ভারতকী প্রধানমন্ত্রী

শক্নাইরবশিং,

ইকায়খুম্নরবা মিনিস্তর হারবর্স;

য়ুনাইতেদ নেসন্স সেক্রেতরি জেনেরেল, মামি মিজুতোরি;

ইকায়খুম্নরবা দিপুতি মিনিস্তর দোক্তর জাতি,

কোলিএসন মেম্বরশিংগী মীহুৎশিং অমসুং মালেমগী লৈবাক কয়াগী ইকায়খুম্নরবা দেলিগেদশিং;

ইবেম্মাশিং অমসুং ইবুংঙোশিং;

তরাম্না ওকচরি!

ইন্তরনেসনেল কনফরেন্স ওন দিজাস্তর রিসিলিয়েন্ত ইনফ্রাস্ত্রকচরগী ৫শুবা ইদিসন্দা মফম অসিদা অদোমগা লোয়ন্না শরুক য়াবা অসিদা ঐ হরাওই। হৌখিবা চহি ৫দা, ইন্তরনেসনেল কনফরেন্স ওন দিজাস্তর রিসিলিয়েন্ত ইনফ্রাস্ত্রকচর অমসুং মসিগা মান্নবা অতোপ্পা মীফমশিংদা অমাং-অতা মায়োক্নবা ঙম্বা ইনফ্রাস্ত্রচরগী লমদা ৱারি শানবা হেনগৎহল্লে।

মসি মখা তানা অপীকপা হিরম অমা ওইদ্রে। মসি মালেমগী থাক্তা অমসুং লৈবাক্কী চাউখৎ-থৌরাংদা অচৌবা মফম অমা কল্লে।

হৌখিবা চহি খর অসিদা, ঐখোয়না খুদোংচাদবশিং নিংথিনা মশক খঙবা ঙম্লে। অনৌবা মতমগী ইনফস্ত্রকচর সিস্তেমশিং অসি অমগা অমগা শম্নৈ। হায়রিবা সিস্তেমশিং অসি অমাং-অতা মায়োক্নবা ঙমহনবগা লোয়ন্না হায়রিবা থবকশিং অসি কৈদৌঙৈদা শীজিন্নবা ফংদ্রিবা মীওই মিল্লিয়ন কয়াদা ঐখোয়না ইনফ্রাস্ত্রকচরশিং খুদোংচাবশিং য়াংবা ফংহনবা দরকার ওইরে। মসি খুন্নাই, শেন্মিৎলোন অমসুং প্রকৃতিগী থবকশিংদা য়াংনা হোংলক্লিবা মরক অসিদা পাংথোকপা ঙমগদবনি।

হন্দক্কী মীফম অসিদা পাম্বৈশিং থিনবা মীৎয়েং চঙবগীদমক ঐনা ইন্তরনেসনেল কনফরেন্স ওন দিজাস্তর রিসিলিয়েন্ত ইনফ্রাস্ত্রকচর থাগৎপা পাম্মী।

ঐখোয়না পাম্বৈশিং থিরিবা অসিদা, ঐগী মীৎয়েংদা, ঐনা থিম ৫ থমজগে:

অহানবদা, মাইপাক্নবগী খ্বাইদগী মরুওইবদি, অনৌবা ইন্সতিতুসনশিংনা কাংলোন চুম্বা ৱাখল্লোন অমা লৈহনবা অসিনি। ঐখোয়না ২১শুবা চহিচাগী খুদোংচাদবশিং কোকহন্নবা ২০শুবা চহিচাগী থৌরাং শীজিন্নবা য়ারোই। মসি খুদম অমগা লোয়ন্না ঐ শন্দোক্না তাকচগে। মল্তি-মোদাল কন্নেক্তিবিতি(প্রধান মন্ত্রী গাতি শক্তি)গী ভারতকী নেসনেল মাস্তর প্লান অসি অখন্নবা ৱাখল্লোন অমনি অমসুং থবক ওইনা পাংথোক্নবা ভারত সরকারগী মরী লৈনবা মিনিস্ত্রিশিং অমসুং দিপার্তমেন্তশিং অমতা ওইনা পুনশিল্লে অমসুং প্রোজেকশিং শেম-শানবা থবকশিংদা রাজ্য সরকারশিং ফাওবা শরুক য়াহল্লে।

লিংখৎখিবা অমসুং থবক তৌবগী ম ওংশিংদা চহি ১০০ নত্ত্রগা মসিদগী হেল্লবা ইন্সতিতুসনশিং হায়বদি রোদৱেজ, রেলৱেজ, এয়রৱেজ অমসুং ৱাতরৱেজ মিনিস্ত্রিশিং অমগা অমগা শম্নবা অসি অরাইবা নত্তে। তুংগী থৌরাং তৌরবা ইন্সতিতুসনশিং শেমগৎনবা থবক কন্না শুদনা, ঐখোয়না মতম শাংনা মতিক চাবা থবক তৌবা নত্ত্রগা মায়োক্নবা ঙম্লোই। ঐখোয়না ইন্সতিতুসনগী অনৌবা থবকশিং অমসুং তেক্নোলোজিগী অনৌবা থবকশিংদা হেন্না পুক্নিং চঙগদবনি।

অনিশুবদা, ঐখোয়গী ইনফ্রাস্ত্রচর শেমগৎপগী থবকশিংদা ঐখোয়না চেকশিন্না হোংদোক-হোঙজিন য়াবগী মতাংদা খনগদবনি। নৌনা ওইরক্লিবা ফিবমশিং ঐখোয়না য়েংগদবনি। করিগুম্বা তুংদা লাক্কদবশিং তম্বা ঙমদবা ফিবম ওইরবদি, ঐখোয়না থবকশিং পাংথোক্নবা লম্বী অমা খক্তদা চৎপা য়ারোই।

অহুমশুবদা, হৌজিক মালেম অসিগী খা থংবা অমসুং অৱাং থংবা শরুক অনিমক্না ৱাৎলিবশিং ফংবা ঙম্নবা ঐখোয়গী ইন্সতিতুসনশিং মতমগা চুনবা মওংদা শেমগৎপা অমসুং খোঙজেল য়াংনা থবক তৌবা দরকার ওই। মখোয় মশাগী হিরমশিংদা ফজনা খঙলবা শীনফম অমগী মীওইশিং ঐখোয়না মথৌ তাই অমসুং তোঙান-তোঙানবা হিরমশিং পুন্না থবক তৌমিন্নবদা নুংঙাইগদবনি।

খুন্নাই অমসুং শেন-থুমগা মরী লৈনবা ৱাফমশিং খঙবা ইঞ্জিনিয়ারশিং ঐখোয়না দরকার ওই অমসুং তেক্নোলোজিনা পীরিবা থাজবশিং খঙবা সোসিএল সাইন্তিস্তশিং ঐখোয়না মথৌ তাই। মসিগী মতাংদা, রিসিলিয়েন্ত ইনফ্রাস্ত্রকচরগীদমক হিরম কয়াগী একাদেমিক নেতৱার্ক অমা হৌদোকপদা ইন্তরনেসনেল কনফরেন্স ওন দিজাস্তর রিসিলিয়েন্ত ইনফ্রাস্ত্রকচরগী থবক্না মরুওইবা থৌদাং অমা লৌগনি।

মরিশুবদা, ইনফ্রাস্ত্রকচরগী থবকশিংগী য়াম্লবা শরুক মালেমগী খা থংবা লৈবাকশিংদা ফংহনবা ঙম্নবা, অৱাং-মখা, মখা-মখা, অৱাং-অৱাং পীথোক-পীশিন তৌনবা ঐখোয়না পাম্মী। মরম অদুনা ঐখোয়না পাম্বৈশিং থিরিবা অসিদা, নৌনা চাউখৎলক্লিবা লৈবাকশিংগী ওইনা ঐখোয়না মমল হোংবা, পাংথোকপা ঙমগদবা অমসুং তুংকোইনা চৎনবা য়াগদবা ফিবমদা মীৎয়েং থমগদবনি।

অরোইবদা, হার্দ এসেতশিং শেমগৎপা খক্তদা য়েংবগী মহুৎতা, মীয়ামদা মতিক চাবা ইনফ্রাস্ত্রকচরগী থবকশিং ফংহনবদা য়েংলগা কয়া য়াম্না মাইপাক্লবগে হায়বা ওনবা অসি য়াম্না মরুওই।

শম্না হায়রবদা, করিগুম্বা ঐখোয়না ঐখোয়গী ইন্সতিতুসনশিং মতমগা চুনবা মওংদা শেমগৎপদা মীৎয়েং চঙলবদি, অপাম্বা খনবগী খুদোংচাবা লৈগদবনি, হিরম কয়াদা পাংথোকপা ঙমগদবনি, অনৌনা চাউখৎলক্লিবা লৈবাকশিংগী থবকশিংদা মীৎয়েং থমগদবনি অমসুং মীয়াম্না মরুওইনা লৌগদবনি অমসুং ঐখোয়গী তুংগী মীরোলশিংগী অমাং-অতা মায়োক্নবা ঙম্বা ইনফ্রাস্ত্রচর শেমগৎনবা ঐখোয়না লম্বীশিং শেম্বা ঙমগদবনি।

ঐখোয় মমাঙদা অমুক্তা থেংনখিদ্রিবা ফিবমশিংদা, অরুবা খুদোংচাদবশিং অমসুং তম্বা ঙমদবা ফিবমশিংদা হিংলি। মসিগা লোয়ন্না ঐখোয়গী লাম্বা লৈতবা খুদোংচাবা কয়া লৈরি। অমাং-অতা থেংনবা ঙম্বগী মতাংদা মালেমগী ওইবা ইহৌ অমা লৈরে।

হৌখিবা চয়োলদা জি-২০ লৈবাকশিং মীফম পাংথোক্তুনা অহানবা ওইনা অমাং-অতা হন্থহন্নবগী মতাংদা ৱাফম কয়া খন্নখ্রে। থা অনিগী মনুংদা সেন্দাই ফ্রেমৱার্ককী খুমাঙচাউশিনবগী মতাংদা খন্ননবা য়ু.এন্না অৱাংবা থাক্কী রাজনিতিগী মীফম অমা পাংথোক্কনি।

মসি অচৌবা খুদোংচাবগী তাঞ্জা অমনি। ঐখোয় মসিগী খুদোংচাবা লৌসি।

অদোম থাগৎচরি!

******