ভারতকী প্রধানমন্ত্রী

য়োর এক্সিলেন্সী, রাস্ত্রপতি পুতিন,

অথোইবা মীথুংলেনশিং,

খুরুমজরি!

ব্লাদিবোস্তোক্তা পাঙথোকপা তরেৎশুবা ইস্তর্ন ইকনোমিক ফোরমদা ঐহাক্না অদোমগা লোয়ননা ভর্চুএল ওইনা কন্নেক্ত তৌবগী খুদোংচাবা ফংজবদা য়াম্না নুংঙাই। থা অসি ব্লাদিবোস্তোক্তা কান্সুলেৎ ওফ ইন্দিয়া লিংখৎখিবগী ৩০শুবা কুমওন তারি। ভারতনা সহর অসিদা কন্সুলেৎ হাংখিবা অহানবা লৈবাক ওইখি। অমসুং মসিগী মতুংদগী সহর অসিদা ঐখোয়গী মরীদা মাইপাকপগী পন্দুপ কয়া উবা ফংজখি।

মরুপশিং,

২০১৫দা লিংখৎখিবা ফোরম অসি ঙসিদি রসিয়ন ফার ইস্তকী চাউখৎ-থৌরাংদা ইন্তর্নেস্নেল কোওপরেসনগীদমক অচৌবা গ্লোবেল ফোরম অমা ওইরে। মসিগীদমক ঐহাক্না রাস্ত্রপতি পুতিনগী বিজনবু থাগৎলি অমসুং মঙোন্দা নুংঙাইবসু ফোঙদোকচরি।

২০১৯দা ঐহাক্না ফোরম অসিদা শরুক য়াবগী খুদোংচাবা ফংজখি। মতম অদুদা ঐখোয়না ভারতকী “এক্ত ফার-ইস্ত” পোলিসী লাউথোকখি। অমসুং মসিগী মহৈ ওইনা ভারতকা রসিয়ন ফার ইস্তকী মরক্তা পীনরিবা কোওপরেসন অসি লম কয়াদা হেনগৎলকখি। ঙসি পোলিসী অসিনা ভারত অমসুং রসিয়াগী “স্পেসিএল এন্দ প্রিবিলেজ স্ত্রেতেজিক পার্তনরশিপ”কী মরু ওইবা য়ুম্বী অমা ওইরকখি।

মরুপশিং,

ঐখোয়না ইন্তর্নেস্নেল নোর্থ-সাউথ কোরিদোর, চেন্নাই-ব্লাদিবোস্তোক মেরিতাইম কোরিদোর নত্ত্রগা নোর্দন সী রুতকী মতাংদা ৱারী শাবদা কন্নেক্তিবিতীনা তুংলমচৎতা ঐখোয়গী মরীশিং খুমাং চাউশিনহনবদা মরু ওইবা থৌদাং লৌরগনি।

ভারতনা আর্তিক্কী সমস্যাশিংগী মতাংদা রসিয়াগা লোয়ননা লৈরিবা পার্তনরশিপ অসি মপাঙ্গল কনখৎহনবা পাম্মি। ইনর্জীগী লমদা কোওপরেসন পীনবা য়াবগী অচৌবা মতিক-ময়াই লৈ। ইনর্জীগা লোয়ননা ভারতনা ফার্মা অমসুং দাইমোন্দসকী লমশিংদা রসিয়ন ফার ইস্ততা চাউনা ইনভেস্তমেন্তশিং তৌখি।

কোকিং কোল সপ্লাই তৌবগী খুত্থাংদা রসিয়ানা ভারতকী স্তীল ইন্দস্ত্রীগীদমক মরু ওইবা পার্তনর অমা ওইবা য়াগনি। ভারতকী তেলেন্তনা মালেমগী চাউখৎলবা লমদম কয়াগী চাউখৎ-থৌরাংদা শরুক তমখি। ঐহাক্না থাজৈ মদুদি ভারত মচাশিংগী তেলেন্ত অমসুং প্রোফেস্নেলিজম অসিনা রসিয়ন ফার ইস্ততা খোঙজেল য়াংনা চাউখৎপা পুরকপা ঙমগনি।

মরুপশিং,

ভারতকী অরিবা ৱারোল “বসুধৈব কুতুম্বকম” অসিনা ঐখোয়দা মালেম অসি ইমুং-মনুং অমগুম্না উনবা তাকপীখি। ঙসিগী গ্লোবেলাইজ ওইরবা মালেম অসিদা মালেমগী শরুক অমদা থোকপা থৌদোক্না মালেম পুম্বদা শাফু পীরি।

য়ুক্রেনগী লান অমসুং কোবিদ লাইচৎ অসিনা গ্লোবেল সপ্লাই চেনশিংদা চাউনা শাফু পীখি। চেং-হৱাই, হার অমসুং ফ্যুলগী অৱাৎপশিং লৈবা অসিনা চাউখৎলক্লিবা লৈবাকশিংগী অচৌবা সমস্যা ওইরি। য়ুক্রেনগী লান হৌখিবদগী হৌনা ঐখোয়না দিপ্লোমেসী অমসুং দাইলোগকী লম্বেলদা চৎপা মথৌ তাই হায়না ফোঙদোক্তুনা লাকখি। ঐখোয়না লান অসি লোইশিন্নবা শান্তি ওইবা খোঙথাং পুম্নমক শৌগৎলি। হীরম অসিদা ঐখোয়না সিরিএলশিং অমসুং হারশিং শাফনা এক্সপোর্ত তৌনবগা মরী লৈনবা অনৌবা য়ান্ন-ৱারোলবু তরাম্না ওকই।

ঐহাক্না ফোরম অসিদা ৱা ঙাংনবগী খুদোংচাবা পীবীবগীদমক ঐহাক্না রাস্ত্রপতি পুতিনবু অমুক হন্না থাগৎচরি। অমসুং ফোরম অসিদা শরুক য়ারিবা পুম্নমক্তা ঐহাক্না খুরুমজরি।

হন্না-হন্না থাগৎচরি!

খঙহঞ্জবা: মসি প্রধান মন্ত্রীনা পাউমীশিংদা থমখিবা ৱারোলগী চাউরাকপা ৱাহন্থোক্নি। তশেংবা ৱারোলদি হিন্দীদা পীখি।

****