ভারতকী প্রধানমন্ত্রী

খুরুমজরি!

‘ইন্দিয়ন এসোসিএসন ওফ ফীজিওথেরাপিস্ত’কী ৬০শুবা নেস্নেল কন্ফরেন্স অসিগীদমক পুম্নমক্কী মফমদা য়াইফ পাউজেল পীজরি‍।

মেদিকেলগী লমদা লৈরিবা মরুওইবা প্রোফেস্নেল কয়ানা অহমদবাদতা পুল্লরিবা অসিগীদমক ঐ নুংঙাই‍। শোকপা নৎত্রগা নাবা ওইরবসু, নহা নৎত্রগা অহল ওইরবসু, শান্নরোয় নৎত্রগা মশা মউ ফনা লৈবা পাম্বা মীওই ওইরবসু, ফীজিওথেরাপিস্তশিংনা চহি তাঙ্কক খুদিংগী মীওইশিংগী মরূপ ওইদুনা মখোয়গী প্রোব্লেমশিং কোকহন্নবা লেপ্লি‍। অদোম্না অৱাবা তারবা মতমদা থাজবগী খুদম ওইরি‍। অদোম্না খাঙবা কনবগী খুদম অমা ওইরি‍। অদোম্না হান্নগী ফীভমদা অমুক হঙ্গৎলকপগী খুদম ওইরি, মরমদি মীওই অমনা খঙহৌদনা শোকপদা নৎত্রগা এক্সিদেন্তকী ভিক্তিম ওইরকপদা, মদু মহাক্কীদমক্তদি হকচাঙদা শোকপদুখক নত্তে, মদু পুক্নিং ৱাখলগী ওইবা শিংনবা অমসুনি‍। অসিগুম্বা খুদোংথিবা মতমশিংদা, ফীজিওথেরাপিস্তশিংনা মখোয়বু লায়েংবখক নত্তনা মখোয়গী পুক্নিংসু থৌগৎলিবনি‍।

মরূপশিং,

য়াম্না তোয়না ঐনা অদোমগী শিনফম অমদি প্রোফেস্নেলিজমদগী পুক্নিং থৌগৎনিংঙাইবা মচাক ফংই‍। অদোম্না অদোমগী লমদা অদোমগী নুংগী পাঙ্গল অদুনা শিংনবশিংদগী হেন্না কল্লি হায়না তম্লক্লমগনি‍। পুক্নিং থৌগৎপা অমদি ঙাক্লৌ খরা পীবিবনা, মীওই অমনা খ্বায়দগী খুদোংথিনিংঙাই ওইবা শিংনবশিংসু মায়োক্নবা ঙম্লি‍। মতৌ অসুম্না মান্নবা থৌওং খরা লৈঙাক্লোন্দসু উবা ফংগনি‍। লৈবাকসিগী লায়রবা মীওইশিং অসিনা মখোয়গী নোংমগী চঙদ্রবা য়াদ্রবশিং ফংবা ঙম্নবগীদমক ঙাক্লৌ খরা মথৌ তাই‍। ঐখোয়না বেঙ্ক একাউন্ত হাংহনবা, তোইলেৎশিং শাবিবা, মীয়ামদা তোতিগী ঈশিং ফংহনবনচিংবা কেম্পেন কয়াগী খুত্থাঙদা মীয়ামদা ঙাক্লৌ পীরি‍। ঐখোয়গী লৈঙাক্না অয়ুস্মান ভারত স্কীম অমদি অতৈ সোসিএল সিক্যুরিতী স্কীমশিংগী খুত্থাঙদা লৈবাকসিদা মপাঙ্গল কল্লবা সোসিএল সিক্যুরিতী নেৎ অমা শেমগৎলে‍। হায়রিবা স্কীমশিং অসিগী মহৈ ঐখোয়না ঙসিসু উবা ফংগনি‍। ঙসি লৈবাকসিগী লায়রবা অমদি মিদ্দল ক্লাসকী মীওইশিংনা মঙ মঙনবগী অমদি মখোয়বু মঙফাওনহন্নবগী থৌনা তাশিন খোমজিনবা ঙম্লে‍। ঙসিদি, মখোয়না মালেমগী মখোয়গী মতিংগা লোয়ননা অনৌবা পন্দোলশিং লোম্বা ঙমগনি হায়বা উৎলক্লি‍।

মরূপশিং,

খ্বায়দগী ফবা ফীজিওথেরাপিস্ত  হায়রগদি অনাবা মীওইদুনা মাগী মথৌ হঞ্জিন হঞ্জিন তাহন্দবা অদুবুনি হায়নৈ‍। মওং অমদা অদোমগী শিনফম অসিনা ইরোমদোম লেপচবগী মরুওইববু তাক্লি‍। অদোমগী পান্দমদি মীয়ামবু মরোমদোম লেপচবা ঙমহনবনি হায়না ঐখোয়না লৌবা য়াই‍। ঙসি ভারতনা ইরোমদোম লেপচবগী মায়কৈদা চঙশিল্লিবা অসিদা অদোমগী শিনফম অসিদা লৈরিবা মীওইশিংনা করিগীদমক ফীভম অসি ঐখোয়গী লৈবাকসিগী তুংলমচৎকীদমক মথৌ তারিবনো হায়বা লায়না খঙবিরমগনি‍। অদুগা খ্বায়দগী মরুওইবনা, দোক্তর অমদি ফীজিওথেরাপী মথৌ তারিবা মীওই অনিদুনা পুন্না থবক পায়খৎমিন্নরবা মতমদতা খোঙজেল লৈরকই হায়বসি ফীজিওথেরাপিস্ত অমনা খঙই‍। মরম অদুনা, চাওখৎ খোঙথাঙবু মীয়ামগী ওইবা ইহৌ অমা ওইহন্নবগীদমক লৈঙাক অসিনা হোৎনরিবা অসিগী মরুওইবা অদোম্না মমুৎ তানা খঙবা ঙমগনি‍। হায়রিবা মীয়াম্না শরুক য়াশিনবগী ইথিল অসি স্বচ্ছ ভারত, বেতী বচাও, বেতী পরাও অমদি অতৈ থৌরাংশিংগী মায় পাকপদা উবা ফংই‍।

মরূপশিং,

মীপুম খদিংগী অমদি লৈবাকসিগীদমক্তা ফীজিওথেরাপীগি ইথিলদা লোত্তুনা লৈবা মরুওইবা পাউজেল কয়া য়াওরি‍। খুদম ওইনা, ফীজিওথেরাপীগী অহানবা কন্দিসদি কন্সিস্তেন্সী হায়বসিনি! মহৌশানা, মীয়াম্না শাজেল তৌবসি হৈনিংনা নুপিৎ ২-৩ তৌরমগনি, অদুবু থুনা মখোয়গী হৈনিংবদু তপ্না তপ্না মাঙখি‍। অদুবু ফীজিওথেরাপিস্ত অমা ওইনা, অদোম্না পাম্লিবা মহৈ অদু চাং তাহন্দনা হোৎনবদগী ফংলক্কনি হায়বা খঙই‍। অদোম্না মথৌ তারিবা শাজেলশিং অদু অহোবা লৈহন্দনা তৌহন্নবা হোৎনৈ‍। অসিগুম্বা লেপ্তনা চত্থবা অমদি খোঙফম হোংদবা অসি লৈবাক্কীদমক্তসু মথৌ তাই‍। ঐখোয়গী খুজিল থৌরাংদা চাং মান্নহনবা তাই, মখোয়বু থবক ওইনা পায়খৎনবা পুক্নিং চপ য়ুংনা লেপ্পা তাই, মদুতদা লৈবাক্কী মথৌ তাবশিং ফংবা ঙমগদৌরিবনি অমদি লৈবাকসিনা লেপখত্তুনা চাউনা মাঙদা চোংবা ঙমগদৌরিবনি‍।

মরূপশিং,

লৈবাক অসিনা হৌজিক নীংতম্বা চহি ৭৫ মপুং ফারকপগী অমৃৎ মহোৎসব পাঙথোক্লি‍। অমৃৎ মহোৎসবকী মতমসিদা লৈবাকসিগী ফীজিওথেরাপিস্ত পুম্নমক্তা ঐখোয়গী লৈঙাক্না, চহি ৭৫ ঙাইদুনা লৈরক্লবা, খুদোল অমা তম্বা ঙম্বসিদা ঐ নুংঙাই‍। ঙাইরক্লিবা অদুদি – ফীঈজিওথেরাপীবু শিনফম অমা ওইনা শকখঙবনি‍। ঐখোয়গী লৈঙাক্না অদোম্না ঙাইরকপদু ফংহল্লে‍। নেস্নেল কম্মিসন ফোর এলাইদ এন্দ হেল্থকেয়র প্রোফেসন্স বিল পুথোক্তুনা, ঐখোয়না অদোমগী ইকায়খুম্নবা হেনগৎহন্নবা তাঞ্জা অমা ফংলে‍। মসিনা ভারতকী হেল্থকেয়র সিস্তেমদা অদোমগী মরুওইবা থৌদাংবুসু শকখঙলি‍। মসিনা ময়াম পুম্নমকপু ভারত্তা অমদি মপান লৈবাকশিংদা থবক তৌবদা হেন্না লায়থোকহল্লে‍। লৈঙাক অসিনা ফীজিওথেরাপিস্তশিংবু অয়ুস্মান ভারত দিজিতেল মিসন নেৎৱর্ক্তসু হাপচিল্লে‍। মসিনা অদোমবু অনাবশিংগা মরী শম্নহনবদা হেন্না লায়থোকহল্লে‍। ঙসিদি, খেলো ইন্দিয়া মুভমেন্তকা লোয়ননা ফিৎ ইন্দিয়া মুভমেন্তসু লৈবাকসিদা খুমাঙ চাওশিল্লে‍। হায়রিবা সেক্তর পুম্নমক অসিদা খুমাঙ চাওশিল্লিবা অসি ফীজিওথেরাপিস্তশিংগা হকথেংননা মরী লৈনৈ‍। অপীকপা ময়োল্লমশিংদা শান্ন-খোৎনবগী ইনফ্রাস্ত্রকচর শেমগৎ শাগৎলকপগা লোয়ননা হৌজিক্তি অদোমগী থৌদাং হেন্না চাউখৎলক্লে‍। মমাঙদদি ঐখোয়না ফেমিলী দোক্তরশিং শীজিন্নরম্মী‍। মতৌ অসুম্না হৌজিক্তি ফেমিলী ফীজিওথেরাপিস্ত লৈরে‍। মসিনা অদোমগীদমক অনৌবা খুদোংচাবশিংসু শেমগৎলি‍।

মরূপশিং,

ঐনা খুন্নাসিদা অমদি অদোমগী অনাবশিংগী মফমদা অদোম্না লৌরিবা থৌদাংগীদমক থাগৎচরি‍। অদুবু অদোমগী মফমদা ঐনা হায়জনিংবা অমসু লৈরি‍। হায়রিবা ৱাফম অসি অদোমগী কন্ফরেন্স অসিগী থীমগসু মরী লৈনৈ অমদি ফিৎ ইন্দিয়া মুভমেন্তকসু মরী লৈনৈ‍। অদোম্না মীয়ামদা অচুম্বা ফিদুপ, অফবা হৈনবী অমদি অচুম্বা শাজেলগী মরমদা অমদি মখোয়গী মরুওইবশিংগী মরমদা তাকপি তম্বিবা য়াবরা? মীয়াম্না মশা মউ ফনা লৈনবগীদমক অচুম্বা লম্বী পরিংদা চৎহনবা মরুওই‍। অদোম্না হায়রিবা অসি আর্তিকল অমদি লেকচরশিংগী খুত্থাঙদা তৌবা য়াই‍। অদুগা ঐগী নহা ওইরিবা মরূপশিংনদি মসি রীলগী (সোসিএল মিদিয়া প্লেৎফোর্মশিংদা) খুত্থাঙদসু তৌবা য়াই‍।

মরূপশিং,

ঐসু করিগুম্বা মতমদা ফীজিওথেরাপিস্তশিংগী সর্ভিস লৌবা তারকই‍। ঐনা থেংনরকপগী মতুং ইন্না, ঐনা অদোমগী মফমদা ৱাফম অমগা থমজনিংই‍। ঐনা থেংনরকপদা য়োগগী হৈশিংবগা ফীজিওথেরাপীগী হৈশিংবগা পুনশিনবা মতমদা, মসিগী মতিক শরুক কয়া থোক্না হেনগৎলকই‍। ফীজিওথেরাপীগী মথৌ তাবা হকচাংগী কমন ওইবা প্রোব্লেমশিং করিগুম্বা মতমদসু য়োগ অমদি আসন (হকচাঙগী ফিদুপ)শিংগী খুত্থাংদা কোকহনবা ঙম্মী‍। মরম অদুনা অদোম্না ফীজিওথেরাপীগা লোয়ননা য়োগগী মরমদা খঙলগদি, অদোমগী শিনফমগী মতিংসু হেনগৎলক্কনি‍।

মরূপশিং,

অদোম্না ভারত্তা তৌরিবা থবক্কী অচৌবা শরুক অমদি অহল ওইরবশিংবু য়েংশিনবসু য়াওরি‍। অদোম্না অনাবা শেন্নবদা অমদি থবক ওইনা তৌবদা খঙ-হৈরিবশিং অদু য়াম্না মমল য়ামই‍। অদোম্না থেংনরকপশিং মচা খায়না দোকুমেন্ত তৌবিয়ু হায়না ঐনা হায়জরি‍। মালেমগী ওইনা অহল ওইবা মীশিং হেনগৎলকপগা লোয়ননা, মখোয়বু শেন্নবিবা হায়বসিসু হেন্না শিংনবা অমদি শেল চঙবা ওইরক্লি‍। অদোম্না থেংনরকপশিং একাদমিক পেপর অমদি প্রজেন্তেসন ওইনা পুথোরকপনা মালেম পুম্বদা চাউনা কান্নগদৌরিবনি‍। ভারতকী ফীজিওথেরাপিস্তশিংগী হৈ-শিংবা মালেমগী মমাঙদা পুথোরক্কদৌরিবনি‍।

মরূপশিং,

তেলিমেদিসিন অসিসু অতোপ্পা ইসু অমনি‍। অদোম্না ভিদিওগী খুত্থাঙদা তাথোক তাশিন তৌনবগী থৌওং অমা শেমগৎপা তাই‍। করিগুম্বা মতমদা মসি য়াম্না মতেং ওই‍। তর্কী অমদি সীরিয়াদা মপাঙ্গল কল্লবা য়ুহা হাখি‍। অসিগুম্বা খুদোংথিবা অমগী মতুংদা মশিং য়াম্লবা ফীজিওথেরাপিস্তশিং মথৌ তাই‍। অসিগুম্বা ফীভম অমদা, অদোম্না মোবাইল ফোনগী খুত্থাঙদা মতেং পাংবা য়াই‍। ফীজিওথেরাপিস্ত এসোসিএসন্না মসিগী মরমদা খলহন্নিংই‍। অদোমগুম্বা হৈ-শিংলবশিংগী লুচিং মখাদা, ভারতনা মশা মউ ফবা অমদি খ্বায়দগী ফবা মওংদা লৈবা ঙমগনি হায়না ঐনা চপ চানা থাজৈ‍। অদোমবু থাগৎচরি!

***