ভারতকী প্রধানমন্ত্রী

প্রধানমন্ত্রী উজ্জ্বলা য়োজনাগী মখাদা কান্নবা ফংলবা মীওই ১০০ হেনবনা ঙসি প্রধানমন্ত্রী শ্রী নরেন্দ্র মোদীগা লোইননা মহাক্কী লৈফমদা উনখ্রে ।

লৈবাক অসিগী তোঙান তোঙানবা রাজ্যশিংদগী লাকপা কান্নবা ফংলবা নুপীশিং অদু ঙসি অঙনবদা রাষ্ট্রপতি ভবন্দা রাষ্ট্রপতি রাম নাথ কোবিন্দনা হোস্ত ওইদুনা পাংথোকখিবা এলপিজি পঞ্চায়ৎকীদমক ন্যু দিল্লিদা লাকখিবনি ।

শ্রী নরেন্দ্র মোদীগা চম্না উন্নখিবা অদুদা এলপিজি সিলিন্দর শিজিন্নবনা মখোয়গী পুন্সিদা মতৌ করম্না অফবা ওইরক্লিবা হায়বদু কান্নবা ফংলবশিং অদুনা পাওদমখি । মখোয়গী পুন্সিদা নুমিৎ খুদিংগী থেংনরিবা তোঙান তোঙানবা ফিভমশি অদুগীদমক প্রধানমন্ত্রীনা মখোয়বু পুক্নিং থৌগৎখি । মখোয়গী মীৎয়েংশিং অদুগী পাওখুম পীরদুনা য়ুমথোং খুদিংদা মৈগী কনেক্সন পীনবা কেন্দ্র সরকারনা হৌদোকখিবা সৌভাগ্য য়োজনাগী মতাংদা প্রধানমন্ত্রীনা পনখি । অঙাং নুপীমচাশিংবু খেন্নবা থম্লিবা মখল অমত্তগী মওং মতৌশিং মুত্থৎনবশু মহাক্না কন্না হায়খি । মখোয় মখোয়গী খুঙ্গংশিবু লু-নান্না থম্নবগী মায়কৈদা থবক তৌনবা অমত্তা ওইনা পুন্সিন্নবা মহাক্না ফোংদোকখি । উজ্জ্বলা য়োজনাগীদমক প্রধানমন্ত্রীবু থাগৎপা ফোংদোক্লদুনা, কান্নবা ফংলবশিং অদুগী মরক্তগী মীওই খরনা মখোয়গী লমদমশিং অদুদা থেংনরিবা অতোপ্পা খুদোংচাদবশিং অদু খন্ন-নৈনবগী তঞ্জা লৌখি ।

থৌরম অদুদা পেত্রোলিয়ম অমসুং নেচরেল গ্যাসকী কেন্দ্র মন্ত্রী শ্রী ধর্মেন্দ্র প্রধানশু শরুক য়াখি ।