ভারতকী প্রধানমন্ত্রী

ভারত মাতা কি জয়!

ভারত মাতা কি জয়!

ভারত মাতা কি জয়!

অন্ধ্র প্রদেসকী রাজ্যপাল সয়েদ অবদুল নাজির জি, রাজ্য অসিগী মীয়াম্না পাম্নরবা চীফ মিনিস্তর, ঐগী মরুপ শ্রী চন্দ্রবাবু নাইদু জি, দিপুতি চীফ মিনিস্তর পাৱান কলয়ান জি, কেন্দ্র সরকারগী ঐগী মরুপ মিনিস্তরশিং, রাজ্য সরকারগী মিনিস্তরশিং, এম.পিশিং অমসুং এম.এল.এশিং, অতোপ্পা শক্নাইরবশিং, ইনাওশিং অমসুং ইচলশিং,

অন্ধ্র প্রাজালা প্রেমা মারিয়ু অভিমা-ননাকি না ক্রিগাতালু।

না অভিমনানি চুপিনচে অভাকাসম ইপ্পুদু লাভিন-চিন্ধি।

ঐনা অহানবদা ভগবান সিমহাচালম বরাহা লক্ষ্মী নরাসিমহা শ্বামীদা খুরুমজরি।

মরুপশিং,

মীয়ামগী থৌজালদগী, চহি ৬০ গী মতুংদা, লৈবাক অসিদা কেন্দ্র সরকার অমা থংন থংননা অহুমলক খল্লে। ঙসিগী থৌরম অসিদা সরকার শেম্লবা মতুংদা অন্ধ্র প্রদেসতা পাংথোকপা ঐগী অহানবা থৌরমনি। থৌরম অসিগী মমাঙদা পাংথোকখিবা রোদসোদা ঐ মীয়াম্না তরাম্না ওকপগীদমক রাজ্য অসিগী মীয়াম থাগৎপা ফোঙদোকচরি। শ্রী চন্দ্রবাবু নাইদুনা মহাক্কী ৱারোলদা পনখিবা ৱাহৈ খুদিংমক অমসুং অনিংবশিং ঐনা ইকায়খুম্নবা উৎলি। অন্ধ্র প্রদেস অমসুং ভারতকী মীয়ামগী মতেংগা লোয়ননা শ্রী নাইদুনা মহাক্কী ৱারোলদা পনখিবা পান্দম খুদিংমক ফংবা ঙমগনি হায়বগী থাজবা ঐনা পীরি।

মরুপশিং,

ঐখোয়গী অন্ধ্র প্রদেস অসি খুদোংচাবা কয়ানা পীক থনবা রাজ্য অমনি। হায়রিবা খুদোংচাবশিং অসি থবক ওইনা পাংথোকপা মতমদা, অন্ধ্র প্রদেস চাউখৎকনি অমসুং ভারত চাউখৎপা লৈবাক অমা ওইগনি। অন্ধ্র প্রদেসকী মীয়াম চাউখৎহনবা হায়বসি ঐখোয়না পান্দমনি, অন্ধ্র প্রদেসকী মীয়ামগী থবক তৌবা হায়বসি ঐখোয়গী ৱাশক্নি। ২০৪৭ ফাওবগী মনুংদা দোল্লর ত্রিল্লিয়ন ২.৫ গী ইকোনোমি অমা লৈনবা অন্ধ্র প্রদেসনা পান্দম থম্লি। মঙলান অসি মঙফাওনবা ঙম্নবা শ্রী নাইদুনা ‘শ্বর্না অন্ধ্র@২০৪৭’ হৌদোক্লে। পান্দম খুদিংমক ফংনবা কেন্দ্রগী এন.দি.এ সরকারনা অন্ধ্র প্রদেস সরকারগা য়াম্না নকশিন্না থবক তৌমিন্নরি। কেন্দ্র সরকারনা অন্ধ্র প্রদেস মরুওইনা লৌদুনা লুপা করোর লাখ কয়াগী প্রোজেকশিং পীরে। ঙসি লুপা করোর লাখ ২ গী প্রোজেকশিং শঙ্গারে। প্রোজেকশিং অসিনা অন্ধ্র প্রদেস চাউখৎপগী অনৌবা থাকশিংদা পুখৎলগনি। চাউখৎ-থৌরাংগী প্রোজেকশিং অসিগীদমক লৈবাক শীনবা থুংবগী মীয়াম্না অন্ধ্র প্রদেসকী মীয়ামদা ঐনা থাগৎপা ফোঙদোক্লি।

মরুপশিং,

রাজ্য অসিগী অনৌবা থবক পাংথোকপগী হৈনবা অমা লৈরিবা অসিনা মরম ওইদুনা, অন্ধ্র প্রদেস অসি আই.তি অমসুং তেক্নোলোজিগী শিংথানিঙাই ওইরবা মফম অমনি। অন্ধ্র প্রদেসকী তুংদা লাক্কদবা তেক্নোলোজিশিংগী মফম অমা ওইরক্নবগী মতম অদু হৌজিক য়ৌরক্লে। গ্রিন হায়দ্রোজেনশুম্বা অনৌবা তেক্নোলোজিশিংদা মাঙজিল থাবা অসি য়াম্না মরুওই। ২০৩০ ফাওবগী মনুংদা গ্রিন হায়দ্রোজেন মেত্রিক তন মিল্লিয়ন ৫ পুথোক্নবা পান্দম অমগা লোয়ননা, ২০২৩ দা নেসনেল গ্রিন হায়দ্রোজেন মিসন হৌদোকখি। অহানবা তাঙ্কক্তা, গ্রিন হায়দ্রোজেন হব অসি লিংখৎকনি, মদুগী মনুংদা অমা বিশাখাপত্নমদা লৈগনি। পাক-চাউনা গ্রিন হায়দ্রোজেন পুথোক্নবগী খুদোংচাবশিং লৈবা মালেমগী সহর খরগী মনুংদা বিশাখাপত্নম য়াওরগনি। গ্রিন হায়দ্রোজেন হব অসিনা থবক কয়া ফংহনগনি অমসুং অন্ধ্র প্রদেসতা মেনুফেকচরিংগী ইকোসিস্তেম অমা শেমগৎকনি।

মরুপশিং,

ঙসি ঐনা নাক্কাপাল্লিদা ব্লক দ্রগ পার্ক প্রোজেক অমগী উরেপ-উয়ুং তম্নবগী খুদোংচাবা ফংলে। অসিগুম্বা পার্ক অমা লিংখৎপা লৈবাক অসিগী রাজ্য অহুমগী মনুংদা অন্ধ্র প্রদেস অমনি। পার্ক অসিনা মেনুফেকচরিং অমসুং রিছার্সকী অফবা ইনফ্রাস্ত্রকচর ফংহনগনি অমসুং লমদম অসিগী ফার্মা কম্পেনিশিং কান্নবা পীবগা লোয়ননা শেন থাদবা মীওইশিংগী পুক্নিং থৌগৎকনি।

মরুপশিং,

সহর শেমগৎপা অসি খুদোংচাবা অমনি হায়না ঐখোয়গী সরকারনা খল্লি অমসুং অন্ধ্র প্রদেস অসি অনৌবা যুগকী সহর শেমগৎপগী খুদম অমা ওইহন্নবা পান্দম থম্লি। মঙলান অসি মঙফাওনবা ঙম্নবা, ঙসি, কৃস সিতি হায়না খঙনবা কৃষ্ণপাত্নম ইন্দস্ত্রিএল এরিয়াগীদমক উরেপ-উয়ুং তম্লে। স্মার্দ সিতি অসি চেন্নাই-বেঙ্গালুরু ইন্দস্ত্রিএল কোরিদোরগী শরুক অমা ওইগনি অমসুং লুপা করোর লিশিং কয়া থাদরক্নবা পুক্নিং চিংশিনগনি অমসুং অন্ধ্র প্রদেসতা উদ্যোগকী থবক লাখ কয়া ফংহনগনি।

মরুপশিং,

শ্রী সিতিগী মওংদা মেনুফেকচরিংগী মফম অমা ওইনা অন্ধ্র প্রদেসনা মাংজৌননা খুদোংচাবা ফংলে। অন্ধ্র প্রদেস অসি লৈবাক অসিগী ইন্দস্ত্রিএল অমসুং মেনুফেকচরিং সেক্তরশিংদা মাঙজিল থাবা রাজ্যশিংগী মনুংদা অমা ওইহন্নবা পান্দম থম্লি। প্রদক্সন লিঙ্ক ইন্সেনতিপ (পি এল আই) স্কিমগুম্বা থবকশিংগী খুৎথাংদা সরকারনা মেনুফেকচরিং য়োকখৎলি, মসিনা তোঙান-তোঙানবা পোৎথোকশিং পুথোকপা মালেমগী মকোক থোংবা লৈবাকশিংগী মনুংদা ভারত য়াওবা ঙম্লে।

মরুপশিং,

বিশাখাপত্নমগী অনৌবা সহরদা সাউথ কোস্ত রেলৱে জোন হেদক্বাতরশিং শানবা উরেপ-উয়ুং তম্লে। মতম কয়াগী মমাঙদগী রাজ্য অসিদা তোখায়বা রেলৱে জোন অমা লৈহন্নবা তকশিন্দুনা লাকপা অদু থবক ওইনা পাংথোক্লে। সাউথ কোস্ত রেলৱে জোন অমা লিংখৎপা অসিনা লমদম অসিদা লৌউ-শিংউ অমসুং ললোন-ইতিক্কী থবকশিং হেনগৎহল্লগনি অমসুং তুরিজম অমসুং লমদম অসিগী শেন্মিৎলোন্দা অনৌবা খুদোংচাবশিং পীরগনি। লুপা করোর লিশিং কয়াগী লম্বী-থোংগী প্রোজেক কয়া শঙ্গারে অমসুং উরেপ-উয়ুং তম্লে। রেলৱে চাদা ১০০ ইলেক্ত্রিক ফংহনবা রাজ্যশিংগী মনুংদা অন্ধ্র প্রদেস য়াওরে অমসুং রেলৱে স্তেসন ৭০ হেন্না অমৃত ভারত স্তেসন স্কিমগী মখাদা শেমগৎলে। অন্ধ্র প্রদেসকী মীয়াম চৎথোক-চৎশিন নুংঙাইনবা বন্দে ভারত ত্রেন ৭ অমসুং অমৃত ভারত ত্রেন চেল্লে।

মরুপশিং,

হেন্না ফবা লম্বী-থোং অমসুং খুদোংচাবশিংগা লোয়ননা অন্ধ্র প্রদেসতা ইনফ্রাস্ত্রকচরগী অওনবা পুরকপা অসিনা রাজ্য অসি অওনবা লাক্লগনি। চাউখৎপা অসিনা হিংবদা লাইবা অমসুং ললোন-ইতিক পাংথোকপদা লাইবা হেনগৎলগনি অমসুং মসিনা অন্ধ্র প্রদেসকী দোল্লর ত্রিল্লিয়ন ২.৫ গী ইকোনোমিগী য়ুম্ফম থোল্লে।

মরুপশিং,

বিশাখাপত্নম অমসুং অন্ধ্র প্রদেস চহি চা কয়া ভারতকী ললোন-ইতিক্কী থোঙজিল ওইদুনা লাক্লি। ঙসি ফাওবা বিশাখাপত্নম য়াম্না মরুওইরি। সমুদ্রগী খুদোংচাবশিং মপুংফানা লৌনবা মিসনগী মওংদা ব্লু ইকোনোমি য়োকখৎলি। শেন্থোক হেনগৎনবা অমসুং ঙা ফাবগী থবক তৌরিবশিংগী ললোন-ইতিক চাউখৎনবা বিশাখাপত্নম হিথাংফম মতমগা চুনবা মওংদা শেমগৎলে। ঙামীশিংদা কিষান ক্রেদিদ কার্দকী খুদোংচাবা ফংহল্লে অমসুং সমুদ্রগী শরুক ঙাক-শেন্নবা থবকশিং পায়খৎলে।

মরুপশিং,

খুন্নাইগী কাংলুপ খুদিংমক চাউখৎপগী কান্নবশিং ফংনবা, কাংলুপ খুদিংমক কোনশিন্নবা অমসুং হিরম খুদিংমক চাউখৎহন্নবা এন.দি.এ সরকারনা থবক পায়খৎলে। নুংঙাই-য়াইফবা অমসুং অনৌবা অন্ধ্র প্রদেস অমা শেমগৎনবা কেন্দ্র সরকারনা কৎথোক্লি। অন্ধ্র প্রদেসকী মীয়াম নুংঙাইহনগদৌরিবা ঙসি শঙ্গারিবা প্রোজেকশিং অসিগীদমক ঐনা অমুক হন্না মীয়ামদা থাগৎপা ফোঙদোকচরি।

ময়াম পুম্নমক ঙমখৈ লৈতনা থাগৎপা ফোঙদোচরি!

***