ভারতকী প্রধানমন্ত্রী

থৌরমসিদা শরুক য়াবিরিবা কর্নাতকাগী গভর্নর শ্রী থাৱর চান্দ গেহলোৎ জী, মুখ্য মন্ত্রী শ্রী বাসবরাজ বোম্মা জী, কেন্দ্রগী মন্ত্রী মন্দলগী ঐগী খোঙবুশিং, স্তেত লৈঙাক্কী মন্ত্রীশিং, এম.পি.শিং, এম.এল.এ.শিং অমদি কর্নাতকা অমদি লৈবাকসিগী ঐগী নহা ওইরিবা মরূপশিং!

মুরু সাবিরা মথা, সিধ্দারুধা মথা, ইন্তহা অনেক মথাগলা ক্ষেত্রককে নন্না নমস্কারগলু‍! রানী চেন্নম্মা না নাদু, সঙ্গোল্লী রায়ণ্ণা না বীদু, ঈ পুন্য ভুমি-গে নন্না নমস্কারগলু!

কর্নতকাগী মফম অসি মাগী চৎনবী, নাৎ অমদি ৱাখল-লৌশিংগীদমক মমিং চৎলি‍। মফমসিদগী মীওই কয়া জ্ঞানপিথ এৱার্দ পীদুনা ইকায়খুম্নখ্রে‍। লমদম অসিনা লৈবাকসিদা অথোইবা ম্যুজিক্সিয়ন কয়া খুদোল তমখ্রে‍। ঐনা ঙসি হুব্বলীদগী পন্দিৎ কুমার গন্ধর্ব, পন্দিৎ বাসবরাজ রাজকুরু, পন্দিৎ মল্লিকঅর্জুন মন্সুর, ভারত রত্ন পন্দিৎ ভিমসেস জোসি অমদি পন্দিতা গঙ্গুবাই হঙ্গল জীগী মফমদা ইকায়খুম্নবা উৎচরি‍।

মরূপশিং,

ইং ২০২৩গী ‘নেস্নেল য়ুথ দে’ অসি য়াম্না অখন্নবা অমনি‍। নাকল অমদা নুংঙাইরবা নেস্নেল য়ুথ ফেস্তিবেল লৈরি, অদুগা নাকল অমদনা নীংতম্বগী অমৃৎ মহোৎসব লৈরি‍। “হৌগৎলু, য়াকায়রো অমদি লেপকনু পন্থুং হৌদ্রিবা ফাওবা”‍। ইলি! ইধেলি! গুরি মুত্তুৱা তনকা নিলদিরি‍। হায়রিবা বিবেকানন্দ জীগী খোল্লাউ অসি ভারতকী নহাশিংগী থৱায় হাপ্লিবা লাইৱানি‍। ঙসি, ঐখোয়না অমৃৎ কাল অসিদা ঐখোয়গী থৌদাংদা পুক্নিং লুপ্তুনা অমদি মখোয়বু খঙনা লৈবাকসিবু মাঙদা পুখত্তুনা চৎকদবনি‍। অদুগা ভারতকী নহাশিংগী মমাঙদা অথোইবা পুক্নিং থৌগৎনিংঙাই ওইরবা স্বামী বিবেকানন্দ জী লৈরি‍। থৌরম অসিদা ঐনা স্বামী বিবেকানন্দ জীগী খুয়াখাদা খুরুমজরি‍। নুমিৎ খরনিগী মমাঙদা, কর্নাতকা লমদমদগী অথোইবা লম্বোইবা অমা ওরিবা শ্রী সিদ্ধেস্বর স্বামী জী লৈখিদ্রে‍। ঐনা শ্রী সিদ্ধেস্বর স্বামী জীগী মফমদসু ইকোক নোন্না শ্রদ্ধাঞ্জলি কৎচরি‍।

মরূপশিং,

স্বামী বিবেকান্দগা কর্নাতকাগী ফজরবা মরী অমা লৈরম্মী‍। মহাক্কী পুন্সিদা মহাক্না কর্নাতকা অমদি লমদম অসোমদা কয়ারক হন্না চৎলম্মী‍। মহাক্না বেঙ্গলুরুদা চৎপা মতমদসু হুব্লী-ধরৱারদা চৎলম্মী‍। হায়রিবা খোঙচৎশিং অসিনা মহাক্কী পুন্সিদা অনৌবা মায়কৈ অমা পীরম্মী‍। মৈসুরুগী নিংথৌরেলসু স্বামী বিবেকানন্দবু চিকাগোদা চৎপদা মতেং পাংখিবা মীওইশিংগী মরক্তা অমা ওইরম্মী‍। স্বামী জীনা ভারত থুংনা চৎখিবা খোঙচৎ অসিনা চহিচা কয়া ঐখোয়গী পুক্নিং ৱাখল অমত্তা ওইরম্মী, লৈবাক অমা ওইবগী ঐখোয়গী থৱায় অমত্তা ওইরম্মী হায়বগী খুদম্নি‍। মসি ‘এক ভারত, শ্রেস্থ ভারত’কী ৱাখল্লোনগী শিবা নাইদ্রবা খুদম অমনি‍। লৈবাকসিনা হায়রিবা ৱাখল্লোন অসিবু অমৃৎ কাল অসিদা অনৌবা ফিরেপকা লোয়ননা মাঙদা পুখৎলি‍।

মরূপশিং,

স্বামী বিবেকানন্দনা ঐখোয়না নহাশিংগী মতিক লৈরবা মতমদা তুংলমচৎ অমদি লৈবাক অমা শেমগৎপসি অরায়বা ওইরকই হায়না হেক হেক হায়বিরম্মী‍। কর্নতকাগী লমদম অসিমক্না লৈবাকসিগীদমক লৈরিবা মখোয়গী থৌদাংদা মরুওইনা মায় ওনশিন্দুনা চহি য়াম্না নৌরিঙৈদা তোপ তোপ্পা থাক য়ৌখিবা অথোইবা মীওই কয়া পুথোকখ্রে‍। কিত্তরুগী রানী চেন্নম্মা লৈবাকসিগী মাঙজিল থাবা নুপী নিংতম লান্মীশিংগী মরক্তা অমনি‍। মহাক্না খ্বায়দগী খুদোংচাদবা মতমদা ফাওবা নীংতম লালবু লমজিংলম্মী‍। রানী চেন্নম্মাগী লান্মীদসু মহাক্কী মথৌনানা ব্রিতিস লান্মীশিংগী থৌনা হলহনখিবা মহাক্কী খোবু সঙ্গোলী রায়ন্নগুম্বা মথৌনা লৈবা লান্মী কয়া য়াওরম্মী‍। লমদমসিগী নারায়ন মহাদেব দোনী শুপ্নতগী চহি ১৪ ফারকপদা লৈবাক্কীদমক মথৱায় কত্থোক্তুনা অথৌবা অমা ওইখি‍।

কর্নাতকাগী মপারী, লান্স নাইক হনুমানথপ্পা কোপ্পদনা সিয়াচেনগী চীংথক্তা নহা অমগী চঙ চঙ লাউবা ফীভম অমদি মথৌনানা অশিববু কমদৌনা মায়থিবা পীখিবগে হায়বা উৎলি‍। মহাক্না মাইনস ৫৫ দিগ্রী তেম্পরেচরদা ফাওবা নুমিৎ তরুক্নিং খাঙদুনা লৈখি, অমদি হিংনা হল্লকখি‍। হায়রিবা মতিক অসি থৌনা ফবখক্তদা লোইবা নত্তে‍। অদোম্না উবিরি, শ্রী বিস্বেস্বরয়না ইঞ্জিনিয়রিংদা মাগী মতিং ফুদোক্তুদা নহা ওইরিবা তেলেন্তশিং অসি হীরম অমখক্তদা পুনশিন্দুনা লৈতে হায়বা উৎলি‍। মতৌ অসুম্না, ঐখোয়গী নহাশিংগী হৈশিংবা অমদি মতিংগী অঙকপা খুদমশিং লৈবাকসিগী তোঙান তোঙানবা মফমশিংদা শন্দোক্তুনা লৈরি‍। ঙসিমকসু, অঙ্কদগী হৌরগা সাইন্স ফাওবদা অথোই অহেন তান্নবগী থৌরমশিং মালেমগী ফোরমদা পাঙথোক্তুনা ভারতকী নহাশিংগী মতিক্না মালেমবু ঙকহল্লি‍।

মরূপশিং,

লৈবাক খুদিংগী অহেনবা মীৎয়েঙ চঙবা হীরম অমদি পান্দমশিং তোঙান তোঙানবা মতমগী মতুং ইন্না হোংই‍। ঙসি, ২১শুবা চহিচাসিদা ভারত মচা ঐখোয়না য়ৌরক্লিবা থাক অসিদা চহিচা কয়াগী মতুংদা চপ চারবা মতম অদু য়ৌরক্লে‍। অমদি মসিগী খ্বায়দগী চাউবা মরমদি ভারতকী নহাশিংগী মতিক, য়ুবা শক্তি অসিনি‍। ঙসি ভারত নহা ওইরিবা লৈবাক অমা ওইরি‍। মালেমগী নহা মীশিংগী চাউরবা শরুক অমা ঐখোয়গী লৈবাকসিদা লৈ‍।

য়ুবা শক্তিনা ভারতকী খোঙচৎপু থৌদুনা পুরি‍! মথংগী চহি ২৫ অসি লৈবাক শেমগৎপগী মরুওইবা মতম্নি‍। য়ুবা শক্তিগী মঙলান্না ভারতকী মায়কৈ লেপ্লি‍। য়ুবা শক্তিগী অনিংবনা ভারতকী পুন্থুং লেপ্লি‍। য়ুবা শক্তিগী অপাম্বনা ভারতকী লম্বী লেপ্লি‍। য়ুবা শক্তি অসিবু লোকশিন্নবগীদমক, ঐখোয়গী পুক্নিং, ঐখোয়না হোৎনরিবশিং নহাগুম্না তৌবা তাই‍! নহা ওইহনবা হায়বসি ঐখোয়না হোৎনবদা ইচঙ থৌনা হোৎনবদুনি‍। নহা ওইহনবা হায়বসি ঐখোয়গী মীৎয়েঙ মায়কৈ শিনবা থুংহনবদুনি‍। নহা ওইহনবা হায়বসি মরম চানা থবক তৌবদুনি!

মরূপশিং,

করিগুম্বা মালেম অসিনা ঐখোয়দা পাম্বৈগীদমক মীৎয়েঙ থম্লক্লবদি, মসিগী মরমসি ঐখোয়গী অমৃৎ মীরোলগী কত্থোকপসিননি‍। ঙসি, মালেম অসিনা ভারতকী মায়কৈদা থাজবা কয়াগা লোয়ননা মীৎয়েঙ থম্লক্লিবা, পুম্নমকসি অদোম ময়ামগী হোৎনজমলননি, ঐগী নহা ওইরিবা মরূপশিং‍। ঙসি ঐখোয় মালেমগী মঙাশুবা খ্বায়দগী চাউবা শেন্মিৎলোন ওইরি‍। ঐখোয়গী পান্দমদি অহুমশুবা থাক ফাওবা পুখৎপনি‍। লৈবাকসিগী শেন্মিৎলোন চাওখৎলকপা অসিনা ঐখোয়গী নহাশিংগী য়াম্লবা খুদোংচাবশিং পুরক্কদৌরিবনি‍। ঙসি লৌউ-শিংউগী লমদা ঐখোয় মালেমগী মাঙজিল থাবা শাফু অমা ওইরি‍। তেক্নোলোজী অমদি ইনোভেসনগী খুত্থাঙদা লৌউ-শিংউগী লমদা অনৌবা রিভোলুসন অমা লাক্কদৌরে‍। মসিগী মহৈনা, নহাশিংগী অনৌবা খুদোংচাবা কয়া থোরক্লগনি অমদি অনৌবা পন্দোল য়ৌবা ঙম্নবগীদমক অনৌবা লম কয়াদা চাওখৎলক্লগনি‍। শান্ন-খোৎনবগী লমদসু, ভারতনা মালেমগী অচৌবা পৱার অমা ওইবগী লম্বীদা চঙশিল্লক্লি‍। মসি ভারতকী নহাশিংগী মতিক মথৌনাতনা ওইথোকপা ঙমহল্লিবনি‍। খুঙ্গঙ, সিতী নৎত্রগা তাউনদা ওইরবসু নহাশিং মফম খুদিংদা মচিন তুমখৎলক্লি‍। ঙসি হায়রিবা অহোংবশিং অসি অদোম্না উরি‍। হয়েংনা মসিগী মপাঙ্গলগা লোয়ননা অদোম্না তুংগী লুচিংবশিং ওইরক্কদৌরিবনি‍।

মরূপশিং,

হৌজিক অসি পুৱারীগী অখন্নবা তাঙ্কক অমনি‍। অদোম্না অখন্নবা মীরোলনি‍। অদোমগী অখন্নবা মিসন লৈ‍। মিসন অসি ভারতকীদমক মালেমগী মফমদা শাফু অমা থম্লমবদুনি‍। মিসন খুদিংমক্কী য়ুম্ফম অমমম মথৌ তাই‍। শেন্মিৎলোন নৎত্রগা মহৈ মশিং, শান্ন-খোৎনবা নৎত্রগা স্তার্ত—অপ, স্কিল দিভেলপমেন্ত নৎত্রগা দিজিতেলাইজেসন্দা ওইরবসু, হীরম খুদিংদা হৌখিবা চহি ৮-৯সিদা মপাঙ্গল কল্লবা য়ুম্ফম থোন্দুনা লাক্লি‍। রনৱে অসি অদোম্না পাইখৎনবগীদমক শেম শাদুনা লৈরে! ঙসি, মালেমসিনা ভারত অমদি মাগী নহাশিংগী মফমদা চাউনা থাজবা থম্লি‍। লৈরিবা থাজবা অসি অদোমগী মতাঙদনি‍। থাজবা অসি অদোম্না মরম ওইরগা লৈরিবনি‍। অদুগা থাজবা অসি অদোমগীদমক্তন‍ি!

ঙসি, চৎলিবা চহিচা অসি ভারতকী চহিচানি হায়বা মালেমগী খোঞ্জেলশিং লৈরি‍। মসি অদোমগী চহিচানি, ভারতকী নহাশিংগী চহিচানি! অচৌবা ইনভেস্তর অয়াম্বনা ভারত্তা শেল থাদবা পাম্মী হায়বা মালেমগী ওইবা সর্ভেশিং লৈরি‍। হায়রিবা ইনভেস্তরশিং অসিনা অদোমগী মফমদা শেল থাদবা পাম্লি‍। ভারতকী স্তার্ত-অপশিং রেকোর্দ ওইবা মওংদা ইনভেস্তমেন্ত ফংলি‍। মালেমগী কম্পেনী কয়ানা মেক ইন ইন্দিয়াগীদমক মেনুফেকচরিং প্লান্তশিং লিংখৎলি‍। শান্নপোত্তগী তুরিজম ফাওবা, দিফেন্সতগী দিজিতেল ফাওবদা ভারতনা মালেম পুম্বদা হেদলাইন শেম্লি‍। অদুনা, থাজবা অমদি খুদোংচাবা পুনশিল্লক্লিবা পুৱারী ওইরবা মতমনি হৌজিক অসি‍।

ঐখোয়গী লৈবাকসিদা, নারি শক্তি (নুপীগী মতিক)না লৈবাকসিগী মতিং হৌদোকপদা অমদি হেনগৎহনবদা মরুওইবা থৌদাং লৌরি‍। হৌজিক নুপী অমদি ঐখোয়ী ইচানুপীশিংনা নীংতম্বগী অমৃৎ কালসিদা থৌনা ফবগী মতৌ উৎলি‍। ঙসিদি ভারতকী নুপীশিংনা ফাইতর জেৎশিং পাইরি অমদি লান্থেংনবগী থৌদাং লৈবা লান্মীদা য়াওশিল্লক্লি‍। ঐখোয়গী ইচানুপীশিংনা সাইন্স, তেক্নোলোজী, স্পেস, নৎত্রগা শান্ন-খোৎনবদা ওইরবসু হীরম অনৌবা পন্দোল লোম্লি‍। মস ভারতনা মাগী পন্থুং তম্না মপাঙ্গল ফুদোক্তুনা চঙশৎল্লি হায়বগী খুদম্নি‍।

মরূপশিং,

ঐখোয় ২১শুবা চহিচা অসি ভারতকী চহিচা ওইহনবা তাই‍। অদুগা মরম অসিনা হৌজিক ওইরিবা মতমসিদগী খোঙকাপ তরা মাঙদা চৎখত্তুনা খনবা মথৌ তাই‍। ঐখোয়গী ৱাখল অমদি থৌওং তুংলমচৎকা চুনবা ওইহনবা তাই! নহাশিংগী অনিংবা থুংহন্নবা অমদি মালেমগী মোদর্ন লৈবাকশিংদগীসু মাঙজিল থানা চৎনবগীদমক অদোম্না অফবা ফজবা মওংদা থবক পায়খৎপা মথৌ তাই‍। করিগুম্বা ঐখোয়না নীংশিংলবদি, চহি ১০-২০গী মমাঙদা লৈরমদবা, অদুবু ঙসি ঐখোয়গী পুন্সিগী থাদোক্নবা য়াদ্রবা শরুক অমা ওইরবা, পোৎলম কয়া লৈরি‍। মতৌ অসুম্না ঐখোয়গী মালেম অসিসু মথংগী চহি খরসিদা, নৎত্রগা চৎলিবা দিকেদ অসিগী লোইরকপদা মপুং ফানা হোংলক্কদৌরিবনি‍। আর্তিফৎসিএল ইন্তলিজেন্স, মেচিন লর্নিং, ইন্তরনেৎ ওফ থিংস অমদি এ.আর.-ভি.আর.নচিংবা নৌনা মচিন তুমখৎলক্লিবা তেক্নোলোজীশিংনা অনৌবা মওং অমা ওল্লকপা য়াই‍। দেতা সাইন্স অমদি সাইবর সিক্যুরিতীনচিংবা ৱাহৈশিং অসি ঐখোয়গী পুন্সিগী হীরম খুদিংদা লুনা চঙশিনখিবা য়াই‍।

মহৈ মশিংদগী হৌরগা লৈবাকসিগী সিক্যুরিতী ফাওবা অমদি হেল্থকেয়রদগী হৌরগা কম্ম্যুনিকেসন ফাওবদা, খুমাঙ চাওশিল্লবা তেক্নোলোজীগী খুত্থাঙদা পুম্নমক অনৌবা লাংওন অমদা উগদৌরিবনি‍। ঙসি লৈত্রিবা থবকশিংনা ইকুই কুইদবা তুংলমচৎ অমদা নহাশিংগী মপুং ওইবা শিনফম ওইরক্কন‍ি‍। মরম অদুনা, ঐখোয়গী নহাশিংনা তুংগী স্কিলশিং অসিগীদমক মখোয় মশাবু শেম শাহৌবা মথৌ তাই‍। মালেমসিদা অনৌবা থোক্লিবা খুদিংমক্কা ঐখোয়গা মরী শম্নহনবা তাই‍। ঐখোয় কনাগুম্বা অমত্তনা তৌনদ্রিবা থবক তৌবা তাই‍। হায়রিবা ৱাখল্লোন অসিগা লোয়ননা অনৌবা মীরোলবু শেম শানবগীদমক অনৌবা নেস্নেল এজুকেসন পোলিসীগী খুত্থাঙদা শীজিন্নবা য়াবা অমদি তুংলমচৎকী ওইবা মহৈ মশিংগী সিস্তেম অমা লৈবাকসিনা শেম শারি‍। ঙসি, স্কুলদগী হৌরগা ইনোভেতিব ওইবা অমদি স্কিল ওরিএন্তেদ এজুকেসন্দা অহেনবা মীৎয়েঙ থম্লি‍। ঙসি নহাশিংনা মখোয়গী অপাম্বগী মতুং ইন্না মাঙদা চঙশিন্নবগী মনিং তম্বা ফংলে‍। য়ুম্ফম অসিনা তুংগী ভারত শেমগৎকদৌরিবা তুংলমচৎকীদমক শেম শাদুনা লৈরবা নহাশিং পুথোক্কদৌরিবনি‍।

মরূপশিং

ঙসিগী খোঙজেল য়াঙনা হোংলক্লিবা মালেম অসিদা স্বামী বিবেকানন্দগী পাউজেল অনিনা নহা খুদিংগী পুন্সিগী শরুক অমা ওইফম থোকই‍। হায়রিবা পাউজেল অনিদুদি – ইনস্তিত্যুসন অমদি ইনোভেসন হায়বসিনি! ঐখোয়না ঐখোয়গী ৱাখল্লোন পাকথোক চাউথোকহল্লগা পুন্না হোৎনমিন্নবগী ৱাখল্লোন্দা থবক তৌরকপা মতমদা ইনস্তিত্যুসন শেম্মী‍। ঙসি নহা খুদিংনা মরনাইগী মায় পাকপবু পাকথোক চাউথোকহন্দুনা অপুনবগী মায় পাকপা ওইহনগদবনি‍। হায়রিবা তীম স্পিরিৎ অসিনা চাওখৎপা ভারতপু ‘তীম ইন্দিয়া’ ওইনা মাঙদা পুদুনা চৎকদৌরিবনি‍।

ঐগী নহা ওইরিবা মরূপশিং,

অদোম্না স্বামী বিবেকানন্দগী ৱাফম অমসু নীংশিংগদবনি‍। স্বামী বিবেকানন্দনা থবক খুদিংমক নোক্নবা, য়ৈখায় থিনগাইবা অমদি য়ানরকপা হায়রিবা তাঙ্কক অহুম অসি ফাওদুনা চৎকদবনি হায়না হেক হেক হায়বিরম্মী‍। করিগুম্বা ইনোভেসনবু ৱাহৈ পরেং অমদা তাকউ হায়রগদি মসিনা চপ চারবা ৱাফম ওইগনি‍। খুদম ওইনা চহি খরগী মমাঙদা লৈবাকসিদা দিজিতেল পেমেন্ত হৌদোরকপা মতমদা কনাগুম্বা মীওই খরনা নোক্নরম্মী‍। স্বচ্ছ ভারত কেম্পেন হৌদোকখিবা মতমদসু হায়রিবা মীওইশৎং অসিনা মসি ভারত্তা থবক ওইনা পায়খৎপা য়ারোই হায়রম্মী‍। লৈবাকসিনা লায়রবশিংগী জন ধন একাউন্ত বেঙ্কশিংদা হাংহন্নবগীদমক থৌরাং লৌখৎলকপদা মখোয়না নোক্নরম্মী‍। কোবিদ মতমদা লমদমসিগী ওইবা ভেক্সিন পুথোরকপদা মদুবু কান্নগদ্রা কান্নরোইদ্রা হায়না ঐখোয়গী সাইন্তিস্তশিংবু নোক্নবিরম্মী‍।

ঙসিদি ভারত দিজিতেল পেমেন্তকী লমদা মালেমগী লুচিংবা ওইরি‍। ঙসি জন ধন একাউন্তশিংনা ঐখোয়গী শেন্মিৎলোনগী অচৌবা শাফু অমা ওইরি‍। ভেক্সিনগী লমদা ভারতনা ফংবা ঙম্লিবা মায় পাকপশিং মালেম পুম্বনা নৈনরি‍। মরম অদুনা, করিগুম্বা ভারতকী নহাশিংনা অনৌবা ৱাখল অমা লৈরবদি, নখোয়না নীংশিংগদবসি অদোমবু মদুগীদমক নোক্নবিবা অমদি য়ৈখায় থিনগাইবিবা য়াওরকপা য়াই‍। অদুবু করিগুম্বা অদোম্না অদোমগী ৱাখলদুনা থাজরবদি মদুদা চপ য়ুংনা লেপ্তুনা লৈয়ু অমদি মদুদা থাজবা থম্মু‍। নহাক্কী মায় পাকপনা মদুবু নোক্নখিবশিংদুগী ৱাখলদগী য়াম্না হেন্না চাউগদৌরিবনি‍।

মরূপশিং,

ঙসি লৈবাকসিদা নহাশিংবু পুদুনা অনৌবা থৌরাং অমদি চাংয়েংশিং লেপ্পা লৈতনা পায়খৎলি‍। মসিগী শরুক অমা ওইনা, লৈবাকসিগী তোঙান তোঙানবা স্তেতশিংগী নহাশিংনা নেস্নেল য়ুথ ফেস্তিবেলদা তোঙান তোঙানবা অথোই অহেন তান্নবগী থৌরমশিংদা শরুক য়াননবা মফমসিদা তিল্লরি‍। মসি কম্পিতিতিব অমদি কোওপরেতিব ফেদরেলিজমগুম্বনি‍। তোঙান তোঙানবা স্তেতশিংদগী নহাশিংনা অফবা মওংদা হিদান্নবগী ৱাখল্লোন্দা মখোয়গী হৈ-শিংবশিং উৎলি‍। মফমসিদা কনানা থোইবগে হায়বদু মরুওইদে, মরমদি হীরম অমা হেক্তদা, ভারতনা মায় পাকপা ওইরক্কদৌরিবনি‍। মদুগীদমক ঐখোয়গী নহাশিংগী হৈ-শিংবশিং য়ুথ ফেস্তিবেল অসিদা উত্থোক্নগৌদরিবনি‍।

অমগা অমগ অথোই অহেন তান্নবগী মথক্তা অদোম্না অমগা অমগসু তেংবাংনগনি‍। মরম অসিননি অথোই অহেন তান্নবা হায়বসি শরুক য়ারিবশিংনা কাঙলোন অমা ইনবদা অমগা অমগা তেংবাংনরবা মতমদতা ওইথোকই হায়রিবা‍। ঐখোয়না হায়রিবা হিদান্নবা অমদি তেংবাংনবগী ৱাখল্লোন অসি লেপ্পা লৈতনা মাঙদা পুদুনা চঙশিনবা তাই‍। ঐখোয়না ঐখোয় ইশাগী মায় পাকপগা লোয়ননা লৈবাকসিনা কদায় ফাওবা য়ৌশিনবা ঙমগদগে হায়বসি মতম পুম্বদা খনবা তাই‍। ঙসি লৈবাকসিগী পান্দমদি – বিক্সিৎ ভারত, সসক্ত ভারত (চাওখৎপা ভারত, মপাঙ্গল কনবা ভারত) হায়বসিনি! চাওখৎপা ভারত অমগী মঙলান মঙফাওনহন্দনা ঐখোয় মীৎকুপ অমা ফাওবা লেপথোক্তুনা লৈথোক্লোইদবনি‍। নহা খুদিংমক্না মঙলান অসিবু মখোয় মশাগী মঙলান ওইহন্দুনা লৈবাক্কী থৌদাং অসি পুদুনা চৎকনি হায়না ঐনা থাজৈ‍। থাজবা অসিগা লোয়ননা, পুম্নমকপু হন্না হন্না থাগৎচরি অমদি য়াইফরোল পীজরি!

দিস্ক্লেমর: মসি প্রধান মন্ত্রীগী ৱারোলগী চাউরাকপা ৱাহন্থোক্নি‍। অশেংবাৱারোলদি হিন্দীদা পীখিবনি‍।

***