ভারতকী প্রধানমন্ত্রী

প্রধান মন্ত্রী, শ্রী নরেন্দ্র মোদীনা নহাশিং অমসুং প্রোফেস্নেলশিংবু পুক্নিং চিংশিনগদবা মহাক্কী ৱাখল্লোন খরা লিঙ্কইন্দা ফোংদোকখ্রে।

মখাদা ইরিবসি প্রধান মন্ত্রী, শ্রী নরেন্দ্র মোদীনা লিঙ্কইন্দা ফোংদোকখিবা ৱাখল্লোন্দুনি।

“চহী চা  অসিগী ৩০ অহুমশুবা দিকেদকী হৌরকপা শরুক অসি মথক-মখা ওন্দুনা হৌবা হায়বদু থোক্লে। কোভিদ-১৯না অকায়বা কয়া অমা পুদুনা লাকখ্রে। কোরোনাভাইরসনা প্রোফেস্নেল লাইফশিংগী পুন্সিগী শক্লোন অদুক্কী মতিক হোংহনখ্রে। হৌজিক্তি য়ুম্না অনৌবা ওফিস হায়বদু ওইরে। ইন্তর্নেৎনা অনৌবা মীফম পাঙথোকফম ওইরে। মতম খরগীদি, মরুপশিংগা ওফিসতগী পোথামিন্নবা হায়বসি হৌখ্রবা ৱারী ওইরে।

ঐহাকসু মসিগী অহোংবসিদা হৈননবা হোৎনরি।মীফমঅয়াম্বা, মন্ত্রী মরুপশিংগবু ওইরো, ওফিসিয়েলশিং অমসুং মালেমগী লুচিংবগবু ওইরো, ভিদিও কনফরেন্সিংগী খুথাংদা পাঙথোক্লে। তোঙান-তোঙানবা স্তেকহোলদরশিংদগী মপুং ফাবা ফীদবেক ফংনবগীদমক সমাজগী তোঙান-তোঙানবা কাঙলুপশিংগা ভিদিও কনফরেন্সিং মীফম কয়া পাঙথোক্লি। এন.জি.ও.শিং, সিবিল সোসাইতি গ্রুপশিং, অমসুং কম্ম্যুনিতি ওরগনাইজেসনশিংগা ৱারী ৱাতাই কয়া শাংনা পাঙথোক্লি। রেদিও জোকীশিংগা ৱারী শান্নবগী শরুকসু য়াওখি।

মসিগী নাকন্দা, নুমিৎ খুদিংগী ফোন মশিং খঙদনা তৌনদুনা সমাজগী তোঙান-তোঙানবা কাঙলুপশিংদগী ফীদবেক লৌরি।

ৱারবা মতম অসিদা মীওই কয়ানা মখোয়না করম্না মথৌ মখাদা তানা তৌরিবগে হায়বা কনা অমনা উরি। য়ুম-য়ুমদা লৈনবগী পাউজেল কয়া পীরদুনা ঐখোয়গী ফিল্ম স্তারশিংনা শেম্বা  ক্রিএতিব ভিদিও খরসু লৈখ্রে। ঐখোয়গী শৈশকপশিংনা ওনলাইন কন্সর্ত অমসু পাঙথোকখ্রে। শত্রং শান্নরোইশিংনা দিজিতেল ওইনা শত্রং শান্নরি অমসুং অসুম্না কোভিদ-১৯ লান্থেংদা মতেং পাংলি। কয়াদা ইনোবেতিব ওইরিবা!

থবক শুফমসু দিজিতেল ফার্স্ত ওইরে। করিগীদি ওইরোইদগে?

পুম্নমক্কী মথক্তা, তেক্নোলোজীগী খ্বাইদগী অহোংবা পুরক্লিবা ইথিল অসি লাইরবশিংদনি। ব্যুরোক্রেতিক হৈরারকি থুগাইরক্লিবা, মিদলমেন মুথত্তুনা য়াইফথৌরাং কয়া খুমাঙ-চাউশিল্লক্লিবসি তেক্নোলোজীননি।

ঐহাক খুদম অমা পীগে। ঐখোয়না ২০১৪দা ময়ামগী সেবা ফংজবা মতমদা, ঐখোয়না ভারতকী মীয়াম পুম্নমক্কা শম্নবা হৌখি, মরুওইনা লাইরবশিংবু মখোয়গী জন ধন একাউন্ত, আধার অমসুং মোবাইল নম্বরগা লোয়ননা।

মসিগী ইচম চম্বা মরী অসিনা চহী কয়া চত্থদুনা লাকখ্রবা শেঞ্জা-থুমজা অমসুং মীয়ামগী থবক থৌরমদগী শেন্দোং তানবা  লেপহনবতা নত্তনা সরকারনা বত্তন অমহেক নম্বগা শেল থাবসু য়াহল্লে। বত্তন অমখক্কী নম্ফম অসিনা ফাইল মপৈ কয়া অমসুং চোন্থদুনা লৈগদবা মতমসু হন্থহল্লে।

মালেম অসিদা অসিগুম্বা ইনফ্রাস্ত্রকচর খ্বাইদগী চাউবদু ভারত্তা লৈ। মসিগী ইনফ্রাস্ত্রকচর অসিনা কোভিদ-১৯গী মনুং অসিদা লাইরবা অমসুং লৈজদ্রবশিংদা, ইমুং করোর কয়াদা শেল থাদুনা কান্নবা ফংহনবদা ঐখোয়বু চাউনা মতেং পাংখ্রে।

অতোপ্পা পনবা য়াবা অমদি এজুকেসন সেক্তরনি। মসিগী হীরম অসিদা মতীক চাবা  প্রোফেস্নেল কয়ানা অনৌবা ৱাখল পুথোক্লি। মসিগী হীরম অসিদা তেক্নোলোজী মপাঙ্গল কলহনবগী কান্নবা কয়া অমা লৈ। ভারত সরকারনা দীক্ষা পোর্তেলগুম্বা লিংখত্তুনা ওজাশিংদা মতেং পাংনবা অমসুং ই-লর্নিংদা মতেং পাংনবা হোৎনরি। এজুকেসনবু অচুম্বা অমসুং মগুন হেনগৎনবা হোৎনবদা পান্দম থম্লি।

লোল কয়াদা ফংলিবা, ই-পাথশালানা ই-বূক অমসুং অসিগুম্বা লর্নিং মতিরেয়েল কয়াসু ফংহনলি।

ঙসিদি মালেম অসে অনৌবা করবারগী মওং অমদা চঙশিন্নরে।

ভারত, মহাক্কী অনৌবা ৱাখল পুথোকপদা খম থেংনা চাউখৎলিবা তগৎ-তগৎ তেক্লিবা লৈবাক অসিনা অনৌবা ৱার্ক কলচর অমা শাগৎপা ঙমগনি।

ঐহাক্না মসিগী অনৌবা করবার অমসুং ৱার্ক কলচর অসিবু মখাগী ভাৱলশিং অসিদা মঙলান শাগৎলি।

ঐহাক্না মখোয়বু অসুম্না কৌই- অনৌবা নোর্মেলগী ভাৱল- মরমদি, ইংলিস লোলগী ভাৱলগুম্না, মখোয়শিংসি কোভিদ-১৯ লোইখ্রবা মতুংগী সংসারদা করবারগী মওং অমহেক্তগী চঙদবা য়াদ্রবা মচাক অমা ওইরক্কদৌরি।

এদাপ্তেবিলিতীঃ

হৌজিক-হৌজিক মথৌ তারিবসি ইরাই লাইনা চুশীন্নবা য়াগদবা করবার অমসুং পুন্সি মহিংগী মোদেলনি।

অসুম তৌবনা ক্রাইসিস লাকপা মতমদা মীওই কয়াগী পুন্সি মাঙবা য়াওহন্দনা ঐখোয়গী ওফিস, করবার অমসুং ললোল-ইতিক্তি য়াঙনা চংশিনবা ঙমগনি।

দিজিতেল পেমেন্তপু ঐখোয়না কোনশিনবা হায়বসি এদাপ্তেবিলিতীগী মতীক চারবা খুদম্নি। অচৌবা অমসুং অপীকপা দুকান্দারশিংনা দিজিতেলগী খুৎলাইশিংদাশেলথাদগদবনি, মসিনা মরুওইনা ক্রাইসিসকী মতমদা ললোন ইতিকপু হিংহন্দুনা থম্বা ঙমগনি। ভারতনা মাঙজৌননা দিজিতেল ত্রাঞ্জেক্সন্দা পাম্ননা চংশিনবা উরে।

অতোপ্পা খুদম অমনা তেলিমেদিসিন্নি। ক্লিনিক নত্ত্রগা হোস্পিতালদা চৎলুবা তৌদনা কন্সলতেসন তৌবা কয়া হান্ননা ঐখোয়না উখ্রে। অমুক্কসু হন্না, মসি পোজিতিব ওইবা খুদম অমনি। ঐখোয়না তেলিমেদিসিনবু মালেম শীনবা থুংনা মতেং পাংনবা ব্যুজিনেস মোদেল অমা পুথোকপা ঙমগদ্রা?

ইফিসেন্সীঃ

ইফিসেন্ত ওই হায়রগা ঐখোয়না হান্না খন্নরম্বদু ঐখোয় নৌহৌননা অমুক খনবগী মতম ওইরব্রা হায়না খল্লি। ইফিসেন্সী হায়বসি ওফিস্তা মতম কয়াম লেল্লবগে হায়সি খক্তা ওইবা য়ারোই।

হোৎনবগী মওং মতৌ খক্তা নত্তবা প্রদক্তিবিতি অমসুংই ফিসেন্সীনা লূম্না লৌবা মোদেলশিং ওইনা খনগদবনি হায়না খল্লি। থবক অদু অকক্নবা মতমগী মনুংদা লোইশিনবনা মরু ওইনা লৌগদবনি।

ইনক্লুসিবিতীঃ

ঐখোয়না খ্বাইদগী খুদোংথীনিংঙাই ওইরিবা লাইরবশিং অমসুং ঐখোয়গী প্লানেত অসিদা মরুওইবা থম্বা ব্যুজিনেস মোদেলশিং শাগৎসি।

ঐখোয়না ক্লাইমেত চেঞ্জ থেংনবদা চাউনা খুমাঙ-চাউশিলহনবা ঙমখ্রে। মালেম ইমানা ঐখোয়দা মহাক্কী মতীক উৎখ্রে, ঐখোয় মীওইবগী থবক থৌরমশিং তপথরকপা মতমদা মহাক্না কয়াগী মতীক য়াঙনা চাউখৎপা ঙম্বগে হায়বদু উৎখ্রে। প্লানেত অসিদা পীরিবা ইথিল অসি হন্থবা তেক্নোলোজী অমসুং প্রেক্তিসশিং শেমগৎপগী মাঙদা মতম মতীক চানা লৈরি। য়াম্না শিজিন্নদনা হেন্না তৌসি।

হকশেল সমস্যাশিং কোক্নবা থবকশিং শেল চঙদনা অমসুং য়াম্না পাক-চাউনা তৌবা মথৌ তারে হায়বসি কোভিদ-১৯না ঐখোয়দা খঙহনবিরে। মীওইবা সমাজগী হকশেল অমসুং য়াইফনবগী মালেমগী থাক্তা ঐখোয়না লুচিংবা ওইবা য়াই।

ফিভম অমহেক্তদা মীপুম খুদিংমক্না চঙদবা য়াদ্রবা পোৎলমশিং ফংনবা ঐখোয়গী লৌমীশিং নাই-পাউশিং, মেছিনরী, অমসুং কৈথেলগী মরমদা খঙহন্নবা ইনোবেসনশিংদা শেল হেন্না থাদগদবনি।

ওপোর্চুনিতীঃ

ক্রাইসিস খুদিংমক্না মখোয়গা লোইননা খুদোংচাবা অমা পুদুনা লাকই। কোভিদ-১৯সু অদুঙাই, খেন্নবা লৈতে। হৌজিক করম্বা অনৌবা খুদোংচাবা/ করম্বা হীরমদা চাউখৎহনবায়াগদগেহায়বানৈনসি।

মনীংদগী তান্নবগী মহুত্তা, কোভিদ-১৯গী মতুংদা ওইগদবা মালেমদুদা ভারতনা মাংজিল থানা চৎকদবনি। মদু ফংনবা হোৎনবদা ঐখোয়গী প্রজাশিং, ঐখোয়গী হৈজ-শিংজবশিং, ঐখোয়গী তৌবা ঙম্বশিংসি করম্না শিজিন্নবা য়াগদগে হায়বগী মতাংদা খনবা হৌরসি।

য়ুনিভর্সেলিজমঃ

কোভিদ-১৯না শন্দোক্ত্রিঙৈদা জাতি, ধর্ম, জাৎ, কাস্ত, ক্রিদ, লোল নত্ত্রগা ঙমখৈগী য়েংদে। ঐখোয়না থেংনবা অমসুং থবক খুদিংমক মরুওইনা অপুনবা অমসুং ইচিল ইনাওগুম্না হোৎনগদবনি।মফমঅসিদদিঐখোয়অমত্তনি।

লৈবাক অমসুং সমাজ কয়ানা অমগা মাইয়োক্নখিবা পুৱারীদা থোকখিবা মমাঙগী মীৎকুপশিংগামান্নদনা, ঙসিদি ঐখোয় পুম্নমক্না অৱাবসি অমত্তা ওইনা মাইয়োক্নরি। তুংদা ওইগদবসি অপুনবা অমসুং রেজিলিয়েন্সনি।

ভারত্তগী পুথোকপা মথংগী ৱাখল অসি মালেম শীনবা থুংনা চুন্নবা অমসুং শিজিন্নবা য়াবা থিগদবনি। মখোয়না ভারতকী খক্তমক নত্তনা মীওইবা জাতি খুদিংমক্কী য়েংদুনা মখোয়গী ফিভম হোংবা ঙমগদবনি।

লোজিস্তিক্স অসি হান্নদি ফিজিকেল ইনফ্রাস্ত্রকচর – লম্বী, ৱেয়রহাউস, হিথাংফম খক্তমক্কী প্রিজমদগী য়েংলম্বনি। হৌজিক মতমগী লোজিস্তিকেল এক্সপর্তশিংনা মালেমগী সপ্লাই চেন অসি মখোয়গী য়ুমদগী নুংঙাইনা কন্ত্রোল তৌবা ঙম্লে।

কোভিদ-১৯ লোইখ্রবা মতুংদা ইন্দিয়ানা ফিজিকেল অমসুং ভর্চুৱেল চুম্না পুনশিন্দুনা য়াম্না লুবা অনৌবা মলতিনেস্নেল সপ্লাই  চেনশিংগী মালেমগী মরু ওইবা সেন্তর ওইনা হৌগৎপাঙমগনি। মদুগী মফমদু ফাওবা য়ৌনা কাখৎসি অমসুং মসিগী খুদোংচাবা অসি মাঙহনগুমসি।

ঐহাক্না ময়াম পুম্নমক্তা মসিগী মরমদা খনবা হৌবীনবা অমসুং ৱারী অসিদা অঙম্বা মতেং পাংবীনবা পুক্নিং চিংশিল্লি।

বি.ৱাই.ও.দি.দগী দব্ল্যু.এফ.ঐচ.তা হোংলকপদা ওফিসিয়েল অমসুং পার্সনেলগী খল মান্ননবা হোৎনবদা অনৌবা খুদোংচাদবশিং লাকহল্লি। অমা হেক্তা ওইরসনু, শাজেল অমসুং হকশেলদা মতম কাইথোকপীয়ু। হকচাং অমসুং ৱাখল ফনবগীদমক য়োগা তৌবীয়ু।

ইন্দিয়াগী মৈহৌরোলগী হিদাক লাংথকশিং অসি হকচাং ফনা লৈহনবদা মতেং পাংদুনা লাক্লি। আয়ুস মন্ত্রালয়না হকচাং ফনা লৈনবগী প্রোতোকোল খরা পুথোকখ্রে। মসিসু য়েংবীয়ু।

অরোইবা ওইনা অমসুং য়াম্না মরুওইনা, আরোগ্যা সেতু মোবাইল এপ দাউলোদ তৌবীয়ু। মসি কোভিদ-১৯ শন্দোকপা লাকশিনবদা মতেং পাংনবগীদমক তেক্নোলোজী শিজিন্নদুনা শাবা য়াম্না নৌবা এপ অমনি। দাউনলোদ হেন্না তৌরিবমখৈ কান্নবা হেনগৎকনি।

নখোয়গী পাউ তানবগীদমক ঙাইদুনা লৈগনি।