ভারতকী প্রধানমন্ত্রী

জপান-ইন্দিয়া সেমিকন্দক্তর সপ্লাই চেন পার্তনরশিপকী মতাংদা ভারতকী ইলেক্ত্রোনিক্স অমসুং ইনফোর্মেসন তেক্নোলোজি মিনিস্ত্রি  অমসুং জপানগী ইকোনোমি, ত্রেদ অমসুং ইন্দস্ত্রি মিনিস্ত্রিগী মরক্তা জুলাই ২০২৩দা খুৎয়েক পীনখিবা মেমোরেন্দম ওফ কোপরেসন(এম ও সি) অমা প্রধান মন্ত্রী শ্রী নরেন্দ্র মোদীনা লুচিংবা কেন্দ্রগী মন্ত্রীমন্দলনা অয়াবা পীখ্রে।

উদোগশিং অমসুং দিজিতেল তেক্নোলোজিশিং চাউখৎহনবদা সেমিকন্দক্তরশিংগী মরুওইবশিং খঙদুনা, ভারত অমসুং জপানগী মরক্তা সেমিকন্দক্তর সপ্লাই চেন হেনগৎহন্নবা এম.ও.সি অসিনা পান্দম থম্লি। লৈবাকশিংনা খুৎয়েক পীনখিবা তারিক্তগী  এম.ও.সি অসি চৎনবা হৌগনি অমসুং মসি চহি মঙাগী মতম চৎনগনি।

সেমিকন্দক্তর সপ্লাই চেন লেংদনা লৈহন্নবা অমসুং অমা অমগী মতেং পাংননবা লৈবাক অনিমক্না জি২জি অমসুং বি২বি গী লমদা মতেং পীনগনি। এম.ও.সি অসিনা মতেং পাংনবা হেনগৎহন্দুনা আই.তিগী লমদা থবক ফংবা হেনগৎহনগনি।

নুঙগীৱারোল

ইলেক্ত্রোনিক্সশিংগী অফবা ফিবম অমা শেমগৎনবা ভারতকী ইলেক্ত্রোনিক্স অমসুং ইনফোর্মেসন তেক্নোলোজি মিনিস্ত্রিনা ফজনা থবক পায়খৎলি। ভারত্তা অফবা অমসুং তুংকোইনা লৈহৌবা য়াবা সেমিকন্দক্তরগী ফিবম অমা শেমগৎনবা মীৎয়েং অমদা, ভারত্তা সেমিকন্দক্তর অমসুং দিসপ্লে শাবগী থবক চাউখৎনবা থৌরম চৎনবা হৌরে। হায়রিবা থৌরম অদুনা সেমিকন্দক্তর ফেবস, দিসপ্লে ফেবস, কম্পাউন্দদ সেমিকন্দক্তরশিং/সিলিকোন ফোতোনিক্স/সেন্সরশিং/দিসক্রিদ সেমিকন্দক্তরশিংগী ফেবশিং অমসুং সেমিকন্দক্তর  এশেমব্লি, তেস্তিং, য়োনবা অমসুং পেকেজিং/আউতসোর্স সেমিকন্দক্তর এসেমব্লি এন্দ তেস্ত(ও এস এ তি) গী খুদোংচাবশিং লিংখৎপদা শেন্থং পীগনি। ভারত্তা সেমিকন্দক্তর অমসুং দিসপ্লে মেনুফেকচরিংগী থবক চাউখৎনবা ভারতকী লাল্লোংশিং ফগৎনবা দিজিতেল ইন্দিয়া কোর্পোরেসন(দি আই সি)গী মখাদা ইন্দিয়া সেমিকন্দক্তর মিসন(আই এস এম) লিংখৎলে।

ইলেক্ত্রোনিক্স অমসুং ইনফোর্মেসন তেক্নোলোজি মিনিস্ত্রিনা লৈবাক অনিগী অমসুং রিজনেল ফ্রেমৱার্কশিংগী মখাদা ইনফোর্মেসন তেক্নোলোজিগী অনৌবা হিরমশিংদা মালেমগী থাক্তা মতেং পীনবা হেনগৎহন্নবা থবক পায়খৎলে। মসিগী পান্দম অসিগা লোয়ননা, লৈবাক অনিগী মরক্তা মতেং পাংনবা হেনগৎহন্নবা অমসুং ই-পাউ পীথোক-পীশিন তৌননবা অমসুং লেংদবা সপ্লাই চেন লৈহন্দুনা ভারত থাজবা য়াবা মরুপ অমা ওইহন্নবা ইলেক্ত্রোনিক্স অমসুং ইনফোর্মেসন তেক্নোলোজি মিনিস্ত্রিনা তোঙান-তোঙানবা লৈবাকশিংগী লুপশিং/এজেন্সিশিংগা এম.ও.য়ুশিং/এম.ও.সিশিং/য়ানচেশিং খুৎয়েক পীনরে। এম.ও.য়ু অসিগী মখাদা জপান অমসুং ভারতকী মরক্তা অমা অমগী মতেং পাংনবা হেনগৎহনবা অসি সেমিকন্দক্তরগা মরী লৈনবা ললোন-ইতিক্কী খুদোংচাবশিং অমসুং ভারত অমসুং জপানগী মরুপ-মপাংগী মরীদা কান্নবা পীগদবা মাইকৈদা থাংজিনবা অতোপ্পা খোঙথাং অমনি।

ওক্তোবর ২০১৮দা প্রধান মন্ত্রী শ্রী নরেন্দ্র মোদীগী জপান খোঙচৎ মনুংদা লৈবাক অনিগী মরক্তা “ইন্দিয়া-জপান দিজিতেল পার্তনরশিপ(আই জে দি পি) হৌদোকখি অমসুং মসিনা দিজিতেল আই.সি.তি তেক্নোলোজিশিংদা মীৎয়েং থমদুনা সাইন্স অমসুং তেক্নোলোজি/আই.সি.তিগী লমদা মতেং পাংনবা হেনগৎহনগনি। হৌজিক চৎথরিবা আই.জে.দি.পি অমসুং ইন্দিয়া-জপান ইন্দস্ত্রিএল কম্পিতিতিপনেস পার্তনরশিপ(আই জে আই সি পি)দা য়ুম্ফম ওইদুনা, জপান-ইন্দিয়া সেমিকন্দক্তর সপ্লাই চেন পার্তনরশিপকী এম.ও.সি অসিনা ইলেক্ত্রোজিক্স সিস্তেমশিংগী লমদা মতেং পাংনবা পাকথোক-চাউথোকহনগনি। উদোগশিং অমসুং দিজিতেল তেক্নোলোজিশিং চাউখৎহনবদা সেমিকন্দক্তরশিংগী মরুওইবশিং খঙদুনা, ভারত অমসুং জপানগী মরক্তা সেমিকন্দক্তর সপ্লাই চেন হেনগৎহন্নবা এম.ও.সি অসিনা পান্দম থম্লি।

******