ভারতকী প্রধানমন্ত্রী

খুরুমজরি।

তেলঙ্গনাগী গভর্নর শ্রী জিষ্ণু দেব ভর্মা জী, ওরিশাগী গভর্নর শ্রী হরি বাবু জী, জম্মু অমসুং কাশ্মীরগী লেফতনেন্ত গভর্নর শ্রী মনোজ সিনহা জী, জম্মু অমসুং কাশ্মীরগী মুখ্য মন্ত্রী শ্রী ওমর অব্দুল্লা জী, তেলঙ্গনাগী সি.এম. শ্রী রেবন্থ রেদ্দিজী, ওরিশাগী সি.এম. শ্রী মোহন চরন মঞ্জীজী, ঐহাক্কী কেন্দ্রগী মন্ত্রীমন্দলগী মরুপশিং অশ্বিনী বৈষ্ণব জী, জি কিশান রেদ্দিজী, দা. জিতেন্দ্র সিংহ জী, ভি সোমাইয়া জী, রবনীত সিংহ বিতু জী, বন্দি সঞ্জয় কুমার জী, অতোপ্পা মন্ত্রীশিং, এম.পি.শিং, এম.এল.এ.শিং, অতোপ্পা মকোক থোংবা মীওইশিং, নুপী অমসুং নুপাশিং।

ঙসি অসি গুরু গোবিন্দ সিংহজীগী মপোক নুমিৎনি। মহাক্কী ৱাখল্লোন অমসুং পুন্সিনা ঐখোয়বু চাউখৎপা অমসুং মপাঙ্গল কনবা ভারত অমা শেমগৎনবা পুক্নিং থৌগৎলি। গুরু গোবিন্দ সিংহজীগী মপোক নুমিৎকীদমক্তা ময়াম পুম্নমকপু য়াইফ-পাউজেল পীজরি।

মরুপশিং,

ভারতনা 2025গী অঙনবা মতমদগী কন্নেক্তিবিতীগী খোঙজেল য়াংনা হেনগৎলক্লি। ঙরাং ঐহাক্না দিল্লী-NCRদা নমো ভারত ত্রেনগী নুংঙাইরবা এক্সপরিয়েন্স অমা ফংজখি। দিল্লী মেত্রোগী মরুওইবা প্রোজেক্তশিং উরেপ উয়ুং তমখি। ঙরাং ভারতনা অচৌবা মাই পাকপা অমা ফংখি, হৌজিক ঐখোয়গী লৈবাক অসিদা মেত্রো নেৎৱার্ক অসি কিলোমিতর লিশিং কয়া য়ৌবা ঙম্লে। ঙসি লুপা করোর কয়াগী প্রোজেক্তশিং শঙ্গাখ্রে অমসুং উরেপ উয়ুংসু তমখ্রে। অৱাংলোমদা জম্মু অমসুং কাশ্মীর, নোংপোক্লোমদা ওরিশা অমসুং খাদা তেলঙ্গনা, ঙসি অসি লৈবাক অসিগী চাউরবা শরুক অমগী ‘ন্যু এজ কন্নেক্তিবিতী’গী মতাংদা অচৌবা নুমিৎ অমনি। হায়রিবা রাজ্য অহুম অসিদা মোদর্ন দিবেলপমেন্ত হৌরকপা অসিনা লৈবাক পুম্বনা হৌজিক পুন্না মাংলোমদা চংশিল্লি হায়বা উৎলি । অমসুং ‘সবকা সাথ, সবকা বিকাস’ হায়রিবা মন্ত্র অসিনা চাউখৎলবা ভারতকী মঙলান অসিদা থাজবগী মচুশিং হাপচিল্লি। ঙসি, থৌরম অসিদা, ঐহাক্না রাজ্য অহুম অসিগী মীয়াম অমসুং লৈবাক মীয়াম পুম্নমকপু প্রোজেক্তশিং অসিগীদমক থাগৎপা ফোংদোকচরি। ঙসি অসি ঐখোয়গী ওরিশাগী মুখ্য মন্ত্রী শ্রীমান মোহন চরন মাজিজীগী মপোক নুমিৎসু ওইরিবা অসি চান্নরুবনি। ঐহাক্না মহাকপু মীপুম খুদিংমক্কী মহুৎ শিন্দুনা য়াইফ-পাউজেল পীজরি।

মরুপশিং,

ঙসিদি, লৈবাক অসিনা চাউখৎলবা ভারত অমগী ৱারেপ ফংনবা হোৎনরি, অমসুং মসিগীদমক, ভারতকী রেলৱেজ চাউখৎহনবা অসি য়াম্না মরু ওই। হৌখিবা চহি তরা অসিদা ভারতকী রেলৱেজদা পুৱারী ওইরবা অহোংবা অমা লাকপসি ঐখোয়না উরে। রেলৱে ইনফ্রাস্ত্রকচরদা মশক থোকপা অহোংবা অমা লাক্লি। মসিনা লৈবাক অসিগী মশক হোংহনখ্রে অমসুং লৈবাক মীয়ামগী থৌনাসু হেনগৎহনখ্রে।

মরুপশিং,

ঐখোয়না ভারত্তা রেলৱেজকী চাউখৎ-থৌরাং অসি পরামিতর মরিদা মাংলোমদা চংশিল্লি। অহানবদা- রেলৱে ইনফ্রাস্ত্রকচর মোদর্নাইজেসন, অনিশুবদা- রেলৱে পেসেঞ্জরশিংদা মোদর্ন ফেসিলিতীশিং ফংহনবা, অহুমশুবদা- লৈবাক অসিগী মফম খুদিংদা রেলৱেজ কন্নেক্তিবিতী, মরিশুবদা- রেলৱেজকী খুত্থাংদা থবক ফংহল্লকপা, ইন্দস্ত্রীশিংদা মতেং পাংবা। ঙসিগী প্রোগ্রাম অসিদা মসিগী ভিজন অসিগী খরা উবা ফংই। অনৌবা দিভিজনশিং, অনৌবা রেলৱে তর্মিনেলশিং অসিনা 21শুবা চহিচাগী মোদর্ন রেলৱেজ অমা ওইহন্নবা ভারত রেলৱেজদা মরুওইবা থৌদাং লৌগনি। মসিনা লৈবাক অসিদা শেন্মিৎলোনগী য়াইফ-থৌরাংগী ইকোসিস্তেম অমা শেমগৎপদা মতেং পাংগনি, রেলৱেজশিং মথৌ পাংথোকপদা মতেং পাংগনি, ইনবেস্তমেন্তগী খুদোংচাবা হেন্না ফংহল্লগনি অমসুং অনৌবা থবক ফংহল্লগনি।

মরুপশিং,

2014দা, ঐখোয়না ভারতকী রেলৱেজগী মোদর্নাইজ তৌবগী মঙলান অদুগা লোয়ননা থবক পায়খৎপা হৌখি। ভন্দে ভারত ত্রেন, অমৃত ভারত অমসুং নমো ভারত রেলগী খুদোংচাবশিং অসি হৌজিক্তি ভারত রেলৱেজকী অনৌবা বেঞ্চমার্ক ওইরক্লি। ঙসিগী এস্পিরেস্নেল ইন্দিয়ানা অতেনবা মতমগী মনুংদা ময়াম অমা ফংনবা হোৎনরি। ঙসিদি মীওইশিংনা অরাপ্পা খোঙচৎশিংসু অতেনবা মতমদা লোইশিনবা পাম্মি। অসিগুম্বা ফিভম অসিদা, লৈবাক অসিগী মফম খুদিংমক্তা হাই স্পীদ ত্রেনগী দিমান্দ হেনগৎলক্লি। ঙসিদি ভন্দে ভারত ত্রেনশিং অসি লম্বী 50 হেনবদা চৎলি। ভন্দে ভারত সর্বিসনা মীয়ামগী খোঙচৎপু নুংঙাইহল্লি। নুমিৎ নিনিগী মমাংদা, ঐহাক্না ভিদিও অমা য়েংখি, মতৌ করম্না ভন্দে ভারতকী অনৌবা স্লিপর ভর্জন অসি মসিগী ত্রাইএল রনদা কিলোমিতর 180গী অঙকপা খোঙজেল চেল্লি। মসি ঐহাক্না খক্তা নত্তনা ভারত মচা খুদিংমক্না উবা পাম্মি। অসিগুম্বা এক্সপরিয়েন্সশিং অসিদি অহৌবা অদুখক্তনি, ভারত্তা অহানবা বুলেৎ ত্রেনসু চেনগদবা মতম অদু কুইদ্রে।

মরুপশিং,

ঐখোয়গী পান্দমদি ইন্দিয়ন রেলৱেজদা চৎপা অসি অহানবা স্তেসনদগী হৌরগা লেমহৌরিবা মফম ফাওবা নীংশিংবা য়াবা এক্সপরিয়েন্স অমা ওইহন্নবা হোৎনবনি। মসিগীদমক, লৈবাক অসিদা অমৃত স্তেসন 1300 হেন্না নৌনা শেমগৎলি। রেলগী কন্নেক্তিবিতীসু হৌখিবা চহি 10 অসিদা চাউনা হেনগৎলে। 2014 ফাওবদা, লৈবাক অসিগী রেল লাইনশিংগী চাদা 35 খক্তমক ইলেক্ত্রিফিকেসন তৌখি। ঙসিদি, ভারতনা রেল লাইনশিংদা 100% ইলেক্ত্রিফিকেসন তৌবগী ময়া নক্না লৈরে। ঐখোয়না রেলৱেজকী শক্তমসু লেপ্পা লৈতনা পাকথোক চাউথোকহল্লে। হৌখিবা চহি 10দা, কিলোমিতর লিশিং 30 হেন্না শাংবা অনৌবা রেলৱে ত্রেকশিং শেমগৎখ্রে, লম্বীগী মথক্তা থোং চা কয়া অমসুং থোংশিংগী মখাদা থোং চা কয়া শেমগৎখ্রে। হৌজিক্তি ব্রোদ গেজ লাইনশিংদা মীওই য়াওদবা ক্রোসিংশিং মুত্থৎখ্রে। মসিনা এক্সিদেন্তশিং হন্থহল্লি অমসুং পেসেঞ্জরশিংগী সেক্যুরিতী হেনগৎহল্লি। দেদিকেতেদ ফ্রাইৎ কোরিদোরশিংগুম্বা মোদর্ন রেল নেৎৱার্কশিংগী থবকসু লৈবাক অসিদা খোঙজেল য়াংনা লোইশিল্লি। অখন্নবা কোরিদোরশিং অসি শাবগা লোয়ননা, মহৌশাগী ত্রেকশিংদা প্রেসর হন্থহল্লগনি অমসুং হাই স্পীদ ত্রেনশিং চৎথোক-চৎশিন তৌবগী খুদোংচাবসু হেনগৎলগনি।

মরুপশিং,

ঙসি রেলৱেজদা পাংথোক্লিবা রিজুভেনেসন দ্রাইব, মেদ ইন ইন্দিয়াবু প্রমোৎ তৌবা, মেত্রোগীদমক মোদর্ন কোচশিং শেমগৎপা, রেলৱেজ, স্তেসনশিং অমুক হন্না শেমগৎপা, স্তেসনশিংদা সোলর পেনেলশিং হাপচিনবা, ‘স্তেসন অমা, পোত্থোক অমা’গীদমক্তা স্তোলশিং হাংদোকপা অসিনা রেলৱেজদা অনৌবা থবক ফংবগী খুদোংচাবা লাখ কয়া ফংহল্লে। হৌখিবা চহি 10দা নহারোল লাখ কয়ানা রেলৱেজদা মতম চুপ্পগী ওইবা সরকারগী থবক ফংলে। ঐখোয়না নীংশিংগদবনি মদুদি অনৌবা ত্রেনশিংগী কোচ পুথোক্লিবা ফেক্তরীশিংগী রো মেতরিএল অসি অতোপ্পা ফেক্তরীশিংদগী লাকপনি। মফম অদুদা দিমান্দ হেনগৎলকপনা থবক ফংবগী খুদোংচাবসু হেনগৎহল্লি। রেলৱেজগা মরী লৈনবা অখন্নবা স্কিলশিং অসি ৱাখলদা থমদুনা, লৈবাক অসিগী অহানবা গতি-শক্তি য়ুনিভর্সিতীসু লিংখৎলে।

মরুপশিং,

ঙসি, রেলৱেজ নেৎৱার্ক পাকথোক চাউথোকপা মতমদা, অনৌবা হেদক্বাতর অমসুং দিভিজনশিংসু শেমগৎলি। জম্মু দিভিজন অসিনা জম্মু অমসুং কাশ্মীরখক্তা নত্তনা হিমাচল প্রদেশ অমসুং পঞ্জাবকী সহর কয়াদা কান্নবা ফংহল্লগনি। মসিনা লেহ-লদাখকী মীয়ামদসু খুদোংচাবশিং ফংহল্লগনি।

মরুপশিং,

ঐখোয়গী জম্মু অমসুং কাশ্মীরনা ঙসি রেল ইনফ্রাস্ত্রকচরদা অনৌবা রেকোর্দশিং শেমগৎলি। উধমপুর-শ্রীনগর-বারামুলা রেল লাইন অসি ঙসি লৈবাক শিনবা থুংনা খন্ন-নৈনরি। প্রোজেক্ত অসিনা জম্মু অমসুং কাশ্মীরবু ভারতকী অতোপ্পা শরুকশিংগা হেন্না ফবা মওংদা শম্নহল্লগনি। প্রোজেক্ত অসিগী মখাদা, মালেমগী খ্বাইদগী ৱাংবা রেলৱে আর্ক ব্রিজ, চেনাব ব্রিজ, লোইশিনখ্রে। লৈবাক অসিগী অহানবা কেবলদা য়ুম্ফম ওইবা রেলগী থোং ওইরিবা অঞ্জি খাদ ব্রিজ অসিসু প্রোজেক্ত অসিগী শরুক অমনি। মখোয় অনিমক অসি ইঞ্জিনীয়রিংগী মান্নদবা খুদম্নি। মসিনা লমদম অসিদা শেন্মিৎলোনগী খুমাং চাউশিনহনগনি অমসুং চাউখৎপা পুরক্কনি।

মরুপশিং,

ভগবান জগন্নাথকী য়াইফ-মঙ্গোলগা লোয়ননা, ঐখোয়গী ওরিশাদা মহৌশাগী ওইবা রিসোর্স কয়া লৈরি। মসিদা য়াম্না চাউবা সমুদ্রগী কোস্ত অমা লৈ। ওরিশাদা ইন্তর্নেস্নেল ত্রেদকী অচৌবা ওইথোকপা য়াবা লৈ। ঙসিদি ওরিশাদা অনৌবা রেলৱে ত্রেকশিংগা মরী লৈনবা প্রোজেক্ত কয়া অমা পায়খৎলি। মসিগীদমক লুপা করোর লিশিং 70 হেন্না থাদনরি। স্তেত অসিদা গতি শক্তি কার্গো তর্মিনেল 7 হৌদোকখ্রে, মসিনা ললোন-ইতিক অমসুং ইন্দস্ত্রীশিং চাউখৎহল্লি। ঙসিসু ওরিশাদা রায়গদা রেলৱে দিভিজনগী উরেপ উয়ুংসু তমখ্রে। মসিনা রাজ্য অসিগী রেলৱে ইনফ্রাস্ত্রকচর হেন্না মপাঙ্গল কনখৎহল্লগনি। মসিনা ওরিশাদা তুরিজম, ললোন-ইতিক অমসুং থবক পীবা হেনগৎহনগনি। অখন্ননা, ত্রাইবেল ইমুংশিংগী মশিং য়াম্না লৈবা খা ওদিশা অসিনা মসিগী কান্নবা য়াম্না ফংগনি। ঐখোয়না জনমান য়োজনাগী মখাদা খ্বাইদগী তুং কোইনা চৎলবা ত্রাইবেলগী মফমশিং চাউখৎহল্লে। মসিগী ইনফ্রাস্ত্রকচর অসি মখোয়গীদমক্তা অচৌবা খুদোংচাবা অমা ওইরগনি।

মরুপশিং,

ঙসি ঐহাক্না তেলঙ্গনাগী চর্লাপল্লী অনৌবা তর্মিনেল স্তেসনসু শঙ্গাবগী খুদোংচাবা ফংলে। স্তেসন অসিবু আউতর রিং রোদকা শম্নহনবা অসিনা লমদম অসিদা চাউখৎপা য়াহল্লগনি। স্তেসন অসিদা মোদর্ন প্লেৎফোর্মশিং, লিফ্তশিং, ইস্কেতরশিংগুম্বা খুদোংচাবশিং লৈ। অতোপ্পা অখন্নবা ৱাফম অমনা স্তেসন অসি সোলর ইনর্জীনা চলাইবনি। অনৌবা রেলৱে তর্মিনেল অসিনা সিকন্দরাবাদ, হায়দ্রাবাদ অমসুং কচিগুদাগুম্বা সহর অসিগী হৌজিক লৈরিবা তর্মিনেলশিংদা লৈরিবা প্রেসর অসি য়াম্না হন্থহল্লগনি। মসিনা মীয়ামগীদমক চৎথোক চৎশিন তৌবদা হেন্না খুদোংচাবা ফংহল্লগনি। হায়বদি, ইজ ওফ লিভিংগা লোয়ননা ইজ ওফ দুয়িং বিজিনেসসু প্রমোৎ তৌগনি।

মরুপশিং,

ঙসি লৈবাক অসিদা মোদর্ন ইনফ্রাস্ত্রকচর শেমগৎনবা হোৎনরি। ভারতকী এক্সপ্রেসৱেজ, ৱাতরৱেজ অমসুং মেত্রো নেতৱর্ক অসি য়াম্না থুনা চাউখৎলক্লি। ঙসিদি, লৈবাক অসিগী এয়রপোর্তশিংদা খ্বাইদগী ফবা খুদোংচাবশিং ফংলি। 2014দা লৈবাক অসিদা এয়রপোর্ত মশিং অসি 74 ওইরম্মি, হৌজিক্তি মখোয়গী মশিং অসি 150 হেনখ্রে। 2014 ফাওবদা সহর 5 খক্তদা মেত্রোগী খুদোংচাবশিং লৈরম্মি, ঙসি সহর 21দা মেত্রো লৈরে। হায়রিবা স্কেল অমসুং স্পীদ অসিগা মান্ননবা, ভারতকী রেলৱেজসু লেপ্পা লৈতনা অপগ্রেদ তৌরি।

মরুপশিং,

হায়রিবা চাউখৎ-থৌরাংগী থবকশিং অসি চাউখৎলবা ভারত অমগী রোদমেপকী শরুক অমনি। মসি ঙসি লৈবাক অসিগী মীপুম খুদিংমক্কী মিসন অমা ওইরে। ঐহাক্না থাজবা থম্লি মদুদি ঐখোয় পুন্না হোৎনমিন্নরগা ঐখোয়না মসিগী মাইকৈ অসিদা হেন্না থুনা চংশিনগনি। মসিগী প্রোজেক্তশিং অসিগীদমক ঐনা লৈবাক মীয়াম্বু অমুক্কা হন্না নুংঙাইবা ফোংদোকচরি।

হন্না-হন্না থাগৎচরি।

****