ভারতকী প্রধানমন্ত্রী

এসিয়ান ইনফ্রাস্ত্রকচর ইনভেসমেন্ত বেঙ্কগী রাষ্ট্রপতি

দাইস্তা লেংশিনবীরিবা অতৈ শক্নাইরবশিং

ভারত অমসুং মপান লৈবাক্কী শক্নাইরবা দেলিগেৎশিং

ইবুংঙো অমসুং ইবেম্মশিং

মুম্বাইদা পাংথোক্লিবা এসিয়ান ইনফ্রাস্ত্রকচর ইনভেসমেন্ত বেঙ্কগী অহুমশুবা চহীগী মীফম অসিদা শরুক য়াবা অসিদা ঐ হরাওবা পোকচরি। বেঙ্ক অমসুং মসিগী মেম্বরশিংগা ঐখোয়গা অচেৎপা মরি লৈননবা খুদোংচাবা ফংবা অসিদা ঐখোয় হরাওজৈ।

২০১৬তগী এ.আই.আই.বি.গী শেল–থুমগী থবক হৌখি। চহী অহুম য়ৌদ্রিঙৈদা বেঙ্ক অসিগী থবক ফজনা পাংথোক্লে। য়ু.এস. দোল্লর বিলিয়ন ১০০গী কেপিতেল স্তোক লৈরে। বেঙ্ক অসিনা এসিয়াদা মরুওইবা থৌদাং লৌনবা শেম শারি।

মরূপশিং,

ঐখোয়গী মীয়ামদা অফবা তুংলমচৎ অমা ফংহন্নবা পান্দমদা এসিয়াগী লৈবাকশিংগী অপুনবা থবক্কী মহৈ ওইনা এসিয়ান ইনফ্রাস্ত্রকচর ইনভেসমেন্ত বেঙ্ক অসি ওইরকখিবনি। চাউখৎলক্লিবা লৈবাক অমা ওইনা ঐখোয়না মান্নবা খুদোংচাদবশিং থেংনরি। অৱাবশিংগী মনুংদা অমদি শেমগৎ–শাগৎনবা শেল থিবা অসিনি। চহী অসিগী মীফমগী পান্দম ‘ইনফ্রাস্ত্রকচর, ইন্নোবেসন অমসুং কোলাবোরেসনগী শেন্থং  থিবা ‘হায়বা পান্দম অসিদা ঐ হরাওই। এ.আই.আই.বি.না তুংকোইনা চৎনগদবা শেমগৎ–শাগৎপগী থবক্ত শেল থাদবনা মীওই বিলিয়ন কয়াগী পুন্সিদা কান্নবা ফংহল্লগনি।

লাইরিক তম্বদা, হকশেলদা, শেল–থুমদা অমসুং থবক পীবদা এসিয়ানা হৌজিক অৱাবা কয়া মায়োক্নরি।

এ.আই.আই.বি.গুম্বা ইন্সতিতুৎশিংগী অচৌবা থৌদাং লৌদুনা লমদম অসিগী খুদোংচাদবশিং কোকহন্নবা মতিং লৌবা য়াই।

ইনর্জী, পৱার, চৎথোক–চৎশিন, তেলিকোম, রুরেল ইনফ্রাস্ত্রকচর, লৌউ–শিংউ, ঈশিং পীবা, লু–নানবা, মহৌশাগী ফিবম ঙাকশেনবা, শহর চাউখৎহনবা অমসুং পোৎ–চৈ পুথোক পুশিনগী সেক্তরশিং অসি মতম শাংনা শেল থাদবা মথৌ তাই। হায়রিবা শেলফমশিং অসিগী শেন্দোয় অসি অপীকপা ওইগদবনি।

শম্না হায়রবদা, এ.আই.আই.বি.না লৈবাক ১২ হেনবদা য়ু.এস. দোল্লর বিলিয়ন ৪গী প্রোজেক্ত ২৫ অয়াবা পীখ্রে। মসি অফবা খোঙহৌ অমনি।

দোল্লর বিলিয়ন ১০০গী কেপিতেলগী থাজবা পীদুনা অমসুং মেম্বর লৈবাকশিংগী শেমগৎকদবা য়াম্না লৈদুনা, এ.আই.আই.বি.না দোল্লর বিলিয়ন ৪ শেন্থং পীরিবা অসি ২০২০ ফাওবদা দোল্লর বিলিয়ন ৪০ অমসুং ২০২৫ ফাওবদা দোল্লর বিলিয়ন ১০০ পীনবা মসিগী খুদোংচাবা ঐনা লৌরি।

মসি অরাইবা থৌওং অমসুং য়াম্না থুনা অয়াবা পীবা দরকার ওই। মসিদা অফবা মখলগী প্রোজেক্তশিং অমসুং অচৌবা প্রোজেক্তশিং দরকার ওই।

খুদিংমক কোনশিনগদবা অমসুং তুংকোইনা চৎনগদবা শেল–থুমগী চাউখৎনবা পুরক্নবা ভারত অমসুং এ.আই.আই.বি.না থবক তৌগনি হায়না ঐনা থাজবা থম্লি। ভারত্তা, ঐখোয়না পব্লিক প্রাইবেৎ পার্তনরসিপ নমুনাশিং, ইনফ্রাস্ত্রকচর দেব্ত ফন্দশিং অমসুং ইনফ্রাস্ত্রকচর ইনভেসমেন্ত ত্রস্তশিং ইনফ্রাস্ত্রকচরগী শেন্থং পীনবা চৎনরি। ভারতনা ইনফ্রাস্ত্রকচর ইনভেসমেন্তগী তোখায়বা ফন্দ অমা শেমগৎনবা হোৎনরি। হায়রিবা এসেৎশিং অদু লম লৌশিনবা,  ইনভাইরনমেন্ত অমসুং উমংগী অয়াবা পীবগী তাঙ্ককতা লৈরিবনা খুদোংথিনীংঙাই ওইদ্রে। মরম অদুনা হায়রিবা এসেৎশিং অসিদা পেন্সন, ইন্সুরেন্স অমসুং সোভরেন্ত ৱেল্থ ফন্দশিংদগী ইন্সতিত্যুস্নেল ইনভেসমেন্ত লাক্লবা য়ারি।

অতোপ্পা থৌরাং অমনা, নেস্নেল ইনভেসমেন্ত এন্দ ইনফ্রাস্ত্রকচর ফন্দ অসিনি। মসিনা লৈবাক মনুং অমসুং মপান লৈবাকশিংদগী লাকপা শেলফমশিং ইনফ্রাস্ত্রকচরদা থাদনবা পান্দম থম্লি। মসিগী ফন্দ অসিদা এ.আই.আই.বি.না য়ু.এস. দোল্লর মিলিয়ন ২০০ থাদনবা থাজবা পীরি।

মরূপশিং,

ভারত অসি মালেমদা শেল থাদবশিংনা খ্বাইদগী নুংঙাইবা লৈবাক অমনি। শেল থাদবশিংনা গ্রোথ অমসুং অচেৎপা শেল–থুমগী ফিবম য়েংলি। মখোয়না থাদখিবা শেলফমশিং অদু ঙাকশেন্নবা মখোয়না রাজনীতিগী তংদু লৈতাবা অমসুং কান্নবা কাংলোন পাম্লি। শেল থাদনবা ইনভেস্তরশিং অসি কৈথেলগী পাক-চাউবা, হৈশিংবা শিন্মী মরাং কাইনা ফংবা অমসুং অফবা ইনফ্রাস্ত্রকচরদা পুক্নীং চিংশিল্লি। হায়রিবা হিরমশিং অসি য়েংবদা ভারত অসি ফিবম য়াম্না ফরে। ঐখোয়গী থবকশিং অমসুং মাইপাকপা খরা ঐ ৱারী লিজগে।

মালেমগী ওইনা চাউখৎলক্তুনা মালেমগী ইকনোমীদা ভারতনা অচৌবা ফিদা অমা কনবা ঙম্লে। য়ু.এস. দোল্লর ত্রিলিয়ন ২.৮ য়ৌদুনা মালেমদা ৭শুবা ইকনোমীদা লৈরি। লৈবাক অসি পর্চেশিং পৱার পেরিতীগী তার্মদা য়েংনবদা অহুমশুবদা লৈরি। ২০১৭কী মরিশুবা ক্বাতরদা চাদা ৭.৭ হেনগৎখি। ২০১৮দা চাদা ৭.৪ হেনগৎকনি হায়না পানরি।

মমল লেংদনা থমদুনা, মপানগী সেক্তরশিং ফগৎতুনা অমসুং শেল পুথবা লাকশিনদুনা ঐখোয়গী মেক্রো ইকনোমী অসি মপাঙ্গল কন্না লৈরি। থাউগী মমল হেনগৎলবসু মমল হেনগৎপা অসি ময়াই ওইরপ লৈরি। শেল-থুমগী অচেৎপা ফিবম শেমগৎনবা সরকারনা কন্না হোৎনরি। জি.দি.পি.গী চাদা য়েংনবদা সরকারদা তোল্লিবা শেলফম অসি হন্থরক্লি। য়াম্না শাংনা ঙাইরবা মতুংদা ভারতকী রেত্তিং অসি ফগৎলকলে।

য়ু.এস. দোল্লর বিলিয়ন ৪০০ হেনবা ঐখোয়গী ফোরেন একচেঞ্জ রিজার্ব অসিনা ঐখোয়গী ঙাক্লৌ ওইরি। ভারতকী শেল-থুমদা মালেম্না থাজবা হেনগৎলক্লি। অপুনবা এফ.দি.আই. চংলকপা হেনগৎলক্লে – হৌখিবা চহী ৪দা য়ু.এস. দোল্লর বিলিয়ন ২২২ হেন্না এফ.দি.আই. লাকখি। য়ু.এন.সি.তি.এ.দি.গী ৱার্ল্দ ইনভেসমেন্ত রিপোর্তগী মতুংইন্না, মালেমগী ওইনা ভারত অসি এফ.দি.আই. ফংবা লৈবাকশিংগী মকোক্ত লৈরি।

মরূপশিং,

মপান লৈবাক্কী শেল থাদবা অমগী মীৎয়েংদা, ভারত অসি খ্বাইদগী খুদোংথিনীংঙাই লৈতবা পোলিতিকেল ইকনোমী অমা লৈরি। শেল থাদবা হেনগৎলক্নবা সরকারনা থৌরাং কয়া পায়খৎলে। ললোন-ইতিক তৌবা লাইনবা ঐখোয়না কাংলোন কয়া লাইথোকহল্লে অমসুং চাউনা শেমদোকলে। শেল থাদরক্লিবশিংদা ঐখোয়না মতিক চাবা, অরোনবা লৈতবা, শোইদবা অমসুং তম্বা ঙম্বা ফিবম অমা ফংহল্লে।

এফ.দি.আই. অসি ঐখোয়না মনিং তমহল্লে। ঙসিদি সেক্তর অয়াম্বা মশা মথন্থা অয়াবা পীজবা লম্বী লৈজরে।

গুদস এন্দ সর্বিসেস তেক্স অসি ঐখোয়গী লৈবাক্না পায়খৎখিবা শিংথানীংঙাই ওইবা তেক্সগী অওনবা অমনি। মসি লৈবাক অমা–তেক্স অমা হায়বা পান্দম অদুদা পায়খৎপনি। মসিনা তেক্স থিদবা হন্থহল্লে, অরোনবা লৈহন্দ্রে অমসুং চৎথোক–চৎশিনদা লাইহল্লে। পুম্নমক অসিগী মথক্তা, মসিনা শেল থাদবশিংনা ভারত্তা ললোন–ইতিক তৌবা লাইহল্লে।

অহোংবশিং অসি মালেমগী মীয়াম্না উরে। ৱার্ল্দ বেঙ্কগী ইজ ওফ দুইং ব্যুজিনেস রিপোর্ত ২০১৮গী মকোক ১০০গী মনুংদা য়াওনবা ভারতনা চহি অহুমগী মনুংদা মফম ৪২ হাইগৎলকখি।

পাক-চাউবা অমসুং ফগৎলকপগী মওংদা য়েংবদা ভারতকী কৈথেল অসি তুংগী ফিবম য়াম্না ফরি। হৌখিবা চহী ১০ অসিদা ভারতকী পর কেপিতা ইনকম অসি শরুক অনি হেনগৎলে। ঐখোয়গী মিদল ক্লাস কঞ্জ্যুমর মিলিয়ন ৩০০ হেন্না লৈরে।  মশিং অসি মথং চহি ১০দা শরুক অনিদা হেনগৎলকপা য়ারি। ভারতনা মথৌ তারিবা অসিগী মশিং য়েংবদা শেল থাদবশিংগী ওইনদি অচৌবা শেল–থুমগী খুদোংচাবা অমনি। খুদম ওইনা, ভারতনা পায়খৎলিবা য়ুম শাবগী থৌরাং অসিনা শহরদা য়ুম মিলিয়ন ১০ শানবা পান্দম থমলি। মসি লৈবাক কয়া পুনশিল্লগা শাগদৌরিবা য়ুম মশিং অদুদগী হেল্লবনি। মরম অদুনা, য়ুম শাবদা অনৌবা তেক্নোলোজী শীজিন্নরবদি মদু ভারতকী ওইনা কান্নগনি।

অতোপ্পা খুদম অমনা, ভারত্তা পায়খৎলিবা রিন্যুএবল ইনর্জীগী থবকশিং অসিনি। ২০২২ ফাওবদা গিগা ৱাত ১৭৫গী রিন্যুএবল ইনর্জী পুথোক্নবা ঐখোয়না পান্দম থমলি। মসিগী মনুংদা নুমিৎতগী লৌবা মৈ গিগা ৱাত ১০০ য়াওরি। ২০১৭তা ঐখোয়না কনভেন্সনেল ইনর্জীদগী রিন্যুএবল ইনর্জীনা হেন্না পুথোক্লে। ইন্তর্নেস্নেল সোলর এলাইন্স অমা শেমদুনা সোলর ইনর্জী ফজনা পুথোক্নবা থবক ঐখোয়না পায়খৎলি। এলাইন্স অসিগী অহৌবা মীফম চহি অসিদা নই দিল্লীদা পাংথোকখ্রে। ২০৩০ ফাওবদা য়ু.এস. দোল্লর ত্রিলিয়ন ১ থাদদুনা সোলর ইনর্জী গিগা ৱাত ১০০০ পুথোক্নবা এলাইন্স অসিনা পান্দম থম্লি।

ভারত অসি ই–মোবিলিতীদা থবক পায়খৎলি। ঐখোয়না থেংনরিবা অৱাবা অসি তেক্নোলোজীনি। চহি অসিদা ঐখোয়না মালেমগী মোবিলিতীগী মীফম অমগী য়ুম্বু ওইগদৌরি। মসিনা ঐখোয় মাংলোমদা চংশিনগনি হায়না ঐনা খল্লি।

মরূপশিং,

ভারত্তা ঐখোয়না চৎথোক–চৎশিনগী থবক ফগৎহল্লি। ভারতমালাগী পান্দমদি লম্বী–থোং ফগৎহন্নবা নেস্নেল কোরিদোরশিং অমসুং হায়ৱেশিং শেমগৎপনি। সাগরমালা প্রোজেক্ত অসি হিথাংফমশিং শম্নহন্নবা, হিথাংফমশিং শেমগৎনবা অমসুং হিথাংফমশিংগা শম্নবা উদ্যোগ শেমগৎনবা থবক পায়খৎপনি। ঐখোয়গী রেল লম্বীশিং চিনবা হন্থনবা দেদিকেতেদ ফ্রাইৎ কোরিদোরশিং শেমগৎলে। কংফাল মনুংগী ঈশিং লম্বীশিং ফাওদুনা ললোন–ইতিক্কী থবকশিং পায়খৎনবা জল মার্গ বিকাস প্রোজেক্তনা থবক পায়খৎলি। ঐখোয়গী উরান স্কিম্না লম লমগী মালং হিথাংফমশিং শেমগৎনবা অমসুং নোংথক্কী লম্বীদা চৎথোক–চৎশিন ফগৎহন্নবা থবক পায়খৎলি। হৌজিক ফাওবা শীজিন্নদনা লৈরিবা অমসুং থৱায় য়াওশিনবা দরকার ওইরিবা মফম অমদি ভারতকী পাক–চাউরবা সমুদ্র খোংবালশিং অসি পোৎচৈ পুথোক–পুশিন অমসুং চৎথোক–চৎশিনদা শীজিন্নবা অসিনি হায়না ঐনা খল্লি।

ঐখোয়না ইনফ্রাস্ত্রকচরগী ৱাফম পুথোরকপা মতমদা, ভারতনা হৌজিক পায়খৎলিবা মতম অসিগী ইনফ্রাস্ত্রকচরশিং খরা পনবা পাম্মি। ভারত নেৎ অসিনা লৈবাক অসিগী কাচিন–কোয়া শিনবা থুংনা ইন্তর্নেত ফংহন্নবা পান্দম থম্লি। ভারত অসি ইন্তর্নেত শীজিন্নবা মীওই মিলিয়ন ৪৬০ লৈরি অমসুং মোবাইল ফোন বিলিয়ন ১.২ শীজিন্নরি। ঐখোয়না দিজিতেল পেমেন্তশিং পুক্নীং থৌগৎলি। ঐখোয়গী য়ুনাইতেৎ পেমেন্তস ইন্তর্ফেস সিস্তেম য়ু.পি.আই.না ভিম এপ অমসুং রুপে কার্দকা লোইননা ভারতকী দিজিতেল ইকনোমীগী অশেংবা মশক অদু উৎলি। উমঙ্গ এপগী খুৎথাংদা মীয়ামদা মখোয়গী মোবাইল ফোনশিংগী খুৎথাংদা সরকারগী থবক ১০০ হেনবগী খুদোংচাবশিং ফংহল্লি। ঐখোয়গী দিজিতেল ইন্দিয়া মিশন অসিনা শহর অমসুং খুঙ্গংদা দিজিতেলগী মান্নদবা লৈরিবশিং কোকহনগনি।

লৌউ–শিংউ অসি ভারতকী ইকনোমীগী থৱায়নি। ৱয়রহাউসশিং, কোল্দ চেনশিং, চিঞ্জাক শেম্বা, ক্রোপ ইন্সুরেন্স অমসুং মরি লৈনবা থবকশিংদা শেল থাদবদা ঐখোয়না পুক্নীং থৌগৎলি। পোৎথোক হেন্না পুথোক্নবা ঈশিং ফজনা শীজিন্ননবা ঐখোয়না মাইক্রো–ইরিগেসন য়োকখৎলি। মসিগী লম অসিদা শেল থাদবা য়াবরা হায়বদু য়েংনবা ঐনা এ.আই.আই.বি.দা য়েংহন্নীংই।

২০২২ ফাওবদা য়ুম লৈতবশিংদা অমাংশঙ য়াওবা, ঈশিং অমসুং মৈ ফংবা য়ুম লাইরবশিংদা ফংহন্নবা ঐখোয়না পান্দম থম্লি। অমোৎ–অকায় মফম চানা লোইশিন্নবা ঐখোয়না থৌরাং কয়া পায়খৎলি।

ঐখোয়গী নেস্নেল হেল্থ প্রোতেক্সন মিশন–অয়ুস্মান ভারত হন্দক ঐখোয়না হৌদোক্লে। মসিনা চহী অমদা লায়রবা ইমুং মিলিন ১০০দা  দোল্লর ৭০০কী কান্নবা ফংহনগনি। হকশেলগী কান্নবা পাকশন্না ফংহনবা অসিনা থবক ময়াম অমা পীবা ঙম্লগনি। স্কিম অসিনা অফবা মখলগী হিদাকশিং পুথোকপা অমসুং মেদিকেল তেক্নোলোজীগী খুৎলাইশিং পুথোকপদা পুক্নীং থৌগৎকনি। মরি লৈনবা থবকশিং য়াওনা কোল সেন্তরশিং, রিসর্স অমসুং ইভালুয়েসন অমসুং আই.ই.সি.গী থবকশিংদা থবক মরাং কাইনা পীবা ঙম্লগনি। হকশেলগী উদ্যোগ পুম্নমক ফগৎলগনি।

সরকারনা অনা–লায়েংগী কান্নবশিং ফংহল্লবা মতুংদা, ইমুং অমগী লৈরিবা শেলফমশিং অদু তুংশিনবা অমসুং অতৈ পোৎলমশিং লৈবদা শীজিন্নবা য়ারগনি। লায়রবা ইমুংশিংদা চাদিং তৌথোকখিবা য়ারবা শেলফমশিং লৈরকপা অসিনা ইকনোমীদা দিমান্দ হেনগৎলক্কনি। মসিগী কান্নবশিং অসি লৌনবা শেল থাদবশিংদা ঐনা হায়জরি।

মরূপশিং,

ভারতকী শেল–থুমগী ফিবম ফগৎলকপা অসি এসিয়াগী অতৈ লৈবাকশিংগা হাইফেৎ মান্নৈ। হৌজিক মহাদেশ অসিমক মালেমগী শেল–থুমগী ময়োন অমা ওইরে। মহাদেশ অসিনা মালেমগী গ্রোথগী ইঞ্জিন অমা ওইরে। তশেংনমক হৌজিক ঐখোয়, এসিয়াগী চহিচা হায়বা তার্ম অদুদা হিংলি।

অনৌবা ভারত অমা থোরক্লে। মসি লৌশিংগী ইকনোমী, চাউখৎপা, তুংগী লম্বী লৈবা অমসুং দিজিতেলগী মচাকশিংনা শেল–থুমগী য়ুম্বী ওইদুনা ভারত অসি লেপ্লি। ঐখোয়গী চাউখৎপগী মরূপ ওইরিবা এ.আই.আই.বি.গা মখা তানা চৎমিন্নগনি হায়না ঐখোয়না থাজবা থম্লি।

থাগৎচরি।