ভারতকী প্রধানমন্ত্রী

মশিং য়াম্না লেংবিরক্লিবা ঐহাক্কী নুংশিজরবা ইচল ইচে অমসুং ইচিল ইনাওশিং । হিন্দুস্থান্না নুমীৎ থোক্লকপা য়েংগে হায়রগদি অরুনাচলগী মায়কৈরোমদা মায় ওন্সিনবা তাই । ঐখোয়গী লৈবাক পুম্বানা, মীওই কোতী চামগা তরামঙা অসিনা নুমীৎ থোক্লকপা য়েংগে হায়রগদি অরুনাচলগী মায়কৈদা য়েংদ্রগদি নুমীৎ থোক্লকপা উবা ফংদে । অরুনাচলদগী অমম্বা মাংখিবগা কোরৌ মঙাল শন্দোরকই, লাক্কদৌরিবা নুমীৎ খরা অসিদা মফম অসিদা দিব্লপমেন্তকী অদুগুম্লবা মঙাল অমা শন্দোরক্তুনা ভারত পুম্ববু ঙালহল্লগনি । অরুনাচলদা ঐহাক কয়ারক হন্না লাকপগী তঞ্জা ফংজখ্রে । সংগঠনগী থবক তৌরিঙৈ মতমদশু লাক্লম্লে, গুজরাতকী মুখ্যমন্ত্রী ওইরিঙৈদশু লাক্লম্মে, অমসুং প্রধানমন্ত্রী ওইরবা মতুং ঙসি অনিরকশুবা ওইনা ময়ামগী মরক্তা তিন্দুনা ময়ামবু উন্নবগী তঞ্জা অদু ঐহাক্না ফংজরে । অরুনাচল অসি অদুগুম্লবা লমদম অমনি মদুদি করিগুম্বা অদোম্না হপ্তা অমা চংনা ভারত পুম্বা কোইরুবদা তাবা ফংলকপা জয় হিন্দ হাবা ৱাহৈ অদু, অরুনাচলদা নুমীৎ অমদা মদুদগী হেন্না তাবা ফংগনি । হায়বদি মফম অসিদা অমনা অমদা গ্রীত তৌবগী চৎনবি অসি জয় হিন্দ অসিনা ওইররে । অৱাং নোংপোক্তা খ্বাইদগী য়াম্না হিন্দি ঙাংবা-খংবা লমদমদি অরুনাচল প্রদেশনি । হন্দক ঐহাক্না অৱাং নোংপোক্তা তোয়না চৎপা মতমদা নহাশিংনা বেনর পায়দুনা ঐখোয়বু হিন্দী তম্বিয়ু হায়না লেপ্পা উরে । মসিমক চাওরবা রিভোলুসন অমনি ।

ঙসি ঐহাক্না মফম অসিদা থৌরম পরেং অহুমদা শরুক য়াবগী তঞ্জা অদু ফংজরে । ভারত সরকারগী বজেৎতগী, ভারত সরকারগী প্রোজেক্ততগী, দোনর মন্ত্রালয়গী খুত্থাংদগী অসিগুম্লবা ব্রান্দ অসি লাইবক ফরবা অরুনাচলগী মীয়াম্না ফংলে । সেক্রেতরিয়েতকী থবক্তি হান্ননা হৌরে । শাবা লোইরবা থোং অদুবু শঙ্গাবিনবা লুচিংবা অদু মতম শংদবনা মরম ওইরগা থা কয়া পন্দুনা লৈবগী পাও ঐখোয়না করি করিগুম্বা মতমদা পাও-চেশিংদা উবা ফংলি । লম্বী শেম্বা লোইরে, লুচিংবা অদুগী কাইথোক্নবা মতম লৈতবনা অদুমক শিজিন্নদনা লৈরম্মী । ঐহাক্না লাক্লবা মতুং অনৌবা কলচর অমা হৌদোক্লে । অনৌবা কলচর অদুদি, ময়াম্না লুচিংবা অদু ঙাইরুরগনু, প্রধানমন্ত্রীবু ঙাইরুরগনু, করিগুম্বা প্রোজেক্ত অদু মপুং ফানা লোইশিল্লগদি শিজিন্নবা হৌবিরো, লাকপগী তঞ্জা ফংবা নুমীৎ অদুদা শঙ্গারগা লোইরে, থবক্তা পন্থবা তৌরোইদবনি । সরকার অসি মচোই মচোই তারকপা মতম, দিপার্তমেন্ত অমনা মফম অমদা, অমনা অতোপ্পা মফমদা । বিল্দিংশু মল্লে, ফম্লিবা ওফিসার অদুশু ময়ুমদা করম্না থুনা হনশিগে খল্লকই । করিগুম্বা এনভাইরোনমেন্ত অদু ফরগদি, ওফিসকী এনভাইরোনমেন্ত অদু ফরগদি ৱার্ক কলচরদশু অফবা মমী তাহনবা ঙম্মী । অফবা ওফিস অমা লৈবনা অমসুং কেম্পস অমা খক্তদা য়ুনিত খুদিংমক লৈবনা মরম ওইরগা হৌজিক্তি খুঙ্গংদগী কনাগুম্বা মীওই অমনা থবক্কীদমক সেক্রেতরিয়েত্তা লাকপা মতমদা লাইথোকহল্লগনি । সরকার অসি মথন্তা চুম্না চৎপা ঙমদে । ময়াম পুম্নমক অমত্তা ওইনা মায়কৈ অমদা চৎলবা মতমদদা সরকারগী মহৈ ফংই । অদুবু করিগুম্বা তেক্নিকেল ওইবা মওংদা কোওর্দিনেসন লৈরগদি মহাক্কী মপাঙ্গল খরা হন্থরকই, অদুবু অচুম্বা মওংদা কোওর্দিনেসন লৈরগদি মহাক্কী মপাঙ্গল য়াম্না হেঙ্গৎলকই । কেম্পস অমখক্তদা ওফিস খুদিংমক লৈবনা তোৎন তিন্ননা লৈমিন্নরগনি । কেন্তিনদশু ওফিসারশিংনা অমত্তা ওইনা চৎমিন্নদুনা মখোয় মখোয়গী খুদোংচাদবশিং অদু তাথোক তাশিন তৌদুনা সোল্ব তৌরগনি । হায়বদি থবক তৌবগী মওং মতৌদা কোওর্দিনেসন হেঙ্গৎলকই, দিলিবরী সিস্তেম য়াঙ্খৎহল্লি । মরম অদুনা মসিগী অনৌবা সেক্রেতরিয়েৎ অসিনা মরম ওইরগা অরুনাচল মীয়ামগী পুন্সিদা চাওনা কানহল্লগনি । মতৌ অদুম্না ঙসি শ্রীমান দোর্জী খান্দু স্তেত কনবেন্সন সেন্তর ইতানগর শঙ্গারদুনা য়াম্না মরুওইবা থবক থবক অমা পাংথোক্লে । মসি শুপ্নগী বিলদিং অমা শঙ্গাবা অদু নত্তে । মসিনা অরুনাচলগী মংলান অদুগী ইনর্জী সেন্তর ওইরকপা য়াই । মফম অসিদা কনফরেন্সকী খুদোংচাবা লৈরগনি, কলচরেল এক্তিবিতীগীদমক খুদোংচাবা লৈরগনি, করিগুম্বা ঐখোয়না অরুনাচলদা তুরিজম হেঙ্গৎহনবা পাম্লগদি ঐহাক্না ভারত সরকারগী তোঙান তোঙানবা কম্পেনিশিংদা হায়গনি মদুদি হৌজিক্তি মফম অদুদা কনভেন্সন সেন্তর লৈরবনি, নখোয়গী জেনরেল বোদীগী মীফম অদু অরুনাচল চৎলগা পাংথোক্লুচো । ঐখোয়না সরকারদা অনৌবা এক্সপ্রিমেন্ত অমা তৌরে । সরকারগী থবক থৌরম অসি চহি ৭০দগী দিল্লিদগী চত্থরি অমসুং মীয়াম্না দিল্লিগী মায়কৈরোমদা মীৎয়েং থম্লম্মী । ঐহাক লাক্লবা মতুং সরকার অসিবু হিন্দুস্থাগী মফম পুম্নমক্তা পুদুনা চৎনবা থবক পায়খৎলে । হৌজিক্তি সরকারগী থবক থৌরম অসি দিল্লিদগী নত্তনা হিন্দুস্থানগী কাচিন কোয়া পুম্নমক্তগী চত্থবা ওইনা উবা ফংলগনি । ঐহাক্না ঐখোয়গী এগ্রীকলচর সমিৎ অমা সিক্কিমদা পাংথোক্লে, লৈবাক্কী মন্ত্রী পুম্নমকপু মফমদুদা কৌরে । মতৌ করম্না সিক্কিম্না ওর্গানিক ফার্মিং তৌরিবগে য়েংবিয়ু হায়না ঐহাক্না হায়রে । লাক্কদৌরিবা নুমীৎশিং অসিদা অৱাং নোংপোক্কী তোঙান তোঙানবা রাজ্যশিংদা ভারত সরকারগী তোঙান তোঙানবা বিভাগকী মন্ত্রালয়শিংগী অচৌ অচৌবা মীফম তোঙান তোঙান্না পাংথোক্লগনি । নোর্থ-ইস্ত কাউন্সিলগী মীফমদা মোরাজী ভাই দেসাইনা প্রধানমন্ত্রী ওইনা শরুক য়াখিবা অদুনা অরোইবা ওইরমগনি । মদুগী মতুংদা কনাগুম্বা অমত্তনা মতম ফংখিদে, প্রধানমন্ত্রী অসি থবক য়াম্না চিল্লি । অদুবু ঐহাক্না ময়ামগীদমক লাক্লি, ময়াম্না মরম ওইদুনা লাক্লিবনি, ময়ামগীদমক লাক্লিবনি । মদুনা মরম ওইরগা নোর্থ-ইস্ত কাউন্সিলগী মীফমদা ঐহাক য়াওখি, শন্দোক্না খন্ন-নৈনখি । মদু খক্তা নত্তে, ঐহাক্না দিল্লি সরকারদা লৈরিবা মন্ত্রীশিং অমসুং মখোয়গী স্তাফ খুদিংমকপু মরক মরক্তা অৱাং নোংপোক্কী তোঙান তোঙানবা রাজ্যশিংদা চৎনবা পাওতাক পীরি । মসিদশু নত্তনা দোনর মন্ত্রালয়না দিল্লিদা ফম্দুনা অৱাং নোংপোক্কী চাওখৎনবা হোৎনরম্মী । ঐহাক্না থা খুদিংগী দোনর মন্ত্রালয়, মহাক্কী সেক্রেতরিয়েত পুম্নমক অৱাং নোংপোক্কী তোঙান তোঙানবা রাজ্যশিংদা চৎনবা পাওতাক পীখ্রে ।

ঙসি মফম অসিদা মেদিকেল কোলেজ, মেদিকেল হোস্পিতাল অমা শানবা উরেপ উয়ুং তম্বগী খুদোংচাবা অদু ঐহাক্না ফংজরে । ঐখোয়গী লৈবাক অসিদা হকশেলগী লমদা খোংথাং কয়া পায়খৎপা মথৌ তারি । অহানবদা হ্যুমেন রিসোর্স দিব্লপমেন্ত, অনিশুবদা ইনফ্রাস্ত্রকচর, অহুমশুবদা খ্বাইদগী মোর্দন ওইবা তেক্নোলোজী ইক্বিপমেন্তনি, ঐখোয়না মায়কৈ অহুম অসিদা হেল্থ সেক্তরবু মপাঙ্গল কনখৎহন্নবগী মায়কৈদা থবক তৌরি । অথুবা মতমদা য়ামদ্রবদা পার্লিয়ামেন্ত কন্সতিত্বেন্সী অহুম খুদিংগী অচৌবা হোস্পিতাল অমা অমসুং অফবা মেদিকেল কোলেজ অমা লিংখৎনবা ঐখোয়না পান্দম থম্লি । ভারত্তা মশিং য়াম্না মেদিকেল কোলেজ লিংখৎলগনি অমসুং মফম অদুগী অঙাংশিংনা মহৈরোইশিংনা মফমদুগী মেদিকেল কোলেজদা তম্লগদি মফম অদুগী লৈনাশিং, মফমদুদা তোইনা নাগনবা লৈনাশিং অদু মহাক্না হেন্না খংগনি । ভারত সরকারনা খুঙ্গং খুদিংমক্তা হকশেলগী কানবা ফংহন্নবা পঞ্চায়ৎ লাখ অমমখায় অনিদা ৱেলনেস সেন্তর হাংদোক্লগনি । মদুনা অনকপা খুঙ্গং অহুম মরিদা কান্নবা ফংহল্লগনি । ঐখোয়না য়াম্না তোইনা শিজিন্নবা হিদাক মখল চাওরাক্না ৮০০বু জন-ঔষধি পরিয়োজনাগী খুত্থাংদা চাওরাক্না হোস্পিতাল লিশিং অহুমদা মমল তাথনা ফংহল্লে । লুপা ১৫০ পীরম্বা হিদাক অদু চপ মান্নবা ক্বালিতী অদুমক্তদা লুপা ১৫দা ফংহল্লে । ঐখোয়না আয়ুশ্মান ভারত য়োজনাগী মখাদা লাইরবা পনখৈগী মখাদা লৈরিবা ইমুংশিংদা অনা অয়েক য়াওরকপা মতমদা লুপা লাখ মঙা ফাওবগী ইন্সুরেন্স কোভর তৌরগনি । মহাক্না হোস্পিতালদা লুপা অমা ফাওবা পীবগী মথৌ তাররোই । আয়ুশ্মান ভারত য়োজনানা লৈবাক অসিগী মেদিকেল সেক্তরদা চাওনা রিভোলুসন পুরকপগী ওইথোকপা লৈরে ।

ইচল ইচে অমসুং ইচিল ইনাওশিং, ঙসি ঐহাক্না ময়ামগী মরক্তা লাক্লিবা অসিগী মরম অহুমদি ময়াম্না খংলে অদুবু মরিশুবা ৱাফম অমশু পুরদুনা লাকচরি মদুদি নই দিল্লিদগী নহারলাগোন এক্সপ্রেস হৌজিক্তি হপ্তা অমদা অনিরক চেল্লগনি অমসুং মদুগী মমিংনা অরুনাচল এক্সপ্রেস কৌরগনি । হৌজিক ঐখোয়গী মুখ্যমন্ত্রীনা তাকপিরে মদুদি কনেক্তিবিতী অদু দিজিতেল কনেক্তিবিতী ওইগেরা, এয়ার কনেক্তিবিতী ওইগেরা, রেল কনেক্তিবিতী ওইগেরা, রোদ কনেক্তিবিতী ওইগেরা, ঐখোয়গী নোর্থ-ইস্তকী মীওইশিং অসি অদুক্কী মতিক খুৎকন পাঙ্গল্লি, অদুক্কী মতিক মতেং ওই, অদুক্কী মতিক ইনর্জেতিক ওই মদুদি মসিগী কনেক্তিবিতীশিং অসি ফংলগদি হিন্দুস্থান পুম্বা মফম অসিদা লাক্তুনা লেপ্লগনি, অশুক য়াম্না থাজবা থম্লি। মরম অদুনা হৌজিক ঐখোয়গী মন্ত্রীজী, ঐখোয়গী নিতিন গাদকরীবু থাগৎপিখ্রে। অরুনাচল খক্তদা লুপা কোতী লিশিং ১৮গী তোঙান তোঙানবা প্রোজেক্তশিং হৌজিক পায়খৎলি, লুপা কোতী লিশিং ১৮গী ভারত সরকারগী প্রোজেক্ত পায়খৎলি । লম্বী পাকথোকপা ওইগেরা, ফোর লেন ওন্থোকপা ওইগেরা, খুঙ্গংগী লম্বী শেম্বা ওইগেরা, নেস্নেল হাইৱে শেম্বা ওইগেরা, দিজিতেল কনেক্তিবিতীগাদমক চাওরবা মিসন মোদ অমদা হৌজিক থবক পায়খৎলি । ভারত সরকারনা শেঞ্জা থুমজাগী মায়োক্তা লান্থেংনরি অমসুং প্রেমা খন্দুনা ইফমদা মপুংফানা মতেং পীবিরকপদা ঐহাক নুঙাইবা ফাওই । ত্রান্সপরেন্সী, একাউন্তেবিলিতী, লৈবাক অসিদা রিসোর্সকী অৱাৎপা লৈতে, লৈবাক অসিদা শেলগী অৱাৎপা লৈতে । অদুবু অয়ুবা বাল্তিন অমদা ইশিং হাপ্পা মতমদা বাল্তিন অদু থনগদ্রা? ঐখোয়গী লৈবাক অসিদা মমাংদা অসুম্না চৎথরম্মী । ঐখোয়না আধার কার্দ শিজিন্নবা হৌরে, দাইরেক্ত বেনেফিত ত্রান্সফরগী থবক হৌরে । অরানবা মওংদা শেল চৎলম্বশিং অদু দাইরেক্ত বেনেফিত ত্রান্সফর তৌদুনা পুম্নমক থিংজিল্লে, লৈবাক্কী ওইনা পায়খৎলিবা প্রোজেক্তশিংদগী চাওরাক্না লুপা কোতী লিশিং ৫৭ কনবা ঙম্লে। মমাংদদী মসি কনা কনাগুম্বশিংগী ফুরিৎখাওদা চংলম্মী, হৌজিক্তি মদু লৈবাক্কী দিব্লপমেন্তদা শিজিনরে । অসিগুম্বা মখলগী খোংথাং কয়া অমা লৌখৎলে । ইচল ইচে অমসুং ইচিল ইনাওশিং, ঙসি ঐহাকপু তরাম্না ওকপিরে, ঐহাকপুশু ময়ামগুম্না অরুনাচলী ওইহনবিরে । ঐহাক্কী লাইবক ফবনি মদুদি, ভারত্তা মঙাল ফংবা হৌরিবা মফম অসিদগী দিব্লপমেন্তকী নুমীৎ থোকলকপা হৌরক্লে, অদুগুম্লবা দিব্লপমেন্তকী মঙাল অদুনা লৈবাক্কী মফম শিনবা থুংনা দিব্লপমেন্তকা মঙালনা ঙালহল্লগনি । থাজবা অসিগা লোইননা ময়াম্বু থাগৎচরি । ময়াম পুম্নমকপু হন্না হন্না থাগৎচরি ।

ঐহাক্কা লোয়ননা হায়মিন্নরশি-জয় হিন্দ ।

অরুনাচলগী জয় হিন্দদি হিন্দুস্থান পুম্বদা তাবা ফংই ।

জয় হিন্দ- জয় হিন্দ

জয় হিন্দ- জয় হিন্দ

জয় হিন্দ- জয় হিন্দ

হন্না হন্না থাগৎচরি ।