ভারতকী প্রধানমন্ত্রী
ঐখোয় পুম্নমক্না ভাইরস অসি করিনো হায়বা খঙদ্রি অমনি হায়বসি য়াজৈ হায়না ঐহাক্না থাজৈ, মমাংদা থোকখিবা অমত্তগা মান্নদ্রি। মরম অসিনা, অসিগুম্বা মশক খঙদবা য়েক্নবা অসিবু থেংননবা হোৎনবদা ঐখোয়গী পাউখুমসু মশানা থোকচরক্লি।
ঐহাক হকশেলগী এক্সপর্ত নত্তে অদুবু ঐগী এসেস্মেন্ত অসি মশিংদা য়ুম্ফম ওইবনি। ঐনা খল্লি মদুদি ঐখোয়না কোরোনাভাইরস লান্থেং অসি ঐখোয়না মী কয়া কনবা ঙম্লবগে হায়বসিদা য়েংগদবনি।
ভাইরস অসি য়াম্না অহোংবা নাইবা অমগী মতৌ লৌই। করিগুম্বা কান্দনা, গুজরাৎকুম্বা মফমশিংনা হোৎস্পোৎ হেক ওই অদুগা ফিবম অসি কেরলা, কর্নাতাকা অসিনচিংবা মফমশিংদনা অমুক লাকশিনবা ঙম্বগুম তৌই। থা খরগী মতুংদা, গুজরাৎকী ফিবম ফগৎলকখি অদুবু কেরলাদা অমুক শাথিরকখি।
মরম অসিননি ঐহাক্না লাইথোকপা য়াবগী মফম অমত্তা লৈতে হায়জরিবসি। ঐহাক্না হায়রিবসিমক ঐগী লৈবাক মীয়ামদা ওক্তোবর ২০দা পীবা পাউজেলদা, ঐখোয়না তৌবা য়াবা অমখক্তি মাস্ক উপ্পা, খুৎ-শা হাম্বা অমসুং সোসিএল দিস্তেন্সিং ঙাকপনচিংবা চেকশিল থৌরাংশিং অসিনি মরমদি ‘হিদাক লৈত্রিবফাওবদি, লাইথোকপা য়াদে হায়না তকশিনখি।
২. অদুবু অদোম্না খনবীখিবশিং অদু মায় পাক্লে হায়না লৌবীব্রা নত্ত্রগা হেন্না ফগৎহনবা অমসুং লেপ্পা লৈতনা ইন্নোবেৎ তৌবা চঙই হায়না লৌবীব্রা?
ঐখোয়না হেন্না মীকুপ নাহুম শিংনা লৈনবা অমসুং মতম চানা লৈবাক পুম্বা লোকদাউন তৌনবা ৱারেপ লৌখি। ঐখোয়না লোকদাউন হৌদোকখিবা মতমদা লৈখিবা অপুনবা কেস অসি লিশিং-লিশিংদা কেস লৈবা লোকদাউন লাউথোকখ্রবা লৈবাকশিংগা য়েংনবদা চাম্মরোমতমক ওইরম্মি। ঐখোয়না লোকদাউন অসি লাইচৎ অসিগী লম্বীদা খ্বাইদগী লুবা তাংকক অমদা থমখি।
ঐখোয়দা লোকদাউনগী তোঙান-তোঙানবা তোঙানবা তাংককশিংগী মতম ফংবদা নত্তনা ঐখোয়না অনলোক্কী থৌওং মতম চানা ফংখি অমসুং ঐখোয়গী শেন্মিৎলোন অসি হৌজিক্তি মহৌশাগী ফিবমদা হঞ্জিল্লকপা হৌরে। হায়রিবসি ওগস্ত অমসুং সেপ্তেম্বরগী দেতানা তাক্লি।
লৈবাক অসিগী ওইবা কোবিদ-১৯ লাইচৎ থেংননবগীদমক ভারতনা সাইন্সতা য়ুম্ফম ওইবা খোঙথাং লৌখৎখি। অসিগুম্বা খোঙথাং অসি কান্নবা ফংলি।
নৈনবদা থেংনরে মদুদি হায়রিবা খোঙথাং অসিনা ভাইরস অসি খোঙজেল য়াঙনা শন্দোক্লক্তুনা মীওই কয়াগী থৱাই লৌরমগদবদগী কনবদা মতেং পাংলি। মতম চানা লোকাউন তৌহৌবগী মথক্তা ভারত অসি মাস্ক উপ্পা, কন্ত্রেক্ত ত্রেসিং এপ অমসুং রেপিদ এন্তিজেন তেস্ত থাদখিবা অহানবা লৈবাকশিংগী মনুংদা অমা ওইখি।
অসিগুম্না চাউবা লাইচৎ অসিদি করিগুম্বা লৈবাক অদুনা ওপুনবা ওইনা পুনশিনলমদ্রবদি থেংনবা ঙম্লম্লোই। লৈবাক পুম্বনা ভাইরস অসিবু থেংননবগীদমক লেপখি। ফ্রন্তলাইন হেল্থ ৱার্কর ওইরিবা কোবিদ ৱারিয়রশিংনা মখোয়গী পুন্সিদা করি খুদোংথিনিংঙাই ওইবগে হায়বা খঙনা- খঙনা লৈবাক অসিগীদমক লান্থেংনখি।
৩. অদোমগী খ্বাইদগী চাউবা পরা অসি করিনো?
হৌখিবা থা খরসিদা ঐহাক্না তমশিলহৌবসি খ্বাইদগী অরোইবা মাইলদু য়ৌগদবা দেলিবরী মেকানিজম অমগী তঙাইফদবা লৈরিবসিনি। অসিগুম্বা দেলিবরী মেকানিজমগী অয়াম্বা শরুক্তি ঐখোয়গী সরকারগী অহানবা তাংকক্তা শেমগৎখ্রে, অমসুং মদুনা চহী চাম্মগী মনুংদা অমুক্তং লাকপা লাইচৎ অসি থেংনবদা অদুক্কী মতীক মতেং পাংখ্রে। ঐহাক্না খুদম অনিখক পীজগে। অহানবদা দাইরেক্ত বেনিফিৎ ত্রান্সফর রেজিমগী থোঙদা, ঐখোয়না মীওই মিলিয়ন কয়াগী বেঙ্ক একাউন্ততা খুদক্তা শেল থাবা য়াহনখ্রে। অসিগুম্বা থবক অসিবু য়াহল্লিবা মেকানিজম পুম্বা হৌখিবা চহী তরুক অসিদা শেমগৎখিবনি। অঙনবা শরুক্তা, মহৌশাগী ওইবা খুদোংথিবা মচা-মচা কয়াদা, মতেং কয়া লাইরবশিংগী মফমদা য়ৌহনবা ঙম্লমদে অমসুং মতমদুদা চাউনা শেঞ্জা থুমজা তৌনরম্মি। অদুবু ঐখোয়না অতেনবা মতমদা শেঞ্জা থুমজাগী ৱাকৎ অমত্তা লাকহন্দনা মতেং কয়া পাক শন্না য়ৌহনবা ঙমখি। মসিনি লৈঙাক্লোন্দা তেক্নোলোজীগী শক্তি হায়বসি। মসিগী ওন্ন-তৈনবা খুদম অমা পীবা তারবদি, অদোমগী অপাবশিংদা ভারতনা মতৌ করম্না ১৯৭০গী স্মোল্পোক্স লাইচৎ থেংনখিবগে হায়বদু খঙহনবা কান্নগনি।
অদুগা অনিশুবদা, অসিগুম্বা য়াম্না তেনবা মতমদা বিলিয়ন অমা হেনবা মীওই কয়াগী লোনচৎ হোংলক্লিবা – মাস্ক উপ্পা অমসুং সোসিএল দিস্তেন্সিং ঙাকপা- কয়া অসি কা হেন্না ইনশিল্লুদ্রবসু মীয়াম্না শরুক য়ারি হায়বগী খুদম অমনি।
কেন্দ্র অমসুং রাজ্যগী সরকারশিংনা কাংবু অমত্তা ওইনা নিংথিনা হোৎনরি পব্লিক অমসুং প্রাইবেৎ সেক্তরশিংসু অমত্তা ওইনা পুনশিল্লি, মন্ত্রালয় খুদিংমক্না তোঙান-তোঙানবা থৌদাংশিং লৌমিন্ননবা পুনশিল্লি অমসুং মীয়াম্না শরুক য়াবনা অপুনবা অমসুং মহৈ য়ানবা লান্থেং অমা ওইহল্লি।
৪. ভারত্তা কোবিদ-১৯ শন্দোক্লকপগী ফিবম অসি অদোম্না করম্না য়েংবগে?
ভাইরস অসিনা ঙল্লিঙৈ মতমদা লৌখৎখিবা প্রোএক্তিব ওইবা খোঙথাংশিংনা ঐখোয়না লাইচৎ অসি ঙাকথোক্নবা হোৎনবদা মতেং পাংখি। অদুবু, মতম চাদনা অমখক্তমক ওইরবসু লৈখিদবা হায়বসি য়াম্না থমোই শোক্নিংঙাই ওই, য়াম্না চাউবা, ওপন ওইবা অমসুং শম্নরিবা ময়াম অসি য়েংলুরবদি লৈবাক অসিগী কোবিদ-১৯না শিবগী চাং অসি মালেমগী খ্বাইদগী নেম্বা লৈবাকশিংগী মরক্তা লৈ।
ঐখোয়গী নাবা ফগৎলকপগী চাং অসি লেপ্পা লৈতনা ৱাংখৎলক্লি অমসুং ঐখোয়গী এক্তিব কেস মশিং অসি কা হেন্না হন্থরক্লি। সেপ্তেম্বরগী ময়াই থংবদা নোংমদা কেস ৯৭,৮৯৪ লাক্লম্বদগী, ঐখোয়না ওক্তোবর অরোইবা শরুক্তদি অনৌবা কেস মশিং ৫০,০০০ খক্তমক রিপোর্ত তৌখি। হায়রিবসি ভারত পুম্বনা অমত্তা ওইনা অমসুং তিম ইন্দিয়া ওইনা হোৎনমিন্নবনা ফংহনবীরকপনি।
৫. খ্বাইদগী নৌবা ত্রেন্দনা হায়রি মদুদি এক্তিব কেস অমসুং ফেতালিতীদা হাইথরক্লিবসিনা শাথিবা মশক অমা ঐখোয়গী মনিংদা লৈরম্বা য়ারি হায়না আসা তৌনরি। অদোমসু হায়রিবা ৱাখল্লোন অসি সরকারদা লৈরিবা দেতাশিংগী মতুং ইন্না য়ানিংব্রা?
মসি অনৌবা ভাইরস অমনি। হান্না শন্দোকপা লাকশিনবা ঙমখ্রবা লৈবাক কয়া অমা অমুক হিংগৎলকপগী পাউ লৈরি।
ভারতকী জিওগ্রাফিকেল স্প্রেদ, মী কূংবগী চাং, চাং নাইনা মী তিনবশিং অসি মশিংশিং অমসুং অতোপ্পগা চাংদম্নবা মতমদা ঐখোয়গী ৱাখলদা থমগদবনি। ঐখোয়গী রাজ্য কয়া অমা লৈবাক কয়াদগী চাউবা হেল্লিবনি।
লৈবাক অসিগী মনুংদা লৈরিবা শাফু অসি য়াম্না পাক চাউই – করিগুম্বা মফম খরদনা হন্থৈ, অদুগা রাজ্য খরদনা কা হেন্না লেপ্তনা অদুমক লৈবা য়াওরি। জিল্লা ৭০০ হেন্না লৈবা লৈবাক অমদা অসিগুম্বা শাফু অসি রাজ্য খরদা খক্তমক লৈবা উই।
ঐখোয়গী খ্বাইদগী নৌবা কেস মশিং, শিবগী চাং অমসুং অপুনবা এক্তিব কেস মশিং অসিনা মমাং মতম খরদগী খরা হন্থবদৌনা তৌই, অদুবু ঐখোয় লাইথোকদি য়াদে। ভাইরস অসি অদুমক লৈরি। ঐখোয়না লাইথোক্লুবদা মহাক্না শাথিরক্কনি।
ঐহাক্না ফাওজৈ মদুদি ঐখোয়গী পাউখুম অসি ফিবম অসিবু হেন্না লাকশিন্নবা, মীয়াম্বু ৱাখল তাহন্নবা, অহেনবা ফেসিলিতীশিং শেম্নবা ‘খ্বাইদগী ফবা অমা লাক্কনি হায়না আসা তৌগদবনি অদুবু খ্বাইদগী শাথিবগীদমক শেম শাদুনদি লৈগদবনি’ হায়বা ৱাখল্লোন অসিদা মীৎয়েং চঙগদবনি।
৬. কোবিদ-১৯গী লাইচৎ অসিনা শেন্মীৎলোন্দা অৱাবা চৈথেং অমা পীখি, হায়রি অসি অদোমনা পুন্সি অমসুং হিংনবগী পাম্বৈগী মরক্তা চাং অমদা লৈহন্নবা পান্দম থমদুনা কোকহন্নবা হোৎনখি। খোঙথাং অসিদা সরকার অসি কয়াম মাই পাকপা ঙম্লে হায়না অদোমনা লৌবগে?
ঐখোয়না নীংখা তম্বা ফংখিবা অসি দিকেৎ তরেৎ হেল্লক্লে, অদুবু হৌজিক ফাওবা মীওই খরদি শপনম শাসন তৌম্বা অদুনা মরম ওইরগা মীয়াম অমসু সরকারশিং অসি তোঙান তোঙানবা পোৎশক অমমমনি হায়না খল্লি। সরকার অসিদা মসিগী অচৌবা মাংজবা লৈরে হায়না পুক্নিংদা ফাউহল্লিবা অসি মসিগী ৱাখল্লোন অসিদগী হৌরকপনি। লাইচৎ অসিনা মীওই করোর ১৩০দা চৈথেং পীরি অমসুং সরকার অমদি পরজাশিংনা মসি লান্থেংনবা ঙম্নবা পুন্না হোৎনমিন্নরি।
কোবিদ-১৯ হৌখিবা মতম অদুদগী হৌনা মালেমগী মফম পুম্বদা তোঙান তোঙানবা লৈবাকশিংদা মীওই মশিং কয়া শীখিবা অদু উবদা অকিবা পোকখি। খঙহৌদনা অনাবা মশিং খঙহেন হেনগৎলকপা অসিনা মরম ওইরগা মখোয়গী হেল্থ সিস্তেমশিং মপাঙ্গল শোন্থরকখি। অহান অঙাং খাইদনা শীখি। মতম অদুদা ঐখোয়না থমখিবা পান্দম অসি ভারত্তা অসিগুম্বা ফীভম অসি ওইদনবা হোৎনবা অমসুং পুন্সিশিং কনবা হায়বা অসিনা ওইখি। ভাইরস অসি শক খঙদবা য়েক্নবা অমগুম ওইখি। মসি অমুক্তা থোকখিদ্রি।
কনাগুম্বা অমনা শখ উদবা য়েক্নবা অমগা লান্থেংনবা মতমদা, মদু মুন্না খঙবদা অমসুং লান্থেংননবা কান্নগদবা লালোং অমা শেম্বদা মতম চংঙি। ঐখোয়না ভারত মচা করোর ১৩০দা ভাইরস অসিদগী থোরকপা খুদোংথিবশিং অমসুং করম্না ইশাবু অমসুং ঐখোয়গী ইমুং মনুংগী মীওইশিংবু ঙাকথোকপা ঙমগদগে হায়বা অসিগী মতাংদা মখোয়না চেকশিন্না লৈনবা খঙহনখি।
মসি য়াম্না অৱাবা থবক অমা ওইখি। জন চেৎনা য়কাইহনবা মরু ওইখি। জন চেৎনা য়কাইহনবা হায়বা অসি জন ভগিদরীগী খুত্থাংদা খক্তা ওইথোক্কনি। জন্তা কর্ফিয়ুগী খুত্থাংদা পুখম থিন্দুনা নত্ত্রগা থাওমৈ থান্দুনা লৈবাক পুম্বগী ৱারেপ লৌমিন্দুনা ঐখোয়না জন ভগিদরী শীজিন্নদুনা ভারত মচা পুম্নমকপু প্লেৎফোর্ম অমদা পুশিনখি। মসিনা অতেনবা মতমগী মনুংদা মীয়াম পুম্বদা এৱের্নেস পীবগী শীংথানিংঙাই ওইবা খুদম অমা ওইরি।
৭. অমসুং শেন্মীলোনগী লালোং অদুনা করি ওইখিবগে?
পুন্সিশিং কনবা হায়বা অসি কোবিদ-১৯দগী পুন্সিশিং কনবা অদু খক ওইদে। মসিদা লায়রবশিংদা চান্নবা চীঞ্জাক অমসুং তঙাই ফদবশিং মরাং কাইনা ফংহনবা অসিসু য়াওরি। অয়াম্বা এক্সপর্তশিং অমসুং পাউচেশিংনা সরকারা কোর্পরেৎ সেক্তরগীদমক ইকনোমিক পেকেজ কাইথনবা হায়রক্লবসু, ঐখোয়গী পান্দমসি শোত্থরবা কাংলুপশিংগী থৱায় কনবা অসিনা ওইখি। ঐখোয়না অহানবা ওইনা লায়রবশিং, মাইগ্রেন্তশিং, লৌমীশিংগী অৱাবা অসি কোকহন্নবা পি.এম. গরিব কল্যান পেকেজ লাউথোকখি।
ঐখোয়দা ঙন্না লাকখিবা অখন্নবা ৱাখল্লোন অদুদু সোসিএল দিস্তেন্সিং অরাইবা মওংদা থমদুনা পোত্থোক পুথোকপদা অকাইবা থোকহল্লোইদবা অদুদি লৌউ-শিংউগী সেক্তরনি হায়বা অসিনি। মরম অসিনা ঐখোয়না অহৌবদগী হৌনা লৌউ-শিংউগী থবক থৌরমশিংদি অয়াবা পীখি। অমসুং থা কয়া অসিদা অপনবশিং লৈজরবসু ঙসিদি ঐখোয়না সেক্তর অসিনা থবক ফজনা তৌরি হায়বগী ফলশিং উবা ফংলে।
খুদক্কী অমসুং মিদিয়ম-তর্ম অনিমক্কী ওইনা মীয়ামদা মথৌ তাবা অদু ফংহন্নবা চেং য়েন্থোকপগী, শ্রমিক স্পেসিএল ত্রেনশিং চেলহনবগী অমসুং লৈশিনবগী থবকশিং পাইখৎখি।
মীয়াম্না থেংনরিবা অৱাবশিং অসি কোকহন্নবা ঐখোয়না আত্মানির্ভর ভারত পেকেজ হৌদোকখি। পেকেজ অসিনা খুন্নাইগী শরুক পুম্নমক অমসুং শেন্মীৎলোনগী শরুক পুম্নমক্না থেংনরিবা সমস্যাশিং কোকহনখি।
মসিনা ঐখোয়দা চহি কয়া অসিদা ঙাইদুনা লাকখিবা অদুবু মমাংদা থবক ওইনা পাইখৎখিদ্রিবা অহোংবশিং অদু পুরক্না খুদোংচাবা অমসু পীখি। কোইলা, লোউ-শিংউ, লেবর, ঙাকশেল, সিবিল এভিএসন অমসুং অতোপ্পা সেক্তরশিংদা অহোংবশিং পুরক্তুনা খুদোংথিবা অসি নংদ্রিঙৈ মমাংদা ঐখোয়না লৈরম্বা অদুদগী খুমাং চাউশিন্নবা লম্বেলদা চংশিনবদা মতেং পাংলি।
ঐখোয়না হোৎনরিবা অসিনা ভারতকী শেন্মীৎলোন অসি পান্নরম্বা চাংদগী হেন্না খোঙজেল য়াংনা চংশিনবগী মহৈ ফংলক্লি।
৮. অদোমগী সরকারনা মরু ওইবা সেকেন্দ-জেনরেসন রিফোর্ম অনি হৌদোকখি – ফার্ম অমসুং লেবর রিফোর্মশিং। মরু ওইনা হৌজিক লৈরিবা অপুনবগী শোত্থরবা শেন্মীৎলোন অমসুং পোলিতিকেলগী ওপোজিসন অসিদা থৌরাংশিং অসিনা পাম্লিবা ইকনোমিক দিবিদেন্দ অদু ফংগনি হায়না অদোমনা কয়াম থাজবা থম্বগে?
এক্সপর্তশিংনা রিফোর্মশিং অসি চহি কয়া মমাংদগী শৌগৎতুনা লাকখি। রাজনিতী দলশিংনা ফাওবা রিফোর্মশিং অসিগী মিংদা ভোৎ খোম্মি। মীপুম খুদিংমক্না রিফোর্মশিং অসি পুরকপা পামখি। তশেংবদি ওপোজিসন পার্তীশিংনা মসিগী মনা অসি ঐখোয়না লৌবা অসি মখোয়না পামদে।
ঐখোয়সু মনা অদু পামদে। লৌমীশিং অমসুং শিন্মীশিংগী য়াইফনবা খল্লগা ঐখোয়না রিফোর্মশিং অসি পুরকখিবনি। অমসুং ঐখোয়গী লৈরিবা রেকোর্দশিং অসিনা মরম ওইরগা ঐখোয়না হোৎনরিবশিং অসি মখোয়না খঙঙি। অমসুং থাজবা থমম্লি।
হৌখিবা চহি তরুক অসিদা ঐখোয়না মথং মথং লৌউ-শিংউগী সেক্তর অসিদা অহোংবশিং পুরক্নবা হোৎনরকখি। ঙসি ঐখোয়না তৌরিবা অসি ২০১৪দা ঐখোয়না লৌখৎপা হৌখিবা খোঙথাং অদুগী শরুক অমা খক্তনি। ঐখোয়না এম.এস.পি.শিং শরুক কয়া হেনগৎহনখ্রে অমসুং মমাংগী সরকারনা লৌমীশিংদগী এম.এস.পি.দা লৈশিনখিবা অদুদগী শরুক কয়া হেন্না ঐখোয়না লৈশিনখি। ইরিগেসন অমসুং ইন্সুরেন্স অনিমক্তা চাউনা ফগৎলকপা উবা ফংলে। লৌমীশিংগী দাইরেক্ত ইনকম সপ্পোর্তসু ফংহনখ্রে।
ভারতকী লৌউ-শিংউ অসিদা ৱাৎলিবা অসি ঐখোয়গী লৌমীশিংনা থাদরিবা হুমাং মমল অমসুং অৱামল অদু মতিক চান্না ফংদবা অসিনি। রিফোর্মশিং অসিনা পুরকপা অনৌবা মওং অসিনা ঐখোয়গী লৌমীশিংগী কান্নবা চাউনা হেনগৎহল্লগনি। অতোপ্পা ইন্দস্ত্রীশিংদদি শেন্দোং ফংলবদি পোত্থোক হেন্নগৎনবা মদু অমুক হন্না সেক্তর অদুদা ইনবেস্ত তৌই। শেন্দোং ফংনবা অমসুং অমুক হন্না ইবেস্তমেন্ত তৌবগী অফবা সাইকল অমা থোরক্লি। লোউ-শিংউগী সেক্তরদসু সাইকল অসিনা ইনবেস্তমেন্ত, ইনোবেসন অমসুং অনৌবা তেক্নোলোলজী কয়াগী থোং হাংলি। অসুম্না রিফোর্মশিং অসিনা লৌউ-শিংউগী সেক্তর খক্তা নত্তনা খুঙ্গংগী অপুনবা শেন্মীৎলোন্দা চাউনা অহোংবা পুরক্নবা মপাঙ্গল লৈ।
লোইখিবতা ঙাইরিবা রবি মার্কেতিং সিজন অসিদা এম.এস.পি.দা কেন্দ্র সরকারনা গেহু এম.তি. লাখ ৩৮৯.৯ রেকোর্দ ওইনা লৈশিনখিবগা লোয়ননা এম.এস.পি. ওইনা লৌমীশিংদা করোর ৭৫,০৫৫ ফংহল্লি।
হৌজিক চত্থরিবা খারিফ মার্কেতিং সিজন অসিদা ফৌ এম.তি. ১৫৯.৫ ফাওবা লৈশিনখ্রে, মমাংগী চহিগী ওইবা এম.তি. লাখ ১৩৪.৫কা চাংদম্নবা মতমদা ১৮.৬২% হেনগৎলে। পুম্নমক অসি ঐখোয়না পার্তলিয়ামেন্ততা পাস তৌখিবা ওর্দিনান্স অহুম অদুগী মতুংদা ওইবা ঙমখিবনি।
য়ু.পি.এ.-২ (২০০৯-১০দগী ২০১৩-১৪)গী চহি মঙাগা চাংদম্নবদা হৌখিবা চহি মঙা অসিগী মনুংদা লৌমীশিংদা ফৌগী পীবা এম.এস.পি. অসি শরুক ১.৫, গেহুনা শরুক ১.৩, হৱাইনা শরুক ৭৫ অমসুং থাও শুংবদা শীজিন্নবা মরুশিংনা শরুক ১০ হেনগৎখ্রে। মসিনা এম.এস.পি.গী মরমদা অরানবা তোকঙা শন্দোক্লিবা মখোয়গী ওইদবা ঙাংবা অমসুং পুকচেল শেংদবা অদু উৎলি।
৯. অমসুং লেবর রিফোর্মশিংগী মতাংদনা কমদৌবনো?
রিফোর্মশিং অসি য়াম্না প্রো-ৱার্কর ওই। করিগুম্বা ফিক্স-তর্মগী ওইনা নেক্লবসু হৌজিক্তি মখোয়দা কান্নবা অমসুং সোসিএল সেক্যুরিতী পুম্নমক ফংহল্লে। লেবর রিফোর্মশিং অসিনা মিনিমম ৱেজ রিফোর্মশিং পুরক্তুনা শিন্মীশিংবু ঙাক শেনবা, ইনফোর্মেল সেক্তরদা শিন্মীশিংগী সোসিএল সেক্যুরিতীগী প্রোবিজন পীবা অমসুং সরকারনা খুৎ থিংজিনবা হন্থহনবা অসিগা লোয়ননা থবক চাউনা পীবদা মতেং পাংলগনি। মসিনা খুৎশুমল মতম চানা ফংহনগনি অমসুং শিন্মীশিংগী ওক্যুপেস্নেল সেফতীবু মরু ওইনা লৌবীদুনা হেন্না অফবা থবক শুফম অমা ওইহনবা ঙমগনি।
হৌখিবা চয়োল খরা অসিদা ঐখোয়না তৌগে হায়না খনখিবা অদু পাঙথোকপা ঙমখ্রে। সেক্সন ১,২০০গী মথক্তা য়াওবা সেন্ত্রেল লেবর লো ৪৪ অসি কোদ মরি খক্তদা পুনশিনবা ঙমখ্রে। হৌজিক্তি রেজিস্ত্রেসন অমা, এসেমেন্ত অমা অমসুং রিতর্ন ফাইলিং অমা খক্তা ওইরগনি। অরাইবা কম্প্লাইন্স অসিগা লোয়ননা মসিনা ইনবেস্ত তৌনবা মরাচেৎপা বিজেসশিংগী মতম অমা ওইহনবা ঙম্লগনি অমসুং ইম্পোইয়ী অমদি ইম্পোইয়রগী মরক্তা অনিমক্তা কান্নবা ফংহনবা ফীভম অমা ওইহনবা ঙম্লগনি।
হৌখিবা চহি তরুক অসিদা মেন্যুফেকচরিং সেক্তরগী ওইনা, কোর্পরেৎ তেক্সকী চাং অসি অনৌবা মেন্যুফেকচরিং য়ুনিৎশিংগী ওইনা ১৫% হন্থহনবা অসিদগী হৌদুনা এফ.দি.আই. লিমিৎশিং হেনগৎহন্দুনা স্পেস, ঙাকশেল অমসুং অতোপ্পা স্ত্রেতেজিক সেক্তরদা লনাই ইনবেস্তমেন্ত তৌবা য়ানবা য়াওনা অহোংবা পুরক্নবা খোঙথাং মশিং কয়া লৌখৎখ্রে। মরু ওইনা মেন্যুফেকচরিং সেক্তরদা রিফোর্মশিং পুরক্তুনা শেমদোক্কদবা শরুক অমা খক্তা ঙাইরে – লেবর রিফোর্মশিং। ঐখোয়না মদুসু তৌবা ঙমখ্রে। ভারতকী ওইনা ফোর্মেল সেক্তরদা লৈরিবা শিন্মীশিংদগী লেবর লোশিংনা হেল্লি হায়না তোয়না ফাগী তৌদুনা ফোঙদোক্নরি। লেবর লো অসিনা শিন্মী খক য়াওদনা মীপুম খুদিংমক্তা কান্নবা ফংহনখি। ভারতকী ৱার্কফোর্সনা ফোর্মেলাইজেসনগী কান্নবশিং অসি ফংদ্রিবা ফাওবা অপুনবগী ওইবা চাউখৎ থৌরাং পুরকপা ঙম্লোই।
হৌখিবা থা খরা অসিদা লৌখৎখিবা রিফোর্মশিং অসিনা মেন্যুফেকচিং অমসুং লৌউ-শিংউ সেক্তর অনিমক্তা গ্রোথ রেৎ অমসুং রিতর্নশিং হেনগৎহনবদা মতেং পাংলগনি। মসিগী মথক্তা মসিনা মার্কেৎশিং অমসুং মার্কেৎ ফোর্সশিংদা থাজবা থম্লিবা অনৌবা ভারত অমা ওইরে হায়না মালেমদসু খঙহনগনি।
১০. য়ানিংদবা ফোংদোরকপা অমনা এমপ্লোয়ীশিং থবক তৌবদগী লেপহনবগী মতাংদা কোমথোকপা অসি মী ৩০০ ফাওবা থবক তৌবা ফেক্তরীশিংদা খক্তমক য়াহল্লি। অদুবু ইলেক্ত্রোনিক্স, ফিরোলশিং অমসুং অতোপ্পা সেক্তরশিংগী য়াম্না চাউবা ফেক্তরীশিংদদি মসিদগী য়াম্না হেন্না থবক তৌরি। থবক লেপ্তুনা পোথাদুনা লৈরিবশিংগীদমক্তা কমপেন্সেশন য়াম্না হেনগৎহন্দুনা ফেক্তরীশিং অদুদা মসিগী কোমথোকপা অসি মখোয়দসু ফংহনবদি করি কায়বগে। মসিগী মথক্তা স্ত্রাইক তৌবগী হক্তা অথিংবা থমজিনবা অসিগী মতাংদা য়ানিংদবা ফোংদোরকপা অসিগী মতাংদা অদোমগী করি ৱাখল্লোন লৈবগে?
ভারতনা খুদোংচাদবা অনিদগী মায়োক্নরি: ঐখোয়গী লেবর লো অসিদা অনম্বা ৱার্করশিংনা মখোয়গী সোসিয়েল সেক্যুরিতী অমত্তা লৈখিদে। অমসুং কমপনীশিংনা লেবর লোশিং কীবদগী অহেনবা ৱার্করশিং নেকপা পামদে, মসিনা লেবর-ইন্তেন্সিব প্রোদক্সনবু দিসিন্সেন্তিভাইস তৌহনখি। ইন্সপেক্তর-রাজ সীস্তেম অমসুং য়াম্না কমপ্লিকেতেদ ওইবা লেবর লোশিং অসিনা এমপ্লোয়রশিংদা য়াম্না চাউনা অথিংবা-অপনবা অমা ওইহল্লি।
ঐখোয়না ইন্দস্ত্রী অমসুং লেবরগী মরক্তা মতম চুপ্পদা চয়েৎনবা, য়ানদবা লৈ হায়বগী ৱাখলল্লোন অসি থাদোক্কদবনি। অনিমক্তা চপ মান্ননা কান্নবা ফংবা মেকানিজম অমা লৈবদি করি কায়বগে? লেবর হায়বা অসি চপ মান্নবা হিরম অমা ওইবনা, লো অসিনা রাজ্য সরকারদা কোদ অসিবু মখাতানা মখোয়গী তোপ-তোপ্পা ফিভম অমসুং মথৌ তারিবশিং অদুগী মতুং ইন্না শেমদোক্নবগী অয়াবা পীরি।
স্ত্রাইক তৌবগী হক অসিদা অথিংবা অমত্তা লৈতে। তশেংনদি, ত্রেদ য়ুনিয়নশিংদা অনৌবা হক অমা পীখ্রে, মসিনা মখোয়দা আইনগী ওইবা থোংদা মখোয়বু মশক খঙহল্লি।
ঐখোয়না এমপ্লোয়র-এমপ্লোয়ীগী মরক্তা লৈরিবা মরী অসি অমুক্কা হেন্না সীস্তেমেতিক অমসুং সীমিত্রিকেল ওইহনখ্রে। নোতিসকী মতমগী খুদোংচাবা অসিনা এম্পলোয়ীশিং অমসুং এমপ্লোয়রশিংগী মরক্তা য়ানদবা, নুংঙাইতবা খুদিংমক্কী নুংশিং-চান্ননা লোইশিন্নবগী খুদোংচাবা পী।
১১. জি.এস.তি. সীস্তেম অসি কোবিদ-১৯দগী অৱাবা কয়া ময়োক্নরি। কেন্দ্র অসিনা হৌজিক্কী ওইনদি শেল পুবদা অয়াবা পীখ্রে অমসুং রাজ্যশিংদা মসিগী মতাংদা অয়াবা পীখ্রে। অদুবু তুং কোইনা য়েংবদা অদোম্না রাজ্য সরকারশিংগীদমক্তা করম্বা ফিভমদা উবগে।
হৌখিবা চহি তরুক অসিদা ঐখোয়গী থবকশিং অদুদা কমপিতিতিব অমসুং কোওপরেতিব ফেদরেলিজমগী ৱাখল্লোন অদু উবা ফংখ্রে। ঐখোয়গী অসিগুম্না চাউবা লৈবাক অসিদা সেন্তর খক্তনা য়ুম্বি ওইরগা চাউখৎপা য়াবা নত্তে, মসিদা রাজ্যগী ওইবা অনিশুবা য়ুম্বি অমা মথৌ তারি। কোবিদ-১৯গী মায়োক্তা লান্থেংনবা অসিসু মসিগী খোংথাং অসিনা হেন্না হেন্না খনখৎ হনখ্রিবনি। ৱারেপশিং অদু অপুনবা ওইনা লৌখিবনি। ঐহাক্না সি.এম.শিংগা মখোয়গী সজেশনশিং অমসুং ইনপুতশিং অদু তাননবগীদমক্তা ভীদিও কনফরেন্স কয়ারক তৌখি, হায়রিববা অসি পুৱারীদা অসিগা মান্নবা লৈখিদ্রি।
জি.এস.তি.গী মতাংদা, হায়রিবা অসি মাইকৈ খুদিংদা য়েংলুরগা হন্দক্কী চহিশিমদি তোপ-তোপ্পা ওই। অনম্বা এজমশনশিং অমসুং কালকুলেশনশিং অদু চহি চা অমদা অমুরক থোকপা লাইচৎ অসিদদি করিমত্তা ওইথোকপা লৈখিদে। অদুবু ঐখোয়না খুমাং চাউখৎনবা ওপ্সনশিং প্রোপোস তৌখি অমসুং রাজ্যশিংনা মসিদা য়ানিংবা ফোংদোকখি। ঐখোয়গী মরক্তা ভাব তানবগী ৱাখল্লোন অমা অসুম ওল্লকপা উরি।
১২। অওম্না মুখ্য মন্ত্রী ওইনা চহি কয়া অমা লৈরকখি। হৌজিক্কী ওইরিবা ফিভম অসিদা ইকোনোমিক্কী ওইবা হিরমগী মতাংদা অদোম্না রাজ্যশিংগা করম্বা মখলগী কোলাবোরেশন প্রোপোস তৌনিংবগে?
ঐখোয়না নিংশিংগদবা য়াম্না মরু ওইবা অমনা কেন্দ্র অমসুং রাজ্যগী মরক্তা লৈরিবা মরি অসি জি.এস.তি খক্তদা লোইবা নত্তে। লাইচৎ অমসুং গ্রোস তেক্স রেভেন্যুদা হন্থবা লৈরবসু, ঐখোয়না রাজ্যশিংদা হেন্না ফরবা রিসোর্স কয়া অমা পীরি। এপ্রিল অমসুং জুলাইগী মতরক্তা কেন্দ্রনা থাধবা স্কীমশিং য়াওনা রাজ্যশিংদা গ্রান্তস-ইন-এদকা লোইননা তেক্সশিং কোমথোকপাগী অপুনা মশিং অদু মামাংগী চহিগী চপ মান্নবা মতমদা পীখিবা লুপা করোর ৩.৪২দগী লুপা করোর ৪.০৬তা হেনগত্তুনা ১৯%গী চাংদা হেনগৎখি। শম্না হায়রবদা ঐখোয়গী রেভেন্যুশিং তারক্লবসু, রাজ্যশিংদা ঐখোয়গী ফন্দশিংদুদি লেপ্তনা অদুমক ফংহল্লি।
কোবিদ-১৯গী লাইচৎ অসি য়েংলগা, কেন্দ্র সরকারনা চহি ২০২০-২১গীদমক্তা রাজ্যশিংদা গ্রোস স্তেত দোমেস্তিক প্রোদক্ত (জি.এস.দি.পি.)গী ২% ফাওবা পুবগী অহেনবা অকক্নবগী অয়াবা পীখ্রে। হায়রিবা অসিদা রাজ্য শিংদা শেনফম লুপা করোর লাখ ৪.২৭ ফাওবা ফংহনখিবা। কেন্দ্রনা হান্নদগী ২০২০গী জুনদা অহানবা ০.৫% অদু হেনগৎনবা রাজ্যশিংদা অয়াবা পীখ্রে। মসিনা রাজ্যশিংদা লুপা করোর ১,০৬,৮৩০গী অহেনবা শেনফম অমা ফংহল্লি। রাজ্যশিংনা হায়জরকপগী মতুং ইন্না স্তেত দিজাস্তর রেসপোন্স ফন্দ (এস.দি.আর.এফ.) শিজিন্নবগী অকক্নবা মশিং অদু ৩৫%দগী ৫০%দা হেনগৎখ্রে। হায়রিবা অসি কোরোনাগা লান্থেংননবা রাজ্যশিংদা অহেনবা শেল লৈননবা তৌখিবনি।
১৩. মীয়াম অমনা কেন্দ্র সরকারনা মসিগী খুদোংচাদবশিংবু রাজ্যদা ইনথৈ হায়না হায়নরি। মসিদা অদোম্না করি খনবীবগে?
মমাংদা তৌরম্বা খরগী খুদম ঐহাক পীগে। য়ু.পি.এ. সরকারগী মখাদা ভি.এ.তি.না সি.এস.তি.গী মহুৎ শিনখিবা মতমদা রেভেন্যুদা হন্থবশিংগী শেনফমশিং রাজ্যদা কেন্দ্র সরকারনা পীগনি হায়না ৱাশকখিবনি। য়ু.পি.এ.না করি তৌই খঙবরা? মখোয়না হায়খিবা ৱা নাথৈদুনা মখোয়না রাজ্যশিংদা খেতি-পুরোন পীয়ু য়াখিদে। মসি চহি অমখক্তগীদা নত্তনা, পুন্না চহি ৫গীনি। মরম অসিননি রাজ্যশিংনা য়ু.পি.এ.গী মখাদা জি.এস.তি.বু য়ানিংদে হায়খ্রিবা। রাজ্যশিংদা তোঙানবা সরকারনা থাজবা পীরম্লবসু ঐখোয়না ইং ২০১৪দা শক্তি পায়রবা তুংদা রাজ্যশিংদা পীথোক্কদবা শেনফমশিং পীথোক্নবা ঐখোয়না ৱারেপ লৌখ্রিবনি। থৌওং অসিনা ঐখোয়না ফেদেরেলিজমগী মাইকৈদা করম্না চৎপগে হায়বদু তাক্লিবনি।
১৪. সরকারবু য়েংশিনবা মীওইশিংনা হায়বদা ভারতনা অৱাংবা থাক অনিদি য়ৌবা ঙম্লে- লাইনা নাবা মীওই মশিং অমসুং শেন্মিৎলোন পীকশিল্লকপা। মসিদা অদোম্না করি খুম্বীনিংই?
ঐখোয়গী রাজ্যশিংগী মীশিংগা মান্নবা অতোপ্পা লৈবাকশিংগা ঐখোয়গী লৈবাক্কা চাংদম্ননবা ঐখোয়গী লৈবাক্কী অপুনবা কেস মশিংদা য়ুম্ফম ওইদুনা খনবা অশিংবা মীওই কয়া অমা লৈ।
অদুবু, ঐহাক্না ইকোনোমিক তাইমসপু নীংথিনা থিজিন-হুমজিন্দুনা অসিগুম্বা ৱারোলশিং অসিগী মতাংদা অশেংবা হায়হন্নিঙই। ঐখোয়না হৌজিক্কী মশিং অসি য়েংবা মতমদা কাওরোইদবদি অখঙ-অহৈশিংনা মশিং অসি কয়া ওইগনি হায়না মার্চতা হায়খিবা অদুনি।
১৫. হান্নগী ফিভমদা অমুক হল্লক্লে হায়না লৌবগী মরু ওইবা শেন্মিৎলোনগী পেরামীতর মঙা অদু করিনো? অদোম্না মথংগী চহিদা হান্নগী ফিভমদা হঞ্জিল্লকপগী করম্বা অকক্নবা মওং লাক্কনি হায়বা থাজবগে?
ঐখোয়না শেন্মিৎলোনগী ফিভম অসি হান্নগী মতৌগুম হঞ্জিল্লকপগী লম্বীদা লৈরে। ইন্দিকেতরশিংনসু অসুম্না তাক্লি। অহানবা ওইনা, লৌউ-শিংউবদা, ঐখোয়গী লৌমীশিংনা মমাংগী রেকোর্দ লোয়না থুগায়খ্রে অমসুং খ্বাইদগী থাক ৱাংবা ওইনা এম.এস.পি.দা পোত্থোক লৈবগী থবক পাঙথোকপা ঙমখ্রে হায়না ঐহাক্না মমাংদসু হায়খ্রবদুনি। মসিগী মরম অনি- পোত্থোক পুথোকপা অমসুং লৈবদা হান্নদগী হেনবা থৌওং পাঙথোকপা – অসিনা খুঙ্গংগী শেন্মিৎলোন্দা মশক থোকপা শেন্থোক লৈহন্দুনা অপাম্বশিংবু পীবা ঙম্বগী মশাগী ওইবা পথাপ অমা লৈহল্লগনি। অনিশুবদা, মমাংদগী হেনবা এফ.দি.আই. চঙলকপা অসিনা ভারতপু শেল থাদবদা নুংঙাইবা লৈবাক অমা ওইবগী মমি অসি কনশিলহল্লকই। হন্দক্কী চহিসিদা, লায়চৎ লৈজরবসু, ঐখোয়না এপ্রিল-ওগস্তকী ওইনা খ্বাইদগী য়াম্বা বিলিয়ন দোল্লর ৩৫.৭৩গী এফ.দি.আই. ফংখি। মসিগী শেনফম অসিনা হান্নদগী খ্বাইদগী হেনবা ওইখিবা মমাংগী চহিগী মান্নবা মতমদগী ১৩% অমুক হেনবনি। অহুমশুবদা, ত্রেক্তরগা লোয়ননা ওতোমোবিল য়োনবগী চাং অসি মমাংগী চহিগী চাং য়ৌশিল্লকপা নত্ত্রগা হেনগদৌবগী মওংদা লৈরি। মসিনা অপাম্বা য়াম্না হেনগৎলে হায়বা তাক্লি। মরিশুবদা, পোত্থোক পুথোকপগী সেক্তরশিংদা লেপ্পা লৈতনা ফগৎলক্লিবা অসিনা সেপ্তেম্বরগী মনুংদা মরু ওইবা কৈথেল ওইরক্লিবশিংগী মনুংদা চন্দুনা চাইনা অমসুং ব্রাজিলগী মথংদা অহুমশুবদা লৈবা ঙমহল্লে। মীরমদা পোত্থোক য়োনবগী চাংনা চহি খুদিংগী হেনগৎলকপগী ফিভম অসি থা তরেৎকী মনুংদা উবা ঙম্বা অসিদা পোত্থোক পুথোকপগী শাহৌ লৌবগী ফিভমসু উবা ফঙই। ই.- ৱে বিল অমসুং জি.এস.তি. খোমজিনবদা শাহৌ লৌবসু য়াম্না ফজরি।
অরোইবা ওইনা, ই.পি.এফ.ও.গী অপুনবা অনৌবা সবসক্রাইবরশিংগী ওইনদি ২০২০গী জুলাই থাগা চাংদম্নবদা ওগস্ত থাদা ৩৪%গী চাং হেনগৎলে অমসুং অনৌবা সবসক্রাইবর মিলিয়ন অমা হেন্না হাপচিনখ্রে। মসিনা থবক্কী কৈথেল অসি চাউখৎলক্লি হায়বা তাক্লি।
মসিদা নত্তনা, ফোরেন এক্সচেঞ্জ রিজর্ব অসিসু হান্নদগী খ্বাইদগী হেন্না ৱাংলে। রেলৱে ফ্রৈৎ ত্রাফিক্কুম্বা শেন্মিৎলোন ফগৎলকপগী মরু-ওইবা ইন্দিকেতরশিংসু মমাং চহিগী চপ মান্নবা মতমগা য়েংনবদা সেপ্তেম্বরদা ১৫%দগী হেন্না হেনগৎলে অমসুং মৈগী অপাম্বা অসিনা ৪%গী চাংদা হেনগৎলে। মসিনা ফগৎলকপগী থৌওং অসি য়াম্না পাক-চাউরে হায়বা তাক্লি। মসিগী মথক্তা আত্মানির্ভর ভারত লাউথোকখিবা অসিসু শেন্মিৎলোন্দা, মরু-ওইনা অপীকপা কারবার অমসুং ইনফোর্মেল সেক্তরগী ওইনা চাউখৎপগী শাফু পীবা ওইখি।
১৬. মখা তাবা শাফু পীবগী করি থৌরাং লৈবগে?
মেক্রো-ইকোনোমিক স্তেবিলিতী অপুনবা অমা লৈহন্নবা হোৎনবগা লোয়ননা শেন্মিৎলোনবু মতম চানা লেপ্তনা শাফু পীবদা তঙাই ফদবা খোঙথাংশিং ঐখোয়না পায়খৎকনি। ঐখোয়না লায়চৎ অসি থেংনবা লোইদ্রি হায়বসি কাওগনু। মসি ওইরবসু, ঐখোয়গী শেন্মিৎলোন্না হান্নগুম লৈরকপা ঙম্বগী তৌবা ঙম্বগী মতিক নীংথিনা উৎলি অমসুং মসিগী মপুং ওইবা মরমদি মীয়াম্না নীংহন্নবা লৈতবা অসিননি। মসিগী মরমশিং অসি মশিংশিং অসিদদি উবা ফংদে অদুবু মশিংগী মরুমদা লৈবা অচৌবা মরম অমনি। দুকান ফম্বশিং, লল্লোন-ইতিক তৌবশিং, এম.এস.এম.ই. চলায়বশিং, ফেক্তরীদা থবক তৌবা থৌমী, ওন্তোপ্রিনরশিং অসিনা মার্কেৎ সেন্তিমেন্ত অচৌবা অমা লৈহনবদা অমসুং শেন্মিৎলোনবু নৌনা হিংগৎহনবদা অচৌবা থৌদাং য়ারিবা মীওইশিংনি।
১৭. কম্পেনী কয়া অমনা চাইনাদা থবক পাম্নরক্তবা মতম অসিদা মরু ওইনা মালেমগী সপ্লাই চেন অসিগী শরুক অমা ওইদুনা ভারতনা মালেমগী অচৌবা পোত্থোক পুথোকফম অমা ওইবা ঙমগনি হায়বগী অদোমদা থাজবা লৈবা মাল্লি। হীরম অসিগী মতাংদা কয়া য়াম্না খুমাং চাউশিল্লগে? ভারতনা মালেমগী সপ্লাই চেন্দা চাইনাগী চাইনাগী মহুৎ শিনবা থাজবা য়াবা লৈবাক অমা ওইরকপা ঙমগদরা?
ভারতনা লায়চৎ অসিগী মতুং খক্তদগী পোত্থোক পুথোকপগী মতাংদা ৱাফম থম্বা হৌরকখিবা নত্তে। ঐখোয়না পোত্থোক পুথোকপা হেনগৎনবা মতম খরদগী থবক তৌদুনা লাক্লে। ভারত অসি খুৎ-শা হৈবা থৌমী য়াম্না লৈবা নহা ওইরিবা লৈবাক অমনি। অদুবু অতোপ্পগী মাংজবদগী ওইজবা তানবগী ৱাখল্লোন্দা ভারতনা থাজবা থমদে। ভারতনা মশাগী মপাঙ্গল শিজিন্নদুনা মালেমগী অচৌবা পোত্থোক পুথোকফম অমা ওইগনি। ঐখোয়গী হোৎনরিবা অসি অতোপ্পা লৈবাক অমগী মহুৎ ওইবা নত্তে, অদুবু তোপ-তোপ্পা খুদোংচাবশিং পীবা ঙম্বা লৈবাক অমা ওইবনি। ঐখোয়না মীয়াম খুদিংমক চাউখৎপা পাম্মি। করিগুম্বা ভারতনা চাউখৎলবদি, মীওইবা খুন্নাইগী শরুক ১/৬না চাউখৎকদৌরিবনি।
মালেমগী অনিশুবা লাঞ্জাও লোইখিবা মতমদা মালেমগী অনৌবা চৎনবী অমা মতৌ করম্না শেমখিবগে হায়বসি ঐখোয়না উখ্রে। কোবিদকী মতুংদসু মসিগা মান্নবা করদি থোক্লগনি। হন্দক্কী মতাং অসিদদি ভারতনা পোত্থোক পুথোকপা অমসুং অমসুং মালেমগী সপ্লাই চেনবু পুনশিনবগী গারি থৌগনি। ঐখোয়গী ওইনদি গনতন্ত্রা, দেমোগ্রাফী অমসুং দীমান্দগী মওংদা অকক্নবা খুদোংচাবা খরা লৈ।
১৮. অদু ওইরবদি, ভারতপু হায়রিবা অচৌবা খোঙথাং অসি থাংবা ঙম্নবা করি-করম্বা পোলিসী পাঙথোক্কে হায়না খনবীরিবগে?
ভারতকী ফার্মা সেক্তরনা হৌখিবা থা খরা অসিদা তুংলমচৎকী হীরমদা থবক ওইনা উৎখ্রে। ভারতনা মালেমগী ফার্মা সপ্লাই চেন্দা মরু ওইবা থবক পাঙথোকপা অমা ওইনা থোক্লকখ্রে। ঐখোয়না অতেনবা মতমগী মনুংদা মালেমগী খ্বাইদগী অনিশুবা পি.পি.ই. কিৎ পুথোকপা লৈবাক ওইবা ঙমখ্রে। ভেন্তিলেতরগুম্বা তেক্নোলোজী ৱাংবা পোত্থোকশিং পুথোকপদা ভারতনা মফম কনবা ঙম্লি অমসুং মসিবু পুথোকপগী মতিক শুক্লৈ লৈরমদবগা চপ মান্নরম্বা অদুদগী হৌজিক্তি অথুবা মতমদা ভেন্তিলেতর লিশিং কয়া পুথোকপা ঙম্লে।
নিং-খা তম্বা ফংখিবদগীনা লায়চৎ হৌবা ফাওবদা ভারত শিনবা থুংবগী সরকারগী হোস্পিতালশিংদা শিজিন্নবা য়াবা ভেন্তিলেতর চাউরাক্না লিশিং ১৫-১৬ খক্তা লৈরম্মি। হৌজিক্তি হায়রিবা হোস্পিতালশিং অসিদা অহেনবা ভেন্তিলেতর ৫০০০০ হাপচিনবগী থৌওং পাঙথোক্নবা কন্না হোৎনরি।
হৌজিক্তি ঐখোয়না হায়রিবা মওংশিং অসি নীংথিনা শেম্বা ঙম্লবনিনা ঐখোয়না মসিবু অতোপ্পা হীরমশিংদসু শিজিন্নবা য়ারগনি। ঐখোয়না মোবাইল, ফার্মাস্যুতিকেল অমসুং মেদিকেলগী খুৎলায়শিং শানবগীদমক্তা হন্দক্তা হৌদোকখিবা প্রদক্সন-লিঙ্কদ ইন্সেন্তিব (পি.এল.আই.) স্কিম অসি মালেমগী মমিং লৈরবা শেল থাদবশিংগী পুক্নিং চীংশিন্দুনা মালেমগী থাক্তা পাক-চাউবা অমসুং চাংয়েংনবা ঙম্বগী মতিক লৈহন্নবা অমসুং ভারতপু এক্সপোর্ত হব অমা ওইহন্নবা মিৎয়েং চঙবা অমসুং পান্দম লৈবা থবক পাঙথোকপগী খুদম অমনি। মথংগী চহি ৫দা মোবাইল ফোনগী শরুক খক্তদা পোত্থোক পুথোকপা অসি লুপা করোর লাখ ১০ হেনগনি অমসুং মসিগী মনুংদগী ৬০%দি মীরমদা পোত্থোক থাদোকপনা ওইগনি হায়না পানরি।
মুদী’সকী মতুং ইন্না ইং ২০২০দা য়ূ.এস.কী গ্রীনফিল্দ প্রোজেক্তশিং চাইনাদা ৮৬, ভিএৎনামদা ১২ অমসুং মলেসিয়াদা ১৫ লাকপগা চাংদম্নবদা ভারত্তা ১৫৪ লাকখি। মসিনা ভারতকী শাহৌ লৈবগী থৌওংদা মাই-পাকপা অসিদা মালেম্না থাজবা থম্লি হায়বা নীংথিনা তাক্লি। ঐখোয়না ভারতপু পোত্থোক পুথোকপগী খ্বাইদগী মমাং থাবা মফম অমা ওইহন্নবগীদমক্তা অচেৎপা য়ুমফম থোল্লবনি।
কোর্পোরেৎকী তেক্সতা হন্থহনবা, কোয়লাগী সেক্তরদা কম্মর্সিএল মাইনিং তৌবা হৌহনবা, লন্নাইগী শেল থাদবশিংনা স্পেস সেক্তরদা চঙবা য়াহনবা, নোঙথক্কী লম্বীদা ঙাক-শেলগী ওইবা অথিংবা থম্লিবা অসিবু মীয়ামগী এবিএসসনগী হীরমদা শিজিন্নবা য়াহন্নবা কোম্থোকপগী থৌওংশিং অসি তুং কোইনা শাহৌ লৌবা ঙমহনবদা তেংবাংগদবা খোঙথাং খরনি।
অদুবু ঐখোয়না খঙগদবা অমদি ঐখোয়গী রাজ্যশিংনা চাউখৎলকপা মতমদতা ভারতনা থুনা চাউখৎপা ঙমগনি হায়বা অসিনি। শেল থাদবশিংগী পুক্নিং চীংশিন্ননবা রাজ্যশিংগী মরক্তা অফবা মওংদা চাংয়েংনবগী থৌওং লৈগদবনি। রাজ্যশিংনা কারবার তৌবদা নুংঙাইবগী থাক্কী মতাংদসু চাংয়েংনরি। ইন্সেন্তিবখক্তনা শেল থাদবগী খুদোংচাবা ফংগদবা নত্তে, রাজ্য খুদিংনা ইনফ্রাস্ত্রকচর শেমগত্তুনা চাউখৎপগা মরী লৈনবা অফবা পোলিসীশিংগী তুং ইনগদবনি।
১৯. আত্মানির্ভরগী খোঙথাং অসিনা মপুং ওইনা মরোমদোম লেপচবা ঙম্বগী মতম পুরক্কনি হায়বগী মতাংদা পাখৎপা মীওই কাঙলুপ খরসু লৈ। মীরমদগী পোত্থোকশিং পুশিল্লকপা থিংদুনা ভারতনা মালেমগী সপ্লাই চেনগী শরুক অমা ওইনবা হোৎনরিবা অসিদা চান্নদবা খরা লৈরে হায়না মীওই খরনসু হায়নরি। মসিদা অদোম্না করি খনবীবগে?
ইশাগী ওইজবতা খনবগী মওং অসি ভারত মচা অমত্তদা চেন্দে। অফবা মালেম অমা শেমিন্নবা ঙম্নবা অতোপ্পা লৈবাকশিংগা খুৎশম্নরগা চৎমিন্নবা চাউখৎপা অমসুং ভাইব্রেন্ত ওইবা গনতন্ত্রগী লৈবাক অমা ওইহন্নবা ঐখোয়না পাম্লি। আত্মানির্ভর ভারত অসি চাংয়েংনবা খক্তগী নত্তে, মসিদি ঐখোয়সু চাংয়েংনবা য়াওবা ঙম্নবা হোৎনবনি। মসিদি অতৈবু খুদুম চনগে হায়বা নত্তে, মসিদি থাজবা য়াবা ওইহনবনি, মসিদি ইশাগীতা য়েংবা নত্তে, মালেমগী ওইনা চাউনা য়েংবনি।
মরম অদুনা ঐখোয়না আত্মানির্ভর হায়বা মতমদা ঐখোয়না অহানবা ওইনা ভারতপু মরোমদোম লেপচবা ঙম্বা হায়বনি। মরোমদোম লেপচবা ঙম্বা ভারত অসি মালেমগী থাজনিংঙাই ওইবা মরু অমসুনি। মরোমদোম লেপচবা ঙম্বা হায়রগা মশাগীতা খনবা হায়বা নত্তে। অঙাং অমনা চহি ১৮ শুবা মতমদা মহাক্কী মমা-মপানা ফাওবা মরোমদোম লেপচবা ঙম্নবা হোৎনৌ হায়রিবনি। মসিদি মহৌশাগী ওইবা থৌওংনি।
ঙসিদি ঐখোয়না মরোমদোম লেপচবা ঙম্বগী মতিক অসিনা মেদিকেলগী হীরমদা মালেমগী তেংবাংলি। খুদম ওইনা হায়রবদা, ঐখোয়না অচঙবা শেনফম হেনগৎপা অমসুং অথিংবা থম্বা লৈতনা ভেক্সিন অমসুং হিদাকশিং পুথোক্লি। ঐখোয়গী লৈবাক্কুম্বা লায়রবা লৈবাক্তি মালেম শিনবা থুংনা লৈরিবা অমসুং মীওইবা খুন্নাইবু তেংবাংলিবা দাক্তরশিংবু তাকপী তম্বীবদা শেল য়াম্না তিংই। মখোয়না মপান্দা চৎখিবদা ঐখোয়না কৈদৌনুংদা থিংদে।
ভারতনা করিগুম্বা হীরম খরদা মরোমদোম লেপ্পা ঙম্বদা, মসিনা মালেমদা মতম পুম্বদা তেংবাংই। করিগুম্বা মীওই অমনা ভারতকী চৎনবী অমসুং ইথিলবু খঙবা ঙমদ্রবদি, মখোয়না মসিগী ৱাফম অসি খঙবা ঙম্লোই।
২০. মসিদা চমম্নরিবা অসি করিনো?
অখঙ-অহৈশিংগী মরক্তা চমম্নবা অসিনা ঐখোয়গী থৌওং অসিদা চমম্নবা নত্তে। লৌউ-শিংউবা, লেবর অমসুং কোয়লাদা শেমদোকপা পুরকপগী খুত্থাংদা ঐখোয়না এফ.দি.আই.দা থম্লম্বা অথিংবা খরা কোন্থোকপা নহাক্না উরে। মালেমগী ওইবা ত্রেদ অমসুং কম্মর্সকী শক্তিদা থাজবা থম্বা লৈবাক অমনা মালেমগা থবক শুমিন্ননবা থোঙ কয়া অমা হেন্না হেন্না হাংলক্কনি। অমসুং তাঞ্জা অসিদসু ভারতনা মহাক্না খুদোংচাবা কয়া লৌবা য়াবা সেক্তরশিংদা পাঙথোকফম থোকপা থবক পাঙথোকপা ঙমদবগী মওংসু লৈরি। খুদম ওইনা কোয়লাবু লৌসি। ভারতনা মালেমগী ওইনা কোয়লা য়াম্না থোকপা লৈবাক অমা ওইজরবসু ইং ২০১৯-২০দা য়ামদ্রবদা লুপা করোর লাখ ১.৫গী কোয়লা মীরমদগী লৈখি। ঐখোয়না মীপাল-তাংবা অসি ঙাক-শেলগী সেক্তরদসুনি। ঐখোয়না এফ.দি.আই.গী অকক্নবা অসি ৪৯দগী ৭৪%দা হেনগৎলবসু মথংগী চহি ৫দা লুপা করোর লাখ ৩.৫গী পোত্থোক ১০১ অসি লৈবাক অসিদা পুথোকচগনি হায়না লাঊথোকখি।
ভারত্তা শেল থাদরকপশিং, মালেমগী থাক্তা চাংয়েংনবা ঙমহন্নবা মখোয়গী তৌবা ঙম্বশিং হেনগৎকনি হায়না থাজবা পীরকপশিংদা ঐখোয়না ফংফম থোকপা লোইনা পীরি। আত্মানির্ভর ভারতকী খোঙথাং অসিদি ভারতকী তৌবা ঙম্বা মতিকপু থাদোকপনি অমসুং মসিগী মতেংনা লৈবাক্কী মার্কেৎ খক্তা নত্তনা মালেমগী মার্কেত্তসু শরুক য়াবা ঙমহনবনি।
মমাংদা, ঐখোয়গী মার্কেৎশিং অসি হাংদোকপদা, ঐখোয়শু ফ্রী ত্রেদ এগ্রীমেন্তশিং (এফ.তি.এ.শিং) ১০ অমসুং প্রিফেরেন্সিএল ত্রেদ এগ্রীমেন্তশিং (পি.তি.এ.শিং) ৬ সহী তৌনখি। হান্নন লৈরবা এফ.তি.এ.শিংগী এসেসমেন্ত অসি মখোয়না ইন্দিয়াদা কয়া য়াম্না কান্নবা পীরে হায়বা অসিদা ওনগনি অমসুং মখোয়গী আইদোলোজিকেল ওইবা মওংদা ওইরোই।
ইন্দিয়া অসি গ্লোবেল ভেল্যু চেনগী শরুক অমা ওইনিংবগী অপাম্বা লৈ অমসুং ললোনবগী য়ান্নবা অমা অপাম্বা লৈ অদুবু মখোয়না শেংনা তৌবা অমসুং পুকচেল শেংদবা তৌরোইদবনি। মখা তানা ইন্দিয়ানা অচৌবা মার্কেত অমা থম্নবা লৈরিবনিনা য়ান্নবা অসিদা অয়াবা অমা পীরক্কদবনি।
ঐখোয়না এফ.তি.এ.শিংগী মখাদা ঐখোয়গী চাওরবা মার্কেত অসিদা প্রিফেরেন্সিএল এসেস পীরি। অদুম ওইনমক ঐখোয়গী ত্রেদিং পার্তনরশিংনা চপ মান্ননা মওং তৌরক্তে। ঐখোয়গী এক্সপোর্তরশিংনা নুঙাইতবা খোঙয়েৎ কয়া মায়োক্নৈ। খুদম ওইনা হায়রবদা ঐখোয়গী ত্রেদিং পার্তনরশিংনা ইন্দিয়াদা স্তীল পুশিল্লকপা ঙমবদা ত্রেদিং পার্তনরশিংনা খরদি ইন্দিয়াগী স্তীলশিং পুশিনবা পামদে। মসিগা মান্ননা, ইন্দিগী তায়র শুংবশিংনা তেক্নিকেলগী অশোইবা খর লৈবদগী মপালদা পুথোকপা ঙমদে। ইন্দিয়ানা ত্রেদ অসিদা য়াবা অমসুং অশেংবা লৈ, অসিনা এক্সপোর্তর অসিদা লায়থোক্না তৌগনি।
আর.সি.ই.পি.গী মতাংদদি, ইন্দিয়ানা লোয়শিল্লকপা অসিদা খ্বাইদগী অঙম্বা হোৎনখি। ঐখোয়না নিয়ম চুম্না অমসুং শেংনা তৌবা অসি পাম্লিবা। ঐখোয়না নন-তারিফকী খোঙয়েৎ অসিদা য়াম্না লুম্না লৌই অমসুং লৈবাক খরগী আর.সি.ই.পি.গী শেংদবা লৈবা অসিদা। ইন্দিয়ানা আর.সি.ই.পি. অসিদা য়াওদনবা ফিরেপ লৈ অমসুং হৌজিক ওইরিবা অশেংবা মওং অসিনা আর.সি.ই.পি.গী চৎন-পথাপ্তা মমি তাদে।
২১. সরকারগী এসেসমেন্দদগী উবা ফংলে মদুদি এফ.তি.এ.শিং অসি ইন্দিয়াগী মায়কৈদা থবক তৌদে। ঐখোয়সু আর.সি.ই.পি. অসিদগী থোরক্লে। মসিগী মরমদা অদোম্না করি খনবিবগে? ঐখোয়না এফ.তি.এ.শিং অসি হেক্তা লৌগদবনি হায়না অদোম্না খনবিবরা?
ইন্তরনেস্নেস ত্রেদ অসিগী চৎন কাংলোনগী মখাদা লৈরিবা অসি মসিদা য়াওরিবা লৈবাক খুদিংমক অমগা-অমগা পুন্না মায় পাকমিন্নবা অসিনি। অমসুং ঐঙোন্দা এক্সপার্তশিংনা হায়, মদুদি মরুওইনা ত্রেদ অসি মালেমগী ওইগদবনি অমসুং দবল্যু.তি.ও. অসিদা কাংলুপ মখল কয়া য়াওরি। ইন্দিয়ানা মতম লৈবা খিবিক্তা গ্লোবেল ত্রেদকী চৎন-কাংলোন অসিদা ঙাক্তুনা লাক্লি অমসুং লুনা লৌশিন্দবা, অচুম্বা, শেংনা তৌবা, ময়েক শেংবা অমসুং ইন্তরনেস্নেল ত্রেদিং সিস্তেম অসিদা লেপতুনা লৈরি, মসিনা দবল্যু.তি.ও. মিয়েং মখাদা লৈরিবা চাওখৎলক্লিবা লৈবাকশিংগী চাওখৎননবা থম্লিবা পোৎশকশিং অসি থুংহনবনি।
২২. ইন্দিয়ানা পি.পি.ই. অমসুং মাস্ক পুথোকপদা ফাওগৎলক্লি। ফার্মা অসিসু স্ত্রাতেজিক সেক্তরদা ফাওগৎলক্লি। হেন্না মাংদা চৎনবা মতৌ করম্না অদোম্না মফম অসিগী মপাঙ্গল কলহনখি?
ঐখোয়না খংই মদুদি লায়চৎ অসি হৌরকপদা ঐখোয়না পি.পি.ই. অসি মপাল লমদা তাংলম্মী। লৈবাক অসি লোকদাউন থমখিবদগী হেন্না অৱাবা মায়োক্নখি মসিনা পোৎ-চৈ শাবদা চৈথেং পীখি মরম অসিদগী গ্লোবেল সপ্লাই চেন অসিদা অকাইবা ওইখি। মসিনা মরম ওইদুনা লৈবাক অসিনা ইশা ইরোমদোম লেপচনবা য়াম্না থুনা খনবা হৌখি।
ঐখোয়না পান্দম অমগী মখাদা চংশিন্দুনা – চিংশিনবা, খংদোকপা অমসুং থিদোকপা অমসুং হীরম অসিগী রো মেতরিএল পুম্বা। ঐখোয়না ইন্দস্ত্রীগা অমসুং স্তেত সরকারগা ২৪X৭ থবক তৌদুনা হায়রিবা পি.পি.ই কিতস, এন-৯৫ মাস্ক, ভেন্তিলেতরস, দাইগ্নোস্তিক কিত অসিনচিংবা অসিগী পান্দম ফংনবা হোৎনৈ। মসিগী অৱাবা অসি হেক কোকখিবগা য়েলহৌগী ওইবা পোত্থোক হৌই অমসুং অপাম্বশিং অসি ফংনবা দোমেস্তিক মেনেফেকচরশিংদা থম্মী। ইন্দিয়া অসি ঐখোয়গী ইরমদম খক্কী দিমান্দ পীবা ঙম্বা খক্তা নত্তনা অতোপ্পা লৈবাকশিং অসিগী দিমান্দশিং পীবা ঙম্লে।
ইন্দিয়া অসি লৈবাক ১৫০দা হিদাক অমসুং হিদাক্কী মপোৎ মচৈ সপ্লাই পীবদা থা খর অসিদা মালেমদা মমিং লৈরক্লি। ইন্দিয়া ফার্মা সেক্তর অসি দোল্লার বিল্লিন ৩৮গী ওইনা চাওনা লৈরি। মসিগী খুদোংচাবা অসি কনখৎনবা সরকারনা লুপা করোর ১,৪০,০০গী ওইবা মেদিকেল দিভাইস অমসুং ফার্মাস্যুতিকেল মচাক থম্নবগী অয়াবা পীখ্রে। অচৌবা দ্রগ পার্ক অমসুং মেদিকেল দিভাইস পার্ক অসি মালেমগী ওইবা লিদরশিপকী ফিবমদা থম্বা ঙম্নবা হোৎনরি।
২৩. ভেক্সিন অমা মথং চহীদা ফংলরবা য়ারি। হায়রিবা অসি কনা কনাদা হান্না য়েন্থোকপা অমসুং কাপ্পা অসি খনবা লৈবিব্রা?
অহানবদা, ঐহাক্না লৈবাক অসিদা থাজবা পীরি মদুদি ভেক্সিন অসি হেক ফংবগা মীপুম খুদিংমক কাপখোক্কনি। কনাগুম্বা অমত্তা খাক্লোই। অদুবু অহানবদা খ্বাইদগী হেন্না শাথিবা মফমদা হান্না ঙাকথোক্কনি অমসুং ফ্রন্তলাইন কাংবুদা হান্ন পীগনি। এদমিনিস্ত্রেসন ফোর কোবিদ-১৯ ভেক্সিনগী নেস্নেল এক্সপার্ত গ্রুপ অমা শেমদুনা মখোয়গী চার্ত শেম্নবা লৈরে।
ঐখোয়না ভেক্সিন শেমগৎপগী থবক অসি হৌজিকশু য়াম্না কন্না চৎথরি হায়বা অসি খংগদবনি। ত্রাইয়েলশিং হৌখ্রে। এক্সপার্তশিংনা ভেক্সিন অসি করিনা ওইগনি, মীওই অমদা দোজ কয়া পীগনি, কয়ারক পীগনি অমসুং করম্না মসি শিজিন্নগনি হায়বা ঙমদ্রি। পুম্নমক অসি এক্সপার্তশিংনা লেপ্লবা মতুংদা প্রজাশিংদা করম্না শিজিন্নগনি হায়বা অদু পীগনি।
থৌরাং অমদা, কোল্দ চেন পোইন্ত ২৮,০০০ হেন্না থমগনি অমসুং কোবিদ-১৯ ভেক্সিন অসি মফম খুদিং য়ৌনবা য়েনগনি। স্তেত, দিস্ত্রিক্ত অমসুং লৈকাইদা কৎথোক্লবা তীমশিংনা ভেক্সিন য়েনবা অমসুং শিন-লাংবা অসি নিয়ম-নিতি ঙাক্না চৎলিবরা হায়বা অসি য়েংশিনগনি।
২৪. কোবিদ-১৯ অসিদা শোথখিবা অসি য়েংলগা ঐখোয়না করিদা পান্দম থমদুনা ২০২৪দা ইকোনোমি অসি দোল্লার ত্রীলিয়ন ৫ ওইবা ঙমগদগে?
পেসিমিক ওইবা মী অয়াম্বা চিংনদুনা লৈ। অদোম্না মখোয়গী মরক্তা লৈরবা, অদোম্না তাগদবা অসি আশা কাইবা অমসুং পুক্নিং হন্থবা ঙাক্তা তাগনি।
অদুম ওইনমক, অদোম্না ওপ্তিমিস্তিক ওইবা মীওইগা ৱা খন্নরবা, অদোম্না অনৌবা ৱাখল্লোল অমসুং চাওখৎনবগী ৱাফম কয়া অমা পীরক্কনি। ঙসিদি ঐখোয়গী লৈবাক অসি তুংগীদমক ওপ্তিমিস্তিক ওইরে, মসি দোল্লার ত্রীলিয়ন ৫ পান্দমগী ওপ্তিমিস্তিক্কী থাক য়ৌরে। অমসুং মসিগী ওপ্তিমিস্তিক অসিনা ঐখোয়দা থাজবা পীরি। ঙসিদি কোরোনাগী লান্মীশিংনা পুং ১৮-২০ অনাবা য়েংবদা থবকশুবা অসি য়েংলগা, মসিনা ঐখোয়দা থবক হেন্না কন্না শুনবগী থৌনা হাপ্লি।
লায়চৎ অসিনা মরম ওইদুনা ঐখোয়না থম্লিবা পান্দম অদু হন্দক্কী চহী অসিদা য়ৌবা ঙমদ্রবা! ঐখোয়না মথং চহীদা য়াম্না কন্না হোৎনদুনা অমসুং য়াংনা চংশিন্দুনা মাংখিবা কয়া ফুকৎনবা হোৎনগনি। করিগুম্বা ঐখোয়গী মফমদা পুক্নিং হন্থরবা তারবদি অচৌবা থবক অমত্তা তৌবা ঙম্লোই। পুক্নিং থৌগৎত্রবদি ঐখোয় মায়থিরে হায়না লৌবা য়ারে। ইন্দিয়া অসি পাৱর মান্ননা লৈবগী লমদা ইকোনোমীদা অহুমশুবা খ্বাইদগী চাওবনি। ঐখোয়না পাম্মী মদুদি ইন্দিয়ানা য়ু.এস. দোল্লার প্রাইজদসু খ্বাইদগী চাওবা অহুমশুবা লৈবা পাম্লি। ত্রীলিয়ন দোল্লার ৫গী পান্দম অসিনা মসি ফংবদা মতেং ওইগনি।
ঐখোয়গী সরকারসু ঐখোয়গী পান্দম অসি ফংনবা ত্রেক রেকোর্দ তৌরি। ঐখোয়না খুঙ্গংগী সেনিতেসন অসি থারিবা মতম অদুগী মমাংদা লোইশিনবা ঙমখ্রে, ইলেক্ত্রিফিকেসন অসিগী পান্দম অসিশু থাখিবা মতম অদুগী মমাংদা লোইখি ঐখোয়না করোর ৮ উজালা কনেকসন পীখি। হায়রিবা ত্রেক রেকোর্দ অসি য়েংলগা মীয়াম্না ঐখোয়গী পান্দম অসি য়ৌবদা থাজবা থম্লি।
ঐখোয়না ভারত্তা ইনভেস্ত তৌরবশিংদা খুদোংচাবা পীরি, মখোয়গী থাজবশিং উত্তুনা শক্তি হেনগৎনবা অমসুং মালেমদা চাংদম্নবা য়াওনবা হোৎনরি। আত্মনির্ভর থৌরাং অসি ভারতকী শক্তিগী শো হাংদোক্তুনা দোমেস্তিক মার্কেৎ খক্তা নত্তনা মালেমগী কৈথেলদা পুথোকপা ঙমহনগনি।
