ভারতকী প্রধানমন্ত্রী

ঐহাক্কী নুংশিজরবা ইরৈবাকচাশিং,

কোরোনা গ্লোবেল লাইচৎকী মায়োক্তা ভারতনা লান্থেংনরিবা অসি অচৌবা থৌনা অমসুং খোংফম চেৎপগা লোয়ননা মাংলোমদা চংশিল্লি। অদোমগী তপস্যা, অদোমগী কত্থোকপনা মরম ওইদুনা ভারতনা হৌজিক ফাওবা কোরোনানা ওইল্লকপা য়াবা মাংহন তাকহনবা অদু ফনা য়াম্না থৈদোকপা ঙম্লি। অদোমগী লৈবাক অসি কন্ননবা, অদোমগী ভারতপু কন্ননবা অদোম্না অচৌবা অৱাবা খাংলি।

অদোম্না মায়োক্নরিবা খুদোংচাদবশিং অদু ঐহাক নীংথিজনা খঙই- খরনা চিঞ্জাক্কীদমক, খরনা মফম অমদগী মফম অমদা চত্থোক চৎশিন তৌবগীদমক, অমদি অতোপ্পশিংনা য়ুম অমদি ইমুং মনুংদগী তাম্না লৈবগীদমক। অদুম ওইনমক অদোমগী লৈবাক্কীদমক হৌন লোনচৎ লৈবা লান্মী অমগুম অদোম্না অদোমগী থৌদাং পাংথোক্লি। ঐখোয়গী সংবিধান্দা হায়রিব ‘ৱি, দি পিপল ওফ ইন্দিয়া’গী শক্তি অদু মসিনি।

বাবা সাহেব দোক্তর ভীম রাও অম্বেদকরগী মপোক কুমওন্দা, ঐখোয় ভারত মীয়ামগী মায়কৈদগী অপুনবা শক্তি অসিনা মফমদা অশেংবা ইকায় খুম্নবা অমা উৎলি। বাবা সাহেবক পুন্সিনা ঐখোয়বু দিতর্মিনেসন অমসুং হার্দ ৱার্ক্কা লোয়ননা শিংনরকপা খুদিংমক থেংননবা পুক্নিং থৌগৎলি।

মরূপশিং, মসি ঐখোয়গী লৈবাক অসিগী তোঙান তোঙানবা শরুকশিংদা তোঙান তোঙানবা কুমহৈশিং পাংথোকপা মতম অমসুনি। বৈসাখি, পোহেলা বোইশাখ, পুথান্দু, অমসুং বিশুগুবা কুমহৈ কয়াগা লোয়ননা রাজ্য কয়াদা অনৌবা চহি হৌরি। লোকদাউনগী মতম অসিদা মীয়াম্না নিয়ম ঙাক্না চৎলিবা অমদি মখোয় মখোয়গী য়ুমশিংদা লেংদনা লৈদুনা কুমহৈশিং পাংথোক্লিবা মতৌ অসি তশেংনা মমল নাইদে। অনৌবা চহিগী তাঞ্জা লাকপদা ঐাক্না অদোমগী হকচাং ফনা লৈনবগীদমক থৌনিজরি অমদি য়াইফ পাউজেল পীজরি।

মরূপশিং, ঙসি মালেম পুম্বদা ওইরিবা কোরোনা লাইচৎগী ফিভম অসি অদোম্না খঙবীরিবা অদুনি। অতোপ্পা লৈবাকশিংগা য়েংনরুবদা ভারতনা ইনফেক্সন থিনবা হোৎনরিবা অসিদা অদোম পার্তনরসু ওইরি লোয়ননা ৱিৎনেসসু ওিইরি। কোরোনাগী কেস অমত্তা লৈত্রিঙৈদগী হৌরগা ভারতনা এয়ারপোর্তশিংদা কোরোনানা শোকহল্লবা লৈবাকশিংদগী লাকপা মীওইশিংবু স্ক্রিনিং তৌবা হৌখি। কোরোনানা নাবা মীশিং ১০০ শুদিরিঙৈ মাংওইননা ভারতনা মপাল লমদগী লাকপা মীওইশিংবু নুমিৎ ১৪নিগী আইসোলেসন তৌহনখি। মফম কয়াদা মোলশিং, ক্লবশিং অমসুং জীমশুং থিংজিনখি। ঐখোয়না কোরোনাগী কেস ৫৫০ খক্তমক লৈবা মতম অদুদা ভারতনা নুমীৎ ২১নিগী মপুংফাবা লোকদাউন অমগী অচৌবা খোঙথাং অমা লৌখৎখি। ভারতনা, সমস্যা হেনগৎলকপা ঙাইখিদে, সমস্যা হেক উবগা, মদুবু, ৱারেপ থুনা লৌদুনা খুদক্তা থিংনবা হোৎনখি। অদুবু হৌখিবা নুমিৎশিংদগী খঙলকপা অদুনা মসিদি তশেংলে মদুদি ঐখোয়না খনখিবা লম্বী অদু, অচুম্বনি।

মরূপশিং, অসিগুম্লবা ক্রাইসিস অসিদা ঐখোয়গী ফিভম অসি অতোপ্পা লৈবাক অমা হেক্তগা চাংদম্নবা অচুম্বা ওইরোই। অদুম ওইনমক, মসিমসু অচুম্বনি মদুদি করিগুম্বা ঐখোয়না মালেমগী অচৌবা, শক্তি লৈরবা লৈবাকশিংদা কোরোনাগা মরী লৈনবা ফিগর য়েংবদা ঙসি ভারত য়াম্না নীংথিজনা মেনেজ তৌরিবা পোজিসন অমদা লৈরি। থা অমা, থা অমা মখায়গী মমাংদা, লৈবাক কয়া অমা কোরোনা ইনফেক্সনগী মতাংদা অমরোমদা ভারতকা মান্ননা লৈরম্মি। অদুবু ঙসিদি, লৈবাকশিং অদু ভারতকা য়েংনবদা কোরোনাগী কেস শরুক ২৫-৩০ ফাওবা হেন্না লৈরে। লৈবাকশিং অদুদা মীওই লিশিং কয়া য়াম্না ৱানা শিখ্রে। ভারতনা হোলিস্তিক এপ্রোচ শিজিন্নরমদ্রবদি, ইন্তিগ্রেতেদ এপ্রোচ শিজিন্নরমদ্রবদি, অথুবা ৱারেপ লৌরমদ্রবদি ঙসি ভারতকী ফিভম অসি অতোপ্পা অমা ওইরমগনি।

ঐখোয়গী লৈবাক অসিনা সোসিয়েল দিস্তেন্সিং অমসুং লোকদাউনদগী চাউনা কানবা ফংলি। শেনমিৎলোনগী মিৎয়েংদা য়েংলুরগদি হৌজিক মসি অৱাবা অমনি অদুবু ভারত মচাশিংগী তুংগী পুন্সিদা, মসিগা চাংদম্ননীংঙাই অমত্তা লৈতে। ঐখোয়গী অকক্নবা রিসোর্শিংগী মনুংদা ভারতনা চৎলিবা লম্বী অসি ঙসিদি মালেম পুম্বদা খন্ননিঙাই ৱাফম অমা ওইরে।

লৈবাক অসিগী রাজ্য শরকারশিংনসু ফিভম অসি পুংজা খুদিং মেনেজ তৌদুনা মসিদা অচৌবা থৌদাংগা লোয়ননা থবক তৌরি। অদুবু মরূপশিং, হোৎনরিবশিং অসিগী মরক্তা কোরোনা শন্দোরক্লিবা অসিনা মালেম পুম্বদা হেল্থ এক্সপার্তশিং অমসুং সরকারশিংবু হান্নদগী হেন্না এলর্ত ওইহল্ল। ভারত্তা মতৌ করম্না কোরোনাগী মায়োক্তা শোক্নরিবা লান অসি মখা চত্থগদগে হায়বগী মতাংদা ঐহাক্না রাজ্যশিংগা লোয়ননা লেপ্পা লৈতনা খন্ন-নৈনরি। লোকদাউন অসি মখা চত্থগদবনি মখোয় পুম্নমক্না ৱাফম থমলক্লি। রাজ্য কয়া মদি হান্ননা লোকদাউন শাংদোক্নবা ৱারেপ লৌখ্রে।

মরূপশিং, ৱাফম পুম্নমক ৱাখলদা থম্দুনা ভারত্তা লোকদাউন অসি মে ৩ ফাওবা শাংদোক্নবা ৱারেপ লৌরে। হায়বদি মে 3 ফাওবা ঐখোয় পুম্নমক, লৈবাক মচা পুম্নমক লোকদাউন্দা লৈগদবনি। মতম অদুদা ঐখোয়না দিসিপ্লিন অদুমক, হান্নগুম ঙাক্কদবনি। লৈবাক মীয়াম পুম্নমক্কী মফমদা ঐহাক্না হায়জরি মদুদি কোরোনা ভাইরস অসি অনৌবা মফমশিংদা শন্দোকহনগুমসি। খ্বাইদগী পীকপা লোকেলগী থাক্তা ফাওবা অনৌবা অনাবা অমা খক্তং হেঙ্গৎলকপা অসি চিন্তাগী ৱাফম ওইগদবনি। কোরোনানা মরম ওইদুনা অনাবা অমা ৱানা শিখিবদা ঐখোয় হেন্না চিন্তা তৌগদবনি। মরম অদুনা, ঐখোয়না হোত-স্পোৎকী মতাংদা য়াম্না মিৎশিং-নাশিংনা লৈগদবনি। মথংগী হপ্তা অমা অসিদা কোরোনাগী মায়োক্তা চংশিল্লিবা লান অসি হেন্না কনখৎহল্লি।

এপ্রিল ২০ ফাওবা শহর খুদিংমক, পুলিস স্তেসন খুদিংমক, জিলা খুদিংমক, রাজ্য পুম্নমক মফম অদুদা লোকদাউন কয়াম্না ইনবগে হায়বদু চাংয়েং তৌগনি। মফম অদুনা কোরানদগী মশাবু কয়াম্না কঞ্জবা ঙম্বগে হায়বদু য়েংগনি। মসিগী চাংয়েংদা মায় পাক্লগদবা, হোত-স্পোৎ কেতেগোরীগী মনুং চন্দবা, অমদি হোত-স্পোৎ ওন্থোকপগী ওইথোকপা নেম্বা মফমশিংদা, এপ্রিল ২০দগী অখন্নবা দরকার লৈবা এক্তিবিতী খরগী অয়াবা পীরবা য়াই। অদুম ওইনমক ৱাফম অসি খঙজিনবীয়ু মদুদি পর্মিসন অসি কন্দিস্নেল ওইগনি, মপান্দা থোকপগী রুলশিং য়াম্না চেকশিনগনি। করিগুম্বা লোকদাউনগী নিয়ম থুগায়রবা অমদি কোরোনাভাইরস শন্দোরকপগী রিস্ক লৈরগদি পর্মিসন অসি খুদক্তা লৌথোক্কনি। মরম অসিনা, ইশানা খক চেকশিন্দবা তৌরোইদবনি, অদুগা কনাসু মসিবু চেকশিন্দবা তৌহল্লোইদবনি। মসিগী মতাংদা হয়েং সরকারগী মাইকৈদগী মরিক চুম্বা গাইদলাইন অমা থাদোক্কনি।

মরূপশিং, এপ্রিল ২০দগী মসিগী মশক খঙদোক্লবা মফমশিংদা মসিগী অকক্নবা কোমথোক্কদৌরিবা অসি খোয়গী লাইরবা ইচিল-ইনাও অমসুং ইচে-ইচলশিংগী পুন্সী মহিং য়েংলগনি। নুংতিগী তাল্লগা চাবশিংনা, নুংতিগী তান্দুনা মখোয়গী মথৌ তাবশিং মপুং ফাহল্লি, মখোয় ঐগী ইমুংনি। ঐগী মরু ওইবা থবকশিংগী মনুংদা অমদি, মখোয়গী পুন্সিদা লাকপা অৱাবশিং হন্থহনবনি। প্রধান মন্ত্রী গরীব কল্যান য়োজনাগী থোংদা সরকারনা মখোয়গী মতেং পাংনবা হোৎনবা য়াবা হোৎনরি। হৌজিক অনৌবা গাইদলাইন শেম্বা মতমদসু মখোয়গী কান্ননবা মপুং ফানা মিৎয়েং চংলে। মতম অসিদা রবীগী লৌ খাওবগী থবকসু পাংথোক্লি। কেন্দ্র সরকার অমসুং রাজ্য সরকারশিং পুন্না, লৌমীশিংনা খ্বাইদগী তানা অৱাবা মায়োক্ননবা হোৎনরি।

মরূপশিং, লৈবাক অসিদা হিদাক-লাংথক, চিঞ্জক অমদি অতোপ্পা দরকার ওইবা পোৎলমশিং মরাং কাইনা লৈরি অমদি সপ্লাই চেনগী অপনবশিং লেপ্পা লৈতনা লৌথোক্লি। হেল্থ ইনফ্রাস্ত্রকচরদসু ঐখোয় খুমাং চাওশিল্লি। জনুৱারীদা কোরোনাভাইরসকীদমক তেস্তিং লেব অমা খক্তা লৈরম্বা অদু হৌজিক ঐখোয় মথৌ তৌরিবা লেব ২২০ হেন্না লৈরে। গ্লোবেল এক্সপরিয়েন্সনা উৎলি মদুদি অনাবা ১০০০০ খুদিংগী বেদ ১৫০০-১৬০০ দরকার ওইরি। ভারত্তা ঙসি ঐখোয় অহেনবা ফমুং লাখ অমদগী হেন্না থৌরাং তৌরে। মসিদা নত্তনা, 600তগী হেনবা অসিগুম্বা হোস্পিতালনা, শুপ্নগী কোবিদ লাইয়েংনবগীদমক থবক তৌরি। খুদোংচাবশিং অসি খোংজেল য়াংনা হেনগৎহল্লি।

মরূপশিং, ঙসি ভারত্তা রিসোর্সশিং অকক্ননা লৈজরবসু, ভারতকী নহা ওইরিবা নহা সাইন্তিস্তশিংদা ঐহাক্না  থোইদোক্না হায়জরি মালেমগী য়াইফনবগীদমক, মীওইবগী য়াইফনবগীদমক, মাংদা থোকপীরকউ, কোরোনাগী ভেক্সিন শানবা থবক পাইরসি।

মরূপশিং, ঐখোয় অখাং কনগদবনি, কাংলোনশিং ঙাক্তুনা চৎলবদি কোরোনাগুম্বা লাইচৎ অসিসু মাইথিবা পীবা ঙমগনি। থাজবা অসিগা লোইননা লোইশিল্লকপদা ঐহাক্না ৱাফম ৭ খক অদোমদগী নীজরিঃ

অহানবা ৱাফম –

য়ুমদা লৈবা অহলশিংগী থোইদোক্না সেবা তৌবীয়ু, মরু ওইনা অরিবা অনাবা লোইনরিবা মীওইশিং, ঐখোয়না মখোয়গী এক্সত্রা কেয়র লৌবীগদনি, মখোয়বু কোরোনাদগী কনগদবনি।

অনিশুবা ৱাফম –

লোকদাউন অমসুং সোসিয়েল দিস্তেন্সিংগী লক্ষমন রেখা মপুং ফানা ঙাকপীয়ু, য়ুমদা শেম্বা ফেসকভর নত্ত্রগা মাস্ক শোইদনা শিজিন্নবীয়ু।

অহুমশুবা ৱাফম –

অদোমগী ইম্যুনিতী হেনগৎহনবীনবগীদমক, আয়ুশ মন্ত্রালয়না পীবা গাইদলাইনশিং ইনবীয়ু, ঈশিং অশাবা, অশৌবা, মসি লেপ্তনা শিজিন্নবীয়ু।

মরিশুবা ৱাফম –

কোরোনা ভাইরস শন্দোকপা থিংবদা মতেং পাংনবগীদমক আরোগ্য সেতু মোবাইল এপ দাউনলোদ তৌবীয়ু।

অতোপ্পবসু এপ অসি দাউলোদ তৌহন্নবা থৌগৎপীয়ু।

মঙাশুবা ৱাফম –

হেক ঙমলিমখৈ লাইরবা ইমুংশিংগী মতেং পাংবীয়ু, মখোয়গী চান-থক্নবগী মথৌ তাবশিং থুংহনবীয়ু।

তরেৎশুবা ৱাফম –

লৈবাক অসিগী কোরোনাগী লাল্লোইশিং, ঐখোয়গী দোক্তর-নর্সিং, সফাই কর্মী-পুলিস কর্মীবু মপুং ফানা ইকাই খুম্নবীয়ু।

মরূপশিং, মপুং ফানা চেকশিনবগা লোইননা মে 3 ফাওবা লোকদাউনকী কাংলোনশিং ঙাক্কদবনি। লৈরিবা মফম অদুদা অদুমক লৈবীয়ু, শোইদ-ঙামদনা লৈবীয়ু।

“ৱয়ম রাস্ত্রে জাগ্রুত্য”

ঐখোয় পুম্নমক্না লৈবাক অসিবু হিংহনগদবনি অমদি মিৎকপ থোকহনগদবনি।

অদোম্বু হন্না-হন্না থাগৎচরি।