ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা থাইলেন্দদা পাঙথোকপা SAMVAD থৌরমদা ঙসি ভিদিও কন্ফরেন্সিংগী খুত্থাঙদা ৱা ঙাংখ্রে‍। তিল্লিবা মীয়ামদা ৱা ঙাংলদুনা, মহাক্না থাইলেন্দদা পাঙথোক্লিবা SAMVAD থৌরমদা শরুক য়াবা ফংবা মহাক্কীদমক লাইবক ফবনি হায়রদুনা, থৌরম অসিবু মায় পাক্না পাঙথোকপগীদমক ইন্দিয়া, জাপান, অমসুং থাইলেন্দকী মমিং লৈরবা ইন্সতিত্যুসনশিং অমসুং লনাই মীওইশিংবু থাগৎখি‍। মহাক্না শরুক য়ারিবা পুম্নমক্কী মফমদা য়াইফ-পাউজেল পীখি‍।

প্রধান মন্ত্রীনা তায়্জা অদু লৌদুনা মহাক্কী মরূপ মিস্তর সিঞ্জো অবেবু নীংশিংলদুনা, SAMVAD কী ৱাখল্লোন অসি মখোয়না ২০১৫ দা ৱারী শানখিবদুদগী লাকখিবনি হায়খি‍। মদুদগী হৌরগা, SAMVAD না তোঙান তোঙানবা লৈবাকশিং কোয়না চত্তুনা দিবেত, দাইলোগ, অমসুং হেন্না চেৎশিন্না ৱাখল তামিন্নবা পুরকপদা থৌদাং য়ারি হায়খি‍।

SAMVAD হন্দক্কী ইদিসন অসি, নাৎ, পুৱারী অমদি পারী পুরীগী লন্দা ইনাক খুল্লবা মফম অমা ওইরিবা থাইলেন্দদা পাঙথোকপদা নুংঙাইবা ফোঙদোক্লদুনা, শ্রী মোদীনা থাইলেন্দনা এসিয়াগী মান্নবা ৱাংউলোন অমসুং লাইনিংগী চৎনবীগী ফজরবা খুদম অমা ওইনা লেপ্লি হায়খি‍।

চহি লিশিং অনি হেল্লবা ভারত অমসুং থাইলেন্দকী মরক্তা লৈরিবা অচেৎপা নাৎকী মরীগী মতাঙদা ৱা ঙাংলদুনা, প্রধান মন্ত্রীনা রামায়ন অমসুং রামাকিএন্না লৈবাক অনিবু শম্নহল্লি অদুগা অনিসিনা ভগবান বুদ্ধবু নীংজবনা মখোয়বু পুনশিন্নহল্লি হায়খি‍। ভারতনা থাইলেন্দদা মমাঙ চহিদা ভগবান বুদ্ধকী শেংলবা অরিবা পোৎলমশিং থাখিবদা, মহাকপু নীংজবা মীওই মিলিয়ন কয়ানা ইকায়খুম্নবা উৎখি হায়বা ৱাফম মহাক্না থমখি‍। ভারতকী ‘এক্ত ইস্ত’ পোলিসী অমসুং থাইলেন্দগী ‘এক্ত ৱেস্ত’ পোলিসীনা অমগা অমগগী অৱাৎপা মেনখৎনুনা, নাকল অনিমক্তা খোঙজেল অমদি নুংঙাই য়াইফবা প্রমোত তৌরি হায়রদুনা শ্রী মোদীনা ভারত অমসুং থাইলেন্দগী মরক্তা তোঙান তোঙানবা সেক্তরশিংদা লৈরিবা মশক মচু থোক্লবা খোঙবু ওসবগী মরীদা মরুওইবা ৱাফমশিং ফোঙদোকখি‍। কন্ফরেন্স অসিনা লৈবাক অনিগী মরক্তা লৈনরিবা মরূপ মপাং ওইবগী মরীগী অতোপ্পা মায় পাক্লবা পন্দুপ অমা হাংদোক্লে হায়না মহাক্না ফোঙদোকখি‍।

এসিয়গী চহিচাগী মতাঙদা ফোঙদোক্লিবা SAMVAD কী থীমগী মতাঙদা পল্লদুনা, মীয়াম্না এসিয়াদা শেন্মিৎলোন ফগৎলকপগী মরমদা হেক হেক ঙাংনরি, অদুবু কন্ফরেন্সস অসি শেন্মিৎলোনখক্তগী নত্তে, খুন্নাইগী ওইবা মচৎ অদুসু উৎলি হায়না শ্রী মোদীনা ফোঙদোকখি‍। ভগবান বুদ্ধনা তাকপিরম্বশিংনা মালেম অসিবু ইং-তপ্পা অমসুং খুমাঙ চাওশিন্বা চক অমদা পুবদা লমজিংবা ঙমগনি, অমদি মহাক্কী লৌশিংদা মীওইবদা য়ুম্ফম ওইবা তুংলমচৎ অমগী মায়কৈদা লমজিংনবা মতিক য়াওরি হায়খি‍।

SAMVAD কী নুংগী ওইবা থীমশিংগী মনুংদা অমা ওইরিবা—কনফ্লিক থোকহন্দবগী মতাঙদা ৱা ঙাংলদুনা, প্রধান মন্ত্রীনা মুক্নবা হায়বসি লম্বী অমনা চুম্মি অদুগা অমনা লাল্লি হায়বসিদগী হেক হেক থোক্লকই‍ হায়খি‍। হীরমসিগী মতাঙদা ভগবদ গীতাগী ৱাফম পল্লদুনা, মীওই খরনা মখোয়গী মীৎয়েঙ অদুদা অদুমক নৈশিন্দুনা মরৈ য়েত্তুনা, নাকল নাম্মখক্তমকপু অচুম্বনি হায়না লৌদুনা লৈ হায়খি‍। চপ মান্নবা ৱাফমদা তোঙান তোঙানবা মীৎয়েঙ লৈবা য়াই হায়না মহাক্না হায়খি‍। মহাক্না রিগ বেদগী ৱাফম পল্লদুনা, ঐখোয়না অচুম্ববু তোঙান তোঙানবা মীৎয়েঙদগী য়েংবা ঙম্লবা মতমদা মুক্নবা থোকহন্দবা য়াই হায়খি‍।

শ্রী মোদীনা মুক্নবগী অতোপ্পা মরম অমসু পল্লদুনা – অতোপ্পবু ঐখোয়দগী খেন্ননা উবসিনি হায়খি‍। খেন্নবনা লাপথোক্নহল্লি, অমদি লাপ্নবনা য়ানদবা ওইহল্লকই হায়খি‍। মসি থেংননবগীদমক, মহাক্না ধম্মদপদগী ৱারোল অমা থিরদুনা, মীপুম খুদিংমক্না নাবা অমদি শিববু কি হায়খি‍। অতোপ্পবু ঐখোয়গা মান্ননা উরবা মতমদা, ঐখোয়না অমাঙ অতা নৎত্রগা হাৎন-শুনবা থোকহন্দবা ঙমগনি হায়খি‍। হায়রিবা ৱাফমশিং অসি ইন্দুনা চৎলবদি, মুক্নবা থোকহন্দবা ঙমগনি হায়খি‍।

“মালেমগী ৱাফম কয়া অমদি খল চাবা পরিংদা চঙশিনবগী মহুত্তা অচেৎপা ফিরেপ অমদা লেপ্পদগী থোরকই,” হায়না শ্রী মোদীনা হায়খি‍। অচেৎপা ৱাখল্লোন্না মুক্নবা, এনভাইরনমেন্তেল ক্রাইসিসশিং অমদি ৱাখল ৱাবগা মরী লৈনবা হকশেলগী ফীভমশিং ফাওবা থোকহল্লকই হায়খি‍। হায়রিবা ৱাফমশিং অসিগী পাম্বৈদি, ঐখোয়দা মরক্কী লম্বী চৎনবা অমদি কা হেনবা ৱাখল্লোন্দা লৈতনবা ৱাফম থম্লমখিবা ভগবান বুদ্ধনা তাকপিরম্বা লম্বীদা লৈ হায়খি‍। ৱাখৈবগী পরম অসি ঙসিসু মরু ওইরি অমদি মসিনা মালেমগী শিংনবশিং লোইশিনবদা লমজিং পীরি হায়না মহাক্না ফোঙদোকখি‍।

প্রধান মন্ত্রীনা ঙসি লৈরিবা মুক্নবশিং অসি মী অমদি লৈবাক্কী ঙমখৈগী ৱাংমদা লান্দুনা মীওইবা খুন্নাইনা মহৌশাগা মুক্নবসু অসুম হেনগৎলক্লি হায়খি‍। মসিনা ঐখোয়গী মালেম অসিবু খুদোংথিহনগদবা এনভাইরনমেন্তেল ক্রাইসিস অমদা পুরকই‍। শিংনব অসিগী পাউখুম ধম্মগী পরমদা মরা তাখ্রদা এসিয়াগী মান্নবা চৎনবীশিংদা য়াওরি হায়না মহাক্না ফোঙদোকখি‍। হিন্দুইজম, বুদ্ধিজম, সিন্তোইজম, অমসুং অতৈ এসিয়াগী চৎনবীশিংনা ঐখোয়বু মহৌশাগা তোৎন-তিন্নদুনা লৈমিন্ননবা তাকপি তম্বি‍। ঐখোয়না ঐখোয় ইশাবু মহৌশাদগী তোখাইবা অমা ওইনা উদে, মসিগী শরুক অমা ওইনা লৌই হায়খি‍। শ্রী মোদীনা মহাত্মা গান্ধীনা থম্লম্বা ত্রস্তীসিপকী ৱাখল্লোন পল্লদুনা, ঙসি খুমাঙ চাওশিন্নবগীদমক মহৌশাগী লন শীজিন্নবা মতমদা, ঐখোয়না তুংগী মীরোলদা লৈরিবা ঐখোয়গী থৌদাংবুসু খন্নগদবনি হায়খি‍। লম্বী অসিদা চঙশিনবনা মহৌশাগী লনশিং অসি কল্লক মিহৌবগী নত্তবদা চাউখৎনবগীদমক শীজিন্নবা ঙমহনগনি হায়খি‍।

শ্রী মোদীনা মহাক মতম অমদা বুদ্ধিস্তকী মরমদা য়াম্না মরুওইবা মফম অমা ওইরম্বা ভারতকী নোংচুপথংবা মায়কৈদা লৈবা বদনগরদা চাউরকপনি হায়না ফোঙদোকখি‍। ভারতকী পার্লিয়ামেন্ততা, মহাক্না ভগবান বুদ্ধনা মহাক্কী অহান্বা ৱাফমশিং ফোঙদোকপিরম্বা শেংলবা মফম সর্নাথ য়াওনা বরানসিগী মীহুৎ ওইরি‍। ভগবান বুদ্ধগা মরী লৈনবা মফম অসিনা মহাক্কী খোঙচৎ শেম্লিবসি ফজরবা তাঞ্জা চানরুবা অমনি হায়না মহাক্না ফোঙদোকখি‍।

“ঐখোয়না ভগবান বুদ্ধবু চেৎনা নীংজবা অসি ভারত লৈঙাক্কী খুজিল থৌরাংশিংদা মমি তাই,” হায়না প্রধান মন্ত্রীনা হায়খি‍। বুদ্ধিস্ত সর্কিতকী শরুক অমা ওইনা মরুওইবা বুদ্ধিস্তকী মফমশিং শম্নহন্নবা লৈঙাক্না তুরিজম ইনফ্রাস্ত্রকচর শেমগৎলে হায়খি‍। হায়রিবা সর্কিত অসিদা চত্থোক চৎশিন নুংঙাইহন্নবা ‘বুদ্ধ পুর্নিমা এক্সপ্রেস’ স্পিসিএল ত্রেন হৌদোক্লে হায়খি‍। কুসিনগর ইন্তরনেস্নেল এয়রপোর্ত শঙ্গাখিবা অসি মালেমগী বুদ্ধিস্ত নীংজবা মীওইশিংদা কান্নগদবা পুৱারী ওইবা খোঙথাং অমনি হায়না মহাক্না ফোঙদোকখি‍। মহাক্না বোধ গয়াগী ইনফ্রাস্ত্রকচরগী ফীভম ফগৎহন্নবা মফমসিদা তোঙান তোঙানবা চাওখি থৌরাংশিংসু লাউথোকখি অমদি মালেমগী মফম পুম্বদগী লাই নীংবশিং, স্কোলারশিং, অমসুং লম্বোইবশিংবু ভারত্তা, ভগবান বুদ্ধগী লমদমদা লাক্নবা ৱাফম থমখি‍।

নলন্দা মহাবিহরা অসি মুক্নবগী শাফুনা থুগাইবিখ্রবা পুৱারীদা খ্বায়দগী অথোইবা য়ুনিভর্সিতীশিংগী মরক্তা অমনি হায়রদুনা, প্রধান মন্ত্রীনা মফম অসিবু সেন্তর ওফ লর্নিং অমা ওইনা শেমগত্তুনা হিঙ্গৎহন্দুনা ভারতনা খাঙবা কন্বগী মতৌ উৎখ্রে হায়খি অমদি ভগবান বুদ্ধগী থৌজালগা লোয়ননা নলান্দা য়ুনিভর্সিতীনা মাগী হান্নগী অথোইবা মশক অদু অমুক হন্না হঞ্জিনহনবা ঙমগনি হায়বগী থাজবা ফোঙদোকখি‍। ভগবান বুদ্ধনা মহাক্কী ৱাফমশিং তাকপিরম্বা পালি লোলবু, মসিগী খুৎইশিং মাঙহন তাকহন্দনা থম্বা ঙমহন্নবা ক্লাসিকেল লোল অমা ওইনা লাউথোক্তুনা লোল অসি য়োকখৎনবা মশক থোকপা খোঙথাংশিং লৌখৎলে হায়না মহাক্না পাউদমখি‍। অরিবা খুৎইশিং মশক খঙদোক্তুনা কেতলোগ তৌনবা, বুদ্ধিজম স্কোলারশিংগী কান্ননবা দোকুমেন্তেসন অমসুং দিজিতেলাইজেসন পুক্নিং থৌগত্তুনা জ্ঞান ভারতম মিসন হৌদোকখিবগী মতাঙদসু মহাক্না পনখি‍।

শ্রী মোদীনা ভগবান বুদ্ধনা তাকপি তম্বিরম্বশিং প্রমোত তৌনবা হৌখিবা দেকেদ অসিদা লৈবাক কয়াগা খুৎশম্ননা চৎমিন্নখিবগী মতাঙদসু ফোঙদোকখি‍। অহান্বা এসিয়ন বুদ্ধিস্ত সম্মিত ইকুই কুইদ্রিঙৈদা “এসিয়া মপাঙ্গল কনখৎহনবদা বুদ্ধ ধম্মগী থৌদাং” হায়বা থীম অসিগী মখাদা ভারত্তা পাঙথোকখি, অমদি মসিগী মমাঙদা, ভারতনা অহানবা গ্লোবেল বুদ্ধিস্ত সম্মিত পাঙথোকখি হায়খি‍। নেপালগী লম্বিনিদা ইন্দিয়া ইন্তরনেস্নেল সেন্তর ফোর বুদ্ধিস্ত কলচর এন্দ হেরিতেজকী উরেপ উয়ুং তমখিবা, অমদি লম্বিনি ম্যুজিয়ম শাগৎপদা ভারতনা লৌরিবা থৌদাংগীদমক চাউথোকচবা ফাওই হায়না মহাক্না ফোঙদোকখি‍। মসিগী মথক্তা, ভগবান বুদ্ধগী ‘কন্সাইজ ওর্দর্স’ অমুক হন্না নমথোকপা অমদি মোঙ্গোলিয়ন কঞ্জুরগী ভোল্যুম ১০৮ মোঙ্গোলিয়াগী মোনাস্তরীশিংদা য়েন্থোকপগী মতাঙদসু মহাক্না পনখি‍। লৈবাক কয়াদা লৈরিবা মোনুমেন্তশিং য়োকখৎনবা ভারতনা হোৎনরিবশিং অসিনা ভগবান বুদ্ধগী লিগেসী মাঙহন্দনা থম্নবা খোঙফম চেৎশিনহল্লে হায়না মহাক্না হায়খি‍।

প্রধান মন্ত্রীনা হন্দক্কী SAMVAD ইদিসন অসিদা লাইনিংগী রাউন্দতেবল অমা পাঙথোক্তুনা, খেন্নবা লাইনিংগী লুচিংবশিং পুনশিন্নবসিদা নুংঙাইবা ফোঙদোকখি‍। ফম্পাক অসিদগী মমল নাইদ্রবা ৱাখল্লোনশিং থোরক্তুনা, হেন্না পুকচেল খোইজেল তিন্নবা মালেম অমা শেম্লকপা ঙমগনি হায়না মহাক্না থাজবা ফোঙদোকখি‍। শ্রী মোদীনা কন্ফরেন্স অসি থৌবু ওইদুনা পাঙথোকপগীদমক থাইলেন্দগী মীয়াম অমদি লৈঙাক্কী মফমদা থাগৎপা ফোঙদোকখি‍। অফবা থৌদাং অসিবু মাঙদা পুখৎনবা পুল্লিবা শরুক য়ারিবা পুম্নমক্কী মফমদা মহাক্না য়াইফ-পাউজেল পীখি‍। ধম্মগী মঙালনা ঐখোয়বু ইং-তপ্পা, খুমাঙ চাওশিনবা অমদি নুংঙাই য়াইফবা চক অমগী মায়কৈদা লমজিংখিগনি হায়না থাজবা ফোঙদোক্তুনা মহাক্কী ৱারোল লোইশিনখি‍।

Sharing my remarks during SAMVAD programme being organised in Thailand. https://t.co/ysOtGlslbI

— Narendra Modi (@narendramodi) February 14, 2025

***