ভারতকী প্রধানমন্ত্রী

ঐহাক্কী নুংশিজরবা ইরৈবাকচাশিং,

মালেম পুম্বা হৌজিক য়াম্না লুবা ক্রাইসিসকী মতম অমা ফাওদুনা চৎলি। মহৌশানা নেচরেল ক্রাইসিস লাকপা মতমদা মদু লৈবাক খরা নত্রগা রাজ্য খরা খক্তদা থোকই। অদুম ওইনমক হন্দক্তি কেলামিতী অসিনা মীওইবা জাতি পুম্নমকপু অৱাফমদা তাহল্লে। মালেমগী অহানবা অমসুং অনিশুবা লাঞ্জাওদা লৈবাক কয়াদা শোকহনখিবা অদুদগী হেন্না ঙসি কোরোনা শোকহল্লে।

হৌখিবা থা অনিদগী ঐখোয়না লেপ্পা লৈতনা মালেম পুম্বদগী লাক্লিবা কোরোনা ভাইরসকা মরী লৈনবা অৱাবগী মশক ওইরবা পাউশিং উবা ফংলি, তাবা ফংলি। থা অনি অসিদা ভারতক মীওই করোর ১৩০না মালেমগী কোরোনা লাইচৎ অসি কন্না মায়োক্নরি, মথৌ তাবা চেকশিন থৌরাং লৌখৎলি।

অদুবু হৌখিবা নুমিৎ খরনি অসিদা ঐখোয় অৱাবা অসিদগী খরা শাফরকপগুম তৌরক্লি। পুম্নমক য়াইফরি। কোরোনাগুম্বা মালেমগী লাইচৎ অসিদা ইংনা নুঙাইনা লৈথোক্নবা ৱাখল্লোন অচুম্বা নত্তে। মরম অসিনা ভারত মচা পুম্নমক্না মীৎশিং-নাশিংনা অমসুং চেকশিন্না লৈবা য়াম্না মরু ওই।

মরূপশিং,

ময়ামগী মফমদগী ঐহাক্না করিগুম্বা খরা নিজরুবা মতম খুদিংদা অদোম্না ঐহাকপু কৈদৌনুংদা নিংবা কায়হনখিদ্রি। ঐখোয়না হোৎনরিবশিং অসি অদোমগী থৌজালগী শক্তি খক্তনা মায় পাকই। ঙসি, ঐহাক্না লৈবাক মীয়াম পুম্নমক্কী মফমদগী, অদোমগী মফমদগী করিগুম্বা খরা নিবা লাকচরি। ঐহাক্না অদোমগী লাক্কদৌরিবা হপ্তা খরা পামজৈ, অদোমগী লাক্কদৌরিবা মতম খরা পামজৈ।

মরূপশিং,

হৌজিক ফাওবদা সাইন্সনা কোরোনা লাইচৎতগী ঐখোয়বু কন্নবা অকক্নবা সোলুসন অমা পুথোকপা ঙমদ্রি অমদি মসিগী বেক্সিন দিবেলপ তৌবা ঙমদ্রি। অসিগুম্বা ফিভম অসিদা চিন্ত তৌবা অসি হৌনশানি।

কোরোনা ভাইরসনা খ্বাইদগী য়াম্না শোকহল্লবা লৈবাকশিংদা স্তদী তৌবদা ৱাফম অমসু মাংদা লাক্লি। লৈবাকশিং অসিদা হৌরকপা নুমীৎ খরনিগী মতুংদা খংহৌদনা লাইনা অসি পাক শন্না শন্দোরকখি। লৈবাকশিং অসিদা কোরোনানা শোকহল্লবা মীগী মশিং য়াম্না য়াংনা হেঙ্গৎলক্লি। ভারত সরকারনা ফিভম অসিদা, কোরোনা শন্দোরকপগী অসিগুম্লবা ত্রেক রেকোর্দ অসিদা মপুং ফানা মীৎয়েং থম্লি।

অদুম ওইনমক লৈবাক খরদদি অথুবা ৱারেপ লৌদুনা য়ারিবা মখৈ মখোয়গী প্রজাশিংবু আইসোলেৎ তৌদুনা ফিভম অদু কন্ত্রোল তৌরি। ভারতগুম্লবা প্রজা কোতি ১৩০ লৈবা লৈবাক অসিগী মাংদা, কোরোনাগী হেঙ্গৎলক্লিবা ক্রাইসিস অসি ইচম চম্বা ৱাফম নত্তে।

ঙসি চাউরা-চাউরবা অমসুং চাউখৎলবা লৈবাকশিংদা ঐখোয়না কোরোনা লাইচৎকী পাক-শন্না শন্দোরক্লিবা অদু উবা ফংলবনিনা ভারত্তা মসিগী মমী তারোই খনবসু লানগনি। মরম অদুনা মসিগী মালেমগী লাইচৎ অসি থেংননবগীদমক মরুওইবা ৱাফম অসি দরকার ওই। অহানবদা দিতরমিনেসন অমসুং অনিশুবদা অখাং কনবা।

ঙসি লৈবাক অসিগী প্রজা কোতি ১৩০না মসিগী গ্লোবেল ক্রাইসিস অসি থিংনবা ঐখোয়গী ৱারেপ অদু হেন্না চেৎশিলহন্নবা, নাগরিক অমা ওইনা ঐখোয়গী থৌদাং অদু পাংথোক্নবা কেন্দ্র অমসুং রাজ্য সরকারশিংনা পীরকপা দাইরেক্সন অদু ঙাক্না চৎপা তাই। ঙসি ঐখোয়না ৱারেপ অসি লৌবা তাই মদুদি ঐখোয় ইশামক লাইনা অসিনা ইনফেক্ত কঞ্জগনি অমদি অতোপ্পবুসু লাইনা অসিনা ইনফেক্ত ওইবদগী কনগনি।

মরূপশিং,

অসিগুম্লবা লাইচৎ অসিদা, মন্ত্র অমা খক্তা মথৌ তৌরি- ‘হম স্বস্থ তো জগ স্বস্থ’, হায়বদি ঐখোয়না হকচাং ফনা লৈবা তারগদি মালেম অসি হকচাং ফনা লৈগনি। অসিগুম্বা ফিভম অসিদা, লাইনা অসিগী হিদাক লাংথক অমত্তা লৈতবনিনা ঐখোয় ইশামকপু হকচাং ফনা থম্বা অসি য়াম্না মরু ওই। লাইনা অসিদগী নান্থোক্নবা অমসুং ইশামকপু হকচাং ফনা থম্নবগীদমক দরকার ওইরিবা অসি অখাং কনবনি। অদুগা মীওই অমনা করম্না অখাং কনগদগে? মীয়াম তিনবদগী লাপ্না লৈবা, য়ুমদগী মপান থোকপদগী নান্থোকপা। হৌজিক্তি মসিবু ‘সোসিয়েল দিস্তেন্সিং’ হায়না কৌনরি, অমদি মালেমগী কোরোনাগী লাইচৎকী মতম অসিদা মসি য়াম্না দরকার ওইরি।

ঐখোয়গী দিতরমিনেসন অমসুং অখাং কনবনা মসিগী মালেমগী লাইচৎ অসিগী ইম্পেক্ত হন্থহনবদা অচৌবা থৌদাং লৌরগনি। অদোম করিসু তৌদে, অদোম করিসু তৌরোই, অদোম কৈথেলদা অদুমক কোইচৎ চৎকনি, লম্বী সোরোক্তা চৎকনি, অমদি কোরোনাদগী নান্থোক্কনি হায়না থাজবা তারগদি মদু অরানবা ওইগনি। অসুম্না তৌদুনা অদোম্না অদোমগা লোয়ননা অদোমগী ইমুং মনুংদসু অচুম্বা তৌদ্রে।

মসি ৱাখলদা থম্দুনা, ঐহাক্না ময়ামগী মফমদা অপীল তৌজরি মদুদি লাক্কদৌরিবা হপ্তা খরা ফাওবা, য়াম্না দরকার ওইবা মতম খক্তদা য়ুমদগী মপান থোকপীয়ু। য়ারিবা মখৈ অদোম অদোমগী থবকশিং, কারবার ওইগেরা নত্রগা ওফিসকী থবক ওইগেরা, য়ুমদগী তৌবীয়ু।

মতম অসিদা সরকারগী থবক তৌরিবশিং, হেল্থকেয়ার সর্বিসশিং, মীয়ামগী মীহুৎশিং, মীদিয়া পর্সোনেলশিং মখোয় এক্তিব ওইনা লৈবা মথৌ তাই। অদুবু সমাজকী লেমহৌরিবা মীপুম খুদিংমক্না মখোয় মশামক লেমহৌরিবা সমাজতগী আইসোলেৎ তৌগদবনি।

ঐহাক্না মসিমসু অপীল তৌজরি মদুদি ঐখোয়গী ইমুং-মনুংদা লৈরিবা অহল ওইরবা সেনিয়র সিতিজনশিং অমদি চহী ৬৫ মথক্কী মীওইশিংনা মথংগী হপ্তা খরদি য়ুম থাদোক্তুনা চৎপীগনু। ঙসিগী জেনরেসন্না মসিদা য়াম্না মমুৎ তানা খংলমলরোই, অদুবু মমাংঙৈ মতমদা লানগী মতমদা নুমিদাংদা ব্লেকআউৎ উবা ফংলম্মী। মসিসু মতম শাংনা চত্থরম্মি। কয়ারক হন্না ব্লেকআউৎকী দ্রিলসু চত্থরম্মী।

মরূপশিং,

ঙসি ঐহাক্না লৈবাক অসিগী নাগরিক খুদিংমক্কী মফমদা অতোপ্পা ইসু অমদা মতেং পাংনবা হায়জরি, মদুদি প্রজাগী কর্ফিয়ুনি। প্রজাগী কর্ফিয়ু হায়বদি প্রজাগীদমক, প্রজানা, প্রজা মশামক্তা থম্বা কার্ফিয়ুনি। হন্দক লাক্লিবা নোংমাইজিং, হায়বদি মার্চকী তাং ২২ অসিদা মীপুম খুদিংমক্না অয়ুক্কী পুং ৭তগী নুমিদাং পুং ৯ ফাওবা প্রজাগী কার্ফিয়ুগী পালন তৌগদবনি। কার্ফিয়ু অসিগী মনুংদা ঐখোয়না য়ুমদগী মপান থোক্লোইদবনি, লম্বী সোরোক্তা চৎলোইদবনি নত্রগা কৈরোল লৈকাইদা চৎলোইদবনি। ইমার্জেন্সী অমসুং ইসেন্সিয়েল সর্বিসকা লোয়নবা মাওই খক্তনা মখোয়গী ময়ুমদগী মপান থোক্কদবনি।

মরূপশিং,

মার্চকী ২২ অসি ঐখোয়না হোৎনরিবা, ঐখোয়গী সেল্ফ-রেস্ত্রেন্ত অমসুং জাতিগী থৌদাংদা ঐখোয়গী ইথৌ অদু মপুং ফাহন্নবা ঐখোয়গী ৱারেপগী খুদম ওইরগনি। মার্চ ২২দা প্রজাগী কার্ফিয়ু অমা মায় পাকপা অমদি মসিদগী ফংলকপা এক্সপরিয়েন্সনা ঐখোয়গী লাক্কদৌরিবা শিংনরকপশিংগীদমকসু শেম শারগনি।

ঐহাক্না লৈবাক অসিগী রাজ্য সরকার পুম্নমক্তসু হায়জরি মদুদি মসিগী প্রজাগী কার্ফিয়ু অসি পাংথোকপদা লুচিংবীয়ু। ঐহাক্না জাতি অসিগী নহাশিং, এন.সি.সি., এন.এস.এস., সিভিল সোসাইতীগুম্বা ওর্গনাইজেসনশিংদা হায়জরি মদুদি হৌজিক্তগী হৌরগা মথংগী নুমীৎ নিনি ফাওবা পুম্নমকপু পব্লিক-কর্ফিয়ুগী মরমদা এৱার্নেস পীবিয়ু। করিগুম্বা ওইথোকপা লৈরগদি মীপুম খুদিংমক্না নুমীৎ খুদিংগী য়ামদ্রবদা মীওই ১০দা ফোন তৌদুনা কোরোনা ভাইরসতগী নান্থোক্নবা উপায়শিংগা লোয়ননা প্রজাগী কার্ফিয়ুগী মতাংদসু হায়বীয়ু।

মরূপশিং,

অদোম্না হোৎনরিবশিং অসিগী মরক্তা, প্রজাগী কার্ফিয়ুগী নুমীৎ, মার্চ ২২দা ঐহাক্না অদোমগী মফমদগী মতেং অমগা পাম্লি। হৌখিবা থা অনিদগী মীওই লাখ কয়া হোস্পিতালশিংদা, এয়ারপোর্তশিংদা অহিং নুংথিল থবক তৌরি। দোক্তরশিংদগী নর্স ফাওবা, হোস্পিতাল স্তাফ, সেনিতেসন ৱার্করশিং, এয়রলাইন এমপ্লোইশিং, সরকারগী স্তাফশিং, পুলিস পর্সোনেলশিং, মীদিয়াগী মীওইশিং, ত্রেন-বস-ওতো রিক্সা সর্বিসকা মরী লৈনরিবা মীওইশিং, হোম দিলিবরী এজেন্তশিং; মখোয় মশাগী খন্দনা অতোপ্পা মীওইশিংগী সেবা তৌরি।

হৌজিক ওইরিবা ফিভম অসিদা মসিগী সর্বিসশিং অসি ইচম চম্না লৌবা য়ারোই। ঙসিদি মীওইশিং অসি মখোয় মশামক ইনফেক্ত ওইরকপা য়াবগী খুদোং থিবা লৈরি। অদুম ওইনমক মখোয়না মখোয়গী মথৌ পাংথোক্লি, অতোপ্পগী সেবা তৌরি। জাতিগী দিফেন্দর অমগুম মখোয়না কোরোনা লাইচৎ অমসুং ঐখোয়গী মরক্তা খোংফম চেৎনা লেপ্লি। জাতি অসিনা মখোয় পুম্নমক্তা তৌবিমল খংবা উৎলি।

ঐহাক্না পাম্লিবদি মার্চ ২২, নোংমাইজিং নুমীৎ অসিদা ঐখোয়না অসিগুম্লবা মীওইশিং অসিদা তৌবিমল খংবা উৎপা অদুনি। নোংমাইজিং নুমীৎকী নুমিদাংৱাইরম পুং ৫ চপ চানা তাবা মতমদা ঐখোয় পুম্নমক ঐখোয়গী য়ুমগী থোংজিন্দা, বেলকোনিদা, থোংনাওদা লেপতুনা মিনিৎ ৫ মখোয়বু ইকায় খুম্নসি। ঐখোয় খুবাক খুদুনা, পুখম থিন্দুনা, বেলশিং খিংদুনা মখোয়গী মোরেল থৌগৎসি, মখোয়গী সর্বিস ইকায় খুম্নসি। মসিগী মতাংদা প্রজাশিংদা খংহন্নবা ঐহাক্না লৈবাক অসিগী লোকেল ওথোরিতীশিংবু মার্চ ২২গী নুমিদাংৱাইরম পুং ৫ তাবা মতমদা সাইরেন খোংনবা হায়জরি।

সেবা অসি খ্বাইদগী অথোইবা ধর্মনি হায়বা ঐখোয়গী ত্রেদিসনবু ঙাক্না চৎলিবা অসিগুম্লবা নাগরিকশিংগীদমক ঐখোয়না পুকচেল শেংনা ঐখোয়গী ফীলিং অদু ফোংদোক্কদবনি।

মরূপশিং,

ক্রাইসিসকী অসিগুম্লবা মতম অসিদা অদোম্না মসিমসু খংজিনবীগদবনি মদুদি ঐখোয়গী চংদবা য়াদবা সর্বিসশিংদা, ঐখোয়গী হোস্পিতালশিংদা প্রেসরসু লেপ্পা লৈতনা হেঙ্গৎলক্লি। মরম অসিনা য়ারিবা মখৈ রুতিন চেক-অপকীদমক হোস্পিতালশিংদা চৎতনবা ঐহাক্না অপীল তৌজরি। দরকার ওইরকপা মতমদা অদোমগী মনাক নকপদা লৈবা দোক্তর, অদোমগী ফেমিলী দোক্তর নত্রগা অদোমগী মরী-মতাদা দোক্তরদা ফোন তৌদুনা দরকার ওইবা গাইদেন্স লৌবিয়ু।

মরূপশিং,

মসিগী মালেমগী লাইচৎ অসিনা ইকোনোমীদসু পাক-চাউনা মমি তারি। কোরোনা ভাইরসনা থোকহল্লিবা ইকোনোমীগী শিংনরকপশিং অদু খংদুনা সরকারনা ফাইনান্স মিনিস্তরগী লুচিং মখাদা কোবিদ-১৯ ইকোনোমিক রেস্পোন্স তাক্স ফোর্স অমা শেম্নবা ৱারেপ লৌরে। তাক্স ফোর্স অসিনা স্তেকহোল্দর পুম্নমক্কা চাং নাইনা ৱারী শান্নবা অমদি ফীদবেক্তা য়ুমফম ওইরগা তুংদা ৱারেপ লৌগনি।

তশেংনা লাইচৎ অসিনা লৈবাক অসিগী মিদল ক্লাস, লৱর ক্লাস অমসুং লাইরবশিংগী ইকোনোমিক ইন্তরেস্তপু য়াম্না শোকহল্লি। ক্রাইসিসকী মতম অসিদা বিজিনেস ৱার্লদ অমসুং সমাজকী হাই ইনকম সেগমেন্তদসু হায়জরি মদুদি য়ারিবা মখৈ মখোয়দা সর্বিস পীরিবা মীওই পুম্নমক্কী ইকোনোমিক ইন্তরেস্ততা পুক্নিং চংবীয়ু। লাক্কদৌরিবা নুমীৎ খরা অসিদা মীওইশিং অসি ওফিস নত্রগা নখোয়গী য়ুমদা লাকপা ঙম্দবসু য়াই। অসিগুম্বা ফিভম অসিদা মখোয়গী খুৎশুমন ককপীগনু, মীনুংশিগা লোয়ননা মখোয়বু ত্রিৎ তৌবীয়ু। মতম পুম্নমক্তা নিংশিংবীয়ু মদুদি মখোয়সু ইমুং-মনুং চলাইরিবনি, মশাগী ইমুং-মনুংবু অনাবদগী ঙাকথোক্লিবনি।

মরূপশিং,

হৌখিবা থা অনিদা ভারত মচা কোতি ১৩০না, লৈবাক অসিগী নাগরিক খুদিংমক্না, লৈবাক্কী মাংদা তারিবা অৱাবা অসি মশাগী অৱাবনি হায়না খল্লি, ভারতকীদমক, সমাজকীদমক মখোয়না তৌবা য়াবা পুম্নমক মখোয়না তৌরি। ঐহাক্না মপুং ফানা থাজবা থম্লি মদুদি লাক্কদৌরিবা মতমশিংদসু অদোমগী থৌদাং অদু মতৌ অসুম্না পাংথোকখিগনি।

মরূপশিং,

ঐখোয়না ঐখোয়গী কেপাসিতী অমসুং কেপেবিলিতী পুম্নমক কোরোনা ভাইরসতগী ঐখোয় ইশাবু ঙাকথোকপদা থাদবা মথৌ তাই। ঙসি লৈবাক অসিদা কেন্দ্র সরকার ওইগেরা, রাজ্য সরকার ওইগেরা, লোকেল ওথোরিতী ওইগেরা, পঞ্চায়ৎ ওইগেরা, মীয়ামগী মীহুৎ ওইগেরা নত্রগা সিভিল সোসাইতী ওইগেরা, পুম্নমক্না মশা-মশাগী ওইবা মওংদা মসিগী মালেমগী ওইনা লাইচৎ অসিগী মায়োক্তা থেংনবদা মশাগী থৌদাং লৌরি। অদোমসু অদোমগী মপুংফাবা থৌদাং অদু পীগদবনি। মালেমগী লাইচৎ অমগী এনবাইরনমেন্ত অসিদা মীওইবা জাতিগী মায় পাকপা ওইরসনু, ভারতকী মায় পাকপা ওইরসনু।

নুমীৎ খরনিগী মনুংদা নবরাত্রিগী কুমহৈ লাক্লনি। মসি শক্তি নিংজবগী কুমহৈনি। ভারত মপুংফাবা শক্তি, মপুংফাবা পাঙ্গল অমসুং ইনর্জীগা লোয়ননা মাংলোমদা চংশিনবা ওইরসনু, মসি পুম্নমক্কী মফমদা ঐহাক্কী য়াইপ পাউজেলনি।

হন্না-হন্না থাগৎচরি।