ভারতকী প্রধানমন্ত্রী

নুংশিরবা নহাওইরিবা মরুপশিং নখোয় আইআইতি-য়ানশিংনি । অদুবু ঐহাক্তী অদুগুম্বা মীশক অমনি মদুদি আই অনি য়াওদবা । নখোয় ময়ামদি আইআইতি-য়ানশিংনি অঙাং ওইরিঙৈদগী শুপ্নগী তিএন ওইরকই । তি ই এ মীশক তিএন চা য়োনবা মীশক । ঐহাক্না খল্লমলিবনি মদুদি কোলেজকী নহাশিং য়াম্না ইচং থৌই মতম য়াম্না মাংহনদে । মদুমক ওইরে । ঙসি অসি ওক্তোবর তাং ৭নি । ২০০১গী জনুৱারি ২৬তা য়াম্না কন্না য়ুহা হাখি । অমসুং মদুগী মতুংদা ওইখিবা ফিভম অদুদা লৈফম চাফম খংহনখিদে । অমসুং ঐহাকপু খংহৌদনা ২০০১গী ওক্তোবর ৭তা গান্ধীনগর অসিমক্তদা মুখ্যমন্ত্রী ফমগীদমক ৱাশক লৌদুনা থৌদাং অদু পাইবা হৌরে । লো অমসুং ওর্দর করিনো খংলমদে কৈদৌনুংদা বিধানসভা উখিদ্রি । অদুবু অনৌবা ইথৌদাং অমা লাক্লে । অদুবু থমোয়দা খনখি মদুদি হোৎনবদি কৈদৌনুংদা লেপলোয় অমসুং ঙসিদি লৈবাক অসিনা ঐহাকপু মতম খুদিংগী অনৌবা ইথৌদাং পিবিরি । অমসুং অনৌবা ইথৌদাং অদুগী মতুং ইন্না ঙসি ময়ামগী মরক্তা লৈরি ।

ঙসি মফম অসিদা হিন্দুস্থানগী তোঙান তোঙানবা মফমদগী লাকপা খুঙ্গংগী লমদমগী নহাশিং লৈরি অহল লমন খরশু য়াওরি । মখোয়বু অহানবদা ঐহাক্না সর্তিফিকেত পিখি । ঐহাক্না মখোয়দা ৱাফম কয়া হংলম্মী অমসুং ঐহাক অঙকপা ফাওরম্মী । মখোয়না পুম্নমক খংলম্মী মহাক্না খুঙ্গংদা করি তৌরি, মীয়ামবু মতৌ করম্না মতেং পাংলি, মখোয়না করি ত্রেনিং ফংলে । ত্রেনিং অদু করিদা শিজিন্নগনি । মহাক্না ৱাহং পুম্নমক্কী ইফমদা পাওখুম পিরম্মী । মসি হোংলকপা অমনি হায়বা ঐহাক খংই । লৈবাক অসিনা অমসুং মালেমনা হৌখিবা চহি চাহুম অসিদা তেক্নোলোজীগী রিভোলুসন উদ্রি । হৌখিবা চহি ৫০দা ৱাখলদা তেক্নোলোজীগী রিভোলুসন লাক্লে । তেক্নোলোজি অসি পুন্সিগী শরুক অমা ওইররে । তেক্নোলোজী অসি মশা মথন্তা দ্রাইবিং ফোর্স ওইররে । অমসুং অসিগুম্বা মতম অসিদা কনাগুম্বা লৈবাক অমনা করিগুম্বা প্রগতি তৌগে হায়রগদি হিন্দুস্থানগী থাক খুদিংমক্কী মীওইশিংবু শহর ওইগেরা খুঙ্গং ওইগেরা লাইরিক হৈবা ওইগেরা হৈতবা ওইগেরা, অহন ওইগেরা নহা ওইগেরা, তেক্নোলোজি অসিগা লোইননা মখোয়বু শম্নহনবা অসি তুংগী য়াইফনবগীদমক তৌদবা য়াদবা অমনি ।

নিংতম খোংজংগী মতমদা মহাত্মা গান্ধীনা লাইরিক তম্বদা পুক্নিং থৌগৎলম্বা অদুনি । স্বরাজকী অন্দলোনদা মহৈ মশিং অসি পাঙ্গল অমা ওইরগদি সুরাজকী অন্দলোন্দা দিজিতেল লিতরেসি অসি য়াম্না চাওবা শক্তি অমনি । মরম অদুনা ভারত সরকারনা হোৎনরিবা অসি হিন্দুস্থানগী খুঙ্গং খুদিংদা, মফম অদুগী থাক খুদিংমক্কী মীওইশিংদা দিজিতেল লিতরেত তৌনবা মায়কৈদা খোং থাংজিনবনি । ঙসিগী প্রোগ্রাম অসিনা ভারতকী খুঙ্গং লমদমদা ইমুং কোতি তরুক লৈরি ইমুং কোতি তরুক অদুগী য়ামদ্রবদা ইমুং অমগী মীওই অমদি দিজিতেল লিতরেত তৌহন্নবা খোংথাং পায়খৎলে । পুং কুনগী কেপ্সুলনি মদুবু তাকপি তম্বিরি । ওনলাইন এগজাম লৌই বীদিও কেমেরাগী মমাংদা ফমদুনা এগজাম পিবা মথৌ তাই । অমসুং মফম অদুদগী মহাকপু সর্তিফাই তৌই । এক্সপরিয়েন্স অমা লাকই । মদুদি দিজিতেল লিতরেসিগীদমক নহাক কয়া য়াম্না তমলে, নহাক্কী চহি কয়ানো হায়বা অদু মথৌ তাদে ।

কার্ল মার্কসকী ফিলোসোফিচৎনবা মতম অমা লৈরম্মী কার্ল মার্কসকী ৱাফমবু মালেমদা মীয়াম্না কোত তৌনরম্মী লৈবা নত্রগা লৈতবা । দিভাইদ অসিগী মতুং ইন্না মহাক্না মহাক্কী রাজনিতীগী ৱাখল্লোন অদু দিবলপ তৌখি । অশুম অসুম পিকশিনখিদুনা পাখল্লোন অদু হৌজিক্তি উবা ফংদ্রে । মমিংতগী ওইনা লৈরে অদুবু তেক্নোলোজিগা মরি লৈন্না করিগুম্বা ভারতকী তুংগী মশেক মঙালগীদমক ঐখোয় পুম্নমক্না চেকশিনন্না লৈদুনা লৈবাক অসিদা দিজিতেল দিভাইদ তৌখিদনবা হোৎনগদবনি । মীওই খরনা দিজিতেল তেক্নোলোজিদা য়াম্না খং হৈরগা অদুগা খরা অমনা করিমত্তা খংদ্রবদি লাক্কদৌরিবা য়ুগ অসিদা হোংলক্লিবা মওং মতৌ অসিদা । মসিগী দিজিতেল দিভাইদ অসি সমাজতা চাওনা অৱাবা ওইহল্লকপা য়াই । মরম অদুনা সমাজপু চাং মান্ননা থমদুনা মসিগী দিজিতেল দিভাইদ অসিদগী নানথোক্নবা মায়কৈরোমদা মসিগী ভারতকী খুঙ্গংশিংদা দিজিতেল লিতরেসিগী খোংথাং অসি চৎথরি । কনাগুম্বা অমত্তনা ৱাতসঅপ মতৌ করম্না ফোরৱার্দ তৌগে হায়বা তাক্নবা ক্লাসরুম থেংনখ্রবা । ৱাতসঅপ ফোরৱার্দ তৌনবা হিন্দুস্থানদা ইন্সতিট্যুত লৈব্রা ? অদুবু নখোয়না উরে মদুদি মীয়াম্না ৱাতসঅপ ফোরৱার্দ তৌবা হৈরে । ঐহাক্না হাইনিংলিবদি করিগুম্বা ঐখোয়না য়ুজর ফ্রেন্দলি তেক্নোলোজীগী লম্বীদা চৎলগদি ঐখোয়না য়াম্না লাইনা দিজিতেল লিতরেসিগী মায়কৈদা লৈবাক অসিবু পুদুনা চৎকনি । দিজিতেল লিতরেসি, দিজিতেল তেক্নোলোজী, দিজিতেল ইন্দিয়া অসি গুদ গোবর্নেস অমগী গরেন্তিনি । ত্রান্সপরেন্সিগী গরেন্তিনি ।

ভারত সরকারনা জেএএম ত্রিনিতীগী মখাদা দিবলপমেন্তকী মংলান অমা শাগৎলি । জেএএম জে- জনধন একাউন্ত, এ- আধার, এম- মোবাইল ফোন অহুম অসিবু পুন্সিন্দুনা মীচম প্রজাগী মথৌতাবা অদুগী মতুং ইন্না সরকার অসি মখোয়গী মোবাইদা য়াওহনবা অসিগুম্বা মখলগী ঐখোয়গী চাওখৎ লম্বীদা চৎলি । লৈবাক অসিদা অচৌবা খোংজং অমা চংশিল্লি । খুঙ্গং লাক কয়াদা ওপ্তিকেল ফাইবর য়ৌহন্নবা হোৎনরি । অমসুং ঙসিদি অথাপ অথাপ্পা মফমশিংদা ঐখোয়গী শোথরবা কাংলুপ্পু ঐখোয়গী লাইরবা অহাংশিংবু অফবা মহৈ মশিং ফংহন্নবা লোং দিস্তেন্স ইদুকেসন অসি দিজিতেলগী খুথাংদা ফংহনবদা ওইথোক্লে । ওপ্তিকেল ফাইবর নেতৱার্ক অসি হিন্দুস্থানগী খুঙ্গং খুদিংমক্তা য়ৌরবা মতমদা খুঙ্গং অদুগী মহৈ মশিংদা, খুঙ্গং অদুগী দিবলপমেন্ততা, খুঙ্গং অদুগী সরকারগী ওইবা থবকশিংদা অহোংবা কয়া অমা লাক্লনি । অমসুং দিজাইন অদু পুদুনা ঐখোয় চৎশিল্লি । মদুগী শরুক অমা ওইনা ঙসি লৈবাক্কী তোঙান তোঙানবা মফমশিংদগী লাকলিবা কমুনিতী সর্বিস সেন্তরগী মীওইশিং মখোয়শিং অদুনা কোর্স তম্বা লোইরে । অমসুং খরা অমনা তমনবা হোৎনরি অমসুং লাক্কদৌরিবা নুমীৎ খরা অসিদা ইমুং কোতি তরুক্তা মীওই অমমম তাকপি তম্বীরগনি মদুনা মখোয়গী ইনকমগী উপায় অমসু ওইরগনি । মোবাইগী মনুংদা য়াওরিবা এপ্লিকেসনশিং অদু মপুং ফানা শিজিন্নবা খংদবা মীওই কয়া অমা লৈরমগনি । মরম অদুনা করিগুম্বা দিজিতেল লিতরেসি লৈরগদি ঐখোয়না চাদিং তৌরিবা অদুগী কান্নবা অদু মপুং ফানা ফংবা ঙমলগনি । অমসুং ঐখোয়না মতৌ অমদা ভেলু এদিসন তৌবা য়াই । অমসুং মরম অসিনা দিজিতেল লিতরেসিগী দিজিতেল ইন্দিয়াগী খোংজং চংশিল্লিবনি । লেস কেস সোসাইতী শেম্বদশু মসিগী দিজিতেল লিতরেসি অসিনা অচৌবা থৌদাং অমা লৌগনি ।

ভারত সরকারনা শেমগৎলিবা ভীম এপ্লিকেসন অদু মালেমগী লৈবাকশিংদা অঙকপা ওইরিবনি । ঐখোয়গী ইনাক্তা লৈরিবা আধার দিজিতেল্লি বাইওমেত্রিক সিস্তেমদগী বেঙ্কতা দাতো লৈরিবা অদু মালেমদা অঙকপা ওইরি । মশিবু শম্নহন্দুনা ঐখোয়না দিবলপমেন্তপু এমপৱারমেন্তপু শম্নহনবগী মায়কৈদা মাংলোমদা চংশিল্লি । অমসুং মদুগী য়াম্না চাওনা কান্নবা ফংলনি হায়বা ঐহাক্না থাজবা থম্মী । ঙসি ঐহাক্কীদি লাইবক ফবা লাইবক ফবা হিরম্নি মদুদি ঙসি মফম অসিদা আইআইতি অসিগী অনৌবা কেম্পস শঙ্গাবগী তঞ্জা ফংলে । আইআইতি অসি ব্রান্দা অমনি । হিন্দুস্থানদা আইআইতি অসি ব্রান্দ অমা ওইরে । অদুবু আইআইতিগী মনুংদা কেম্পস ব্রান্দ হেন্না মরু ওইরক্কনি । করম্বা আইআইতিগী কেম্পস কমদৌই । লাক্কদৌরিবা চহি খরা অসিদা মসি নৈননবা মচাক অমা ওইরক্কনি । মরম অদুনা ঐহাক্না হায়কি মদুদি ঐহাক্না গুজরাত্তা হিন্দুস্থানগী মকোক ওইরিবা আইআইতি কেম্পসগুম্লবা কেম্পস অমা পাম্মী । ঙসিদি ঐহাক উরুবদা অপেনবা ফাওই মদুদি কেম্পস অসি হিন্দুস্থানগী মরুওইবা আইআইতিশিংগা চাংদম্নবা য়ারে । কেম্পসকী মশাগী তোঙানবা শক্তি অমা লৈজৈ । অনিশুবা শক্তিনা ফেকল্তিনি ঐহাক্না নুঙাইবা ফাওই মদুদি ঙসি গান্ধিনগরদা লৈরিবা আইআইতি অসিদা ফেকল্তি চাদা ৭৫দি মপাল লমদা ত্রেন তৌরুরবা ঙাক্তনি । অমসুং মখোয়না মখোয়গী মতম সক্তি পুম্নমক আইআইতি ছাত্রশিংদা কৎথোক্নবা ৱারেপ লৌরে । মখোয়গী ৱারেপ অদু ঐঙাক্না তরাম্না ওকচরি । ঙসি মালেমদা তোপ য়ুনিবর্সিতী ৫০০ লৈরি । নিং তম্বা ফংলবা মতুং চহি ৭০ ফাওবদা মসিগী তোপ ৫০০ অসিগী মনুংদা ঐখোয়দি উবা ফংদ্রি । মসিগী কালংক অসি মুথৎপা ফগদ্রা ফরোইদ্রা । ২০২২দা ভারতনা নিং তম্বা ফংলকপগী চহি ৭৫ শুবা পালন ফাওবগী মনুংদা ঐখোয়গী য়ুনিবর্সিতীশিং অসি থাক অদুগী মনুং চন্দুনা মালেমদা শকতাক্নবা খুদোংচাবা অদু ফংনবা হোৎনগদবনি । ভারত সরকারনা অহানবা ওইনা ৱারেপ লৌরে মদুদি প্রাইভেত য়ুনিবর্সিতী তরা অমসুং পব্লিক য়ুনিবর্সিতী তরা চেলেঞ্জ রুত্তা মখায়বু খনগৎলগনি । চাওরাক্না কোতি লিশিং তরাগী শেনফম থাদরগনি । করিগুম্বা য়ুনিবর্সিতীশিং অদুনা চেলেঞ্জ রুত্তা মায় পাক্তুনা মথকলোমদা লাক্তুনা অমসুং গ্লোবেল স্তেন্দর্দপু ইস্তাব্লিস তৌরগদি ঙসি ভারত সরকার অমসুং রাজ্য সরকারশিংগী লৈরিবা নিয়মশিং অদুদগী মখোয়বু নিং তমহন্দুনা মখোয়গী থৌনা মখোয়গী মায়কৈ লেপচবদা অপন্বা পিররোই । সেলেবসতা কেম্পসতা ফেকল্তিদা মশানা ৱারেপ লৌজবদা সরকারনা অপনবা পিরোই নখোয়না মহৈ অদু পুরক্তুনা পিগদবনি । সরকারনা য়ুনিবর্সিতী ২০গীদমক কোতি লিশিং অমগী শেনফম থাদবদা য়ারে । গান্ধিনগর আইআইতিগী মনাক্তা অশুক চাওবা একর ৪০০গী কেম্পস লৈরে কোতি ১৭০০ চংনা শেমগৎলে । ঐহাক্না থাজবা থম্মী মদুদি সুধির জৈন অমসুং মহাক্কী তিম অমসুং ঐখোয়গী নহাশিং পুন্দুনা পোৎলুম অসি পুদুনা মাংলোমদা লাক্কনি । কনাগুম্বা লৈবাক অমদা দিবলপমেন্তকীদমক্তা ইন্সতিট্যুসনশিংবু মতম মতম খুদিংগী শেমগৎপা মথৌ তাই । ঙসি ফাওবা মালেমগী মফম অমত্তদা ফোরেন্সিক সাইন্স য়ুনিবর্সিতী লৈত্রি ।

গুজরাত খক্তদনি মশাগী ফোরেন্সিক সাইন্স য়ুনিবর্সিতী লৈরিবা । মালেমদা অমত্তা ঙাইরবা য়ুনিবর্সিতীনি । ঙসিসু হিন্দুস্থানদা ইন্দিয়ান ইন্সতিট্যুত ওফ তিচর ইদুকেসন আইআইতিই অসিগুম্বা য়ুনিবর্সিতী অমত্তা লৈত্রি মদুনা খ্বাইদগী ফবা ক্বালিতীগী ওজা থৌরাং তৌরিবা । তিচিংদা মখোয় গ্রেজুয়েত ওইরিবা তিচিংদা মখোয় পোস্ত গ্রেজুয়েত ওইরিবা । অমসুং ফর ফরবা ওজাশিং মফম অদুদগী থোরকলি । গুজরাত অসি লৈবাক অসিগী অহানবা রাজ্যনি মদুনা ইন্দিয়ান ইন্সতিট্যুত ওফ তিচর ইদুকেসন অসিগুম্বা য়ুনিবর্সিতী লিংখৎলিবা । চিলদ্রেন য়ুনিবর্সিতী লিংখৎপা অহানবা রাজ্যসু গুজরাতনি । মালেমগী মফম কৈদশু চিলদ্রেন য়ুনিবর্সিতী লৈত্রি । ঙসিদি মাইক্রো ফেমিলিগী মায়কৈদা মালেম অসি মাংলোমদা চংশিল্লি । মমাশিংশু মশাগী মথৌদা চিল্লি মপাশিংশু মশাগী মথৌদা চিল্লি । অঙাংশিং অদু য়ুমগী থবক তৌরিবশিং অদুদা থাজদুনা থাদোক্লম্মী । মতমগী অপাম্বগী মতুং ইন্না অসিগুম্বা ইন্সতিট্যুত এরেঞ্জ তৌবা তাবনি মদুদি ঐখোয়গী পিকলিবা অঙাংশিং অদু মখোয়গী অফবা দিবলপমেন্ত অমসুং অচুম্বা য়েংশিন খোৎচিনবা । মখোয়বু অফবা নাগরিক ওইনবা মখোংদগী শেম্বা তাবনি । অমসুং অদুগী থবক অদু মসিগী চিলদ্রেন যুনিবর্সিতি অসিনা তৌগনি । অঙাঁশিংগী শান্নপোৎ করম্বা মওংগী ওইগনি, অঙাংশিংনা লৈরিবা কা অদুগী মচু অদু করি ওইগনি । অঙাংশিংদা করম্বা মখলগী ইশৈ তাহনগনি । অঙাংশিংদা ন্যুত্রিসন ভেলু লৈবা চিঞ্জাক অদু করি ওইগনি । অঙাংশিংবু তাকপি তম্বিবগী অনৌবা তেকনিক খরি ওইগনি মদু মখোয়না লায়না খংবা ঙমগদবা । মসিগী রিসার্স পুম্নমক অসি তৌদবা য়াদবনি ।

মমাঙৈদদি ইমুং মনুং অসি পুন্না লৈনরম্মী । অমসুং ইমুং মনুং অদু মসা মথন্তা য়ুনিবর্সিতী অমা ওইরম্মী । অমসুং অঙাং অদুনা মবোক্তগী অমা তমলম্মী, মপুদগী অমা তমলম্মী মখুরাদগী অমা তমলম্মী । মমাদগী অমা তমলম্মী, মপনথৌদগী অমা তমলম্মী । ঙসি মাইক্রো ইমুংগী মনুংদা মসিগীদমক্তা তাকপি তম্বীবগী মমল অদু লৈত্রে, মদুদগী ৱাখল্লোন অসি লাকখিবনি । মদুদি মালেমদা লাক্কদৌরিবা জেনরেশনশিংগী অঙাংশিংগী খনবিনবগীদমক অমসুং মদুদগী চিলদ্রেন য়ুনিবর্সিতী লাকখি । মদু মসিগী গুজরাত অসিগী লৈবাক লৈহাওদা লিংখৎখি । ক্রাইমগী সংসারদা মরুওইবা মফম অহুম লৈরি । অহান্বদা লেগেল ফেকল্তী, অনিশুবদা পুলিস অমসুং অহুমশুবদা ক্রাইম দিতেক্ত তৌনবা ফোরেন্সিক গুজরাতনা অহুমক অসিদা থবক তৌরি । নেস্নেল লো য়ুনিবর্সিতী লিংখৎলে । মদুনা খ্বাইদগী ফরবা লোয়রশিং থৌরাং তৌরনি । অফবা জজ থৌরাং তৌরনি । অমসুং জুদিসরিগী শরুক অদু চেকশিন্না থমলনি । পুলিস একাদমি য়ুনিবর্সিতী লিংখৎলে হিন্দুস্থানদা পুলিসিংগী অখন্নবা য়ুনিবর্সিতী খরা লৈ । মদুগী মনুংদা রুজরাত রাজ্যসু অমনি । গুজরাতনা লৈবাক অসিগী অনিশুবা রাজ্যনি । অমসুং ফোরেনসিক সাইন্স য়ুনিবর্সিতী ঙসি ক্রিমিনেল থৌদোকশিং অদোম্না উবা ফংলমলগনি । তেক্নোলোজীগী মতেংনা ক্রাইম ফাগৎলি । করিগুম্বা ফোরেন্সিক সাইন্স য়ুনিবর্সিতীগী পাঙ্গলগুম্না ফোরেন্সিক সাইন্স য়ুনিবর্সিতীগী ছাত্রশিং থৌরাং তৌরবদি সাইবর ক্রাইমবু ওইরবসু অতোপ্পা ক্রাইমবু ওইরবসু মদুদু ঙাকথোক্নবা দিতেক্ত তৌনবা, মরাল লৈরবিং অদু দন্দি ফংহন্নবা ফোরেন্সিক ৱার্ল্দনা খ্বাইদগী চাওবা থৌদাং অদু লৌরক্কদৌরি । অদুবু অয়াম্বনা এগজাম ওরিয়েন্তেদ ইনোভেসি, এগজাম ওরিয়েন্তেদ প্রোজেক্তশিং পাংথোক্লি, ঐহাক্কী লৈবাক্কী নহাশিং মসিগী মনুংদী পুন্দুনা থমবা অদু ঐহাক পামদে । মতমগী মতুং ইন্না ঐখোয়না ইনোভেসনদা পুক্নিং চংগদবনি ।

ভারত সরকারনা নীতি আয়োগতা এআইএম হায়না মমীং থোনবা ইন্সতিট্যুত দিবেলপ তৌরে । অতল ইনোভেসন মিসন, এআইএম অমসুং মদুগী মখাদা লৈবাক্কী চেলেঞ্জ রাউত খনগৎলে । অদুগুম্বা স্কুলশিংদা ইনক্রিজিং লেবকীদমক পৈশা পিরি । অমসুং মঙাশুবা, তরেতশুবা, নিপালশুবা, তরাশুবা অমসুং তরানিথোই শুবা ক্লাসকী অঙাংশিংবু ইনোভেসনগীদমক পুক্নিং থৌগৎলি । হিন্দুস্থানগী মরাইবক হোংনবা ঐখোয়গী ইনাক্তা লৈরিবা নেচরেল তেলেন্ত অদু ঐখোয়না ইনোভেসনদা চৎপা তাবনি । লৈবাক অদুগী মনুংদা আইতিগী খংহৈরবা লৈরবা অদুবু গুগল অতোপ্পা লৈবাক অমদা পুথোকখিবা । ঐহাক্না পাম্লিবা অসি, ঐহাক্না লৈবাক্কী নহাশিংদা শিংনরি লাকপিরো ঐখোয়না মালেমগী মরাইবক হোংদোক্নবা, ভারতকী মরাইবক হোংদোক্নবা ইনোভেসনগী লম্বী অদুদা খোংদারশি । অদুবু অফবা ইনোভেসনগী মওং মতৌ তোঙাল্লি । অমসুং ঐহাক্না নখোয় ময়াম্বু লমজিংবা পাম্লি, ঙসি ঐহাক্না থাজবা থম্লি মদুদি ঐহাক্কী ৱাফম অসি চেকশিন্না তাবিয়ু । নখোয়গী লৈরিবা একাদমিক নোলেজ অসিদা নখোয়না সরকিত তমলমগনি । বেসিক স্ত্রকচরেল ইঞ্জিনীয়ারিং তমলমগনি । মদুগী মতুং ইন্না ইনোভেসন তৌবাশু মওং মতৌ অমনি । ঐখোয়গী লৈবাক্তা মশিং থিঙমদবা সমস্যাশিং লৈরি । হৌজিক্কী ওইনা স্বচতাগী খোংজং চংশিল্লি । ইনোভেসন তৌরিবা ঐহাক্কী নহাশিং করিগীদমক ৱেস্তপু ৱেল্থ ক্রিয়েত তৌগদবা ইনোভেসনগী অনৌ অনৌবা প্রোজেক্তশিং করিগী পাইখৎলোইদবগে । ঙসি সোলর ইনর্জীদা থবক তৌরি । ঙসিদি সোলর ইনর্জী, ৱিন্দ ইনর্জী, রিন্যুয়েবল ইনর্জী, ক্লাইমেত চেঞ্জ মসি পুম্নমক অসি ঐখোয়গী থবক ওইরে । ঐখোয়না ভারতকী মওং মতৌগী মখা পোন্না ঐখোয়না করি ইনোভেসন তৌরগা য়ুমথোং খুদিংদা পোৎশিংবু লাইনা য়ৌহনবা ঙমগনি । করিগুম্বা ভারত্তা সোলর ইনর্জী অসুক য়াম্না ফংলগদি ঐখোয়না থোং থাকপগীদমক্তা ইমুং খুদিংমক্তা চাদিং হন্থহনবা য়াগদ্রা । লায়রবগী ইমুংদা মিদল ফেমিলীদা চাকশং মনুংদা ফুয়েলগী চাদিং লৈরিবা অদু হন্থহনগদ্রা হন্থহল্লোয়দ্রা । অপিক অপিকপা পোৎশিং ঐখোয়না য়েংলি । ঐহাক্না থাজবা থম্লি মদুদি আইআইতি গান্ধিনগরনা কলচর অমা পুরক্কনি ইনোভেসনগী কলচর পুরক্কনি । অমসুং কলচর অদু নীদ বেজ ওইবা তাই । নোলেজ বেজ নত্তে নীদ বেজ ওইরগদি ইনোভেসন লেংদনা লৈ । মদু স্কেলেবল ওইরকই, মদু কমর্সিয়েলগী খুদোংচাব ফংলকই । অমসুং য়াম্না চাওবা কম্পেনিশিংনা মদু লৈনবা মাংলোমদা চংশিল্লকই । মরম অদুনা ঐহাক্না পাম্লিবা অসি আইআইতিনা মায়কৈ অদোমদা থবক তৌরকপা অদুনি ।

ঐহাক্না আইআইতিগী নহাশিংদা ৱাফম অমসু হায়নিংলি । হিন্দুস্থানগী মনুংদা গুজরাতনা অহানবা রাজ্য ওইগনি মদুনা আই ক্রিয়েত হায়না কৌবা ইন্সতিট্যুত অমা লিংখৎখিবা । মী অয়াম্বনি মসি খংলমলোয় । ঐহাক্কী ৱাখলদা মসি চহি অহুম মরি শুরমলগনি । হৌজিক মদুগী বিলদিং শঙ্গাগদবা ৱাৎলি । ঐহাক্না মতম পিবা ঙমদদুনা লৈরে । অদুবু ঐহাক্না পিগনি । মসিগী আই ক্রিয়েত অসিনা রাজ্যগী অমসুং লৈবাক্কী ইনোভেসনদা পুক্নিং চংলি । মখোয়দা ইন্কুবেসন ফংহনবগী মথৌ তৌরি । মফম অদুদা লৈফম চাফমগী খুদোংচাবা ফংই । লেব লৈরি । অদোমগী ৱাখল্লোন অদু সরকারনা মফম অদুদা তঞ্জা অমা পিনবা থৌরাং তৌরি । আই ক্রিয়েত অসি মশা মথন্তা হিন্দুস্থানদা অমখক্তনি অমসুং মালেমগী খ্বাইদগী ফবা ইনোভেসন তৌরিবা ইন্সতিট্যুসনশিংগা লোয়ননা মহাক্না কোলাবোরেসন তৌরি । ঐহাক্না ফোংদোক্লিবা বাফম অসি পাওচেগী হেদলাইনদা য়াওদবনি । অদুবু লৈবাক অসিগী তুংগী নহাশিংগীদমক য়াম্না মরু ওইবা অমনি । মরম অসিনা মরুপশিং নখোয়দা ঐহাক্না ঐহাক্না থাজবা থম্লি । মসিগী ২০২২গী ভারতকী নিং তমখিবগী চহি ৭৫ ফারকপা, হৌজিক ঐখোয়গী ইনাক্তা চহি মঙা লৈরি ।

১৯৪২দা মহাত্মা গান্ধীনা হায়খি । হিন্দ থাদোক্লো ক্বিত ইন্দিয়া চহি মঙাগী মনুংদা লৈবাক অসিনা মদু ফংখি । অংগ্রেজশিং মফি মরোল য়োম্দুনা চৎপা তাখি ।

ঐহাক্কী ইরৈবাকচাশিং করিগুম্বা ঐখোয়না চহি মঙা অসি লাইরবা লৈহনলোইদবনি, জাতিবাদ লৈহল্লোয়দবনি, লৈবাক অসিদা শেঞ্জা থুমজা লৈহল্লোয়দবনি হায়না লেপতুনা লৈরবদা মসি পুম্নমক ওইথোকপা য়াই লাকপিরো মরূপশিং লেং মান্ননা চৎমিন্নরশি । মসি তৌগদবনি হায়বগা লোয়ননা ঐখোয় চৎলশি । ঐহাক্না আইতিগী নহাশিংদা ৱাফম অমগা হাইজনিংই । কনভোকেসন পাংথোকপা মতমদা নখোয়দা ৱাফম কয়া তাকলমগনি । অশুক চাওবা ভব্য ভবনদা নকোয়না লৈরি । ভব্য ভবন অসিগী মনুংদা মহৈ মশিং পুক্নিং লৌশিং ফংলি । নখোয়গী কোক লৈবা, ইমা ইপা অয়াবা পিবা অমসুং মখোয়গী ফিভম ফবনা মরম ওইদুনা নখোয় মফম অসিদা লৈবা ওইরম্বা য়াই । মসি পুম্নমক অচুম্বা ওইরগশু ঐহাক্কী নহা ওইরিবা মরূপশিং নখোয়না মসিগী ভব্য কেম্পস অসিদা লৈরিবগী মরমদি কনাগুম্বা লাইরবা অমনা মসিঘীদমক কন্ত্রীব্যুত তৌরখিবগীনি । কনাগুম্বা লাইরবা অমগী হক অদু নখোয়না ফংলি । মসিগী একর মরীগী মফম অসি করিগুম্বা সরকারনা মখোয়দা য়োন্দুনা পৈশা পুরক্তুনা খুঙ্গংদা প্রাইমরি স্কুলগী বিলদিং শেমলমবা তারবদি বিলদিং কয়া য়াম্না শেমলমগনি । পিএসই সেন্তর শেমলমবা তারগদি কয়া য়াম্না শেমলমগনি । অদুবু লৈবাক্কী তুংগী য়াইফনবগীদমক মসিগী একর চামরিগী মফম অসি লৈবাক্কী তুংগীদমক মফম অসিদা লিংখৎলিবনি । সমাজকীদমক হোৎনবগী ঐহাক্কী অপাম্বা লৈরি । মদু কৈদৌনুংদশু হন্থহল্লোয় । ঐহাক্কী লৈবাক্কী মীচম প্রজাগীদমক পাংথোক্কনি । ৱাখল্লোন অসিগা লোয়ননা মসিগী অনৌবা বিলদিং অসি শঙ্গাবগী মতম অসিদা থমোয়নুংদা চেৎনা খনবিয়ু । মসিগী আশা অসিগা লোয়ননা ময়াম পুম্নমকপু ঐহাক্না য়াইফ মঙ্গোল পিজরি । পুম্নমকপু থাগৎচরি ।