ভারতকী প্রধানমন্ত্রী

ইকাইখুম্নজরবা রাস্ত্রপতি শ্রী রাম নাথ কোবিন্দ অমদি অতোপ্পা মীথুংলেনশিং, ঐহাক্না অহানবদা আশার পুর্নিমাগী য়াইফ-পাউজেল পীজরি। মসি গুরু পুর্নিমা হায়নসু খঙনৈ। ঐখোয়বু লৌশিং পীরিবা গুরুশিংবু নীংশিংবা নুমিৎ অমনি। মসিগী ৱাখল্লোন্দা ঐখোয়না ভগবান বুদ্ধাদা ইকাই খুম্নবা উৎলি।

মোঙ্গোলিয়ন কঞ্জুরগী কোপীশিং মোঙ্গোলিয়াগী সরকারদা খুদোল তমখিবা অসিদা ঐহাক্না হরাওবা পোকই। মোঙ্গোলিয়ন কঞ্জুর অসি মোঙ্গংলিয়াদা পাকশন্না ইকাইখুমনৈ। অয়াম্বা মোনাস্ত্রীশিংনা মসিগী কোপী অমা লৈগনি।

মরূপশিং, ভগবান বুদ্ধাগী পন্দুম নিপালগী লম্বেল অসিনা খুন্নাই অমসুং লৈবাক কয়াগী য়াইফনবা লম্বেলদা পুরি। মসিনা মীনুংশিং অমসুং থৌজাল হৈবনা পীবা কান্নবা অদু উৎলি। ভগবান বুদ্ধানা ৱাখলদা অমদি থবক্তা চমনা হিংনবা তাকপী-তম্বীরম্মি।  বুদ্ধিজমনা ইকাইখুমনবা তম্মু তাক্লম্মি। মীবু ইকাই খুম্নবা। লাইরববু ইকাই খুম্নবা। নুপীবু ইকাই খুম্নবা। শান্তি অমসুং অহিংশাবু ইকাই খুম্নবা। মরম অসিনা বুদ্ধিজমনা তাকপী-তম্বীরম্বা অসিনা গ্রহ অসিবু য়োকখৎনবা পাম্বৈ অমা ওইগনি।

মরূপশিং, সার্নাথতা মহাক্কী অহানবা ধর্ম্মগী পাউতাক পীবদা, অমসুং মসিগী মতুংদা মহাক্না তাকপী-তম্বীরম্বদা, ভগবান বুদ্ধানা হীরম অনিগী মরমদা ঙাংখি – আশা তৌবা অমসুং থবক পাংথোকপা। মহাক্না আনিসিগী মরক্তা অনকপা মরী অমা লৈ হায়বা খঙখি। আশা তৌবনা থবক পাঙথোক্নিংবগী ইথিল ফাওহল্লি। ভগবান বুদ্ধাগী ওইনদি মীওইবগী অৱাবা অসি কোকহনবনি। ঐখোয়না অৱাবা কয়া হেন্না ফবা মওংদা মায়োক য়াবনা মীয়ামদা আশা তৌবা হেনগৎহনগনি।

মরূপশিং, ঐহাক্না ২১শুবা সতাপতি অসিদা আশা কয়া তৌরি। মসিগী আশা অসি ঐহাক্কী অপিকপা মরূপশিং- ঐখোয়গী নহাশিংনা পীবনি। আদোমনা করিগুম্বা আশা, অনৌবা পুথোকপা অমসুং মীনুংশিনা করম্না অৱাবা কোকহনগদগে হায়বগী খুদম উনীংলবদি, মদু ঐখোয়গী স্তার্ত-অপ সেক্তরদা উবা ফংগনি। মঙাল লৈরবা নহা কয়াগী ৱাখলশিংনা মালেমগী অৱাবা কয়া কোকহল্লি। ভারত অসি স্তার্ত-অপ খ্বাইদগী য়াম্না লৈবা অমা ওইরি।

ভগবান বুদ্ধাগী ৱাখল্লোন অসিগা লোয়ননা হিংনবা ঐহাক্না ঐগী নহা ওইরিবা মরূপশিংদা হায়জরি। মখোয়না ইথিল পোকহন্দুনা লমজিংগনি। মতম অমদা অদোমবু মখোয়না থেমজিনগনি নত্রগা থৌনা হাপ্পিগনি। তশেংবমক, ভগবান বুদ্ধানা তাকপীরম্বা – আপ;দীপো ভব:, নশাগী লমজিং মৈরা ওইয়ু হায়বা অসি য়াম্না ফবা পরা অমনি।

মরূপশিং, ঙসি মালেম অসিনা খুদোংচাদবা কয়া মায়োক্নরি। মসিগী খুদোংচাদবশিং অসি লোইশিন্নবা পাম্বৈ ভগবান বুদ্ধাগী ৱাখল্লোনশিংদগী ফংগনি। মসি হৌখিবা মতমগা মরী লৈনৈ। মসি হৌজিক মতম অসিগসু মরী লৈনৈ। অমসুং তুংলমচৎকসু মরী লৈনগনি।

মরূপশিং, বুদ্ধিস্তকী ওইবা য়েলহৌঙৈ মতমদগী লৈরক্লবা মফমশিংদা মীয়াম চত্তুনা খঙমিন্নবা হৌজিক য়াম্না মথৌ তারে। ভারত অসিসু অসিগুম্বা মফম কয়া অমা লৈ। লৈবাক অসিগী মীয়াম্নসু ঐহাক্কী কেন্দ্র ওইরিবা বরনাসি অসি সার্নাথকী য়ুমনি হায়বা খঙলমগনি? বুদ্ধিস্তকী মফমশিং অসিদা মীৎয়েং থম্বা মথৌ তাই। নুমিৎ খরগী মমাংদা ভারতকী কেবিনেৎনা কুশিগর এয়রপোর্ত অসি ইন্তর্নেস্নেল ওইগনি লাউথোকখি। মসিনা মীওই, তীর্থ চৎপা মী অমসুং লম কোইবা কয়া লাকহনবা য়ারগনি। মসিনা মীওই কয়াগী শেন্মীৎলোন লৈনবা খুদোংচাবশিং ফংহল্লগনি।

অদোমবু ভারতনা ঙাইরি!

মরূপশিং, অমুক্কা হন্না ঐহাক্না ময়ামদা য়াইফ-পাউজেল পীজরি। ভগবান বুদ্ধাগী ৱাখল্লোন্না আশা লৈবা নুংশি চান্নবা অমদি অপুনবা পুরকপা ওইরসনু। মহাক্কী থৌজালনা ঐখোয় পুম্নমক অফবা ওইমিন্নরসি।

থাগৎচরি। হন্না হন্না থাগৎচরি।

*****