ভারতকী প্রধানমন্ত্রী

য়োর এক্সিলেন্সী, রাস্ত্রপতি অমসুং ঐগী ইনাও প্রবোৱো সুবিএন্তো,

লৈবাক অনিমক্কী দেলিগেৎশিং,

মেদিয়াগী মরুপশিং,

খুরুমজরি!

ইন্দোনেসিয়ানা ভারতকী অহানবা রিপব্লিক দেগীদমক ঐখোয়গী চীফ গেস্ত ওইখি। ঐখোয়গী 75শুবা রিপব্লিক দেগী থৌরম পাংথোকপা অসিদা ইন্দোনেসিয়ানা অমুক্কা হন্না মসিগী মরুওইবা থৌরম অসিদা শরুক য়ানবা অয়াবা পীখিবা অসি ঐখোয়গীদমক চাউথোকচনীংঙাই ওইবা ৱাফম অমনি। মসিগী থৌরম অসিদা, ঐহাক্না রাস্ত্রপতি প্রবোৱোবু ভারত্তা তরাম্না ওকচরি।

মরুপশিং,

2018দা ঐহাক্কী ইন্দোনেসিয়া খোংচৎ মনুংদা, ঐখোয়না ঐখোয়গী পার্তনরশিপ অসি কম্প্রিহেন্সিব স্ত্রেতেজিক পার্তনরশিপ অমা ওইনা খুমাং চাউশিলহনখি। ঙসি, ঐখোয়না রাস্ত্রপতি প্রবোৱোগা লোয়ননা ম্যুচেল কোওপরেসনগী তোঙান-তোঙানবা এস্পেক্তশিংদা পাক-শন্না খন্ন-নৈনখি। দিফেন্স সেক্তরদা ঐখোয়গী তেংবাং পীনবা অসি মপাঙ্গল কনখৎহন্নবা, ঐখোয়না দিফেন্স মেন্যুফেকচরিং অমসুং সপ্লাই চেনগী লমশিংদা পুন্না থবক তৌমিন্নবা ৱারেপ লৌরে।

ঐখোয়না মেরিতাইম সেক্যুরিতী, সাইবর সেক্যুরিতী, তেরোরিজম থেংনবা অমসুং দি-রেদিকেলাইজেসনগী লমদা মতেং পীনবগী মতাংদসু অকনবা ৱাফম থমখি। ঙসি খুৎয়েক পীনখিবা মেরিতাইম সেফতী এন্দ সেক্যুরিতীগী য়ান্ন-ৱারোল অসিনা ক্রাইম প্রিভেন্সন, সর্চ এন্দ রেস্ক্যু অমসুং কেপাসিতী বিল্দিংগী লমশিংদা ঐখোয়গী তেংবাং পীনবা হেনগৎহল্লগনি। হৌখিবা চহী খরা অসিদা, ঐখোয়গী বাইলেতরেল ত্রেদ য়াম্না থুনা হেনগৎলক্লি, অমসুং হৌখিবা চহীদা মসি USD বিল্লিয়ন 30 হেনখি।

মসিগী খোংথাং অসিবু হেন্না খুমাং চাউশিলহন্নবগীদমক ঐখোয়না কৈথেলগী এক্সেস অমসুং ত্রেদ বাস্কেৎকী তোঙান তোঙানবা মখলশিং শেমগৎনবা খন্ন-নৈনখি। প্রাইবেৎ সেক্তর অসিসু মসিগী হোৎনবা অসিদা মান্নবা পার্তনর অমনি। ঙসি পাংথোকখিবা CEO ফোরম মীফম অমসুং প্রাইবেৎ সেক্তরদা ফাইনেল তৌখিবা এগ্রীমেন্তশিং ঐখোয়না তরাম্না ওক্লি। ফিনতেক, আর্তিফিসিএল ইন্তেলিজেন্স, ইন্তর্নেৎ ওফ থিংস অমসুং দিজিতেল পব্লিক ইনফ্রাস্ত্রকচরগুম্বা লমশিংদা ম্যুচেল কোওপরেসন মখা তানা মপাঙ্গল কনখৎহন্নবা ঐখোয়না ৱারেপ লৌরে।

হকশেল অমসুং ফুদ সেক্যুরিতীগী সেক্তরশিংদা, ভারতনা ইন্দোনেসিয়াগা মিদ-দে মেল স্কিম অমসুং পব্লিক দিস্ত্রিব্যুসন সিস্তেমদগী তম্লকপা অমসুং এক্সপিরিয়েন্সশিংগা লোয়ননা শরুক য়ামিন্নরি। ঐখোয়না ইনর্জী, ক্রিতিকেল মিনরেলস, সাইন্স অমসুং তেক্নোলোজী, স্পেস অমসুং STEM এজুকেসনগী সেক্তরশিংদা পুন্না থবক তৌমিন্ননবা ৱারেপ লৌরে। লৈবাক অনিগী দিজাস্তর মেনেজমেন্ত ওথোরিতীশিংসু জোইন্ত এক্সরসাইজশিং পাংথোক্নবগীদমক পুন্না লাক্কনি।

মরুপশিং,

ভারত অমসুং ইন্দোনেসিয়াগী মরক্তা লৈনরিবা মরী অসি চহী লিশিং কয়াগী মমাংদগী লৈরক্লি। রামায়ন অমসুং মহাভারততগী ইথিল লৌরকপা ৱারীশিং অমসুং ‘বালি জাত্রা’ অসি ঐখোয়গী অচৌবা লৈবাক অনিগী মরক্তা লৈরিবা চহী কয়াগী মমাংগী কলচরেল অমসুং হিস্তোরিকেল লিঙ্কশিংগী থৱায় য়াওবা খুদম্নি। বুদ্ধ বোরোবুদুর লাইশঙগী মতুংদা, ভারতনা প্রমাম্বনান হিন্দু লাইশঙগী কঞ্জর্বেসনগী থবকশিংদা মতেং পাংলিবা অসিদা ঐহাক য়াম্না নুংঙাইবা ফাওই।

মসিগী মথক্তা, কুমজা 2025 অসি ইন্দো-আসিয়ান তুরিজমগী চহী ওইনা পাংথোক্কনি। মসিনা ভারত অমসুং ইন্দোনেসিয়াগী মরক্তা কলচরেল একচেঞ্জ অমসুং তুরিজমসু পুক্নিং থৌগৎকনি।

মরুপশিং,

ইন্দোনেসিয়ানা আসিয়ান অমসুং ইন্দো-পেসিফিক লমদমশিংদা ঐখোয়গী মরুওইবা পার্তনর অমনি। লৈবাক অনিমক্না লমদম অসিদা শান্তি, সেক্যুরিতী, চাউখৎপা অমসুং কাংলোনশিংদা য়ুম্ফম ওইবা কাংলোন ঙাক্না চৎনবগীদমক অচেৎপা ৱাফম থম্লি। ঐখোয়না য়ানরি মদুদি ইন্তর্নেস্নেল লোশিংগী মতুং ইন্না ফ্রিদম ওফ নেভিগেসন অসি ফংহনগদবনি।

ঐখোয়গী এক্ত ইজ পোলিসীদা, আসিয়ানগী অপুনবা অমসুং সেন্ত্রেলিতীদা অহেনবা মীৎয়েং থম্লি। ঐখোয়না G-20, আসিয়ান অমসুং ইন্দিয়ন ওসিন রিম এসোসিয়েসনগুম্বা প্লেৎফোর্মশিংদা পুন্না থবক তৌমিন্নরি।

হৌজিক ঐখোয়না BRICSতা ইন্দোনেসিয়াগী মেম্বর ওইরকপবুসু তরাম্না ওক্লি। ফোরম পুম্নমক্তা, ঐখোয়না গ্লোবেল সাউথকী লৈবাকশিংগী কান্নবা অমসুং মরুওইবশিংগীদমক কোওর্দিনেসন অমসুং কোওপরেসনদা থবক তৌগনি।

এক্সিলেন্সী,

ঐখোয়গী রিপব্লিক দেগীদমক অথোইবা মীথুংলেন ওইনা অদোমগৌ ভারত খোংচৎ অসি ঐখোয়গীদমক চাউথোকচনীংঙাই ওইবা ৱাফম অমনি। থৌরম অসিদা ইন্দোনেসিয়াগী মার্চিং স্ক্বাদপু অহানবা ওইনা উবা ফংনবা ঐখোয় পুম্নমক্না অপেনবা ফাওই। ঐহাক্না অমুক্কা হন্না অদোম অমসুং অদোমগী মীহুৎ কাংবুবুসু ভারত্তা তরাম্না ওকচরি।

হন্না-হন্না থাগৎচরি।

খঙহঞ্জবা – মসি প্রধান মন্ত্রীগী ৱারোলগী চাউরাকপা ৱাহন্থোক্নি। তশেংবা ৱারোলদি হিন্দীদা পীখি।

***