ভারতকী প্রধানমন্ত্রী

মরূপশিং,

কন্যাকুমারীদা লাকচবা অসিদা ঐহাক অপেনবা ফাওই। ঐহাক্না অম্মা জয়াললিতাগী মফমদা ইকায় খুম্নবা উৎচরি। মহাক্না তামিলনাদুগী মীয়ামগীদমক তৌবীরম্বা অফবা থবকশিং অদু চারোল শুরোল কয়ানা নীংশিংদুনা লৈহৌরগনি। মহাক্না য়েংবীরম্বা চাউখৎ থৌরাংগী মিৎয়েং অদু মপুং ফাহন্নবা তামিল নাদু সরকারনা হোৎনরিবা অসিদা ঐহাক নুংঙাইবা ফাওই।

ঐহাক্না চাউথোকচরি মদুদি ভারতকী অহানবা নুপী ঙাকশেল মন্ত্রী নির্মলা অসি তামিল নাদুদগী ওইরি। ভারত মচা পুম্নমক্না চাউথোকচবা ফাওরিবা থৌনা ফরবা ৱিং কমান্দর অভিনন্দন অসিসু তামিল নাদুদগীনি। নুমিৎ খরনিগী মমাংদা গান্ধী পীস প্রাইজ লান্থোকখিবা বিবেকানন্দা কেন্দ্রবুসু ঐহাক্না নুংঙাইবা ফোংদোকচরি।

মরূপশিং,

ঙাইহাক্কী মমাংদা ঐখোয়না লম্বী–থোং, রেলৱে অমসুং হাইৱেগা মরী লৈনবা চাউখৎ থৌরাংগী থবক কয়াগীদমক শঙ্গাবা অমসুং উরেপ–উয়ুং তম্বগী থৌরম পাংথোকখ্রে। ঐহাক্না মদুরাই অমসুং চেন্নাইগী মরক্তা তেজস এক্সপ্রেস লমথাখ্রে। মসি চেন্নাইগী ইন্তিগ্রেল কোচ ফেক্তরীমক্তদা শাবা খ্বাইদগী অনৌবা থাক্কী ওইবা ত্রেন অমনি অমদি মেক ইন ইন্দিয়াগী অচৌবা খুদম অমনি।

ঙসি রামেশ্বরম অমসুং ধনুশকোরীগী মরক্তা রেলৱে লাইন অমগী উরেপ উয়ুংসু তমখি। মসিগী লাইন অসি ১৯৬৪গী সাইক্লোনগী মতুংদা অমাং অতা থোকহনখি অদুবু চহী ৫০ হেনবা অসিদা লাইন অসিদা পুক্নীং চংখিদে। অদুবু শুংশেম শেমজিন্দনা লৈববুদি থেংলসু থেংনা শেমজিল্লিবা অসিনা হেন্না ফরে। অনৌবা পামবৈনা থোং শারগদবা অসিদা ময়াম্না নুংঙাইবা ফাওবীরমগনি।

মরূপশিং,

ঙসিদি ভারত অসি মালেমদা খোংজেল য়াংনা চাউখৎলক্লিবা অচৌবা ইকোনোমী অমা ওইরি। ভারতনা রেকোর্দ ওইবা খোংথাংদা নেক্স জেনরেসন ইনফ্রাস্ত্রকচর শেমগৎ শাগৎলি। ঐখোয় খ্বাইদগী চাউবা স্তার্ত–অপ ইকো– সিস্তেম লৈবা লৈবাকশিংগী মনুংদা অমা ওইরে। ভারত অসি মালেমদা খ্বাইদগী চাউবা হেল্থকেয়র প্রোগ্রাম ওইরিবা আয়ুশ্মান ভারতকী য়ুমশু ওইরি।

মরূপশিং,

২১শুবা চহীচাগী ভারতনা স্পীদ অমসুং স্কেলগা লোয়ননা থবক তৌগদবনি, মদুমক্নি এন.দি.এ. সরকারনা তৌরিবা অসিসু। হৌখিবা নোংমাইজিং নুমিৎতা, চহী অসিগী বজেত্তা লাওথোকখিবা প্রধান মন্ত্রী কিসান সম্মান নিধী হৌদোকখ্রে।

স্কিম অসিগী মখাদা একর মঙা ফাওবা লৌ উনবা লম লৈবা লৌমীশিংদা কেন্দ্র সরকারনা ইন্সতোল্তমেন্ত অহুমলক্তা চহীগী ওইনা লুপা লিশিং তরুক্কী ওইবা শেলগী তেংবাং অমা পীরগনি। লৌমী কোতি ১.১ হেনবনা মখোয়–মখোয়গী বেঙ্ক একাউন্তশিংদা মখোয়গী অহানবা ইন্সতোলমেন্ত হান্ননা ফংখ্রে। ফেব্রুৱরীগী তাং ১দা লাওথোকখিবা স্কিম অমা থা অদুমক্তদা থবক ওইনা পাংথোকপা অসি নখোয়না লাম্বা ফংব্রা। ঐখোয়না পুং ২৪ লেপ্তনা থবক শুদুনা স্কিম অসি নুমিৎ ২৪দা হৌদোকখি।

মরূপশিং,

লীপ ইয়র অমসুং ফুৎবোল ৱার্ল্দ কপ্না চহী মরিগী মনুংদা অমুক্তং লাকপগুম, কংগ্রেসকী মপুং ফাদবা লোন কোকপীবসু মীখলগী মমাং মক্তদা য়ৌরকই। লৌমীশিংগীদমক্তা করিগুম্বা অমত্তা পায়খৎপা তৌদনা লোয়শিল্লকপদা মখোয় থোরক্লগনি অদুগা হায়গনি – ঐখোয়গী নখোয়গী লোনশিং কোকপীরগনি।

তশেংবদি, কংগ্রেসকী লোন কোকপীবনা লৌমী খরা খক্তদা কানবা ফংহল্লি। এন.দি.এ. সরকারগী কিসান সম্মান নিধী অসি চহী খরগী মনুংদা অমুক্তং লাকপা স্কিম নত্তে। মসিগী কান্নবা অসি চহী খুদিংগী পীগনি অমদি চহী তরাগী মনুংদা কন্না শু–নোম্লিবা লৌমীশিংনা চাউরাক্না লুপা কোতি লাখ ৭.৫ ফংলগনি।

মরূপশিং,

২০১৪দা, চহী কুনথ্রাগী মতুংদা পার্তী অমনা পর্লিয়ামেন্তা মপুংফাবা মেজোরিতী ফংবা ঙমখি। মীয়ামগী পাওজেল অদু ময়েক শেংখি – মখোয়না থৌনা ফবা অমসুং অকনবা ৱারেপশিং লৌবা ঙম্বা সরকার অমা পাম্লি।

মীয়াম্না পাম্লিবসি পুকচেল শেংবনি, নিংথৌগী শাগৈ অদু নত্তে।

মীয়াম্না পাম্লিবসি চাউখৎপনি, চাউথবা নত্তে।

মীয়ম্না পাম্লিবসি প্রোগ্রেসনি, পেরলাইজ নত্তে।

মীয়ম্না পাম্লিবসি খুদোংচাবা অদুনি, অপনবা অথিংবা নত্তে।

মীয়ম্না পাম্লিবসি সেক্যুরিতীনি, তাশিন্দুনা লৈবদু নত্তে।

মীয়ম্না পাম্লিবসি চাউখৎপা অদুনি, ভোৎ ফংনবা রাজনিতী তৌবদু নত্তে।

সবকা সাথ সবকা বিকাসনা লমজিংলদুনা অমদি ভারত মচা কোতি ১৩০না থৱাই য়াওনা শরুক য়াদুনা, এন.দি.এ. সরকারনা লৈবাক্কী য়াইফনবা খ্বাইদগী পুৱারী ওইরবা ৱারেপ খরা লৌখ্রে। ঐহাক্না লোকেল অমসুং নেস্নেলগী খুদম খরা পীজগে। তামিল অসি সমুদ্র মপান্দা লৈবা রাজ্য অমনি। মফম অসিদা ফিসরীগী সেক্তর অসি য়াম্না পাক চাউখ্রে।  

এন.দি.এ. সরকারনা ফিসরীজকী অনৌবা দিপার্তমেন্ত অমা শেমগৎলে। ঐখোয়গী ঙামী ইচিল ইনাওশিংগীদমক কিসান ক্রিদিৎ কার্দকী কান্নবশিংসু হৌদোকখ্রে। কেন্দ্রনা তামিল নাদুদা দীপ সি ফিশিং ভেসেলশিং শেমগৎ শাগৎনবগীদমক লুপা কোতি চাহুম হেনবগী শেনফম থাদোকখ্রে।

সমুদ্রদা ঙা ফারিবা ঙামীশিংনা স্পেসতগী মতেং ফংলি। ঐখোয়না ইন্দিয়ন স্পেস রিসর্স ওর্গনাইজেসনগী তেংবাংনা দিবেলপ তৌবা নেভিক্কী দিভাইসশিং ফংহল্লে। দিভাইস অসিনা লমদম অসিগী লোন্দা ই-পাও ফংহল্লে। মসিগী নেভিগেসন দিভাইস অসিনা ফিসিং জোনগী মতাংদা খঙহনবতা নত্তনা নোং-চিংগী ফিভমগা মরী লৈনবা ৱার্নিংশিংসু ঙামীশিংদা পীরি।

মরূপশিং,

ভারত সরকারনা ঙামীশিংগী সেফতী মসুং য়াইফনবা থবক তৌরি। দিপ্লোমেতিক্কী ওইবা কন্না হোৎনরিবশিং অদুনা মরম ওইদুনা ২০১৪গী মে থাদগী শ্রী লঙ্কাগী ওথোরিতীনা ঙামী লিশিং অমগা চামপল হেন্না থাদোরকখ্রে।

মরূপশিং,

ঐহাক্না ঙাকশেল অমসুং সেক্যুরিতীগী মতাংদসু থমজগে। ঐখোয়গী এক্স-সর্বিসমেনশিংগী য়াইফনবা ঐখোয়না ৱান রেঙ্ক ৱান পেন্সনগী পুৱারী ওইরবা ৱারেপ অদু লৌখ্রে। মসিমক তৌফম থোকপনি। চহী কয়া লৈঙাক্লম্বা মখোয়না ৱান রেঙ্ক ৱান পেন্সনবু মমুৎ তানা খঙনবা হোৎনখিদে।

মরূপশিং,

চহী কয়াদগী ভরতনা, তেরোরিজম্না কিহনলকপশিং মায়োক্নদুনা লাক্লি। অদুবু হৌজিক্তি চাউনা অহোংবা অমা লৈরে – তেররগী মতাংদা হৌজিক্তি ভারতনা উপায় লৈতগুম লৈবদু তৌররোই। ২০০৪দগী ২০১৪ ফাওবদা তেরর এতেক্ত কয়া অমা থোকখ্রে।

হাইদ্রবাদ, অহমেদবাদ, জয়পুর, বেঙ্গলুরু, দিল্লী, মুম্বাই, পুনে অমদি অতোপ্পা মফমশিংদা বোম্ব পোখায়খি। অসিগুম্লবা তেররগী থৌওংশিং অসিদা দায় লৌরিবা মখোয়শিং অদু চৈরাক পীগনি হায়না জাতি অসিনা থাজবা থমখি অদুবু করিসু তৌখিদে। ২৬/১১গী থৌদোক থোকখি, তেরোরিস্তকী মায়োক্তা এক্সন লৌখৎলক্কনি হায়না ভারতনা থাজবা থমখি অদুবু করিসু তৌখিদে।

অদুবু উরিগী থৌদোক থোকপা মতম অদুদা ঐখোয়গী থৌনা ফরবা লান্মীশিংনা করি তৌখিবগে হায়বদু ময়াম্না উবিখ্রে। পুলৱামাগী থৌদোক থোকপা মতমদা ঐখোয়গী নোংথক্কী লান্মীশিংনা করি তৌখিবগে হায়বদু ময়াম্না উবিখ্রে।

জাতি অসিগীদমক মথৌ পাংথোক্লিবা মখোয়শিং অদুবু ঐহাক্না ইকায় খুম্নজরি। মখোয়না ঙাকশেল্লিবা অদুনা ঐখোয়গী জাতি অসি অকি-অখং য়াওদনা লৈহনবা ঙম্লি। ২৬/১১গী থৌদোক অদুগী মতুংদা এয়র ফোর্সনা সর্জিকেল স্ত্রাইক চত্থবা পামখি অদুবু য়ু.পি.এ.না অথিংবা থমখি হায়না ন্যুজ রিপোর্তশিংদা পাওদমখিবা মতম অমা লৈখি। অদুগা ঙসিদি, আর্ম ফোর্সশিংনা মখোয়না তৌনীংবা তৌবদা মপুং ফানা মনীং তম্বা ফংবগী পাও তাবা ফংলি। তেরোরিস্ত অমসুং তেরোরিজমগী ইথিন অদু ককথৎতুনা মাংহন তাকহল্লি অমদি হেন্না মাংহন তাকহনখিগনি। মসি অনৌবা ভারত অমনি। মসি তেরোরিস্তশিংনা মাংহন তাকহল্লকপশিং শেন্দোয়গা লোয়ননা হনগদবা ভারত অমনি।

মরূপশিং,

ঐখোয় শেঞ্জা-থুমজা অমসুং ব্লেক মনীগী মতাংদা ৱারী তৌরশি। লুপা অমমম খুদিংগী পৈশা তরামঙা খক্তমক লাইরবশিংগী মফমদা য়ৌই হায়খিবা প্রধান মন্ত্রী ভারতনা মমাংদা উখ্রে। মীওই খরনা শেঞ্জা-থুমজাবু পুন্সীগী লম্বী অমগুম হায়রি। মসি মখোয়গী মফমদা চৎনবা য়াই অদুবু ঐঙোন্দদি চৎনবা য়ারোই।

এন.দি.এ. সরকারনা শেঞ্জা-থুমজাগী মায়োক্তা পুৱারী ওইরবা খোংথাংশিং লৌখ্রে। শাশিন্নবা কম্পেনীশিং থিংজিনখ্রে, শাশিন্নবা বেনেফিসরীশিং লৌথোকখ্রে। শেঞ্জা-থুমজা তৌরুবশিংসু মখোয়না তৌরুরিবা পাপ চেনবা থবক অদুগীদমক পাওখুম পীবা তারি।

মরূপশিং,

ঐখোয়না শেঞ্জা-থুমজা তৌবশিংদা অকনবা থোংথাং লৌখৎলকপা মতম অদুমক্তদা পুকচেল শেংলবা তেক্স থিরিবশিংবু মনা পীরি। লুপা লাখ মঙা ফাওবা তাল্লিবা মখোয়শিং অদুনা ইনকম তেক্স থিররোই হায়না ঙসিদগী চপ চানা থা অমগী মমাংদা পুথোকখিবা বজেৎতা লাওথোকখ্রে। ভারতপু চহী অদুক য়াম্না লৈঙাক্লম্বা মখোয়শিং অদুনা মিদল ক্লাসকীদমক খনখিবা লৈব্রা নত্ত্রগা মখোয়দা তেক্সতা কোমথোকপা থমখিব্রা?

মরূপশিং,

চহী কয়াদগী কংগ্রেসনা অচৌবা দাইনেস্তীশিংগী মরূপশিং অমসুং ইমুং-মনুংগী মীওইশিং খক্তদমক কান্নহনগদবা ইকোনোমিক কলচর প্রমোৎ তৌরম্মি। কংগ্রেসকী ইকোনোমিক কলচরগী মায়োক্তা ৱা ঙাংবা ঙমখিবা মীওই অদুদি তামিল নাদুগী মপারী সি. রাজাগোপালচারীনি।

ঙসিদি ঐখোয়না নৌনা রিফোর্ম তৌরবা অমসুং পিপল-ফ্রেন্দলী ওইবা ইকোনোমী শেমগৎতুনা রাজাজীগী মংলান অদু মংফাওহল্লে। ইজ ওফ দুয়িং বিজিনেসতা ভারতকী থাক মফম ৬৫ হায়গৎলে। চহী মরিগী মমাংদা ঐখোয়না ১৪২ শুবা মফমদা লৈরম্বা অদু হৌজিক্তি ৭৭ শুবা মফমদা লৈরে।

হৌখিবা চহীদা কেন্দ্র সরকারনা এম.এস.এম.ই. সেক্তরগীদমক কান্নবা কয়া অমা লাওথোকখ্রে। হৌজিক্তি মিনিৎ ৫৯গী মনুংদা লুপা কোতি অমা ফাওবগী লোন অমা ফংহনবা ঙমহল্লে। মসি অদোম্না চেন্নাই ফাওবা চৎপদা চংগদবা মতম অদুদগী হেন্না খোংজেল য়াংলে।

মরূপশিং,

ঐখোয়না ভারতকী নহাশিং অমসুং মখোয়গী হৈ-শিংবদা থাজবা থম্লি। মুদ্রাগী মখাদা মীওই কোতি ১৫না লুপা কোতি লোখ ৭ হেনবগী লোন ফংবা ঙমখ্রে। স্কিম অসিগী মখাদা মকোক থোংবা রাজ্যশিংগী মনুংদা তামিল নাদু অসি অমা ওইরি।

মরূপশিং,

সোসিয়েল জস্তিস্তা ওপোজিসনগী ৱারেপ লৈজদে। দা. বাবাসাহেব অম্বেদকরবু কংগ্রেসনা অমুক্তা নত্তনা অনিরক মায়থিবা পীখি। কংগ্রেসনা চহী নিফু অসিদা দা. অম্বেদকরগী মফমদা ভারত রত্ন পীখিদে অমদি পর্লিয়ামেন্তকী সেন্ত্রেল হোলদা দা. অম্বেদকরগী অয়েকপা লাই থেৎখিদে। মসিগী থবক অনি অসি বি.জে.পি.না শৌগৎপা নন-কংগ্রেস গবর্নমেন্ত অমনা পাংথোকখি।

মরূপশিং,

২০১৯গী লোক সভা মীখলদা ময়েক শেংলবা নাকল অনি লৈরি। ঐখোয়গী মায়কৈদনা পাঙ্গল-শক্তি লৈবা অমসুং তংদু-লৈতাবা পীরি। অতোপ্পা নাকলদনা তুশোন-মাইশোন্নবা অমদি শোকপা – পনবা য়াবা পীরি। ঐখোয়গী লিদরশিপ অমসুং ৱার্ক কলচর অসি ভারত পুম্বনা খঙলি। অতোপ্পা মায়কৈ অদুদনা চয়েৎনবা অমা ওইরি। মখোয়গী ওইনা তুংদা জাতি অসি কনানা লুচিংগনি হায়বা ঙমদ্রি। ভারতপু চাউখৎহন্নবা পান্দম নত্ত্রগা মিৎয়েং লৈতে। ২০০৯দা মীখল মতুংদা দি.এম.কে. অমসুং কংগ্রেসনা মতৌ করম্না পোর্তফোলিয়োশিং য়েন্থোকনখিবগে হায়বা অদু ভারতনা নীংশিংলি।

ঐহাক্কী অমত্তা ঙাইরবা ইমুং-মনুংদি ভারত মচা কোতি ১৩০ অসিনি।

ঐহাক্না মখোয়গীদমক হিংগনি, ঐহাক্না মখোয়গীদমক শিগনি।

মখাতাবা দাইনেস্তী অমগীদমক ঐহাক পব্লিক লাইফতা চংজদে।

ভারতকী চাউখৎনবগীদমক ঐহাক্না তৌবা ঙম্বা অদুমক তৌনবা ঐহাক মফম অসিদা লৈরি।

লাইরবদগী লাইরবশিংগী মংলানশিং অদু মংফাওহনবা ঙম্বা ভারত অমা শেমগৎনবা ঐহাক্না ময়ামগী তেংবাং অমসুং থৌজাল অদু নীজরি।

রেল্লী অসিবু মীশিং য়াম্না শরুক য়াবীবগীদমক থাগৎচরি।

ভারত ইমানা য়াইফরে।    

*****