ভারতকী প্রধানমন্ত্রী

ইকায়খুম্নরবশিং,

কোরোনাগী মালেমগী লাইচৎ থেংননবগীদমক ঐখোয়না মালেম অমা – হকশেল অমা হায়বা মীৎয়েঙ অমা মালেমগী মাঙদা থমখি‍।

তুংদা অসিগুম্বা লাংফমশিং থেংননবগীদমক হায়রিবা মীৎয়েঙ অসি মালেমগী য়াম্না কনবা পাঙ্গল অমা ওইহনবা য়াই‍।

ইকায়খুম্নরবশিং,

মালেমগী ফার্মাসীগী থৌদাং লৌরদুনা ভারতনা লৈবাক ১৫০ হেনবদা হিদাক ফংহনখি‍।

মসিগা লোয়ন-লোয়ননা ভেক্সিন রিসর্চ অমসুং মেনুফেকচরিং হেনগৎহন্নবগীদমক লৈজবা পাঙ্গল শীজিন্নখি‍।

য়াম্না তেল্লবা মতমদা ঐখোয়না ভারত্তা ভেক্সিন দোজ বিলিয়ন অমা হেন্না কাপথোকখ্রে‍।

মালেমগী মীয়ামগী শরুক তরুক থোকপগী অমদা শন্দোকপা হন্থহন্দুনা ভারতনা মালেমবু ঙাকথোকপদা থৌদাং য়াখি, অমদি ভাইরস অসিনা মখা তানা ম্যুতেসন থোক্লকপগী চিংনবা হন্থহনখি‍।

ইকায়খুম্নরবশিং,

লাইচৎ অসিনা মালেম পুমবদা থাজবা য়াবা সপ্লাই চেনগী মথৌ তাবা হেনগৎহল্লে‍।

ফীভম অসিদা ভারতনা মালেম পুম্বগী মেনুফেকচরিং হবকী শক্লোন্দা মাঙদা থোরক্লি‍।

মসিগীদমক ভারতনা ইচঙ থৌবা শেন্মিৎলোনগী অওনবা পুরকপদা অনৌবা খোঙজেল হাপখি‍।

ঐখোয়না কোস্ত ওফ দুইং বিজিনেস য়াম্না হন্থহনখি অমদি থাক খুদিংদা ইনোভেসন হেনগৎহনখি‍।

ঐনা জি-২০ লৈবাকশিংদা পাউকৎচরি মদুদি অদোমগী শেন্মিৎলোন হিংগৎহনবদা অমদি সপ্লাই চেন দাইভরসিফাই তৌবদা ভারতপু অদোমগী থাজবা য়াবা খোঙলোয় ওইহনবিয়ু‍ হায়বসিনি‍।

ইকায়খুম্নরবশিং,

তশেংনমক কোবিদনা মরম ওইরগা অপনবা পীদবা পুন্সিগী হীরম অমত্তা লৈরম্লোই‍।

অসিগুম্বা ফঈভম অসিদা ভারতকী আই.তি.-বি.পি.ও. সেক্তরনা সেকেন্দ অমত্তসু লেপখিদে, রাউন্দ-দি-ক্লোক থবক তৌদুনা মালেম পুমবদা ঙাক্লৌ পীখি‍।

অসুম্না উনবা মতমদা অদোমগুম্বা লুচিংবশিংনা ভারতনা কমদৌনা থাজবা য়াবা খোঙবু অমগী শক্লোন লৌবগে হায়বসিদা খন্ন-নৈনবিবা ঐ নুংঙাইবা ফাওই‍।

মসিনা ঐখোয়গী নহারোলশিংদা অনৌবা থৌনা পীগনি‍।

মসি ওইথোক্লিবগী মরমদি ভারতনা মতম মাঙহন্দনা ৱর্ক ফ্রোম এনিৱ্যেরগা মরী লৈনবা মথৌ তাবা অওনবশিং পুরকখি‍।

ইকায়খুম্নরবশিং,

মালেমগী শেলথুমগী অর্কিতেকচরবু তরু তরুবা ওইহন্নবগীদমক চাদা ১৫গী মিনিমম কোর্পোরেত তেক্স রেত য়াম্না মরুওইবা খোঙথাঙ অমা ওইখি‍।

ঐ ইশামক্না ২০১৪গী জি-২০ মীফমদা ৱাফমসি হৌদোকখি‍। মায়কৈ অসিদা মরুওইবা খোঙথাঙ লৌখৎপিবগীদমক্তা ঐনা জি-২০গী তৌবিমল খঙবা উৎজরি‍।

শেন্মিৎলোন হিংগৎহন্নবগীদমক মালেমগী খোঙহৌ হেনগৎহনবা মরুওই‍।

মসিগীদমক ঐখোয়না তোঙান তোঙানবা লৈবাকশিংদা ভেক্সিন সর্তিফিকেতপু শকখঙমিন্নবা মথৌ তাই‍।

ইকায়খুম্নরবশিং,

ভারতনা মশাগী মালেমগী ওইবা থৌদাংবু মতম পুম্বদা লূম্না লৌদুনা লাক্লি‍।

ঙসি ঐনা জি-২০গী ফম্পাক অসিদা ময়াম পুম্নমক্কী মফমদা হায়জনিংবা ৱাফমদি ভারতকী থৌরাংদি মথঙ চহিদা মালেমগীদমক ভেক্সিন দোজ বিলিয়ন ৫ হেন্না পুথোকপনি‍।

ভারতকী খোঙফম অসিনা কোরোনাগী মালেমগী লাইচৎ থৎংবদা চাউনা মতেং ওইগনি‍।

মরম অসিনা দব্লিউ.ঐচ.ও.না ভারতকী ভেক্সিনবু অথুবা মতমদা শকখঙবিবা মরুওই‍।

থাগৎচরি‍।

***