশংবা মহৈ-মরোংগী মার্কেৎ হেনগৎলবা মতমদা অপীকপা লৌমী করোর ২.৫গী শেন্থোক হেনগৎলগনি। মসিনা খুঙ্গংগী শেন্মীৎলোন্দা কান্নবসু পীরগনি। মিল্লেৎ অসি হৌজিক প্রোসেস অমসুং পেকেজ ফুদ আইতেমশিংগী খুত্থাংদা স্তোরশিং অমসুং মার্কেৎশিংদা য়ৌহল্লি। হৌখিবা চহি খরা অসিদা শ্রী অন্নদা স্তার্তঅপ ৫০০ হেন্না লৈবাক অসিদা শেমখি। মশিং য়াম্লবা এফ.পি.ও.শিংনা মাইকৈ অসিদা মাংদা চংশিল্লি। নুপীশিংনা সেল্ফ-হেল্প গ্রুশিংগী খুত্থাংদা মিল্লেৎকী পোত্থোক পুথোক্লি। খুঙ্গং থাদোক্লবা মতুংদা পোত্থোকশিং অসিনা মোলশিং অমসুং সুপরমার্কেৎশিংদা য়ৌবা ঙম্লি। হায়বদি লৈবাক অসিদা মপুং ফাবা সপ্লাই চেন অমা শেমগৎলি। মসিনা মরম ওইদুনা নহারোলশিংনা থবক্কী খুদোংচাবা ফংলি, অমসুং অপীকপা লৌমীশিংনা চাউনা কান্নবসু ফংলি।

মরুপশিং,

হৌজিক্কী ওইনা ভারতনা জি-২০গী প্রসিদেন্ত ওইরি। ভারতকী মোতো অসি – মালেম পুম্বগীদমকন ৱান আর্থ, ৱান ফেমিলী, ৱান ফ্যুচরনা ওইরি।

মালেম পুম্ববু ইমুং অমা ওইনা খনবগী ৱাখল্লোন অসিসু মালেমগী মিল্লেতকী চহি অসিদা মমি তারি। ভারতনা মতম পুম্বদা মালেম অমসুং মীওইবা খুন্নাইগী সেবা তৌনবা লৌবা ৱারেপ অসিবু মশাগী থৌদাংনি খন্দুনা খ্বাইদগী অহানবা মিৎয়েং চঙদুনা লাক্লি। ঐখোয়না য়োগগা লোয়ননা মাংদা চংশিনবা মতমদা মালেমগী য়োগ নুমিৎকী খুত্থাংদা য়োগগী কান্নবশিং মালেম শিনবা থুংবদা য়ৌরি। মালেমগী লৈবাক ১০০ হেনবদা য়োগবু পুক্নিং থৌগৎলিবা অমসুং লৈবাক ৩০ হেনবনা অয়ুর্বেদবু শখঙলিবা অসিদা মহাক্না য়াম্না নুংঙাইবা ফাওই। ইন্তর্নেস্নেল সোলর এলাইএন্স শেম্নবা ভারতকী খোঙথাংশিংনা সস্তেনেবল ওইবা প্লানেত অমা শেম্নবগীদমক্তা কান্নবা প্লেতফোর্ম অমা পীরি অমসুং লৈবাক ১০০ হেনবনা ইহৌ অসিদা শরুক য়ারি। লাইফ মিসনবু লুচিংবা নত্ত্রগা ক্লাইমেত চেঞ্জকী পান্দমশিং মতমগী মমাংদা ফংবা ওইরো, ভারতনা মশাগী হেরিতেজতগী ইথিল লৌরি, খুন্নাইদা অহোংবা পুরক্লি অমসুং মালেমগী য়াইফ-থৌরাংগীদমক্তা ইথিলশিং অসিগী মতেং লৌরি। অমসুং মসিগা মান্নবা মহৈ অমসু ঐখোয়না ‘মিল্লেত ইহৌ’ অসিদা উবা ফংবা য়াগনি। জোৱার, বাজরা, রাগী, সামা, কঙ্গনী, চীনা, কোদোন, কুতকী অমসুং কুত্তুগুম্বা ভারতকী তোঙান-তোঙানবা মফমশিংদা মরাং কায়না ফংবা শ্রী অন্নগী খুদমশিংনি। মিল্লেত অসি চহি চা কয়াদগী ভারতকী পুন্সি মহিংগী শরুক অমা ওইদুনা লাক্লি। ভারতনা শ্রী অন্নাগা মরী লৈনবা মশাগী লৌউ-শিংউগী থৌওংশিং অসি মালেমদা তাকপা পাম্মি অমসুং অতোপ্পা লৈবাকশিংগী মফমদগীসু তম্বা পাম্মি। ঙসি থৌরমসিদা শরুক য়ারিবা ঐখোয়গা নক্নবা মরী লৈবা লৈবাকশিংগী লৌউ-শিংউ মন্ত্রীশিংদা ঐহাক্না হীরম অসিগী মতাংদা তংদু লৈতানা চৎকদবা থৌওং অমা শেম্নবা হায়জরি অমসুং লবুক্তগী কৈথেল ফাওবা অমসুং লৈবাক অমদগী লৈবাক অমদা পুন্না থৌদাং য়ামিন্নদুনা অনৌবা সপ্লাই চেন অমা শেম্বগী তঙাই ফদবা লৈ।

মরুপশিং,

ঙসি ফম্পাক অসিদা ঐহাক্না মিল্লেৎতা হেন্না শক্তি পীবা মীৎয়েং চংই। মিল্লেৎকী মপাঙ্গল অসি অইং-অশা খাংবা ঙম্বা অসিনি। মিল্লেৎশিং অসি য়াম্না খুদোংচাদবা ফীভমশিংদসু লায়না হৌবা ঙম্মি। মসি পুথোকপদা ঈশিংগী চাং য়াম্না নেম্না চংই, ঈশিং ফংদবা মফমশিংগীদমক চু্নৈ। লৌশিং লৈরবা মীওই পুম্নমক্না খঙই মদুদি মিল্লেৎকী অখন্নবা মগুন অসি কেমিকেলশিং য়াওদনা মহৌশানা হৌজবা ঙম্মি। মরম অসিনা মিল্লেৎশিংনা মীওইবা অমদি লৈহাও অনিমক্কীদমক শাফবা ওইহল্লি।

মরুপশিং,

ঐখোয়না ফুদ সেক্যুরিতীগী মতাংদা ৱারী শাবা মতমদা  ঐখোয়না খঙই মদুদি ঙসিগী মালেম অসিদা শীংনবা অনি মায়োক্নরি। নাকল অমদা লায়রবশিংগী ফুদ সেক্যুরিতীগী মতাংদা খল্লিবা গ্লোবেল সাউথ। মফম অসিদা মচি ওইবা চীঞ্জাক চাবা ফংদবা অসি অচৌবা শীংনবা ওইরি। হায়বরি নাকল অমদা ফুদ সেক্যুরিতীগী সমস্যা অমসুং অতোপ্পা নাকল অমদনা চীঞ্জাক্কী হৈনবগী সমস্যা! মফম অনিমক্তা কেমিকেলগী চাং ৱাংনা শীজিন্নবগী সমস্যা মায়োক্নরি। শ্রী অন্ন অসিদি থাবদা লায়বা অমসুং শেলসু য়াম্না চঙদবা অমসুং অতোপ্পা মহৈ মরোংগা চাংদম্নবদা অতেনবা মতমদা লোকপা য়াবা অসিনা মরম ওইরগা মসিগুম্বা শিংনবশিংগী ৱারোইশিন পুরকপা ঙমগনি। শ্রী অন্ন অসিদি মচি য়াম্না ওই, মহাও য়াম্না লৈ, ফাইবরগী চাং য়াম্না ৱাংই, হকচাংদা য়াম্না কান্নবা পী অমসুং পুন্সি মহিংগা মরী লৈনবা লাইনা কয়া ঙাকথোকপদসু তেংবাংই।

মরুপশিং,

মিল্লেৎনা লোইবা নাইদ্রবা খুদোংচাবা কয়া পুদুনা লাক্লি। শ্রী অন্নানা নেস্নেল ফুদ বাস্কেত্তা শরুক তম্লিবা অসি শুপ্নগী ৫-৬%নি, লৌউ-শিংউ সেক্তরগী সাইন্তিস্ত অমসুং অখঙ-অহৈশিংনা হায়রিবা শরুক তম্বগী চাং হেনগৎহন্নবা থবক পাংথোক্লসি অমসুং চহি খুদিংগী ফংবা ঙমগদবা পান্দম থমদুনা চৎসি। লৈবাক অসিনা ফুদ প্রোসেসিং সেক্তর চাউখৎহন্নবা পি.এল.আই. স্কিম হৌদোকখ্রবনি। মিল্লেৎ সেক্তরনা মসিদগী খ্বাইদগী হেন্না কান্নবা লৌহনবগী তঙাই ফদবা লৈরি অমসুং কম্পেনী মশিং য়াম্বনা মিল্লেতকী পোত্থোক পুথোক্নবা মাঙ থানা চংশিনগদবনি। রাজ্য কয়ানা মখোয়গী পি.দি.এস. পথাপতা শ্রী অন্ন য়াওহন্নখ্রে অমসুং অতোপ্পা রাজ্যশিংনসু মসিগী মতুং ইনগদবনি। অঙাংশিংনা মতিক চাবা ন্যুত্রিসন ফংহন্নবা অমসুং মখোয়গী চিঞ্জাক্তা অনৌবা মহাও অমা হাপহন্নবগীদমক্তা শ্রী অন্নবু মিদ-দে মীলদা য়াওহনবা য়াই। ঐহাক্না থাজৈ মসিগী হীরমশিং অসি কনফরেন্স অসিদা য়াম্না কুপ্না খন্নগনি অমসুং মখোয়বু থবক ওইনা পাংথোকপগী থৌরাংসু য়াৎকনি। অন্নদতা, অমসুং ময়াম্না পুন্না হোৎনবগা লোয়ননা শ্রী অন্ননা ভারত অমসুং মালেমগী চাউখৎ-থৌরাংদা অনৌবা মঙাল অমা পীরগনি। থাজবা অসিগা লোয়ননা ঐহাক্না থমোয় শেংনা পুম্নমকপু থাগৎপা ফোঙদোকচরি। লৈবাক অনিমক্কী নেস্নেল প্রসিদেন্তশিংদা মতম কাইথোকপীবগীদমক ঐহাক্না তৌবীমল খঙবা উৎচরি। হন্না-হন্না থাগৎচরি।

***