ভারতকী প্রধানমন্ত্রী

ইকাই খুম্নরবা স্পীকর,

মমাংগী নুমিৎ হুম্নি অসিদা সেনিয়র দিগনিতরী অমসুং ইকায় খুম্ননীংঙাই ওইরবা মেম্বরশিংনা মশাগী ৱাখল্লোন কয়া ফোংদোক্নখ্রে। পুম্নমক্কী ৱারোল খুদিংমক ঐহাক্কী ইফমদা লোয়না য়ৌরকখি। ঐহাক ইশামকসু ৱারোল খরা তাজখ্রে। লৈবাক মীয়াম্না ঐখোয়গী সরকারগী মফমদা হন্না হন্না থাজবা উৎলি। ঐহাক্না ঙসি লৈরিবসি লৈবাক্কী মীয়াম কোতি কোতিগী মফমদা ইকায় খুম্নবা উৎনবগীদমক্তনি। অদুগা স্পীকরজীনসু হায়বীরি, মপু অসি থৌজাল য়াম্না লৈ অদুগা পাম্বৈ অমা নত্ত্রগা অমগী খুত্থাংদা ঐখোয়গী অপাম্বা ফংনবা ভগ্বান্না থৌজানবী। ওপোজিসনগী মফমদা পাউতাক পীদুনা মখোয়না নো কনফিদেন্স মোসনগী ৱাফম পুথোরক্লিবা অসি ভগ্বানগী থৌজালদগীনি হায়না ঐহাক খল্লি। ইং 2018দা মখোয়না মান্নবা মোসন অমা পুখৎলকখিবা অদুসু ইশ্বরগী থৌজালননি হায়না ঐহাক খল্লি। মসিদি সরকারগী ফ্লোর তেস্ত নত্তে, মসিদি ইং 2018দা ওপোজিসন্না নো-কনফিদেন্স মোসন পুখৎলকখিবা মতমদা হাউস্তা হৌদোকখিবা মীওইশিংগী ফ্লোর তেস্তনি হায়না ঐহাক্না মতম অদুদসু হায়খিবনি। অদুগা ভোত থাদবগী মতম লাকপদসু, ওপোজিসনগী তসেংবা মশিংদগী হন্থনা ভোত মখোয়না ফংখি। মসিদা নত্তনা, ঐখোয়না মীয়ামগী নাক্তা চৎলুবা মতমদা মীয়াম পুম্বনা মখোয়গী মথক্তা নো কনফিদেন্স হায়না লাউথোক্লকখি। অদুগা মীখলদা এন.দি.এ.না সীত মশিং হেন্না ফংখি, বি.জে.পি.সু সীত মশিং হেন্না ফংখি। মসিনা হায়বদি, নো কনফিদেন্স মোসন অসি ঐখোয়গী ওইনা হীরম অমদা য়াম্না অফবা অমনি হায়বনি। অদুগা এন.দি.এ. অমসুং বি.জে.পি.না ইং 2024গী মীখলদা হান্নগী রেকোর্দ কয়া অদুবু থুগায়দুনা মায় অমুক্কা পাক্লগনি হায়বসি অদোম্না ঙসিদি খঙজরে হায়বা ঐনা উবা ঙম্লে।

ইকাই খুম্নরবা স্পীকর,

ওপোজিসনগী ৱাহৌদোক্তগী মরম ওইরগা, নুমিৎ হুম্নিদগী মফমসিদা তোঙান-তোঙানবা হীরমগী মতাংদা খন্ন-নৈনরক্লি। মখোয়না হৌরকপদগী থৱাই য়াওরম্লবদি হেন্না নুংঙাইগদৌবনি। মমাংগী নুমিৎশিংদা হাউস অমসুং ঐখোয়গী হাউস অনিমক্না জনবিশ্বাস বিল, মেদিএসন বিল, দেন্তল কম্মিসন বিল, ত্রাইবেলশিংগা মরী লৈনবা বিল, দিজিতেল দেতা প্রোতেক্সন বিল, নেস্নেল রিসর্চ ফাউন্দেসন বিল, কোস্তেল এক্বা কলচরগা মরী লৈনবা বিল, মসিগুম্বা মরু ওইবা বিল কয়া মফমসিদা পুথোকখ্রে। বিলশিং অসিদি ঐখোয়গী ঙামীশিংগী হক্কী মতাংদনি, মসিগী খ্বাইদগী চাউনা কান্নবা ফংগদবসি কেরলানি, কেরলাগী এম.পি.শিংদগী থাজবসু হেন্না থম্লিবনি। মসিগী বিল অসিদা ফাওবদি মখোয়না নীংথিনা শরুক য়ারম্বা য়াবনি। অদুবু রাজনীতি তৌবা হেনমনখিবনা মখোয়না ঙামীশিংগী থোইদোক্না খনবগী মতম লৈখিদ্রে।

নেস্নেল রিসর্চ ফাউন্দেসন বিলগী মতাংসু লৈরি। লৈবাক্কী নহাশিংগী অপাম্বদা অনৌবা মাইকৈ তাক্কদবা বিলনি। হিন্দুস্তান্না সাইন্সকী পাৱর অমগুম্না মালেমদা করম্না মাঙজিল থাগনি, মসিগী মতাংদা মিৎয়েং শান্না খন্নবা য়াবনি, মসিদসু অদোম্না নুংঙাইত্রি। দিজিতেল দেতা প্রোতেক্সন বিল। মসিদি লৈবাক্কী ঙসিগী নহাশিংনা ফাওরিবা ইথিলগা য়াম্না মরী লৈনবনি। লাক্কদৌরিবা মতমশিংদি তেক্নোলোজীনা শাফু পীগদৌরিবনি। দেতা অসি ঙসিদি অনিশুবা থাউ, অনিশুবা সনা ওইনা খন্নরবনি। মসিদা য়াম্না কুপ্না খন্নবগী মথৌ তারিবনি। অদুবু অদোমদি রাজনীতিদা হেন্না থৱাই চঙলি। খুঙ্গং, লাইরবা, মাইনোরিতী, শোত্থরবা, ত্রাইবেলগী য়াইফ য়ুম্বালগী মতাংদা খন্নবা বিল কয়া অমা য়াওরি। মখোয়গী তুংগী পুন্সিগা মরী লৈনরিবনি। অদুবু, মসিদা অদোম্না থৱাই চঙদে। লৈবাক মীয়াম্না থবক অমগীদমক্তা অদোম্বু থাবীরক্লি, অদুগা অদোম্না মখোয়গী থাজবা মাঙহল্লে। লৈবাক্তগী পার্তীনা হেন্না লুই হায়বা ৱাফম অমা ওপোজিসনগী পার্তী খরগী মওং মতৌদগী ময়েক শেংনা খঙবা ঙম্লে। লৈবাক্তগী পার্তীদনা হেন্না প্রাইওরিতী পীরে। অদোম্না লাইরবগী করিমত্তা খন্দে হায়বা ঐ খল্লি। শক্তি পায়নিংবগী ৱাখলনা অদোমগী থক কাখ্রে। অদোম্না লৈবাক্কী নহাশিংগী করিমত্তা খন্দে। অদোমগী তুংগী মতমগী রাজনীতিগী মতাংদা খক খল্লে।

ইকাই খুম্নরবা স্পীকর,

অদোম্না পুনশিন্দুনা হাউসপু নোংমা মথৌ তৌহল্লিবসি করি থবক্কীনো? নো কনফিদেন্স মোসন পুরকপা য়ানবরো? শেঞ্জা থুমজাদা হারবা অদোমগী খোঙলোইশিংগা করি হীরমদা ৱারী শাদুনা নো কনফিদেন্স মোসনগী মতাংদা অদোম্না করম্না খন্নবগে? অদোমগী কাঙবুনা য়াম্না মথা শাবগী মতৌ ঐনা সোসিএল মীদিয়াদা উরে। মসি অদোমগী হৌজিক ওইরিবা ফিভম্নি।

অদুগা স্পীকর্জী, দিবেত অসিগী য়াম্না নুংঙাইবা শরুক্তি ওপোজিসন্না ফিলদিং শিল্লি, অদুগা বাউন্দরী অমসুং সিক্স য়ৈরিবা অসিনা ত্রেজরী বেঞ্চনা ওইরিবা অসিনি। অদুগা, ওপোজিসন্না নো-কনফিদেন্স মোসন অসিদা নো-বোল লেপ্তনা হুল্লি। ত্রেজরী বেঞ্চনা সেঞ্চ্যুরী য়ৈখ্রে, অদুগা ওপোজিসনগী মাইকৈদগীনা নো বোল লংদুনা লৈরে।

স্পীকরজী,

ঐহাক্না ওপোজিসনগী মরুপশিংদা করিগুম্বা খরা হায়জনিংইঃ অদোম্না শেম শারগা লাক্ত্রিবা করিগীনো? খরা হোৎনবীয়ু। ঐহাক্না অদোমদা কন্না হোৎনজৌ হায়দুনা চহি মঙা পীরে; ঐহাক্না ইং 2018দা হায়খিবনি, ইং 2023দা শেম শারগা লাকউ। অদোম্না চহি মঙা ফাওবা শেন্নবা ঙমদে। য়াম্না নুংঙাইতেবো, য়াম্না নুংঙাইতেবো!

ইকায় খুম্নরবা স্পীকরজী,

ঐখোয়গী ওপোজিসনগী মরুপশিংদা পাউচেগী হেদলাইন ওইনীংবগী অকনবা ইথিল অমা লৈ। অদুবু, লৈবাক অসিনা অদোম্বুসু য়েংদুনা লৈরি হায়বসিসু কাওগনু। অদোমগী ৱাহৈ খুদিংমক লৈবাক অসিনা কুপ্না তারিবনি। অদুবু, অদোম্না লৈবাক অসিগী মফমদা নীংবা কায়বা নত্তনা অতৈ করিসু পীদরি। অদুগা ওপোজিসনগী চৎনরোলগী ওইনদি, ফত্ত্রবা রেকোর্দনা থল্লবা মীওইশিং অদুনসু ঐখোয়গী মিংচৎ থীনবা হোৎনরি।

ইকায় খুম্নরবা স্পীকর্জী,

হন্দক্কী নো কনফিদেন্স ভোৎকী ৱাফম খরদি য়াম্না তোঙানবা অমসুং মমাংদা অমুক্তা থোকখিদ্রিবা ওইবসি য়াম্না ঙকই। মমাংদা তাখিদ্রি, ৱাখলনা ফাওবা খনখিদরি। খ্বাইদগী চাউবা ওপোজিসন পার্তীগী লুচিংবগী মমিং অসি ৱা ঙাঙগদবশিংগী লিস্ততা ফাওবা য়াওদে। মমাংগী থৌদোকশিংদা য়েংসিঃ ইং 1999দা বাজপায় সরকারগী মাইয়োক্তা নো কনফিদেন্স মোসন পুখৎলকখিবা মতমদা, শরদ পাৱারনা ওপোজিসনগী লুচিংবা ওইরম্মি। মহাক্না দিবেত লুচিংখি। ইং 2003গী অতলজীগী মতমদনা, সোনিয়াজীনা ওপোজিসনগী লুচিংবা ওইবীরম্মি, মহাক্না নো কনফিদেন্স মোসন লুচিংখি। ইং 2018কী ওপোজিসনগী লুচিংবনা খার্গেজীনি অমসুং মহাক্না নো কনফিদেন্স মোসনবু মশক থোক্না লুচিংখিবনি। অদুবু হন্দক্কী মতাংসিদা অধির বাবুবু কৈদৌখ্রবগে? মহাক্কী মশামক্কী পার্তীনা ৱা ঙাঙবগী তাঞ্জা অমা ফাওবা পীবিদ্রে। মসিমক অমিত ভাইনা থৌদাং খঙনা, থৌওং অসি নুংঙাইতে (অধি বাবুবু নাথৈরে হায়বগী) ঙরাং হায়খ্রে। মতম লোইরবা ফাওবদা, ঙসি ৱা ঙাঙবগী খুদোংচাবা অমা পীরিবা অসিদি অমিত ভাইগী পুকচেল চাউবগী মতৌনি। মখোয় অসিদি হীরম খুদিংমক মাঙহন তাকহনবদা য়াম্না হৈবা ঙাক্তনি। অদোমগী করি তঙাই ফদবা লৈবগে ঐ খঙদে। অধির বাবুবু করিগীদমক্তা কান্থোক্লিবনো? কনানা খঙনি, কনানোম্না কোলকাতাদগী কৌরক্লমবা য়াই, কংগ্রেস পার্তীনা মহাকপু লেপ্তনা মিংচৎ থীহল্লি। করিগুম্বা মতমদা, মীখলগী মরম পীশিন্দুনা  মহাকপু ফমদগী মতম খরগী ওইনা লৌথোকই। ঐখোয়না আধির বাবুগীদমক্তা নুংঙাইতবা উৎচরি। সুরেশজী, চানবীদুনা হৌনা অমুক্তা নোকপীয়ু।

ইকায় খুম্নরবা স্পীকর্জী,

লৈবাক অমসুং পুন্সি অমসুং পুৱারী খুদিংদা মদুনা অরিবা চৎনবীদগী মপান থোক্লক্তুনা অনৌবা শাক্তি, অপাম্বা, মঙলান অমসুং ৱারেপকা লোয়ননা তুংলমচত্তা চঙশিনবগী মতম অমা লাকই। ঙসিগী 21শুবা চহি-চাগী য়ুগ অসিদা, ঐহাক্না গনতন্ত্রগী শেংলবা লাইশঙ অসিদগী থৱাই চঙনা অমসুং চহি কয়াগী এক্সপেরিএন্সকা লোয়ননা ঙসিগী য়ুগ অসিদি খুদোংচাবা লৌবা, ভারতকী মঙলান মঙফাওনহনবগী খুদোংচাবা পুম্নমক লৌবগী মতম্নি হায়জরি। ঐখোয় খুদিংনা মতমসিদা হিংলিবনি। মসিগী মতম অসিদি য়াম্না মরু ওইবা মতম্নি।

অহোংবা নাইবা মালেমসিদা থোক্লিবা থৌদোকশিং অসিনা লৈবাক অসিদা চহি লিশিং কয়াগী শাফু পীগনি হায়না ঐহাক্না হায়জনিংই। মীওই মিলিয়ন 4.5না য়ুগ অসিদা মখোয়গী মায় পাকপা, মথৌনা অমসুং মপাঙ্গল পুথোক্তুনা হোৎনরিবা অসিনা মথংগী চহি লিশিং অমগী ফম্বাক শেমগদৌরিবনি। মরম অদুনা, য়ুগ অসিদা অমত্তা ওইবা মিৎয়েং লৈবগী ঐখোয় পুম্নমক্কী অচৌবা থৌদাং লৈরি – মিৎয়েং অদুদি, লৈবাক্কী চাউখৎ থৌরাংদা ওইগদবনি। হৌজিক্কী মতমগী তঙাই ফদবসি লৈবাক্কী অপাম্বা থুংহন্নবা ঐখোয় পুন্না থম্মোই শেংনা হোৎনমিন্নবনি। ঐখোয়গী অপাম্বা খুদিংবু মায় পাকপদা ওন্থোক্কদবনি। মীওই বিলিয়ন 1.4গী অপুনবা পাঙ্গলনা লৈবাক অসিবু অৱাংবা থাক্তা পুখৎপা ঙমগনি। মালেম্না ঐখোয়গী নহাশিংগী মতিক মগুন খঙলে অমসুং ঐখোয়সু মসিদা থাজবা থম্ফম থোকই। অচৌবা মঙলান মঙলিবা ঐখোয়গী নহাশিংনা মখোয়গী মঙলানবু অচৌবা মায় পাকপদা ওন্থোকপা ঙম্মি। অদুনা, ইকাই খুম্নরবা স্পীকর, ঐখোয়গী লৈবাক মীয়াম্না চহি 30গী মতুংদা ইং 2014দা মপুং ফানা মেজোরিতী ওইবা সরকার অমা শেমখি। মখোয়গী ত্রেক রেকোর্দতা য়ুম্ফম ওইরগা, লৈবাক্কী নহাশিংনা মখোয়গী মঙলান অমসুং অপাম্বা ফংহনবা ঙমগনি হায়বা খঙই। মদুনা মরম ওইরগা, মখোয়না সরকার অসিবু ইং 2019দা অমুক্কা হন্না থাগৎলকখিবনি।

ইকাই খুম্নরবা স্পীকর,

নহাশিংগী মঙলান মঙফাওনহন্নবা মখোয়দা খুদোংচাবা পীবা হায়বসি হাউস অসিদা লৈরিবা মীওই খুদিংগী থৌদাংনি। ঐখোয়না মসিমক পাংথোক্তুনা ভারতকী নহাশিংদা শেঞ্জা থুমজা তৌদবা সরকার অমা খুদোল তমখি। ভারতকী নহাশিং ওইরিবা ঙসিগী প্রোফেস্নেলশিংদা ঐখোয়না থৌনা হাপ্লে, অৱাংবা থাক্কী মায় পাকপা ঙমহন্নবা খুদোংচাবা পীরে। ভারতকী মিংচৎপু শেমদোক্লগা মালেমদা লৈবাক অসিগী অনৌবা শক্তাক অমা পীরে। মালেম্না ভারত্তা থম্লিবা থাজবা অসিসু নোংম-নোংমগী হেনগৎলক্লি।

অদুগা, ঐখোয়গী ওপোজিসনগী মরুপশিং অসিনা মতম অসিদা করি তৌরিবগে? চাউখৎপগী খুদোংচাবা কয়ানা থল্লবা মতমসিদা মখোয়না নো কনফিদেন্সকী ভোত থমদুনা মীয়ামগী থাজবা মাঙহন্নবা শিনলি। ঙসিদি, ঐখোয়গী নহাশিংনা অনৌবা স্তার্তঅপ কয়া রেকোর্দ ওইবা মশিংদা হৌদোক্তুনা মালেমদা অঙকপা ফাওহল্লি। ঙসিদি, ভারত্তা ফোরেন ইনভেস্তমেন্ত চঙলকপগী মশিংনা রেকোর্দ ওইবা মশিং ওইরে। অদুবু, ওপোজিসনদি ভারতকী ওইবা অফবা পাউ তাবা পামদে, মসি মখোয়গী ৱাখল্লোনগী ফিভম্নি। ঙসিদি, লাইরবশিংগী থম্মোইদা মশাগী মঙলান মঙফাওনহন্নিংবগী অপাম্বনা থল্লে। অদুগা, লৈবাক অসিদগী লাইরবসু য়াম্না য়াঙনা লোইশিনলক্লি। নিতি আয়োগকী মখা পোন্না, লৈবাক্কী মীয়াম করোর 3.5 হেনবনা মমাংগী চহি মঙাগী মনুংদা লাইরবগী খয়াত্তগী মনিং তমখি।

ইকাই খুম্নরবা স্পীকর,

IMFনা মখোয়গী ৱর্কিং পেপরদা ভারতনা এক্ত্রীম পোবর্তী মুত্থৎপগা পাংখক ওইরে হায়রি। IMFনা ভারতকী DBT অমসুং সোসিএল ৱেলফিয়রগী অতোপ্পা স্কিমশিংবু ‘য়াম্না নিংথীবা থৌওংনি” হায়রিবনি।

ইকাই খুম্নরবা স্পীকর,

WHOনা জল জীবন মিসন্না লৈবাক্কী মীওই লাক্ষ 4 অমসুং স্বচ্ছ ভারত অভিয়ান্না মীওই লাক্ষ 3গী পুন্সি কনবদা তেংবাংখি হায়না ফোংদোকখ্রে। মসিগী মীওইশিং অসিদি ঐহাক্কী লাইরবা, শোত্থরবা অমসুং খুদোংচাবা কয়া ফংজদ্রবা ঐহাক্কী ইমুংগী মীওইশিংনি। WHOনা থিজিনবগী মখা পোন্না, মীওইশিং অসি স্বচ্ছ ভারত অভিয়ন (ক্লীন ইন্দিয়া কেম্পেন) অসিনা মখোয়বু কনবনি হায়রি। স্কিম অসিগী মতেংদগী স্কিম লাইরবা ইমুংশিংদা চহিদা লুপা 50,000 কনবদা তেংবাংলি হায়না UNICEFনসু হায়খি।

ইকাই খুম্নরবা স্পীকর,

থাজবা ঙমদবা অমসুং নাপল কাবা হায়বসি ওপোজিসনগী মতৌ ওইরে। মখোয়না লৈবাক মীয়াম্না থাজবা থম্লিবা অসিবু উবা ঙমদ্রে। অদুনা, মসিগুম্বা ওস্ত্রিচককুম্বগী মতৌসিদা লৈবাক্না করি তৌগনি?

ইকাই খুম্নরবা স্পীকর,

মমাংগী নুমিৎ হুম্নি অসিদা ঐহাক্কী ওপোজিসনগী মরুপশিংনা পামদবা লোন্দা শিজিন্নরি। মখোয়না সোর্স কয়াদগী ফত্তবা ৱাহৈ কয়া খোমজিনবা মাল্লে। মসিগুম্বা ফত্তবা ৱাহৈ কয়া ঙাঙথোকখ্রবা মতুংদা মখোয়গী ৱাহৈ লোইশিনখ্রবা মাল্লে। অদুগা মীওইশিং অসিনা ঐহাক্কী অহিং নুংথিল খঙদনা মিৎয়েং চঙলি। মসি মখোয়গী মহৌশাগী মতৌনি। অদুগা মখোয়গী খ্বাইদগী পামজবা খোল্লাওদু করিনো? “মোদী, অদোমগী মোংফম তৌরবনি”। মসিদি মখোয়না খ্বাইদগী পামজবা খোল্লাওনি। অদুবু মখোয়গী মসিগুম্বা ৱাহৈশিং অসিদি ঐহাক্কী ইফমদদি তোনিক ওইরিবনি। মখোয়গী নেগেতিব ওইবা থৌওংবু ঐহাক্না পোজিতিব ওইহল্লিবনি। মখোয়না মসি করিগী তৌরিবনো? মসি করিগী থোক্লিবনো? ঐহাক ঙসি হাউস্তা অরোনবা ৱাফম অমা তমজগে। ওপোজিসনগী মীওইশিংদা অরোনবা থৌজাল অমা লৈ হায়না ঐহাক খল্লি। মখোয়না ফত্তবা ওইহন্নিংবা খুদিং অসি অফবা অমসুং মায় পাকপা ঙাক্তা ওইবনি। খুদমদি অদোমগী মাঙদা লৈরে। চহি কুন হৌখ্রে, অদুগা মসিগী মনুংদা করি করি পাংথোকখিদবা লৈবগে,করি তৌখিদবা লৈবগে? অফবা ঙাক্তা ওইখিবা ঙাক্তনি। অদুনা, অদোমগী মফমদা অরোনবা থৌজাল অমা পীনবীখ্রবনি। মসিমক ঐহাক্না খুদম অহুমদা তাকপা ঙমগনি।

অদোম্না বেঙ্কিং সেক্তর অসি তুরগনি হায়খি। লৈবাক অসি লোইরগনি হায়খি। মখোয়না হায়খিদবা করি লৈবগে? মখোয়না মীরমগী এক্সপর্ত ফাওবা পুশিল্লক্তুনা মখোয়গী খুত্থাংদা মখোয়না হায়খিবা ৱাফম চুমহন্নবা হোৎনৈ। মীরমগী অখঙ-অহৈনা হায়রবদি মীয়াম্না চুম্মি খনগনি হায়না মখোয়না লৌই। মখোয়না ঐখোয়গী বেঙ্কশিংগী ফিভমগী মতাংদা অরানবা অমসুং নুংঙাইতবা পাউ কয়া শন্দোকই। মখোয়না ফত্তবা ওইহন্নিংবা বেঙ্কশিংনা হৌজিক্তি করি ওইরে? ঐখোয়গী পবলিক সেক্তর বেঙ্কশিংনা হান্নদগী হেন্না নীংথিজনা পাংথোক্লে, শেন্দোংনা শরুক অনি হেন্না হেনগৎলে। মখোয়শিং অসিনা ফোন বেঙ্কিং স্কেম অমগী মতাংদা ৱাফম থম্মি, অদুনা মরম ওইরগা, য়াম্না লুবা NPA ৱাথোক অমা থোকহনখি।

অদুবু মখোয়না শেমখিবা NPAনা থোকহনখিবা ফত্তবা থৌওং কয়াবু ঐখোয়না চুম্থোক্তুনা ঐখোয়না ঙসিদি অনৌবা পাঙ্গলগা লোয়ননা মায় পাক্লে। শেল-থুম মন্ত্রী, শ্রীমতি নির্মলা সিতারামন্না বেঙ্কশিং অসিনা ওইহনখিবা মশক থোকপা হীরম খরগী মতাংদা ফোংদোকখি। অতোপ্পা খুদম অমনা, ঐখোয়গী সরকারনা মপু ওইবা HALনি। মসিনা দিফেন্স ফোর্সকী হেলিকোপ্তর শাবনি। মখোয়না HALগী মতাংদা ৱাফম কয়া থমখিবনি। HALগী মালেমগী মিংচৎ শোক্নবা ৱা কয়া ঙাঙখিবনি। HAL অসি মরাই চাইথরবনি, ভারতকী দিফেন্স ইন্দস্ত্রী অসি লোইরবনি হায়না মখোয়না হায়বনি।

মসিদা নত্তনা, অখন্নবা ৱাফম খরা থম্নবগীদমক্তা ভিদিও কয়া নমখিবা ঐখোয়না হন্দক্তা উখ্রে। HALগী থোংগালদা শিন্মীশিংবু খোমজিন্দুনা মখোয়গী মফমদা ইহৌ থোকহন্নবা হোৎনবগী মতৌগুম্বা ভিদিও কয়া নমখিবনি। শিন্মীশিং অসিগী তুংগী মতম লৈত্রবনি, মখোয়গী অঙাংশিং চরা হেন্দুনা শিরগনি, HAL অসি লুপ্লবনি হায়না পাউদমখিবনি। অদুবু ঙসিদি, HALনা মায় পাকপগী অনৌবা থাক্তা লৈরে। মখোয়গী খ্বাইদগী ৱাংবা রেভেন্যু ফংখ্রে। মরাল কয়া শিনবা, শিন্মীশিংবু শাওহন্নবা মখোয়না কয়া য়াম্না হোৎনরবসু, HALনা ঙসিদি ভারতকী মিংচত অমসুং প্রোগ্রেসকী খুদম অমা ওইরে।

ইকাই খুম্নরবা স্পীকর,

ঐহাক্না অহুমশুবা খুদম পীজরি। মখোয়না LICগী মতাংদা করি হায়খি হায়বা মীয়াম্না খঙলে। LIC অসি মুৎলবনি, লাইরবগী শেল মাঙলবনি, LICদা শেল থমখিবা লাইরবশিংনা কদাইদা চৎকনি হায়বা ৱাফম মখোয়না থমখিবনি। অদুবু ঙসিদি, LICনা লেপ্পা লৈতনা শাহৌ লৌরি। স্তোক মার্কেত্তসু মখোয়না চাউখৎলি। মখোয়না ফত্তবা ওইহন্নিংবা সরকারগী কম্পেনী খুদিংনা মায় পাকপা লোয়না ওইরকখ্রে।

ইকাই খুম্নরবা স্পীকর,

লৈবাক্কী তৌবা ঙম্বগী মতিক্তা থাজবা থমদবা মীওই কয়াসু লৈরি। মখোয়না লৈবাক্না কন্না হোৎনরিবা, মায় পাকপা কয়া ফংলিবা অসিদা থাজবা লৈতে। ঐহাক্না নুমিৎ খরনিগী মমাংদা, ঐখোয়গী সরকারগী মথংগী তর্মদা, অহুমসুবা তর্মদা, ভারতনা মালেমগী অহুমসুবা খ্বাইদগী চাওবা শেন্মিৎলোন ওইগনি হায়খিবনি। 

ইকাই খুম্নরবা স্পীকর,

লৈবাক্কী তুংগী মতমদা মখোয়না থাজবা খরা থম্লম্লবদি, ঐহাক্না থমখ্রিবা ৱাফম অসিদা মখোয়না থৌদাং খঙবা ওপোজিসনগী মীওই অমা ওইনা অসুম্না হংলম্বা য়াবনি, “ফরে, নির্মলাজী, মসি মতৌ করম্না তৌগদৌরিবনো অমুক্তা হায়বীয়ু। মোদীজী, অদোম্না মসি ফংনবা করি থৌরাং য়াৎলিবগে? ঐখোয়দা রোদমেপ উৎপীয়ু। মসি তৌবীয়ু, মসি তৌবীগনু”। অদুগা, ঐহাক্না মরী লৈনবা পাউখুমসু পীরমগনি, পীবা তাবনি। “ঐখোয়না মীখলগী মতমদা মীয়ামগী নাক্তা চৎকনি অদুগা মখোয়না (রুলিং পার্তী) লৈবাকপু অহুমশুবা থাক্তা পুরক্কনি হায়রি, অদুবু ঐখোয়না অহানবা থাক্তা ওইনা পুরক্কনি, ঐখোয়না মসি তৌগনি, মদু তৌগনি” হায়না হায়রম্বা য়াবনি। ঐখোয়গী কংগ্রেসকী মীওইশিংনা করি হায়রি? মখোয়গী ৱাখল শাগৎপা ঙমদবগী মতৌদা অমুক্তা য়েংশি। চহি কয়া শক্তি পায়রক্লবা মতুংদা ফাওবা, ঐখোয়না এক্সপেরিএন্স লৈতবা ৱাফম কয়া তাবা ফংলি।

মখোয়না (কংগ্রেসকী মেম্বরশিং) করি হায়রি? পান্দম অসি ফংনবা ঐখোয়না করিসু তৌবগী মথৌ তাদে, অহুমশুবা থাক অসিদি মহৌশানা অদুমক ফংলক্কদবনি হায়না মখোয়না হায়রি। মসিগুম্বা ৱাখল্লোন অসি চেনবনা মখোয় অসি মতম শাংনদগী মথৌ পাংথোকপা ঙমদনা লৈবনি হায়না ঐহাক খল্লি। পুম্নমক অসিবু মথন্নতা অদুমক ওইজরক্কনি হায়না মখোয়না খল্লিবনি। লৈবাক অসিনা করিসু তৌরুদনা অহুমশুবা থাক্তা য়ৌগনি হায়না মখোয়না হায়রিবনি। ঐখোয়না কংগ্রেসকী মিৎয়েং অসি খন্নরবা, করিগুম্বা থবক খুদিংমক মথন্নতা অদুম তৌজরক্লবা, মদু ওইরবদি, কংগ্রেস অসি মিৎয়েং লৈতবা কাঙবুনি হায়না ময়েক শেংনা তাক্লি।

ইকাই খুম্নরবা স্পীকর,

কংগ্রেসকী লৈঙাক মনুংদা লাইরবগী চাং য়াম্না হেনগৎখ্রিবসি মসিগী মরমদগীনি। লৈবাক অসি ইং 1991দা বেংক্রপ ওইগে তৌরুরবনি। মখোয়গী মতমদা ঐখোয়গী শেন্মিৎলোন অসি তরাশুবা, তরানিথোইশুবা থাক্তা লৈরম্লবনি। অদুবু, ভারতনা ইং 2014দা মকোক থোংবা মঙাশুবা থাক্তা চনবা ঙমখি। মসিগী অহোংবা অসি জাদুগী চৈ অমা হাইবদগী ফংবনি হায়না কংগ্রেসনা খল্লমগনি। অদুবু, ঐখোয়না য়াৎখিবা থৌরাং অমসুং লেপ্পা লৈতনা হোৎনখিবদগী থাক অসিদা য়ৌবা ঙমখিবনি। মসিগুম্বা থবক অসি চত্থখিগনি, তঙাই ফদবগী মখা পোন্না রিফোর্ম পাংথোকখিগনি, অদুগা পুম্নমক অসিগী মহৈ ওইনা ঐখোয়না অহুমশুবা থাক্তা য়ৌগনি।

ইকাই খুম্নরবা স্পীকর,

লৈবাক্না থম্লিবা অসিবু ঐহাক্না ৱাহৈদা ফোংদোকপা পাম্মি। অদোম্না ইং 2028তা নো কনফিদেন্স মোসন অমা থাংগৎপা মতমদদি, লৈবাক অসিনা মালেমগী অহুমশুবা থাক্তা লৈরগনি হায়বগী থাজবা লৈবাক অসিনা থম্লি। মসিনি লৈবাক্কী থাজবা।

ইকাই খুম্নরবা স্পীকর,

ঐখোয়গী ওপোজিসন মরুপশিংদি থাজদবা মতৌনা থল্লবনি। ঐখোয়না লাল কিলাদগী স্বচ্ছ ভারত অভিয়ানগী খোল্লাও লাওখি। মদুদসু, মখোয়না থাজবা থমখিদে। মসিবু করম্না ওইথোক্কনি? গান্ধীজীসু মসিগী মতাংদা হায়রম্মি, করি ওইখিবগে? লু নানববু করম্না ফংগদৌরিবনো? থাজদবা কয়ানা মখোয়গী ৱাখল্লোন থনখি। ইমা অমসুং ইচে-ইচলশিংবু মপান্দা খোঙ হাম্বগী থৌওংদগী মনিং তমহন্নবা ঐখোয়না অমাংশঙ লৈবগী তঙাই ফদবদা মিৎয়েং চঙখি, অদুগা মসিগুম্বা ৱাফম্বু লাল কিলাদগী ঙাঙবরা হায়বা মখোয়গী ৱাহং অমুক লাকখি। “মসিবু লৈবাক অসিগী প্রাইওরিতী অমরা?” ঐখোয়না জন ধন একাউন্তকী মতাংদা হায়বা মতমদসু মখোয়না চপ মান্নবা পাউখুম পীরকখি। “জন ধন একাউন্ত হায়ববু করিনো? লাইরবগী মখুত্তা শেল লৈবরা? মখোয়গী ফুরিৎখাওদা করি য়াওবগে? মসিনা করি কান্নদোইনো অমসুং মখোয়না মসিদগী করি তৌগদৌরিবনো?” ঐখোয়না য়োগ, অয়ুর্বেদগী মতাংদা, মসিবু খুমাং চাউশিলহনবগী মতাংদা হায়খিবা মতমদসু, মখোয়না কান্নদবা থৌওংনি হায়বা মতাগুম্না পাউখুম পীখিবনি। ঐখোয়না “স্তার্তঅপ ইন্দিয়া”গী মতাংদা ৱাহৌদোক থমখি, মসিদসু মখোয়না নুংঙাইতবগী ৱাফম শন্দোকখি। “কনা অমত্তনা স্তার্তঅপ হৌদোকপা ঙম্লোই”। ঐখোয়না দিজিতেল ইন্দিয়াগী ৱাফম থমখি, মদুদা খঙ-হৈরবা মীওইশিংনা অশাংবা ৱাফম অমুক থম্লকখি। “ভারতকী মীয়ামদি ইবা পাবা হৈতবনি। মখোয়দি মোবাইল ফোন শিজিন্নবা ফাওবা হৈবা নত্তে। মখোয়না দিজিতেল করম্না ওইবা ঙমগদৌরিবনো”? ঙসিদি, লৈবাক্না দিজিতেল ইন্দিয়াদা চাউখৎলি। ঐখোয়না মেক ইন ইন্দিয়াগী ৱারী শাখি। মখোয়না মতম পুম্বদা মসিগী মতাংদা করেম কথাইনখি।

ইকাই খুম্নরবা স্পীকর,

কংগ্রেস পার্তী অমসুং মখোয়গী মীওইশিংনা ভারত নত্ত্রগা ভারতকী মতিক মগুন্দা কৈদৌনুংদা থাজবা থমখিদে। মসি মখোয়গী পুৱারীনি।

ইকাই খুম্নরবা স্পীকর,

মখোয়না কনাদা থাজবা থম্বগে? ঐহাক ঙসি হাউস্তা হায়জগে। পাকিস্তান্না ঙমখৈদা লান্দাবগী থৌওং তোয়না পাংথোক্লম্মি। লৈবাক মনুংদা নুমিৎ খুদিংগী তেরোরিস্ত চঙলক্কনি, অদুদগীদি পাকিস্তান্না ঐখোয় খঙদে হায়রক্কনি। কনা অমত্তনা মসিগী থৌদাং লৌরমদে। অদুগা মখোয়না পাকিস্তানবুদি লেপ্তনা নুংশিরম্মি। পাকিস্তান্না হায়বা খুদিংমক থাজরম্মি। পাকিস্তান্না তেরোরিস্তসু থারক্কনি, শান্তিগী ৱারীসু শাগনি হায়রম্মি। পাকিস্তান্না হায়রবদি অচুম্বা ওইরম্মনি হায়না মখোয়না থাজবা অদুম থম্লম্মি। মসি মখোয়গী ৱাখল্লোন্নি। কাশ্মীরনা অহিং নুংথিল খঙদনা তেরোরিস্তকী চৈনা খাঙলম্মি। অদুগা সরকারনা কাশ্মীর অমসুং মীয়ামদা থাজবা কৈদৌনুংদা থম্লমদে। মখোয়না হুরিয়াত্তা থাজরম্মি, তোখায় তানীংবশিংদা থাজরম্মি, পাকিস্তানগী ফিরাল পায়বা খুদিংবু থাজরম্মি। ভারতনা তেরোরিজমগী মাইয়োক্তা সরজিকেল স্ত্রাইক পাংথোকখি। এয়রস্ত্রাইক পাংথোকখি, অদুবু মখোয়না ইন্দিয়ন আর্ম্দ ফোর্স্তা থাজবা থমখিদে। ঐখোয়গী য়েক্নবা হায়বা ৱাফমদা মখোয়না থাজখি। মসি মখোয়গী ৱাখল্লোন্নি।

ইকাই খুম্নরবা স্পীকর,

ঙসিদি, মালেমসিদা কনাগুম্বা অমনা ভারতকী মতাংদা ফত্তবা ঙাংবা মতমদা, মখোয়না মদুবু হেক্তা থাজৈ। ভারতকী মাইয়োক্তা লৈবা খুদিংদা থাজবা ঙমহনবা মেগ্নেতিক পাৱর অমা মখোয়গী মনাক্তা লৈ। খুদম ওইনা হায়রবদা, চাবা থকপা ফংদবা লৈবাক কয়া অমনা ভারত্তগী হেন্না চাউখৎলি হায়না কনা গুম্বা অমনা হেক হায়বা মতমদা, মদুনা অরানবা ৱাফম ওইজরবসু, মখোয়না মদুদা থাজবা থম্মি। ভারতকী মিংচৎ থিহনবদা মখোয়না করি নুংঙাইবা ফংবগে? কান্নদবা থবক্তা থৱাই য়াওবগী হৈনবী অমা মখোয়দা লৈ, মদুবু মখোয়না ভারত্তা য়াম্না চাউথোকহনগনি, মদু শন্দোক্নবা ৱাফম কয়া থমগনি। কোরোনা লাইচৎ হৌরকপা মতমদা, ভারতকী সাইন্তিস্তশিংনা মেদ ইন ইন্দিয়া ভেক্সিন পুথোকখি। ভারতকী ভেক্সিন্দা মখোয়না থাজখিদে, মীরমগী ভেক্সিন্দদি মখোয়না থাজবা থমখি। মসি মখোয়গী ৱাখল্লোন্নি।

ইকাই খুম্নরবা স্পীকর,

লৈবাক্কী প্রজা করোর কয়ানা ভারতকী ভেক্সিন্দা থাজবা থমখি। মখোয়না ভারতকী মতিক ময়াইদা থাজবা থমদে। মখোয়না ভারতকী মীয়ামদা থাজবা থমদে। অমসুং ঐহাক্না হাউস অসিদা হায়জনীংই। লৈবাক্কী মীয়াম্না কংগ্রেসকী মাইকৈদা থাজদবগী ৱাখল্লোন চাউনা লৈ। কংগ্রেসন মাগী মীংচৎ মাংহনখি, নাপলনা হেনখিবনা লমদম অসি উবা ঙমখিদে।

ইকাই খুম্নরবা স্পীকর,

কংগ্রেসনা লৈবাক্কী শরুক কয়াদা মাইপাক্নবা হোৎনবদা দিকেদ কয়া চংখি। কংগ্রেসনা তামিল নাদুদা অকোনবা ওইনা মাইপাকখিবা অসি 1962দনি। তামিল নাদুগী মীয়াম্না চহি 61দগী হায়দুনা লাকখি, কংগ্রেস No Confidence, ৱেস্ত বেঙ্গোলদা অকোনবা ওইনা 1972দা কাখি। ৱেস্ত বেঙ্গোলগী মীয়াম্না চহি 51 অসি কংগ্রেস No Confidence হায়দুনা লাকখি। উত্তর প্রদেশ, বিহার অমসুং গুজরাত্তা কংগ্রেসনা 1985দা কাখি, হৌখিবা চহি 38 অসিনা মীয়াম্না কংগ্রেস No Confidence হায়না ফোঙদোক্তুনা লাকখি। ত্রিপুরাদা অকোনবা ওইনা 1988দা কাখি চহি 35 অসিদা ত্রিপুরাগী মীয়ামনা কংগ্রেস No Confidence হায়না হায়দুনা লাকখি। কংগ্রেস No Confidence, কংগ্রেস No Confidence। ওরিসাদা কংগ্রেসন অকোনবা ওইনা 1995দা কাখি হায়বদি ওরিসাদসু কংগ্রেস্তা চপ মান্নবা পাউখুম অসি চহি 28 পীদুনা লাকখি, ওরিশানা হায়রি কংগ্রেস No Confidence।

ইকাই খুম্নরবা স্পীকর,

নাগালেন্দদা কংগ্রেসনা ইকোন কোন্না কাখিবা অসি 1988দনি। মফম অসিগী মীয়াম্নসু চহি 25 অসি কংগ্রেস No Confidence হায়দুনা লাকখি। কংগ্রেস No Confidence। দিল্লী, আন্ধ্র প্রদেশ অমসুং ৱেস্ত বেঙ্গোলদা MLA অমা ফাওবা লৈতে। মীয়াম্না হঞ্জিন হঞ্জিন কংগ্রেসতা No Confidence হায়না লাউদুনা লাকখি।

ইকাই খুম্নরবা স্পীকর,

ঙসি ঐহাক্না নখোয়গী থবক্কী মতাংদা হায়জগে। ঐনা হায়রিবা অসি নখোয়গী য়াইফনবনি। নখোয় ৱাগনি, নখোয় য়াম্না ৱাগনি। নখোয়গী য়াইফনবা ঐহাক্না হায়গে। ঙসি মফম অসিদা ঐহাক্না ঐখোয়গী বিরোধীগী মরুপশিংদা অৱাবা ফোঙদোকচনীংই। নুমিৎ খরনিগী মমাংদা বেঙ্গলুরুদা নখোয়না পুন্না দিকেদ অমা মখাইগী UPAগী থৌরম পাঙথোকখি। মসিগী অরোইবা মথৌ মঙম পাঙথোকখি। দেমোক্রেতিক বিহেবিয়রগী মতুং ইন্না নখোয়গীদমক মীনুংশি পোকফম থোকই। অদুবু অশোইবা অসি ঐহাক্কী নত্তে মরমদা নাকল অমরোমদা নখোয় নশানা UPAগী থবক তৌরি অমসুং মদুগী নুংঙাইবা ফোঙদোক্লি। দিকেদ কয়া শুরবা তমথিরবা গারী অসি ইলেক্ত্রিক গারী ওইনা উৎনবা অচৌবা থৌরম অমা পাঙথোকখি অমসুং নোংনীংবা ৱাফমদি থৌরম অদু লোইদ্রিঙৈ মমাংদা মনা লৌনবা মী ফুনরকখি। এলাইন্স অসিগা লোয়ননা নখোয়না মীয়ামগা চৎকনি হায়বদা ঐহাক্না অঙকপা পোকই। বিরোধীগী মরুপশিংদা ঐহাক্না হায়জনীংবদি নখোয়না তুং ইল্লিবা অদু লৈবাক্কী নহারোল অমসুং লৈবাক্কী ভেল্যুশিং খঙদবা অমনি। মীরোন অমগী মতুং মীরোন অমা, মীওইশিং অসিনা মোরোক অঙাংবা অমসুং মোরোক অশঙবগী মরক্তা খেন্নবা খঙদে। অদুবু ঐহাক্না মরুপশিং নখোয়বু খঙই, নখোয় পুম্নমক ভারতকী ৱাখল্লোন মুন্না খঙই, নখোয়না ভারতকী মুদ খঙই। নমথাক তৌনবা হোৎনবশিং অদুগী অশেংবা অদু মাংদা থোরকই।

“লানদগী লাপনা চেনখি, লানদগী লাপনা চেনখি

মমিং থোনখি রনধীর,

ভাগ্যচন্দগী লাইবক অসি হৌজিক ফাওবা তুমখি

ইকাই খুম্নরবা স্পীকর,

মখোয়গী অৱাবা অসি মখোয় মশাবু হীংদুনা থম্নবা হোৎনবনি, মখোয়না NDAগী সপ্পোর্ত মথৌ তাই। অদুবু মখোয়গী নাপল কাবা মতৌ অসি মখোয়না থাদোক্তে মরম অসিনা মখোয়না NDAদা I অনি হাপখি। নাপলগী লংলা অনি হাপখি। অহানবা অসিনা দল কুন-তরুক্কী নাপল অমসুং অনিশুবা অসিনা ইমুং অমগী নাপল। করিগুম্বা অমা কন্নবগীদমক NDAসু হুরানখি অমসুং ভারতপু I.N.D.I.A. হায়না মচেৎ তানা থুগাইখি।

ইকাই খুম্নরবা স্পীকর,

ঐখোয়গী DMK ইচিল ইনাওশিং তাবীয়ু, কংগ্রেস মেম্বরশিংসু তাবীয়ু। স্পীকর, UPAনা থাজৈ মদুদি লৈবাক্কী মিং শীজিন্নদুনা মখোয়গী ক্রেদিবিলিতী হেনগৎহনখি। কংগ্রেস শৌগৎলিবা দলশিং, কংগ্রেসকী লেংদ্রবা মপাংশিং, তামিল নাদু সরকারদা মন্ত্রী ওইরিবা অমনা উমিৎ নিনিগী মমাংদা হায়খি ‘I.N.D.I.A.’ অসি মখোয়গীদমক্তদি মরু ওইদে। মখোয়গী মতুং ইন্না তামিল নাদু অসি ভারত মনুং চনদে।

ইকাই খুম্নরবা স্পীকর,

ঙসি, ঐহাক্না চাউথোকচবগা লোয়ননা হায়জনীংই মদুদি তামিল নাদু অসি লৈবাকনীংবগী ইচেলশিং মতম চুপ্পদা  চেল্লিবা রাজ্যনি। রাজ্য অসিনা রাজাজী পীখি, কমারাজ পীখি, MGR পীখি, অব্দুল কলাম পীখি। ঙসি তামিল নাদু অসি মখোয়গী খোঞ্জেলশিংনা খোন্থাং য়ৈরি।

ইকাই খুম্নরবা স্পীকর,

মখোয় মশাগী লৈবাক লৈ হায়বা য়ানীংদবা মীওইশিং নখোয়গী এলায়েন্স মনুংদা লৈরবা মতমদা নখোয়গী গারী অদু কদায়দা খামগনি? মীকুপ অমা য়েংবীয়ু অমসুং করিগুম্বা ৱাখল লৈরবদি মদু খন্থবীয়ু।

ইকাই খুম্নরবা স্পীকর,

মখোয় মশাগী মমিংগা শাগোন্নরিবা ৱাখল্লোন অদু ঙসি চুনদ্রে। মখোয়গী ৱাখল্লোন অসি অরিবনি। মখোয়না খল্লি মখোয়গী মমিং ওন্থোক্লগা মখোয়না লৈবাক অসি লৈঙাক্কনি। লাইরবনা মখোয়গী মমিং অসি মফম খুদিংমক্তা উবা ফংই অদুবু মখোয়গী থবক্তি উবা ফংদে। হোস্পিতালশিংদা মখোয়গী মমিং য়াওরি অদুবু লায়েংদি ফংদে। এজুকেস্নেল ইন্সতিত্যুসনশিং, লম্বীশিং, পার্কশিংদা মখোয়গী মমিং থেৎলি; লাইরবগী য়াইফনবা স্কিমশিংদা, স্পোর্তস এৱার্দশিং, এয়রপোর্তশিং, ম্যুজিয়মশিংদা মখোয়গী মমিং য়াওরি। মখোয়গী মিংগী মরুমদা মখোয়না থৌশিলশিং হৌদোকই অমসুং হায়রিবা থৌশিলশিংদগী লুপা করোর কয়া কয়াগী শেঞ্জা- থুমজা তৌখি। খুন্নাইগী লাস্ত-মাইলদা লৈরিবা মীওইশিংনা গ্রাসরুৎ লেবেলদা করি তৌরি খঙনীংখি অদুবু মখোয়দা শাগৈগী মমিং নত্তনা করিসু লৈখিদে।  

ইকাই খুম্নরবা স্পীকর,

কংগ্রেসকী  শক্তাক্কা তশেংনা মরী লৈনবা করিগুম্বা অমত্তা মখোয়দা লৈতে। মীখলগী মার্কাদগী ৱাখল্লোনশিং ফাওবা কংগ্রেসনা মখোয়গীনি হায়রিবা অসি কনাগুম্বা অমদগী অৱাইবনি।

ইকাই খুম্নরবা স্পীকর,

মখোয়গী অশোইবশিং কুপশিন্নবা মখোয়না মীখলগী মার্কাশিং অমসুং ৱাখল্লোনশিং ৱাইবা খক্তা নত্তনা মসিনা অহোংবশিং লাকখিবগীদমক দলনা য়ানীংদবা অদু উৎখি। মসিনা মখোয়না 2014দগী হৌদুনা য়ানীংদবা ফীভম অমদা লৈরকখিবা অদু উৎলি। দল অসি কনানা লিংখৎখি? দল অসি লিংখৎখিবা মীরৈবাকচা এ ও হুমনি। 1920দা ভারতকী নীংতম ইহৌদা অনৌবা শক্তি অমা হাপখি। অনৌবা ফিরাল চীংখৎখি অমসুং জাতিনা মদু য়াখি। অদুম ওইনমক কংগ্রেসনা ফিরাল অদুগী শক্তি উবদা মদু লৌশিন্নবা ৱারেপ লৌখি। মখোয়না মার্কা অদুদা য়েংদুনা খনখি মদুদি মসি পোলিতিকেল ভেহিকলগীদমক মসিদি চুন্নগনি। মসিগী লালোং অসি 1920দগী হৌদুনা লাকখি। মখোয়না খনখি মদুদি করিগুম্বা মীয়াম্না মচু অহুমগী ফিরাল উরবদি মখোয়দা মীয়ামনা থাজগনি খনখি। মখোয়না লালোং অসি তৌদুনা ভোত্তরশিংবু খোম্নবা গান্ধীগী মমিং ফাওবা শীজিন্নখি। কয়ারক হন্না মখোয়না হুরানখি। কংগ্রেসকী মীখলগী মার্কাশিং অসি য়েংবীয়ু – শন লাবা অনি, শনাও অমসুং খুতুম তাবা। মার্কাশিং অসিনা মখোয়গী খোঙথাংশিং, মখোয়গী ৱাখল্লোনশিং তাক্লি মসিনা ইমুং অমগী কন্ত্রোল মখাদা পুম্নমক লৈ ময়েক শেংনা তাক্লি।

ইকাই খুম্নরবা স্পীকর,

মসি I.N.D.I.A. এলায়েন্স নত্তে। মসি ‘ঘামনদিয়া’ এলায়েন্সনি। অমসুং মসিগী প্রোসেসন অসিদা মীপুম খুদিংমক্না বর ওইনীংই। মীপুম খুদিংমক্না প্রধান মন্ত্রী ওইনীংই।

ইকাই খুম্নরবা স্পীকর,

মসিগী এলায়েন্স অসিনা করম্বা রাজ্যদা নখোয় কদায়দা কনাগা লেপ্পি ফাওবা খন্থখিদে। ৱেস্ত বেঙ্গোলদা নখোয়না TMC অমসুং কম্ম্যুনিস্ত পার্তীগী মায়োক্তা লৈ অদুবু দিল্লীদদি পুল্লি। অমসুং আধির বাবু 1991 ৱেস্ত বেঙ্গোলগী বিধান সভা মীখলশিংদা কম্ম্যুনিস্ত পার্তীনা নঙোন্দা করি তৌখি। মসি পুৱারীদা হৌজিকসু ইদুনা লৈরি। হোয় 1991 অসি হৌখ্রে, অদুবু মমাং চহিদা কেরালাগী ৱায়ানাদতা কংগ্রেস ওফিস থুগাইখিবা মীওইশিং অদুগা হৌজিক মখোয়গা মরুপ ওইরি। মখোয়না মপান থোংদা নখোয়গী মমিং হোংবা য়াই  অদুবু মখোয়গী অরিবা পাপশিংদুদি কমদৌবা? পাপশিং অদুনা নখোয়বু ইপাক্তা লুপহনগনি। পাপশিং অদু নখোয়না মীয়ামদগী করম্না লোৎকনি? নখোয়না লোৎপা য়ারোই অমসুং ঙসি মখোয়না লৈরিবা রাজ্যদা ঐহাক্না মসি হায়জনীংই:

अभी हालात ऐसे हैं, अभी हालात ऐसे हैं

इसलिए हाथों में हाथ,

जहां हालात तो बदले,

फिर छुरियां भी निकलेंगी।

(হৌজিক ফীভম অসি অসুম তৌরি, হৌজিক ফীভম অসি অসুম তৌরি,

মরম অসিনা খুৎশম্নদুনা,

ফীভমদা অহোংবা পুরক্কনি,

থাংশিং ফাওবা শৎকনি)

ইকাই খুম্নরবা স্পীকর,

মসিগী নাপল কারবা এলায়েন্স অসি লৈবাক্কী দাইনাস্তিক পোলিতিক্সকী অচৌবা শক্তমনি। ঐখোয়গী নীংতম লান্মীশিং, সংবিধান শেম্লিবশিংনা মতম চুপ্পদা দাইনাস্তিক পোলিতিক্সকী মায়োক্তা লৈরকখি। মহাত্মা গান্ধী, সরদার বল্লভভাই পতেল, দা. বি আর অম্বেদকর, দা. রাজেন্দ্র প্রসাদ, মৌলানা আজাদ, গোপিনাথ বোর্দোলোই, লোকনাথ জয়াপ্রকাশ, দা. লোহিয়া অমসুং নখোয়না উরিবা মমিংশিং অসিনা দাইনাস্তিক পোলিতিক্সকী মায়োক্তা লৈখি মরমদি মসিনা লৈবাক্কী মীচম প্রজাদা অকাইবা পীবা য়াই খনখি। দাইনাস্তিক পোলিতিক্সনা মীচম প্রজাশিংবু মখোয়গী হকশিং অমসুং খুদোংচাবশিং ফংহনখিদে অমসুং মশক নাইবা মীওইশিং অসিনা মতম চুপ্পদা লৈবাক অসিনা ইমুং মনুং, মমিং অমসুং শেলদা য়ুম্ফম ওইবা সিস্তেম অমদগী লাপ্না লৈনবা হোৎনখি। অদুম ওইনমক কংগ্রেসনা মসিগী ৱাখল্লোন অসি কৈদৌনুংদা পামখিদে।

ইকাই খুম্নরবা স্পীকর,

ঐখোয়না মতম চুপ্পদা মখোয়না দাইনাস্তিক পোলিতিক্সকী মায়োক্তা লৈবা মীওইশিংবু নুংশিখিদে। কংগ্রেস দলনা দাইনাস্তিক পোলিতিক্স পামখি। কংগ্রেস দলনা ফ্যুদেলিজম পামখি। হায়রিবা অসিদা অচৌবা লুচিংবশিং অমসুং মখোয়গী মচাশিংনা মকোক থোংবা ফমশিং পাইখি। ইমুংগী সর্কলগী মপান্দা লৈবা মীওই ফাওবা য়াওনা মখোয়না ময়েক শেংনা হায়খি: মসিগী রোয়েল কোর্ত অসিগী শরুক অমা ওইদ্রিবা ফাওবা নখোয়গী তুংলমচৎ লৈরোই। মসিনা মখোয়গী এপ্রোচ। মসিগী ফ্যুদেল সিস্তেম অসি ৱিক্কেৎ কয়া মাংবা, মীওই কয়াগী হকশিং মাংহনখি। কংগ্রেসনা বাবা সাহেব অম্বেদকরবু মাইথিবা পীনবা অনিরক মখোয়গী অঙম্বা থাক্তা হোৎনখি। কংগ্রেসনা দা অম্বেদকরগী ফিজোলদা নোক্নখি; বাবু জগজিবন রামনা ইমর্জেন্সীগী মতাংদা ঙাংখি অমসুং মহাকপু কংগ্রেসনা লেম্না থাখিদে। মহাকপু ওৎপীখি। মোরার্জী দেসাই, চৌধরী চরন সিংহ, চন্দ্রসেখর জীগুম্বা মশক নাইবা মীওই কয়াবু ফ্যুদেলগী ৱাখল্লোন চেনশিংনা লেপ্পা লৈতনা নমথখি। ফ্যুদেল সিস্তেম অসিগী শরুক ওইদবশিং, দাইনাস্তিক পোলিতিক্সকী শরুক নত্তবা মীওইশিংগী পার্লিয়ামেন্তদা ফোতো থেৎপা ফাওবা য়ানীংখিদে। মখোয়গী ফোতোশিং অসি 1990গী মতুংদা BJPনা লুচিংবা কংগ্রেস নত্তবা সরকারশিং লাক্লবা মতুংদা সেন্ত্রেল হোলদা থেৎপা য়াহনখি। লোহিয়া জীগী ফোতো অসি কংগ্রেস নত্তবা সরকার লাক্লবা মতমদা 1991দা পার্লিয়ামেন্তদা থেৎখি। নেতাজীগী ফোতো অসি জনতা পার্তীনা শক্তি পাইবা মতম 1978দা থেৎখি। লাল বাহাদুর শাস্ত্রি অমসুং চৌধুরী চরন সিংহগী ফোতোশিং অসি কংগ্রেস নত্তবা সরকার লাক্লবা মতমদা 1993দা পার্লিয়ামেন্তদা থেৎখি। কংগ্রেসনা সরদার পতেলনা শরুক তমখিবশিং অদু নমথখি। ঐখোয়গী সরকারনা মালেমগী খ্বাইদগী ৱাংবা মীতম, স্তচু ওফ য়ুনিতী শাদুনা মহাক্কী লেগেসী ওইনা ইকাই খুম্নবা ফংখিবা লাইবক ফবনি। ঐখোয়না দিল্লীদা প্রাইম মিনিস্তর্স ম্যুজিয়ম শাদুনা হান্নগী প্রধান মন্ত্রীশিংদা ইকাই খুম্নবা উৎখি। পি.এম. ম্যুজিয়ম অসিনা দলগী খেন্নবা থমদে। করিগুম্বা মখোয়গী ইমুংগী নত্তবা মীওইনা প্রধান মন্ত্রী ওইবদা মীওইশিং অদুবু মখোয়না য়ানীংদে।

ইকাই খুম্নরবা স্পীকর,

কয়ারক হন্না নেগেতিব ওইবা ৱাফমশিং ফোঙদোক্নীংবা লৈরবসু, খোঙথাং অমা পাইখৎপা মতমদা অচুম্বা অদুসু থোরকই। অমসুং করিগুম্বা মতমদা অচুম্বা অদু থোরক্তবা য়াওখিবগী এক্সপরিয়েন্স ঐখোয়দা লৈ। হনুমান্না লঙ্কা মৈ থাখিদে; মশাগী নাপলনা মৈচাকহনখিবনি। অমসুং মসি য়াম্না চুম্মি। য়েংবীয়ু, মীয়াম অসি ভগবান রামগী শক্লোন্নি। মরম অসিনা 400দগী 40দা হন্থহনখি। হনুমান্না লঙ্কা মৈ থাখিদে; নাপলনা মৈ থাখিবনি মরম অসিনা মখোয়বু 400দগী 40দা হন্থহনখি।

ইকাই খুম্নরবা স্পীকর,

অচুম্বদি লৈবাক্কী মীয়াম্না চহি কুনথ্রাগী মতুংদা মপুং ফানা  মেজোরিতী ফংদুনা সরকার অমা থাগৎখি। অদুবু লাইরবা নুপা অমনা মফম অসিদা করম্না লাক্লিবনো? নখোয়গী হক, নখোয়গী ইমুং মনুংনা মীরোল কয়া পাইরম্বা ভেল্যুশিং অদু মহাক্না করম্না লৌদুনা মফম অসিদা লাক্লিবনো? মসিনা নখোয়দা অৱাবা পীখি, মসিনা নখোয়বু তুম্বা য়াহনখিদে। অমসুং লৈবাক্কী মীয়াম্না নখোয়বু তুম্বা য়াহনদে অমসুং মখোয়না নখোয়বু 2024দসু তুম্বা য়াহল্লোই।

ইকাই খুম্নরবা স্পীকর,

মতম অমদা এয়রপ্লেন মনুংদা মখোয়গী মপোক নুমিৎকী কেক খকখি। ঙসি চপ মান্নবা এয়রপ্লেন্না লাইরবশিংগী ভেক্সিনশিং পুরি। মসিনি খেন্নবা।

ইকাই খুম্নরবা স্পীকর,

মতম অমদা দ্রাই ক্লিনিং তৌনবা ফীরোল এয়রপ্লেনদা পুরমখি। ঙসি ‘হৱাই চপ্পল’ তোংবা লাইরবশিংনা এয়রপ্লেন তোংলি।

ইকাই খুম্নরবা স্পীকর,

মতম অমদা বেকেসন অমসুং নুংঙাইথোক্নবা নেবেল ৱারশিপশিং শীজিন্নরমখি। ঙসি চপ মান্নবা নেবেল শিপশিং অসি মীরমদগী পন্দুনা লৈবা ভারত মচাশিং ময়ুম লমদমদা পুরকপদা, লাইরবশিংবু ময়ুম লমদমদা পুরকপদা শীজিন্নরি।

ইকাই খুম্নরবা স্পীকর,

থবক তৌবা, লমচৎ শাজৎতা চাউজনীংবা অমসুং মোদর্ন মোনার্কগুম্না থবক তৌবা মীওইশিংনা মফম অসিদা লাইরবা মীওই অমগী মচা নুপানা মফম অসিদা লেপ্পদা নুংঙাইতবা পোকই। মরমদি মখোয়না মমিংনা মমিং চৎহল্লি অমরোমদা ঐহাক্তি থবক্তা থাজবা থম্মি।

ইকাই খুম্নরবা স্পীকর,

ঐহাক্না অকক্নবা ৱাফমশিং অকক্নবা তাঞ্জাদা ফোঙদোক্নবা খুদোংচাবা অমা ফংখি অদুনা ঐহাক্না মাংজৌননা খনবগী মথৌ তাদে। অসিগুম্বা থৌদোকশিং তাঞ্জা চানা থোকখিবা য়াম্না য়াওখ্রে। তাঞ্জা চানরুবা অসি য়েংবীয়ু – ঙরাং কনাগুম্বনা থমোয়দগী হায়রকখি। লৈবাক অসিনা মখোয়গী ফীভম মতম কয়াগী মমাংদা খঙদুনা লাকখি অদুবু হৌজিক মীয়ামনসু মখোয়গী থমোয় খঙলে।

ইকাই খুম্নরবা স্পীকর,

মখোয়না মোদীবু অদুক্কী মতিক নুংশিবনা মখোয়না মোদীগী মরমদা নুমিৎ চুপ্পা অমসুং মঙদা ফাওবা পুং 24 খনখি। মোদীনা ৱা ঙাংলিঙৈদা মরক্তা ঈশিং থক্লবা মখোয়না লাউরকই, “মোদী অসি পরা ফারগা লাকপনি”। ঐহাক্না কালেনগী নুংশাদা মীয়াম উন্নবা থোক্লবা অমসুং মসিদা হুমাং তৈথোকপদা ফাওবা মখোয়না অমুক হন্না হায়রক্কনি, “য়েংঙু মোদী হুমাং তারে”। মসিনি মখোয়গী মওং মতৌ! ঐহাক্না ঈশৈ অমদগী পরেং খরা থমজগে:-

डूबने वाले को तिनके का सहारा ही बहुत,

दिल बहल जाए फकत, इतना इशारा ही बहुत।

इतने पर भी आसमां वाला गिरा दे बिजलियां,

कोई बतला दे जरा डूबता फिर क्‍या करे।

ইকাই কুম্নরবা স্পীকর,

ঐহাক্না কংগ্রেসকী মতৌ অসি খঙই। চহি কয়া মখোয়না চপ মান্নবা অরিবা ফেল ওইরবা প্রদক্ত অদু হঞ্জিন-হঞ্জিন লোঞ্চ তৌনবা হোৎনরি। মখোয়না লোঞ্চ তৌবা খুদিং মাইপাক্তে। অমসুং মসিনা মরম ওইদুনা মখোয়না ভোত্তরশিংবু নুংশিদবা অসি ৱাংমা লানখি। মখোয়গী লোঞ্চ মাইপাকখিদে অমসুং মসিনা মরম ওইরগা মখোয়গী অশাওবা অমসুং নুংশিদবা অদু মীয়ামদা ওনশিনখি। অদুবু PRগী মীওইশিংনা করি হায়রি? মখোয়না ‘মোহব্বৎ কী দুকান’ হায়না কৌই অমসুং মসিদগী মখোয়গী ইকোসিস্তেম হৌই। অদুবু লৈবাককী মীয়াম্না মসিবু ‘লুত কী দুকান’ হায়না কৌরি।  নুংশিদবা, স্কেম, এপীজমেন্ত অমসুং ফত্তবা ৱাখলশিং মসিদা য়াওরি। লৈবাক অসি দিকেদ কয়াদগী দাইনাস্তিক পোলিতিক্সকী মৈনা চাক্তুনা লাকখি। অমসুং নখোয়গী দুকান অদুনা ইমর্জেন্সী, তোখাই তাবা, সিখশিংদা হীংশা চত্থবা অমসুং নমথাক কয়া য়োল্লি; মসিনা উরিগী পুৱারী অমসুং খুদম চাংদম য়োন্থোকখি! নুংশিনদবা ৱাখল্লোন চেনহল্লিবা নখোয় ইকাইয়ু মরমদি নখোয়না আর্মীগী ইকাই খুম্নবা অদু য়োন্থোকখি।

ইকাই কুম্নরবা স্পীকর,

মফম অসিদা ফম্মিবা ঐখোয় কয়া খুঙ্গং নত্ত্রগা লাইরবা ইমুংশিংদগী ঙাক্তনি। হাউস অসিদা লৈরিবা মশিং য়াম্লবা মীওইশিং খুঙ্গংশিং অমসুং অপীকপা সহরশিংদগী ঙাক্তনি অমসুং করিগুম্বা খুঙ্গংদগী মীওই অমনা মীরমদা চৎপা তারবদি মদুগী মরমদা মতম শাংনা ঙাংবা তাবনি। করিগুম্বা মহাক্না মীরমদা অমুক নত্ত্রগা অনিরক চৎলবসু মহাক্না মদু চহি কয়া শোন্নদুনা লৈগনি। দিল্লী নত্ত্রগা মুম্বাই অমুক্তা চৎপা ফংদবা খুঙ্গংগী লাইরবা মীওই অমনা অমেরিকা নত্ত্রগা য়ুরোপ চৎপগী খুদোংচাবা ফংলবদি মদু চহি কয়া শোন্নদুনা লৈবা অসি মহৌশানি। মতৌ অসুম্না খমলাদা শোলগোম অমুক্তা থাদ্রিবা মীওই অমনা অপুনবা লৌবুক অদু উবদা অঙকপা পোকপা অসি মহৌশানি।

ইকাই কুম্নরবা স্পীকর,

গ্রাউন্দদা অমুক্তা চৎত্রিবা, কারগী থোঙনাও চীংথরগা অতোপ্পগী অৱাববু মখোয়গী কারশিংদগী য়েংখিবা মীওইশিং অসিনা পুম্নমক অসি উবদা অঙকপা পোক্লি। অসিগুম্বা মীওইশিং অসিনা ভারতকী ফীভম তাকপা মতমদা মখোয়না ভারত অসি চহি 50 মখোয়গী ইমুং মনুংনা পালমখিবনি হায়বা কাউথোকখি। অমরোমদা ভারতকী মওং-মতৌ তাকপদা মখোয়না মখোয়গী মপা-মপুগী অশোইবশিং অদু পল্লি। পুৱারীনা মসিগী শাখিনি। অমসুং মখোয়না মসিদা মখোয়না মাইপাক্লোই; মরম অসিনা মখোয়না অনৌবা পাম্বৈশিং লোঞ্চ তৌরি।

ইকাই কুম্নরবা স্পীকর,

মীওইশিং অসিনা খঙই মদুদি মখোয়গী অনৌবা দুকান অসি মতম খরগী মতুংদা লোল্লগনি। অমসুং ঙসি খন্ন-নৈনবা অসিগী চৈরক্তা ঐহাক্না লৈবাক অসিগী মীয়ামদা নাপলনা থুমহৎলবা কোলিজনগী ইকনোমিক পোলিসীগী মতাংদা চেকশিনবা ৱা থম্বা পাম্মি। মখোয়না লৈবাক অসিবু শক্তি লৈহনবগী মহুৎ শোন্থহল্লিবা অদুগুম্বা ইকনোমী অমা পাম্মি। ঐখোয়না ময়েক শেংনা উবা ফংই মদুদি কংগ্রেস অমসুং মখোয়গী এলায়েন্সশিংনা ঐখোয়গী অকোইবদা লৈরিবা লৈবাকশিংনা তুং ইল্লিবা ইকনোমিক পোলিসীশিংগা লোয়ননা মাংদা চংশিনবা পাম্মি। মখোয়না ত্রেজরী লান্ননা শীজিন্নদুনা ভোৎ ফংনবা গেম শান্নরি। ঐখোয়গী অকোইবদা লৈরিবা লৈবাকশিংগী ফীভম অসি অমুক্তা য়েংবীয়ু। অমসুং ঐহাক্না লৈবাক অসিদা হায়জনীংই মদুদি ঐহাক্না মখোয় অসি হোংলক্কনি থাজদে অদুবু মীয়াম্না মখোয়গী অশোইবা অদু শেমদোক্নবা শোইদনা হোৎনগনি।

ইকাই কুম্নরবা স্পীকর,

মসিগী থৌদোকশিং অসিনা ঐখোয়গী লৈবাক লোয়ননা ঐখোয়গী রাজশিংদা ফত্তবা শাফু অমা পীরি। রাজ্যশিং অসিগী মীয়াম্না অৱাবশিং মায়োক্নরি অমসুং অনৌবা পোৎলুমশিং পুরি মরমদি মখোয়না মীখল কান্নবা নমথাক তৌদুনা ৱাশকখি। অমসুং চাউখৎ-থৌরাংগী প্রোজেক্তশিং লেপহন্নবা লাউথোকখি।

ইকাই কুম্নরবা স্পীকর,

নাপলনা থুমহৎলবা কোলিজন অসিগী ইকনোমিক পোলিসীশিংগী ফল ঐহাক্না ময়েক শেংনা উবা ফংখ্রে। মরম অসিনা ঐহাক্না ইরৈবাকচাশিংদা চেকশিনৱা থম্বা পাম্মি, অশেংবা অদু খঙহনবা পাম্মি। মীওইশিং অসিনা, নাপলনা থুমহৎলবা কোলিজন অসি ভারতপু শেল পুথহনগনি। ভারত শোইদনা শেল পুথগনি। ইকনোমী শোইদনা লুপহনখিগনি। দবল দিজিৎ ইফ্লেসন শোইদনা লাকহনগনি। পোলিসী পেরালাইসিস শোইদনা ওইহনগনি। শোইদনা তংদু লৈতাদবা ওইহনগনি। শেঞ্জা-থুমজা থোকহনগনি। এপীজমেন্ত তৌগনি। দাইনাস্তিক পোলিতিক্স তৌগনি। চাউনা থবক ফংহল্লোই। হিংসা থোকহনগনি। ভারতপু চহিচা অনিগী মমাংদা লৈরম্বা ফীভমদা চীংথগনি।

ইকাই কুম্নরবা স্পীকর,

মখোয়না ভারতপু তোপ ইকনোমী 3গী মনুংদা চলহনবা কৈদৌনুংদা ঙমলোই। মোদীনা লৈবাক অসিবু ঐহাক্কী অহুমশুবা তর্মদা ঐহাক্না ভারতপু তোপ ইকনোমী 3গী মনুং শোইদনা চলহনগনি হায়না গরেন্তী পীরি। মসি ঐহাক্না লৈবাক অসিদা গরেন্তী পীরি। অদুম ওইনমক মখোয়না লৈবাক অসিবু চাউখৎহনবগী ৱাখল কৈদৌনুংদা খল্লোই। মীওইশিং অসিনা মাইকৈ অসিদা থবক অমত্তা তৌবা ঙমলোই।

ইকাই কুম্নরবা স্পীকর,

দেমোক্রেসীদা থাজবা থমদবা মীওইশিংনা হান্না ঙাংনবা হোৎনৈ অদুবু তাবগী শক্তি লৈতে। মখোয়না চিন্না ঙাংলম্লগনি চনখি; ফত্তবা লংশিল্লগা চেনখি; ওইদবশিং ঙাংলম্লগা চেনখি। মসিনা মখোয়গী গেম। মখোয়দগী লৈবাক  অসিনা করিসু আশা তৌবা য়াদে। করিগুম্বা মখোয়না গৃহ মন্ত্রীনা মনিপুরগী মরমদা ঙাংবদা থৱায় য়াওরম্বা তারবদি মনিপুরগী মরমদা হেন্না নীংথিনা খন্নবা য়াগদবনি। লম খুদিংমক খন্নবা য়ারমগদবনি। অমসুং মখোয়সু ৱাফম কয়া থম্বগী খুদোংচাবা ফংলমগনি। অদুবু মখোয়না খন্ন-নৈনবা অসিদা থৱায় য়াওদে অমসুং ঙরাং অমিত ভাইনা ৱাফম অসি কুপ্না থমখি, লৈবাক অসিনা মীওইশিং অসিনা নমথাক কয়া তৌবা অসি খঙলকপদা অঙকপা পোক্নখি। মীওইশিং অসিনা অচৌবা পাপশিং তৌখি অমসুং ঙসি মখোয়না থাজদবগী মোসন পুখৎলকপদা অমসুং থাজদবগী মতাংদা ৱা ঙাংবা মতমদা লৈবাক অসিদা থাজৈ তাক্নবা, লৈবাক্কী থাজবদা অনৌবা শক্তি পীনবা অমসুং থাজদবশিংদা মতিক চাবা পাউখুম পীনবগী থৌদাং অসি ত্রেজরী বেঞ্চকীনি। ঐখোয়না মনিপুর খক্তগী মতাংদা খন্নবা পামখি; গৃহ মন্ত্রীনা ৱাফম অসি চপ মান্ননা ফোঙদোক্তুনা চীথি অমা ইখি। মসি মহাক্কী দিপার্তমেন্তগা মরী লৈনবা ৱাফম অমা ওইখি। অদুবু মখোয়গী ওইনদি থৌনা লৈখিদে; থবক পাইখৎনীংবা লৈতে অমসুং তৌনীংবসু পোকখিদে অদুবু ফত্তবা ৱাখল্লোনশিংদি চেনখি।

ইকাই কুম্নরবা স্পীকর,

মনিপুরগী সমস্যাগী মতাংদা লৈবাক্কী গৃহ মন্ত্রী শ্রী অমিত শাহনা পুং অনি চুপ্না ঙরাং ৱাফম অসিগী মতাংদা শুগাইনা থমখি অমসুং মহাক্না সরকার অমদি লৈবাক্না মীৎয়েং চংলি ফোঙদোকখি অমসুং লৈবাক্কী মীয়ামদা ভাব তাহন্নবা হোৎনখি। অপুনবা হাউসকী মহুৎ শীন্দুনা থাজবগী অমসুং কনফিদেন্সকী পাউজেল মনিপুরদা পীখি। জেনরেল পব্লিক ভাব তাহন্নবসু হোৎনখি। লৈবাক্কী য়াইফনবা অমসুং মনিপুরগী ফীভম ফগৎহন্নবা লম্বী অমা থীগনি। অদুবু মখোয়না রাজনিতী নত্তনা করিসু খনবা ঙমদে। মরম অসিনা মখোয়না গেমশিং অসি শান্ননবা ৱারেপ লৌখি।

ইকাই কুম্নরবা স্পীকর,

অমিত ভাইনা ঙরাং পুম্নমক কুপ্না হায়খি, মনিপুরদা ৱায়েলশঙনা ৱারেপ অমা লাউথোকখি। হৌজিক ঐখোয় পুম্নমক্ন ৱায়েলশঙশিংদা করি তৌরি অমসুং মসিগী মাইকৈদা অমসুং মায়োক্তা লৈবদা করি থোকহল্লি খঙলে। হীংশা চত্থরকখি অমসুং ইমুং কয়ানা অৱাবা কয়ামরুম মায়োক্নখি। মীওই কয়া লৈখিদ্রে। নুপীশিংগী মায়োক্তা হীংশা চত্থখি, হীংশা অসি ঙাকপীফম থোক্তবনি অমসুং কেন্দ্র অমদি রাজ্য সরকারনা মরাল লৈবশিং চৈরাক পীনবা হোৎনরি। অমসুং লৈবাক্কী প্রজা পুম্নমক্তা শান্তি পুরক্নবা অমসুং তুংদসু শান্তি লৈহন্নবা খোঙথাংশিং পাইখৎলি। মনিপুরনা অমুক হন্না থাজবগা লোয়ননা মাংদা চংশিল্লগনি। ঐহাক্না মনিপুরগী প্রজাশিংদা অমসুং ইমা-ইবেন, ইচা-ইচল অমসুং ইচানুপীশিংদা লৈবাক অসিনা নখোয়গীদমক লেপ্পী, হাউস অসিনা নখোয়গীদমক লেপ্পী হায়না হায়জরি। ঐখোয়না পুন্না শীংনবা অসিগী ৱারোইশিন পুরক্কনি। অমুক হন্না শান্তি হঞ্জিনবা ঙমহনগনি। ঐহাক্না মনিপুরগী মীয়ামদা থাজবা পীজরি মদুদি মনিপুরবু চাউখৎপগী লম্বীদা খোঙজেল য়াংনা চংশিনহন্নবগীদমক অঙম্বা থাক্তা হোৎনগনি।

ইকাই কুম্নরবা স্পীকর,

হাউস অসিদা ইমা ভারতীগী মতাংদা হায়খিবা খুদিংমক্না ভারত মচা খুদিংমক্কী থমোয় কাইহনখি। করি তৌরবনো ঐহাক খঙদে। শক্তি পাইদ্রবদি অসুম তৌনব্রা? মখোয় শক্তি পাইদনা লৈবা ঙমদব্রা? অমসুং মখোয়না শীজিন্নরিবা লোল অসি করিনো?

ইকাই কুম্নরবা স্পীকর,

মীওই খরনা ইমা ভারতপু শীহন্নীংলিবা অসি করিনো ঐহাক খঙদে। মসিদগী হেন্না লাইবক থীবা করি লৈগনি? মখোয় অসি দেমোক্রেসী লোয়ননা সংবিধান হাৎপগী মতাংদা করিগুম্বদা ফোঙদোকখিবশিং অদুনি। তশেংবদি মখোয়গী ৱাখলদা লৈবা অদু মখোয়গী থবক্তা মমি তাই। ঐহাক্না অঙকপা পোকই অমসুং মীওইশিং অসি কনানো? লৈবাক অসিনা ওগস্ত 14, পার্তিসন তৌখিবা নুমিৎ অদু কাওরব্রা? নুমিৎ অসিনা ঐখোয়দা ঙসি ফাওবা অৱাবা, চৈথেং অমসুং কপ লাউখিবা অদু নীংশিংহল্লি। মখোয় অসি ইমা ভারতীবু মচেৎ অহুম থোক্না থুগাইখিবশিংনি। ইমা ভারতীনা মীখা পোনবগী য়োৎলিং লৌথোক্লমদাইদা মখোয়না ইমাগী মখুৎশিং ককথৎখি। ইমাবু শরুক অহুম থোকহনখি। মীওইশিং অসিনা করি মতিক লৈদনা অসিগুম্বা ৱাফম পুথোক্লিবনো।

ইকাই কুম্নরবা স্পীকর,

মীওইশিং অসিনা লৈবাক্কীদমক থৱায় থানবা অথোইবা মীওই কয়াদা ইথিল পীখিবা, ভারতকীকাচিন কোয়া খুদিংমক্তা ৱাখল তাহন্নবা খোঞ্জেল ওইরিবা ভন্দে মাতরমগী ঈশৈ ফাওবা থুগাইখি। এপীজমেন্তগী পোলিতিক্সনস মরম ওইরগা মখোয়না মা ভারতীবু মচেৎ মচেৎ তানা থুগাইবা খক্তা নত্তনা ভন্দে মাতরমগী ঈশৈসু মচেৎ-মচেৎ তাহনখি। ‘ভারত তেরে তুকরে হোঙ্গে’ লাউখিবা মীওইশিং অদু মখোয়নি। মখোয়না খোলাও অসি লাউখিবা মীওইবু থৌগৎখি। মখোয়না ‘ভারত তেরে তুকরে হোঙ্গে’গুম্বা খোলাও অসি থৌগৎলি। অৱাং নোংপোক্কা শেম্নহল্লিবা সিলিগুরিগী মনাক্তা লৈরিবা অপীকপা কোরিদোর অসি ককথৎপা তারবদি অৱাং নোংপোক অসি তোখাই তাগনি হায়না ফোঙদোকখিবা মীওইশিংবু মখোয়না শৌগৎলি। অসিগুম্বা মীওইশিং শৌগৎপসু মখোয়নি।

ইকাই কুম্নরবা স্পীকর,

হৌগৎতুনা থোকখ্রিবা মীওইশিং অসিদা মখোয়দা কছছাথিবু করিনো হংবীয়ু? কনাগুম্বা অমনা মখো্যদা কছছথিবু করিনো হংবীয়ু? মখোয়না কয়া অমা খুমলক্কনি অদুবু ঙসি ঐহাক্না মখোয়দা কছছথিবু করিনো অমসুং মসি কদাইদগী লাকপগে তাকচগে? মখোয়দা হংঙু, মখোয়না অসিগুম্বা ৱাফমশিং ইদুনা লৈবাক অসিবু লান্না লমজিংলি। অমসুং DMKগী মীওইশিং, মখোয়গী সরকার, মখোয়গী মুখ্য মন্ত্রীনা ঐঙোন্দা চেরোল থারকখি। মখোয়না হৌজিকসু ইরি অমসুং হায়, মোদীজী কছছথিবু অমুক হন্না পুবীরকউ। কছছথিবু অসি করিনো? কনানা করি তৌখি? তামিল নাদুদগী হেন্দোক্তুনা অমসুং শ্রী লঙ্কাগী হেক মমাংদা কনাগুম্বা অমনা অতোপ্পা লৈবাক্তা ঈথৎ অমা পীথোকখি। করম্বা মতমদা পীথোকখি? কদাইদা পীথোকখি? মসি ইমা ভারতকী শরুক নত্তব্রা? মসি কাইদোকপদা কনানা মতম অদুদা পাল্লমখি? মসি শ্রী ইন্দিরা গান্ধীগী মতমদা থোকখিবনি। কংগ্রেসকী পুৱারী অসি ইমা ভারতপু থুগাইবগী মতাংদা ঙাক্তনি।

ইকাই কুম্নরবা স্পীকর,

কংগ্রেসনা ইমা ভারতীবু করম্না নুংশিরিবা? ভারতকী মীয়ামগীদমক করম্না মীনুংশি পোকপগে? হাউস অসিগী মমাংদা ঐহাক্না ৱাফম অমা থমজগে। মখোয়না অৱাবা অসি খঙলোই। ঐহাক্না অৱাং-নোংপোক্তা কোইনা চৎখি অমসুং পোলিতিক্স য়াওদ্রিঙৈদা মফম অদুদা চৎখি। মফম অদুগা ঐহাক্কা অনকপা মরী অমা লৈনৈ। মখোয়না মসিগী মরমদা খঙদে।

ইকাই কুম্নরবা স্পীকর,

হাউস অসিদা অদোমগী মাংদা ৱাফম অহুম থমজগে। ইরৈবাকচাশিংনা তারিবা অসিদা ঐহাক্না চাউথোক্না হায়জগে। অহানবা থৌরোক অসি মার্চ 5, 1966দা থোকখি – নুমিৎ অসিদা কংগ্রেসনা মাগী এয়র ফোর্সকী খুত্থাংদা মিজোরামদা লৈরিবা করিসু ঙমজদ্রবা মীচমশিংদা লানদাখি। অমসুং মসিদা অচৌবা কন্ত্রোভর্সী অমা থোকখি। কংগ্রেসনা পাউখুম পীগদবনি মদু অতোপ্পা লৈবাক্কী এয়র ফোর্সনা চত্থখিব্রা। মিজোরামগী মীয়াম অসি ঐগী লৈবাক্কী প্রজা নত্তব্রা? মখোয়বু ঙাক শেনবা অসি ভারত সরকারগী থৌদাং নত্তব্রা? মার্চ 5, 1966 – এয়র ফোর্সকী এতেক; মীচম মীয়ামদা লানদাবা।

অমসুং ইকাই কুম্নরবা স্পীকর,

হৌজিকসু মার্চ 5 অসি মিজোরাম পুম্বনা তেংথারি। মিজোরামনা অৱাবা অদু কাওবা লৈতে। মীওইশিং অসিনা মিজোরামগী অশোকপা অদু ফহন্নবা হোৎনখিদে। মখোয়গীদমক মীওইশিং অসিনা অৱাবা নুংঙাইতবা পোকখিদে। অমসুং কংগ্রেসনা অচুম্বা অসি লৈবাক পুম্বদগী লোৎশিন্দুনা  থমখি। ঐখোয়গী ইশাগী এয়র ফোর্সনা প্রজাদা লানদাবা অসি চুমব্রা? মতম অদুদা কনানা পাল্লি – ইন্দিরা গান্ধী। অকাল তখৎতা লানদাখি। মসি ঙসি ঐখোয়না কাওদ্রি। মখোয়না মিজোরামদগী মসিগী হৈনবী অসি তমলকখি। অমসুং মরম অসিনা ঐহাক্কী ইশাগী লৈবাক্তা অকাল তখৎতা মখোয়না লানদাখি অদুগা হৌজিক্না মখোয়না ঐখোয়দা তাক্লি।

ইকাই কুম্নরবা স্পীকর,

অৱাং নোংপোক্তা মখোয়না মীয়ামগী থাজবা মাংহনখি। অশোকপা অসি অমা নত্ত্রগা অমদা অদুমক থোরকই। মসিগী মরম অসি ঐখোয় ইশানা তৌরুবা অদুননি।

ইকাই কুম্নরবা স্পীকর,

ঐহাক্না অতোপ্পা থৌদোক অমগা পনজগে মদুদি অৱাং নোংপোক্কী মীয়ামদা 1962দা তৌখিবা তমথিরবা রেদিও ব্রোদকাস্ত অদুনি, মসি ঙসিসু খোন্থাং য়ৈরি। চীনানা লৈবাক অসিদা লানদারকপা মতমদা লৈবাক্কী কাচিন কোয়া খুদিংদা লৈরিবা মীওইশিংনা ভারতনা মখোয়বু ঙাকশেনবীগনি খনখি, মতেং পীগনি খনখি; মখোয়গী পুন্সি অমদি লনথুমশিং কনগনি, লৈবাক অসিবু কনগনি খনখি। মীয়াম্না মখোয় মশানা লান্থেংনবা তাখি অদুবু লুরবা মতম অদুদা দিল্লীদা লৈঙাক্লিবা পন্দিৎ নেহরুনা রেদিওদা করি হায়খি? মতম অদুগী লুচিংবা মহাক খক্তনি। অদুবু মহাক্না হায়খি, “অসামগী মীয়ামগী অৱাবদা শরুক য়াজরি”। মতম অদুদা ওইরমখিবা ফীভম অসি মসিনি। ব্রোদকাস্ত অদুনা ঙসি ফাওবা অসাম মীয়ামগী থমোয়দা চৈনা পীখি। নেহরুজীনা মখোয় মশা মথন্তা ঙাকচনবা করম্না থাদোকখিবনো? ঙসি ঐখোয়না পাউখুম পাম্মি।

ইকাই কুম্নরবা স্পীকর,

লোহিয়ায়িস্তনা থাদোকখ্রে অদুবু ঐহাক্না মখোয়দা করিগুম্বা অমা হাজনীংই। লোহিয়াজীগী চাদা নৌদানি হায়না হায়জরিবা মীওইশিং অসিনা, ঙরাং হাউস্তা মখৌ পোঙনা ঙাংখি, খুদুম থাংগৎতুনা ঙাংখি। লোহিয়াজীনা নেহরুজীদা অচৌবা মরান অমা শিরমখি। অমসুং লোহিয়াজীগী ৱাহৈশিং অদু মসিনি – মসি কয়াদা লাইথোক্লিবনো অমসুং মসি কয়াম শাথিবগে! স্ক্বার মাইল 30,000 হেন্না চাউবা মফম অসি কোল্দ স্তোরেজতা হাপচিনখি অমসুং চাউখৎপা অমত্তা ফংহনখিদে। লোহিয়াজীনা নেহরুজীদা মরাল শীখি – ‘অৱাং নোংপোক্তা নহাক্না খল্লিবা অসি করিনো? অৱাং নোংপোক্কী মীয়ামগী থমোয় অমসুং ইহুল খঙনবা নহাক্না হোৎনখিদে লৈতে’। ঐহাক্কী মন্ত্রী 400না স্তেৎ হেদক্বাতরশিংদা অহিং য়ারেকপা খক্তা নত্তনা দিস্ত্রিক্ত হেদক্বাতরশিংদসু লৈখি।

অমসুং ঐহাক্না 50 চৎখি। মসি মশিং খক্তা নত্তে মসিনা ঐখোয়না কত্থোকপা অদু তাক্লি। মসিনি অৱাং নোংপোক্তা ঐখোয়না কত্থোকপা অসি।

ইকাই কুম্নরবা স্পীকর,

অমসুং কংগ্রেসকী থবক খুদিংমক রাজনিতী, মীখল অমসুং সরকারগীদমক খল্লি। মখোয়না সীৎ হেন্না ফংবা মফমশিংদা মখোয়গী রাজনিতী তৌবদা হেন্না লাই অমসুং মখোয়না মফম অদুদা করিগুম্বা তৌনবা ফোর্স তৌখি। অদুবু অৱাং নোংপোক্তদি কমদৌবা? লৈবাক অসিনা তারি। অৱাং নোংপোক্তা মখোয়গী সীৎ য়াম্না লৈতে, মখোয়না লমদম অসি মখোয়গীনি খনদে। মখোয়দা মীৎয়েং চংবীদে। লৈবাক্কী প্রজাশিংগীদমক মখোয়দা মীনুংশি পোক্তে।

ইকাই কুম্নরবা স্পীকর,

মরম অসিনা মখোয়না সীৎ য়াম্না লৈতবা লমদমশিংদা অতোনবগী মচাগুম্না লোইনবীরি। মসি কংগ্রেসকী DNAদা য়াওরবনি। মমাংগী চহি কয়াগী পুৱারীদা য়েংবীয়ু। মখোয়না অৱাং নোংপোক্তা অসুম্না তৌদুনা লাকখি; অদুবু য়েংবীয়ু ঐহাক্না হৌখিবা চহি 9 অসিদা পাইখৎখিবশিংনা ঐহাক্না থৌনা লৈনা হায়জরি অৱাং নোংপোক অসি ঐখোয়গী খ্বাইদগী নুংশিরবা শরুকনি। ঙসি মনিপুরগী সমস্যাশিং অসি ঙসি খক্তা ওইরকপা ফীভম ওইনা উহল্লি। ঙরাং অমিত ভাইনা সমস্যা অসি করিনো অমসুং করম্না থোকখিবনো নীংথিনা হায়খ্রে। অদুবু ঙসি ঐহাক্না য়াম্না শেংনা হায়জগে মদুদি  অৱাং নোংপোক্তা থোক্লিবা সমস্যাশিং অসিগী হৌরকফম কংগ্রেসনি। অৱাং নোংপোক্কী মীয়ামদা দাইনবা য়ারোই মসি কংগ্রেসকী রাজনিতীনা থোকহনবনি।

ইকাই কুম্নরবা স্পীকর,

মনিপুর অসি ভারতকী কলচরদা মরা চেৎনা লৈখ্রবনি; মনিপুর অসি কত্থোকপগী ফজরবা হেরিতেজ লৈজৈ; মনিপুরদা নীংতম ইহৌ অমদি আজাদ হিন্দ ফোজকী লেগেসী লৈ; মনিপুরনা মশীং লাকঙমদনা কত্থোকখি। ঐখোয়গী অসিগুম্বা লমদম অসি কংগ্রেস লৈঙাক্কী মতমদা সেপরেতিজমগী মৈনুংদা লংশিনখি। পুম্নমক অসিগী মরম করিনো?

ইকাই কুম্নরবা স্পীকর,

ঐহাক্না নখোয়দা নীংশিজনীংই, অৱাং নোংপোক্না পুম্নমক খঙই। মনিপুরদা মতম অমদা এক্ত্রিমিস্ত ওর্গনাইজেসনশিংগী অনীংবা অপাম্বগী মতুং ইন্না সিস্তেম খুদিংমক চল্লাইরমখি। মখোয়গী অপাম্বগী মতুং ইন্না পুম্নমক পাঙথোকলমখি অমসুং মতম অদুদা মনিপুরদা কনানা সরকার পাইবগে? কংগ্রেস! সরকারগী লোইশঙশিংদা মহাত্মা গান্ধীগী ফোতো থেৎহনখিদবা অদু কনাগী সরকারগী মতমদনো? কংগ্রেস। মোইরাংদা লৈবা আজাদ হিন্দ ফোজতা নেতাজী সুভাশ চন্দ্র বোসকী মীতমদা বোম্ব লংশিনখিবা মতমদা মনিপুরদা কনানা সরকার পাইবগে? কংগ্রেস।

ইকাই কুম্নরবা স্পীকর,

মনিপুরদা লৈবা স্কুলশিংদা নেস্নেল এন্থেম শকপা থীংনবা ৱারেপ লৌখিবা মতমদা মনিপুরদা কনাগী সরকার লৈখিবগে? কংগ্রেস। লাইব্রেরীদা লৈবা লাইরিকশিং, মমল য়াম্লবা লৌশিং অমসুং হেরিতেজ পুম্নমক মৈ থাদোকপগী কেম্পেন চত্থখিবা মতমদা মনিপুরদা করম্বা সরকার লৈখি? কংগ্রেস। মনিপুরগী মন্দিরগী খাংসি নুংথিল পুং 4দা লেপহনখিবা, পুম্নমক লোকদাউন তৌখিবা অমসুং লাই খুরুম্বা ফাওবা অৱাবা ওইখিবা, আর্মীনা শঙদুনা লৈইবা মতমদা মনিপুরদা করম্বা সরকার লৈখি? কংগ্রেস।

ইকাই কুম্নরবা স্পীকর,

ইম্ফালদা লৈবা ISKON মন্দিরদা বোম্ব পোখাইহন্দুনা ভক্তাশিং হাৎখিবা মতমদা মনিপুরদা করম্বা সরকার লৈখি? কংগ্রেস। IAS, IPS ওফিসরশিংনা মফম অদুদা থবক তৌবা পাম্লবদি মখোয়গী তোলোপকী শরুক অমা এক্সত্রিমিস্তশিংদা পীবা তারমখি। মদুতদা মখোয়না শান্তি লৈবা ঙম্মি, মদু করম্বা সরকারগী মতমদনো? কংগ্রেস।

ইকাই কুম্নরবা স্পীকর,

মখোয়গী অৱাবা অসি সেলেক্তিব ওই, মখোয়গী সেন্সিতিবিতী অসি সেলেক্তিব ওই। মখোয়গী স্কোপ অসি রাকনিতীদগী হৌই অমসুং রাজনিতীগা লোয়ননা মখা চত্থৈ। মখোয়না হ্যুমেনিতীগীদমক খন্দে, অমদি লৈবাক্কীদমক্তসু খনবা তৌদে। মখোয়না লৈবাক্কী সমস্যাশিংগী মরমদা খন্দে। মখোয়না রাজনিতী নত্তনা করিগুম্বা অমত্তা খঙদে।

ইকাই কুম্নরবা স্পীকর,

মনিপুরদা হৌজিক অমসুং হৌখিবা চহি তরুক অসিদা লৈরকখিবা সরকারনা লেপ্পা লৈতনা সমস্যাশিং অসিগী ৱারোইশিন অমা পুরক্নবা কত্থোকপগী ৱাখল্লোনগা লোয়ননা হোৎন্দুনা লাক্লি। কনাগুম্বা অমত্তনা বন্ধ অমসুং ব্লোকেদকী মতম অদু কাওবা লৈরোই। ঙসি মসি হৌখিবা মতমগী থৌদোক অমা ওইরে। শান্তি পুরক্নবা মীপুম খুদিংমক্কা লোয়ননা থাজবা লৈহন্নবা খোঙথাংশিং লৌখৎলি অমসুং তুংলমচৎতসু লৌখৎখিগনি। অমসুং ঐখোয়না রাজনিতীবু লাপ্না থম্লবদি শান্তি থুনা পুরকপা ঙমগনি। ৱাফম অসি ঐহাক্না ইরৈবাকচাশিংদা থাজবা পীজনীংই।

ইকাই কুম্নরবা স্পীকর,

অৱাং নোংপোক অসি ঙসি ঐখোয়না লাপ্পাগুম্না খল্লি অদুবু সাউথ ইস্ত এসিয়াদা খুমাং চাউশিল্লি, ASEAN লৈবাকশিংগী মরু ওইবা হেনগৎলক্লিবা অসিদা য়েংলবদি নোংপোক থংবা অসি চাউখৎলকপগা লোয়ননা মালেমগী মীৎয়েংদা য়েংবদা অৱাং নোংপোক অসি সেন্তর পোইন্ত ওইরক্কদবা নুমিৎ অদু কুইদ্রে। অমসুং মসি ঐহাক্না ময়েক শেংনা উবা ফংলি। মরম অসিনা ঙসি ঐহাক্না ভোৎকীদমক খনদনা অৱাং নোংপোক্কী চাউখৎ থৌরাংগীদমক অঙম্বা হোৎনরি। সাউথ ইস্ত এসিয়া অমসুং  ASEANগী লৈবাকশিংদা মালেমগী অনৌবা স্ত্রকচরনা করম্না শাফু পীরক্কনি  অমসুং অৱাং নোংপোক্কী মরু ওইবা অসি করম্না হেনগৎলক্কনি অমদি অৱাং নোংপোক্কী মতিক ময়াই অমুক হন্না হেনগৎলক্কনি হায়বা ঐহাক্না নীংথিনা খঙই। মসি ওইথোকপা হৌরক্লিবা অসি ঐহাক্না উবা ফংই অমসুং মরম অসিনা ঐহাক্না থবক অসি পাইখৎপনি।

ইকাই খুম্নজরবা স্পীকর,

মরম অদুনা ঐখোয়গী সরকার অসিনা অৱাং নোংপোক্তা চাউখৎ থৌরাংগী খ্বাইদগী অহানবা মীৎয়েং থম্লিবনি। হৌখিবা চহি মাপল অসিদা ঐখোয়না অৱাং নোংপোক্তা ইনফ্রাস্ত্রকচর শেমগৎনবা লুপা করোর লাখ কয়া চাদিং তৌখ্রে। ঙসি মতমগা চুনরবা, হাইৱেশিং, মতমগা চুনরবা, রেলৱেজ, মতমগা চুনরবা অনৌবা এয়রপোর্তশিংনা অৱাং নোংপোক্কী মশক তাক্লি। ঙসিদি অহানবা ওইনা অগর্তলা অসি রেলৱে কন্নেক্ত তৌবা ঙমখ্রে। পোৎচৈ পুনবা ত্রেন মনিপুরদা অহানবা ওইনা থুংখ্রে। অহানবা ওইনা মতমগা চুনরবা বন্দে ভারত ত্রেন অসি অৱাং নোংপোক্তা মথৌ তৌবা হৌখ্রে। অহানবা ওইনা অরুনাচলদা গ্রীন ফিল্দ এয়রপোর্ত অমা শেমগৎলি। অহানবা ওইনা সিক্কিম অমসুং অরুনাচলগুম্বা রাজ্যশিংদা এয়র কন্নেক্তিবিতী লৈরে। অহানবা ওইনা অৱাং নোংপোক অসি ৱাতরৱেজকী খুত্থাংদা মালেমগী ললোন ইতিক্কী গেতৱে অমা ওইরে। অহানবা ওইনা অৱাং নোংপোক্তা AIIMS কুম্বা মেদিকেল ইন্সতিত্যুত অমা হাংদোকখ্রে। অহানবা ওইনা লৈবাক অসিগী স্পোর্ত য়ুনিভর্সিতী অমা মনিপুরদা হাংদোকখ্রে। অহানবা ওইনা মিজোরমদা ইন্দিয়ন ইন্সতিত্যুত ওফ মাস কম্ম্যুনিকেসনগুম্বা ইন্সতিত্যুত অমা হাংদোকখ্রে। অহানবা ওইনা অৱাং নোংপোক্তগী কেন্দ্রগী মন্ত্রী মন্দলদা শরুক য়াবগী মশিং চাউনা হেনগৎলক্লি। অহানবা ওইনা নগালেন্দদগী নুপী এম.পি. অমা রাজ্য সভাদা য়ৌরক্লি। অহানবা ওইনা অৱাং নোংপোক্কী য়ামলবা মীয়ামদা পদ্ম এৱার্দ পীখি। অহানবা ওইনা অৱাং নোংপোক্কী হীরো লাচিৎ বোফুকানগুম্বগী তেব্যু গনতন্ত্র দিৱসতা য়াওহনখি। অহানবা ওইনা মনিপুরদা রানি গাইদিংলুগী মীংদা ত্রাইবল ফ্রীদম ফাইতর ম্যুজিয়ম অমা শাখ্রে।

ইকাই খুম্নজরবা স্পীকর,

ঐখোয়না হায়রিবা সবকা সাথ, সবকা বিকাস অসি ঐখোয়গী ওইনা স্লোগান অমখক নত্তে, মসি ৱাহৈ খক্তা নত্তে। মসিগী ঐখোয়গী লাইবক্কী পোৎলম অমনি। ঐখোয়গী কত্থোকপা য়াওরি অমসুং ঐখোয় অসি লৈবাক্কীদমক্তা কত্থোক্লিবা মীওইশিংনি। ঐখোয়না করিগুম্বা মতমদা অসিগা মফম অসিদা লাকপা ফংবগী খুদোংচাবা ফংগনি হায়না নোংমতা খল্লুদে। অদুবু লৈবাক অসিগী মীয়ামগী থৌজালদগী ঙসিদি খুদোংচাবা অসি পীবীরে। মরম অদুনা ঐহাক্না লৈবাক অসিগী মীয়ামদা থাজবা থমজরি-

ঐখোয়গী ওইবা পোৎলমশিং অমসুং ঐখোয়গী মতমগী মীকুপ খুদিংমক লৈবাক মীয়ামগীদমক্তনি!

ইকাই খুম্নজরবা স্পীকর,

ঙসি ঐহাক্না ওপোজিসনগী ইচিল ইনাওশিংদা করিগুম্বা অমগী থাগৎপা ফোঙদোকচনীংই। অদুম ওইনমক মখোয়না হাউস অসিগী লুচিং অসিবু হাউ অসিগী লুচিংবনি হায়না লৌবা ঙমদে, মখোয়না ঐহাকপু ৱাফম অমত্তা থম্নবা তাঞ্জা পীদে, অদুবু ঐহাক্না খাংবা কল্লি, স্তেমিনা লৈ অমসুং ঐহাক্না করিগুম্বা খরা উশীন্নদবা ঙম্মি, মসিদা মখোয় অৱাবা পোকই। ঐহাক্না করিগুম্বা অমা থাগৎপা ফোঙদোকচরি। ঐহাক্না 2018দা 2023দা নো কনফিদেন্স মোসন পুখৎলক্নবা থবক অমা শিন্নখি অমসুং মখোয়না মদু পাংথোকখি। মখোয়না 2018 অমসুং 2023গী মরক্তা চহি 5 ফংখি, অদু করিগুম্বা অমত্তা শেম শাদুনা পুরকখিদে। ইনোবেসন অমত্তা লৈরমদে; ক্রিএতিবিতী অমত্তা লৈরমদে। মখোয়না ইসুশিং উবা ফংখিদে। মখোয়না লৈবাক অসিবু অদুক্কি মতিক নীংহন্নবা পোকহনখি। হোয় ফরে স্পীকরজী। ঐখোয়না মখোয়বু 2028 দা অতোপ্পা খুদোংচাবা অমগা পীরগনি। অদুবু হন্দক্কী মতাং অসিদা মখোয়না ঐখোয়গী সরকারগী মায়োক্তা 2028তা নো-কনফিদেন্স মোসন পুখৎলকপা মতমদা করিগুম্বা খরা শেম শাদুনা পুরক্নবা খংহনজরি। ইসু খরা হান্না থিদোকপীয়ু। নখোয়না কান্নদবা অমসুং চৎনদবা এজেন্দা করিগী পুখৎলক্লি? লৈবাক অসিনা নখোয়না ওপোজিসন ওইবগী মতক চারে হায়না করিগুম্বা খরদি থাজবা লৈরে। অদুবু মদুগী খুদোংচাবা অদুসু নখোয়না মাংহল্লে। ঐহাক্না নখোয়না হোমৱর্ক খরা তৌগনি হায়বা থাজৈ। নখোয়না নখোয়গী মরৈশিং, লাউ-খোংবা অমসুং স্লোগানশিং অদু পুখৎনবা মীওই কয়ামরুম ফংগনি অদুবু ৱাখল খরা থাদবীয়ু।

ইকাই খুম্নজরবা স্পীকর,

রাজনিতীগী ওইবা তোঙানবা মফম অমা লৈজৈ। পার্লিয়ামেন্ত অসি মদুগী প্লেতফোর্ম অমা নত্তে। পার্লিয়ামেন্ত অসি লৈবাক অসিগী খ্বাইদগী অৱাংবা থাক্তা ইকাই খুম্নরিবা ইন্সতিত্যুসন অমনি। অদুনা MPশিংনা মসিগী মরমদা মুন্না খংগদবনি। লৈবাক অসিনা রিসোর্স কয়ামরুমদা ইনবেস্ত তৌরি। লৈবাক অসিগী লাইরবশিংগী হক ওইরিবা রিসোর্সশিং অদু মফম অসিদা শিজিন্নরি। মমফম মীকুপ খুদিংমক লৈবাক অসিগী শিজিন্নগদবনি। অদুবু মসিগী ৱাখল্লোন অসি ওপোজিসন্দা উবা ফংদে। মরম অদু স্পীকরজী মসিগী রাজনিতী অসি অসুম্না মখা চত্থবা বারোই। মখোয়দা অহাংবা মতম খরা লৈরে অদুনা মখোয় পার্লিয়ামেন্ততা লাক্লে। অদুম্না পার্লিয়ামেন্ত অসি মথৌ তৌগদ্রা? মসি অচুম্বা নত্তে।

ইকাই খুম্নজরবা স্পীকর,

ঐখোয়গী অহাংবা মতমদা পার্লিবামেন্ততা চৎসি। মসিগী ৱাখল্লোন অসিদা ঐখোয়না রাজনিতী তৌগদবনি, অদুবু লৈবাক অসিদি চলাইবা য়ারোই। মসিদা ঐখোয়নদা লৈবাক অসিবু চলাইনবা থৌদাং অদু পীরি, মরম অদুনা করিগুম্বা মখোয়না মসিগী থৌদাং অসি পাংথোকপা ঙমদ্রবদি মখোয়না মখোয়গী ভোত্তরশিং অদুবু নমথাক তৌরি।

ইকাই খুম্নজরবা স্পীকর,

ঐহাক্না লৈবাক অসিগী মীয়ামদা চাউনা থাজবা থম্লি অমসুং স্পীকরজী ঐহাক্না থাজবা লোয়ননা লৈবাক অসিগী মীয়াম্না চাউনা থাজবা লৈরি হায়না থমজগে। মীনাই নাইথাংগী চহি লীশিং কয়াগী মতম অদুদা ফাওবা মখোয়না মথমোইদা থম্বা থাজবা অদু মাংহনখিদে। মসি থাজবা মাংদবা সমাজ অমনি। মসি ‘ৱারেপশিং থবক্তা ওনথোকপদা কত্থোকপা’ হায়বা চৎনবী অসি ইল্লিবা সমাজ অমনি। वयम् राष्ट्रांग भूता হায়বা মন্ত্র অসিবু ইন্দুনা লৈবাক অসিগীদমক থবক তৌরিবা সমাজ অমনি।

অদুনা ইকাই খুম্নজরবা স্পীকর,

মীনাই নাইথাংগী মতম ঐখোয়দা কবারক হন্না লান্দারকখি, ঐখোয়না অৱাবা কয়া নংখি, অদুবু লৈবাক অসিগী অথৌবশিংনা, লৈবাক অসিগী ফীদমনীংঙাই ওইরবা মীওইশিংনা, লৈবাক অসিগী ৱাখল্লন লৈবাক মীওইশিংনা, লৈবাক অসিগী প্রজা মীয়াম্না মদুগী থাজবগী মৈরি অদুদি কৈদৌনুংদা মুত্থৎখিদে। মদুগী মৈরি অদু মূত্থৎখিদবনা মসিগী মৈরি অদুগী মরুমদা ঐখোয়না ঙসি অৱাবা কোক্লিবনি। 

ইকাই খুম্নজরবা স্পীকর,

হৌখিবা চহি মাপন অসিদা লৈবাক অসিগী মীচম মীয়ামগী থাজবা অসি অনৌবা পনখৈশিং ফংবা ঙমখ্রে অমসুং অনৌবা ইহূলশিং ফংবা ঙমখ্রে। ঐহাক্কী লৈবাক অসিগী নহারোলশিংনা মালেমগা লম্বা তৌনবগী মংলানশিং মংবা হৌরে। মসিদগী হেন্না লাইবক ফবা অমা লৈরমখিগদ্রা? ভারতমচা খুদিংমক চেৎনা থাজবা থম্লি।

ইকাই খুম্নজরবা স্পীকর,

ঙসিদি ভারত অসি অৱাফমদা তাদ্রে অদুগা অৱাবসু লাক্ত্রে। ঙসিদি ভারতনা কনাগুম্বা অমগী মখোঙদা চংজদ্রে; ঙসিদি ভারতনা চোকথবা লৈত্রে; ঙসিদি ভারতনা লেপ্পা লৈত্রে। ঐখোয়গী চাউখৎলবা হেরিতেজ অমসুং থাজবা ৱারেপশিং অসিনা মরম ওইরগা লৈবাক অসিগী মীচমশিংনা লৈবাক অসিদা থাজবা থম্লি, মসিনা মরম ওইরগা মালেম অসিনা ভারত্তা থাজবা থম্লি। ঙসি মালেম অসিনা ভারত্তা থাজবা থম্লিবা অসিগী মরম অমদি ভারতকী মীয়াম্না মখোয় মশানা মশাবু থাজবা থম্বা হেগৎলকপদগিনি। মসি শক্তিনি, মসিগী থাজবা অসি মাংহন্নবা হোৎনবীগনু। মসি লৈবাক অসিবু মাংলোমদা পুখৎনবা খুদোংচাবা অমনি। করিগুম্বা নখোয়না মসিবু খংবা ঙমদ্রগদি, তুমিন্না লৈবীয়ু। মতম খরা ঙাইবীয়ু, নমথাক তৌদুনা লৈবাক অসিবু থুগাইনবা শিনবীগনু।

ইকাই খুম্নজরবা স্পীকর,

হৌখিবা চহিশিংদা ঐখোয়না চাউখৎপা ভারত অমগী অচেৎপা য়ুম্ফম থোনবদা মাই পাকখ্রে অমসুং লৈবাক অসিনা 2047দা নীতম্বগী 100শুবা পালন তৌনবা মংলান মংলি। নীংতম্বগী চহি 75 মপুং ফাখিবগা ‘অমৃতকাল’ হৌখ্রে। অদুগা ঐখোয় ‘অমৃতকাল’গী অহৌবা চহিদা লৈরি। ঐখোয়না ঙসি অকনবা য়ুম্ফম অমগা লোয়ননা চৎলিবা অসি 2047দা চাউখৎপা ভারত অমা ওইনবা য়ুম্ফম অদুনি হায়না ঐহাক্না থাজবা থম্লি। অদু মসি লৈবাক অসিগী মীয়াম্না হোৎনবা কনবা, লৈবাক অসিগী মীয়াম্না থাজবা থম্বা, লৈবাক অসিগী মীয়াম্না কত্থোকপা, লৈবাক অসিগী মীয়ামগী অপুনবা শক্তি, অমসুং লৈবাক অসিগী মীয়ামগী শীংথানীংঙাই ওইরবা থৌদাং অদুনা ওইথোকপা ঙমহনগনি। মসিনি ঐহাক্না থাজবা থমজবদি।

ইকাই খুম্নজরবা স্পীকর,

মসিদা ফোঙদোক্লিবা ৱাফমশিং অসি রেকোর্দ তৌগদৌরিবনি, অদুবু পুৱারীনা ঐখোয়না পাংথোকখিবা থবকশিং অদুগী শাখি ওইহৌগদৌরিবনি, মসিগী থবকশিং অসিনা নুংঙাই য়াইফবা ভারত অমগী মংলান অদু মংফাওনহনবদা অচেৎপা য়ুম্ফম থোনগদৌরিবনি। ইকাই খুম্নজরবা স্পীকর মসিগী থাজবা অসিগা লোয়ননা ঙসি ঐহাক্না হাউসকী মমাং অসিদা করিগুম্বা খরা শেংদোকচগে হায়না লাকচবনি অমসুং ইশানা ইশাবু কন্ত্রোল তৌজদুনা, মখোয়গী করেম কথাইনবদা অমগা অমগা নোংচদুনা, ঐহাক্কী ৱাখল অসি ফাথদুনা, ঐহাক্না লৈয়াক অসিগী মীওই করোর 140 গী মাংলান মংফাওননবা পুক্নীং থৌগৎচরি, মসিগী ৱারেপ খুদিংমক মীৎমাং অসিদা থমজরি। মসিনি ঐহাক্কী ৱাখল্লোন্দা লৈজরিবা। ঐহাক্না হাউস অসিদা লৈরিবা মেম্বর খুদিংমক্তা মীকল অসিবু খংনবা অমসুং পুন্না চৎমিন্ননবা আপীল তৌজরি। লৈবাক অসিদা মমাংদা মনিপুরনা অৱাবা কয়ামরুম নংখ্রে, অদুবু ঐখোয় পুম্নমক্না মসিগী সোলুসনশিং পুথোকখি। মরম অদুনা ঐখোয় পুন্না চৎমিন্নসি, ঐখোয়না মনিপুরগী মীয়ামদা থাজবা থমদুনা মাংলোমদা চংশিনসি। রাজনিতী তৌদুনা মনিপুরগী থদাং অদুদি খংদবা তৌবীগনু। মফম অদুদা থোক্লিবা খুদিংমক লাইবক থীবনি। অদুবু ঐখোয়গী সোলুসনশিং অদুনা মখোয়গী অৱাবা অদু খংগদবনি অমসুং মদুগী অৱাবা অদু কোক্নবা হোৎনগদবনি। 

ইকাই খুম্নজরবা স্পীকর,

হায়রিবা হীরম অসিদা ঐখোয়না য়াম্না খন্নখ্রে। পুং অমগা মখাই অসিদা সরকারনা লৌখৎলিবা থবকশিং অসিগী মরমদা অমমমতা ওইনা থম্নবা ঐখোয়দা খুদোংচাবা অমা ফংখ্রে। অদুগা করিগুম্বা মসিগী মোসন অসি লাকলমদ্রবদি ঐখোয়না ফোঙদোকনীংবা ময়াম অসি ফোঙদোকপা ঙমলমদবসু য়াই, অদুগা ঐহাক্না মসিগী মোসন অসি থাংগৎপীরিবা ময়ামবু অমুক্কা হন্না ইকাই খুম্নবা উৎচরি, অদুবু মসিগী মোসন অসি লৈবাক অসিবু মীনম্বগী মোসননি, মসি লৈবাক অসিগী মীয়াম্না রিজেক্ত তৌগদবনি। মসিগা লোয়ননা ঐহাক্না ইকাই খুমনজরবা স্পীকরবু থমোই শেংনা থাগৎপা ফোঙদোকচরি, হন্না হন্না থাগৎচরি।

****