ভারতকী প্রধানমন্ত্রী
আর্ত ওফ লিভিং ফাউন্দেসন্না শিন্দুনা পাংথোকপা ‘কেম্পেন ফোর দ্রগস ফ্রী ইন্দিয়া’দা প্রধান মন্ত্রী শ্রী নরেন্দ্র মোদীনা ভীদিও পাওজেলগী থোংদা ৱা ঙাংখ্রে। পাওজেল অদু ঙসি হিসারগী গুরু জম্বেশ্বর য়ুনিবর্সিতীদা পাংথোকপা থৌরম অমদা শন্দোকখি।
লৈবাক অসিদা দ্রগনা কিহনলক্লিবা অসি থেংনবগী মায়কৈদা শ্রী শ্রী রবি শঙ্করনা হোৎনরিবশিং অমসুং আর্ত ওফ লিভিং ফাউন্দেসনগী থৌদাং অদু প্রধান মন্ত্রীনা মহাক্কী ৱারোলদা থাগৎপা ফোংদোকখি।
দ্রগ অসি সমাজ অসিদা চাউনা কিহল্লক্লিবা অমনি হায়না ফোংদোক্লদুনা প্রধান মন্ত্রীনা হায়খি মদুদি ৱার্ল্দ হেল্থ ওর্গনাইজেসন্না চাউরাক্না পাবগী মতুং ইন্না মালেম অকোয়বদা মীওই কোতি অহুম হেন্না দ্রগতা লাইচুরদুনা নারি।
প্রধান মন্ত্রীনা হায়খি মদুদি নহা কয়ানা পোৎকী মগুন অদু শেরান্ননা শিজিন্নদুনা লাইচুবা অদু উবদা অকিবা ফাওই। প্রধান মন্ত্রীনা হায়খি, “দ্রগশিং অসি অফবা নত্তে। দ্রগশিংবু ফজনবগী মওংদা লৌরিবা অসি অচৌবা অরানবা ৱাখল্লোন অমনি।”
শ্রী নরেন্দ্র মোদীনা হায়খি মদুদি হকশেলগী প্রোব্লেমশিংগী মথক্তা পোৎকী মগুন শেরান্ননা শিজিন্নবনা মরম ওইদুনা ইমুং মনুংবু মাংহন তাকহল্লিবা নার্কোতিক্স ত্রেদ অসি লৈবাক অসিগী সেফতী অমসুং সেক্যুরিতীদা অচৌবা অকিবা অমা ওইরি। নার্কোতিক্স ত্রেদ অসি তেরোরিস্তশিং অমসুং এন্তি–নেস্নেল এলিমেন্তশিংগীদমক খ্বাইদগী চাউবা শেন্থোক লাকফম অমা ওইরি।
হকচাংফবা পুন্সি অমগীদমক, নুংঙাই য়াইফবা ইমুং অমগীদমক, জাতি অসিগী হেন্না ফবা তুংগী অমদি সেফতী অমসুং সেক্যুরিতীগীদমক ‘নো তু দ্রগস’ হায়নবা প্রধান মন্ত্রীনা নহাশিংদা তকশিনখি। মহাক্না হায়খি মদুদি মশানা মশাবু থাজবা থম্বা মখোয়শিং অদু দ্রগক্কী খয়াত্তা তাদে। ৱারী ৱাতাই শান্নবা, কাউন্সেলিং অমসুং মখা তানা নুংশিবীবা অমসুং তেংবাংবীবগী খুত্থাংদা লায়চুরবশিংবু রিহেবিলিতেসনগী লম্বীদা পুরকপা ঙম্মি হায়না প্রধান মন্ত্রীনা মখা তাখি।
দ্রগ এদিক্সন্না কিহনলক্লিবা অসি লাকশিন্নবা কেন্দ্র সরকারনা পায়খৎলিবা তোঙান তোঙানবা ইনিসিয়েতিবশিং অদু প্রধান মন্ত্রীনা শমলপ্না পাওদমখি। মসিগা মরী লৈননা মহাক্না ২০১৮দা হৌদোকখিবা দ্রগ দিমান্দ রিদক্সনগী নেস্নেল এক্সন প্লানগী মতাংদা মহাক্না পাওদমখি।
লৈবাক্কী মফম কয়াদা কোলেজশিংগী মহৈরোইশিংনা ভীদিও কনফরেন্সকী থোংদা প্রধান মন্ত্রীগী ৱারোল অদু তাখি।
