ভারতকী প্রধানমন্ত্রী
কোরিয়াদা লৈরিবা ইন্দিয়ন কমুনিতীদা প্রধান মন্ত্রী শ্রী নরেন্দ্র মোদীনা ঙসি ৱা ঙাংখ্রে।
মহাক্না সিওলদা লৈরিবা ইন্দিয়ন কমুনিতীদা মহাকপু তরাম্না ওকপীবগীদমক থাগৎপা ফোংদোকখি।
ভারত অমসুং কোরিয়াগী মরক্তা লৈনরিবা মরী অসি ললোন ইতিক খক্তদা য়ুমফম ওইবা নত্তে হায়না মহাক্না ফোংদোকখি। লৈবাক অনিমক্কী মরক্তা লৈনরিবা মরীগী মরুওইবা য়ুমফমদি প্রজাশিংগী মরক্তা পাও ফাওনবনি হায়না মহাক্না ফোংদোকখি।
ভারত অমসুং কোরিয়াগী মরক্তা লৈরিবা চহী কয়া লিরবা মরী অদু প্রধান মন্ত্রীনা ফোংদোকখি, অমদি অয়োধ্যাদগী কিলোমীতর লিশিং কয়া লাপ্না লাক্তুনা কোরিয়াগী নীংথৌ অমগা লুহোংখিবা মহারানী সুর্য়রত্নবু নৌহৌনা নীংশিংখি। হন্দক্তা পাংথোকখিবা দিৱালীগী থৌরমদা কোরিয়াগী ফাস্ত লেদী কিম জুং–সুক্না অয়োধ্যাদা লাকখিবা অদুসু মহাক্না নীংশিংখি।
লৈবাক অনিগী মরক্তা লৈরিবা মরূপ ওইবগী মরী অসি বুদ্ধিজম্না মখা তানা চেৎশিলহল্লে হায়না প্রধান মন্ত্রীনা ফোংদোকখি।
ইন্দিয়ন কমুনিতীনা কোরিয়াদা চাউখৎ থৌরাং, রিসর্স অমসুং ইনোবেসন্দা থৌদাং য়ারিবা অদুদা মহাক নুংঙাইবা ফাওই হায়না প্রধান মন্ত্রীনা হায়খি।
কোরিয়াদা যোগ অমসুং ভারতকী কুমহৈশিং ময়াম্না পাম্নরিবা অদু মহাক্না পনখি। ভারতকী চিঞ্জাকশিং অসিসু কোরিয়াদা য়াম্না পাম্নবা ওইরক্লি হায়না মহাক্না ফোংদোকখি। এসিয়ন গেম্সতা ভারক্কী মশান্না কবদ্দীদা কোরিয়ানা উৎখিবা থোইদোক হেন্দোকপা পর্ফোমেন্স অদুসু মহাক্না পনখি।
চহী অসি ভারতনা মহাত্মা গান্ধীগী চহী ১৫০শুবা মপোক কুমওন থৌরম পাংথোক্লি হায়না প্রধান মন্ত্রীনা ফোংদোকখি। মালেম অসিনা বাপুগী মরমদা হেন্না খঙগদবনি অমদি পান্দম অসি ফংনবা হোৎনবা অদু ঐখোয়গী ইথৌদাংনি হায়না মহাক্না হায়খি।
কোরিয়াগা লোয়ননা ভারতকী মরী অসি হেন্না চেৎশিল্লে অমদি রিজন অসিদা শান্তি, তংদু লৈতাবা অমসুং চাউখৎপা পুরক্নবা লৈবাক অনিমক্না পুন্না থবক তৌমিন্নরি হায়না প্রধান মন্ত্রীনা ফোংদোকখি। হৌজিক্তি ভারতকী পোত্থোকশিং কোরিয়াদা শিজিন্নরে অমদি কোরিয়াগী পোত্থোকশিং ভারতকী য়ুমথোং খুদিংদা শিজিন্নরি হায়না মহাক্না ফোংদোকখি।
হন্দক্তা ভারত্তা ওইরক্লিবা ইকোনোমিক দিবেলপমেন্তকী মতাংদা প্রধান মন্ত্রীনা ৱাফমশিং থমখি।
অথুবা মতমদা ভারত ৫ ত্রিলিয়ন দোলর ইকোনোমী ওইরক্লগনি হায়না মহাক্না ফোংদোকখি।
মহাক্না ইজ ওফ দুয়িং বিজিনে অমসুং ইজ ওফ লিভিংদা খঙনীংঙাই ওইবা মওংদা মাংলোমদা চংশিল্লিবা অদু ফোংদোকখি। মহাক্না জি.এস.তি. অমসুং কেশলেস ইকোনোমীগুম্বা ফগৎলক্লিবশিং অদুসু পনখি।
ভারত্তা ফাইনান্সিয়েল ইনক্লুজন রিভোলুসন অমা মালেম অসিনা সাখী ওইরি হায়না মহাক্না ফোংদোকখি। মসিগা মরী লৈননা বেঙ্ক একাউন্তশিং, ইন্সুরেন্স অমসুং মুদ্রা লোনশিংগী মতাংদা ঙাংখি।
এচিবমেন্ত কয়া অমনা মরম ওইদুনা ভারতকী মীংচৎ হেঙ্গৎলক্লে হায়না মহাক্না ফোংদোকখি। মহাক্না লায়রবশিংবু লেম্না লায়েংবা, মালেমগী খ্বাইদগী ৱাংবা মীতম – স্তেচু ওফ য়ুনিতী অসুং দিজিতেল ইন্দিয়াগী মতাংদা পনখি।
ক্লিন ইনর্জীগী লমদা ভারতকী দিবেলপমেন্ত অমসুং ইন্তর্নেস্নেল সোলর এলাইন্সকী মতাংদসু প্রধান মন্ত্রীনা ঙাংখি।
ঙসিগী ভারত্তা অনৌবা ইনর্জী অমা লৈরে হায়না প্রধান মন্ত্রীনা ফোংদোকখি। হয়েং মহাক্না ভারতকী প্রজাশিংগী মায়কৈদগী সিওল পিছ প্রাইজ লৌরগনি হায়নসু মহাক্না ফোংদোকখি।
প্রয়াগরাজদা হৌজিক চত্থরিবা কুম্ভ মেলাগী মতাংদা প্রধান মন্ত্রীনা পনখি অমদি হায়খি মদুদি হন্দক্কী কুম্ভ মেলা পায়খৎলিবা লু–নানবগী থৌওং অদু মালেম অসিনা খঙলে। মহাক্না কোরিয়াদা লৈরিবা ইন্দিয়ন কমুনিতীশিংবু মখোয় মশানা হোৎনদুনা ভারত্তা তুরিজম প্রমোৎ তৌনবা তকশিনখি।
