ভারতকী প্রধানমন্ত্রী

ভারত মাতা কী জয়!

ভারত মাতা কী জয়!

ভারত মাতা কী জয়!

নহারোল, থৌনা ফাবা পুম্নমক্না থৱায় য়াওবনা রাস্ত্রীয় এক্তা দিবসকী অচৌবা শক্তি অমনি। অমরোমদা ঐগী মমাংদা মিনি ইন্দিয়া অমগী মওংদা লৈরি। তোঙান-তোঙানবা রাজ্যশিং, তোঙান-তোঙানবা লোলশিং, তোঙান-তোঙানবা চৎনবী লৈ অদুবু মফম অসিদা তিল্লিবা মীপুম খুদিংমক অসি অমত্তা ওইবগী অচেৎপা মরী অমনা কিখি। বীদ কয়া ওইরবসু রোজরীদি অমখক্তনি। হকচাং কয়া লৈরবসু ৱাখলদি অমা খক্তনি। ওগস্ত 15বু ঐখোয়গী নীংতম নুমিৎ, জনুৱারী 26পু গনত্রা নুমিৎনা পালন তৌবা অদুগুম্না ওক্তোবর 31 অসি লৈবাক্কী কাচিন কোয়া খুদিংমক্তা নেস্নেলিজমগী ৱাখল্লোন ফোঙদোকপগী কুহ্মৈ অমা ওইরকখি।

ওগস্ত 15দা লাল কিলাদা পাঙথোকপা থৌরম, জনুৱারী 26তা জিল্লীগৌ কর্তব্যপথতা চৎপ পরেদ অমসুং ওক্তোবর 31দা স্তেচু ওফ য়ুনিতীগী মমাংদা ইমা নর্মদাগী তোর্বান্দা রাস্ত্রীয় এক্তা দিবস পাঙথোকপা অসিনা জাতিবু চাউখৎহন্নবগী ত্রিনিতী ওইরকখি। ঙসি মফম অসিদা পাঙথোকখিবা পরেদ অমসুং থৌরমশিংনা মীপুম খুদিংমকপু শুমহৎখি। এক্তা নগরদা লাকপা বিজিতরশিংনা অচৌবা মীতম অসি য়েংবা খক্তা নত্তনা সরদার সাহেবকী পুন্সি, মহাক্না কত্থোকখিবা অমসুং মহাক্না ভারত শেমগৎপদা শরুক তমখিবা অদুসু উবা ফংখি। মীতম অসি শাবগী ৱারীদা এক ভারত শ্রেস্থ ভারতকী ৱাখল্লোনগী মমি অমা তাখি। মসি শানবগীদমক লৈবাক্কী কাচিন-কোয়া খুদিংমক্তগী লৌমীশিংনা আইরন মেন অসিগী মীতমগীদমক লৌ-উবগী খুৎশু খুৎলাই অমসুং থাং-তেন দান তৌরকখি। ৱাল ওফ য়ুনিতী অসি লৈবাক্কী কাচিন কোয়া খুদিংমক্তগী পুরকখিবা লৈপাক্না শাখি। মসি অচৌবা ইথিল অমনি। ইথিল অসিনা থল্লবা ইরৈবাকচা করোর কয়ানা থৌরম অসিগা মরী লৈনরি।

লৈবাক শিনবা থুংবদগী ‘রন ফোর য়ুনিতী’গীদমক মীওই লাখ কয়ানা শরুক য়ারি। কলচরেল প্রোগ্রামশিংগী খুত্থাংদা মীওই কয়ানা মসিগী শরুক অমা ওইরি। লৈবাক অসিদা ঐখোয়না য়ুনিতীগী ইচেল অমা উবা মতমদা, ভারত মচা করোর 140গী মরক্তা য়ুনিতীগী ইহুল চেনবা মতমদা সরদার সাহেবকী ৱাখল্লোন্না ‘এক ভারত- শ্রেস্থ ভারত’কী ফিরেপকা লোয়ননা ঐখোয়গী ইরক্তা চেল্লিবগুম্না ফাওই। য়াইফরবা নুমিৎ অসিদা ঐহাক্না সরদার বল্লভভাই পতেলদা ইকোক নোন্না খুরুমজরি। ঐহাক্না ইরৈবাকচা পুম্নমক্তা রাস্ত্রীয় এক্তা দিবসকী নুংঙাইবা ফোঙদোকচরি।

ঐগী ইমুং মনুংশিং,

লাক্কদৌরিবা চহি 25 অসি ভারতকীদমক চহিচা অসিগী খ্বাইদগী মরু ওইবা চহি 25নি। চহি 25 অসিদা ঐখোয়না ভারতপু নুংঙাই য়াইফবা, ভারতপু চাউখৎপা ওইহনগদবনি। নীংতম্বা ফংদ্রিঙৈ মমাংদা মমাংগী চহিচাগী চহি 25গী মতমদা ইরৈবাকচা খুদিংমক্না ভারত নীংখা তম্নবা কত্থোকখি। হৌজিক চাউখৎপা ভারত অমা ওইহন্নবা মথংগী চহি 25 অসি ঐখোয়গী মাংদা খুদোংচাবা অমা ওইরি। ঐখোয়না সরদার পতেলগী ইথিলগা লোয়ননা পান্দম খুদিংমক ফংনবা হোৎনগদবনি।

ঙসি মালেম পুম্বনা ভারত্তা মীৎয়েং থম্নরক্লি। ঙসি ভারত অসি মাইপাকপশিংগী অনৌবা পনখৈ অমদা য়ৌবা ঙম্লে। মালেমনা G20দা ভারতকী তৌবা ঙম্বশিং উবদা অঙকপা পোজক্নখি। ঐখোয়না মালেমগী খ্বাইদগী চাউবা দেমোক্রেসীগী ক্রেদিবিলিতী অদুবু অনৌবা পনখৈ তম্না পুখৎপদা চাউথোকচবা পোকই। ঐখোয়গী ঙমখৈশিংবু মালেমগী খুদোংথিবা কয়ামরুম থোক্লিঙৈ চৈরক্তা শাফনা থম্বা ঙম্বদা চাউথোকচবা পোকই। ঐখোয়না মথংগী চহি খরা অসিদা মালেমগী খ্বাইদগী চাউবা ইকনোমিক পাৱর অহুমগী মনুং চল্লগনি। মালেমগী লৈবাক অমত্তনা য়ৌবা ঙমদ্রিবা মফম অমদা লৈবাক অসিনা থা কাবা ঙমখিবদা ঐখোয়না চাউথোকচবা পোকই। ঙসি ভারতনা ঐখোয়গী প্রোফেস্নেলশিংনা মালেমগী বিলিয়ন-ত্রিলিয়ন দোলর কম্পনীশিং চল্লাইরিবা অমসুং লমজিংলিবা অসিদা চাউথোকচবা পোকই। ঙসি তিরঙ্গাগী মতিক ময়াই অসি স্পোর্তসকী লমদা লেপ্পা লৈতনা হেনগৎলক্লিবা অসিদা চাউথোকচবা পোকই। ঐখোয়গী নহারোল, ইচাশিংনা রেকোর্দ ওইবা মশিংদা মেদলশিং লৌরকপদা ঐখোয়না চাউথোকচবা পোকই।

মরুপশিং,

অমৃত কাল অসিদা ভারতনা মীখা পোনবগী ৱাখল্লোন থাদোক্তুনা মাংদা চংশিন্নবা ৱাশকখি। ঐখোয়না চাউখৎলক্লি অমসুং ঐখোয়গী কলা-সংস্কৃতি য়োকখৎলি। ভারতনা মাগী নেবেল ফ্লেগতগী মীখা পোনবগী খুদম লৌথোকখি। মীখা পোল্লিঙৈ মতমগী কান্নদ্রবা আউন কয়া লৌথোকখি। ইন্দিয়ন জুদিসিএল কোদসু IPCনা মহুৎ শিনখি। মতম অমদা ইন্দিয়া গেৎ মীরৈবাক্কী শক্তিগী মীহুৎ অমগী মীতম থমলমখিবা অদু নেতাজী সুভাশকী মীতম ওইনা থমদুনা ঐখোয়দা ইথিল পীরি।

মরুপশিং,

ঙসি ভারতনা ফংবা  ঙমদবা পান্দম অমত্তা লৈত্রে। ভারতনা পুন্না লৌবা ঙমলোইদবা ৱাশক অমত্তা লৈত্রে। হৌখিবা চহি মাপন অসিদা লৈবাক অসিনা মীপুম খুদিংমক্না হোৎনরবদা করিগুম্বা ঙমলোইদবা অমত্তা লৈতে হায়বা উবা ফংখি। কাশ্মির অসি আর্তিকল 370দগী মনীং তম্বা ফংহনগনি কনানা খল্লমখি। অদুবু ঙসি কাশ্মির অমসুং লৈবাক অসিদগী আর্তিকল 370গী ফক্লাং কাইখ্রে। সরদার সাহেবনা লৈরিবা মফম অদুদা মহাক্না শোইনা নুংঙাইবা পোক্লমগনি অমসুং ঐখোয় পুম্নমক্তা থৌজাল পীবীরমগনি। ঙসি কাশ্মিরগী ইচিল-ইনাওশিংনা তেরোরিজমগী লাংদগী থোরকপা ঙম্লে অমসুং অহাংবা নুংশিৎ ফংজরে অমসুং লৈবাক অসিগী চাউখৎ-থৌরাংদা খোঙথাং মথং মথং থাংজিল্লক্লি। অমরোমদা সরদার সরোবর দাম অসি দিকেদ 5-6 পন্দুনা লৈরমখি। মীপুম খুদিংমক্না হোৎনবনা মরম ওইদুনা দাম অসিগী থবকসু হৌখিবা চহি খরা অসিদা লোইশিনবা ঙমখি।

মরুপশিং,

ঐখোয়গ এক্তা নগর অসি অখাং কল্লবদি মাইপাকপা ঙম্মি হায়বগী অচৌবা খুদম অমসু ওইরি। চহি 10-15গী মমাংদা কনাগুম্বা অমত্তনা কেবরিয়া অসি অসুম্না হোংলক্কনি খল্লুদে। ঙসি এক্তা নগর অসি গ্লোবেল গ্রীন সিতী ওইনা শকখঙলি। মসি লৈবাক কয়াগী পুক্নিং চীংশিনখিবা মিসন লাইফ হৌদোকখিবা মফম অদুনি। মফম অসিদা ঐহাক্না লাকপা খুদিং মসিগী ফজবা অসি হেন্না হেনগৎলক্লি। রিভর রাফতিং, এক্তা ক্রুজ, এক্তা নর্সরী, এক্তা মোল, আরোগ্য বেন, কক্তস এন্দ বত্তরফ্লাই গার্দেন, জঙ্গল সফারি, মিয়াৱাকি ফোরেস্ত, মেজ গার্দেননা লমকোইবা কয়াগী পুক্নিং চীংশিল্লি। হৌখিবা থা 6 অসিদা মফম অসিদা উ চারা লাখ 1.5 হেন্না থাখি। এক্তা নগর অসি সোলর পাৱর জেনরেসন অমসুং সিতী গ্যাস দিস্ত্রিব্যুসন্দা মাংজিল থারি।

ঙসি মফম অসিদা স্পেসিএল হেরিতেজ ত্রেন কৌবা অনৌবা এত্রেক্সন অমা হাপচিনখ্রে। ত্রেন অসিনা এক্তা নগর স্তেসনদগী অহমদাবাদ ফাওবা চেন্দুনা ঐখোয়গী কলা সংস্কৃতি অদু উহনগনি অমসুং মসিদা মোদর্ন ফেসিলিতীশিং য়াওরি। মাগী ইঞ্জিন অসি য়েংবদা স্তীম ইঞ্জিন মাল্লি অদুবু ইলেক্ত্রিসিতীনা চল্লাই। এক্তা নগরদা ইকো-ফ্রেন্দলী ত্রান্সপোর্তকী শিল-লাংলি। হৌজিক মফম অসিদা লাকপা লমকোইবশিংনা পব্লিক বাইক শিয়রিং সিস্তেমগী খুদোংচাবশিংসু ফংলি। মসিদা ই-বস, ই-গোল্ফ কার্ত অমসুং ই-সাইকলসু লৈ। হৌখিব চহি 5 অসিদা লমকোইবা করোর 1.5 হেন্না লাকখি অমসুং মসিগী মশিং অসি লেপ্পা লৈতনা হেনগৎলক্লি। ঐখোয়গী ত্রাইবেল ইচিল-ইনাওশিংনা মসিদগী চাউনা কান্নবা ফংলি,  মসিনা মখোয়দা থবক্কী খুদোংচাবসু পীরি।

মরুপশিং,

ঙসি মালেম পুম্বনা ভারতকী ফিরেপ, থৌনা অমসুং ভারত মীয়ামগী মতিক-ময়াইগী শক্তি অসি ইকাই খুম্নবা অমসুং থাজবগা লোয়ননা মীৎয়েং থম্নরি, ভারতকী মীয়াম শক্তি ঙাক্না চৎপা, ভারতকী মতিক ময়াই অমসুং লম্বা লৈত্রবা খোঙচৎ অসি ঙসি মীপুম খুদিংমক্কী ইথিলগী হৌরকফম ওইরি।

অদুবু ঐগী নুংশিরবা ইরৈবাকচাশিং,

ঐখোয়না ৱাফম খরা কৈদৌনুংদা কাওরোইদবনি, ঐখোয়না মখোয়বু মতম চুপ্পদা নীংশিংগদবনি। ঙসি রাস্ত্রীয় এক্তা দিবস অসিদা ঐহাক্না মসিগী মতাংদা ইরৈবাকচা খুদিংমক্তা ঐগী ৱাখল্লোন ফোঙদোকচনীংই। ঙসি মালেম পুম্বদা ইরাং থোক্লি। কোরোনাদগী হৌনা লৈবাক কয়াগী ইকনোমীগী ফীভম অসি য়াম্না শোকচিল্লে। লৈবাক কয়ানা চহি 30-40গী খ্বাইদগী ৱাংবা ইনফ্লেসন মায়োক্নরি। অসিগুম্বা ফীভমশিং অসিদা ভারতনা মালেমদা মাগী ফিরাল চীংখৎলি। ঐখোয়না লেপ্পা লৈতনা মাংদা চংশিল্লি,  শীংনবশিং মথং-মথং কোকহল্লি। ঐখোয়না অনৌবা রেকোর্দশিং থম্মি, ঐখোয়না অনৌবা স্তেন্দর্দশিং শেম্মি। ঙসি লৈবাক অসিদা হৌখিবা চহি 9দা শেমখিবা পোলিসীশিং অমসুং লৌখিবা ৱরেপশিংগী কান্নবা অদু পুন্সিগী লম খুদিংমক্তা উবা ফংলক্লি। মীওই করোর 13.5 হেনবনা চহি 5 অসিদা লাইররম্বদগী থোরকপা ঙমখ্রে। ঐখোয়না লৈবাক অসিদগী লায়রবা মাংহনবা ঙমগনি হায়বগী থাজবা ফংখি। ঐখোয়না মাইকৈ অসিদা লেপ্পা লৈতনা চংশিল্লি। অমসুং মসিনা মরম ওইদুনা তানফম অসি ভারত মচা খুদিংমক্কী য়াম্না মরু ওই। কনাগুম্বা অমত্তনা লৈবাক অসিদা লৈরিবা তংদু লৈতাবগী ফীভমদা অকাইবা থোকহন্নবা তৌরোইদবনি। করিগুম্বা ঐখোয়গী খোঙথাংশিং অসি থৈখ্রবদি ঐখোয়গী পান্দম ফংবা ঙমলোই। ভারত মচা করোর 140না কন্না হোৎনখিবা, লৈবাকপু চাউখৎপগী লম্বেলদা পুরকখিবা অদু অরেম্বদা তাহল্লোইদবনি। ঐখোয়না তুংলমচৎতা মসি ঙাক্না চৎতুনা ঐখোয়গী ৱাশকশিং ঙাক্কদবনি।

ঐগী ইরৈবাকচাশিং,

লৈবাক্কী অহানবা গৃহ মন্ত্রী ওইনা সরদার পতেলনা লৈবাক্কী ইন্তর্নেল সেক্যুরিতীগী মতাংদা য়াম্না চেকশিনখি। মহাক অসি আইরন মেন অমা ওইখি। হৌখিবা চহি 9 অসিদা লৈবাক্কী ইন্তর্নেল সেক্যুরিতীদা লম কয়াদগী শীংনবশিং লাকখি। অদুবু ঐখোয়গী সেক্যুরিতী ফোর্সশিংনা অয়ুক নুমিদাং কন্না হোৎন্দুনা লৈবাক্কী য়েকনবশিংনা মখোয়গী থৌরাংদা মাইপাকপা ঙমহনখিদে। মী চিনবা মফমশিংদা চৎত্রিঙৈ মমাংদা ৱাখলদা চীংনবা পোকলমখিবা মতম অদু মীয়াম্না হৌজিকসু কাওদ্রি। হরাও কুহ্মৈগী মীতিনবা, কৈথেলশিং, মীয়াম তিনবা মফমশিংদা তার্গেৎ তৌদুনা লৈবাক্কী চাউখৎ-থৌরাংদা অপনবা পীনবা হোৎনদুনা লাকখি। মীয়াম্না বোম্ব পোখাইরবা মতুংদা অমাং অতা থোকপা অদু উখ্রে। মসিগী মতুংদা ইনভেস্তিগেসন চত্থরবদা সরকারনা  চংখিবা মতম অদুসু উখ্রে। লৈবাক অসিদা মতম অদু অমুক হন্না হল্লকহল্লোইসি, অঙম্বা থাক্তা মসি থীংনবা হোৎনরি।

মরুপশিং,

লৈবাক অসিনা পুনশিনবগী লম্বীদা, ঐখোয়গী চাউখৎ খোঙচৎতা লৈরিবা খ্বাইদগী চাউবা অপনবা অসি এপীজমেন্তগী পোলিসী অসিনি। ভারতকী হৌখিবা দিকেদ কয়াদা ঐখোয়না মীয়ামদা থেম্মিবা মীওইশিং অদুনা কৈদৌনুংদা তেরোরিজম উখিদে, মাগী অকিবা অমসুং মাগী তমথিবা অদু উখিদে। মীয়ামদা থম্মিবা মীওইশিংনা মীওইবা খুন্নাইগী য়েক্নবশিংগীদমক লেপ্পদা চীংনবা লৈতে। মখোয়না তেরোরিস্তকী থৌওংশিং থীজিনবা তৌখিদে অমসুং এন্তি-নেস্নেল ইলিমেন্তশিংগী মায়োক্তা অকনবা থবক লৌখৎলমখিদে। এপীজমেন্তগী ৱাখল্লোন অসি অদুক্কীমতিক খুদোংথীনিংঙাই ওই মসিনা তেরোরিস্তশিং ফাওবা ৱায়েলশঙদা কনবা লাকখি। অসিগুম্বা ৱাখল্লোন্না খুন্নাই অমত্তদা কান্নবা পীরোই। মসিনা লৈবাক্তা কান্নবা অমত্তা পীরোই। ইরৈবাকচা খুদিংমক্না মীকুপ খুদিং মসিদগী চেকশিনহনগদবনি, ঐখোয়না এক্তাগী ৱাখল্লোনদগী লৈবাক অসিবু ঙাকচগদবনি।

ঐগী নুংশিরবা ইরৈবাকচাশিং,

হৌজিক লৈবাক অসি মীখলগী ৱাখলদা লৈরি। রাজ্যশিংদা মীখলগী থবক হৌখ্রে অমসুং মথং চহিদা লোক সভাগী মীখলশিংসু পাঙথোক্কনি। নখোয়না লৈবাক অসিদা পোজিতিব ওইবা পোলিসীগী লম্বী অমত্তা য়াৎতভা অচৌবা পোলিতিকেল ফেক্সন য়াম্না উবা ফংলমগনি। লাইবকথিবদি মসিগী পোলিতিকেল ফেক্সন অসিনা খুন্নাই অমসুং লৈবাক্কী মায়োক্তা লৈবা তেক্সতিক্সশিং পাইখৎলি। মখোয়গী মশাগী কান্নবা, মখোয় মশাগী ওইজবা অসিনা লৈবাক্কী অপুনবা শক্তমদগী হেন্না মরু ওই। মরম অসিদা শীংনবা কয়া অসিগী মরক্তা ঐগী ইরৈবাকচাশিং, মীয়াম, নখোয়গী থৌদাং অসি য়াম্না মরু ওই। মীওইশিং অসিনা লৈবাক্কী অপুনবগী শক্তম কাইহন্দুনা মখোয়গী রাজনিতীগী ওইবা খুদোংচাবশিং লৌনবা হোৎনরি। লৈবাক অসিনা মখোয়দগী চেকশিনগদবনি অমসুং মদুতদা ঐখোয়গী চাউখৎপগী পান্দমশিং ফংবা ঙমগনি। চাউখৎপা ভারতকী পান্দম ফংনবগীদমক ঐখোয়না লৈবাক্কী অপুনবগী শক্তম ঙাকশেন্নবা ঐখোয়গী খোঙথাং মীকুপ  অমা ফাওবা লেপলোইদবনি। ঐখোয়না অপুনবগী মন্ত্রগা লোয়ননা হিংগদবনি। ঐখোয়না অপুনবগী শক্তম ঙাক্নবা লেপ্পা লৈতনা শরুক তমগদবনি। ঐখোয়না লম অমা হেক্তদা লৈরবসু মদুদা চাদা 100 কত্থোক্কদবনি। মসিনা তুংদা লাক্কদবা মীরোলশিংদা অফবা তুংলমচৎ অমা পীবা ঙমগনি। মসিমক সরদার সাহেবনা ঐখোয়দগী পামখি।

মরুপশিং,

ঙসি মাইগোবতা সরদার সাহেবকা মরী লৈনবা নেস্নেল কম্পিতিসন অমা হৌরি। সরদার সাহেব ক্বিজকী খুত্থাংদা লৈবাক্কী নহারোলনা মহাক্কী মরমদা হেন্না খঙনবা খুদোংচাবা ফংলগনি।

ঐগী ইমুং মনুংশিং,

ঙসিগী ভারত অসি অনৌবা ভারতনা। ভারত মচা খুদিংমক্তা থাজবনা থল্লি। ঐখোয়না থাজবা অসি মখা চত্থনবা তৌগদবনি অমসুং লৈবাক অসিনা মখা তানা খুমাং চাউশিনগদবনি। মসিগী ৱাখল্লোন অসি লেংদনা লৈহনসি। মসিগী মতিক ময়াই অসি লেংদনা লৈহনসি। মসিগা লোয়নান ঐহাক্না ইরৈবাকচা করোর 140গী মহুৎ শিন্দুনা ইকাই খুমনরবা সরদার পতেলদা ইকাই খুম্নবা উৎচরি। ঐখোয়না হরাও তয়াম্বগা লোয়ননা রাস্ত্রীয় এক্তা দিবস পাঙথোক্লসি। অপুনবগী মন্ত্রগা লোয়ননা হীংবগী হৈনবী অসি থমলসি। অপুনবগীদমক নখোয়গী পুন্সিগী মীকুপ খুদিংমকপু কত্থোকপীয়ু। ৱাফমশিং অসিগা লোয়ননা ঐহাক্না পুম্নমক্তা অমুক হন্না নুংঙাইবা ফোঙদোকচরি।

ভারত মাতা কী জয়!

ভারত মাতা কী জয়!

ভারত মাতা কী জয়!

হন্না-হন্না থাগৎচরি!

***