ভারতকী প্রধানমন্ত্রী

মফম অসিদা লেংবিরক্লিবা ইচিল-ইনাও ইচল-ইচেশিং অমসুং নহা ওইরিবা মরূপশিং।

ওরিশাগী চাওখৎ থৌরাংগীদমক কত্থোকপগী ৱাখল্লোনগা লোয়ননা থবক তৌনবা ঐখোয়না হোৎজরিবা অসি ঙসিদি মরুওইবা থাক অমদা য়ৌরে। ঙাইহাক্কী মমাংদা লুপা কোতি লিশিং ১৪ হেনবগী তোঙান তোঙানবা প্রোজেক্তশিং শঙ্গাখ্রে অমসুং উরেপ উয়ুং তমখ্রে। প্রোজেক্তশিং অসিদা অৱাংবা থাক্কী মহৈ মশিং, হকশেল, গ্যাস, লম্বী-থোং অসিনচিংবশিংগী মরুওইবা তোঙান তোঙানবা প্রোজেক্তশিং য়াওরি। মসিগী প্রোজেক্তশিং অসিনা ওরিশাগী চাওখৎ থৌরাং, মফম অসিগী প্রজা মীয়ামগী পুন্সি মহিং ফগৎহনবদা মরুওইবা থৌদাং লৌরগনি। চাওখৎ থৌরাংগী অসিগুম্লবা প্রোজেক্তশিং অসিগীদমক ময়াম পুম্নমকপু ওরিশাগী মীপুম খুদিংমকপু হন্না হন্না নুঙাইবা ফোংদোকচরি।

মরূপশিং, লৈবাক অসিগী পুৱারিদা অহানবা ওইনা কেন্দ্র সরকারনা ওরিশা য়াওনা নোংপোক ভারত অপুনবগী চাওখৎ থৌরাংদা পুক্নিং চিংশিল্লক্লি। লৈবাক অসিদা থোং মান্ননা চাওখৎপা পুরকপদা মরুওইবা থৌদাং লৌরদুনা হৌখিবা চহি মরিদগী লেপ্পা নাইদনা মফম অসিদা ইনফ্রাস্ত্রকচরগা মরী লৈনবা তোঙান তোঙানবা প্রোজেক্তশিং পায়খৎলি। কেন্দ্র সরকার অসিনা নোংপোক ভারতপু নোংপোক এসিয়া অমসুং খা এসিয়াগী গেৎৱে ওইনা শেমগৎনবা মায়কৈরোমদা চংশিল্লি। সবকা সাথ, সবকা বিকাসকী মন্ত্র অদুদা চৎতুনা ওরিশাগী প্রজা মীয়াম, ওরিশাগী মফম শিনবা থুংনা চাওখৎপা পুরক্নবা ৱাখল্লোনগা লোয়ননা কেন্দ্র সরকারনা মাংলোমদা চংশিল্লি।

মরূপশিং, ঙসি আই.আই.তি. ভুবনেশ্বরবু ওরিশাগী নহাশিংগীদমক কত্থোচনবগী তঞ্জা অদু ঐহাক্না ফংজরে। মসি শাবদা লুপা কোতি ১২৬০ চাদিং তৌখি। মসিগী পুক্নিং হুনা ফজরবা কেম্পস অসিনা লাক্কদৌরিবা মতম খরা অসিদা ওরিশাগী নহারোলশিংগী মংলানশিংগী সেন্তর ওইরগনি। মফম অসিগী নহাশিংগীদমক থবক পীনবগী অনৌবা পাম্বৈ অমা ওইরগনি। আই.আই.তি. গী কেম্পস অসিদা ওরিশাগী ইন্দস্ত্রীশিং, মফম অসিগী উমংশিংদা ফংলিবা পোত্থোকশিংগা মরী লৈননা রিসর্স তৌরগনি। মফম অসিগী ত্রাইবেল ইচল-ইচে অমসুং ইচিল-ইনাওশিংগী পুন্সিবু হেন্না ফগৎহন্নবা অনৌবা তেক্নোলোজী পুথোক্লগনি। সংস্থান অসিনা লৈবাক অসিগী অমদি মালেম অসিগীদমক অৱাংবা থাক্কী ইঞ্জিনীয়রশিং পুথোক্লগনি। মসিদসু নত্তনা লাক্কদৌরিবা নুমীৎ খরা অসিদা বরহামপুরগী মনাক্তা লুপা কোতি ১৬০০ চংনা ইন্দিয়ান ইন্সতিত্যুৎ ওফ সাইন্স এজুকেসন এন্দ রিসর্সকী থবকসু পায়খৎলগনি।

মরূপশিং! এজুকেসন, সাইন্স অমসুং তেক্নোলোজীগা মরী লৈনবা অসিগুম্লবা মশিং য়াম্লবা সংস্থানশিং হৌখিবা চহি মরি মখায় অসিদা কেন্দ্র সরকারনা লৈবাক পুম্বদা অয়াবা পীখ্রে। মসি সরকার অসিগী অদুগুম্লবা মীৎয়েং অদু মাংলোমদা পুখৎপনি। মদুগী মতুং ইন্না অনৌবা ভারত অসিবু মালেম অসিগীদমক মোর্দন তেক্নোলোজী অমসুং স্তার্ত অপকী হব ওইহন্নবা লেপ্পা লৈতনা হোৎনরি। ঐহাক্না থাজবা থম্লি মদুদি ওরিশাগী অসিগুম্লবা অনৌবা সংস্থান অসিনা ৱাখল্লোন অমসুং ইনোবেসনগী ওইবা ওরিশাগী শক্তম অদু হেন্না চেৎশিলহল্লগনি।

মরূপশিং, মহৈ-মশিংগা লোয়ন-লোয়ননা প্রজা মীয়ামগী হকশেলগী লমদসু কেন্দ্র সরকারনা পুক্নিং চংলি। ৱাখল্লোন অসিগা লোয়ননা ভুবনেশ্বরগী খোরদাদা শারিবা ই.এস.আই.সি. হোস্পিতাল পাকথোক চাওথোকহনবগী থবকশু মপুং ফানা পায়খৎলে।

ঙসিদি অনৌবা খুৎশু খুৎলায়গা লোয়ননা হোস্পিতাল অসিশু প্রজা মীয়ামদা কত্থোকখ্রে, হান্নগী অরিবা হোস্পিতাল অদুগী শরুক অনি ওইররে। হৌজিক্তি মসি ফমুং চামা লৈবা অচৌবা হোস্পিতাল অমা ওইরে। কেন্দ্র সরকারনা থমলিবা পান্দমদি অথাপ্পা খুঙ্গংশিংদা উমংশিংদা লৈরিবা ঐহাক্কী ত্রাইবেল ইমুং মনুংশিংবু অনা লায়েংবদা ককঙাওনহন্দবা অদুনি। পান্দম অসিবু পুক্নিংদা থম্লদুনা আয়ুশ্মান ভারত য়োজনাগী মখাদা হেল্থ এন্দ ৱেলনেস সেন্তর শাবগী থবকশু খোংজেল য়াংনা চংশিল্লি। ওরিশাদসু হেল্থ এন্দ ৱেলনেস সেন্তর চাওরাক্না লিশিং অমগা চামা য়াঙ্খৈ অয়াবা পীখ্রে। লাক্কদৌরিবা চহি অমা অনি অসিদা মসিগী য়ামখ্রবা সেন্তরশিং অসি শেম্বা লোইদুনা থৌরাং তৌরবা মতমদা ওরিশা অমসুং লৈবাক অসিগী হকশেলগী লমদা চাওনা অহোংবা পুরক্লগনি।

মরূপশিং, ওরিশাদা হকশেলগী খুদোংচাবশিং হেঙ্গৎহনবগা লোয়ন-লোয়ননা লম্বী-থোংগা মরী লৈননা কনেক্তিবিতী হেঙ্গৎহন্নবা থবকশু কেন্দ্র সরকারনা খুমাং চাওশিন্না পায়খৎলি। রাজ্য অসিগী মশিং য়াম্লবা চাওখৎপা ৱাৎলিবা মফমশিংবু লম্বী-থোংনা শম্নহন্নবা প্রোজেক্তশিংবু খুমাং চাওশিলহল্লি। খুঙ্গংশিং অমসুং সহরশিংবু শম্নহল্লি। ওরিশাদা নেস্নেল হাইৱেগী অশাংবা কিলোমীতর লিশিং ১০ ফাওবা য়ৌহন্নবা মায়কৈদা কেন্দ্র সরকারনা খোংজেল য়াংনা মাংলোমদা চংশিল্লি। পান্দম অসিগী মখাদা ঙসি লম্বী-থোংশিং, হাইৱেগা মরী লৈনবা প্রোজেক্ত মরিগীদমক উরেপ উয়ুং তমখ্রে। চান্দীখোলে-ভদ্রক সেক্সন অমসুং তাংগী-পোইতোলা সেক্সনগী লেন তরুক ওইহনবা ওইগেরা, কতক-আঙ্গুল সেক্সন পাকথোকহনবা ওইগেরা মদু নত্রগা খান্দাগিরি ফ্লাইওবর শেমগৎ শাগৎপা ওইগেরা, চাওরাক্না লুপা কোতি লিশিং মরি মখায়গী তোঙান তোঙানবা প্রোজেক্তশিং অসিনা ওরিশাগী চাওখৎ থৌরাংদা মরুওইবা থৌদাং লৌরগনি। খুদোংচাবশিং অসিনা মীয়ামগী চৎথোক চৎশিনদা লায়থোকহল্লগনি। ললোন ইতিকসু লায়থোকহল্লগনি।

মরূপশিং, ওরিশাগী ইনফ্রাস্ত্রকচরদা পাকথোক চাওথোরকপগা লোয়ন লোয়ননা মফম অসিদা ইন্দস্ত্রী পুরক্নবা অনৌবা লম্বী, অনৌবা খুদোংচাবসু লৈরে। অখন্ননা থাও অমসুং গ্যাসকী লমদা ওরিশাগী ফ্যুচর ব্রাইত ওই। পারাদীপ হাইদ্রবাদ পাইপলাইন্না ওরিশাবু অনৌবা শক্তম অমা পীরগনি। মফম অসিগী নহাশিংবু থবক পীনবা অনৌবা তোঙান তোঙানবা খুদোংচাবশিং ফংহল্লগনি। চাওরাক্না কিলোমীতর ১২০০ শাংবা পাইপ লাইন অসিনা ওরিশাগা লোয়ন লোয়ননা অন্ধ্র প্রদেশ অমসুং তেলঙ্গনাগী পেত্রোলিয়ম পোত্থোকশিংগী দরকার ওইবশিং অদু মেনশিল্লগনি। পারাদীপ রিফাইনরিদগী পুথোরকপা পেত্রোল, দিজল, কেরোসিন অমসুং এরোপ্লেনগী থাওশিংনা তোঙান তোঙানবা শহরশিং অমসুং খুঙ্গংশিংগী দরকার ওইবা অদু মপুং ফাহল্লগনি। চাওরাক্না লুপা কোতি লিশিং মরি মখায় চংনা পায়খৎকদৌরিবা প্রোজেক্ত অসিগী মখাদা বহরামপুর, বিশাখাপত্নম, রাজামুন্দ্রী অমসুং বিজয়ৱাদাদা দেলিবরী কম পম্পিং স্তেসন শেম্লগনি, পাইপ লাইন অসি শেম্লবা মতুংদা ওরিশা অসি নোংপোক ভারতকী পেত্রোলিয়মগী হব অমা ওইরগনি।

মরূপশিং, লৈবাক অসিগী লায়রবদগী লায়রবা ইমুং মনুং ফাওবা লু-নানবা মৈখু চেন্দবা ফুয়েল ফংহন্নবা সরকারনা অকনবা থবক পায়খৎলি। লৈবাক অসিগী ইমুং খুদিংদা এল.পি.জি. সিলিন্দর য়ৌহনবদদি ঐখোয় মায় পাক্কদবা খরা খক্তমক ঙায়রে। হৌজিক পাইপ শিজিন্নদুনা চাক থোংনবা গ্যাস ফংহন্নবা খোংথাংসু সরকারনা হৌদোক্লে। অখন্ননা নোংপোক ভারতপু পাইপ শিজিন্নদুনা গ্যাস য়ৌহন্নবা মায়কৈদা প্রধান মন্ত্রী উর্জা গঙ্গা য়োজনা খোংজেল য়াংনা চংশিল্লি। উত্তর প্রদেশতগী ওরিশা ফাওবা পি.এন.জি. গী লাইন তিংনবা লুপা কোতি লিশিং কয়া চাদিং তৌরি। মসিগী মখাদা ঙসিদি জগদীশপুর, হলদিয়া, বোকারো, ধামরা পাইপ লাইন প্রোজেক্তকী বোকারো-আঙ্গুল সেক্সনগী উরেপ উয়ুংসু ঙসি তমখ্রে। চাওরাক্না লুপা কোতি লিশিং অহুম মখায় চংনা শাগদবা প্রোজেক্ত অসি মপুং ফানা লোইরবা মতমদা মসিনা ওরিশাগী জিলা মঙাগা লোয়ন-লোয়ননা ঝারখন্দগী জিলা তরুকসু পাইপকী গ্যাসনা শম্নহল্লগনি।

মরূপশিং, লৈবাক অসিগী অহানবা নিংতম ইহৌদা মরুওইবা থৌদাং লৌখিবা পায়কাক্রান্তিগী চহি ২০০ শুরকপদা অখন্নবা পোস্তেল তিকেৎ অমসুং কোইন অমসু ঙসি রিলিজ তৌখ্রে। মসিদসু নত্তনা পায়কাক্রান্তিগী লুচিংবা বকশী জগবন্ধুগী মিংদা উৎকল য়ুনিবর্সিতীদা চেয়র অমসু সরকারনা হৌদোক্লে। চেয়র অসিনা পায়কা অমসুং ত্রাইবেল ইহৌ য়াওনা মশিং য়াম্লবা লৈবাক নিংবা ইহৌগী রিসর্সকা মরী লৈনবা হিরমশিংদা রিসর্সকী সেন্তর ওইরগনি। লোয়ন লোয়ননা মসিনা ওরিশাগী ত্রাইবেল সমাজদা লাক্লিবা সমাজকী অমসুং শেল থুমগী অহোংবশিং অদু খংনবগী মায়কৈদসু মরুওইবা থৌদাং লৌরগনি।

মরূপশিং, পায়কাগী অথোইবশিং অদুবু ইকায় খুম্নবগা লোয়ন-লোয়ননা ওরিশাগী চাওখৎলবা স্পিরিচুয়েল হেরিতেজ অসিবু মালেমদা শকখংহন্নবা হোৎনরি। কতক জিলাগী ললিতগিরিদা আর্কিওলোজী ম্যুজিয়ম শঙ্গাবগী তঞ্জা অদুসু ঙসি ঐহাক্না ফংজরে। মসিদা বৌদ্ধ কালগী হৌরকপা মতমগা মরী লৈনবা মরুওইবা পোৎলমশিং থম্লি। ম্যুজয়ম অসি মালেম পুম্বগী বৌদ্ধ লাইনিংগা মরী লৈনবা মীওইশিং, রিসর্স স্কোলরশিংবু পুক্নিং চিংশিল্লগনি, মদুদসু নত্তনা অতোপ্পা মীওইশিংগীসু লমকোয়বগী পুক্নিং চিংশিনফম ওইরগনি। ওরিশাগী তুরিজম ইন্দস্ত্রীনা মসিদগী অহেনবা শক্তি ফংলগনি। মদুনা মফম অসিগী নহাশিংগীদমক থবক ফংনবা অনৌবা তঞ্জা অমা ফংহল্লগনি।

মরূপশিং, কেন্দ্র সরকারনা ওরিশাগী অপুনবা চাওখৎ থৌরাংগীদমক হোৎনরি। ওরিশাগী ইনফ্রাস্ত্রকচরদগী হৌরগা মীপুম খুদিংমক্কী চাওখৎ থৌরাংগীদমক তোঙান তোঙানবা খোংথাং পায়খৎলি। ঐহাক্না ময়ামদা থাজবা পীরি মদুদি থবক অসি মখা চত্থখিগনি। ওরিশা অসি ন্যু ইন্দিয়াগী দিবেলপমেন্তকী মরুওইবা ইঞ্জিন অমা ওইহনগনি। মসিগীদমক ঐখোয় পুন্না অমত্তা ওইনা মাংলোমদা চংশিনগদবনি, মাংলোমদা চংশিনগনি, পুন্না হোৎনমিন্নগদবনি। ৱাফম অসিগা লোয়ননা ঐহাক্না অমুক হন্না অসিগুম্লবা মশিং য়াম্লবা চাওখৎ থৌরাংগী প্রোজেক্তশিং অসিগীদমক ওরিশাগী প্রজা মীয়াম্বু থমোয় শেংনা নুঙায়বা ফোংদোকচরি। অমদি জয় জগন্নাথপু খুরুমজদুনা ময়াম পুম্নমকপু হন্না হন্না থাগৎচরি।