ভারতকী প্রধানমন্ত্রী

এসিস্তেন্ত সেক্রেতরী ওইনা মখোয়গী কাইনা থৌরমগী শরুক অমা ওইনা, ২০১৫ বেচকী আইএএস ওফিসরশিংনা ঙসি প্রধানমন্ত্রী শ্রী নরেন্দ্র মোদীগী মাংদা প্রজেন্তেসনশিং উৎখ্রে।

লৈঙাক্কী তোঙান তোঙানবা হিরমশিংদা খনগৎলবা প্রজেন্তেসন ৮ ওফিসরশিংনা শেমখি, মখোয়গী থিমশিং অদুদি খুদোংথিবা নংলবশিংদা খুদক্কী ওইবা তেংবাং, ত্রেকিং ইন্দিবিজুএল কার্বোন ফুৎপ্রিন্তশিং, ফাইনান্সিয়েল ইনক্লুজন, খুঙ্গংগী চাগা হেনগৎহনবা, দাতা দ্রাইবন রুরেল প্রোস্পরিতী, হেরিতেজ তুরিজম, রেলৱে সেফতী অমসুং সেন্ত্রেল আর্ম ফোর্সেসনি।

থৌরম অদুদা ৱা ঙাংলদুনা প্রধানমন্ত্রীনা হায়খি মদুদি মতম কায়া মরুম অসি খ্বাইদগী নহা ওইবা অমসুং খ্বাইদগী অহল ওইবা ওফিসরশিংনা মখোয় মশেল পাউ ফাওনরকপা অসি তশেংনা য়ামনা মরু ওইবা অমনি। প্রধানমন্ত্রীনা হায়খি মদুদি নহা ওইরিবা ওফিসরশিংনা অসিগুম্বা ৱারি-ৱাতাই অসিদগী কান্নরবা শরুকশিং লৌশিঞ্জগদবনি। প্রধানমন্ত্রীনা নহা ওইরিবা ওফিসরশিংদা জিএসিতি চৎনহনবা অমসুং মরুওইনা বিঐচআইএম এপকী থোংদা দিজিতেলগী ওইবা মওংদা পীথোক-পীশিন তৌনবা চাওখৎহন্নবগী লমদা মিয়েং চংনবা খঙহনখি।

মহাক্না মখোয় মখোয়গী মরি লৈনবা বিভাগশিংদা সরকারগী ই-বাজার (জিআইএম)বু শিজিন্নবদা খোংজেল য়াংশিন্নবা ওফিসর পুম্নমক্তা খঙহনখি। মহাক্না হায়খি মদুদি মসিনা ময়াই চাবশিং লোইশিল্লগনি অমসুং সরকারগীদমক্তা শেল তুংশিন্নবগী মরম অমা ওইরগনি।

ওদিএফকী পান্দমশিং অমসুং খুঙ্গংগী লমদা মৈ পীবগী খুদমশিং পল্লদুনা প্রধানমন্ত্রীনা ওফিসরশিংদা পান্দমগী শরুক চাদা চাম্মা ফংনবগী মাইকৈদা থবক তৌনবা ফোংদোকখি। মহাক্না ওফিসরশিংদা খঙহনখি মদুদি ২০২২ ফাওবগী মনুংদা নীংতম লান্মীশিংগী মংলানগী ভারত শেম্ননবগী মাইকৈদা থবক তৌবীয়ু। মহাক্না হায়খি মদুদি তোল্ল- তারবা ফিভমদগী হৌরকপা ওফিসরশিংনা নহা ওইরিবা মহৈরোইশিংগা শোইদনা উনবীয়ু অমসিং মখোয়বু পুক্নীং থৌগৎপীয়ু। প্রধানমন্ত্রীনা হায়খি মদুদি পাউ ফাওনবনা নুংশিনবগী মাইকৈদা পুরকই।

মহাক্না হায়খি মদুদি ঙসিগী ওফিসরশিংগী মরু ওইবা পান্দমদি জাতি অমসুং মীয়ামগী য়াইফনবা হোৎনবনি। মহাক্না ওফিসরশিংদা তীম স্প্রিত্তা থবক তৌমিন্ননবা খঙহনখি অমসুং মখোয়না চৎলুবা মফম খুদিং তীম শেম্ননবসু খঙহনখি।