ভারতকী প্রধানমন্ত্রী

ঙসি ঐনা জম্মু-কশ্মীরগী বেনিফিসরী অনিদগী আয়ুশ্মান ভারত য়োজনাগী মতাংদা মখোয়দগী তাজবগী তাঞ্জা ফংজখি। ঐগীদমক্তদি মসি শুপ্নগী অদোম্না খঙলু-উরুবা অদুখক নত্তে। করিগুম্বদা থবক তৌবদা, ৱারেপ লৌবদা, মখোয়গীদমক্তা তৌরিবশিংদগী পেঞ্জবগী ৱাহৈ ফংলকপদা, ৱাহৈ অদু ঐগীদমক্তদি থৌজালগী মশক্নি। ঐনা লাইরবশিংগীদমক্তা হেন্না থবক তৌবদা, অমসুং কন্না হোৎনজবদা অমসুং চেঞ্জবদা, অদোমগী থৌজাল অসিনা থৌনা য়াম্না হাপ্পী অমসুং চান্নরুদগী মসি য়েংবীয়ু জম্মুদা লৈবা মীওইসু অমসুং কশ্মীরগীসু, মখোয়গী অপীকপা কারবারশিং কনানা দ্রাইবর ওইবা কনানা করি করি, অদুবু অৱাবগী মতমদা স্কিম অসি মখোয়গী পুন্সিদা কয়াদা অচৌবা থবক ওইরিবনো। অদোমগী ৱাফম তারুরগা ঐহাক নুংঙাইবা ফাওই। চাউখৎ-থৌরাংগী প্রোজেক্তশিংগী কান্নবা অরোইবা মীশক অদু ফাওবা য়ৌহনবা লাইরবদগী লাইরবা ফাওবা য়ৌহনবা, মালেমগী কাচিন কোয়া খুদিংমক য়ৌহনবা, পুম্নমক্তা য়ৌহনবা অসি ঐখোয়গী সরকারগী কম্মিৎমেন্তনি। ঙসি থৌরম অসিদা শরুক য়াবীরিবা ঐগী মন্ত্রী পরিশদকী খোঙলোই গৃহ মন্ত্রী শ্রী অমিত শাহজী, হকশেল মন্ত্রী ভাই দোক্তর হর্শবর্ধনজী, পি.এম.ও.দা ঐগা লোইননা রাজ্য মন্ত্রী ওইনা থবক তৌমিন্নরিবা ভাই জিতেন্দ্র সিংহজী, জম্মু-কশ্মীরগী লেফতিনেন্ত গোভর্নর শ্রীমান মনোজ সিনহাজী, সংসদকী ঐগী অতৈ খোঙলোই পুম্নমক, জম্মু-কশ্মীরগী মীহুৎশিং অমসুং ঐগী জম্মু-কশ্মীরগী নুংশিরবা ইচিল-ইনাওশিং,

ঙসিগী নুমিৎ অসি জম্মু কশ্মীরগীদমক্তা য়াম্না পুৱারী ওইরি। ঙসিদগী জম্মু কশ্মীরগী মীপুম খুদিংমক আয়ুশ্মান য়োজনাগী কান্নবা ফংগদৌরি। হকশেলগী স্কীম – মসি মশানা য়াম্না চাউরবা খোঙথাং অমা ওইজরি। অমসুং জম্মু-কশ্মীরনা মখোয়গী মীয়ামগী চাউখৎ-থৌরাংগীদমক খোঙথাং অসি লৌখৎপা উবদা, ঐসু য়াম্না নুংঙাইবা ফাওই অমসুং মরম অসিনা শ্রীমান মনোজ সিনহাজী অমসুং মহাক্কী তীম অপুনববু, সরকারগী শিন্মী পুম্নমকপু, জম্মু-কশ্মীরগী মীয়াম্বু ঐগী মায়কৈদগী হন্না হন্না নুংঙাইবা ফোংদোকচরি। ঐনা পামজরম্বদি থৌরম অসি ঙারাংমক পাংথোকপনি, করিগুম্বা তাং ২৫দা অতলজীগী মপোক নুমিত্তা মসি পাংথোকপা ঙম্লম্লবদি অদুবু ঐগী অচিনবা খরদগী ঙরাং ঐ মসি পাংথোকপা ঙমখিদ্রে অদুনা ঙসিগী তাং অসি লেপ্পা তাখি। অতলজীনা জম্মু-কশ্মীরবু অখন্ননা নুংশিজখি। অতলজীনা ইন্সানিয়ৎ (মীওই লোনচৎ), জমহুরিয়ৎ (জমুগী মচৎ) অমসুং কশমীরিয়ৎ (কশমীরগী মচৎ)কী মতাংদা ঐখোয় ময়ামদা মথংগী থবক্কীদমক মতম পুম্বদা মায়কৈ তাকপীদুনতা লাকখি। মন্ত্র অহুম অসিবু শোঞ্জদুনা ঙসি জম্মু-কশ্মীর, ৱাখল্লোন অসিবু চেৎশিলহঞ্জরদুনা মাংদা চখৎলি।

মরূপশা,

স্কিম অসিগী কান্নবগী মতাংদা শন্দোক্না হায়দ্রিঙৈদা ঐ ঙসি, ঐনা অদোমগী নাক্তা লাকপগী  তাঞ্জা ফংজরিঙৈ অসিদা ঐনা হায়জরি মদুদি ঐনা জম্মু-কশ্মীরগী মীয়াম্বু দেমোক্রেসী অসি মপাঙ্গল কলহনবগীদমক্তা নুংঙাইবা ফোংদোকচরি, দিস্ত্রিক্ত দিবেলপমেন্ত কাউন্সিলগী মীখলনা অনৌবা তাঙ্কক অমা ইরে, ঐনা মীখলগী ফেজ খুদিংমক্তা উরি মদুদি অসুক য়াম্না ইংখ্রবা মতম অসিদসু, কোরোনা অসিদসু, নহা, অহল, নুপীশিংনা বুথ তম্না লাক্নরি। পুং কয়া পরেংদা লেপ্তুনা লেরি। জম্মু কশ্মীরগী ভোতর খুদিংমক্কী মায়থোংদা ঐনা চাউখৎপগী, দিবেলপমেন্তকী আশা উরি, অপাম্বা উরি। জম্মু কশ্মীরগী ভোতর খুদিংমক্কী মিৎলুদা ঐনা হৌখ্রবা মতমবু তুংওইনরমদুনা, হেন্না ফবা তুংলমচৎকী থাজবা উরি।

মরূপশা,

জম্মু-কশ্মীরদা মীখলশিং অসিনা মসিসু উৎখ্রে মদুদি ঐখোয়গী লৈবাক্তা দেমোক্রেসী কয়াদা মপাঙ্গল কল্লিবনো অমসুং ঐনা মসিসু হায়জনীংই মদুদি জম্মু-কশ্মীরগী লৈঙাক, সেক্যুরিতী ফোর্সনা মতৌ অসুম্না মীখল শিনখিবা অসিদা দল পুম্নমক্কী মায়কৈদগী মীখল অসি য়াম্না ত্রান্সপরেন্ত ওইনা পাংথোকখি, পুচেল শেংনা পাংথোকখি। পুমনমক অসি ঐনা তারুবদা অদুক্কী মতিক চাউথোকচবা পোকচখি মদুদি জম্মু-কশ্মীরগী মীখল চুম্না পাংথোকপা, মনীং তম্না পাংথোকপা, ৱাফম অসি জম্মু-কশ্মীরগী মায়কৈদগী তারুবদা দেমোক্রেসীগী মপাঙ্গলদা ঐখোয়না থাজবা হেন্না কনশিল্লি। ঐনা লৈঙাকপুসু, সেক্যুরিতী ফোর্সপুসু হন্না হন্না নুংঙাইবা ফোংদোকচরি। অদোম্না তৌখিবদু থবক মচা নত্তে, য়াম্না চাউখ্রবা থবক্নি। ঙসি ঐনা করিগুম্বা হকথেংননা উন্নরম্বা ওইরম্লবদি লৈঙাক্কী মীওইশিংদা অদুক্কী মতিক থাগৎলমগনি, ৱাহৈতনা ৱাৎহৌগনি। অসুক চাউখ্রবা থবক অমা অদোম্না পাংথোক্লে। ঐখোয়গী লৈবাক্তা অনৌবা থাজবা অমা পোকহল্লে অমসুং মসিগী মপুং ফানা ক্রেদিৎ অসি মনোজজী অমসুং মহাক্কী সরকারগী, লৈঙাক্কী মীপুম খুদিংমক্তা পীরি। ভারতকীদমক্তা চাউথোকচনীংঙাইগী মিৎকুপ্নি।

মরূপশা,

পুদুচেরীদা চহি তরাগী খুজিং কয়া ঙাইরবা মতুংদা ২০০৬তা লোকেল বোদী পোল্স পাংথোকখি। মীখলশিং অদুদা খনখিবশিং অদুগী থবক তৌবগী মতম ২০১১দা লোইখ্রে। রাজনীতি দল খরগী হায়দোকখিবা অমদি তৌথোরকপদা কয়াদা খেন্নিরিবনো, দেমোক্রেসীগী মায়কৈদা মখোয়না কয়াম লুম্না লৌরিবা, মসি ৱাফম অদুদগীসু খঙবা ঙম্মি। চহি কয়া হৌখ্রবসু, পুদুচেরীদা পঞ্চায়ৎনচিংবগী মীখল তৌহন্দ্রি।

ইচিল-ইনাওশা,

কেন্দ্র সরকারনা লেপ্তনা হোৎনরি মদুদি খুঙ্গংগী চাউখৎ-থৌরাংদা, খুঞ্জাশিংগী থৌদাং খ্বাইদগী য়াম্না শরুক য়াবা। প্লানিংদগী হৌরগা পাংথোকপা অমদি য়েংশিনবা ফাওবা পঞ্য়াতী রাজগী মরী লৈনবা ইন্সতিত্যুৎশিংদা হেন্না পাঙ্গল হাপ্লি। অদোম্নসু উবীরমগনি, লাইরবশিংগা মরী লৈনবা মথৌ তাবশিং মপুং ফাহন্নবগীদমক্তা পঞ্চায়তশিংগী থৌদাং হৌজিক কয়াদা চাউরিবনো। মসিগী কান্নবা জম্মু কশ্মীরদসু উবা ফংলে। জম্মু কশ্মীরগী খুঙ্গং খুঙ্গংদা ইলেক্ত্রিক য়ৌরে। মফম অসিগী খুঙ্গং ঙসিদি লমহাংদা মাংশিনবা তৌকখ্রে। খুঙ্গং খুঙ্গং ফাওবা শরক য়ৌহন্নবগীদমক মনোজজীগী মিৎয়েং মখাদা লৈঙাক অপুনবনা অরুবশিংগী মরক্তসু খোঙজেল য়াংনা মাংদা চখৎলি। মথংগী চহি ২-৩ অসিদা রাজ্যগী য়ুমথোং খুদিংদা পাইপ্তগী ঈশিং য়ৌহন্নবা কন্না হোৎনরি। জম্মু-কশ্মীরদা লোকেল গোভর্নেন্স মপাঙ্গল কলহনবনা, দিবেলপমেন্তকী থবক্তা খোঙজেল হেন্না য়াংহনগনি।

মরূপশা,

ঙসি জম্মু-কশ্মীরগী মীয়ামগী চাউখৎপা অসি ঐখোয়গী সরকারগী খ্বাইদগী মকোক থোংবা  মরুওইবশিংগী মনুংদা অমনি। নুপীদা শক্তি শিন্নববু ওইরো, নহাশাংদা তাঞ্জা ফংহনবগী ৱাফম্বু ওইরো, দলিৎশিং-শোৎথরিবশিংগী – তুহৎপীরবা-লাইরবশিংগী য়াইফ-থৌরাংগী পান্দম্বু ওইরো নত্ত্রগা মীয়ামগী কন্সতিত্যুস্নেল অমসুং ফন্দামেন্তেল রাইৎ, ঐখোয়গী সরকারনা রাজ্য সরকারগী কান্ননবগীদমক ৱারেপ লৌরি। ঙসি পঞ্চায়তী রাজগুম্বা ইন্সতিত্যুৎশিংনা থাজবগী মতিং লৈরবা পাউজেল অসি শন্দোক্লি। ঙসি ঐখোয়না মীয়ামদা মসি থাজহনবা ঙম্লে মদুদি অহোংবা পুরকপা ওইথোকই অমসুং অহোংবা অদু মখোয়গী খল্লবা পামজবা মীহুৎনা পুরকপা ঙমগনি। মখোঙদগী হৌবা দেমোক্রেসী পুরক্তুনা ঐখোয়না মীয়ামগী অপাম্বশিং অদুদা তাঞ্জা পীরি। জম্মু-কশ্মীরগী মসিগী চাউরবা লন-থুম অমসুং মসিগী নীংথিজরবা মীয়াম্না মখোয়গী লমদম অসিবু মপাঙ্গল কলহন্নবগীদমক পাম্বৈশিং শিজিন্নরি, অনৌবা পাম্বৈশিং পুথোক্লি।

মরূপশা,

জম্মু-কশ্মীরগী পুন্সি লম্বী কৌনরিবা ঝেলম তুরেলদা, রাবী, ব্যাস, সতলুজনা ইতিন্নদ্রিঙৈ মমাংদা তুরেল মচা ময়াম অমসু তিল্লরি অমসুং মতুংদা তুরেল ময়াম অসি অচৌবা সিন্ধু তুরেলদা তিনখি। অচৌবা সিন্ধু তুরেল অসি ঐখোয়গী সভ্যতা, ঐখোয়গী নাৎ অমসুং চাউখৎপগী খোঙচৎকী খুদম্নি। মতৌ অসুম্না চাউখৎপগী খোঙজংসু তুরেল মচাশিংনা, মতেং পাংবা তুরেল ওইনা ইচেল কয়াদা চেন্থরি অমসুং অচৌবা ইচেল অমা শেম্মি। ৱাখল্লোন অসিগা লোইননা ঐখোয়না হকশেলগী লমদসু অহোংবা পুরক্নবা হোৎনরি। ঐখোয়গী চৎনবীনা অপীক অপীকপা ইচেল কয়াগুম্না স্কিম কয়া হৌদোক্লি অমসুং পুম্নমক্কী পান্দম অমখক থম্লি – হকশেলগী লমদা য়াওলগী ওইবা অহোংবা পুরকপা। ঐখোয়না উজ্জ্বলা য়োজনাগী মখাদা লৈবাক অসিগী ইচলশিংদা, ইচা নুপীশিংদা গ্যাস কনেক্সন পীখিবদা, শুপ্নগী শিং ফংহন্নবা স্কিম অমখক ওইনা উরোইদবনি। ঐখোয়না মসিগী থোংদা ঐখোয়গী ইচল-ইচাশিংবু মৈখুদগী কনখি, ইমুং অপুনবগী হকশেলবু ফগৎহন্নবা হোৎনখি। লাইচৎকী মনুংদসু জম্মু-কশ্মীর অসিদা চাউরাক্না গেস সিলিন্দর লাখ ১৮ রিফিল তৌহনখি। মতৌ অসুম্না স্বচ্ছ ভারত অভিয়ানগী খুদম য়েংবীয়ু। খোঙজং অসিগী মখাদা জম্মু কশ্মীরদা লাখ ১০দগী হেনবা তোইলেৎ শাখ্রে। অদুবু মসিগী পান্দম শুপ্নগী অমাঙশঙ শাবদা লোইদে, মসিনা মীয়ামগী হকশেলবু হোংদোক্নবসু হোৎনখি। অমাঙশঙদগী লুবা নানবদি ওইরক্লে, লাইনা কয়ামরুম অমসু থিংবা ঙম্লে। হৌজিক মসিগী মখা চৎথরকপা ওইনা ঙসি জম্মু-কশ্মীরদা আয়ুশ্মান ভারত-হকশেলগী স্কিম হৌদোক্লে। অদোম খনবীয়ু, স্কিম অসিনা লুপা লাখ ৫ ফাওবগী লেম্না লায়েংবা ফংলগদি পুন্সিদা কয়াদা চাউনা খুদোংচাবা ফংলগদবা। হৌজিক আয়ুশ্মান ভারত য়োজনাগী কান্নবা রাজ্যগী চাউরাক্না ইমুং লাখ ৬না ফংলি। হকশেলগা থৌরাংগী মতুংদসু কান্নবা অসি ইমুং লাখ ২১না ফংগনি।

মরূপশা,

হৌখিবা চহি ২রোমদা, লাইরবা করোর অনি মখাইদগী হেনবনা আয়ুশ্মান ভারত য়োজনাগী কান্নবা লৌখ্রে। মসিদগী জম্মু কশ্মীরগী মীয়ামসু অৱাবগী মতমদা তেংবাং য়াম্না ফংখ্রে। মফম অসিগী চাউরাক্না লাইরবা অনাবা লাখ অমরোমগী হোস্পিতালদা লুপা লাখ ৫ ফাওবা লেম্না লায়েংখ্রে। মদুদসু খ্বাইদগী য়াম্না লায়েংলিবা লাইনাশিং অদুগী মনুংদা কেন্সর, হার্ত অমসুং তাং চিকপা-নাবগা মরী লৈনবা লাইনাশিংনা খ্বাইদগী হেল্লি। মসি লায়েংবদা কনাগুম্বা লাইরবা অমগী নুং-পান ওনগদবা লাইনাশিংনি অমসুং ঐখোয়নদি উরে মদুদি কনাগুম্বা লাইরবা ইমুং অমনা ৱানা হোৎনদুনা খরা কাখৎচরকপদা অমসুং ময়াই ওইবা থাক্কী কাংবুনা খরগা হেন্না কাখৎচরকপদা ইমুংদা কনাগুম্বনা নারকপা মতমদদি অমুক হন্না মখোয় লাইরবগী চাগোইনুংদা উংদুনা লৈ।

ইচিল-ইনাওশা,

জম্মু-কশ্মীরগী নুংশিৎ অসি অদুক্কী মতিক শেংই, নুমিৎকী মোৎপা অদুক্কী মতিক হন্থৈ মদুদি মহৌশাদগী পুম্নমক্না পাম্নৈ অমসুং ঐদি অদোম মতম পুম্বদা হকচাং ফনা লৈবা অসি পাম্মি। হোয়, হৌজিক্তি ঐ মসিদা থাজবা ফংলে মদুদি অনাবগী ফিভমদা আয়ুশ্মান ভারত-হকশেলগী স্কিম্না অদোমগী খোঙলোই অমা ওইনা লৈরগনি।

মরূপশা,

স্কিম অসিগী অতোপ্পা কান্নবা অমগা লৈরি মসিগী মতাংদা হন্না হন্না পনবা মথৌ তাই। অদোমগী লাইয়েং অদু শুপ্নগী জম্মু কশ্মীরগী সরকারগী অমসুং প্রাইবেৎ হোস্পিতালশিং খক্তদা অকক্নবা লৈরোই। লৈবাক অসিদা স্কিম অসিগী মখাদা য়াওরিবা হোস্পিতাল লিশিং কয়া অসিগী কান্নবসু অদোম্না ফংগনি। খনবীয়ু অদোম মুম্বৈদা চৎলি অমসুং খঙহৌদনা মথৌ তারক্লবদি কার্দ অসিনা মুম্বৈদসু অদোমগী থবক তৌগনি। অদোম্না চেন্নৈদা চৎপদা মফম অদুদসু মসি কান্নগনি, মফম অদুগী হোস্পিতালসু লেম্না অদোমগী সেবা তৌগনি। অদোম্না কোলকতা চৎলবদি, মফম অদুদা অৱাবা ওইগনি মরমদি মফম অদুগী সরকার আয়ুশ্মান য়োজনাগা মরী লৈনদে, খরদি অদুম য়াওই করি তৌরুনি। লৈবাক শিনবা থুংনা লিশিং ২৪দগী হেনবা হোস্পিতাল হৌজিক লৈরি, মফম অদুদা হকশেলগী স্কিমগী মখাদা অদোম্না লায়েংবা য়াগনি। অপনবা অমত্তা লৈতে, অথিংবা অমত্তা লৈতে। কনাদসু কমিশন পীরোই, কৎকীদি মমিং ফাওবা য়াওদে, হায়জ-নোঞ্জবা অমত্তা তৌরোই, শেঞ্জা-থুমজা অমত্তা লৈতে। হকশেলগী স্কিমগী কার্দ উৎলগা, অদোম্না মফম খুদিংদা লায়েংবগী খুদোংচাবা ফংগনি।

মরূপশা,

জম্মু-কশ্মীর হৌজিক লৈবাক অসিগী চাউখৎ-থৌরাংগা লোইননা লেংজুম লেংজুম ঙাননা চৎমিন্নরি। কোরোনাগীবু ওইরবসু মতৌ অসুম্না রাজ্যদা থবক পায়খৎলিবা অসি শিংথানীংঙাইনি। ঐঙোন্দা তমখি মদুদি লিশিং ৩দগী হেনবা দোক্তরশিং, লিশিং ১৪দগী হেনবা পেরামেদিকেল স্তাফ, আশা ৱাকরশিংনা অহিং-নুংথিল লেপ্তনা থবক তৌরি। মসিগী তেল্লবা মতমগী মনুংদা রাজ্যগী হোস্পিতালশিংদা কোরোনাগা মায়োক্ননবসু শেম-শাখি। অসিগুম্বা থৌরাংশিংনা মরম ওইদুনা কোরোনাদগী অনাবা কয়া কনবদা ঐখোয় মায় পাকপা ফংলি।

ইচিল-ইনাওশা,

জম্মু কশ্মীরদা হেল্থ-সেক্তরদা ঙসি অদুক্কী মতিক পুক্নীং চিংশিল্লিবা অসিগুম্না হান্না অমুক্তা তৌখিদ্রি। আয়ুশ্মান ভারত য়োজনাগী মখাদা রাজ্য অসিদা ১১০০দগী হেনবা হেল্থ এন্দ ৱেলনেস সেন্তর শাননবা পান্দম থম্লি। মসিগী মনুংদা ৮০০দগী হেন্না থবক মপুং ফাখ্রে। জন ঔশধী কেন্দ্রশিংদা য়াম্না অতাবা মমলদা ফংলিবা হিদাকশিং অমসুং ফ্রী দায়লাইসিসকী খুদোংচাবা অসিনসু মীওই লিশিং কয়াদা কান্নবা ফংহল্লে। জম্মু অমসুং শ্রীনগর দিবিজন্দা মফম অনিদা কেন্সর ইন্সতিত্যুৎ ২সু শাগৎলি। এম্স অনিগী থবকসু খোঙজেল য়াংনা পায়খৎলি। নহাশিংবু মেদিকেল অমসুং পেরামেদিকেল এজুকেসনগীদমক্তা জম্মু কশ্মীর মক্তদা খ্বাইদগী হেন্না তাঞ্জা ফংনবগীদমক্তসু থবক পায়খৎলি। জম্মু কশ্মীরদা অনৌবা মেদিকেল কোলেজ ৭কী অয়াবা ফংখ্রে। মসিদগী এম.বি.বি.এস.কী সীৎ শরুক অনিদগী হেন্না ফংগদৌরি। মসিদা নত্তনা অয়াবা পীখ্রবা অনৌবা নর্সিং কোলেজ ১৫ অসিদগী, নহাশিংগীদমক্তা অনৌবা তাঞ্জা শেম্লগনি। মসিদা নত্তনা জম্মুদা আই.আই.তি. অমসুং আই.আই.এম. লিংখৎপা অসিনসু মফম অসিগী নহাশিংদা হাইয়র এজুকেসনগী হেন্না ফবা তাঞ্জা ফংহল্লগনি। রাজ্য অসিদা স্পোর্ত ফেসিলিতীগীদমক্তা প্রোজেক্তশিং হৌদোক্লি, মসিনা মফম অসিগী তেলেন্ত অসি স্পোর্তকী তাইবঙদা মকা ফোংবদা মতেং পাংগনি।

ইচিল-ইনাওশা,

হেল্থকা লোইননা অতোপ্পা ইনফ্রাস্ত্রকচরদসু জম্মু কশ্মীরগী খোঙথাং খোঙজেল য়াংনা মাংদা থাংজিল্লি। হৌখিবা চহি ২-৩ অসিদা মসিগী মতমদা করম্না খোঙজেল য়াংশিনখিবা, মসিগী হেন্না ফবা খুদম হাইদ্রো পাৱরনি। চহি তরাগী খুজিং ৭তা জম্মু কশ্মীরদা ইলেক্ত্রিক মেগাৱাৎ লিশিং ৩ মখাইগী কেপাসিতী শেম-শাখি। হৌখিবা চহি ২-৩রোম অসিদা মেগাৱাৎ লিশিং ৩গী কেপাসিতী অমক্কা হাপচিনখি। প্রাইম মিনিস্তর দিবেলপমেন্ত পেকেজগী মখাদা পায়খৎলিবা প্রোজেক্তশিংদসু হৌজিক খোঙজেল য়াম্না য়াংনা থবক পায়খৎলি। মরুওইনা কনেক্তিবিতীগা মরী লৈনবা প্রোজেক্তশিংদগী রাজ্যগী মশক অমসুং মরাইবক অনিমক হোংদোক্কদৌরি। ঐনা চিনাবতা শারিবা হেন্না ফবা রেলৱে ব্রিজগী শক্তমশিং উরে অমসুং ঙসি ঙরাং অসি সোসিএল মীদিয়াদা হিন্দুস্তানগী মীপুম খুদিংমক্না উবীরম্বা য়ারে। শক্তমশিং অদুবু উরুরগা করম্বা মীওইনা চাউথোকচবা পোক্লোইদবগে। মথংগী চহি ২-৩দা ৱৈলীগা কনেক্ত তৌননবা রেলৱেনা কন্না হোৎনরি। জম্মু অমসুং শ্রীনগরদা লাইৎ রেল ত্রাঞ্জিৎ মেত্রোগী মতাংদসু ৱারী খুমাং চাউশিল্লি। বনিহাল তনেলবুসু মথংগী চহি ফাওবগী মনুংদা মপুং ফাহন্নবগীদমক হোৎনরি। জম্মুদা পায়খৎলিবা সেমি রিং রোদকী থবক অসিসু অথুবা মতমদা লোইশিন্নবা সরকারনা হোৎনরি।

মরূপশা,

কনেক্তিবিতী হেন্না ফবা ওইরবদি মদুদগী তুরিজম অমসুং ইন্দস্ত্রী অনিমক্তা পাঙ্গল হাপ্পি। তুরিজম জম্মুগীসু পাঙ্গল ওইরি অমসুং কশ্মীরগীসু পাঙ্গল ওইরি। কনেক্তিবিতীগী স্কিমশিং অসিদা সরাকরনা থবক তৌরি, মদুদগী জম্মুসু কান্নবা ফংগনি অমসুং কশ্মীরসু কান্নবা ফংগনি। কারপেত্তগী হৌরগা কেসর ফাওবা, সেমদগী হৌরগা বাসমতী ফাওবা জম্মু কশ্মীরদা করিবু লৈতবগে? কোরানাগী মরমদগী তৌখিবা লোকদাউনগী মতমদসু সরকারনা ৱাফম অসিদা পুক্নীং চংখি মদুদি মফম অসিগী এপ্পলনা লৌমীশিংগী অৱাবা ঙম্লিবমখৈ হন্থহনবা। কৈথেলদা অচুম্বা মওংদা মতম চানা পোৎ য়ৌহন্নবা, ঐখোয়গী সরকারনা থা খরগী মমাংদা ৱারেপ অসিসু লৌখি মদুদি এপ্পল লৈনবগীদমক্তা মার্কেৎ ইন্তর্ভেন্সন স্কিম অদু হৌখিবা চহিগুম্না হন্দক্কী চহিদসু চৎনখিগনি। মসিগী মখাদা সরকারনা এপ্পল লৈবগী থবক, নাফেদকী থোংদা অমসুং লৌমীশিংদগী হকথেংননা পাংথোক্লি। লৈরিবা এপ্পলশিং অদুগী পেমেন্তসু দাইরেক্ত বেনিফিৎ ত্রান্সফরগী থোংদা হকথেংননা লৌমীগী একাউন্ততা য়ৌহল্লি। স্কিম অসিগী মখাদা এপ্পল মেত্রিক তন লাখ ১২ লৈবা ঙম্মি অমসুং মসি জম্মু-কশ্মীরগী লৌমীশিং অমরোমদা য়াম্না চাউবা কান্নবা অমা ওইরি। ঐখোয়গী সরকারনা নাফেদপু ৱাফম অসিগীদমকসু অয়াবা পীরে মদুদি মখোয়না লুপা করোর ২৫০০গী সরকারগী গরেন্তী শিজিন্নবা য়ারগনি। এপ্পল লৈনবগীদমক্তা, অনৌবা মার্কেতিং প্লেৎফোর্ম ফংহন্নবগীদমক্তা, ত্রান্সপোর্তেসনগী খুদোংচাবশিং হেনগৎহনবদা সরকারনা লেপ্তনা খুমাং চাউশিল্লি। এপ্পলগী স্তোরেজগীদমক্তা সরকারনা পাংলিবা মতেং অসিদগীসু লৌমীশিংনা য়াম্না কান্নবা ফংলে। মফম অসিদা অনৌবা ফার্মর প্রদ্যুসর ওর্গনাইজেসন – এফ.পি.ও. শেম্নবা, মশিং য়াম্না শেম্নবা, মসিগীদমক্তসু লেপ্তনা লৈঙাক্না হোৎনরি। অনৌবা লৌউ-শিংউগী রিফোর্মশিংনা জম্মুদসু অমসুং তম্পাক্তসু, মফম অনিমক্তা ফুদ প্রোসেসিং ইন্দস্ত্রীগীদমক্তা অনৌবা তাঞ্জা শেম্লে। মসিদগী মীওই লিশিং কয়ানা, থবক ফংবা অমসুং মশানা মশাবু থবক পীজবগী খুদোংচাবা ফংগদৌরি।

ইচিল-ইনাওশা,

ঙসি জম্মু-কশ্মীরদা নাকল অমরোমদা সরকারগী থবক লিশিং কয়া নোতিফাই তৌরি, অদুগা নাকল অমরোমদনা সেল্ফ-ইম্প্লোইমেন্তকীদমক্তসু খোঙথাং পায়খৎলি। বেঙ্ককশিংগী খুৎথাংদা হৌজিক জম্মু কশ্মীরদা ললোন ইতিক তৌবা নহারোলশিংনা লাইনা লোন ফংবা হৌরে। মসিদসু ঐখোয়গী ইচলশিং, সেল্ফ হেল্প গ্রুপশিংগা মরী লৈনরিবশিংনা মশিং খ্বাইদগী য়াম্না মাংদা থোরক্লি।

মরূপশা,

মমাংদা লৈবাক অসিগীদমক শেমখিবা স্কিম অয়াম্বা, শেমখিবা কাংলোন, মদুদা ইনরম্মি – এক্সেপ্ত জে. অমসুং কে. হৌজিক মদু পুৱারী ওইরে। জম্মু অমসুং কশ্মীরনা চংশিল্লিবা শান্তি অমসুং চাউখৎপগী লম্বী অসিনা রাজ্য অসিদা অনৌবা ইন্দস্ত্রীশিং লাক্নবগী লম্বীসু শেম্লি। ঙসি জম্মু-কশ্মীরনা আত্মনির্ভর ভারতকী খোঙজংদা মখোয়গী থৌদাং য়ারি। হান্না এপ্লিকেবল ওইরমদবা অদু হৌজিক এদমিনিস্ত্রেসনগী শরুক ওইরে। জম্মু-কশ্মীরগী মীয়ামগী হক্কী তাঞ্জানি।

মরূপশা,

ঐখোয়গী সরকারনা ৱারেপশিংগী মতুংদা, অহানবা ওইনা জম্মু কশ্মীরগী লাইরবা মীচমগী কাংলুপ্না রিজর্বেসনগী কান্নবা ফংলে। অহানবা ওইনা চিংগী মীওইশিংনা রিজর্বেসনগী খুদোংচাবা ফংলে। ইন্তর্নেস্নেল বোর্দরদা লৈরিবশিংবুসু চাদা ৪গী রিজর্বেসনগী কান্নবা ঐখোয়গী সরকারনা পীরে। ফোরেস্ত এক্ত চৎনহনখিবদগীসু মীয়াম্না অনৌবা হক ফংলে। মসিদগী গুজ্জর বকরৱাল, সেদ্যুল ত্রাইবশিং অমসুং ত্রেদস্নেল ওইবা মওংদা উমংশিংগী অকোইবদা লৈরিবশিংনা উমংগী লম শিজিন্নবগী কাংলোনগী ওইবা হক ফংলে। হৌজিক কনাদসু খেন্নবগী ৱাফম থমদ্রে। জম্মু কশ্মীরদা মমাংঙৈদগী লৈরক্লবা মরূপশিংদা দোমিসাইল সর্তিফিকেৎসু পীরে। মসিবুনি সবক সাথ, সবকা বিকাস, সবকা বিশ্বাস হায়রিবসে।  

মরূপশা,

ঙমখৈ ৱাংমদগী তৌরকপা শেলিংনা মতম পুম্নমক্তা অৱাবগী মরম অমা ওইহল্লি। শেলিংগী অৱাবা অসিগী পাম্বৈগীদমক্তা বোর্দরদা বঙ্কর শাবগী থবক খোঙজেল য়াংনা পায়খৎলি। সাম্বা, পুঞ্ছ, জম্মু, কথুআ অমসুং রাজৌরীগুম্বা সেন্সিতিব ওইবা মফমশিংদা মশিং য়াম্না শুপ্নগী বঙ্কর শাবতা নত্তনা মীয়ামগী ঙাক-শেলগীদমক্তা লান্মী অমসুং সেক্যুরিতী ফোর্সশিংসু মনীং তম্বা পীরি।

মরূপশা,

ঐখোয়গী লৈবাক্তা চহি কয়া লৈঙাকলম্বা মখোয়গী, য়াম্না চাউবা অশোইবা অমদি মসিসুনি মদুদি মখোয়না ঙমখৈ হায়বদি ঙমখৈগী মনাক্তা লৈবা মফমশিংগী চাউখৎ-থৌরাং অদু মপুং ফানা থৌশাখিদে। মখোয়গী সরকারগী ৱাখল্লোন অসিনা জম্মু-কশ্মীর ওইরো নত্ত্রগা নোর্থ ইস্ত ওইরো, লমদম অসোম্না শোৎথনা লৈবা তাখি। পুন্সিগী য়ুম্ফম ওইবা মথৌ তাবশিং, ইকাই খুম্ননীংঙাই ওইরবা পুন্সি অমগী মথৌ তাবশিং, চাউখৎ-থৌরাংগী মথৌ তাবশিং, মীচম মীয়াম ফাওবদা য়ৌশিনফম থোকপা অদু ফাওবা য়ৌশিনবা ওইখিদে। অসিগুম্বা ৱাখল্লোন অসিনা কৈদৌঙৈদসু লৈবাক্কী মান্নবা চাউখৎপা পুরকপা ঙমদে। অসিগুম্বা শেরান্নবা ৱাখল্লোন অসিগী মফম ঐখোয়গী লৈবাক অসিদা লৈতে। ঙমখৈগী মনাক্তা নত্ত্রগা ঙমখৈদগী লাপ্পা মফমদা। ঐখোয়গী সরকারগী ফিরেপ্তি লৈবাক অসিগী মফম অমা হেক্তা চাউখৎপগী ইচেলদা হৌজিক চিৎথবা লৈহল্লরোই। অসিগুম্বা মফমশিংদা মীয়ামগী হেন্না ফবা পুন্সিনা ভারতকী অমত্তা ওইবা অমদি মখল-মখা অসিসু মপাঙ্গল কলহনগনি।

মরূপশা,

লৈবাক্কী মফম খুদিংমক চাউখৎনবা, জম্মুগী চাউখৎনবা, কশ্মীরগী চাউখৎনবা, ঐখোয়না লেপ্তনা মসিগীদমক থবক তৌগদবনি। ঐনা অমুক্কা হন্না শ্রীমান মনোজ সিনহাজীবু অমসুং মহাক্কী তীম্বু ঙসি শোইদনা নুংঙাইবা ফোংদোকচবা পামজৈ হৌজিক মনোজজীগী ৱারোল তারুবদা, থবক কয়ামরুমগী মহাক্না গিনার অমসুং জম্মু-কশ্মীরগী মীয়ামগী মরক্তা লেপ্তুনা মশিং থিখি। অদুক্কী মতিক খোঙজেল য়াংনা থবক পায়খৎলিবা অদুনা, লৈবাক অপুনবা অসিদা অনৌবা থাজবা, অনৌবা আশা পোকহল্লগনি অমসুং ঐনা থাজৈ জম্মু-কশ্মীরগী মীয়ামদা চহি তরাগী খুজিং কয়াদগী মপুং ফাদনা লৈরক্লবা থবক অদু মনোজজী অমসুং মতম অসিগী লৈরিবা এদমিনিস্ত্রেতিবকী তীম অসিগী থোংদা শোইদনা মপুং ফাহল্লগনি, মতমগী মমাংদা মপুং ফারগনি। অসুম্না ঐনা মপুং ফানা থাজৈ। অমুক্কা হন্না অদোম পুম্নমক্তা হকশেলগী স্কিমগীদমক্তা, আয়ুশ্মান ভারত য়োজনাগীদমক্তা হন্না হন্না নুংঙাইবা ফোংদোকচরি। ইমা বৈশনবী দেবী অমসুং বাবা অমরনাথকী থৌজাল ঐখোয় পুম্নমক্তা পীনবীবা ওইসনু। নীংজবা অসিগা লোইননা হন্না হন্না থাগৎচরি!

*****