ভারতকী প্রধানমন্ত্রী

গুদ মোর্নিং হাউসতোন;

গুদ মোর্নিং তেকসাস;

গুদ মোর্নিং অমেরিকা,

ভারত অমসুং মালেমগী মফম কয়াদা লৈরিবা ঐগী ভারতমচাশিংতরাম্না ওকচরি।

মরূপশিং,

ঙসি অয়ুক ঐখোয়গা লোয়ন্না য়াম্না অখন্নবা মীওই অমা ঐখোয়গা লৈমিন্নরি। মহাক শক তাকপা মথৌ তাদে। মহাক্কী মমিং মালেম অসিদা লৈরিবা মী খুদিংমক্না তারে।

মালেমগী রাজনিতিগী মতাংদা মালেম অসিদা ৱারী শানবা খুদিংদা মহাক্কী মমিং পন্নরি। মহাক্কী ৱাহৈ খুদিংমক মীওই মিল্লিয়ন কয়ানা তারি।

মহাক য়ুমথোং খুদিং পন্নবা মিং অমা ওইরে অমসুং মসিগী চাউরবা লৈবাক অসিগী খ্বাইদগী ৱাংলবা ওফিস মহাক্না পায়দ্রিঙৈদা মমিং য়াম্না চৎখি।

সি ই ওদগী কমান্দর-ইন-চীফ, বোর্দরুমদগী ওভেল ওফিস, স্তদিওশিংদগী মালেমগী ফম্বাক্ত, রাজনিতিদগী ইকোনোমিদা অমসুং সেকুরিতিদা মহাক্না মফম খুদিংদা মতম শাংনা লৈহৌরগদবা ইথিল অমা পীরে।

ঙসি মহাক ঐখোয়গা লৈমিন্নরি। মসিগী চিংলেম্লবা স্তদিয়ম অমসুং মশিং য়াম্লবা মীয়াম অসিদা তরাম্না ওকপা অসি ঐগী লাইবক ফবনি।

মহাক্কা ঐনা তোইনা উনবগী খুদোংচাবা  ঐনা ফংই হায়না ঐনা হায়বা ঙম্মি অমসুং মতম খুদিংমক্ত ঐনা মরূপ-মপাং ওইবা, নুংশিবা অমসুং থৌনা লৈবা য়ুনাইতেদ স্তেদ ওফ অমেরিকাগী রাস্ত্রপতি দোনাল্দ ত্রম্প উবা ফংখি।

মসি ইতোপ-তোপ্পনি, মসি মমাংদা অমুক্ত থোকখিদ্রিবনি।

মরূপশিং,

ঐনা হায়রি মদুদি ঐখোয়না মতম খর উনরে অমসুং উনবা খুদিং মহাক তরাম-তরাম্না ওকপা, লাইনা উনবা  অমসুং লৌশিং কয়ানা পীক থনখি। অতৈ কয়াগীদমক ঐনা মহাক পামজৈ।

মহাক্কী লুচিংবগী গুন, অমেরিকাগী খঞ্জবা,অমেরিকানমচাশিংগী খনবা, অমেরিকাগী তুংগী থাজবা অমা অমসুং অমেরিকা অমুক হন্না মপাঙ্গল কনহন্নবা অকনবা       ফিরেপ লৈ।

মহাক্না মাংজৌন্নবা অমেরিকা অমুক হন্না মপাঙ্গল কনখৎহল্লে। মহাক্না য়ু এস অমসুং মালেমগী ওইনা থবক কয়া পাংথোক্লে।

মরূপশিং,

ভারত্ত লৈরিবা ঐখোয়গা রাস্ত্রপতি ত্রম্পকা অফবা মরি লৈনরি। অববী বার ত্রম্প সরকার হায়রিবা ৱাহৈশিং হৌনা লাউখি অমসুং মহাক্না হ্বাইত হাওসতা হরাওবা ফোংদোকপা অদু মিল্লিয়ন কয়াগী মাইথোং হরাওবা অমসুং থাগৎপনা থনগনি।

ঐনা অহানবা ওইনা মহাক্কা উনবদা মহাক্না ঐঙোন্দা হায়খি, হ্বাইত হাওসতা ভারতকী অশেংবা মরূপ লৈ। ঙসি নহাক্না মফম অসিদা লাকপা অসিনা খুদম ওইরে।

চহি কয়া অসিদা ঐখোয়গী লৈবাক অনি অসিনা মরূপ-মপাং ওইবগী মরি অসি অনৌবা অৱাংবা থাকশিংদা পুখৎলে। রাস্ত্রপতি, হাউসতোন্দা অয়ুক অসিদা , মালেমগী খ্বাইদগী চাউবা গনতন্ত্র চৎপা লৈবাক অনিগী কুম্মৈ মসিগী মরূপ-মপাংগী মীহুল অসি নহাক্না তাবা ফংলগনি।

ঐখোয়গী অচৌবা লৈবাক অনিগী মরক্ত লৈনরিবা মীওইবগী মরিশিংগী থৌনা অমসুং অচেৎপা নহাক্না ফাওবা ঙমগনি। হাউসতোন্দগী হৌরগা হায়দ্রবাদ ফাওবা, বোস্তোনদগী বেঙ্গালুরু,  চিকাগোদগী সিমলা, লোস এঞ্জেলেসতগী লুধিয়ানা , নিউ জর্সিদগী নিউ দিল্লি ফাওবদা মীয়াম থম্মোয়গী ওইবা মরি লৈনরি।
 

ভারত্ত নোংমাইজিংগী অহিং অথেংবা ওইরবসু মীওই মিল্লিয়ন কয়া মখোয়গী তি ভি মমাংদা ফম্লি , মালেমগী তোঙান-তোঙানবা মতমদা লৈরিবশিং ঙসি ঐখোয়গা পুল্লি। মখোয়না পুৱারী ওইরবা থৌদোক অসি য়েংলি।

মিস্তর রাস্ত্রপতি নহাক্না ঐহাক ২০১৭তা নহাক্কী ইমুং-মনুংদা শক তাকখি অমসুং বিল্লিয়ন অমা হেনবা ভারতমচাশিং অমসুং মালেমগী মফম কয়াদা লৈরিবা ভারতকী মীয়াম ঐগী ইমুং-মনুং ওইনা ঙসি ঐনা নঙোন্দা শক তাক্লি।

ইবেম্মাশিং অমসুং ইবুংঙোশিং, ঐনা নখোয়দা ঐগী মরূপ, ভারতকী মরূপ অমা, অচৌবা অমেরিকাগী রাস্ত্রপতি দোনাল্দ ত্রম্প লানথোক্লি।