ভারতকী প্রধানমন্ত্রী

খুরুমজরি। ননাইনা খুরুমজরি। ঙসি, অফাওবা সুফী লম্বোইবা কবীরদাসজীবু নীংশিংদুনা পাংথোক্লিবা থৌরম অসিদা, শেংলবা লমদম অসিদা খোংদাবা ফংজবা অসি ঐগী লাইবক য়াম্না ফবনি। ঙসি ঐহাক মফম অসিদা লাকচবা অসিদা য়াম্না নুংঙাইবা ফাওজৈ। ঐনা শেংলবা লমদম অসিবু খুরুমজরি অমসুং অদোম পুম্নমকপু খোং শোক্না খুরুমজরি।

রাজ্য অসিগী মীয়াম্না য়ানরবা অমসুং মতিক লৈরবা মুখ্য মন্ত্রী শ্রীমান য়োগী আদিত্যনাথজী, কেন্দ্রদা মন্ত্রীপরিষদকী ঐগী খোংলোই ওইবীরিবা শ্রীমান মহেশ শর্মজী, কেন্দ্রদা মন্ত্রীপরিষদকী ঐগী খোংলোই ওইবীরিবা শ্রীমান শিবপ্রতাপ শুক্লাজী, রাজ্য সরকারদা মন্ত্রী ওইবীরিবা দাক্তর রীতা বহুগুনাজী, রাজ্য সরকারদা মন্ত্রী ওইবীরিবা শ্রীমান লক্ষ্মী নারায়ন চৌধরীজী, সংসদতা ঐগী খোংলোই ওইবীরিবা অমসুং উত্তর প্রদেশ ভারতীয় জনতা পার্তীগী প্রসিদেন্ত ওইবীরিবা ঐগী মরূপ দাক্তর মহেন্দ্র নাথ পান্দেজী। ঐখোয়গী সংসদকী নহা ওইরিবা, থৌনা ফরবা, পুকচেল চেৎপা অমসুং নোল্লুকপা লোইননা লৌশিংতনা থল্লবা, লমদম অসিগী মপারী, ঐখোয়গী এম.পি. শ্রীমান শরত ত্রিপাথীজী, উত্তর প্রদেশকী চীফ সেক্রেতরী শ্রীমান রাজীব কুমার, মফম অসিদা লেংবীরক্লিবা খঙ–হৈরবা পু্ম্নমক অমসুং লৈবাক অসিগী মফম কয়াদগী লেংবীরক্লিবা ঐগী নুংশিজরবা ইচিল–ইনাও অমসুং ইচল–ইচেশিং। ঙসি ঐহাক মগহরগী শেংলবা লমদম অসিদা লাকপগী লাইবক ফরবা তাঞ্জা অদু ফংজরে, পুক্নীংদা থোইদোক্না পেঞ্জবগী ৱাখল অমা ফাওজরি।

ইচিল–ইনাওশিং, পুম্নমক্কী পুক্নীংদা অসিগুম্বা লাইনীংগী মফমশিং অসিদা চৎনীংবগী অপাম্বা ফাওই, ঙসিদি ঐগী অপাম্বা অদু মপুং ফারে। ঙৈহাক্কী মমাংদা ঐহাক সন্ত কবীরদাসজীগী মংফমদা লৈ কৎচবগী, মহাক্কী খুবমদা ফী কৎচনবগী খুদোংচাবা ফংজরে। কবীরদাসজীনা লীরি কোনবীরম্বা শুরুং অদুসু ঐহাক উবা ফংজরে। খুনাই অসিদা কুমজা কয়াদগী লম্বী তাকপীরিবা, লমজিংলোই মীনুংশি অমসুং মান্নবা ৱাখল্লোনগী শক্তম, অথোইবা কবীরবু মহাক্না থুপখিবা লমদম অসিদগী হন্না হন্না নোলুকচরি।

অসুম্না হায়নৈ মদুদি মফম অসিদা লম্বোইবা কবীর, গুরু নানক দেব অমসুং বাবা গৌরখনাথজীনা পুন্না ফম্মিন্নদুনা লাইনীং–লাইশোনগী ওইবা ৱারী–ৱাতাই তৌনখি। মগহরদা লাকচদুনা ঐহাক মহৈ য়াল্লবগুম ফাওজৈ। ঙসি পুর্ণিমা নুমিৎনি। ঙসিদগী ভগবান ভোলেনাথকী য়াত্রাসু হৌগদৌরি। ঐনা তীর্থ য়াত্রিশিংদা নুংঙাইবা খোংচৎ অমা ওইননবা পুকচেল শেংনা য়াইফ–থৌনি পীজরি।

কবীরদাসজীগী চামঙা কুনথ্রাশুবা মপোক কুমওনগী থৌরম অসিদা মফম অসিদা চহি চুপ্পা পাংথোক্কদবা কবীর মহোৎসব হৌদোক্লি। মীওইবা পুম্নমক্কীদমক্তা কবীরদাসজীনা থম্বীরম্বা মমল নাইদ্রবা লল অসিগী কান্নবা অসি হৌজিক ঐখোয়না পুম্নমক্না ফংজগদৌরি। কবীরজী মশামক্নসু হায়বীরম্মি –

তীর্থ গএ তো এক ফল, সন্ত মিলে ফল চার।

সদগুরু মিলে অনেক ফল, কহে কবীর বিচার॥

হায়বদি তীর্থ চৎপনা থৌজাল (পুন্য) অমখক ফংই অদুবু লম্বোইবশিংগা লোইনরগদি থৌজাল মরি ফংবা ঙম্মি।

মগহরগী লমদম অসিদা কবীরগী মহোৎসবতা, কবীরগী মহোৎসব অসিনা অসিগুম্বা থৌজাল পীবীগদৌরিবনি।

ইচিল–ইনাও, ইচল–ইচেশিং, ঙৈহাক্কী মমাংদা মফম অসিদা সন্ত কবীর একাদমীগী উরেপ–উয়ুং তমখ্রে। চাউরাক্না লুপা ক্রোর ২৪ চাদিং তৌদুনা মফম অসিদা অথোইবা কবীরগা মরি লৈনবা নীংশিংনীংঙাই ওইবশিংবু খোমজিনগদবা লুপশিং লিংখৎলগনি। কবীরনা খুন্নাই অসিবু মীকপ থোকহন্নবা পাংথোকপীরম্বা থবকশিং, কবীরগী শৈশক, ত্রেনীং তৌফম শঙ্গাই, কবীরগী জগোই তম্ফম শঙ্গাই, রিসর্স সেন্তর, লাইব্রেরী, ওদিতোরিয়ম, হোস্তেল, আর্ত গেলরী; পুম্নমক অসি শেমগৎনবা মসিদা থৌরাং য়াওরি।

সন্ত কবীর একাদমী অসিনা উত্তর প্রদেশকী লম লমগী লোনশিং অমসুং খুঙ্গংগী চৎনবীশিংগী চাউখৎ–থৌরাং অমসুং ঙাক শেনবগী থবক তৌগনি। ইচিল–ইনাওশা, কবীরগী পুন্সি অপুনবা অচুম্বা থিবা লোইননা চুমদববু চৈবদা হৌখি। কবীরগী লাইনীং অদুদি য়াবদগী নত্তে, খঙবদগী হৌই। মহাক কোক্তগী তোন ফাওবা হরাও–তয়ামদুনতা লৈবা, হৈনবীদা লুপচবা, ভক্তগী মাংদা মনাই, নীংথৌগী মাংদা পুকচেল চাউবা, পুকচেল শেংবা, লৌশিং লৈবা, নুংদা থোৎপা, মপান্দা কনবা ওই।

অথোইবা কবীরদাস, উফুলদগী হৌরকখি অদুবু লাইবক্কী চন্দন ওইখি। অথোইবা কবীরদাস মীওইবদগী লাই ওইখি। মহাক ৱাখল্লোন ওইদুনা লাকখি অদুগা থবক্তা ওন্থোক্তুনা লোম্বা নাইদবা ওইখি। লম্বোইবা কবীরদাসজীনা খুন্নাইদা শুপ্নগী লম্বী তাকপীবগী থবক্তমক তৌখিদে খুন্নাইগী ৱাখল্লোন অদুবু য়কাই হন্নবগীসু হোৎনখি, অমসুং খুন্নাই অসিবু য়কাইহন্নবগীদমক্তা মহাক কাসীদগী মগহরদা লাকখি।

কবীর সাহবনা হায়বীরম্মি মদুদি করিগুম্বা থমোইদা রাম লৈরগদি মগহরসু খ্বাইদগী শেংলবা মফম্নি। অমসুং মহাক্না হায়বীরম্মি –

ক্যা কাসী ক্যা উসর মগহর, রাম হৃদয় বসো মোরা

মহাক কনাগীসু মহৈরোই ওইরমদে, রমানন্দনা শেমগৎচরম্বা সেবক্নি। লম্বোইবা কবীরদাসনা হায়বীরম্মি –

হম কাসী মেং প্রকত ভএ হৈং, রমানন্দ চেতাএ।

কাসীনা কবীরবু লাইনীংগী ওইবা থৌনা অমসুং গুরুগা উনহনখি।

ইচিল–ইনাওশা, কবীর ভারতকী থৱাইগী ঈশৈনি, মহাও অমসুং মনম হায়না কৌবা য়াই। মহাক্না অচম্বা খু্ঙ্গংগী ভারত মচাশিংগী থমোইগী ৱাফম্বু মহাক্কী মশাগী ঙাংনরিবা লোন্দাদা লেংশিনখি। গুরু রামানন্দগী শিষ্যনিনা করম্না জাতি (কাংলুপ্তা)দা থাজবা থম্লুনি। মহাক্না কাংলুপকী খেন্নবা নমখাইখি –

মীওইবা অপুনবগী কাংলুপ অমত্তনি – মসি লাওথোকখি অমসুং মশাগী নুংগী নাপল অদুবু লোইশিন্দুনা মদুদা ঙান্থোইরিবা ঈশ্বরবু উজনবগী কবীরদাসজীনা লম্বী তাকপীখি। মহাক পুম্নমক্কীনি মরম অদুনা মহাক পুম্নমক্কী ওইখি। মহাক্না হায়খি –

কবীরা খরা বাজার মেং মাঙ্গে সবকী খের।

ন কাহু সে দোস্তী, ন কাহু সে বৈর॥

(কবীরনা কৈথেলদা লেপতুনা পুম্নমক্কী য়াইফ–থৌনি নীজরি। কনাগীসু মরূপ নত্তে, কনাগীসু য়েক্নবা নত্তে।)

মহাক্কা দোহাশিং অসি খঙননবগীদমক করিগুম্বা লোনগৈ অমত্তগী মথৌ তাদে। নঙ–ঐনা ঙাংনরিবা অচম্বা লোন্দা–পুদা, মাংলংগী ইংলবা তান্থাগা লোইননা পুন্সিগী অরোন–অথুপ কয়াবু মহাক্না মীচম–মীয়ামগী লোন্দাদা খঙহল্লি। নশাগী নুংদা ফুম্লিবা রাম্বু অদু য়েংঙু, হরী পুক্নীংদা লৈবনি, মপান্থোংগী তৌশিন্নবশিংদা করিগী মতম মাংহল্লিবনো। নশাবু শেমদোকচরবদি হরী ফংগনি –

জব মৈং থা তব হরি নহীং, জব হরি হৈ মৈং নহীং।

সব অন্ধিয়ারা মিৎ গয়া দীপক দেখা মাহী॥

ঐনা ইশাগী নাপলদা তাওদুনা লৈরিঙৈ প্রভুবু উবা ঙমখিদে, অদুবু গুরুনা লৌশিংগী মৈরা ঐগী নুংদা চুখৎপীরকপা মতমদুদা অমম্বা পুম্নমক কোকখ্রে।

ইচিল–ইনাওশা, মতমগী শাংলবা তাঙ্কক্তা, সন্ত কবীরগী মতুংদা রৌদাশ লাকখি। চহি কয়াগী মতুংদা মহাত্মা ফুলে লাকখি, মহাত্মা গান্ধী লাকখি, বাবা সাহেব ভীমরাও অম্বেদকর লাকখি। খুন্নাইদা শন্দোক্লিবা মান্নদবশিংবু কোকহন্নবগীদমক পুম্নমক্না মাগী মাগী মওংদা খুন্নাইদা লম্বী তাকপীখি।

বাবা সাহেবনা ঐখোয়দা লৈবাক অসিগী সংবিধান পীনবীখি। লৈবাক মচা অমা ওইনা পুম্নমকপু মান্নবা হক পীনবীখি। লাইবক থীবদগী ঙসি অদুগুম্বা মীথোইশিং অদুগী মিংদা, খুন্নাই অসিবু থুগাইনবা হোৎনরিবা রাজনীতিগী ওইবা কান্নবা লৌবগী ইচেল অমা শেমলক্লি। রাজনীতিগী দল খরদি খুন্নাই অসিনা ইং–তপ্পা অমসুং চাউখৎপা পামদে, অদুবু মখোয়না পাম্মি য়েংথিনবা, ইরাং হৌহনবা। পেন্দবা অমসুং ইরাং অদুক্কী মতিক লৈরি মখৈ রাজনীতিগী কান্নবা ফংগনি হায়না মখোয়না খল্লি। অদুবু অশেংবদি অসিগুম্বা মীওইশিং অসি লৈমাই অসিদগী মরু ফুকখ্রে। সন্ত কবীর, মহাত্মা গান্ধী, বাবা সাহেবপু য়াবা ঐখোয়গী লৈবাক্কী ৱাখল্লোল অসি মখোয়না খঙবা ঙমদ্রি।

কবীরনা হায়বীরম্মি – ইশাগী নুংদা য়েংলবদি অচুম্বা ফংগনি, অদুবু মখোয়না কৈদৌঙৈদসু কবীরবু হকচিন্না খক পাদ্রে। সন্ত কবীরদাসজীনা হায়বীরম্মি

পোথী পরী–পরী জগ মুআ, পন্দিৎ ভয়া ন কোয়,

ধাই আখর প্রেম কা পরো সো পন্দিৎ হৌয়॥ 

(লাইরিক অচৌ–অচৌবা পারগা কনানসু লৌশিং লৈবা মী ওইবা ঙমদে, শুপ্নগী মীনুংশি অদু মশক খঙলবা মীওইতনা অদুগুম্বা লৌশিং লৈবা মীশক অদু ওই।)

মতম অদুদা য়ু.পি. সরকার থোকপীরকউ, লাইরবশিংগীদমক শাখিবা য়ুমশিংগী য়ামদ্রবদা মশিংদু ফাওবদি তাকপীয়ু হায়না ঐখোয়গী সরকারনা চিথী কয়া কয়া ইখি, ফোন কয়ারক তৌখি। অদুবু মখোয় মশাগী শঙ্গাইশিংতদা হৈনবা সরকার ওইরমখি। মখোয় মখুৎ লোনশিন্দুনা অদুম্মক লৈখি। অদুগা হৌজিক য়োগীজীগী সরকার লাক্লবা মতম অসিদা, উত্তর প্রদেশতা লাইরবশিংগীদমক রেকোর্দ য়ুমশিং শারক্লি।

মরূপশা, কবীরনা মপুন্সি চুপ্পা কাংলোন অদুদা পুক্নীং চংখি। মালেমগী কাংলোন অদুদা নত্তে, মশানা শেমখিবা অমসুং অচুম্বনি হায়না খনখিবা কাংলোনশিং অদুদা। মগহরদা লাকপগী মরমসু মসিননি। মহাক্না মোক্ষ (অরান–খুভম)তা মাই ওন্সিনখিদে। অদুবু লাইরবশিংদা লৌনম্বা থাজবা পীরিবা, খু্নাইরোল অমসুং মীশিং য়াম্বগী ৱা ঙাংলিবশিংনা লৈঙাক্কী মতাংদা মীহৌবা অসিসু ঙসি ঐখোয়না ময়েক শেংনা উরি।

মরূপশা, অদোম্না তলাক অহুমগী মরমদসু মখোয়গী মতৌ অদু উবীরে। লৈবাক অপুনবা অসিদা মুস্লিম খুন্নাইগী ইচল–ইচেশিং ঙসিদি কিহন-খংহনবা কয়া থৌওইদনা তলাক অহুম লৌথোক্নবা, অসিগুম্বা তমথিবা চৎনবী অসিদগী খুন্নাই অসিবু কঞ্জনবা লেপ্তনা তকশিন্দুনা লাক্লি। অদুবু রাজনীতিগী দল অসিনা, লৈঙাক অসি ফংনবগীদমক্তা ভোত বেঙ্ককী গেম শান্নরিবা মীওইশিংনা, তলাক অহুমগী বিলবু সংসদতা পাস তৌনবা হোৎনবদা অপনবা পীদুনা লাক্লি। মখোয় অসি মশাগী কান্ননবগীদমক্তা খুন্নাই অসিবু মতম চুপ্পদা মপাঙ্গল শোলহন্দুনা লৈহনবা পাম্মি। মখোয়শিং অসি ফত্তবশিংদগী নান্থোকহনবা খক পামদে।

মরূপশা, কবীরনা শাফোংলকপা মতম অসি ভারতকী মথক্তা অকনবা লান্দা অমা চৎথরকপা মতম অদুদা ওইখি। লৈবাক অসিগী মীচম মীয়াম মীপাইবা পোক্নখিবা মতম্নি। সন্ত কবীরদাসনা মতম অদুগী বাদশাহ (নিংথৌ)দা শিংনখি। কবীরদাসকী শিংনবা অদুদি –

দর কী বাত কো দরবেসা বাদশাহ হৈ কৌন ভেসা (ঐঙোন্দা থোঙ্গাল অদু তাকউ, নিংথৌবু কনানো)

কবীরনা হায়খি – মীয়ামগী অৱাববু মশক খঙবা অমসুং মদুবু কোকহন্নবা হোৎনবা অদু ফিদমনীংঙাই ওইরবা লৈঙাক্লোই অদুনি। মহাক্না লৈঙাকলোই অমা ওইনা ফিদমনীংঙাই ওইরবা নিংথৌ রাম্বু খঞ্জখি। মহাক্না নীংজরম্বা রাজ্য অদু মীয়ামগী লৈঙাক অমসুং মীচং–মীখাই নাইদবা ওইখি। অদুবু লাইবক থিবদি ইমুং কয়ামরুম্না ঙসিদি মশাবু মীয়ামগী নোংদম্বা ওইনা লৌজদুনা সন্ত কবীরদাসজীনা হায়বীরম্বা ৱাফমশিংবু মপুং ফানা থওইদনবা হোৎনরি। ঐখোয়গী লালহৌগী অমসুং ফিদমগী য়ুম্ফম অসি কবীরগুম্বা অফাওবা মীওইশিংনি হায়বসি মখোয়না কাওথোকখ্রে।

কবীরজীনা ইকাই–ইকি অমত্তা য়াওদনা চৎনবীশিং অদুদা হকথেংননা লান্দাখি। মীগা মীগগী মরক্তা খেন্নবা থম্লিবা থৌরাং খুদিংমক্তা শিংনখি। নমথবীরবা, শোৎথহৌরবা, নৈহৎপীরবা মখোয়শিং অদুগীদমক্তা, কবীরনা মখোয়বু মপাঙ্গল লৈহনবা পামখি। মখোয়বু অয়ম্বা ওইনা লৈহনবা মহাক্না পামখিদে।

সন্ত কবীর দাসজীনা হায়রম্মি –

মাংগন মরন সমান হৈ, মত কোই মাংগো ভীখ

মাংগন তে মরনা ভলা, য়হ সতগুরুকী সীখ॥

(নীবা হায়বসি অশিবগা পাংখক্নি, অদুনা কনাসু নীগনু। নীবদগীদি শিবনা হেন্না ফৈ হায়না গুরুনা হায়বীরম্মি।)

কবীর মশামক শুরগা চাবা মীওইনি। অদুবু নীং তম্লবা চহি কয়া অসিগী মতুংদসু কুইরবা মতম অসি ঐখোয়গী কাংলোন শেম্বশিংনা কবীরগী অসিগুম্বা ৱাখল্লোন অসি খঙবা খমদ্রে। লাইরবা কোকহন্নবগী মিংদা মখোয়না লাইরবশিংবু ভোৎ বেঙ্ককী রাজনীতিদা নমশিন্দুনা থম্লি।

মরূপশা, হৌখিবা চহি মরি অসিদা ঐখোয়না অদুগুম্বা চৎনবী–কাংলোন অদুবু হোংদোক্নবা অদুক্কী মতিক হোৎনখি। ঐখোয়গী সরকারনা লাইরবা, দলিৎ, চৈথেং ফংলবা, শোৎথহৌরবা, নুপীশিং, নারোলশিংবু মপাঙ্গল কলহন্নবগী লম্বীদা খোং থাংজিল্লি। জন–ধন য়োজনাগী মখাদা উত্তর প্রদেশতা চাউরাক্না লাইরবা ক্রোর মঙাগী বেঙ্ক একাউন্ত হাংদোক্তুনা, নুপী লাখ ৮০দগী হেনবদা উজ্জ্বালা য়োজনাগী মখাদা গ্যাস কনেক্সন লেম্না পীদুনা, চাউরাক্না লাইরবা লাখ ৭০ রোমদা থা অমদা শুপ্নগী লুপা অমা অমসুং নোংমগী পৈশা ৯০গী প্রেমিয়মদা ইন্সুরেন্স য়াওহন্দুনা, য়ু.পি.গী খুঙ্গংশিংদা অমাং–শঙ ক্রোর কুনমরি শাদুনা, মীয়ামগী বেঙ্ক একাউন্তা হকথেংননা পৈসা ত্রান্সফর তৌহন্দুনা লাইরবশিংবু মপাঙ্গল কলহন্নবা থবক পাইখৎলে। আয়ুশ্মান ভারত্তগী ঐখোয়গী লাইরবা ইমুংশিংদা অহোংবা, য়ৌশিনবা ঙম্বা অমসুং খ্বাইদগী ফবা হেকশেলগী থবকশিং ফংহন্নবা য়াম্না চাউবা কোকথোং অমা থোংগৎচরি। লাইরবশিংগী ইকাই খুম্নবা অমসুং মখোয়গী পুন্সিবু লাইথোকহন্নবদা সরকারনা মরুওইবা পান্দম ওইনা থম্লি।

মরূপশা, কবীর থৌমী অমা ওইরম্মি, থৌমী অমা ওইখি। কবীরনা হায়রম্মি –

কল করে সো আজ করো। (হয়েং তৌগদবদু ঙসি তৌ।)

কবীরনা থবক্তা থাজবা থমখি, মহাক্কী রামদা থাজবা থমখি। ঙসি খোংজেল য়াংনা মপুং ফারক্লিবা স্কিমশিং, খোংজেল শরুক অনি য়াংনা শেম্লিবা লম্বীশিং, অনৌবা হাইৱে, খোংজেল শরুক অনি য়াংনা রেল লম্বীশিং ইলেক্ত্রিক্কী ওইহনবা, খোংজেল য়াংনা শেমগৎলিবা এয়রপোর্তশিং, শরুক অনিদগী হেন্না খোংজেল য়াংনা শাগৎলিবা য়ুমশিং, পঞ্চায়ৎ খুদিংমক্তা তিংলিবা ওপ্তিকেল ফাইবর নেতৱর্ক, থবক ময়াম অসিগী খোংজেল অসি কবীরনা তাক্লম্বা লম্বী অদুগী খুদমদুমক্নি।

ইচিল–ইনাওশা, মালেম পুম্বনা মগহর অসি সন্ত কবীরনা থুপখিবা মফম ওইনা খঙনৈ। অদুবু নীং খা তম্লবা চহি কয়াগী মতুং অসিদা মফম অসিদসু ওইফম থোকপা ফিভম অদুদি ওইদ্রি। চহি ১৪–১৫গী মমাংদা হান্নগী রাষ্ট্রপতি অব্দুল কলামজীনা মফম অসিদা লাকখিবদা মহাক্না মফম অসিগীদমক্তা মলান অমা মঙজখি। মহাক্কী মঙলানশিং অদুবু মঙফাওনহন্নবগীদক মগহরবু মালেমগী মেপ্তা অচুম্বা অমসুং নুংশি–চান্নবগী মফম ওইনা শেমগৎনবগীদমক থবক হৌজিক খোংজেল য়াংনা পাইখৎলি।

কবীর সাহবকী ৱাহৈশিং অসি মীপুম খুদিংমক্কী মফমদা য়ৌহনবা অমসুং মদুগী মতুং ইন্না চৎহনবা অসি মথৌ তাই। ঐনা থাজৈ মদুদি মসিদা কবীর একাদমীনা অচৌবা থৌদাং য়াগনি। অমুক্কা হন্না মপাল্লোমদগী লেংবীরকপা লাইনীং চেৎলবশিংবু সন্ত কবীরগী শেংলবা লমদম অসিদা লেংবীরকপগীদমক্তা ঐনা মখোয়বু হন্না হন্না তৌবীমল খঙবা উৎচরি। সন্ত কবীরগী শেংলবা ৱাহৈশিং অদু পুন্সিদা ইঞ্জদুনা ঐখোয় ন্যু ইন্দিয়াগী ৱাশক অসি মপুং ফাহনগনি।

থাজবা অসিগা লোইননা, ঐগী ৱাহৈ লোইশিঞ্জরি। অদোম পুম্নমকপু হন্না হন্না থাগৎচরি।

সাহিব বন্দগী, সাহিব বন্দগী, সাহিব বন্দগী