ভারতকী প্রধানমন্ত্রী

ঐহাক্কী নুংশিরবা মরুপশিং,

ঐহাক্না অদোম্বু লৈবাক মীয়াম করোর 140গী মহুৎ শিল্লগা থাগৎপা ফোংদোকচরি।

মফম অসিমক্তদা, স্তেদিয়ম অসিমক্তদা ইং 1951দা অহানবা এসিয়ন গেম্স পাংথোকখিবা হায়বসি তান য়াম্না চানবা ৱাফম অমনি। অদোম পুম্নমক, শান্নরোই পুম্নমক্না উৎখিবা পর্ফোরমেন্সশিংনা লৈবাক্কী মফম খুদিংদা নুংঙাইবা ফোংদোক্নরি। 100 হেনবা মেদল তেল্লী ফংনবগীদমক্তা অদোম্না অহিং নুংথিল খঙদনা হোৎনখিবনি। এসিয়ন গেম্সতা অদোম্না উৎখিবা পরফোর্মেনশিংনা লৈবাক পুম্বদা চাউথোকচবা ফাওহল্লে।

ঐহাক্না ঙসি লৈবাক পুম্বগী মহুৎ শিন্দুনা ঐখোয়গী শান্নরোইশিংগী কোচ, ত্রেনর, মরী লৈনবা মীওই খুদিংবু থম্মোই শেংনা থাগৎচরি। তীম অসিগী মনুং চনবা মীওই খুদিং, সপ্পোর্ত স্তাফ, ফিজিও, ওফিসিএল খুদিংমকপু থাগৎচরি, ইকায় খুম্নজরি। ঐহাক্না অদোমগী ইমা-ইপাশিংবু অখন্ননা থাগৎচরি। পুম্নমক য়ুমদগী হৌবনি, কেরিয়রগী লম্বী কয়াদা চৎপা হৌবা মতমদা, অঙাংশিংনা শান্ন-খোৎনবগী মাইকৈদা চঙবা মতমদা, মতম মাঙহনগনু, লাইরিক তৌ হায়না হায়নবা ঙাক্তনি। করিগুম্বা অশোক অপন য়াওরকপা মতমদা ইমানা হৌজিক্তি চৎলুরনু, ঐ নঙবু থাদোকপা ঙম্লরোই হায়নবা ঙাক্তনি। অদুনা, অদোমগী ইমা ইপাশিংবুসু ইকায় খুম্নফম থোকই। মখোয়দি পর্দাগী ফিখলগী মরুমদগী কৈদৌনুংদা থোক্লক্তে, অদুবু মখোয় য়াওদনা পুম্নমক অসি ওইথোক্কদবসু নত্তে।

মরুপশিং,

অদোম্না পুম্নমক্না পুৱারী শেম্লম্লগা লাক্লবনি। হন্দক্কী এসিয়ন গেম্সকী মশিং কয়া অসিনা অদোমগী মায় পাকপগী খুদম ওইরিবনি। এসিয়ন গেম্সতা ভারতকী খ্বাইদগী ফজবা পরফোর্মেন্স অসিদি হন্দক্কীসিনি। ঐখোয়না অচুম্বা মাইকৈদা চৎলি খঙবদা ঐহাক্না য়াম্না অখন্ননা নুংঙাইবা ফাওই। ঐখোয়না ভেক্সিনগী মরমদা থবক তৌবা মতমদা, মসিবু ওইথোক্কদরা নত্ত্রগা ওইথোক্লোইদরা হায়না চিংবা য়াম্না ফাওখি। অদুবু, ভেক্সিন্না মায় পাক্লবা মতুংদদি, দোজ 200 (16.19)গী মথৌ তাখি, লৈবাক মীয়ামগী পুন্সি কনখি, মালেমগী লৈবাক 150গী মতেং পাংখি, মতমদুদা ঐহাক্না ঐখোয়গী মাইকৈ অসি চুম্লে হায়বা খঙখি। অদুগা ঙসি অদোম্না মায় পাক্লগা লাক্লিবা অসিদসু ঐখোয়গী মাইকৈ অসি চুম্লে হায়বা খঙলে।

মীরম লৈবাক্তা এথলেতিক্সকী লমদা খ্বাইদগী য়াম্বা মেদল ভারতনা হন্দক লৌখি। শুতিংদা খ্বাইদগী য়াম্বা মেদল, আর্চরীদা খ্বাইদগী য়াম্বা মেদল, স্ক্বাশতা খ্বাইদগী য়াম্বা মেদল। রোৱিং, নুপীগী বোক্সিং, নুপী অমসুং নুপাগী ক্রিকেত্তা অহানবা ওইনা গোল্দ মেদল, স্ক্বাশ মিক্স দবলদা অহানবা গোল্দ মেদল, অদোম্না গোল্দ মেদলগী ফিরাল য়ুংলম্লে। অদুগা অমুক্তগা য়েংসিকো, নুপীগী শোৎপুত্তা চহি হুম্ফু তরানিথোই, 4X4 100m রিলেদা চহি হুম্ফুমাথোই, শগোল থৌবদা চহি নিফুমাথোই, নুপাগী বেদমিন্তনদা চহি নিফুগী মতুংদা ঐখোয়না মেদল অমা ফংলে। দিকেদ মরি, মঙা, তরুক্কী মতমসিদা লৈবাক্না পাউ অসিবু ঙাইদুনা লাক্লিবনি। অদোম্না হৌজিক্তি পাউ অসিমক তাহল্লে। অদোমগী পুরুশর্থনা চহি কয়া ঙাইজরকপগী মতৌ লোইশিনখ্রে হায়বা অমুক্তা খন্থবীয়ু।

মরুপশিং,

হন্দক্কী মতাংসিদা য়াম্না অখন্নবা অমা লৈ, ঐহাক অদোমগী মফমদা হায়জগে। ঐখোয়না শরুক য়াখিবা মশান্না খুদিংদা মেদল অমা নত্ত্রগা অনিদি অদুমক লৌবা ঙমখি। মসিগুম্বা মতৌনা মরম ওইরগা ঐখোয়গী কেনভাস অমা চাউখৎলক্লিবা অসিদি ভারতকী ওইনা য়াম্না ফবা ইঙ্গিৎ অমনি। ইভেন্ত 20 অমদি লৈবাক্না ঙসি ফাওবদা পোদিয়ম ফিনিশ ফংবা ঙমখিদ্রিবা ইভেন্তনি। মশান্না কয়াদা অদোম্না খাতা হাংবতা নত্তনা, অনৌবা লম্বী অমা হাংদোক্লম্লবনি। নহাশিংদা ইথিল পীগদবা অনৌবা লম্বী অমা হাংলম্লবনি। এসিয়ন গেম্সতগী হেন্দোক্তুনা ঐখোয়গী ওলিম্পিক্সকী খোঙচত্তা থাজবা পোকহনবগদবা লম্বী অমা হাংলবনি।

মরুপশিং,

ঐখোয়গী নারি শক্তিনা মশান্নশিং অসিদা নীংথিরবা পরফোর্মেন্স উৎলম্বা অসিদা ঐহাক্না য়াম্না চাউথোকচৈ। মখোয়না উৎলম্লিবা পরফোর্মেন্সশিং অদুনা ভারতকী নুপীমচাশিংগী মপাঙ্গল করিনো হায়বা তাক্লবনি। ভারতনা হন্দক্কী এসিয়ন গেম্সতা লৌখিবা অপুনবা মেদলগী তংখায়দি ঐখোয়গী নুপী শান্নরোইশিংনা লৌরকপনি। মসিগুম্বা পুৱারী ওইরবা মায় পাকপা অসিনা ঐখোয়গী নুপী ক্রিকেত তীম্না হৌদোকখি।

ইচানুপীশিংনা খ্বাইদগী য়াম্বা মেদল বোক্সিংদা লৌখি। ত্রেক এন্দ ফিল্দগী মতাংদদি, ঐখোয়না পুম্নমক্তগী মকোক ওইরগদবনি খল্লগা লম্পাক্তা কুম্থরকপদু মঙাইখ্রে। ভারতকী নুপীমচাশিংনা নম্বর ৱান্দগী তাথবগীদি শেম শাদবগুম্বনি। মসিমক অনৌবা ভারতকী ইথিলনি। মসিমক অনৌবা ভারতকী মপাঙ্গলনি। অনৌবা ভারতনা অরোইবা মহৈ ফংদ্রিবা ফাওবা, মায় পাক্লে হায়না লাউথোক্ত্রিবা ফাওবা লেপ্তুনা লৈথোকপা নত্তে। অনৌবা ভারতনা মশাগী খ্বাইদগী ঙমজবা উৎনবা হোৎনৈ।

ঐহাক্কী নুংশিরবা শান্নরোইশিং,

ঐখোয়গী লৈবাক্তা তেলেন্তকী অৱাৎপা কৈদৌনুংদা লৈখিদে হায়বা অদোমসু খঙলবনি। লৈবাক অসিদা মায় পাক্নিংবগী অপাম্বা মতম পুম্বদা লৈদুনা লাক্লি। ঐখোয়গী শান্নরোইশিংনা মমাংদসু অফবা পরফোর্মেন্স উৎখ্রে। অদুবু, শিংনবা কয়াগী মরমদগী ঐখোয়না মেদলগী মতাংদা তুংদা লৈহৌবনি। অদুনা, ভারতনা ইং 2014গী মতুংদগী ঐখোয়গী স্পোর্ত ইকোসীস্তেম্বু মোদর্ন ওইহন্নবা, অওনবা পুরক্নবা হোৎনবা হৌখিবনি। ভারতকী শান্নরোইশিংনা মালেমগী খ্বাইদগী ফবা ত্রেনিং ফেসিলিতী ফংহন্নবা ঐখোয়না হোৎনখিবনি। ঐখোয়গী শান্নরোইশিংনা লৈবাক অমসুং মালেমগী মফম কয়াদা শান্নবগী খুদোংচাবা য়ারিবমখৈ ফংহন্নবা ভারতনা হোৎনরি। ভারতকী শান্নরোই খনবদা নুং-পান ফাওনা উগদবনি, মীচঙ চঙলোইদবনি, খুঙ্গংগী মফমদা লৈরিবা স্পোর্তিং তেলেন্তশিংদা খুদোংচাবা পীনবা ঐখোয়না হোৎনদুনা লাক্লি। ঐখোয়গী শান্নরোইশিংগী মশাগী থাজবা কাইদনা লৈনবা, মখোয়গী অৱাৎপা অমত্তা লৈহন্দনবা ঐখোয়না শক্তি পুম্নমক থাদদুনা হোৎনরি।

চহি 9গী মমাংগা চাংদম্নবদা, ঐখোয়গী শান্নবগী বজেৎসু শরুক অহুম হেনগৎলে। ঐখোয়গী TOPS অমসুং খেলো ইন্দিয়া স্কিম্না গেমচেঞ্জর ওইনা থোক্লক্লে। ঐহাক্না গুজরাত্তগী খঙলকপনি, গুজরাত্তি মশান্না অমখক খঙই – শেলগী মশান্না। অদুবু খেলো গুজরাত হেক হৌদোকখিবদা, শান্নবগী চৎনবীসু তপ্না তপ্না চাউখৎলকখি। মদুগী এক্সপেরিএন্সতগী ঐহাক্কী ৱাখল্লোন্দা খেলো ইন্দিয়াগী ৱাফম লাকখিবনি, হৌজিক্তি মদুসু মায় পাক্লে।

মরুপশিং,

হন্দক্কী এসিয়ন গেম্স অসিদা চাউরাকপা শান্নরোই 150দি খেলো ইন্দিয়াদগী ফংলকপনি। মখোয়গী মরক্তগী 40দগী হেনবনা মেদল লৌবসু ঙমখি। খেলো ইন্দিয়াদগী থোক্লকপা অসুক য়াম্লবা শান্নরোইশিংনা পোদিয়ম য়ৌরকপা উবদা খেলো ইন্দিয়া খোঙথাং অসি অচুম্বা মাইকৈদা চৎলি হায়বা খঙবা ঙম্লে। অদুনা, ঐহাক্না অদোমগী মফমদা হায়জনীংবদি, অদোমগী লৈফমগী অকোয়বদা লৈবা স্কুল, কোলেজশিংদা ৱারি শাবা খুদিংদা খেলো ইন্দিয়াদা শরুক য়ানবা পুক্নিং থৌগৎপীয়ু। মদুদগী মখোয়গী পুন্সি হৌগদৌরিবনি।

তেলেন্তপু মশক খঙদোকপদগী হৌরগা, মতমগা চুনবা ত্রেনিং পীবা অমসুং মালেমগী খ্বাইদগী ফবা কোচিং পীবা ফাওবা ভারতনা ঙসি কনাদগী তাবা নত্ত্রে। মসিগুম্বা মতম অসিদা, ঐহাক্না হৌজিকসু হায়জরি, হৌজিক হৌজিক ঐখোয়গী শান্নরোই লিশিং অহুমদগী হেনবদা খেলো ইন্দিয়া স্কিমগী মখাদা মখোয়গী ত্রেনিং চত্থরি। মখোয়গী কোচিং, মেদিকেল, চিঞ্জাক, ত্রেনিংগীদমক্তা সরকারনা শান্নরোই খুদিংগী মফমদা চহিগী ওইনা লুপা লাখ 6কী স্কোলার্শিপসু পীরিবনি।

মসিগী স্কিম অসিগী মখাদা, চাউরাক্না লুপা করোর লিশিং অনি মখায় অসি শান্নরোইশিংদা হকথেংননা পীরিবনি। ঐহাক্না অদোমগী মফমদা থাজবা পীজরি। অদোমগী হোৎনবদা শেলগী অৱাৎপা অমত্তা লৈহল্লোই। সরকারনা অদোমগীদমক্তা, শান্নবগী মালেমগীদমক্তা মথংগী চহি মঙাদা লুপা করোর লিশিং অহুম চাদিং তৌগদৌরিবনি। ঙসি লৈবাক্কী কাচিন কোয়া খুদিংদা স্পোর্ত ইনফ্রাস্ত্রকচর কয়া অদোমগীদমক্তা শেমগৎলিবনি।

মরুপশিং,

অদোমগী এসিয়ন গেম্স পরফোর্মেন্সনা ঐহাক্কী ইফমদা ৱাফম অমা খঙহল্লে। হন্দক্কী মেদল তেল্লী অসিদা চহি নৌরিবা শান্নরোই কয়ানা মশাগী মফম শেম্নখি। চহি নৌরিবা শান্নরোইশিংনা মায় পাক্লকপা মতমদা শান্ন-খোৎনবগী লৈবাক্কী শক্তাক অমা শেম্লকই। অদুনা, মায় পাক্লগা হল্লক্লিবা খ্বাইদগী চহি নৌবা শান্নরোইশিংগী মফমদা অনিরক হন্না থাগৎচরি। অদোম্না লৈবাক্কী সেবা মতম শাংনা তৌখিগদবনি, লৈবাক্কীদমক্তা ফজবা পরফোর্মেন্স ক্যা উৎখিগদবনি। অনৌবা ভারত অসিনা অদোমগী অফবা পরফোর্মেন্স অদুখক্তা নত্তে, অদোম্না মেদল পুরকপসু পাম্লিবনি।

মরুপশিং,

নহা ওইরিবা চারোন শুরোন্না হৌজিক্কা ৱাহৈ অমা য়াম্না হায়নৈ – “GOAT”, মসিনা হায়বদি গ্রেতেস্ত ওফ ওল তাইম হায়বনি। লৈবাক্কী ওইনদি অদোম পুম্নমক গোত ঙাক্তনি। অদোমগী থৱাই য়াওবগী চাং, অদোমগী কত্থোকপা, অদোমগী অঙাং ওইরিঙৈগী ৱারিনা পুম্নমক্কী মফমদা ইথিল পীরিবনি। মসিনা অতোপ্পা নহাশিংদা মখোয়গী পান্দম ফংহন্নীংবগী ইথিল পীগনি। অদোমগুম্বা ওইবা পামগনি। মসিগুম্বা ইথিল অসি কায়হনবা য়াদে। অদোম্না য়ারিবমখৈ নহা মশিং য়াম্বগা পুনগদবনি। স্কুলশিংদা চত্তুনা অঙাংশিংগা উন্নবীয়ু হায়না ঐহাক্না অদোম শান্নরোইশিংগী মফমদা হায়খিবদু ঐহাক নীংশিংই। মখোয়গী মরক্তগী ঙসি ঐখোয়গী মরক্তা খরসু য়াওরমগনি। নীরজনা স্কুল অমদা চৎলুবনি। মফমদুগী অঙাংশিংনা নীরজপু য়াম্না থাগৎখিবনি। ঐহাকসু ঙসি মসিগুম্বা ৱাফম খরা হায়জনীংই। লৈবাক্না অদোমগী মফমদগী করিগুম্বা খরা নিবগী হক লৈকো? তুমিন্না লৈরিবা করিগীনো? তপ্না ঙাংলিবা করিগীনো? সিদি য়াদ্রেবো! লৈবাক্না অদোমগী মফমদগী থাজবা থম্মি, মসু থুংহগনিকো?

ঐহাক্কী নুংশিরবা শান্নরোইশিং, অমুক্তা য়েংবীয়ু,

লৈবাক্না হৌজিক নিশাগী মাইয়োক্তা লান্থেংনরি। নিশাগী অমাঙবগী মতাংদা অদোম লোইনা খঙলবনি। খঙদনা তৌখিবা দোপিংনা শান্নরোইশিংগী পুন্সি মাঙহনবা য়াওরিবনি। মায় পাক্নিংবগী মতিক্না শান্নরোইশিংদা অরানবা পাম্বৈ শিজিন্নবা য়াওদবা নত্তে। মসিগী মতাংদা ঐহাক্না অদোমগী মফমদা চেকশিন ৱা খরা হায়জনীংই। অদোম্না ঐখোয়গী নহাশিংদা চেকশিন ৱা হায়বীগনি, মরমদি অদোমদি মায় পাক্লবা ঙাক্তনি। অদোমদি অচুম্বা লম্বীদা চত্তুনা হোৎনজমনগী মহৈ য়াল্লবনি। অরানবা লম্বীদা চৎপগী মথৌ তাদ্রবনি। অদোম্না হায়বা মখোয়না তাগনি। অদুনা, অদোম্না য়াম্না ফবা থৌদাং য়াবা য়াই।

অদোমদি মিৎয়েং শানবা অমসুং ৱাখল চেৎপগী খুদম্নি। হকচাং ফবখক্তনা মেদল পুরকপা নত্তে, ৱাখল্লোন লিংবগী মথৌসু তাই। মসিদদি অদোমদি অথোইবা ওইরবনি। মসিদি অদোমগী শক্তি অমনি, মসি লৈবাক্কীদমক্তা শিজিন্নসি। নিশাগী ফত্তবশিংগী মতাংদা অদোম্না ভারতকী নহাশিংদা পাউদম্বীয়ু, মখোয়বু ভাব তাহন্নবা অদোম্না ব্রান্দ এম্বেসেদর ওইবা য়াগনি। অদোমদা বাইত পীয়ু হায়না হংলকপা খুদিংদা, ইন্তর্ভ্যু তৌবা খুদিংদা, ৱাফম অসি শোইদনা হায়বীয়ু। ঐহাক্না লৈবাক্কী নহা ওইরিবা চারোন শুরোন্দা মসি হায়জবা পাম্মি, শোইদনা হায়বীয়ু। মরমদি, অদোম্না ফংলিবা মায় পাকপা অসিনা মরম ওইরগা মখোয়না অদোমগী ৱা শোইদনা তাগনি। মসিবু অদোম্না ইশাগী মিসন্নি খনবীয়ু হায়জরি। নিশাদগী নিংতম্বা ভারত অমা পুরকপদা অদোম্না শোইদনা পাঙ্গল হাপ্পা ঙমগনি।

মরুপশিং,

অদোম্না সুপরফুদকী মগুন খঙই, মসি ফিতনেসকীদমক্তা কয়া য়াম্না মথৌ তাবগে হায়বা অদোম খঙই। অদোম্না ইশাগী পুন্সি মহিংদা মচি ওইবা চিঞ্জাক্তা মিৎয়েং চঙলিবা, চানীংলবসু চাদবা কয়া য়াওরিবা, করি চাফম থোকই, করম্বনা চাফম থোক্তে হায়বা নীংথিনা খঙলিবনি। অদুনা, লৈবাক্কী অঙাংশিংদা মখোয়গী চিঞ্জাক্কী হৈনবীগা মরী লৈননা নুয়ত্রিসনগী মতাংদা মখোয়বু অদোম্না লমজীংবীয়ু। অদোম্না স্কুলশিংদা, অঙাংশিংগী মফমদা অচুম্বা চিঞ্জাক, অফবা হৈনবীগী মতাংদা ৱারি শাবীয়ু।

মরুপশিং,

অদোম্না শান্নবুংদা পাংথোক্লিবশিং অদুনা অচৌবা কেনভাস অমগী শরুক অমসু ওইরিবনি। লৈবাক্না মাঙজিল থানা চৎলকপা মতমদা, মদুগী মমি সেক্তর খুদিংদা তাই। ঐখোয়না মসিমক ভারতকী স্পোর্ত সেক্তরদা উবা ফংলি। লৈবাক্কী ফিভম ফত্তবা মতমদা, মদুমক শান্নবুংদসু উবা ফংই। মালেমগী থাক্তা ভারতনা হৌজিক মশক থোকপা ফম অমা কনবা ঙম্লক্লি, মসিমক শান্নবগী হীরমদসু ফংবা ঙম্লবনি। ভারতনা ঙসিদি মালেমগী খ্বাইদগী মকোক থোংবা অহুমশুবা শেন্মিতলোন ওইবগী মাইকৈদা চঙশিল্লি, মসিগী কান্নবসু ঐখোয়গী নহাশিংদা হকথেংননা ফংগনি। অদুনা, স্পেস্তসু য়েংবীয়ু, ভারতকী মরমদা ঙাঙনরি, মাইকৈ পুম্নমক্তা চন্দ্রয়ানগী ৱারি শানরি। স্তার্তঅপকী মালেমদা ঙসিদি ভারতনা মকোক্তা লৈরে। সাইন্স অমসুং তেক্নোলোজীদা মশক থোকপা থবক পাংথোক্লি। ওন্তোপ্রিনর্শিপকী হীরমদা ভারতকী নহাশিংনা নীংথিরবা খুদম কয়া থম্লি। মালেমগী অচৌ-অচৌবা কম্পেনীশিংগী মমিং অমুক্তা লৌবীয়ু, মখোয়গী CEOশিং ভারত মচানা অয়াম্বা ওইরমগনি, ভারতকী নহা ওইরমগনি। মসিনা হায়বদি, ভারতকী নহাগী পাঙ্গলনা সেক্তর খুদিংবু খুদুম চল্লে হায়বনি। লৈবাক্না অদোম শান্নরোইশিংদা থাজবা য়াম্না থম্লি। থাজবা অসিনা ঐখোয়না 100 হেনবা ঙমখ্রিবনি। অদোম্না মসিমক ওইথোকহল্লিবনি। হৌজিক ঐখোয়গী মাঙদা ওলিম্পিকসু লৈরে। অদোম্না পেরিসকীদমক্তা ইশাগী লৈজবী ফুদোক্তুনা হোৎনবীয়ু। হন্দক্কী মতাংদা মায় পাকপা ঙমখিদবা অদোমসু নীংহন্নবগী মথৌ তাদে। ঐখোয়না অশোইবদগী তম্লগা অনৌবা খোঙথাং থাংগদবনি। অদোম্না শোইদনা মায় পাক্কনি হায়বসি ঐহাক্কী থাজবনি। নুমিৎ খরনিগী মতুংদা, পেরা এসিয়ন গেম্স হৌরগনি। ঐহাক্না অদোমগী খুত্থাংদা পেরা এসিয়ন গেম্সকী শান্নরোই, নহা খুদিংদা য়াইফ পাউজেল পীজরি। অদোমগী নীংথিরবা পরফোর্মেন্সশিংগীদমক্তা ঐহাক্না অদোম পুম্নমকপু অমুক্কা হন্না থাগৎচরি।

পুম্নমকপু হন্না হন্না থাগৎচরি।

***