ভারতকী প্রধানমন্ত্রী

রাজকোৎকী মীয়াম, অদোম কমদৌবিরিবগে,

নুংঙাইবনা থল্লে!

হন্দক্তা অদোম্না নবরাত্রি নুংঙাইবা মপুং ফানা লৌখ্রে‍। চহি অনিগী মতুংদা অসিগুম্বা তাঞ্জা অসি ফংলিবা নত্ত্রা, দিৱালীগী শেম শাবদি কমদৌবিরি? ঙসিদি অদোমগী দিৱালী ঐদি হৌজিক্তগী হৌনা উবা ফংলে‍। ঙসিদি রাজকোৎ মচু মমেন্না থল্লে‍। নবরাত্রি লোইখিবতা ঙায়রি, বিজয়াদসমী লোইখিবতা ঙায়রি, গরবা শান্নবতদা চোকথরে, ধন্তেরাস লাকপা ঙাইরি, দিৱালীগী শেম শানরি, অনৌবা চহিসু লাক্লগনি, করবার মচা অচৌবশিংগীদমক্তা থবক ময়াম অমা লৈরগসু ঙসি রাজকোত্তা মীনুংসি অমসুং থৌজালনা তরাম তরাম ওক্লিবা চাউরবা থৌরম অমা পাঙথোক্লি‍। ঐনা রাজকোৎপু চাম্মরক হন্না খুরুমজরি‍।

মফমসিদদি দিৱালী হায়বসি পাঙথোকখ্রবা থবকশিংগী হিসাব শুবা, অদুগা অনৌবা চহি হায়বসিনা অনৌবা পান্দমগা লোয়ননা অনৌবা খোঙচৎ হৌবা অমদি অচেৎপা ফিরেপকা লোয়ননা মাঙদা চঙশিনবনি‍। হৌজিক রাজকোৎ য়াওনা সৌরাস্ত্র পুম্বগী চাওখৎ থৌরাংগীদমক ঙসি প্রোজেক্ত কয়া লোইশিল্লক্লিবশিং অসিবু দিৱালীগী খুদোল ওইনা অদোমগী খুয়াখাদা কৎচরি‍। অদুগা উরেপ উয়ুং তম্লিবশিং অসিনা অনৌবা পান্দমশিংগী য়ুম্ফম থোল্লিবনি‍। কন্নেক্তিভিতী, ইন্দস্ত্রী, ঈশিং, মীয়ামগী য়াইফনবগা মরী লৈনবা অসিগুম্বা প্রোজেক্তশিং অসিনা রাজকোৎপু শরুক কয়া থোক্না মপাঙ্গল কনখৎহল্লগনি‍। মফমসিগী মীয়ামবু মখোয়গী পুন্সি হিংবদা নুংঙাইহনবদা মতেং ওইগনি‍।

মালেমগী খ্বাইদগী ফবা তেক্নিক শীজন্নদুনা লৈবাক্কী মফম তরুক্তা য়ুম শাননবগী থৌরাং অমা হৌদোক্লি‍। মখোয়গী মনুংদা রাজকোৎসু অমনি‍। অদুগা য়ুম ১১৪৪, অনৌবা তেক্নোলোজী, অনৌবা খোঙফম, অনৌবা খোঙজেল অমদি কোরোনাগী লাংফম মতমদসু হায়রিবা থবকশিং অসি পাঙথোক্নবগীদমক তেক্নোলোজী অমদি অফবা লৈঙাক, ৱা ঙাকপা, মীয়ামগী মথৌ তাবগীদমক খনবা ময়াম অসিনা মরম ওইরগা অসিগুম্বা থবকশিং অসি পায়খৎপা ঙম্লিবনি‍। মসিগীদমক ভারত লৈঙাক্কী মন্ত্রী মরূপ হরদীপ সিংহ পুরী অমসুং গুজরাতকী মুখ্যমন্ত্রী অমসুং মহাক্কী কাঙবু, মরূপ ভুপেন্দ্র ভাই অমদি রাজকোৎকী মীয়ামগী মফমদা ইকায়খুম্নবা উৎচরি‍।

ঙসি, মরুওইনা হায়রিবা অনৌবা তেক্নিক অসি শীজিন্নদুনা শারিবা ফজরবা য়ুমশিং, য়ুম্বু ওইরবী ইমা অমদি ইচে-ইচলশিংগী মফমদা অখন্ননা নুংঙাইবা ফোঙদোকচরি‍। দিৱালীগী মতমদা অদোমগী য়ুম শাবা লোইরবনিনা, অদোমগী য়ুমদা লক্সমী লেঙশিন্দুনা লৈবা ওইরসনু হায়না ঐখোয় পুন্না তাইবং মপুগী মফমদা খুরুমমিন্নসি‍। মফমসিদা ঐনা শো শিন্নবা মতমদা ময়ামদা য়ুম কমদৌনা শাখিবগে হংখি‍। মখোয়গী মায়থোঙদা তারিবা মমিদুনা য়ুমশিং অসি উরগা মখোয় কয়া য়াম্না নুংঙাইবগে হায়বা তাক্লি‍। অমরোমদদি লৈঙাক্কী য়ুম হায়বসি কনানসু মশিং থাবিবা নত্তে‍। হৌজিক্তি লৈঙাকসু খোঙথাঙ খুদিং মীয়াম্না শিংথাবিরে‍।

হৌখিবা চহি ২১সিদা ঐখোয় পুন্না মঙলান কয়া মঙখি, খোঙথাঙ কয়া লৌখৎখি, পন্দোল কয়া লোমখি‍। অদুগা মহাত্মা গান্ধীনা পোরবন্দরদা পোক্লগা রাজকোত্তা মহৈ মশিং তমখিবগুম্না ঐগীদমক্তদি রাজকোৎ ঐগী অহানবা শিন্দমফম্নি‍। অৱাং গুজরাত্তা পোক্লগা রাজকোত্তা লৈঙাক্লোন অমসুং রাজনিতীগী অদোমগী খুয়াখাদা অহানবা শিন্দমফম ওইখি‍। রাগকোৎকী মপাঙ্গল য়েংবিয়ু, লমদমসিনা গান্ধীজীগী অহানবা শিন্দম্লকপদা থৌজানবিখি, ঙসিদি গান্ধীজীনা ঐখোয়গী পুক্নিং পাঙ্গল হাপ্পিরি‍। অদুগা অদোম্না ঐবু থৌজানবিখিবা চহি ২০ মপুং ফারে, থৌদাংসু হেনগৎলক্লি, মসি রাজকোৎ মীয়ামগী থৌজাল মতিক্নি‍।

ঐখোয়গী বজুভাইনা সিৎ হাঙহনবিদুনা ঐবু রাজকোত্তা থাবিখি অমদি ঐবু কোনশিনবিখি অদুগা অদোমগী থৌজালদগী ঐগী খোঙচৎ হৌখি‍। হায়রিবা খোঙচৎ অদুনা ঙসিদি গুজরাৎপু অমদি লৈবাকসিবু চাওখৎপগী অনৌবা পন্দোল তম্না পুদুনা চৎনবগী তাঞ্জা ওইরে‍। রাজকোৎকী লমন ঐনা কৈদৌঙৈদসু শিংবা ঙম্লরোই‍। অদোমগী লমন তোনশিন্দুনা লৈহৌরগনি‍। অদুগা ঙসি ময়ামগী মরক্তা লাকপসিদা থৌগলগী মপুং ফাবা ৱাখল্লোনগা লোয়ননা ইকোক নোন্দুনা অদোমগী খুয়াখাদা চাওখৎ থৌরাংগী থবকশিং অসি কৎচরি‍ মরূপশিং‍।

মহৈরোয় অমা ওইনা ময়ামগী মফমদগী ৱাফম তয়া তমশিনজখি‍। ৱাফম কয়া খঙখিবা অমদি রাজকোৎনা তমবিখিবা ময়াম্না ঙসি লৈবাক্কী কান্নবা ওইরক্লি‍। ঙসি গুজরাতকী চাওখৎ থৌরাং মীয়াম্না শোন্নরিবা, গুজরাতকী মওং মতৌ মীয়াম্না শোন্নরিবা, লৈবাক পুম্বদগী শান্নরোয়শিং গুজরাত্তা শান্ন-খোৎনবগী থৌরম য়াওবা লাকখি‍। মতমদুদা নবরাত্রি মতম ওইবনা, য়াম্লবা শান্নরোয়শিংনা ঐগা ফোন্দা ৱারী শান্নখি অদুগা কয়া অমনা সোসিএল মীদিয়াদা মখোয়গী ৱাখল্লোন ফোঙদোক্নখিবা ময়াম মরক্তা গুজরাতকী ইচে ইচলশিংনা নুমিদাংগী মতমদা সনাগী লীক-কোন শিদুনা চৎপদা করিসু চিংনবা লৈত্রিবা ৱাফম কয়া থেংনখি‍। মখোয় পুম্নমক্না গুজরাতপু উরগা, রাজকোৎপু উরগা লৈবাক শিনবা থুংবদগী লাকখিবশিংনা অঙকপা পোক্নখি‍।

মসি পুম্নমকসি লো এন্দ ওর্দরগী ফীভমদা মরুওইবা মীৎয়েঙ চঙবগী মহৈনি‍। মফমসিদা ওইরম্বা ফীভম, রাজকোত্তা ওইরম্বা ফীভম অদোমসু খঙবিরিবদুনি, সৌরাস্ত্র অপুম্বদা জনসংঘগী মতমদা ঐ রাজনিতী য়াওদ্রি, মতমদুদা জনসংঘগী চিমনভাই সুক্লা অমসুং সুর্য়কান্ত ভাই অচার্য় অনিনা গুন্দাগী মায়োক্তা লূপ শেমখি অমদি গুন্দাগী চৎনবী মুত্থৎনবা থৌরাং পায়খৎখি‍। রাজকোৎ অমসুং সৌরাস্ত্র পুম্বদা গুন্দা কাঙবুগী মায়োক্তা জনসঙ্ঘনা মপুং ফানা লান্থেংনরম্মী‍।

ঙসি ভাজপাগী লৈঙাক শেম্লবা মতুংদা, লো এন্দ ওর্দর, নুংঙাই য়াইফবা, ইং তপ্পা পুম্নমক লাক্লে‍। মরাল লৈবা মী, মাফিয়া, তেরোরিস্তবু শীজিন্নরম্বা কাঙবুশিং, ঙসিদি গুন্দা কাঙবু পুম্নমক্তগী নীং তমদুনা মদুগী নুংঙাইবা খুন্নাইগী কাঙলুপ খুদিংমক্না ফংলি‍। ইং তপ্পা, অফবা ৱাখল, অপুনবগী শক্তম মমা মপা পুম্নমক্কী মচাশিংবু অরংবা তুংলমচৎগী থাজবা পীরি‍। মসিগীদমক কন্না হোৎনখিবা কয়া অসি উরগা ঐনা কয়াগী মতিক চাউথোকচরিবা, কয়াদা নুংঙাইজরিবা‍।

ঐ নিংশিংলি ঐখোয়না অসিগুম্বা থৌরাং লেপ্পা লৈতনা পায়খত্তুনা লাকখি‍। মতম পুম্বদা হৌখিবা চহি কয়াদা ঐখোয়না গুজরাতপু হেক য়ারিবমখৈ মপুং ফাহন্নবা, হোৎনবা কনবা ওইহন্নবা চোকথবা নাইদনা হোৎনদুনা লাকখি‍। মদুগীদমক মথৌ তারিবা ফীভম ঐখোয়না মতম পুম্নমক্তা পুক্নিং থৌগত্তুনা লাকখি‍। মদুনা মরম ওইরগা লৈঙাক্না হোৎনখিবা ময়ামদুনা ঙসি গুজরাত খোঙজেল য়াঙনা মাঙদা চঙশিল্লি‍।

চাওখৎপা ভারতকীদমক চাওখৎপা গুজরাত, মপাঙ্গল কনবা ভারতকীদমক মপাঙ্গল কনবা গুজরাত হায়রিবা ৱাখল্লোন অসি পুদুনা চৎখি‍। মদুগীদমক ঐখোয়না ভাইব্রেন্ত গুজরাতকী থৌরাং ঐখোয়না পায়খৎখি‍। মালেম পুম্বদগী মীওইশিংবু ইন্দস্ত্রী লিংখৎনবা কৌখি, ঐখোয়না লৌউ-শিংউগী কুমহৈ পাঙথোকখি‍। শাখ্রবা নুংশাগী মরক্তা থা অমমম চুপ্না লৌউ-শিংউগী কুমহৈ পাঙথোকখি‍। লৌউ-শিংউগী ৱাফম লৈরমদবা স্তেত অসিদা ঙসিদি চাবা কোন্ননবা মহৈ মরোং পুথোক্লি‍। লৌউ শিংউগী লমদা চাদা ৯দগী ১০ ফাওবগী গ্রোথ লৈহন্দুনা লৈবাক পুম্বগী মীৎয়েঙ চিংশিনখি‍। মফমসিদা গরিব কল্য়ান মেলা পাঙথোকই, খুঙ্গঙ লায়রবশিংবু মপাঙ্গল কনখৎহন্নবগীদমক মফমসিদা থবক পায়খৎখি‍। লায়রবশিং মপাঙ্গল কল্লবা মতমদা ময়ায় ওইবা কাঙলুপসু মপাঙ্গল কনখৎলক্কনি অমদি মখোয়না মপাঙ্গল কল্লবদি খুন্নাই অসিনা খোঙজেল য়াঙনা চেনখৎকনি, ইচঙ থৌনা চেনখৎলক্কদৌরিবনি‍। মখোয়না লৈননবা য়ুম অমা লৈরবা মতমদা ইকায়খুম্নবা ঙাক্না হিংবা ঙমগদৌরিবনি‍। মশাগী য়ুম অমা লৈজবা হায়বসি মীপুম খুদিংমক্কী মঙলান্নি‍।

মশাগী য়ুম অমমম লৈহন্নবগীদমক লৈঙাক্না লায়রবা অমসুং মেদিয়ম ক্লাসকী মীওইশিংগীদমক থৌরাং কয়া পায়খৎলি‍। মসিদসু নত্তনা য়ুম হায়বসি পুন্সি হিংবদা নুংঙাইহনগদবনি, তোইলেৎ লৈহনগদবনি, মৈ ফংগদবনি, ঈশিং ফংগদবনি, গ্যাস ফংগদবনি, ইন্তরনেৎ কন্নেক্তিভিতী লৈগদবনি, ওপ্তিকেল ফাইবর নেৎৱর্ক লৈগদবনি অমদি মতমগা চুনবা খুদোংচাবা পুম্নমক ফংহনগদবনি হায়বা হীরমসিদা থবক পায়খৎলি‍।

মীচম মীয়ামগী পুন্সিদা খুদোংচাদবা কয়া থেংনরি‍। লায়রবা ওইরবসু, মেদিয়ম ক্লাস ওইরবসু ফনা কন্না হোৎনরবসু য়ুমদা অনাবা য়াওরকপা মতমদা লায়রবগী চগোয়নুংদা অদুমক উংদুনা লৈ‍। লায়রবগী য়ুমদা অনাবা য়াওরকপা মতমদা হৌগৎপা ঙমদনা লৈখা তারকই, নিদুনা চাবগী ফীভম লাকই‍। অদুবু খুন্নাইসিদা মশা মউ ফনা লৈনবগী থৌরাং লৈরবদি লায়রবশিংগী অৱাবা কোকই‍। হায়রিবা ৱাখল্লোন অসিবু মাঙদা থমদুনা ঐখোয়না আয়ুস্মান ভারত য়োজনা, পি.এম.জে.এ.ৱাই. হৌদোকখি‍। হৌজিক্তি থৌরাং অসিগী মখাদা লুপা লাখ মঙাগী লায়েংবগী কান্নবা পীরি অমদি য়,জনা অসিগী মখাদা লুপা করোর কয়াগী কান্নবা মীয়ামদা ফংহল্লি‍।

ইচিল ইনাওশিং,

লায়রবা মুত্থৎসি হায়বগী খোল্লাউ মতম কয়া লাউদুনা লাকখ্রে‍। রোতি-কপরাগী খোল্লাউসু কয়ারক হন্না লাউখ্রে‍। অসুম্না লাউরগা তন তঙ্খায় চারগা হরাও হরাও মতুং ইনগনি হায়না মতম কুইনা ককঙাওনদুনা লাকখ্রে‍। অসুম্না তৌদুনা লৈরকপা মতমদা ঐখোয়না খোল্লাউ হায়বসিদি খোল্লাউনি ঐখোয়দি মীয়ামগী পুন্সিদা অহোংবা পুরকফম থোকই হায়বা ৱাখল খনখি‍। তন তঙ্খায় চাবগী মহুৎ তন মপুম চাগদবনি, য়ুমদা চাক লাম্না লাকপা মতমদা চাক পীজনবগী মতিক লৈহন্নবা পুন্সি অদোমগীদমক পুরকফম থোকই হায়না খনখি‍। মখোয়না রাজনিতীদা খোঙদাদুনা মখোয়গী য়ুমজাও কয়া শাখি, অদুবু লায়রবশিংগী খাংপোকশঙগী ৱাখলদি মখোয়দা লৈখিদে‍। ঐনা লায়রবশিংগী পক্কাগী য়ুম শানবগীদমক লৈবাক পুম্বদা থৌরাং পায়খৎখি‍।

অমত্তা ওইনা পুনশিন্দুনা লৈবাকসিদা থবক অসি পায়খৎখি‍। ঙসিদি গুজরাতনা, অমদি রাজকোৎনা ইন্দস্ত্রীগী লমদা মশাগী মফম কল্লি‍। ঐ নীংশিংলি, ঐনা মুখ্যমন্ত্রী ওইরিঙৈ চহি কয়াগী মমাঙদা ঐনা মীফম অমদা ৱা ঙাঙখি‍। মতমদুদা ঐনা হায়খি, মোরবী, রাজকোৎ, জামনগর হায়রিবা মফম অসি অপীকপা জাপান অমগী মতৌগুম মাঙদা চঙশিল্লক্কনি হায়না ঐনা চহি কয়াগী মমাঙদা হায়খি‍। মতমদুদা ঐনা হায়খিবা ঙসিদি চম্লে‍। ঙসিদি রাজকোৎ ইঞ্জিনিয়রিং ইন্দস্ত্রীগী মফম ওইরব্রা ওইদ্রিবরা‍। মতমদুদা ঐনা মোরবী, রাজকোৎ, জামনগর অপুনবা মফমসিদা গুজরাত পুম্ববু থাক ৱাংনা থাঙ্গৎনবা মতিং লৈ হায়না উখি‍।

ইচিল ইনাওশিং,

য়ুম শানবা স্কীম অসিগী মখাদা হৌখিবা চহি নিপানসিদা ঐখোয়না খুঙ্গঙ অমসুং ময়োল্লমশিংদা পক্কাগী য়ুম করোর অহুম হেন্না শাখ্রে‍। মদুগী মনুংদা গুজরাত্তা পক্কাগী য়ুম লাখ তরা শানবগী পান্দম থম্বদা লাখ তরেৎ শাবা লোয়দুনা খুৎশিন্নখ্রে‍। ভুপেন্দ্র ভাই অমসুং মহাক্কী কাঙবুবু গুজরাতপু চাওখৎ মায়কৈদা পুনবগী অসিগুম্বা থবক থৌরমশিং মখোয়গী মীৎয়েঙ মখাদা পায়খৎপগীদমক নুংঙাইবা ফোঙদোকচরি‍। লায়রবখক্তা নত্তনা মেদিয়ম ক্লাসকী মীওইশিংগী য়াইফনবা খনবিবগীদমক্তা মহাকপু থাক ৱাংনা থাঙ্গৎচরি‍। রেরাগী চৎন-কাঙলোন শেমদুনা মেদিয়ম ক্লাসকী মঙলানশিংবু ঐখোয়না ঙাক্লি‍।

ঐখোয়না গুজরাতকী মেদিয়ম ক্লাসতা লুপা করোর লিশিং ১১গী মতেং পীদুনা মখোয়গী ময়ুম শাজনবগী থৌরাং পায়খৎলি‍। মসিদসু নত্তনা থবক য়াম্না য়ামখৎলকপনা মরম ওইরগা গুজরাতকী মপান্দগী শিন্মীশিং পুরকপা মথৌ তাহল্লি‍। হায়রিবা লংফৈদা লাক্লিবা শিন্মীশিং অসিগী পুন্সিদসু খুদোংথিবা তাহন্দনবগীদমক, মখোয়গী লৈননবা য়ুম ফংহন্নবগীদমক লৈঙাক্না থৌরাং পায়খৎলি‍।

হান্নগী লৈঙাক্না শারম্বা য়ুম অদুগুম্বা নত্তে, ঐখোয়না মীনুংসি উৎলুবগী ৱাফমসু নত্তে, অদোমবু ইরোমদোম লেপচবা ঙহন্নবগীদমক, ইশানা ইশাদা থাজবা থমজবা ঙম্নবগীদমক ঐখোয়না থৌরাং পায়খৎপনি‍। ৱাখলদা থাজবা কয়াগা লোয়ননা থবক পায়খৎপনি‍। অসিগুম্বা ৱাফমশিং অসি পুদুনা চৎলি অমদি ঙসি রাজকোত্তা লাক্লি‍। খুন্নাইবু মপাঙ্গল কলহন্নবগীদমক ঐখোয়না লেপ্পা লৈতনা হোৎনরিবা, নীংতম্লবা ভারতকী মঙলান মঙফাওনহন্নবা হোৎনরিবা অসিগী খুদম অমনি রাজকোৎকী লাইত হাউস প্রোজেক্ত অসি মরুপশিং‍।

ঙসি রাজকোত্তা লৈবাকসিগী ফিদম্নিংঙাই ওইবা মওংদা থবক পায়খৎলি‍। ইঞ্জিনিয়রিংগী মহৈরোয়শিং, য়ুনিভর্সিতীগী মীওইশিং, রিএল এস্তেত্তা লৈরিবা মীওইশিং পুম্নমক রাজকোৎকী লাইত হাউস প্রোজেক্তনা কান্নবা পীগদৌরি‍। মসিনা লায়রবা, মেদিয়ম ক্লাসকী ইমুং লাখ কয়াগী য়ুম ফংগদৌরিবনি‍। রাজকোত্তা মতমগা চুনবা মওংদা খোঙজেল য়াঙনা চাওখৎপা পুরক্নবা, ইনফ্রাস্ত্রকচর ফগৎনবা অমদি সৌরাস্ত্র পুম্ববু পুনশিন্নবগী ফীভমগীদমকসু ৱাখল খল্লিবনি অমদি অনৌবা য়াওল অমা পুরক্নবগীদমক ঐখোয়না থবক পায়খৎলি‍।

মতমগা চুনবা থৌওং শীজিন্নদুনা ভারত্তা মরোমদোম লেপচবা ফীভম পুরক্নবা ঐখোয়না পান্দম অমা থম্লি‍। মরম অসিনা মহাশিংগী ত্রেনিং পীদুনা নহাশিংনা অনৌ অনৌবা স্তার্তঅপ শেমগৎলক্নবা ঐখোয়না পুক্নিং থৌগৎলি‍।

মরূপশিং,

ময়োল্লমগী পুন্সিদা লম্বী-থোং, কৈথেল, মোল, প্লাজা, অকোয়বদা চাওখৎপা হায়বসিনা মপুং ফাবা নত্তে‍। ময়োল্লমগী পুন্সিদা অচৌবা থৌদাং অমা লৈরি, হায়রিবা থৌদাং অসি য়ানবগী তাঞ্জা অমসি লৈ অমদি চাওখৎপগী অনৌবা পাম্বৈ অমসু ওইরি‍। মসিদসু নত্তনা মফমসিদা ফুতপাথতা ফমদুনা পোৎচৈ য়োল্লিবা, মনা মশিং য়োল্লিবা মখোয়গীদমক্তসু ঐখোয়না খল্লি‍। মখোয়বু বেঙ্কতগী গরেন্তী অমত্তা য়াওদনা শেল পুবা ফংহন্নবা ঐখোয়না খল্লি‍। মখোয়দা স্বানিধি য়োজনাগী খুত্থাঙদা লায়না শেন্থং ফংহন্নবা থবক পায়খৎলি‍।

ইচিল ইনাওশিং,

ঙসি দিজিতেল ইন্দিয়া কয়ামুক য়াম্না মপাঙ্গল কল্লবগে হায়বা অদোম উবিরম্লগনি‍। মালেমদা খ্বাইদগী হোঙবা ইন্তরনেৎ ঐখোয়না পুদুনা লাক্লি, অমদি ঐখোয়গী স্ত্রীত ভেন্দরসু দিজিতেলগী পাম্বৈনা শেল শিংলি‍। অসুগুম্বা থৌওং কয়া ঐখোয়না গুজরাত্তা উবা ফংলি অমদি গুজরাতনা মসিগী কান্নবা ফংলি মরূপশিং‍। মসিদসু নত্তনা মসিগী ইথিলসু চাউনা তারি‍।

অপীকপা ইন্দস্ত্রী, এম.এস.এম.ই., রাজকোৎকী ইঞ্জিনিয়রিং ইন্দস্ত্রীনা চাওখৎ মায়কৈদা অচৌবা থৌদাং য়ারি‍। মফমসিদা পুথোক্লিবা পম্প, মেচিনগী খুৎলায়শিং, রাজকোত্তা পুথোকপা পোৎলমশিংনা য়ৌদবা লৈবাক্কী মফম অমত্তবু লৈরম্লরোই‍। ঐখোয়গী ফেলকন পম্প, ফিলমার্সেল, এঞ্জেল পম্প, রোতেক ইঞ্জিনিয়রিং, জলগঙ্গা পম্প, সিল্ভর পম্প, রোতেক পম্প, সিধ্দি ইঞ্জিনিয়রিং, গুজরাত ফোরজিন, তোপলেন্দনচিংবা ব্রান্দ কয়া ভারতকী কাচিন কোয়া শিনবা থুংনা মমিং চৎলি‍। মপান লৈবাকশিংদসু থাদোক্লি‍। হায়রিবা মতিং অসি রাজকোৎনা শেম্বনি‍।

ঙসি ভারত্তা ওতোমোবাইল ইন্দস্ত্রী চাওখৎলিবা, গুজরাত্তা চাওখৎলক্লিবা, মখোয়গী পার্তশিং শাবগী থবক রাজকোত্তা তৌরি অমদি মালেম শিনবা থুংনা য়ৌরি‍। গুজরাত্তা শারগা জাপান্দা পুশিল্লিবা গারীশিংগী স্পেয়র পার্তশিং রাজকোৎকী শিন্মীশিংনা শাবনি, মসিদগী হেন্না চাওথোকচনিংঙাই করিবু লৈরবগে‍। গুজরাত্তা সাইকলফাওবা শারমদবা মতম অমা লৈরম্মী‍। ঐনা ঙসি হায়রিবসি ইশিন্দুনা থম্বিয়ু, গুজরাত্তা প্লেনসু শারখিগনি অমদি রাজকোত্তা প্লেনগী স্পেয়র পার্তসু শাবা হৌরক্কদবা নুমিত্তু কুইদ্রবনি‍।

চহি কুনলোমগী মমাঙদা রাজকোৎনা অঙকপা অমা তৌখ‍ি‍। চহি কুনসিদা অনৌবা পুৱারী অমা ইরে‍। য়ুনিভরসিতীদা মহৈ মশিং তম্বগী থবক রাজকোৎনা তৌরি‍। রাজকোৎকী ইঞ্জিনিয়রিং, মখোয়গী লুপা করোর লিশিং মঙাগী এক্সপোর্ত অদোমসু খন্থবিয়ু, রাজকোৎখক্তগী ইঞ্জিনিয়রিংনা লুপা করোর লিশিং মঙাগী এক্সপোর্ত তৌরিবা রাজকোৎকী মতিং অসিনা মফমসিগী নহাশিংগী তুংলমচৎ শেমগৎকদৌরিবনি‍। মসিনা মরম ওইরগা মীয়ামদা থবক নীংথিনা ফংলি, মীয়ামগী পুন্সিদা ইকো সিস্তেম অমা পুরক্লি‍।

মোরবীসু অঙকপা থবক তৌরি‍। মোরবীগী সেরামিক তাইল্স মালেম পুম্বদা মমিং চৎলি‍। মালেম পুম্বদা সেরামিক্কী থবক তৌরিবা অসিগী চাদা ১৩ মোরবীখক্তদা তৌরি‍। মরম অসিনা মোরবীবু তাউন ওফ এক্সপোর্ত এ্ক্সেলেন্সী হায়না খঙনরিবনি‍। ফক্লাং, লৈমায়, বাথরুম নৎত্রগা তোইলেৎ ওইরবসু মোরবী য়াওদনা মতুং ফাদে মরূপশিং‍। মোরবী য়াওদনা মপুং ফাবা ঙম্লোই‍। মোর্বীদা ঈচাও লাকপা মতমদা মোরবী হৌগৎলকপা ঙমগনি হায়না কনানসু খন্নরুদ্রবনি, অদুবু মাগী মতিংনা ঙসিদি মোরবীনা অতোপ্পশিংবুসু হৌগৎহল্লি‍।

ঐ নীংশিংলি, মোরবী তেক ওফ থাক্তা লৈরিঙা মতমদা মফমদুদা গ্যাস চাং নাইনা ফংহল্লবদি মোরবী অঙকপা ফংনা চাওখৎলক্কনি হায়না ঐনা খনখি‍। ঐখোয়না মোরবীদা ইন্দস্ত্রিএল গ্যাস পাইপলাইন তিংখি, অমদি মদুনি মোরবীদা অনৌবা পাঙ্গল হাপখি‍। ঙসি মোরবীদা লুপা করোর লিশিং ১৫গী সেরামিক পার্ক শেমগৎলিবা অসি অচৌবা থৌরাং অমনি‍। হৌখিবা চহি ২০-২২ অসিদা গুজরাত্তা ইন্দস্ত্রী চাওখৎলক্লি, তোঙান তোঙানবা লমদা চাওখৎলক্লি, মসিনা মরম ওইরগা কান্নবা কয়া ফংলি‍। হন্দক্তা ভুপেন্দ্র ভাইগী লৈঙাক্না অনৌবা ইন্দস্ত্রিএল পোলিসী শেমখিবা মদুগা কান্নবা তুংদা লাক্কদৌরিবা অনৌবা মীরোলশিংনা ফংগদৌরিবনি‍।

ইচিল ইনাওশিং,

ত্রেদিস্নেল ইন্দস্ত্রী অমসুং মসিগী ৱাংমদা রাজকোত্তা মতিং য়াবা কয়া লৈরি, সৌরাস্ত্রদা লৈরি, গুজরাত্তা লৈরি‍। মরম অসিনা ঙসি অসুক চাউখ্রবা স্কীম অসি অদোমগী খুয়াখাদা কৎচবা লাক্লিবনি, অমদি মসিগীদমক্তা চাউথোকচবা অমদি নুংঙাইবা ফাওরি‍। অদোম্না তরাম্না ওকপিদুনা ইকায়খুম্নবা উৎপিবা অসিগীদমক্তা ঐনা অমুক্কা হন্না রাজকোৎকী লমন তোনশিঞ্জরে‍। অদুগা মতম পুম্নমক্তা থমজনিংবা ৱাফমদি মতম পুম্বগী ওইনা রাজকোৎকী মীৎয়েঙখাদা লৈজগে অমদি রাজকোৎকী থৌগলগী তাঞ্জা অমত্তা লেম্না মাঙহঞ্জরোই‍। ৱাফম অসি থমজবগা লোয়ননা অমুক্কা হন্না ময়াম পুম্নমকপু ইকোক নোঞ্জরি, য়াইফ-পাউজেল পীজরি‍।

থাগৎচরি!

দিসক্লেমর: প্রধান মন্ত্রীগী অশেংবা ৱারোল গুজরাতী লোলদা পীখিবনি, মদুগী ৱাহন্থোক পীজবনি‍।

*****