ভারতকী প্রধানমন্ত্রী

শ্রী মোরারজী দেসাই ১৮৯৬কী ফেব্রুৱারী ২৯দা হৌজিক্না গুজরাৎকী বুলসর জিলাদা লৈখ্রবা ভদেলী জিলাদা পোকখি। মহাক্কী মপা স্কুলগী ওজা ওইরম্মি অমসুং থক্সি-খাসি য়াম্না পাম্বা মীশক অমনি। অঙাং ওইরিঙৈদগী হৌনা নহা ওইরিবা মোরারজীনা মহাক্কী মপাদগী ফিভম পুম্নমক্তা কন্না হোৎনবা অমসুং অচুম্বগী লম্বীদা চৎপা তমখি। মহাক্না সেন্ত বুসর হাই স্কুলদগী মহৈ তমখি অমসুং মহাক্না মেত্রিক্কী পরিক্ষা মাই পাকখি। ১৯১৮দা বোম্বে প্রোবিন্সকী ৱিলসন সিবিল সরবিস্তগী গ্রেজুএসন লোইবগা মহাক্না চহি ১২ দিপুতি কলেক্তর ওইনা থবক তৌখি।

১৯৩০দা ভারত্তা মহাত্মা গান্ধীনা হৌদোকখিবা নীং খা তম্বগী ইহৌগী ময়াই চল্লকপা মতম অদুদা শ্রী দেসাইনা ব্রিতিশকী ৱায়েল থৌদা অদুদগী থাজবা মাংখি, মরম অসিনা মহাক্না সরকারগী থবক তোকথোক্তুনা নীং খা তম্বগী লালহৌদা শরুক য়ানবগী ৱারেপ লৌরখি। মদু য়াম্না লুবা ৱারেপ অমা ওইখি অদুবু শ্রী দেসাইদা ফাওরকখি মদুদি মসি লৈবাক্কী নীং খা তম্বগী ৱাফমনি, ইমুংগা মরি লৈনবা সমস্যশিংদি কোন্না খনগদবনি, লৈবাক্কীনা হানগদবনি।

শ্রী দেসাই নীং খা তম ইহৌগী মতমদা অহুমলক জেল চংখি। মহাক ১৯৩১ দা ওল ইন্দিয়া কোংগ্রেস পার্তীগী মেম্বর অমসুং ১৯৩৭ ফাওবা গুজরাৎ প্রদেশ কোংগ্রেস কমিতীগী সেক্রেতরী ওইখি।

অদুগী মতুং বোম্বে প্রোবিন্সতা বি জি খেরনা লুচীংবা অহানবা কোংগ্রেসকী সরকারনা ১৯৩৭তা থবক পাইরকপা মতমদুদা শ্রী দেসাই লৌউ-শিংউ, রেবিন্যু, ফোরেস্ত অমসুং কো-ওপরেতিবসকী মন্ত্রী ওইখি। মীয়ামদা খঙহল্লমদনা ভারতনা মালেমগী লাঞ্জাওদা য়াওশিনবগীদমক ১৯৩৯দা কোংগ্রেসকী মন্ত্রীশিংনা ওফিস্তগী মপান থোক্তুনা য়ানীংদবা উৎখি।

মহাত্মা গান্ধীনা হৌদোকখিবা মরোমদোমগী ওইবা সত্যগ্রহদা শ্রী দেসাই ফাজিনখি। ১৯৪১গী ওক্তোবরদা মহাক থাদোকখি অমসুং ১৯৪২গী ওগস্তা ভারত থাদোকউ হায়বা খোংজংগী মতমদা মহাকপু অমুক্কা হন্না ফাজিনখি। মহাক ১৯৪৫দা থাদোকখি। ১৯৪৬তা রাজ্য বিধান সভাগী মীখলগী মতুংদা মুম্বৈদা হোম অমসুং রেবিন্যু মন্ত্রী ওইখি। মহাক্না থবক পাইরিঙৈগী মতমদা শ্রী দেসাইনা ‘লেন্দ ওফ দ তিল্লর ’ ৱাফমগীদমক্তা সেক্যুরিতী তেনেন্সী রাইৎ পুথোক্তুনা লেন্দ রেবিন্যুদা অহোংবা কয়া পুরক্লম্মি। পুলিস এদমিনিস্ত্রেসনগী লমদা মহাক্না মীয়াম অমসুং পুলিসকী মরক্কী থাপ্নবা হন্থহনখি অমসুং পুলিস এদমিনিস্ত্রেসনবু মীয়ামগী পুন্সি অমসুং লন-থুম ঙাক শেনবা ঙম্ননবা মীয়ামগী তঙাইফদবশিংগী মতুং ইন্না হেন্না থৌদাং য়াহনখি। ১৯৫২দা বোম্বেগী মুখ্য মন্ত্রী ওইখি।

মহাক্না মসি য়াজখি মদুদি খুঙ্গংদা লৈবা মীওইশিংনা মহৌশাগী ওইবা পুন্সি মহিংদা হিংদ্রিফাওবদি সোসিএলিজম হায়বসিগী ৱাহন্থোক করিমত্তা লৈতে। শ্রী দেসাইনা লৌমীশিং অমসুং শেল তোনবশিংগী অরুবশিং অদু কোকহন্নবগী লম্বীদা প্রোগেসিব লেজিসলেসন শেমদুনা মহাক্কী ৱাখল্লোন অসিবু থবক্তা ওন্থোক্নবা অকনবা থৌরাং পাইখৎখি। মসিদা শ্রী দেসাইগী সরকারনা লৈবাক অসিগী অতৈ রাজ্যশিংদগী হেন্না মাংজিল থাখি। মসিদা নত্তনা মহাক্না অহোংবা লৈতনা অমসুং থমোইশেংনা লেজিসলেসন অদু থবক্তা ওন্থোকখি। বোম্বেদা মহাক্কী অসিগুম্বা লৈঙাক অসিবু পুম্নমক্না হায়নীংঙাই লৈতনা থাগৎনখি।

রাজ্যশিংবু অমুক হন্না শেমগৎলবা মতুংদা শ্রী দেসাইনা ১৯৫৬কী নবেম্বর ১৪দা কমর্স অমসুং ইন্দস্ত্রী মন্ত্রী ওইনা কেন্দ্রগী মন্ত্রী মন্দলদা য়াওখি। মতুংদা মহাক্না ১৯৫৮গী মার্চ ২২দগী শেল থুমগী ফম পাইখি।

শ্রী দেসাইনা শেল থুমগী থৌরাং অমসুং ফিস্কেল এদমিনিস্ত্রেসনগা মরি লৈনবা হিরমশিংদা মহাক্কী ৱাখল্লোনশিং অদুবু থবক্তা ওন্থোকখি। ঙাকশেল অমসুং চাওখৎ থৌরাংগী মরি লৈনবা তঙাইফদবশিংবু মপুং ফাহন্নবা মহাক্না রেবিন্যু হেনগৎহনখি, কান্নদবা চাদিং হন্থহনখি অমসুং লৈঙাকপদা চংগদবা সরকারগী চাদিং ওস্তেরিতী অদু হেনগৎহনখি। মহাক্না ফাইনান্সিয়েল দিসিপ্লিন অদুবু চৎনহন্দুনা শেল থুমগী অমাংবা অদু শাথিনা হন্থহনখি। মহাক্না খুন্নাইগী অৱাংবা থাক্কী মীওইশিংনা তৌনবা অরেম্বা চাদিংশিংদা অথিংবা থমদুনা মদুবু লাকশিন্নবা হোৎনখি।

১৯৬৩দা মহাক্না কামরাজ প্লানগী মখাদা কেন্দ্রগী মন্ত্রী মন্দলদগী তোকখি। পন্দিৎ নেহরুগী মতুংদা শ্রী লাল বহাদুর শাস্ত্রীনা এদমিনিস্ত্রেতিব সিস্তেম অমুক হন্না শেমগৎনবা মহাকপু এদমিনিস্ত্রেতিব রিফোর্মস কমিসনগী চিয়র্মেন ওইননবা থেমখি। মীয়ামগী পুন্সিগা মরি লৈনবা মহাক্কী শাংলবা অমসুং মশিং থিঙমদ্রবা এক্সপরিয়েন্সশিং শিজিন্নদুনা মহাক্না থৌদাং অসিবু নীংথিজনা পাংথোকখি।

১৯৬৭তা শ্রী দেসাই শ্রীমতি ইন্দিরা গান্ধীগী মন্ত্রী মন্দলদা উপ-প্রধান মন্ত্রী অমসুং শেল থুম মন্ত্রালয়গী ইন চার্জ ওইনা শরুক য়াখি। ১৯৬৯গী জুলাই দা শ্রীমতি গান্ধীনা মঙোন্দগী শেল থুমগী ইনচার্জ অদু লৌথোকখি। শ্রী দেসাইনা ৱাফম অসি য়াখি মদুদি প্রধান মন্ত্রীগী মফমদা মহাক্কী খোংলোইশিংগী বিভাগশিং শিন্দোক শিঞ্জিন তৌবগী থৌইদোক হেন্দোকপা হক লৈ অদুবু মহাক্কী ইকাই খুম্নবদা ৱাফম অসিনা শোকহনখি মদুদি শ্রীমতী গান্ধীনা ৱাফম অসিগী মতাংদা মহাক্কা তান্নরম্বা ফাওবা তৌখিদে। মরম অসিনা মহাক্না খনখি মদুদি মহাক্না ভারতকী উপ-প্রধান মন্ত্রীগী ফম থাদোকপা নত্তনা অতৈ অতোপ্পা পাম্বৈ অমত্তা লৈতে।

১৯৬৯দা কোংগ্রেস পার্তী মচেৎ তারবা মতুংদা শ্রী দেসাই কোংগ্রেস ওর্গনাইজেসন্দা অদুম্মক লৈহৌখি। মহাক্না মতুংদসু পার্তীদা অচৌবা থৌদাং য়াখি। মহাক ১৯৭১দা এম পি ওইনা অমুক হন্না খনখি। ১৯৭৫দা গুজরাৎ বিধান সভা মুথৎলবা মতুংদা মফম অদুদা মীখল তৌননবগীদমক অরেপ্পা লৈতবা চারা হেনবগী খোংজং অমা চংশিনখি। চারা হেনবদুনা মরম ওইদুনা ১৯৭৫দা মফম অদুদা মীখল পাংথোকখি। ওপোজিসনগী পার্তী ৪ অমসুং ইন্দিপেন্দেন্ত মীহুৎশিংনা শৌগৎতুনা শেম্বা জনতা দলনা বিধান সভাদা মপুং ফাবা মেজোরিতী ফংখি। এলাহাবাদ হাই কোর্তনা শ্রীমতী গান্ধীগী লোক সভা মীখল অদুবু চৎনবা য়ারোই হায়না লাউথোকখ্রবা মতুংদা শ্রী দেসাইনা ফাওরম্মি মদুদি দেমোক্রেতিক্কী প্রিন্সিপলশিং অদুবু ঙাক্লদুনা শ্রীমতী গান্দীনা ফম থাদোকপা মথৌ তাই।

ইমর্জেন্সী লাওথোকপা মতম ১৯৭৫গী জুন ২৬তা শ্রী দেসাই ফাজিন্দুনা থম্লম্মি। মহাকপু মথন্তা কা অমদা থম্লম্মি অমসুং লোকসভা মীখল তৌহন্নবা ৱারেপ লাওথোক্ত্রিঙৈ মতম খরগী মমাংদা ১৯৭৭কী জনুৱারী ১৮দা মহাক থাদোকখি। মহাক্না লৈবাক শিনবা থুংনা য়ামনা কন্না খোংজং চংশিনখি অমসুং ৬ শুবা লোক সভাগীদমক্তা মার্চ ১৯৭৭তা শিনখিবা মীখলদা জনতা পার্তীনা অঙকপা ফংনা মাই পাকখিবদা মহাক্কী মরুওইবা থৌদাং য়াওখি। শ্রী দেসাই গুজরাৎকী সুরত কন্সতিত্যুএন্সীদগী এম পি ওইনা খনখি। মতুংদা মহাকপু অমত্তা ওইনা পার্লিয়ামেন্তা জনতা পার্তীগী লুচীংবা ওইনা খনখি অমসুং ১৯৭৭কী মার্চ ২৪দা ভারতকী প্রধান মন্ত্রী ওইনা ৱাশক লৌখি।

শ্রী দেসাই ১৯১১দা গুজরাবেনগা লুহোংখি। মখোয়গী মচা মঙাগী মনুংদা মচানুপা অমা অমসুং নুপী অমা হৌজিক হিংলি।

প্রধান মন্ত্রী অমা ওইনা শ্রী দেসাইনা ভারতকী মীয়াম্বু অকিবা লৈহন্দনা লৈবাক অসিগী মীওই অমত্তনা, মদু খ্বাইদগী ৱাংবা ফম পাইজরবসু, লান্না তৌরক্লবদি মীওই অমা হেক্তনা মহাক্কী অশোইবা অদু তাকপীবা ঙম্বা ওইহনবা পামখি। মহাক্না হন্না হন্না মসি হায়খি, “কনা অমত্তনা, প্রধান মন্ত্রীমক্নসু লৈবাক অসিগী আইনগী মথক্তা লৈবা খক য়ারোই।”

মহাক্কীদমক্তদি অচুম্বা অসি পাম্বৈ অমা নত্তে, থাজবগী শরুক অমনি। মহাক্না করিগুম্বদা মহাক্কী ফিদম অদুবু ফিভমগী মখা পোলহল্লমদে। অরুবা ফিভমদসু মহাক্না কমিৎমেন্তকা লোইননা মাংদা অসুম্মক চখৎখি। মহাক মশামক মসিবু থাজজখি – ‘ পুম্নমক্না অচুম্বা অমসুং থাজবগী মখা পোন্না পুন্সিদা থৌদাং পাংথোক্কদবনি।’.