ভারতকী প্রধানমন্ত্রী

কর্নাতকাগী মুখ্য মন্ত্রী শ্রী বসাবরাজ বোম্মৈজী, কেন্দ্রদা মন্ত্রী ওইমিন্নরিবা ঐগী মরুপ প্রলহাদ জোশীজী, পার্লিয়ামেন্তদা ঐখোয়গী সিনিয়র ওইবা মরুপ দা. বিরেন্দ্র হেগরেজী, হিস হোলিনেস স্বামী নির্মলানন্দ-নাথ স্বামীজী, হিস হোলিনেস শ্রী শ্রী শিবরাত্রি দেশীকেন্দ্র স্বামীজী, শ্রী শ্রী বিশ্বপ্রসন্ন তীর্থ স্বামীজী, শ্রী শ্রী নঞ্জাধুতা স্বামীজী, শ্রী শ্রী শিবমুর্তি শিবাচার্য় স্বামীজী, কেন্দ্রগী মন্ত্রী-মন্দল, পার্লিয়ামেন্তগী মেম্বর ঐহাক্কী মরুপ ইনাও রবিজী, দিল্লী-কর্নাতকা সংঘগী মেম্বরশিং, নুপী অমদি নুপাশিং,

অহানবদা ঐহাক্না পুম্নমকপু  তরাম্না ওকচরি। ঙসি দিল্লী-কর্নাতকা সংঘ ইল্লাদরু ইরু, এন্তাদরু ইরু, ইন্দেন্দিগু নী কন্নদাবাগীরু’না মসিগী ফজরবা লেগেসী অসি মাংদা পুরি। ‘দিল্লী কর্নাতকা সংঘ’গী চহি ৭৫শুবগী পালন তৌরম অসি লৈবাক্না নীংখা তম্বগী চহি ৭৫ শুবরকপা মতমদা পাঙথোক্লি। ঐখোয়না চহি ৭৫গী মমাংগী ফীভমশিং য়েংলুবা মতমদা ঐখোয়না খোঙথাংশিং অসিদা ভারতকী মুৎনাইদ্রবা থৱায় অদু উবা ফংই। দিল্লী-কর্নাতকা সংঘ শেম্বা অসিনা নীংতম্বগী অহানবা তাঙ্কক্তা লৈরম্বা মীওইশিং অদু লৈবাক্কী মপাঙ্গল কনখৎহন্নবা মিসন্দা করম্না পুনশিনখিবগে উৎলি। নীংতম্বগী অমৃত কালগী অহানবা তাঙ্কক্তা ফাওবা উবা ফংখিবা লৈবাক্কী শক্তি অমদি কত্থোকপা অদু ঙসিসু হিংদুনা লৈবা অসু উবা ফংবদা ঐহাক্না নুংঙাইবা পোকই। থৌরম অসিদা ঐহাক্না সংঘ অসিগী মঙলান শাগৎচরম্বা অথোইবা মীশকশিংদা ইকাই খুম্নবা উৎচরি। অমসুং চহি ৭৫গী খোঙচৎ অসি অরাইবা নত্তে। অৱা-নুংঙাই কয়া মায়োক্নখি, মীওই কয়াগা চৎমিন্নখি। সংঘ অসি চল্লাই খিবা মীওইশিংনা মসিবু চহি ৭৫ মাংদা পুখৎখি অমসুং চাউখৎহনখি, মখোয় পুম্নমকপু থাগৎফম থোকই। ঐহাক্না কর্নাতকাগী মীয়াম্না জাতি শেমগৎপদা লৌখিবা থৌদাংশিংগীদমক ইকাই খুম্নবা উৎচরি।

মরুপশিং,

ভারতকী শক্তম, ভারতকী চৎনবী, নত্ত্রগা ভারতকী ইথিল ওইরবসু ঐখোয়না কর্নাতকা য়াওদনা ভারতপু মশক তাকপা ঙম্লোই। মিথোলোজীগী মতমদগী হৌদুনা হনুমান্না ভারত্তা কর্নাতকাগী থৌদাং লৌদুনা লাকখি। হনুমান য়াওনা রাম নত্ত্রগা রামায়ন লৈরমলোই। করিগুম্বা মিসন অমা হেক্তগী য়ুগ অসি হোংবা তরাবদি আয়োধ্যদগী রামেশ্বরম ফাওবা য়ৌগনি, মসিনা কর্নাতকাদা খক্তা শক্তি পীগনি।

ইচিল-ইনাওশিং,

মিদিবেলগী মতমদা ইনভেদরশিংনা ভারতপু থুগাইনবা হোৎনখি অমসুং সোমনাথকুম্বা শিবলিংশিং থুগাইখি, কর্নাতকাগী দেবরা দাসিময়্যা, মাদারা চেন্নয়্যা, দোহর কক্কয়্যা, অমসুং ভগৱান বসবৈশ্বরাগুম্বা লম্বোইশিংনা মীয়ামবু ইস্তালিঙ্গাগা শম্নহন্নবা হোৎনখি। মপানগী শক্তিনা লৈবাক অসিদা লান্দারকপা মতমদা মখোয়গী মমাংদা চেকপলগুম্না রানী অবক্কা, ওনাকে ওবাব্বা, রানী চেনম্মা অমসুং ক্রান্তিবীরা সঙ্গোল্লী রায়ন্নাগুম্বা থৌনা ফবা-ফবীশিংনা লেপখি। নীংতম্বা ফংলবা মতুং ফাওবা ‘কাশী হিন্দু য়ুনিভর্সিতী’গী অহানবা ভাইস-চাঞ্চেলর, মহারাজা কৃষ্ণরাজা এদিয়রদগী ফিল্দ মার্শেল কে.এম. কারিয়প্পা অমসুং ভারত রত্ন এম বিশ্বেশ্বরেয়ানা কর্নাতকাপু ইথিল পীখি অমসুং ভারতকী মীৎয়েং চীংশিনখি। অমসুং হৌজিক ঐখোয়না পুজ্য স্বামিজীদগী কাশীগী এক্সপরিয়েন্সশিংগী মতাংদা তারি।

মরুপশিং,

কন্নরাগী মীয়াম্না মতম চুপ্পদা ‘এক ভারত শ্রেস্থ ভারত’কী মন্ত্রগা লোয়ননা হিংদুনা লাকখি। মখোয়না কর্নাতকাগী লম অসিমক্তগী ইথিল ফংখি। হৌজিক ঐখোয় পুম্নমক্না রাস্ত্রিয়া কবি কুবেম্পু নাদা গীতেগী শৈরেং তাবা ফংখ্রে অমসুং পুজ্য স্বামীজীনা মসিগী মরমদসু তাকপীখ্রে। কয়াদা ফজরিবা ৱাহৈশিংনো – জয় ভারত জননিয়া তনু জাতে, জয় ও মা কর্নাতকা। মহাক্না কয়াদা নীংথীজনা ইমা কর্নাতকাপু থাগৎলি। ইশৈ অসিনা ভারত শিনবা থুংবদা লৈরিবা সভ্যতাগী মরমদা শন্দোক্না তাক্লি। অমসুং মসিদা কর্নাতকাগী মরু ওইবা অমসুং থৌদাংগী মরমদা পল্লি। ঈশৈ অসিগী ৱাখল্লোন অদু খঙবা মতমদা ঐখোয়না ‘এক ভারত শ্রেস্থ ভারত’কী ৱাখল্লোনসু খঙই।

মরুপশিং,

ঙসি ভারতনা জি-২০গুম্বা অচৌবা মালেমগী গ্রুপকী প্রসিদেন্সী পাইবা মতমদা দেমোক্রেসীগী মমা ওইনা ঐখোয়গী ৱাখল্লোনশিং অসিনা ঐখোয়বু লমজিংলি। ভগৱাব বসবেশ্বরাগী ৱাহৈশিংনা ‘অনুভব মন্তপা’গী খুত্থাংদা, মহাক্কী দেমোক্রেতিন তীচিংশিংনা ভারতকী লমজিং মৈরা ওইরি। ঐহাক্না লন্দনদা ভগৱান বসবেশ্বরাগী মীতম শঙ্গাবা, ঐখোয়গী চাউথোকচবা হেনগৎহনবগী খুদোংচাবা ফংজবা ঐহাক্কী লাইবক ফবনি। অমসুং ঐহাক্না তোঙান-তোঙানবা লোলশিংদা মহাক্কী ৱাহৈশিং অসি ফোঙবগী খুদোংচাবা ফংখি। মাইপাকপশিং অসিনা কর্নাতকাগী চৎনবী অসি অমর ওই, মাগী ইথিল অসি অমর ওই হায়না তাক্লি।

মরুপশিং,

কর্নাতকা অসি ত্রেদিসন লোয়ননা তেক্নোলোজীগী লমদমনি। মফম অসিদা পুৱারী ওইরবা নাৎ লোয়ননা মতমগা চুনবা আর্তিফিসিএল ইন্তেলিজেন্স লৈ। ঙসি অয়ুক ঐহাক্না জর্মন চাঞ্চেলরগা উনখি অমসুং ঙরাংদগী বেঙ্গলুরুদা থৌরম অসি পাঙথোকপদা ঐহাক্না নুংঙাইবা পোকই। ঙসি বেঙ্গলুরুদা জি২০ গ্রুপকী অচৌবা মীফম অমসু পাঙথোক্লি।

মরুপশিং,

ঐহাক্না লৈবাক অমা হেক্তগী মকোক্কা উনবা মতমদা ঐহাক্না অরিবা অমদি অনৌবা ভারতকী শক্তম অনিমক উহন্নবা হোৎনৈ। ত্রেদিসন অমসুং তেক্নোলোজী অনিমক অসি ঙসিগী অনৌবা ভারতকী তেম্পরামেন্তনি। ঙসি লৈবাক অসিনা চাউখৎ-থৌরাং অমদি হেরিতেজ, খুমাং চাউশিনবা অমসুং চৎনবী পুন্না মাংদা চংশিল্লি। ঙসি নাকল অমরোমদা ভারতনা মাগী অরিবা মন্দিরশিং অমসুং কলচরেল সেন্তরশিং হীংগৎহল্লি অমসুং মসিগা ইরোইননা ঐখোয়না দিজিতেল পেমেন্তশিংদা মালেমগী লমজিংবা অমা ওইরক্লি। ঙসিগী ভারতনা ঐখোয়গী চহিচা কয়াগী অরিবা হুরানখ্রবা মীতম অমসুং আর্তিফেক্তশিং মপালদগী অমুক হন্না পুরক্নবা হোৎনরি। অমসুং ঙসিগী ভারতনা মপালদগী ফোরেন দাইরেক্ত ইনভেস্তমেন্তগী রিকোর্দ থম্লি। মসি অনৌবা ভারতকী চাউখৎপগী লম্বীনি হায়রিবা অসিনা চাউখৎপা ভারতকী পান্দম তম্না ঐখোয়বু লমজিংগনি।

মরুপশিং,

ঙসি কর্নাতকাগী চাউখৎ-থৌরাং অসি লৈবাক্কীদমক অমসুং কর্নাতকা সরকারগীদমক খ্বাইদগী মরু ওই। মমাংদা মীওই খরনা সরকার শেম্লবা মতুংদা কর্নাতকাদগী শেল লৌথোকপা মতম অমা লৈরমখি। অদুবু ঙসি লৈবাক্কী শেল, লৈবাক্কী রিসোর্সশিং অসি কর্নাতকাগী চাউখৎ-থৌরাংগীদমক থমোয় শেংনা কত্থোক্লি। য়েংঙু, ২০০৯ অমসুং ২০১৪গী মনুংদা চহি খুদিংগী কেন্দ্রদগী কর্নাতকাগীদমক চহি খুদিংগী করোর লিশিং ১১ পীরমখি। অমরোমদা ঐখোয়গী সরকারনা ২০১৯ অমসুং ২০২৩গী মরক্তা হৌজিক ফাওবদা কেন্দ্রদগী লুপা করোর লিশিং ৩০ পীখি। ২০০৯ অমসুং ২০১৪গী মরক্তা কর্নাতকাদা রেলৱে প্রোজেক্ততা লুপা করোর ৪,০০০ চাদিং তৌখি অমসুং রেলৱে মন্ত্রী অমদি কর্নাতকাদগী ওইখি। চহি মঙাদা লুপা করোর লিশিং ৪দগী তাই হায়বনি। অমরোমদা ঐখোয়গী সরকারনা বজেৎ অসিদা কর্নাতকাগী রেল ইনফ্রাস্ত্রকচরগীদমক লুপা করোর লিশিং ৭ পীখি। নেস্নেল হায়ৱেগীদমক মমাং সরকারগী চহি মঙাগী মনুংদা কর্নাতকাদা পুন্না করোর ৬০০০ পীখি। অদুবু হৌখিবা চহি ৯ অসিদা ঐখোয়গী সরকারনা চহি খুদিংগী কর্নাতকাদা করোর লিশিং ৫ ইনভেস্ত তৌখি। চহি ৫দা করোর লিশিং ৬ পীরম্বা অদু চহি খুদিংগী করোর লিশিং ৫  পীরি।

মরুপশিং,

ঐখোয়গী সরকারনা অপ্পর ভাদ্রা প্রোজেক্তকী মতম শাংনা পীদবা দিমান্দ অদু থুংহনখি। তুমকুরু, চিকমেঙ্গলুর, চিত্রাদুর্গ অমসুং দেবাঙ্গিরি য়াওনা সেন্ত্রেল কর্নাতকাগী ইকং থোক্কনবা মফমশিংদা চাউনবা কান্নবা পীরি, ঐগী লৌমীশিংদসু কান্নরগনি। মসিগী চাউখৎপগী অনৌবা খোঙজেল অসিনা কর্নাতকাগী শক্তমদা অহোংবা লাকহল্লি। দিল্লীদা লৈরিবা কয়ানা মখোয়গী খুঙ্গংশিংদা মতম শাংনা লাকখিদে, মফম অসিদা লাকপা মতমদা নখোয়না শোইদনা ঙক্কনি লোয়ননা চাউথোকচবা পোক্কনি।

মরুপশিং,

দিল্লী কর্নাতকা সংঘগী চহি ৭৫শুবা অসিনা ঐখোয়দা শাহৌ, মাইপাকপা অমসুং লৌশিংগী ইচেলগী মরু ওইবা মীকুপ কয়া পুরকখি। হৌজিক মথংগী চই ১৫ অসিনা হেন্না মরু ওই। অমৃত কাল অমসুং দিল্লী কর্নাতকা সংঘগী মথং চহি ২৫দা নখোয়না মরু ওইবা থবক কয়া তৌগদবনি। নখোয়না মীৎয়েং চংগদবা হীরম অনি অদুদি –কালিকে মত্তু কালেনি। হায়বদি লৌশিং অমসুং কালা হায়বনি। ঐখোয়না কালিকেগী মরমদা হায়রবদি ঐখোয়গী কন্নরা লোল, মাগী সহিত্যা অসি কয়াম ফজবগে ঐখোয়না খঙবা ঙমগনি। মসিগা ইরোইননা কন্নরা লোলগী অখন্নবা অমা লৈ। মসি স্পীকরশিংগী মরক্তা পাবগী হৈনবী য়াম্না শক্তি লৈবা লোলনি। কন্নরা লোলগী রীদর মশিং অসি য়াম্না ৱাংই। ঙসি কন্নরাদা অনৌবা অফবা লাইরিক অমা থোরকপা মতমদা পব্লিশরশিংনা চয়োল খরগী মনুংদা নৌনা প্রিন্ত তৌখি। অতোপ্পা লোলশিং কর্নাতকাগী অসিগুম্না লাইবক ফরোই।

দিল্লীদা লৈবশিংনা মখোয়গী মশাগী রাজ্যগী মপান্দা লৈবা অনৌবা মীরোলশিংগীদমক লোল অসি লুবা কয়াম হেনগৎলকপগে খঙলমগনি। মরম অসিনা জাগদগুরু বসবেশ্বরাগী ৱাহৈশিং নত্ত্রগা হরি দাসকী ঈশৈশিং ওইবদু কুমার ব্যাসনা উবা মহাভারতকী ভর্জন নত্ত্রগা কুবেম্পুনা ইবা রামায়ন দরশনম ওইরবদসু চাউখ্রবা হেরিতেজ অসি হৌরক্লিবা মীরোলদা শিন্নবা মরু ওই। নখোয়না লাইব্রেরী অমসু থম্মি হায়না তাই। স্তদী সর্কল সেসনশিং, সহিত্যাগা মরী লৈনবা খন্ন-নৈনবশিংগুম্বা প্রোগ্রাম কয়া পাঙথোকই হায়না তাই। মসিগী মতেংনা দিল্লীগী কন্নরাশিংগী অঙাংশিংদা কন্নরা পাবগী হৈনবী থমগনি।

মরুপশিং,

কালিকেগা লোয়ননা কর্নাতকানা কালাগী লমদা থোইদোক হেন্দোকপা কয়া ফংবা ঙমখি। অতেনবা মতমগী মনুংদা প্রোগ্রাম অসিদা ঐহাক্না অপুনবা কর্নাতকাগী নাৎকী ওইবা ফজবা উবা ফংই। কর্নাতকা অসি ক্লাসিকেল আর্ত অমসুং জানাপাদা আর্ত অনিমক হৈ। কনসালেদগী ঈশৈগী কর্নাতিক স্তাইল, ভারতনাত্যমদগী য়ক্ষগানা ফাওবা কর্নাতিক আর্তকী মওং খুদিংমক মগুন লৈ। দিল্লী কর্নাতকা সংঘনা চহি কয়া অসিদা অসিগুম্বা প্রোগ্রাম কয়া পাঙথোকখি। অদুবু হৌজিক্তি খোঙথাংশিং অসি নেক্স লেবেলদা হেনগৎহনবা মথৌ তারে। ঐহাক্না তুংদা অসিগুম্বা প্রোগ্রাম পাঙথোকপদা দিল্লী কন্নরাগী ইমুং খুদিংমক্না নন-কন্নরা ইমুংশিংসু পুরক্নবা হায়জরি। অসুম তৌবনা মখোয়না কন্নরাগী ফজরবা অসি উহনবা ঙমগনি। মসিনা কর্নাতকাগী মরমদা মীয়াম্না খঙনীংবসু হেনগৎহনগনি। নখোয়দা ঐহাক্না ৱাফম অমা হায়জনীংই। কর্নাতকাগী আর্তিস্তশিং, লৌশিং লৈবা মীওইশিংনা মফম অসিদা লাকপদা নখোয়না নেস্নেল ৱার মেমোরিএল, পি.এম. ম্যুজিয়ম অমসুং দিল্লীগী কর্ত্য পথতা চৎনবা হায়জরি।

মরুপশিং,

হৌজিক মালেম্না ভারতকী থৌশিলদগী ‘ইন্তর্নেস্নেল ইয়র ওফ মিল্লেৎস’ পাঙথোক্লি। কর্নাতকা অসি ভারতকী মিল্লেৎ হায়বদি শ্রী ধন্যাগী মপুং ওইবা সেন্তর অমা ওইরি। নখোয়গী শ্রী অন্ন-রাগী অসি কর্নাতকাগী নাৎকী মরু ওইবা শরুকসু ওইরি অমসুং খুন্নাই অসিবু মশক তাকই। ঐখোয়গী য়েদ্দ্যুরাপ্পাজীগী মতমদগী কর্নাতকাদা ‘শ্রী ধন্যা’ চাউখৎহন্নবা প্রোগ্রামশিং হৌখি। ঙসি লৈবাক পুম্বনা কন্নরাশিংগী লম্বী তুংইন্দুনা চৎলি, অমসুং কোর্স সিরিএলশিং অসি শ্রী অন্ন কৌরি। ঙসি মালেম পুম্বনা শ্রী অন্নগী কান্নবশিং খঙই। মসিনা কর্নাতকাগী মীয়াম অমসুং কর্নাতকাগী অপীকপা লৌমীশিংদা চাউনা কান্নবা পীরগনি।

মরুপশিং,

২০৪৭তা ভারতনা মাগী নীংতম্বগী চহি ১০০ মপুং ফারকপদা চাউখৎপা লৈবাক অমা ওইনা দিল্লী-কর্নাতকা সংঘ অসিসু মাগী চহি ১০০ মপুং ফাগনি। ভারতকী অমর ওইনবা হোৎনবগী মতিক ময়াইদা নখোয়না শরুক তম্লিবা অদুসু খন্নগনি। ঐহাক্না অচৌবা থৌরম অমদি চহি ৭৫গী খোঙচৎ অসিগীদমক পুম্নমক্তা য়াইফ মঙ্গোল পীজরি, ইকাই খুম্নরবা লম্বোইশিংদা ঐহাক্না থমোয় শেংনা তৌবীমল খঙবা উৎচরি। ইকাই খুম্নরবা লম্বোইবশিংগী থৌজালশিং ফংবা অসি ঐহাক্কী লাইবক ফবনি অমসুং ঐহাক্না চাউথোকচবা পোকই। ঐহাক্না থমোয় শেংনা পুম্নমকপু অমুক হন্না থাগৎপা ফোঙদোকচরি। ঐহাক্কা লোয়ননা হায়বীয়ু ভারত মাতা কী – জয়, ভারত মাতা কী – জয়, ভারত মাতা কী – জয়!

***