ভারতকী প্রধানমন্ত্রী

প্রধান মন্ত্রী, শ্রী নরেন্দ্র মোদীনা ঙসি গোৱা লৈঙাক্কী রোজগার মেলাদা ভিদিও কন্ফরেন্সিংগী খুত্থাঙদা ৱা ঙাঙখ্রে‍।

প্রধান মন্ত্রীনা ধন্তেরাসতা কেন্দ্রগী থাক্তা রোজগার মেলা পাঙথোক্নবা ৱাখল্লোন হৌদোকখিবনি‍। মদুনা কেন্দ্র লৈঙাক্কী থাক্তা থবক লাখ ১০ পীননবা কেম্পেনগী অহৌবা ওইখি‍। মদুদগী হৌরগা, প্রধান মন্ত্রীনা গুজরাত, জম্মু অমসুং কাস্মির অমদি মহারাস্ত্র লৈঙাক্কী রোজগার মেলাশিংদা ৱা ঙাঙখি, অমদি ঙরাং নৌনা থবক খল্লবা মীওইশিংদা এপোইন্তমেন্ত লেত্তর ৭১,০০০ য়েন্থোক্লদুনা তোঙান তোঙানবা লৈঙাক্কী দিপার্তমেন্তশিংদা নৌনা থবক খল্লবা মীওইশিংগী ওনলাইন ওরিএন্তেসন কোর্সকী কর্ময়োগী প্রারম্ভ মোদ্যুলসু হৌদোকখিবনি‍।

থৌরমদুদা ৱা ঙাঙলদুনা, প্রধান মন্ত্রীনা এপোইন্তমেন্ত লেত্তর ফংলবা নহাশিংগী মফমদা নুংঙাইবা ফোঙদোকখি অমদি থৌরাং অদুবু থবক পীননবগী লমদা গোৱা লৈঙাক্না পায়খৎলকপা মরুওইবা খোঙথাঙ অমনি হায়না ফোঙদোকখি‍। প্রধান মন্ত্রীনা লাক্কদৌরিবা থাশিংদা গোৱা পুলিস অমদি অতৈ দিপার্তমেন্তশিংদা রিক্রুইৎমেন্ত দ্রাইভ কয়া পাঙথোক্কদৌরি‍ হায়না পাউদমখি‍। “মসিনা গোৱা পুলিস ফোর্সপু মপাঙ্গল কনখৎহন্দুনা লমদমদুগী মীয়াম অমদি লম কোয়বশিংগী ঙাকশেলগী থৌওংদা হেন্না ফীভম ফগৎহনগনি”, হায়না মহাক্না হায়খি‍।

“কেন্দ্র লৈঙাক্না নহা লিশিং কয়াদা থবক পীবগা লোয়ননা হৌখিবা চয়োল খরসিদা লৈবাকসিগী তোঙান তোঙানবা স্তেতশিংনা লেপ্পা লৈতনা রোজগার মেলাশিং পাঙথোক্তুনা লাক্লি”, হায়না শ্রী মোদীনা ফোঙদোকখি‍। প্রধান মন্ত্রীনা দবল ইঞ্জিন লৈঙাক্না পানবা স্তেতশিংনা মখোয়গী নহাশিংবু মপাঙ্গল কনখৎহন্নবগীদমক মখোয়গী ওইবা থাক্তা অসিগুম্বা রোজগার মেলাশিং পাঙথোক্নবা হোৎনরিবা অসিদা নুংঙাইবা ফোঙদোকখি‍।

প্রধান মন্ত্রীনা, হৌখিবা চহি ৮সিদা কেন্দ্র লৈঙাক্না গোৱা শেমগৎনবগীদমক লুপা করোর লিশিং কয়া থাদখ্রে হায়বা ৱাফম থমখি‍। লুপা করোর ৩০০০ চঙনা শেমগৎখিবা শঙ্গাগদবা কুইদ্রবা মোপা এয়রপোর্তকী মতাঙদা পল্লদুনা, স্তেত অসিদা পায়খৎলিবা কন্নেক্তিবিতী অমদি ইনফ্রাস্ত্রকচর প্রোজেক্তশিংগুম্না, এয়রপোর্ত অসিনা গোৱা মীয়ামদা থবক পীননবগী অচৌবা মফম অমা ওইরে হায়না প্রধান মন্ত্রীনা হায়খি‍। “’স্বয়মপুর্ন গোৱা’গী পান্দমদি ইনফ্রাস্ত্রকচর ফগৎহনবগা লোয়ননা স্তেত অসিদা তঙায় ফদবা এমেনিতীশিংগী ফীভমসু ফগৎহনবনি”, হায়না প্রধান মন্ত্রীনা ফোঙদোকখি‍। গোৱা তুরিজম মাস্তর প্লান এন্দ পোলিসীগী মরমদা পল্লদুনা, গোৱা চাওখৎনবগীদমক স্তেত লৈঙাক্না  অনৌবা ব্লুপ্রিন্ত অমা পুথোক্লে অমদি মসিনা তুরিজম সেক্তরদা শেল থাদনবগী অনৌবা খুদোংচাবা কয়াগী থোঙ হাংদোক্তুনা থবক পীবগী চাং ৱাংনা হেনগৎহল্লগনি হায়না প্রধান মন্ত্রীনা পাউদমখি‍। মহৌশাগী লৌউ-পথাপ্তা থবক পীবগী চাং হেনগৎহন্নবগীদমক গোৱাগী খুঙ্গংগী লমশিংদা শেন্মিৎলোন মপাঙ্গল কনখৎহন্নবা লৌখৎলিবা খোঙথাঙশিংগী মরমদা পল্লদুনা, ফৌ, উহৈ-ৱাহৈ, য়ুবী, চনান অমদি মরু মরাং পুথোক্লিবা লৌমীশিংবু সেল্ফ-হেল্প গ্রুপশিংগী মরী শম্নহল্লে হায়না প্রধান মন্ত্রীনা পাউদমখি‍। হায়রিবা থৌরাংশিং অসিনা গোৱাদা থবক পীনবগী অমদি মশানা মশাবু থবক পীননবগী অনৌবা খুদোংচাবা কয়া শেমগৎলি হায়বা ৱাফমসু মহাক্না থমখি‍।

নৌনা থবক খল্লবশিংবু গোৱাগী অমদি লৈবাক্কী চাওখৎনবগীদমক থবক তৌনবা ৱাফম থম্লদুনা, প্রধান মন্ত্রীনা, “অদোমগী পুন্সিগী খ্বাইদগী মরুওইবা চহি ২৫ হৌজিক হৌগদৌরিবনি”, হায়না ফোঙদোকখি‍। চাওখৎপা ভারতকী মঙলান অমদি ২০৪৭গী অনৌবা ভারতকী পান্দমশিং পুথোক্লদুনা প্রধান মন্ত্রীনা মহাক্কী ৱারোল লোইশিনখি‍। “গোৱা চাওখৎহনবগা লোয়ননা ২০৪৭গী অনৌবা ভারতকী পান্দমশিং অদোমগী মাঙদা তাদুনা লৈরে‍। ময়াম পুম্নমক্না অদোমগী থৌদাংগী লম্বীঈদা মপুং ফানা পুক্নিং লুপ্তুনা অমদি ইচঙ থৌনা চৎকনি হায়না ঐনা থাজৈ”, হায়বা ৱাফম ফোঙদোক্তুনা প্রধান মন্ত্রীনা লোইশিনখি‍।

*****