ভারতকী প্রধানমন্ত্রী

মন্ত্রীমন্দলগী ঐগী মরূপ দোক্তর জিতেন্দ্র সিংহ জী, প্রিন্সিপাল সেক্রেতরী দোক্তর বি.কে. মিস্রা, শ্রী রাজীব গৌবা, সি.ভি.সি. শ্রী সুরেস পতেল, অতৈ কম্মিস্নরশিং, ইবেম্মা অমদি ইবুংঙোশিং !

ভিজিলেন্স ৱীক অসি সরদার পতেলগী মপোক কুমওন্দগী হৌখিববনি‍। সরদার সাহেবনা মপুন্সি চুপ্পা পুকচেল শেংবা, অরোন অথুপ লৈতবা লম্বীদা চত্তুনা অমদি মসিনা পুক্নিং থৌগত্তুনা মীয়ামগী থৌগলগী থবক্তা কত্থোক্লম্মী‍। অদুগা হায়রিবা খোঙফমসিগা লোয়ননা ভিজিলেন্সকী মরমদা মীয়ামদা পাক শন্না খঙহন্নবা থৌরাং অসি লৌখৎলিবনি‍। হন্দক্তি ময়াম পুম্নমক্না ‘চাওখৎপা ভারতকীদমক শেঞ্জা থুমজা লৈতবা ভারত’ হায়বা ফিরেপকা লোয়ননা ভিজিলেন্স ৱীক পাঙথোক্লি‍। ফিরেপ অসি ঙসিগী মতম্না পুরকপা মথৌ তাবদুনি অমদি লৈবাক মীয়ামগীদমক্তসু য়াম্না মরু ওই‍।

মরূপশিং,

চাওখৎপা ভারত অমগীদমক থাজবা অমদি থাজনিংঙাই ওইহনবা অনিমক য়াম্না মরুওই‍। মীয়াম্না লৈঙাক্তা থাজবা হেল্লিবমখৈ মীয়াম্না মশাবু থাজবগী চাংসু হেল্লক্কদৌরিবনি‍। ঐখোয়গীসিদা লৈরিবা খুদোংচাদবা হায়রগদি লৈঙাক্কী মফমদা লৈরম্বা মীয়ামগী থাজবা মাঙখিবতা নত্তনা লৈঙাক্নসু মীয়ামদা থাজবা ঙমদবসিনি‍। মতম শাংনা মীনায় নাইথাংগী পুন্সিদা লৈরকপদগী ফংলকপা শেঞ্জা থুমজা, মীওৎ মীনৈ, মচাক মথুম পায়শিনবগী পরিং নীংতম্লবা মতুংদসু অদুমক মখা শমথখিদুনা লৈবাকসিগী মীরোল মরিরোমদি মসিনা চাউনা চৈথেং পীখি‍।

অদুবু নীংতম্বগী অমৃৎকালসিদা ঐখোয়না চহি কয়াদগী চৎনদুনা লাক্লিবা থৌওংসিবু মপুং ফানা হোংদোকপা তাই‍। হন্দক্কী ওগস্ত ১৫দা ঐনা লাল কিলাদগী ঐনা হৌখিবা চহি নিপানসিদা থবক পাঙথোক্তুনা, থৌওং হোংদোক্তুনা থৌরাং খরা পায়খৎখ্রবা মতুংদা হৌজিক্তি শেঞ্জা থুমজাগী মায়োক্তা খোঙফম চেৎনা লাল চঙবা মতম ওইরে হায়খি‍। ঐখোয়না পাউজেল অদুবু খঙজিন্দুনা লম্বী অসিদা চঙশিনবনা ঐখোয়না চাওখৎপা ভারতকী মায়কৈদা খোঙজেল য়াঙনা চঙশিনবা ঙমগদৌরিবনি‍।

মরূপশিং,

লৈবাকসিদা শেঞ্জা থুমজা অমদি মীয়ামগী খোঙজেল তপথহল্লিবসিগী– মচাক মথুম নীংথিনা লৈতবা অমদি লৈঙাক্না মরম চাদনা শাফু পীবা – হায়রিবা মরম অনি অসি লৈ‍। মতম শাংনা হায়রিবা মচাক মথুম অমদি খুদোংচাবা ৱাৎপগী ফীভম অসি থৌওইনা লৈহল্লম্মী অমদি লৈরিবা অহোবা অদু হেন্না পাকথোক চাউথোকহন্দুনা অমসু অমসু কান্নদবা লমজেলদা হিদান্নবগী ফীভম অমা লাকহনখি‍। লমজেল অসিনা শেঞ্জা থুমজাগী ফীভমদা হার-ঈশিং চাইবগুম থোকখিদুনা শেঞ্জা থুমজাগী ইকোসিস্তেম অমা শেমগৎখি‍। রাসন দুকান্দা পরেং লেংবা, গ্যাস সিলিন্দর লৌনবগী পরেং লেংবা, বিল থিবা, মিং চনবা, লাইসেন্স তান্নবা, অয়াবা অমা লৌবা হীরম খুদিংদা পরে পরেং লেপ্পগী মতৌ লৈরম্মী‍। পরেং অসি শাংলিবমখৈ শেঞ্জা থুমজাগী ফীভম হেনগৎলকই‍। অসিগুম্বা অৱাৎপশিংনা থোকহল্লকপা শেঞ্জা থুমজানা লায়রবা অমদি ময়ায় ওইরপ্পা কাঙলুপকী মীওইশিংদা খ্বাইদগী হেন্না শোকহল্লি‍।

লৈবাকসিগী লায়রবা অমদি ময়ায় ওইরপ্পা কাঙলুপকী মীওইশিংনা তঙায় ফদনা চঙদ্রবা য়াদ্রবা এমেনিতীশিং ফংনবা হোৎনবদা মখোয়গী মপাঙ্গল শীজিন্নদুনা লৈরবদি লৈবাকসিনা কমদৌনা চাওখৎলক্কদৌরি? মরম অসিননি, ঐখোয়নৌ হৌখিবা চহি ৮সিদা হায়রিবা অৱাৎপা অমদি শাফুতনা থল্লবা সিস্তেম অসিবু হোংদোক্নবা হোৎনদুনা লাক্লিবা‍, লৈঙাক অসিনা সপ্লাই অমসুং দিমান্দকী মরক্তা লৈরিবা অহোবা অসি মেনশিন্নবা হোৎনরি‍বা‍। মসিগীদমক ঐখোয়না পাম্বৈ কয়া শীজিন্নখি‍।

মসি ফংবা ঙম্নবগীদমক চঙশিল্লিবা পাম্বৈ অহুমগী মায়কৈদা ময়ামগী পুক্নিং চিংশিঞ্জগে‍। অহানবদা তেক্নোলোজীগী খুমাঙ চাওশিনবা, অনিসুবদা তঙায় ফদনা চঙদ্রবা য়াদ্রবা সর্ভিসশিং মীপুম তিংনা ফংহনবা, অমদি অহুমসুবদা ইরোমদোম লেপচবগী মায়কৈদা খোঙ থাংজিনবনি‍। রাসনগী খুদম হেক্তা লৌবিয়ু‍। হৌখিবা চহি ৮সিদা ঐখোয়না পি.দি.এস.পু তেক্নোলোজীগা মরী শম্নহনখি, অমদি শাজিন্নবা বিনিফিসরী করোর কয়া সিস্তেমদগী লৌথোকখি‍।

মতৌ অসুম্না দি.বি.তি. শীজিন্নদুনা লৈঙাক্না পীরিবা কান্নবশিং বিনিফিসরীশিংগী মফমদা হকথেংননা ফংহল্লে‍। থোঙথাঙ অসিনা লুপা করোর লাখ ২ হেনবগী শেনফম লান্না চৎলমগদবদগী কলহৌবা ঙমখি‍। কেসতা য়ুম্ফম ওইবা শেন্মিৎলোন অমদা শেঞ্জা থুমজা তৌবা, ব্লেক মনীনচিংবা থিদোকপা কয়া য়াম্না লুবগে হায়বা ঐখোয় পুম্নমক খঙনরবা ঙাক্তনি‍।

হৌজিক্তি দিজিতেল ওইবা মওংদা শেল থাদোক থাজিন তৌবগী থৌওং হেন্না লায়রক্লি‍। গভর্নমেন্ত ই-মার্কেৎ প্লেস – জি.ই.এম.নচিংবা সিস্তেম অসিনা লৈঙাক্কী পোৎচৈ লৌশিনবদা অরোন অথুপ লৈতবা ফীভম পুরকপা ঙমহল্লি, সিস্তেম অসিগা মরী লৈনবা খুদিংমক্না মসিগী মরুওইবা খঙই, অমদি থেংনদুনা লৈরি‍।

মরূপশিং,

লৈঙাক্কী স্কীম খুদিংমক্কী কান্নবা ফংবা য়ারবা বিনিফিসরী খুদিংদা য়ৌশিনবা অমদি মীপুম তিংনা ফংহনবগী পান্দম ফংবনা শেঞ্জা থুমজাগী মফম মুত্থৎপগা লোয়ননা খুন্নাইদা অচান মিরান নাইবগী চৎনবী মুত্থৎলি‍। লৈঙাক অমদি লৈঙাক্কী দিপার্তমেন্তশিং মশানা থোরক্তুনা কান্নবা ফংবা য়াবা মীপুম খুদিংমক থিদোক্তুনা মখোয়গী থোঙজিলদা চত্তুনা থোঙ থিল্লরবা মতমদা মরক্তা দলালী চারম্বা মীওইশিংগী মথৌ মাঙখিগনি‍। মরম অসিনা ঐখোয়গী লৈঙাক্না স্কীম পুম্নমক্তা সেচুরেসন ফংননবা পান্দম থম্লি‍। য়ুমথোঙ খুদিংদা থক্নবা ঈশিং, লায়রবশিংগী পক্কাগী য়ুম, লায়রবা ইমুং খুদিংগী মৈ ফংহনবা, লায়রবা ইমুং খুদিংগা গ্যাস ফংহনবা হায়রিবা স্কীমশিং অসিদা লৈঙাক্না চঙশিল্লিবা লম্বী পরিং অসিগী মমি তারি‍।

মরূপশিং,

মপান্দগী পুশিল্লকপা পোৎলমশিংদা কা হেন্না তাংদুনা লৈবনা শেঞ্জা থুমজাগী অচৌবা মরম অমা ওইরি‍। চহি কয়া ঐখোয়গী দিফেন্স সেক্তরনা মীরমদা তাংদুনা লৈরম্বা অদোম খঙবিরিবদুনি‍। মসিনা মরম ওইরগা ৱাথোক কয়া থোকখ্রে‍। ঙসি ঐখোয়গী দিফেন্স সেক্তরদা আত্মনিরভরতা পুরক্নবগীদমক থাংজিল্লিবা খোঙধমসিনা ৱাথোক থোকপগী মফমসু লৈহল্লরোই‍। রাইফল্সতগী হৌরগা ফাইতর জেৎ অমসুং ত্রান্সপোর্ত এয়রক্রাফ্ত ফাওবা ভারত্তা ইশানা পুথোকচনবগী মায়কৈদা খোঙ থাংজিল্লি‍। দিফেন্সখক্তা নত্তনা অতৈ মথৌ তাবশিংদসু মপান লৈবাক্তা তাংদুনা লৈবা হন্থহন্নবা, আত্মনিরভরতাগী থৌরাং অসিদা ঐখোয়না পুক্নিং থৌগৎলি‍।

মরূপশিং,

সি.ভি.সি.বু অরোন অথুপ লৈতবা ফীভম লৈহনবদা মীপুম খুদিংদা পুক্নিং থৌগৎলিবা ইন্সতিত্যুসন অমনি‍। মমাঙদা ঐনা ময়ামগী মফমদা ‘প্রিভেন্তিব ভিজিলেন্স’গী মরমদা পুক্নিং চঙবিনবা ৱাফম থমখি‍। অদোম্না মায়কৈ অসিদা খোঙথাঙ কয়া লৌখৎলে হায়না ঐঙোন্দা পাউদম্লকই‍। মসিগীদমক থা অহুমগী কেম্পেন পাঙথোকখিবা অদু থাগৎনিংঙাইনি, মসিগীদমক্তা অদোমগী কাঙবু পুম্নমকপু থাগৎচরি‍। মসিগীদমক্তা ওদিৎ অমসুং য়েংশিনবগী মওং অমা অদোম্না পায়খৎলি‍। অদুবু থৌওং অসিবু মতমগা হেন্না চুশিন্নহন্নবা অমদি তেক্নোলোজীনা থৌদুনা চৎননবগী ফীভম কমদৌনা শেম্বা য়াবগে হায়বসিদা অদোম শোয়দনা খনবিয়ু, খনফমসু থোকই‍।

মরূপশিং,

লৈঙাক্না শেঞ্জা থুমজাগী মায়োক্তা লেপ্লিবা খোঙফম অসিমক দিপার্তমেন্ত খুদিংদা লৈহনবা মথৌ তাই‍। চাওখৎপা ভারত অমগীদমক, ঐখোয়না শেঞ্জা থুমজা শুকয়া য়াদবা এদমিনিস্ত্রেতিব সিস্তেম অমা শেমগৎপা মথৌ তাই‍। হায়রিবা ফীভম অসি ঙসি অদোম্না লৈঙাক্কী কাঙলোন্দা, লৈঙাক্কী ফিরেপ্তা, অমদি লৈঙাক্কী ৱারেপশিংদা মফম খুদিংদা উবা ফংবিরমগনি‍। অদুবু ৱাখল্লোন অসি ঐখোয়গী লৈঙাক্লোনগী থৌওংগী দি.এন.এ.দসু মরা তাহনবা মথৌ তাই‍। শেল চাবা ওফিসরশিংগী মায়োক্তা, ক্রিমিনেলগী ওইরবসু নৎত্রগা দিপার্তমেন্তেলগী ওইরবসু থবক লৌখৎপদা চহি কয়া শাংথদুনা লৈ হায়বা ইথিল অমা লৈনরি‍। অসিগুম্বা শেঞ্জা থুমজাগা মরী লৈনবা দিসিপ্লিনরী প্রোসীদিংশিং অসি মিসন মোদতা অকক্নবা মতমগী মনুংদা লোইশিনবা য়ারোইদবরা? থাঙ তারক্কদবগী ঙাইদুনা লৈরগদি, মহাক্কী মফমদসু লৈতাফম খঙদবা অমা ওইহল্লি‍। করিগুম্বা মহাক মরাল লৈরমদবা ওইরগদি, চগোয়নুংসিদা চঙলকপা মতমদা ঐনা পুন্সি চুপ্পা পুকচেল শেংনা থবক তৌজরক্লগা ঐবু লাংদা থুহনবিরে অদুগা ফিরেপসু অমত্তা লৌবিদনা থম্বিরে হায়বা ৱাখলদা মহাক্কী মফমদসু অৱা পোৎলুম পুহন্দুনা থম্বিগদৌরিবনি‍। মরাল লৈবা মীওইশিংগী মাঙজবদুনা তোঙানবা ৱাফম অমনি, অদুবু মরাল লৈজদবা মীওইদুদি থাঙ অমা তারক্কদবগী য়ান্দুনা লৈবা হায়বসি মখোয়গী পুন্সিদসু লৈঙাক্কী মফমদসু পোৎলুম অমনি‍। ঐখোয়গী মরূপশিংবু অসুম্না মতম কুইনা চরাংনবা ফীভমদা পন্দুনা লৈহনবগী করিবু কান্নগদৌরি‍।

মরূপশিং,

অসিগুম্বা মরাল শিরকপা ৱাকৎশিং হেক থুনা লোইশিল্লিবমখৈ লৈঙাক্লোনগী ফীভমদা অরোন অথুপ লৈতবা ওইহনগদৌরিবনি অমদি মদুনা মতিক হাপকদৌরিবনি‍। ক্রিমিনেল কেসশিংগী মতাঙদসু খোঙলৈ থুনা ৱায়েল চত্থনবা, মখোয়বু লেপ্পা লৈতনা য়েংশিন্নবা ফীভম শেম্বা মথৌ তাই‍। হীরম অসিদা তৌবা য়াবা অতোপ্পা থবক অমনা, পন্দুনা লৈবা শেঞ্জা থুমজাগী কেসতা য়ুম্ফম ওইরগা দিপার্তমেন্তশিংগী রেঙ্কিং শেম্বনি‍। অসুম তৌবনা হৌজিক ঐখোয়না লু-নান্নবগীদমক কম্পিতিসন তৌরিবা অসিগুম্না, মসিদসু তৌসি‍। করম্বা দিপার্তমেন্তনা ঐখোয়বু চিংথরিবগে, করি মরমগীনো হায়বদু য়েংসি‍। করম করম্বা দিপার্তমেন্তশিংনা হায়রিবা ৱাফম অসিবু লুম্না লৌদুনা খোঙজেল য়াঙনা চঙশিল্লিবগে হায়বসু য়েংসি‍। অদুগা মসিগা মরী লৈনবা রিপোর্তশিং থাগী নৎত্রগা থা অহুম-অহুমগী ওইনা ফোঙদোকপনা তোঙান তোঙানবা দিপার্তমেন্তশিংদা শেঞ্জা থুমজাগা মরী লৈননা পন্দুনা লৈরিবা কেসশিং থুনা লোইশিনবদা পুক্নিং থৌগৎকনি‍।

ঐখোয় তেক্নোলোজীগী মতেংনা অতোপ্পা থবক অমগসু তৌবা য়াই‍। ভিজিলেন্স ক্লিয়রেন্সতা মতম কুইনা লৌবা হেক হেক থেংনৈ‍। থৌওং অসিবুসু তেক্নোলোজীগী মতেং লৌদুনা স্ত্রীমলাইন তৌবা য়াই‍। ময়ামগী মফমদা থম্বা পাম্বা অতোপ্পা হীরম অমনা, মীয়ামগী ৱাকৎকী দেতা অসিনি‍। লৈঙাক্কী তোঙান তোঙানবা দিপার্তমেন্তশিংদা মীচম মীয়াম্না ৱাকৎ থারক্লিবনি, হায়রিবা ৱাকৎশিং অদুগী ৱাখৈ পুরক্নবগী সিস্তেম অমা শেমদুনা লৈরি‍।

অদুবু মীয়ামগী ৱাকৎকী দেতা ঐখোয়না ওদিৎ তৌবা য়ারবদি মীয়ামগী ৱাকৎ খ্বাইদগী হেন্না লাকপা দিপার্তমেন্তসু খঙদোকপা য়াগনি‍। দিপার্তমেন্ত অদুগী থবক থৌরমশিং হেক হেক পন্থহনবা মীওই অদুসু খঙদোকপা ঙম্লগনি‍। ঐখোয়না তৌরিবা থবক থৌওংদা করি অশোয়বা লৈবদগী ৱাফমশিং অসি থোরক্লিবনো হায়বসু খঙবা ঙম্লগনি‍। অসুম্না তৌবনা দিপার্তমেন্ত অদুদা লৈরিবা শেঞ্জা থুমজাগী মরু ফাওবা য়ৌনা চঙশিন্দুনা থিদোকপা ঙমগনি হায়না ঐনা খল্লি‍। ঐখোয়না ৱাকৎশিং অসিবু তোখাইনা য়েংবা য়ারোই‍। পুম্নমকশিংয অদু মাঙদা পুথোক্তুনা থম্লবা মতমদা নৈনবগী থবক খুদিংমক পাঙথোক্কদবনি‍। অদুগা মসিনা মীয়াম্না লৈঙাক অমদি লৈঙাক্কী লোয়শঙশিংদা থম্লিবা থাজবসু হেনগৎহনগনি‍।

মরূপশিং,

শেঞ্জা থুমজা য়েংশিন্নবগীদমক খুন্নাইনা শরুক য়াশিনবা, মীয়াম্না শরুক য়াশিনববু হেক য়ারিবমখৈ পুক্নিং থৌগৎকদবনি, হীরমসিদা থবকসু পায়খৎকদবনি‍। মরম অসিনা শেল চারিবা মীওই অদু ফনা মপাঙ্গল কনবা ওইরবসু ফীভম অমত্তদা নান্থোকহল্লোইদবনি, মসি অদোমগুম্বা লূপশিংগী থৌদাংনি‍।

শেল চাবা মীওই অমত্তা রাজনিতীগী-খুন্নাইগী ঙাক্লৌ ফংহল্লোইদবনি, শেল চাবা খুদিংমক খুন্নাইগী ৱায়েলশঙদা লেপহনগদবা ফীভম অমা শেমগৎপা মথৌ তাই‍। শেঞ্জা থুমজা তৌবা মীওইশিং মরাল লৈরে হায়বা উৎলবসু জেলদা থাজিনবগী মহুত্তা কয়ারক হন্না মখোয়গী মিংচৎ হেনগৎহনবা য়াওরি‍। অচুম্বগীদমক লেপ্পা শাবা মীওইশিংনা মখোয়গী মনাক্তা চত্তুনা খুৎ শোক্নদুনা ফোতো কাপমিন্নবদা ইকায়বা ফাওনদবা ঐ উই‍।

মসি ভারতকী খুন্নাইগী ওইনা অফবা নত্তে‍। ঙসিমকসু, মরাল লৈরে খঙলবা শেল চাবা মীওইশিংগীদমক কনাগুম্বা মীওই খরদি ৱা ঙাঙলি‍। হৌজিক্তি শেঞ্জাবা মীওইশিংবু ইকায়খুম্নবা উৎননবা ৱাফম ফোঙদোক্নবা কয়াসু উরি, মসি মমাঙদা অমুক্তা তাখিদ্রিবা ঙাক্তনি‍। অসিগুম্বা মীওই, অসিগুম্বা শাফুশিং অসিদা খুন্নাইগীদমক মখোয়দা লৈরিবা থৌদাংগী মরমদা খঙহনবা য়াম্না মরু ওইরে‍। হীরম অসিদা মতিক চাবা থবক লৌখৎপদা অদোমগী দিপার্তমেন্তগী অচৌবা থৌদাং লৈ‍।

মরূপশিং,

ঙসি ময়ামগী মরক্তা তিল্লরবসিদা অতোপ্পা ৱারী খরসু শানিংবগী পুক্নিংদা অপাম্বা ফাওরক্লি‍। শেঞ্জা থুমজা অমদি শেল চাবা মীওইশিংগী মায়োক্তা থবক তৌরিবা সি.ভি.সি.গুম্বা ইন্সতিত্যুসনশিংনা মতু মমান শোন্না লৈফম থোক্তে‍। লৈবাক্কী য়াইফনবগীদমক থবক তৌগে হায়রবদি মরাল লৈবগুম তুশোন মানশোন্না হিংবগী মথৌ তাদে মরূপশিং‍। ঐখোয় রাজনিতিগী পান্দম থম্লগা থবক তৌবগী মথৌ তাদে‍।

মীচম মীয়ামগী পুন্সিদা থেংনরিবা খুদোংচাদবশিং অদু কোকহনবনা ঐখোয়গী থবক্নি, হায়রিবা থবক অসি ঐখোয়না তৌগদবনি‍। মশাগী ওইজবা থিবা মীওইশিংনা চঙশিল্লিবা থবক থৌরমশিংদা অপনবা পীনবা অমদি হায়রিবা ইন্সতিত্যুসনশিং অসিগা মরী লৈনবা লনাই মীওইশিংগী মিংচৎ থিহন্নবা হোৎনরক্কনি‍। পুম্নমকশিং অসি থোরক্কনি, ঐদি মতম কুইনা হায়রিবা ফীভমসিদা লৈরক্লবনি‍। মতম কুইনা লৈঙাক্কী মকোক ওইনা ঐনা থবক তৌনবগী তাঞ্জা ফংলি‍। ঐনা মীচৈ কয়া তাখ্রে, ইরাল কয়া শীরকখ্রে, ঐগীদমক্তা করিসু হায়নিংঙাই লৈহৌদ্রে‍। অদুবু জন্তা জনার্ধন হায়বসি লাইগী মশক্নি, মখোয়না অচুম্বা খঙই অমদি চাংয়েং তৌই, অমদি মতম য়ৌরক্লবদা মখোয়না অচুম্বগীদমক্তা লেপ্লক্কনি‍। মসি ঐনা থেংনরকপশিংদগী হায়বনি মরূপশিং‍। পুকচেল শেংনা চৎপিয়ু, অদোমদা শিন্নরিবা থৌদাংশিং পুকচেল শেংনা পাঙথোকপিয়ু‍। অদোম য়েংবিয়ু, লাইসু অদোমগীদমক লেপ্লক্কনি, মীয়াম পুম্বনা অদোমগীদমক লেপ্লক্কনি, কনাগুম্বা খরদি লাউ খোংদুনা লৈহৌগনি, মরমদি মখোয়দি ওইজবা থিবা কাঙবুনি‍। মখোয়দি মখোঙ অদু অমোৎপদা পুত্থদুনা লৈরবা কাঙবুনি‍।

অদুনা মরম ওইরগা ঐনা হঞ্জিন-হঞ্জিন হায়রিবসিনি লৈবাক্কীদমক পুকচেল শেংনা থবক তৌবা মতমদা চয়েৎনবা তানফম লাকপা মতমদা করিগুম্বা ঐখোয়না পুকচেল শেংবগী লম্বীদা চৎলবদি, ফিদম্নিংঙাই ওইবা থমক তৌরবদি কিথি কিরুম হিংবগী মথৌ তাদে মরূপশিং‍।

ময়াম পুম্নমক্না খুদম্নি, অদোক্না খোঙফম চেৎনা থবক পায়খৎলকপা মতমদা খুন্নাইনা অদোমগা লোয়ননা লেপ্তুনা লৈবা তাঞ্জা কয়া লাক্লমগনি মরূপশিং‍। শেঞ্জা থুমজা লৈতবা লৈবাক অমদি শেঞ্জা থুমজা লৈতবা খুন্নাই ওইহন্নবগীদমক সি.ভি.সি.গুম্বা লূপশিং লেপ্পা লৈতনা মীকুপ নাহুম শিংনা লৈবা হায়বসিনা ৱাফম অমনি অদুবু মখোয়না ফীভম খুদিংমক্তা মীয়ামদা খঙহনবা মথৌ তাই, মরমদা মখোয় মথন্তনা করিবু তৌবা ঙমগনি, মীওই মঙা-তরুক কা অমদা ফমদুনা লৈরগা মরিবু তৌবা ঙমগদৌরিবনো‍। লৈরিবা সিস্তেম পুম্নমক্না মখোয়গা লোয়ননা চৎমিন্নদ্রিবমখৈ, ৱাখল্লোন অসিদা চঙশিমিন্নদ্রিবমখৈ সিস্তেম অসি হেক হেক কায়থরক্কনি‍।

মরূপশিং,

অদোমগী থৌদাং য়াম্না চাওই‍। অদোমগী শিংনবসু অহোংবা নাই‍। মরম অসিনা অদোমগী থবক থৌওং লেপ্পা লৈতনা মতিং লৈহনবা মথৌ তাই‍। অদোম্না অমৃৎকাল অসিদা অরোন অথুপ লৈতবা অমদি হিদান্নবা য়াবা ইকোসিস্তেম অমা শেম্বদা মরুওইবা শক্লোন লৌরকখিগনি হায়না ঐনা থাজৈ‍।

ঙসি মফমসিদা স্কুলগী মহৈরোয় খরা কৌদুনা থম্লম্বা য়াম্না নুংঙাইরে‍। পুম্নমক্না এসে কম্পিতিসন্দা শরুক য়ারি‍। স্পীচ কম্পিতিসন অমসু তুংদা হাপচিনবা য়াই খল্লি‍। অদুবু ৱাফম অমদা ঐগী পুক্নিং চিংশিনখি, অদোমগী পুক্নিংসু চিংশিনবিরমগনি‍। অদোমসু উবিরমগনি, ময়াম অমসু উবিরমগনি, ময়াম্না উরগা ৱাখলসু খনবিরমগনি‍। ঐনসু উই অদুগা খল্লি‍। নুপা চাদা ২০খক্তনা শেঞ্জা থুমজা থেংনবগী মনা লৌখি অদুগা চাদা ৮০না নুপীশিংনা মনা লৌখি‍। মঙাগী মনুংদা নুপীমচা মরি, হায়বদি ২০গা ৮০গা কমদৌনা ওইরবনো, মরমদি খুন্নাইগী চুপ্লি মখোয়না পায়রক্কদৌরিবনি‍। নুপীমচাশিংগী পুক্নিং ৱাখলদা ফাওরিবা অফবা তুংলমচৎ অমগী মঙলান অদু নুপামচাশিংগী মরক্তসু ফাওহন্দুনা শেঞ্জা থুমজাগী মায়োক্না থেংননবা ইহুল পোকহনবা মথৌ তাই‍।

অদুবু অদোম্না পায়খৎলিবা প্রিভেন্তিব কেম্পেন অসি অঙাংশিংগী পুক্নিংদা শেঞ্জা থুমজা য়ানিংদবগী ইহুল অমা ফাওহনখিবসিগী মীৎয়েঙদা অফবা খোঙথাঙ অমনি‍। অমোৎ অকায় হৈনদবগী ইথিল পোকত্রিবমখৈ তরু তনানবগী মরুওইবা খঙলোই‍। শেঞ্জা থুমজাবু তরাইনসু লৌগুমসি, মসিনা সিস্তেম পুম্ববু থুগাইবা ঙম্লিবনি‍। ঐ খঙই হীরম অসিদা অদোম হঞ্জিন হঞ্জিন তাবা মথৌ তাগনি, হঞ্জিন হঞ্জিন ঙাঙবা মথৌ তাগনি, হন্না-হন্না মীকুপ নাহুম শিংনা লৈবা মথৌ তাগনি‍।

কনাগুম্বা মীওই খরদি লৈরিবা কাঙলোন কয়াসিগী ৱাংমদা লৈদুনা মখোয়না তৌনিংবা পুম্নমক তৌবা য়াগদগে হায়বসিদা মপাঙ্গল ফুদোক্তুনা, ৱাখল লৌশিং থাদদুনা লৈ অমদি অতোপ্পদসু পাউতাক পীরি‍। ঙসি নৎত্রবসসু হয়েং ওইরবসু নোংমদি ৱায়েৎ থোরক্কনি, মতমদুদা নান্থোক্তুনা চেনবা ৱাগনি‍। তেক্নোলোজীনা খুদম চাংদম খরদি অদুমক থম্লম্মী‍। তেক্নোলোজীগী মতিং হেক ঙম্লিবমখৈ য়াম্না শীজিন্নরিবমখৈ ঐখোয়না ফীভম অসিদা অওনবা পুরকপা ঙমগনি অমদি হোংদোকপসু ঙমগনি‍। ঐখোয় হোৎনসি‍।

ঐনা ময়াম পুম্নমক্কী মফমদা য়াইফ-পাউজেল পীজরি‍।

ইচিল ইনাও ময়াম থাগৎচরি !

*****