ভারতকী প্রধানমন্ত্রী

য়োর এক্সিলেন্সী প্রধানমন্ত্রী বেঞ্জামিন নেতন্যাহু,

মীদিয়াগী মীহুৎশিং,

প্রধানমন্ত্রী বেঞ্জামিন নেতন্যাহুবু মহাক্কী অহানবা ভারত খোংচৎতা তরাম্না ওকচবা অসিদা অপেনবা অমা ফাওই ।

য়েদীদীহায়াকর, বরুখিমহাবায়িমলেহোদু!

(ঐহাক্কী অথোইবা মরূপ, ভারত্তা তরাম্না ওকচরি!)

ভারত অমসুং ইজরেলগী মরক্তা মরূপ ওইবগী খোংচৎ অসিদা অদোমগী খোংচৎ অসি মতম কয়াগী মমাদগী ঙাইদুনা লৈরকপনি ।

অদোমগী খোংচৎ অসিনা ভারত অমসুং ইজরেলগী মরক্তা দিপ্লোমেতিক্কী ওইবা মরিদা চহি ২৫ মপুং ফাখিবগী থৌরম লোইশিল্লকপগী তঞ্জা অমশু ওইরি ।

ইং ২০১৮ অসিদা ঐখোয়গী অহানবা অতিথী ওইনা অদোমগী খোংচৎ অসিনা ঐখোয়গী অনৌবা চহিগী কেলেন্দরদা অখন্নবা খুদম অমা থম্লে ।

মরূপশিং,

মমাং চহিগী জুলাই থাদা, ঐহাক্কী ইজরেল খোংচৎ মনুংদা ভারতমচা বিলিয়ন ১.২৫গী য়াইফ পাওজেলশিং অমসুং মরূপ ওইবগী মরি অদু ঐহাক্না পুদুনা চৎখি । মদুগী পাওখুমদা, ঐহাক্কী মরূপ বিবিনা লুচিংবা ইজরেলগী প্রজানা ঐহাকপু হরাও তয়াম্বগা লোয়ননা তরাম্না ওকপিখি ।

খোংচৎ অদুদা, প্রধানমন্ত্রী নেতন্যাহু অমসুং ঐহাক্না অমনা অমদা ৱাশক্নখি অমসুং ঐখোয়গী প্রজানা স্ত্রেতেজিক পার্তনরশিপ অমা শেমগৎখি । অমসুং মসি ঐখোয়না সেয়ার তৌরিবা এম্বিসন অমসুং কম্মিতমেন্ত অদুগী খোংথাং অমা ওইখি মদুনা মরম ওইরগা তেনখ্রবা থা তরুক্কী মতুং অসিদা অদোমগী অখন্নবা খোংচৎ অমা ওইনা ভারত্তা লাকপিরি ।

ঙরাং অমসুং ঙসি অসি প্রধানমন্ত্রী নেতন্যাহু অমসুং ঐহাক্না ঐখোয়গী লৈনরিবা মরিশিংদা ওইরিবা ফিভমশিং অদু নৌহৌনা য়েংশিনখি অমসুং ওইথোকপা য়াবশিং অমদি খুদোংচাবশিংগী মতাংদা খন্ন-নৈনখি । ঐখোয়না য়াম্না পাক চাওবা অমসুং মনুং হুৎনা খন্ন-নৈনখি ।

হৌখিবা চহিদা তেল অবীবদা অদোম্না অচৌবা থাংশাং অমা শিজিন্নদুনা ব্যুরিওক্রেতিক রেদ তেপ ককথৎপগী অপাম্বা অদু ফোংদোকখি অমসুং খোংথাং অদু থুজিনখি ।

প্রধানমন্ত্রীবু, ঐহাক্না মসি হায়বদা নুঙাইবা ফাওই মদুদি ভারত্তা মদুমক পাংথোক্নবা ঐখোয় শেম শাদুনা লৈরে । ঐখোয়না মমাংদা লৌখিবা ৱারেপশিং অদু থবক ওইনা পাংথোক্নবা পন্থবা তৌদনা ঐখোয়গী শরুকশিং অদু পীখ্রে ।

মদুগী মহৈশিং অদু হান্ননা উবা ফংলে । ঙসি ঐখোয়না খন্ন-নৈনখিবশিং অদুনা ঐখোয়গী মরক্তা য়ান্নবা হেঙ্গৎহন্নবা অমসুং ঐখোয়গী পার্তনরশিপ হেন্না চেৎশিনহন্নবা অমত্তা ওইনা পুন্সিন্দুনা পান্দম থম্লে ।

মসি ঐখোয়না লম্বী অহুমদা ফংনবা হোৎনগনি:

• অহানবদা, ঐখোয়গী প্রজাশিংগী পুন্সিনা শোক্ন শম্নরিবা অদুগুম্লবা কোওপরেসনগী লমশিংদা হৌজিক লৈরিবা য়ুম্বীশিং অদু ঐখোয়না হেন্না চেৎশিলহনবনি । মখোয়শিং অদুদি এগ্রিকলচর, সাইন্স অমসুং তেক্নোলোজী অমসুং সেক্যুরিতীনি ।

খুমাং চাওশিল্লবা ইজরেলগী প্রেক্তিস অমসুং তেক্নোলোজী পুশিল্লক্তুনা এগ্রিকলচরেল কোওপরেসনগী মরুওইবা মফম অমা ওইহন্নবা অদুগুম্লবা সেন্তর্স ওফ এক্সেলেন্স অদু হেঙ্গৎহনবদা ঐখোয়না ৱাখল্লোনশিং ফোংদোক্নখি ।

ঙাকশেলগী লমদা, ঐহাক্না ইজরেলগী কম্পেনিশিংবু ঐখোয়গী কম্পেনিশিংগা লোয়ননা লিবরেলাইজ তৌরবা এফদিআই রেজিমগী কান্নবা লৌনবা বার্তন তৌরি ।

• অনিশুবদা,

ঐখোয়না ওইল এন্দ গ্যাস, সাইবর সেক্যুরিতী, ফিলম অমসুং স্তার্ত অপ্স অসিনচিংবা কোওপরেসনগী এক্সপ্লোর য়াম্না ওইদবা লমশিংদা খোং থাংজিল্লি ।

• অমসুং অহুমশুবদা,

ঐখোয়গী লমদমশিংগী মরক্তা প্রজা চৎথোক চৎশিন তৌবা অমসুং ৱাখল্লোন পিথোক পিশিন তৌবা কোমথোক্নবা ঐখোয়না ৱারেপ লৌরে । মসিদা মথৌতারিবা অসি পোলিসী লায়থোকহনবা, ইনফ্রাস্ত্রকচর অমসুং কনেক্তিবিতী হেঙ্গৎহনবনি ।   

ঐখোয়গী প্রজাশিংনা অমনা অমগী লমদমদা থবক তৌবা অমসুং চৎথোক চৎশিন তৌবদা লায়থোকহন্নবা ঐখোয়না ইজরেলগা লোয়ননা থবক তৌমিন্নরি । অথুবা মতমদা ইজরেলদা ইন্দিয়ান কলচরেল সেন্তর অমা হাংলগনি ।

সাইন্সকা মরি লৈনবা ইদুকেস্নেল স্ত্রিমশিংদগী নহা ওইরিবা মীওই ১০০ চহিগী ওইনা লৈবাক অনিগী খোংচৎকীদমকশু ঐখোয়না ৱারেপ লৌরে ।

মরূপশিং,

ঙরাং, ভারতকী লৈবাক লৈহাওদা খোংদারবা মতুং অহানবা ওইনা লৈথদুনা, চহি চামগী মমাংদা ইজরেলদা থোকখিবা বেতল ওফ হাইফাদা লৈখিদ্রবা থৌনা ফরবা ভারতকী লান্মীশিং অদুবু নিংশিংদুনা ইকায় খুম্নবা উৎনবা তীন মুর্তী হাইফা চোক নৌনা মমিং থোনবগী থৌরমদা প্রধানমন্ত্রী নেতন্যাহুনা ঐহাক্কা লোয়ননা শরুক য়ামিন্নখি ।

ঐখোয়গী লৈবাক অনিমক্না ঐখোয়গী পুৱারি অমসুং ঐখোয়গী অথৌবশিং অদু কৈদৌনুংদা কাওখিদ্রি । অমসুং প্রধানমন্ত্রী নেতন্যাহুগী অসিগুম্লবা খোংথাং অসি ঐখোয়না থমোয় শেংনা থাগৎচরি ।

লোইশিল্লকপদা, হংচিৎ অসি ঐহাক্কী হোম স্তেত গুজরাত্তা প্রধানমন্ত্রীগা লোয়ননা পুন্না চৎমিন্নবগী খুদোংচাবা অদু ফংজরগদি ঐহাক নুঙাইজগনি ।

মফম অদুদা এগ্রিকলচর, তেক্নোলোজী অমসুং ইনোবেসন অসিনচিংবা তোঙান তোঙানবা লমশিংদা ঐখোয়গী ম্যুচেল কোওপরেসনগা মরি লৈননা ৱাশক ঙাকলিবা অদু য়েংনবগী খুদোংচাবা অমা ফংলগনি ।

প্রধানমন্ত্রী নেতন্যাহু, মিসেজ নেতন্যাহু অমসুং মীহুৎ কাংবুবু ভারত্তা নিংশিংনিঙাই ওইবা খোংচৎ অমা ওইনবা ঐহাক্না য়াইফ পাওজেল পিজরি ।

ময়ামবু থাগৎচরি । তোদা রব্বা!