ভারতকী প্রধানমন্ত্রী

অলিগর মুস্লিম য়ুনিবর্সিতীগী চান্সেল্লর, হিস হোলিনেস দাঃ শেদনা মুফদ্দল সাইফুদ্দিন সাহেব, এজুকেসন মন্ত্রী দাঃ রামেশ পোখ্রিয়াল ‘নিশাঙ্ক’জী, রাজ্যগী এজুকেসন মন্ত্রী শ্রী সঞ্জয় ধোত্রেজী, ভাইস চান্সেল্লর ভাই তারিক মন্সুরজী, প্রোফেসর, স্তাফ, থৌরম অসিদা শরুক য়ারিবা এ.এম.য়ু.গী মহৈরোই লিশিং কয়া, এলম্নি লাখ কয়া, ইকায়খুম্নরবা মীথুংলেনশিং অমসুং মরুপশিংবু খুরুমজরি।

অহানবমক্তদা ঐহাক্না নখোয় খুদিংবু থাগৎচরি। অদোম্না এ.এম.য়ু.গী অসিগুম্বা পুৱারী ওইরগদবা চহি ১০০শুবগী হরাও-তয়াম্বা ফোংদোকপগী থৌরম অসিদা ঐহাকপু নখোয়গী হরাওবগী মরক্তা য়াওনবা খুদোংচাবা পীবীরি। ঐহাক্না সেঞ্চুরী গেৎ, সোসিএল সাইন্স বিভাগ, মাস-কম্ম্যুনিকেসন অমদি অতোপ্পা তোঙান-তোঙানবা বিভাগশিংগী বিলদিংশিংবু নীংথিনা লৈতেংবগী ফোতো কয়া উবা ফংলি। মসিগীশিং অসি বিলদিংখক্তা নত্তে, মসিগা লোইনরিবা মহৈ-মশিং তম্বীবগী পুৱারী ওইরবা কয়া অসি ভারতকী মমল নাইদ্রবা হেরিতেজ অমনি।

ঙসিদি, এ.এম.য়ু.গী দিগ্রী পাইদুনা থোক্লক্লবা মীওই খুদিংনা ভারতকী মমিং লৈরবা মফমশিংদতা নত্তনা মালেমগী লৈবাক খুদিংদা শন্দোক্তুনা লৈরি। ঐহাক্না মীরৈবাক্তা চৎপা মতমদা মফম অসিগী এলম্নিগী মীওইশিং উন্নবদা মখোয় খুদিংনা মখোয়শিংনা এ.এম.য়ু.দা মহৈ তম্লকই হায়দুনা য়াম্না চাউথোকচনা হাইজৈ। এ.এম.য়ু.গী এলম্নিশিংনা কেম্পস অসিদগী ফাগী-জুগাই অমদি শৈরেং থীবগী তোঙানবা মওং অমা লোইনদুনা লাক্নৈ। মখোয়না মালেমগী মফম অমা হেক্তদা লৈরবসু, মখোয়না ভারতকী নাৎ অমসুং চৎনবীশিংবু ইকায় খুম্নদুনা চৎলি।

চাউথোকচনিংঙাই ওইরবা অলিগশিং, নখোয়না অসুম্না হায়নবা নত্ত্রো? মসিগী মরম অসিনা নখোয়গী খোংলোয়শিংনা ইকায় খুম্নরিবনি। চহি চাম্মগী পুৱারী অসিদা এ.এম.য়ু.না মীওই লাখ কয়াগী পুন্সি শেমখি, তোঙানবা অমসুং বৈগ্যানিক ওইরবা ৱাখল্লোন পীবীখি। খুন্নাই, লৈবাক্কী ওইনা করিগুম্বা অমা পাংথোক্নিংবগী ইথিল পীবীখি। ঐহাক্না মীওই খুদিংগী মমিং পল্লবদি, মতম য়াম্না লৌরগনি। এ.এম.য়ু.গী অসিগুম্লবা শক্তাকচনিংঙাই ওইরবা মগুন, ইকায় খুম্ননিংঙাই ওইরবা মঅং অসিদা য়ুম্ফম ওইদুনা শ্রী সয়দ অহমদ খান্না অসিগুম্লবা ইন্সতিত্যুৎ অসিবু লিংখৎলম্লিবনি। মসিগী চহি চাম্মা অসিগী মনুংদা এ.এম.য়ু.গী খুত্থাংদা লৈবাকপু শেবা তৌরিবা মফম অসিগী মহৈরোই অমসুং ওজা খুদিংবু ঐহাক্না থাগৎলি।

হৌজিক লৈরিবা কোরোনাগী খুদোংচাদবশিং অসিগী মনুং অসিদসু এ.এম.য়ু.না খুন্নাইদা তেংবাংলিবা অসিগী মওং অসিসু মমাংদা অমুক্তা তৌখিদ্রিবা মওংনি। মীওই লাখ কয়াবু শেল লৌদনা তেস্ত তৌবীবা, আইসোলেসন ৱার্দ শেম্বীবা, প্লাজমা বেঙ্ক শাবীবা অমসুং পি.এম. কেয়র ফন্দদা য়াম্লবা শেনফম পীবীবগী থৌওংশিং অসিনা অদোম্না খুন্নাই অসিগীদমক্তা নখোয়না পাংথোক্কদবা থৌদাংশিংদা কয়া য়াম্না লুনা খল্লি হায়বসি তাক্লিবনি। ঐহাক্না নুমিৎ খরনিগী মমাংদা চান্সেল্লর দাঃ শেদনা সাহেবকী চিথি ফংজখি। মহাক্না ভেক্সিনেসনগী দ্রাইব চত্থবদসু অসিগুম্না তেংবাংগনি হায়না ইবিরকখি। লৈবাক অসিবু মাং থানা থমদুনা, অসিগুম্লবা নীংথিনা থৌরাং য়াৎনা পাংথোকপা থৌওং কয়া অসিনা কোরোনাগুম্বা মালেমগী লাইচৎ অসিবু লান্থেংনবা ঙম্লিবনি।

মরুপশিং,

এ.এম.য়ু.গী কেম্পস অসি শহর অমাগুম্বনি হায়না মীওই কয়ানা ঐঙোন্দা হায়। মসিগী বিভাগশিং, হোস্তেল দর্জন কয়া অমা লৈরিবা, ওজা, প্রোফেসর, মহৈরোই লিশিং কয়া লৈরিবা অসিগী মরক্তা অপিকপা ভারত অমগী মমি অমসু উবা ফংই। এ.এম.য়ু.দা নাকল অমদা উর্দু তম্বীবগা লোইননা অতোপ্পা নাকল অমদা হিন্দি অমসুং আরবী খক্তা নত্তনা সংস্কৃতসু মসিগী চহি চাম্মা অসিদা তম্বীদুনা লাক্লি। মফম অসিগী লাইব্রেরীদা কুরানগী মেনুস্ক্রিপ লৈবতা নত্তনা গীতা-রামায়নগী ৱাহন্থোক কয়াসু নীংথিনা শেম-শাদুনা থম্লি। অসিগুম্লবা তোঙান-তোঙানবগী মওং অসি এ.এম.য়ু.গী মগুন ওইবতা নত্তনা মসিনা ভারতকী পাঙ্গলসু ওইরিবনি। ঐখোয়না মসিগী মতিক অসিবু কৈদৌনুংদা কাওরোইদবনি অমসুং মসিগী মপাঙ্গলসু শোন্থহল্লোইদবনি। এ.এম.য়ু.গী কেম্পস অসিদা নোংম-নোংমগী ওইনা মতিক লৈবা ভারতকী ৱাখল্লোন অসি মপাঙ্গল হেনগত্তুনা লাক্লি অমসুং ঐখোয়না খুদিংনা অপুনবা অমা ওইনা হীরম অসিগী মতাংদা থবক তৌমিন্নগদবনি। 

মরুপশিং,

হৌখিবা চহি ১০০ অসিদা এ.এম.য়ু.না মালেমগী লৈবাক কয়া অমবু ভারতকা মরী চেৎশিনহন্নবা হোৎনবগী থবক কয়াসু পাংথোক্তুনা লাক্লি। উর্দু, আর্বী অমসুং ফার্সি লোলদা মফম অসিদা রিসর্চ তৌরিবা, ইস্লামিক লিতরেচরদা রিসর্চ তৌরিবা অসিনা ইস্লামগী ওইবা মালেমগা ভারতকী নাৎকগী মরীসু নকশিন্ননা থম্লি। মফম অসিদা মীরমদগী মহৈরোই লিশিং অমামুক্না মফম অসিদা মহৈ তম্লি হায়না ঐঙোন্দা পাউদম্লি। অসিগুম্বা ফিভম অসিদা, লৈবাক অসিগী ফজবশিং, মপাঙ্গলশিং অসিবু য়েংদুনা, তমদুনা অমসুং ময়াম অসিগী মওংশিং অসি নীংশিংহন্দুনা মখোয়না মখোয়গী মরমদা হলহনখিবা অসি এম.এম.য়ু.গী থৌদাং অমনি। করিগীনো হায়বদা, মখোয়না কেম্পস অসিদা তাবা, উবা খুদিংমক অসিদা য়ুম্ফম ওইরগা ভারতকী মশক তাক্কদৌরিবনি। মতৌ অসুম্না, নখোয়গী মফম অসিদা অহেনবা অমসুং তোঙানবা থৌদাং অমা লৈরিবনি। 

ইশাগী ইকায় খুম্নবা হেনগৎহন্নবা অমসুং ইশাগী থৌদাং নীংথিনা পাংথোকপগী থৌদাং অমা লৈ। নখোয়না নাকল অমদা নখোয়গী য়ুনিবর্সিতী অসিগী সোফ পাৱর মপাঙ্গল কনখৎহন্নবা হোৎনবতা নত্তনা নাকল অমদনা লৈবাক অসিবু শেমগৎ-শাগৎপগী থৌদাং অসিসু লেপ্তনা পাংথোক্কদবনি। এ.এম.য়ু.গা মরী লৈনবা মীওই অমসুং মহৈরোই খুদিংমক্না মখোয়গী তৌফম-থোকপশিংবু নীংথিনা মশক খঙবগা লোইননা তুং-লমচৎকীদমক্তা চৎকদবনি। সয়দনা হায়রম্বা ৱাফম অমা ঐহাক্না নখোয়দা হায়জনীংই। মহাক্না অসুম্না হায়রম্মি – “মশাগী লৈবাক্কীদমক্তা খঞ্জবা মীওই অমগী অহানবা অমসুং খ্বাইদগী মরু ওইবা থৌদাংদি লৈবাক অসিদা লৈরিবা মীওই খুদিংগী ফনবগীদমক্তা থবক তৌবা অসিনি। মীয়াম অসিগী জাতি অমসুং লাইনিং খেৎনজরবসু, মখোয়গী ফনবা থবক তৌগদবনি”।

মরুপশিং,

সয়দনা মহাক্কী অসিগুম্লবা ৱাফম অসিগা লোইননা খুদম অমসু পীরম্মি। মহাক্না হায়রম্মি –“ মীওই অমনা মহাক্কী পুন্সি অমসুং হকশেলবু ফনা লৈহন্নবগীদমক্তা মহাক্কী হকচাং কয়াৎ খুদিংমকপু ফনা লৈহনবগুম, লৈবাক অসিবু চাউখৎহন্নবগীদমক্তা হীরম খুদিংমক্তা চাউখৎপগী তঙাই ফদবসু লৈ।“

মরুপশিং,

ঙসিদি লৈবাক অসিনা মসিগী ওইরক্লিবা চাউখৎপগী ফিভমশিংগী খুদোংচাবা কয়া অসি মীওই খুদিংনা অচান-মীরাই নাইদনা ফংবগী লম্বীদা চৎলি। লৈবাক অসিগী মীওই খুদিংনা সংবিধানগী মতুং ইন্না ফংফম থোকপা হক ফংদুনা অমসুং মখোয়গী তুংগী পুন্সিগী ওইনসু মশাদা থাজবগা লোইনবা অমসুং ধর্মনা মরম ওইদুনা খুদোংচাবা মাঙদবা অমসুং মান্নবা খুদোংচাবা ফংদুনা মশাগী মঙলানশিংসু মংফাওনবা ঙম্বগী লম্বী অমদা লৈবাক অসিনা চৎলি। লৈবাক অসিনা “সবকা সাথ, সবকা বিকাস, সবকা বিস্বাস”তা য়ুম্ফম ওইদুনা চৎলি। লৈবাক অসিগী থৌওংশিংদা হায়রিবা ৱাফমশিং অসিগী মমি উবা ফংই। লৈবাক অসিনা লায়রবশিংগীদমক্তা পায়খৎলিবা য়োজনাশিং অসিগী কান্নবশিং অসি ধর্মগী অচান-মীরায় লৈতনা মীওই খুদিংনা ফংলি।

অচান-মীরায় নাইদবা মওংদা লৈবাক অসিগী লায়রবা করোর ৪০গী বেঙ্ক একাউন্ত হাংলে, করোর ২ হেনবা লায়রবশিংগী পক্কা য়ুম শারে, করোর ৮ হেনবা নুপীশিংদা গ্যাস কন্নেক্সন ফংলে।  কোরোনাগী মতম অসিদসু লৈবাক অসিগী মীওই করোর ৮০দা অচান-মীরাই নাইদনা চান-থক্নবা কয়া লেম্না পীরি। অয়ুশমান য়োজনাগী মখাদা লায়রবা মীওই করোর ৫০দা লুপা লাখ ৫ ফাওবগী খুদিংচাবা পীদুনা অচান-মীরাই নাইদনা লেম্না লায়েংলে। লৈবাক অসিগী ওইবা খুদিংমক লৈবাক্কী মীওই খুদিংগীনি অমসুং মসিগী কান্নবশিং অসি মখোয় খুদিংনা ফংফম থোকই। ঐখোয়গী সরকারনা মসিগী ৱাফমশিং অসিগা লোইননা থবক পাংথোক্লি।

মরুপশিং,

ঐহাক্না নুমিৎ খরনিগী মমাংদা অলিগর মুস্লিম য়ুনিবর্সিতীগী এলম্নি অমগা উন্নখি। মহাক অসি ইস্লামিক স্কোলার অমনি। নখোয় খুদিংদা ঐহাক্না পাউদম্নিংবা য়াম্না নুংঙাইবা ৱাফম অমা মহাক্না ঐঙোন্দা হায়বীখি। স্বচ্ছ ভারত মিসনগী মতুং ইন্না লৈবাক অসিদা অমাংশঙ করোর ১০দগী হেন্না শাখিবা অদুদা মীওই খুদিংনা কান্নবা ফংনখি। মসিগী অমাংশঙশিং অসিসু অচান-মীরাই নাইদনা শাখিবনি। তৌবতবু মসিগী থৌওং অমদি মীয়াম্নসু পন্নখিদে অমসুং একাদমিক ৱর্ল্দদসু নৈনখিদে। ঐহাক্না অলিগর মুস্লিম য়ুনিবর্সিতী মহৈরোই খুদিংনা মসিগী হীরম অসিদা পুক্নিং চংহন্নিংই।

ঐহাক্কী মরুপশিং,

মতম অমদা ঐখোয়গী লৈবাক অসিগী মুস্লিমগী ইচানুপীশিংগী মহৈ তম্বা তোকপগী চাং অসি ৭০%দগী হেল্লম্মি। মুস্লিম খুন্নাই চাউখৎপদা অসিগুম্বা মওংদা নুপীমচাশিংনা মহৈ তম্বা তোকপা অসিনা মতম পুম্বদা অয়েৎপা অমা ওইদুনা লাক্লি। অদুবু চহি ৭০দগী হেন্না মসিগী ৭০%গী চাংদা মহৈ তম্বা তোকপগী চৎনবী অসি চত্থদুনা লাক্লি। মসিগী তাল্লক অসিদা স্বচ্ছ ভারত মিসন হৌদোকখি অমসুং খুঙ্গং খুদিংদা অমাংশঙ শাখি। সরকারনসু স্কুল কারিবী নুপীমচাশিংগী ওইনা মিসন মোদতা অমাংশঙ শাখি। হৌজিক লৈবাক অসিনা করি ফিভমদা লৈরি? মুস্লিম ইচানুপীশিংনা মহৈ তম্বা তোকপগী চাং অসি ৭০% ওইরম্বা অদু হৌজিক্তি হন্থরক্তুনা ৩০%দা লৈরে।

অহানবদদি মুস্লিম ইচানুপীশিংনা অমাংশঙ লৈতবদগী মহৈ তম্বা তোক্নখি। হৌজিক্তি ফিভম অসি হোংলক্লি। মুস্লিম ইচানুপীশিংনা মহৈ তম্বা তোক্তনবা হায়দুনা কেন্দ্র সরকারনা কন্না হোৎনরি। নখোয়গী য়ুনিবর্সিতী অসিদসু মহৈ তম্বা লেপ্লুরবা মহৈরোইশিংগী ওইনা ‘ব্রিজ কোর্স’ চলায়রি। হৌজিক্তসু ঐহাক্না য়াম্না নুংঙাইজবা ৱাফম অমা ঐঙোন্দা তম্লকখি। হৌজিক্তি এ.এম.য়ু.দসু মহৈ নুপীশিংগী মশিং অসি হেনগৎলক্তুনা ৩৫%গী চাংদা য়ৌরক্লে। মসিগীদমক্তা ঐহাক্না নখোয়বু থাগৎনিংই। মুস্লিম ইচানুপীশিংগী মহৈ তম্বদা, মখোয়গী মপাঙ্গল হাপ্নবগীদমক্তা সরকারনা মিৎয়েং চঙলি। হৌখিবা চহি ৬ অসিদা সরকারগী মাইকৈদগী মুস্লিম ইচানুপী চাউরাকপা করোর ১দা স্কোলার্শিপ পীখ্রে।

মরুপশিং,

জেন্দরদা য়ুম্ফম ওইরগা অচান-মীরাই লৈতবা, মীওই খুদিংমক্কী ফংফম থোকপা হক ফংহনবা অমসুং লৈবাক চাউখৎপগী খুদোংচাবা মীওই খুদিংদা ফংহনবা হায়বশিং অসি এ.এম.য়ু. হৌদোকখিবা মতমদা য়াওখিবা পান্দম্নি। এ.এম.য়ু. হৌদোকখিবদা মসিগী ফাউন্দর চান্সেল্লরগী থৌদাংশিং অসি বেগম সুলতান্না লৌরমখিবা অসিদা এ.এম.য়ু.না ঙসি ফাওবদা চাউথোকচরিবনি। চহি চাম্মগী মমাংদা ফাওবা অসিগুম্বা ৱাখল্লোন লৈরম্বা অসি কয়াদা চাউরবা থবক্নো হায়বসি মীয়াম্না খন্থবা য়াই। মতম অদুদা মতমগা চান্নবা মুস্লিমগী খুন্নাই অমা লৈহন্নবা হোৎনখিবা অদুবু তলাক অহুমগুম্বা চৎনবী অসিবু লৈবাক অসিনা মুত্থত্তুনা মখা তানা লেপ্তনা চত্থরি।

মরুপশিং,

করিগুম্বা নুপী অমনা মহৈ-মশিং হৈরবদি, মহাক্কী ইমুং পুম্বা মহৈ-মশিং হৈবনি হায়না হায়নরম্মিবনি। অদুবু ইমুং মনুং পুন্না মহৈ-মশিং হৈবা অসিগিসু অহেনবা ৱাহন্থোক লৈরি। নুপীশিংবু মহৈ-মশিং হৈহনগদৌরিবা অসি মহাক্কী হকপু মতাং চানা শিজিন্নবা অমসুং মশাগী মরাইবক মশানা লেপচবা ঙমহন্নবনি। এজুকেসন অসিনা থবক্কী খুদোংচাবা অমসুং ওন্তোপ্রিনর্শিপকী খুদোংচাবা অনিমক পুদুনা লাকই। থবক্কী খুদোংচাবা অমসুং ওন্তোপ্রিনর্শিপকী খুদোংচাবা অসিনা শেন্মিৎলোন্দা নিং-খা তম্বা পুরকই। মপাঙ্গল লৈরবা নুপী অমনা হীরম খুদিংদা অমসুং ৱারেপ খুদিংদা অতৈগা মান্নবা ফিদম লৈরিবনি। ইমুং-মনুং নত্ত্রগা লৈবাক্কী লমদা মাইকৈ তাকপা ওইরো, হীরম খুদিংদা মহাক্কী মান্নবা ফিদম লৈ। ঐহাক্না ঙসি নখোয়গা ৱারী শারিবা অসিদা লৈবাক্কী অতোপ্পা ইন্সতিত্যুৎশিংদসু নুপীমচাশিংবু য়ারিবমখৈ মহৈ-মশিং তম্বীবগা মরী লৈহন্নবীয়ু হায়না হায়নিংই। মখোয়দা ইচম চম্বা মহৈ-মশিং পীবতা নত্তনা অৱাংবা থাক্কী মহৈ-মশিংসু তম্বীয়ু হায়নিংই।

মরুপশিং,

এ.এম.য়ু.না মহাক্কী অৱাংবা থাক্কী মহৈ-তম্বীবগী লমদা মহাক্কী কন্তেম্পোরেরী করিকলমশিং কয়াগী পুক্নিং চিংশিনলি। অদোমগী য়ুনিবর্সিতীদা হান্নদগী হৌনা ইন্তর-দিসিপ্লিনরীগী হীরম অসি তম্বীদুনা লাক্লি। করিগুম্বা মহৈরোই অমনা সাইন্স অমসুং হিস্ত্রী পাম্লবদি, অনি অসিগী মরক্তগী অমখক্তং খন্দবা য়াদে হায়না লৈরিবা অসি করিগীনো? মসিগী মান্নবা হীরম অসি অনৌবা নেস্নেল এজুকেসন পোলিসীদসু পনলি। মসিদা ২১শুবা চহি চাগী মহৈরোইশিংগী তঙাই ফদবশিং অমসুং অপাম্বশিংবু খন্নবদা মিৎয়েং চঙলি। ঐখয়গী লৈবাক্কী নহারোলশিং অসিনা লৈবাক্না হান্না হায়রিবা ৱাখল্লোন অসিগা লোয়ননা মাং থানা চৎনবা ইথিল পীরি। মখোয়না অনৌ-অনৌবা স্তার্ত-অপশিংগী খুত্থাংদা লৈবাকপু খুদোংচাদবা কয়াগী ৱারোইশিন পীরি। রেস্নেল থিঙ্কিং অমসুং সাইন্তিফিক আউৎলুক অসিনা মখোয়গী অহানবা মিৎয়েং চঙবগী লম ওইরি। 

অনৌবা নেস্নেল এজুকেসন পোলিসী অসিদা ভারতকী নহাশিংদা মসিগী ৱাখল্লোন অসিগী ইথিল পীরি। ভারতকী এজুকেসনগী ইকো-সীস্তেম অসি মালেমগী মতমগা চান্নবা অমা ওইহন্নবা ঐখোয়না কন্না হোৎনরি। অনৌবা নেস্নেল এজুকেসন পোলিসী অসিদা মলতিপল এন্ত্রী অমসুং একজিৎ পোইন্ত য়াওরি অমসুং মসিনা মহৈরোই অমদা মহাক্কী মহৈ-মশিং তম্বগী মতাংদা ৱারেপ লৌবদা লাইহল্লি। একজিৎ ওপ্সন খুদিংগী মতুংদা মখোয়দা মদুগা চান্নবা সর্তিফিকেৎসু পীগনি। মসিনা মহৈরোই অমদা অপুনবা কোর্সকী ফীগী মতাংদা নুংনাংবা লৈহন্দনা মশাগী অপাম্বা ৱারেপ লৌবদা নিং তমহনগনি।

মরুপশিং,

সরকারনা অৱাংবা থাক্কী মহৈ তম্বদা এনরোলমেন্ত তৌবগী মশিং হেনগৎহন্নবা অমসুং সিৎ মশিং হেনগৎহন্নবা লেপ্তনা থবক পায়খৎলি। ইং ২০১৪দা ঐখোয়গী লৈবাক্তা আই.আই.তি. ১৬ লৈরম্মি। ঙসিদি আই.আই.তি. ২৩ লৈরে। ইং ২০১৪দা ঐখোয়গী লৈবাক্তা আই.আই.আই.তি. ৯ লৈরম্মি। ঙসিদি আই.আই.আই.তি. ২৫ লৈরে। ইং ২০১৪দা ঐখোয়গী লৈবাক্তা আই.আই.এম. ১৩ লৈরম্মি। ঙসিদি আই.আই.এম. ২০ লৈরে। মেদিকেল এজুকেসনগী লমদসু থবক য়াম্না পায়খৎলে। চহি ৬কী মমাংদা লৈবাক অসিদা এমস ৭খক লৈরম্মি, অদুবু ঙসিদি ২২ লৈরে। মহৈ-তম্বা অসি ওনলাইন ওইরো নত্ত্রগা ওফলাইন ওইরো, হৌজিক্তি মসি মীপুম খুদিংমক্তা চাং-নাইনা ফংহল্লে। মসিনা মীওই খুদিংগী মপুন্সি হোংহল্লে অমসুং ঐখোয়না মসিগী পান্দম অসিগা লোয়ননা থবক পায়খৎলি।

মরুপশিং,

এ.এম.য়ু.না চহি ১০০ শুরকপা অসিদা, নহা ওইরিবা অদোমগুম্বা পার্ত্নর্শিংদগী ঐহাক্না অপাম্বা খরা থম্মি। চহি ১০০ শুরকপা অসিদা এ.এম.য়ু.গী হোস্তেল ১০০দা এক্সত্রা-করিক্যুলার তাস্ক অমা তৌবা য়াদবরা? মসিগী তাস্ক অসিনা লৈবাক অসিনা নিং-খা তম্লকপগী চহি ৭৫শুবগা মরে খরা লৈনৈ। এ.এম.য়ু.দা অচৌবা ইন্নোভেতিব অমসুং রিসর্চতা মিৎয়েং চঙবা তেলেন্ত কয়া অমা লৈ। হোস্তেলগী মহৈরোইশিং অসিনা মীয়াম্না নীংথিনা খঙদ্রিবা নিং-তম লালহৌগী লান্মীশিংগী মরমদা থিজিন্দুনা লৈবাক মীয়াম মাঙদা পুথোরকপা য়াগদরা? মহৈরোই খরনা অসিগুম্বা মীওইশিং অসিগী পোক্নফম লমদম, শিফমদা চত্তুনা, মখোয়গী ইমুংগী মীওইশিং হৌজিক কদাইদা লৈরিবগে খঙদোক্তুনা মখোয়গা পাউ ফাওনবা হোৎনসি। মহৈরোই খরনা ওনলাইনগী রিসোর্স শিজিন্নদুনা খঙদোক্নবা হোৎনসি। খুদম ওইনা হায়রবদা, হোস্তেল ৭৫না আদিৱাসি নিং-তম লালহৌগী মতাংদা দোক্যুমেন্ত শেম্বা য়াই। মতৌ অসুম্না, হোস্তেল ২৫না নুপী নিং-তম লালহৌগী মতাংদা থিজিন হুমজিনবগী থবক চত্থবা য়াই।

এ.এম.য়ু.গী মহৈরোইশিংনা লৈবাক্কীদমক্তা তৌবা য়াবা থবক অমসু লৈ। এ.এম.য়ু.দা লৈবাক অসিগী মমল নাইদ্রবা ইদুনা লৈরম্লবা লাইরিক কয়া অমা লৈ। মখোয়শিং অসি ঐখোয়গী লৈবাক্কী ওইবা হেরিতেজশিংনি। মখোয়শিং অসিবু দিজিতেল নত্ত্রগা ভর্চুএলগী খুত্থাংদা মালেম পুম্বগী মাংদা পুথোক্লকপা অসি ঐহাক্না য়াম্না পামজৈ। ঐহাক্না এ.এম.য়ু.গী এলম্নি নেৎৱর্ক্তসু অনৌবা ভারত অমা ওইহন্নবা হোৎনরিবা থৌওংশিং অসিদসু শরুক য়াবীয়ু হায়না হায়রি। আত্মানির্ভর ভারত অভিয়ান, ভোকেল ফোর লোকেলবু হেন্না মাই-পাকহন্নবা থবক কয়া অমা পাংথোকপগী তঙাই ফদবা লৈরি। মসিগী মতাংদা করিগুম্বা এ.এম.য়ু. অমসুং মসিগী এলম্নিদগী পাউতাক অমসুং ৱারোইশিন কয়া ফংবা ঙম্লবদি, ঐহাক্না য়াম্না নুংঙাইগনি।

মরুপশিং,

ঙসিদি মালেম পুম্বনা ভারত্তা মিৎয়েং থম্লি। চহি চা অসিবু ভারতকী মতম্নি হায়রিবা অসিদা অমসুং মসিগী পান্দম অসি ফংনবা ভারতনা মতৌ করম্না থবক পাংথোক্কনি হায়বসিগী মতাংদা মালেম পুম্বনা খোইরাংবা ফাওরি। মরম অদুনা পান্দম অসি ফংবা অসি মীওই খুদিংগী অমত্তা ঙাইরবা ৱাখল্লোন ওইগদবনি। ঐখোয় অসি কদাইদা অমসুং করম্বা ইমুংদা পোক্লকই, করি ধর্মনো হায়বসিদগী হেন্না লুরিবদি ঐখোয়না লৈবাক অসিগী মীওই অমা ওইনা লৈবাক অসিগী অপাম্বা অসিগা মতৌ করম্না মরী লৈনগদগে হায়না খনগদবনি। মসিগী মতাংদা ঐখোয়না অমত্তা ওইনা লেপ্লবা মতমদা ঐখোয়গী পান্দম অসি ফংবদা হেন্না লাইগনি।

মরুপশিং,

খুন্নাই অমদা খেৎনবা ৱাখল্লোন লৈবা অসি মশানা তাবনি। অদুবু হীরম অসিনা লৈবাক্কী পান্দমগী মতাংদা লাক্লবদি, খেৎনবশিং অসি নাকলদা থমগদবনি। করিগুম্বা নহা নখোয়না অসিগুম্বা ৱাখল্লোনগা লোইননা মাং থানা থোক্লক্লবদি ঐখোয়না ফংবা ঙম্লোইদবা পান্দম অমত্তা লৈরোই। মহৈ-মশিং তম্বা, শেন্মিৎলোন চাউখৎপা, অফবা য়াইফ-য়ুম্বাল, খুদোংচাবা ফংবা, নুপীশিংগী ফংফম থোকপা হক ফংহনবা, লৈবাক ঙাক-শেনবা, লৈবাক নিংবগী ইথিল নত্ত্রগা মীওই খুদিংগী তঙাই ফদ্রবা পোৎলমশিং ফংবগী হীরমশিং খুদিংমক লোইনা ফংবা ঙমগনি। মসিগী হীরমশিং অসি ঐখোয়গী রাজনীতিগী নত্ত্রগা ইশাগী তোঙানবা ৱাখলনা মরম ওইদুনা নাথৈবা য়াবা অমত্তা নত্তে। মসিগী মরমদা ঐহাক্না মফম অসিদা হায়রিবা অসিগী মরমদি মফম অসিদগী নিং-তম লান্মী কয়া থোক্লকখিবা লৈখিবগীনি। মখোয় লোইনমক মফম অসিদগী হৌরকখিবা ঙাক্তনি। মখোয়শিংগীসু ইমুং-মনুংগী, খুন্নাইগী অমসুং মশাগী ওইবা তোঙান-তোঙানবা ৱাখল্লোন লোইনা লৈখিবা ঙাক্তনি। অদুবু মীখা পোনবদগী নিং-তম্বা ফংবগী মতাং লাকপদদি, মখোয়গী ৱাখল্লোনশিং অসি নিং-তম্বা ফংবগী পান্দম ওইনা অমত্তা ওইখি।

মরুপশিং,

ঐখোয়গী ইপা-ইপুশিংনা নিং-তম্বা ফংনবগীদমক্তা পাংথোকখিবা খুদিংমক ঙসিদি নখোয়না অনৌবা ভারত অমা ওইহন্নবগীদমক্তা পাংথোকপা তাবনি। নিং-তম্বা ফংবা অসিনা অমত্তা ওইরবা ৱাখল্লোন ওইখিবগুম্না অনৌবা ভারত অমা ওইহন্নবা অমত্তা ওইবা ৱাখল্লোন লৈদুনা থবক তৌবা তাবনি। অনৌবা ভারত অসিদি মরোমদোম লেপচবা ঙমগনি হায়না পুন্না খনমিন্নরবদি করোর ১৩০ হেনবা লৈবাক্কী মীওই খুদিংমক কান্নবা ফংগনি। মসিগী খন্ন-নৈনবা অসিবু লৈবাক্কী মফম খুদিংদা য়ৌহনবা অসি নহা ওইরিবা নখোয় খক্তনা তৌবা ঙমগনি।

মরুপশিং,

রাজনীতি অসি ঐখোয়গী খুন্নাই অসিগী মরু ওইরবা শরুক অমনি হায়বসি ঐখোয় খঙগদবনি। অদুবু খুন্নাই অসিদা রাজনীতি নত্তবা অতোপ্পা হীরমশিংসু লৈরি। রাজনীতি অমসুং লৈঙাক্কী ৱাখল্লোন অসিদগী লৈবাক্কী খুন্নাইগী ৱাখল্লোন অসিনসু হেন্না মরু ওই। খুন্নাই অমবু করম্না চাউখৎহনসিগে হায়বা রাজনিতীদগী হেন্না মরু ওইবা স্পেস অমসু লৈ। মসিগী স্পেস অসিগী মতাংদা ঐখোয়না খঙদোকপা অসি য়াম্না মরু ওইবনি। মসিগী থবক অসি ঐখোয়গী এ.এম.য়ু.গী কেম্পসকুম্বনা তৌবা ঙমগনি, নখোয়না তৌবা ঙমগনি।

মরুপশিং,

ঐখোয়না অনৌবা ভারতকী ৱারী শাবা মতমদা খুন্নাইগী চাউখৎপা পুরকপা অসি রাজনীতিগী মিৎয়েংদা য়েংবা য়ারোই। হোই, ঐখোয়না অপুনবা ওইনা হীরম অসিদা থবক পায়খৎলকপা মতমদা মীওই খরদি নুংঙাইতবা ফাওবা অসিদি অদুমক থোক্কনি। মসিগী থৌওং অসিদি মালেমগী খুন্নাই খুদিংদা থোক্কনি। মশা খক্তগী খনবা মীওইসু অদুমক লৈগনি। মখোয়না মখোয়গী ওইজনবগীদমক্তা মীয়ামগী পুক্নিং হন্থহনবা থৌওং অদুমক পাংথোক্লক্কনি। অদুবু ঐখোয়গী পুক্নিং অমসুং ৱাখল্লোন্দা অনৌবা ভারত অমা পুরকপা অসি লেংদনা লৈখিবা মতমদা অসিগুম্বা ফত্তবা ইথিল অসি মশা-মথন্তনা অদুমক মাঙজখিগনি।

মরুপশিং,

রাজনীতিদি ঙাইবা য়াই অদুবু খুন্নাইদি ঙাইবা য়ারোই। লৈবাক চাউখৎপা অসিদি ঙাইদুনা লৈবা য়ারোই। খুন্নাইগী কাঙলুপ অমসুং লায়রবশিংদি ঙাইবা য়ারোই। নুপীশিং, শোত্থরবা, তুহৎপীরবশিংনা ঙাইরগা লৈবসু পাম্লোই। খ্বাইদগী মরু ওইবা অমনা, লৈবাক অসিগী নহাশিং, নখোয়নসু ঙাইদুনা লৈবসি খক পাম্লোই। হৌখিবা চহি-চাদা মতম কয়া অমা খেৎনবগী মিংদা মাঙখ্রে। হৌজিক্তি মতম মাঙহনবা য়াদ্রে, মীপুম খুদিংনা অমত্তা ওইনা পুন্দুনা অনৌবা ভারত অমা ওইহন্দুনা মসিবু মরোমদোম লেপচবা ঙমহনগদবনি।

মরুপশিং,

চহি ১০০গী মমাংগী ইং ১৯২০গী নহাশিংনা লৈবাক্কী নিং-তম্বা ফংনবগীদমক্তা লান্থেংনবা অমসুং মশাগী পুন্সিবু কত্থোকপগী খুদোংচাবা ফংখি। মখোয়গী মতমগী মীওইশিংনা কত্থোকখিবা অদুগী মতেংনা ইং ১৯৪৭তা লৈবাক অসিনা নিং-তম্বা ফংখি। নখোয়গী ওইনা অনৌবা ভারত অমা শেম্নবা, মসিবু মরোমদোম লেপচবা ঙমহন্নবা খুদোংচাবা য়াম্না লৈরে। মতম অদুগী মতম্না ইং ১৯২০, হৌজিক্না ইং ২০২০নি। ইং ১৯২০গী চহি ২৭কী মতুংদা লৈবাক অসিনা নিং-তম্বা ফংখি। ইং ২০২০গী চহি ২৭কী মতুং, হায়বদি ইং ২০৪৭তা, অসি নখোয়গী ওইনা য়াম্না মরু ওইবা মতম ওইরগনি।

ইং ২০৪৭তা লৈবাক অসিনা নিং-তম্বা ফংবগী চহি ১০০ শুবা মতমদুগী পুৱারী ওইরবা মতম অদুগী নখোয়না শাখি ওইগদৌরিবনি। মসিদা নত্তনা, মসিগী চহি ২৭ অসিদা মতমগা চান্নবা ভারত অমা ওইহন্নবা নখোয়গী অচৌবা থৌদাং লৈগদৌরিবনি। নখোয়না মতম খুদিংদা লৈবাক্কীদমক্তা খনগদবনি, নখোয়গী ৱারেপ খুদিংমক লৈবাক্কী অফবা ওইবদা য়ুম্ফম ওইগদবনি।

ঐখোয়না অমত্তা ওইনা হোৎনদুনা লৈবাক অসিবু মরোমদোম লেপচবা ঙমহনগনি, লৈবাক অসিবু চাউখৎপগী অনৌবা থাক অমদা পুখৎপা ঙমগনি হায়বগী ঐহাক্না থাজবা থম্মি। এ.এম.য়ু.না চহি ১০০ শুরকপা অসিদা নখোয়বু অমুক্কা হন্না ঐহাক্না য়াইফ-পাউজেল পীরি। অদুগা হায়রিবা চহি ১০০ অসিদা মসিগী ইন্সতিত্যুসন অসিবু অনৌবা থাক অমদা পুখৎনবা থৌওং কয়া পাংথোকখিবশিংগী মফমদসু মখোয়বু নীংশিংদুনা ঐহাক্না ইকায় খুম্নবা উৎলি। অদুগা অসিগুম্লবা য়াইফরবা মতম অসিদা তুংদসু মাই পাকপা কয়া লাকপা ওইরসনু হায়না ঐহাক্না য়াইফ পাউজেল পীরি। মালেম শিনবা থুংনা লৈরিবা এলম্নিশিংবুসু মখোয়গী হকশেল অমসুং য়াইফ-য়ুম্বালদা অফবা ওইরসনু অমসুং তুংদসু মাই-পাকপা কয়া ফংবা ওইরসনু হায়না য়াইফ পাউজেল পীরি। অমসুং সরকার অসিনা নখোয়গী চাউখৎপা অমসুং মঙলানশিংবু মঙফাওনহন্নবা হোৎনবা কৈদৌনুংদা তুং হন্দুনা চৎলোই হায়না থাজবা পীরি।

মসিগী থাজবা অসিগা লোয়ননা, পুম্নমকপু অমুক হন্না থাগৎচরি।

****